រដ្ឋបាលស្រុកល្វាឯម ដោយមានការសម្របសម្រួលពីការិយាល័យអប់រំ យុវជន និងកីឡា បានអញ្ជើញអតីតអ្នកសារព័ត៌មាន ២រូប ចែករំលែកបទពិសោធន៍ និងព័ត៌មានទូទៅ ពាក់ព័ន្ធនឹងការសិក្សា ដល់សិស្សថ្នាក់ទី១១ និងថ្នាក់ទី១២ ជិត ១០០០នាក់។ អតីតអ្នកសារព័ត៌មាន ២ រូបនោះ គឺបណ្ឌិត ទូច សុខៈ អ្នកនាំពាក្យរងក្រសួងមហាផ្ទៃ  និងលោក រ៉េន រតនៈ អ្នកនាំពាក្យឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចែករំលែកបទពិសោធន៍ និងព័ត៌មានទូទៅពាក់ព័ន្ធនឹងការសិក្សា ជាពិសេសអន្តរកាល នៃការឆ្លងកាត់ជីវិតពីសិស្សទៅជានិស្សិត និងពីនិស្សិតទៅជាអ្នកបម្រើការងារតាមស្ថានប័នរដ្ឋ និងឯកជន។ ប្រព្រឹត្តទៅនៅក្រោមម្លប់ឈើត្រជាក់ល្ហឹម នៃវិទ្យាល័យ ហ៊ុន សែន ទឹកឃ្លាំង កាលពីថ្ងៃទី៩ ខែកញ្ញា ឆ្នាំ២០២៤ ម្សិលម៉ិញនេះ  គាំទ្រយ៉ាងពេញទំហឹងពីបណ្ឌិត កន សុខកាយ អភិបាល នៃគណៈអភិបាលស្រុកល្វាឯម ។  លោក រ៉េន រតនៈ ដែលក៏ជាអតីតអ្នករាយការណ៍ព័ត៌មានជាន់ខ្ពស់ និងជាពិធីករព័ត៌មាន នៃស្ថានីយ៍ទូរទស្សន៍ PNN ផង បានថ្លែងថា នេះជាលើកទី៣ហើយដែលលោកបានចូលរួមសម្របសម្រួលរៀបចំវគ្គចែករំលែកបទពិសោធន៍ និងព័ត៌មានសំខាន់ៗដល់សិស្សានុសិស្សក្នុងស្រុកល្វាឯម ដែលជាស្រុកកំណើតរបស់លោក គឺបន្ទាប់ពីបានសង្កេតឃើញបទពិសោធន៍ជោគជ័យប្រកបដោយគុណភាព ដែលឯកឧត្តមអភិសន្តិបណ្ឌិត ស សុខា បានរៀបចំវគ្គនេះនៅតាមបណ្ដាវិទ្យាល័យទូទាំងខេត្តព្រៃវែង ធ្វើឱ្យសិស្សានុស្សិស ជាពិសេសថ្នាក់ទី១២ ទទួលបានព័ត៌មានច្រើនពាក់ព័ន្ធជម្រើសសិក្សា និងការងារ រួមទាំងបទពិសោធន៍ផ្សេងៗ ក្រោយពីពួកគេបញ្ចប់ការសិក្សាថ្នាក់ទី១២ ហើយបានរំឭកថា រូបលោក និងសិស្សជំនាន់មុនៗ បានបញ្ចប់ការសិក្សាថ្នាក់ទី១២ ដោយភាពមិនច្បាស់លាស់ ពគឺមិនច្បាស់ថាគួររៀនជំនាញអ្វី ចង់ធ្វើអ្វី  ត្រូវរៀបចំជីវិតសិក្សា និងការងារដោយរបៀបណាជាដើម។ លោកបណ្ឌិត កន សុខកាយ អភិបាល នៃគណៈអភិបាលស្រុកល្វាឯម បានថ្លែងអំណរគុណលោកបណ្ឌិត ទូច សុខៈ និងលោក រ៉េន រតនៈ ដែលបើទោះបីជាមមាញឹកក្នុងការងារ ក៏លោកទាំងពីរតែងតែឆ្លៀតចូលរួមជាវាគ្មិន ដើម្បីរួមចំណែកពង្រឹងគុណភាពធនធានមនុស្សក្នុងស្រុកល្វាឯម ហើយថាការចែករំលែកនេះ ជាអំណោយផ្នែកពុទ្ធិដ៏ពិសេសថ្មីមួយទៀតសម្រាប់សិស្សានុសិស្សស្រុកល្វាឯម បន្ថែមលើការបង្ហាត់បង្រៀនរបស់លោកគ្រូ អ្នកគ្រូ និងការបើកវគ្គបំប៉នត្រៀមប្រឡងបាក់ឌុបដោយឥតគិតថ្លៃផ្ដល់ជូនដោយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។ នាឱកាសនោះ លោក បណ្ឌិត ទូច សុខៈ និងលោក រ៉េន រតនៈ ក៏បានផ្ដល់អំណោយសៀវភៅ រៀនពី ហ៊ុន សែន ដើម្បីជោគជ័យ  និងសៀវភៅ ទស្សនៈសម្ដេចក្រឡាហោម ស ខេង ឆ្នាំ២០២១ ជាង ១១០០ក្បាល ជូនសាលាស្រុកល្វាឯម វិទ្យាល័យ ហ៊ុន សែន ទឹកឃ្លាំង និងវិទ្យាល័យ ហ៊ុន សែន ល្វាសរ ព្រមទាំងចែកជូនសិស្សានុសិស្សដែលបានចូលរួមផងដែរ៕    អត្ថបទ៖ ខឿន សាឃាង  រូបភាព៖ សែត ប៊ុនថាន់   

 នៅថ្ងៃនេះ ជនមានពិការភាព ១០០នាក់ នៃសមាគមតន្ត្រីសំនៀងជនពិការ ទទួលបានជំនួយពីសប្បុរសជន មានជាគ្រឿងឧបភោគ បរិភោគ និងថវិកា។ ប្រធានសមាគម បានលើកឡើងថា ជំនួយទាំងនេះ ពិតជារួមចំណែកឱ្យជនមានពិការភាព ចាប់យកជំនាញ សម្រាប់ជីវិត។ ជំនួយសប្បុរសជននានា ពិតជាបានរួមចំណែកកាត់បន្ថយបន្ទុកមួយផ្នែករបស់ សមាគមតន្ត្រីសំនៀងជនពិការ និងបានចូលរួមចំណែកជួយឱ្យមានពិការភាពដែលកំពុងស្នាក់នៅសិក្សានៅទីនេះ ចាប់យកនូវចំណេះ និងជំនាញ សម្រាប់ជីវិតរបស់ពួកគាត់ ។  នេះគឺជាការលើកឡើងរបស់ឯកឧត្តម ចាប តូ អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានសមាគមតន្ត្រីសំនៀងជនពិការ នាឱកាសទទួលអំណោយសប្បុរសធម៌ពី ដា ហ៊ួ ហេង នាព្រឹកថ្ងៃទី១០ ខែកញ្ញា ឆ្នាំ២០២៤ នេះ ។ ឯកឧត្តម ចាប តូ ដែលក៏ជាជនមានពិការភាពភ្នែកទាំង ២ ផង បានឱ្យដឹងថា សមាគមតន្ត្រីសំនៀងជនពិការ បង្កើតឡើងកាលពីឆ្នាំ២០១២ បច្ចុប្បន្នមានសមាជិកជាង ៧០០ នាក់ នៅទូទាំង ២៥ រាជធានី ខេត្ត  ហើយសមាគមមានបើកបង្រៀនជំនាញវិជ្ជាជីវៈមួយចំនួនដល់ជនមានពកការភាពដូចជាអក្សរស្ទាប ម៉ាស្សា ពិធីករ ពិធីការិនី ចម្រៀង តន្ត្រី និងកុំព្យូទ័រជាដើម ហើយថា អំឡុងពេលរៀនវគ្គជំនាញទាំងអស់នេះ ជនមានពិការភាពស្នាក់នៅក្នុងសមាគម ដែលទាំងនេះជាបន្ទុកដ៏ធំមួយ ។ ម្យ៉ាងទៀត ឯកឧត្តម ចាប តូ បានឱ្យដឹងថា សមាគមតន្ត្រីសំនៀងជនពិការ មិនមានទទួលជំនួយពីបរទេសទេ ។ ចំពោះអគារ ជាអំណោយរបស់សម្ដេច យាយ និងសម្ដេចកិត្តិព្រឹទ្ធបណ្ឌិត ចំណែកថ្លៃទឹក និងភ្លើង ទទួលបានជួយពីប្រមុខដឹកនាំរាជរដ្ឋាភិបាល ចំណែកម្ហូបអាហារ ពឹងលើជំនួយសប្បុរសជនជាសំខាន់៕    អត្ថបទ៖ ខឿន សាឃាង  រូបភាព៖ សែត ប៊ុនថាន់  

សហគមន៍បន្លែសុវត្ថិភាព និងសរីរាង្គ «ទួលត្រពាំងស្រស់បំព្រង» ត្រូវបានបង្កើតឡើងជាង ៤ឆ្នាំមកហើយ នៅក្នុងភូមិត្រពាំងប្រស្រែលិច ឃុំគោកគង់លិច ស្រុកកញ្ជ្រៀច ខេត្តព្រៃវែង។    ប្រធានសហគមន៍បន្លែ «ទួលត្រពាំងស្រស់បំព្រង» លោក អៀត អ៊ាត បានអំពាវនាវឱ្យពលរដ្ឋ និងក្រុមហ៊ុនឯកជន បន្តជួយគាំទ្របន្លែសុវត្ថិភាព និងសរីរាង្គក្នុងស្រុក។ កន្លងទៅ សហគមន៍មានសមត្ថភាពផ្គត់ផ្គង់បន្លែពី ១២តោន ទៅ ១៥តោន ក្នុង ១ថ្ងៃ។    ប៉ុន្តែពេលនេះ សហគមន៍ បានបន្តបន្ថយសមត្ថភាពផលិត មកនៅត្រឹម ៣ ទៅ ៤តោន ក្នុង ១ថ្ងៃតែប៉ុណ្ណោះ។ មូលហេតុ ត្រូវបានលោក អៀត អ៊ាត លើកឡើងថា ដោយសារខ្វះទីផ្សារ និងប្រជាកសិករដូរមុខរបរ ទៅធ្វើអ្វីផ្សេង។..   អត្ថបទ៖ តុល សុភ័ណ រូបភាព៖ ឆិល សុភ័ស្ត  

 ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានសង្កេតឃើញថា វិស័យអប់រំនៅកម្ពុជា មានរីកចម្រើនពី ១ឆ្នាំ ទៅ ១ឆ្នាំ ដែលបង្កើតធនធានមនុស្សយ៉ាងច្រើន សម្រាប់អភិវឌ្ឍន៍កម្ពុជា ហើយបើប្រៀបធៀបកាលពី ២០ឆ្នាំមុន វិស័យអប់រំ មានការវិវត្តន៍ទៅមុខគួរឱ្យកត់សម្គាល់។ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានមានប្រសាសន៍នៅក្នុងពិធីបើកដំណើរការឱ្យប្រើប្រាស់អគារ ជួសជុល កែលម្អ និងអាហារសាមគ្គីជូនលោកគ្រូអ្នកគ្រូ និងសិស្សានុសិស្សនៅសាលាបឋមសិក្សាត្នោតស្ថិតនៅក្នុងខេត្តព្រៃវែងឱ្យដឹងថា វិស័យអប់រំ ជាវិស័យដំបងនិងជាគ្រឹះដ៏សំខាន់មួយក្នុងយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជាដែលបានរួមចំណែកពង្រឹងសេដ្ឋកិច្ចនៅកម្ពុជា ហើយបើវិស័យអប់រំយើងទន់ខ្សោយ និងមិនមានការវិវត្តន៍ទៅមុខពីមួយឆ្នាំទៅ១ឆ្នាំ នោះកម្ពុជា មិនអាចមានការរីកចម្រើនដូចសព្វថ្ងៃឡើយ។ លើសពីនេះ ឯកឧត្តមអភិសន្តិបណ្ឌិត ស សុខា បញ្ជាក់បន្ថែមទៀតថា យើងត្រូវមើលឱ្យបានស៊ីជម្រៅថាវិស័យអប់រំយើងមានការរីកចម្រើនដល់កម្រិតណា ដោយមិនគួរបន្ទោសបង្អាក់បែបអវិជ្ជមានដោយប្រៀបធៀបវិស័យអប់រំកម្ពុជាជាមួយបណ្តាប្រទេសផ្សេងៗ ជាក់ស្តែង បើយើងប្រៀបធៀបជាមួយបណ្តាប្រទេសផ្សេងៗ យើងពិតជានៅក្រោយគេបន្តិចមែន ប៉ុន្តែយើងគួរពិនិត្យមើល និងប្រៀបធៀបកាលពី២០ឆ្នាំមុន និងពី១ឆ្នាំទៅ១ឆ្នាំ វិស័យអប់រំកម្ពុជា មានការរីកចម្រើនដល់កម្រិតណា។ ឯកឧត្តមអភិសន្តិបណ្ឌិត ស សុខា បានបន្ថែមទៀតថា យើងត្រូវបន្តដុសខាត់ខ្លួនឯងបន្ថែមពី១ឆ្នាំទៅ១ឆ្នាំ និងបន្តជំរុញឱ្យយុវជនមានឱកាសការងារ និងចំណេះចេះដឹងពោរពេញទៅដោយសមត្ថភាព សីលធម៌ ព្រមទាំងគុណធម៌នៅក្នុងជីវិតរស់នៅប្រចាំថ្ងៃ ដោយសារតែកម្ពុជា ធ្លាប់ឆ្លងកាត់សង្រ្គាម និងការបែកបាក់គ្នាឆ្អែតឆ្អន់ហើយ។ នៅក្នុងឱកាសផ្តល់អាហារសាមគ្គីជូនលោកគ្រូអ្នកគ្រូ និងសិស្សានុសិស្សនៅសាលាបឋមសិក្សាត្នោត លោកជំទាវ ញ៉ែម សាខន ភរិយាសម្តេចក្រឡាហោម ស ខេង ឯកឧត្តមអភិសន្តិបណ្ឌិត ស សុខា និងលោកជំទាវ កែ សួនសុភី ព្រមទាំងឯកឧត្តម នាយឧត្តមសេនីយ៍ ស ថេត ក៏បានចូលរោងបាយដោយផ្ទាល់ ដើម្បីចំអិនម្ហូបអាហារជាង១០មុខសម្រាប់សិស្សានុសិស្សនៅឯទីជនបទ ក្នុងគោលបំណងផ្តល់ក្តីស្រឡាញ់ដល់កុមារតូចៗ៕    អត្ថបទ៖ តុល សុភ័ណ រូបភាព៖ ឆិល សុភ័ស្ត  

 ក្រសួងកសិកម្ម តែងតែជំរុញ និងលើកទឹកចិត្តឱ្យកសិករ ប្រើពូជស្រូវជាតិ ពីព្រោះលក់បានថ្លៃ និងឆាប់បានផល ធ្វើឱ្យកសិករកាត់បន្ថយបានជាអតិបរមានូវហានិភ័យ។ ការប្រើនូវពូជស្រូវជាតិ ដូចជា ពូជស្រូវសែនក្រអូប និងពូជស្រូវផ្ការំដួល ជាដើម ក៏ថែមទាំងលើកកិត្តិយមុខមាត់ពូជស្រូវជាតិ ដែលឈ្នះពានមាស ៥លើកផងដែរ។ ក្រសួងកសិកម្ម តែងតែបានពន្យល់លើកទឹកចិត្ត និងជំរុញឱ្យកសិករដាំស្រូវ ដែលជាពូជជាតិដោយសារកត្តាសំខាន់ៗមួយចំនួន ដូចជា បានផលចំណេញច្រើនដល់កសិករ ខណៈការដាំស្រូវពូជនាំចូលពីបរទេសនាំមកនូវហានិភ័យខ្ពស់ដល់កសិករ ជាដើម។ នេះគឺជាការលើកឡើងរបស់កញ្ញាជំទាវ អ៊ឹម រចនា មន្ត្រីនាំពាក្យក្រសួងកសិកម្ម រុក្ខាប្រមាញ់ និងនេសាទ ។ សូមជម្រាបថា ស្ថាប័នជំនាញដែលស្ថិតក្រោមឱវាទរបស់ក្រសួងកសិកម្ម បានជោគជ័យជាបន្តបន្ទាប់ក្នុងការបង្កាត់ពូជស្រូវល្អៗជាច្រើនដែលក្នុងនោះពូជស្រូវសែនក្រអូន០១ គឺជាពូជស្រូវកំពុងឈានមុខគេទាំងក្នុងប្រទេស និងនៅលើឆាកអន្តរជាតិ ។  ពូជស្រូវសែនក្រអូប០១ គឺជាពូជបង្កាត់ចេញពីស្រូវផ្ការំដួល ធ្វើឱ្យអង្ករ នៃស្រូវសែនក្រអូប០១ មានក្លិនក្រអូប មានទម្រង់អង្ករស្រលោនល្អ បាយទន់ មានរសជាតិឆ្ងាញ់ ជាពូជស្រូវស្រាល ដាំដុះបានផលក្នុងរយៈពេលខ្លី ផ្ដល់លទ្ធភាពឱ្យកសិករអាចធ្វើបានច្រើនដងក្នុងមួយឆ្នាំ ។ សំខាន់បំផុត ពូជស្រូវសែនក្រអូប០១ មានការចរចាធានាតម្លៃខ្ពស់ដោយរោងម៉ាស៊ីន និងសហព័ន្ធស្រូវអង្ករកម្ពុជា ។ ហេតុនេះកញ្ញជំទាវ អ៊ឹម រចនា ពន្យល់ថា ពូជស្រូវសែនក្រអូប០១ មានទីផ្សារស្រាប់ទាំងក្នុងប្រទេស ទាំងនៅប្រទេសចិន និងអឺរ៉ុប ហើយការដាំពូជស្រូវសែនក្រអូប០១ គឺជាការលើកតម្កើងកិត្តិយសមុខមាត់ កិត្តិនាមពូជស្រូវជាតិ ខណៈផ្ការំដួលជាពូជស្រូវដែលបានឈ្នះពានមាសជាអង្ករឆ្ងាញ់ដាច់គេនៅលើពិភពលោករហូតទៅដល់ ៥ ដងជាប់ៗគ្នា ៕  អត្ថបទ៖ ខឿន សាឃាង រូបភាព៖ ឯកសារ  

ក្រុមអ្នកដើរព្រៃកម្ពុជា រៀបចំព្រឹត្តិការណ៍កីឡារត់ឡើងភ្នំ កាលពីថ្ងៃទី៧ និងថ្ងៃទី៨ ខែកញ្ញាកន្លងទៅនេះ នៅទឹកធ្លាក់ស្រែអំពិល ដែលស្ថិតនៅក្នុងស្រុកទឹកផុស ខេត្តកំពង់ឆ្នាំង។ ព្រឹត្តិការណ៍នេះ មានអ្នកចូលរួមជាង ១០០នាក់ និងមានអ្នកចូលរួមប្រកូតកីឡារត់ឡើងភ្នំជាង ៨០នាក់ផងដែរ។ ក្រុមអ្នកដើរព្រៃកម្ពុជា CAT បានរៀបចំព្រឹត្តិការណ៍កីឡាដើម្បីទេសចរណ៍ នៅក្នុងតំបន់ការពារធម្មជាតិទឹកធ្លាក់ស្រែអំពិល ស្ថិតនៅភូមក្តុល ឃុំក្ដុលសែនជ័យ ស្រុកទឹកផុស ខេត្តកំពង់ឆ្នាំង កាលពីថ្ងៃទី៧-៨ ខែកញ្ញា។  ព្រឹត្តិការណ៍នេះ មានអ្នកចូលរួមជាង ១០០នាក់ ដែលសុទ្ធសឹងតែជាយុវជន និងអ្នកចូលចិត្តដើរព្រៃបោះតង់ជាដើម។ ក្នុងចំណោមអ្នកចូលរួមជាង ១០០នាក់នេះ ក៏មានអ្នកចូលរួមជាង ៨០នាក់ផងដែរ ដែលបានចូលរួមប្រកួតកីឡារត់ឡើងភ្នំ ដែលរៀបចំដោយក្រុមអ្នកដើរព្រៃកម្ពុជា ឬហៅកាត់ថា CAT។ ការប្រកួតកីឡាឡើងភ្នំនេះ ត្រូវបានរៀបចំឡើងដោយ អ្នកចូលរួមត្រូវស្ពាយឥវ៉ាន់ដែលមានទំងន់ ១០គីឡូ សម្រាប់បុរស និង ៥គីឡូក្រាមសម្រាប់នារី រត់ឡើងភ្នំដែលមានចម្ងាយ ៧គីឡូម៉ែត្រ។   លោក យ៊ា បេនយ៉ាមីន ប្រធានក្រុមអ្នកដើរព្រៃកម្ពុជា បានលើកឡើងថា ព្រឹត្តិការណ៍កីឡាដើម្បីទេសចរណ៍នេះ ត្រូវបានរៀបចំឡើងដើម្បីផ្សព្វផ្សាយពីសក្តានុពលទេសចរណ៍របស់ខេត្តកំពង់ឆ្នាំង ជាពិសេសកន្លែងទេសចរណ៍ក្នុងតំបន់ការពារធម្មជាតិទឹកធ្លាក់ស្រែអំពិល ព្រមទាំងរំលេចពីប្រភេទកីឡារត់ឡើងភ្នំឱ្យគេបានស្គាល់កាន់តែច្រើនផងដែរ។  ជាមួយគ្នានេះ លោក រឿន រដ្ឋា ជាម្ចាស់ជ័យលាភីលេខ១ផ្នែកបុរស បានឱ្យដឹងថា ខ្លួនធ្វើដំណើរពីខេត្តមណ្ឌលគិរី ដើម្បីមកចូលរួមប្រកួតកីឡារត់ឡើងភ្នំនេះ។ ការប្រកួតនេះ គឺជាលើកទី១របស់លោករដ្ឋា  ប៉ុន្តែលោកអាចធ្វើបានជាម្ចាស់ជ័យលាភីលេខ១ ក្នុងការប្រកួតដែលចំណាយពេលត្រឹមតែជាង ៣០នាទីប៉ុណ្ណោះ។  ចំណែកកញ្ញា ថាច់ ធីឌឿក ជាម្ចាស់ជ័យលាភីលេខ១ ផ្នែកនារី និងបច្ចុប្បន្នជាកីឡាការិនីជម្រើសជាតិតៃខ្វាន់ដូមួយរូប ក៏បានលើកទឹកចិត្តអ្នកដែលចូលចិត្តប្រភេទកីឡារត់ទាំងអស់ ឱ្យចូលរួមក្នុងព្រឹត្តិការណ៍កីឡានេះ ដើម្បីលើកស្ទួយប្រភេទកីឡារត់ឡើងភ្នំឱ្យបានកាន់តែប្រសើរ។  សូមបញ្ជាក់ដែរថា ព្រឹត្តិការណ៍កីឡា ដើម្បីទេសចរណ៍ ដែលរៀបចំឡើងដោយក្រុមអ្នកដើរព្រៃនេះ  មានការសហការជាមួយក្រសួងបរិស្ថាន ក្រសួងទេសចរណ៍ និងក្រសួង ស្ថាប័នពាក់ពាក់ព័ន្ធ រដ្ឋបាលខេត្តកំពង់ឆ្នាំង អាជ្ញាធរមូលដ្ឋាន និងមានការចូលរួមពីកីឡាករ កីឡាការិនី រួមជាមួយ អ្នកទេសចរណ៍ ក្នុងស្រុក និងក្រៅស្រុកជាច្រើនរូប។  កម្មវិធីនេះក៏មានការជួបជុំចែករំលែកបទពិសោធន៍ ភ្លើងគប់ បោះតង់ មើលទេសភាពធម្មជាតិ សត្វព្រៃ និងការរត់ប្រណាំងឡើងភ្នំជាដើម។ ក្រៅពីការលើកកម្ពស់កីឡា និងទេសចរណ៍ ព្រឹត្តិការណ៍នេះ ក៏មានគោលបំណងដើម្បីលើកកម្ពស់សុខភាព និង បង្កើតឱកាស រួមចំណែក ដល់ប្រព័ន្ធអេកូឡូស៊ីនៃតំបន់ការពារធម្មជាតិ ថែមទាំងជួយផ្សព្វផ្សាយពីការការពារបរិស្ថាន ជួយថែរក្សា ការពារព្រៃឈើ និងការដាំដើមឈើផងដែរ៕     អត្ថបទ៖ អ៊ីសា ហាសាណះ  រូបភាព៖ ហ៊ុន សុជាតា  

 ប្រជាកសិករមួយចំនួន នៅស្រុកខ្សាច់កណ្តាល ខេត្តកណ្តាល បានបង្ហាញការពេញចិត្តនឹងតម្លៃស្រូវ នៅពេលនេះ ដែលលក់បានចន្លោះពីជាង ១០០០រៀល ដល់ ១២០០រៀល ក្នុង ១គីឡូក្រាម។ ប៉ុន្តែពួកគាត់ បានសំណូមពរឱ្យតម្លៃជី ប្រេង និងថ្នាំ ចុះថ្លៃជាងពេលនេះ។       អត្ថបទ៖ តុល សុភ័ណ    រូបភាព៖ ឆិល សុភ័ស្ត  

យុវជន វ៉ាន់ដា បានប្រកបរបរលក់នំពុម្ពតាមរទេះ នៅម្តុំវិទ្យាល័យបាក់ទូក ក្នុងរាជធានីភ្នំពេញ។ ក្នុង ១ថ្ងៃ យុវជន វ៉ាន់ដា លក់នំពុម្ព បានជាង ១ពាន់នំ ក្នុងមួយថ្ងៃ ដែលអាចរកចំណូលបានប្រមាណ ៣០ ទៅ ៤០ម៉ឺនរៀល ក្នុងមួយថ្ងៃ។  លោក វ៉ាន់ដា មានទីកំណើតនៅក្នុងខេត្តកំពង់ចាម បានមកចាប់របរលក់នំពុម្ព នៅរាជធានីភ្នំពេញ និងកំពុងទទួលបានការគាំទ្រខ្លាំង។ បច្ចុប្បន្ននំរបស់លោក មានការពេញនិយមពីសំណាក់ពលរដ្ឋគ្រប់វ័យ ដែលស្ទើរតែចាក់ពុំទាន់។  ផ្តើមលក់ពីម៉ោង ៧ព្រឹក ដល់ម៉ោង ៤ល្ងាច លោក វ៉ាន់ដា អាចលក់នំបានប្រមាណជាង ១ពាន់នំក្នុងមួយថ្ងៃ ឬប្រមាណ ៣០គីឡូម្សៅ។ នំរបស់លោកលក់នៅក្បែររបងវិទ្យាល័យបាក់ទូក ដែលក្នុងនំមួយលោកអាចលក់បានតម្លៃ ១ពាន់រៀល ហើយក្នុងមួយថ្ងៃលោកថា អាចរកបានប្រាក់ចំណេញប្រមាណ ៣០ទៅ៤០ម៉ឺនរៀល។  ចាប់ផ្តើមប្រកបរបរលក់នំពុម្ពនេះប្រមាណ ៧ឆ្នាំ លោក វ៉ាន់ដា ព្យាយាមបន្ថែមរសជាតិនំរបស់ខ្លួនឱ្យកាន់តែមានឱជារសកាន់តែឈ្ងុយឆ្ងាញ់ ដើម្បីធ្វើយ៉ាងណាអាចលក់បានបរិមាណកាន់តែច្រើនថែមទៀត។  ផ្តើមលក់ដំបូង លោក វ៉ាន់ដា ប្រើពុម្ពចំនួន ៤ និងលក់តែម្នាក់ឯងប៉ុណ្ណោះ ប៉ុន្តែក្រោយពីផ្លាស់ប្តូរទីតាំងលក់ និងមានសំទុះនៃការគាំទ្រច្រើន លោកបានបន្ថែមពុម្ពរហូតដល់ ៦ និងចាប់ផ្តើមបង្កើនបរិមាណនៃការលក់ផងដែរ ដើម្បីធ្វើយ៉ាងណាឱ្យទាន់តាមតម្រូវការរបស់អ្នកទិញ។  បើទោះបីជាចាប់របរនេះរយៈពេល ៧ឆ្នាំហើយក្តី ប៉ុន្តែនំរបស់លោក ទើបតែមានអ្នកស្គាល់ច្រើនរយៈពេលមួយឆ្នាំចុងក្រោយនេះប៉ុណ្ណោះ ហើយការដែលមានអ្នកគាំទ្រច្រើនបែបនេះ ក៏អាចធ្វើឱ្យលោករកចំណូលបានច្រើន និងមានទឹកចិត្តក្នុងការពង្រីករបរមួយនេះបន្ថែមទៀត។ ទន្ទឹមនឹងសំទុះនៃការគាំទ្រនំរបស់លោកច្រើនបែបនេះ លោកក៏សម្តែងភាពរីករាយ និងផ្តាំផ្ញើរឱ្យប្រជាពលរដ្ឋចូលរួមគាំទ្រនំខ្មែរឱ្យបានច្រើន ជៀសវាងបាត់បង់ទៅថ្ងៃខាងមុខ៕    អត្ថបទ៖ អ៊ីសា ហាសាណះ  រូបភាព៖ ហ៊ុន សុជាតា   

 ព្រះគ្រូគម្ពីរ៍លិខិតវិជ្ជា ប៉ា សុធារ៉ា ព្រះលេខាធិការអនុគណខណ្ឌជ្រោយចង្វារ និងជាព្រះចៅអធិការវត្តសូរិយាពោធិមាស មានសង្ឃដីកាថា វត្តសូរិយាពោធិ៍មាស កំពុងរៀបចំជួសជុល និងតុបតែង ជុំវិញវត្តឱ្យបានសោភ័ណល្អ។ ក្នុងមួយឆ្នាំៗ ពុទ្ធបរិស័ទកើនឡើងជាលំដាប់ទាំងក្មេង និងចាស់។ ការកើនឡើងនេះ មានផលវិជ្ជមាន សម្រាប់វិស័យព្រះពុទ្ធសាសនា។       .  អត្ថបទ៖ តុល សុភ័ណ  រូបភាព៖ ឆិល សុភ័ស្ត  

បើទោះបីជាបច្ចុប្បន្ន ខេត្តពោធិ៍សាត់ មានប្រព័ន្ធប្រឡាយទឹកយ៉ាងច្រើនសន្ធឹកហើយក្ដី ក៏ប្រជាពលរដ្ឋ ជាពិសេសកសិករ ធ្វើស្រែ នៅតែត្រូវការបន្ថែមទៀត។ ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ ឱ្យដឹងថា ដរាបណា ប្រទេសជាតិរក្សាបាននូវសុខសន្តិភាព នោះប្រព័ន្ធស្រោចស្រពខេត្តពោធិ៍សាត់ ប្រាកដជានឹងពង្រីកឱ្យកាន់តែខ្វាត់ខ្វែងថែមទៀត។      អត្ថបទ៖ ខឿន សាឃាង  រូបភាព៖ សែត ប៊ុនថាន់  

សម្តេចរដ្ឋសភាធិការធិបតី ឃួន សុដារី ប្រធានរដ្ឋសភា និងលោកជំទាវ ចុង មីង (Zong Ming) អនុប្រធានគណៈកម្មាធិការអចិន្ត្រៃយ៍សភាតំណាងប្រជាជនចិន ក្រុងសៀងហៃ បានជួបពិភាក្សាការងារ នៅវិមានរដ្ឋសភា នៅថ្ងៃទី៣ ខែកញ្ញានេះ។     ភាគីទាំងពីរ បានឯកភាពគ្នា បន្តធ្វើកិច្ចសហការរួមគ្នា បង្កើតផលប្រយោជន៍ថ្មីៗបន្ថែម អោយប្រជាជននៃប្រទេសទាំងពីរ។ ថ្នាក់ដឹកនាំស្ថាប័នរដ្ឋសភាទំាងពីរ ក៏បានឯកភាព ធ្វើអោយកិច្ចព្រមព្រៀងច្រករបៀងឧស្សាហកម្ម និងបច្ចេកវិទ្យារវាងប្រទេសទំាងពីរកម្ពុជា-ចិន ទទួលបានលទ្ធផលផ្លែផ្កាផងដែរ។   អត្ថបទ៖ ហ៊ុន ឌីណូ  រូបភាព៖ សុខ ពិសិដ្ឋ   

 ឪពុកម្តាយ នៅតែបន្តជំរុញលើកទឹកចិត្តកូនៗ ឱ្យចូលរួមប្រឡងចូលក្របខណ្ឌគ្រូបង្រៀន រហូតដល់ជោគជ័យ។ នៅក្នុងការប្រឡងប្រជែងជ្រើសរើសគ្រូបង្រៀន ក្នុងក្របខណ្ឌក្រសួងអប់រំ គឺមានបេក្ខជនមួយចំនួន បានចូលរួមប្រឡង ចាប់តាំងពីការប្រឡងជ្រើសរើសគ្រូបង្រៀន នៅបឋមសិក្សា ការប្រឡងគ្រូមធ្យមសិក្សា ហើយនៅពេលនេះ ការប្រឡងគ្រូមត្តេយ្យសិក្សា។        អត្ថបទ៖ អ៊ីសា ហាសាណះ  រូបភាព៖ ហ៊ុន សុជាតា   

រដ្ឋមន្រ្តី ទទួលបន្ទុករដ្ឋលេខាធិការដ្ឋានកិច្ចការព្រំដែន ឯកឧត្តម ឡាំ ជា បានបកស្រាយ ពន្យល់ពលរដ្ឋខ្មែរសាជាថ្មីរឿងព្រំដែនកម្ពុជា និងវៀតណាម។ ឯកឧត្តម អះអាងថា កម្ពុជាមិនបានបាត់ទឹកដី ឬកាត់ទឹកដីខ្លួន អោយវៀតណាមនោះទេ។     ការលើកឡើងដូច្នេះ ខណៈដែលលោក សម រង្សី អតីតមេបក្សប្រឆំាងនៅបរទេស អះអាងថា កម្ពុជាបានបាត់បង់ទឹកដី ដោយសំអាងលើផែនទី Google Maps ដែលគ្មានមូលដ្ឋានច្បាស់លាស់ និងមានគំនិតទុច្ចរិត ចង់បង្កចលាចលឱ្យមានភាពវឹកវរ ដើម្បីប្រយោជន៍នយោបាយរបស់ខ្លួន និងបក្សពួកតែប៉ុណ្ណោះ។  អត្ថបទ៖ ហ៊ុន ឌីណូ  រូបភាព៖ ទ.ទ.ក    

ក្រសួងមុខងារសាធារណៈ ចាប់ផ្តើមដំណើរការកែសន្លឹកកិច្ចការរបស់បេក្ខជនប្រឡងប្រជែងជ្រើសរើសមន្ត្រី ក្នុងក្របខណ្ឌក្រសួងអភិវឌ្ឍន៍ជនបទ និងប្រឡងប្រជែងជ្រើសរើសគ្រូបង្រៀនបឋម ក្នុងក្របខណ្ឌក្រសួងអប់រំ យុវជន និងកីឡា ហើយនៅថ្ងៃទី២ ខែកញ្ញា ឆ្នាំ២០២៤នេះ នៅមណ្ឌលកំណែសាលាភូមិន្ទរដ្ឋបាល។   នៅព្រឹកថ្ងៃទី២ ខែកញ្ញា ឆ្នាំ២០២៤នេះ ក្រសួងមុខងារសាធារណៈ បានចាប់ផ្តើមដំណាក់កាលកែសន្លឹកកិច្ចការ របស់បេក្ខជនប្រឡងប្រជែងជ្រើសរើសមន្ត្រីរាជការឱ្យចូលបម្រើការងារក្នុងក្របខណ្ឌក្រសួងអភិវឌ្ឍន៍ជនបទ និងគ្រូបង្រៀនមត្តេយ្យសិក្សា ឱ្យចូលបម្រើការងារក្នុងក្របខណ្ឌក្រសួងអប់រំ យុវជន និងកីឡា ហើយដោយមានវត្តមានដ៏ខ្ពង់ខ្ពស់របស់ ឯកឧត្តមឧបនាយករដ្ឋមន្ត្រី ហ៊ុន ម៉ានី ប្រធានគណៈកម្មការរៀបចំការប្រឡងប្រជែង ដើម្បីពិនិត្យលើរបៀបរបប និងនីតិវិធី កែសន្លឹកកិច្ចការប្រឡងប្រជែងជ្រើសរើសក្របខណ្ឌក្រសួងអភិវឌ្ឍន៍ជនបទ និងក្រសួង អប់រំ យុវជន និងកីឡានេះ។  ក្នុងនោះក៏មានការចូលរួមពីសំណាក់ថ្នាក់ដឹកនាំ អន្តរក្រសួង ស្ថាប័នពាក់ព័ន្ធ ក្រុមការងារអនុគណៈកម្មការជំនាញ អ្នកសង្កេតការណ៍មកពី សាកលវិទ្យាល័យ និងសាធារណជន រួមទាំងបេក្ខជន ព្រមទាំងអ្នកសារព័ត៌មាន ជាច្រើនរូប។ សន្លឹកកិច្ចការ ចាប់ផ្តើមកែពីម៉ោង ៨៖០០ ព្រឹក តាមរយៈការកាត់ក្បាលសន្លឹកកិច្ចការ ការចុះលេខ និងនីតិវិធីនានា ដែលស្ថិតក្រោមការឃ្លាំមើលជាប់ជាប្រចាំពី អង្គភាពប្រឆាំងអំពើពុករលួយ និងអនុគណៈកម្មការត្រួតពិនិត្យ និងវាយតម្លៃ ស្របតាមនិយាមនីតិវិធីប្រតិបត្តិដែលបានកំណត់ដោយឈរលើគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។ គួរឱ្យដឹងដែរថា សន្លឹកកិច្ចការដែលត្រូវធ្វើកំណែនេះ មានចំនួន ២១៨៧ច្បាប់ ជារបស់បេក្ខជនប្រឡងប្រជែងជ្រើសរើសមន្ត្រីរាជការឱ្យចូលបម្រើការងារក្នុងក្របខណ្ឌក្រសួងអភិវឌ្ឍន៍ជនបទ ៧២៩នាក់ ដែលបានបញ្ចប់កាលពីថ្ងៃទី៣១ ខែសីហា ឆ្នាំ២០២៤ នៅមណ្ឌលសាលាភូមិន្ទរដ្ឋបាល និងសន្លឹកកិច្ចការចំនួន ១០ ៥១១ច្បាប់ របស់បេក្ខជន ប្រឡងប្រជែងជ្រើសរើស គ្រូបង្រៀនមត្តេយ្យសិក្សា ឱ្យចូលបម្រើការងារក្នុងក្របខណ្ឌក្រសួងអប់រំ យុវជន និងកីឡា ដែលទើបនឹងបញ្ចប់កាលពីម្សិលមិញនៅថ្ងៃទី០១ ខែកញ្ញា ឆ្នាំ២០២៤ នៅមណ្ឌលសាកលវិទ្យាល័យភូមិន្ទភ្នំពេញ៕    អត្ថបទ៖ អ៊ីសា ហាសាណះ  រូបភាព៖ ហ៊ុន សុជាតា    

ដូចការគ្រោងទុក នៅព្រឹកថ្ងៃទី០២ ខែកញ្ញា២០២៤ នាវាកងទ័ពជើងទឹកអូស្ត្រាលី០១ គ្រឿង ឈ្មោះ HMAS Perth-FFH157 (Anzac Class FFH)  បានចូលចតនៅកំពង់ផែស្វយ័តក្រុងព្រះសីហនុក្នុងដំណើរបំពេញទស្សនកិច្ចនៅកម្ពុជារយៈពេល ៣ថ្ងៃ ចាប់ពីថ្ងៃទី២ ដល់ ថ្ងៃ៤ ខែកញ្ញា ឆ្នាំ២០២៤ ដែលជាដំណើរទស្សនកិច្ច សុឆន្ទៈមកកម្ពុជា ពង្រឹងពង្រីកចំណងមិត្តភាពរវាងប្រទេសទាំងពីរកម្ពុជា អូស្ត្រាលី។   ក្នុងនាមកងទព័ជើងទឹកកម្ពុជា លោកវរនាវីឯក មាន សាវឿន នាយសេនាធិការ រងមូលដ្ឋានសមុទ្ររាម និងនាយនាវីជាច្រើនរូប អញ្ជើញទៅ ទទួលស្វាគមន៍នាវាកងទ័ពជើងទឹកអូស្ត្រាលី ចំនួន០១គ្រឿងនេះ។     នាវា HMAS Perth-FFH157(Anzac Class FFH)  ដឹកនាំដោយវរនាវីទោ Ben Dalton មេបញ្ជាការនាវាកងទ័ពជើងទឹក អូស្រ្តាលី ហើយក្នុងដំណើរទស្សនកិច្ចនេះ តាមកម្មវិធីគ្រោងនឹងមានពិធីជប់លៀងផ្លូវការដែលរៀបចំដោយប្រតិភូនាវានៅល្ងាចថ្ងៃទី០២ ខែកញ្ញា ឆ្នាំ២០២៤។ កម្មវិធីចូលជួបសំដែងការគួរសមជាមួយថ្នាក់ដឹកនាំ អាជ្ញាធរនិងមេបញ្ជាការមូលដ្ឋានសមុទ្ររាម សកម្មភាពដើរសន្តិភាពនិងសន្តិសុខនៅថ្ងៃទី ៣ខែកញ្ញាឆ្នាំ២០២៤ រួមជាមួយដំណើរទេសចរណ៍  និងការបង្ហាញអំពីប្រតិបត្តិការ ទូកតូចបច្ចេកទេសពន្លត់អគ្គីភ័យ កម្មវិធីប្រកួតបាល់ទះ មិត្តភាពរវាងនាយនាវី កងទ័ពជើងទឹកកម្ពុជា និងនាវិកនាវា កងទព័ជើងទឹកអូស្ត្រាលីនៅថ្ងៃទី០៣ ខែកញ្ញា ឆ្នាំ២០២៤។     អំពីលក្ខណៈបច្ចេកទេសនាវា៖- នាវាឈ្មោះ PERTH - FFH 157 (Anzac Class FFH)- មេបញ្ជាការ វរនាវីទោ BEN DALTON- បណ្ដោយប្រវែង  ១១៨ ម៉ែត្រ - ទទឹងប្រវែង  ១៤.៨ ម៉ែត្រ - ជម្រៅទឹក  ៦.៤ ម៉ែត្រ - ទម្ងន់ផ្ទុក  ៣,៩០០ តោន- មានឧទ្ធម្មភាគចក្រ MH60-Rabbit Seahawk- មេបញ្ជាការហោះហើរ(អាកាសយាននិក  វរនាវីត្រី Patrick Mc Guire- មាននាវិកសរុប ១៩០ នាក់(នាយនាវី ៣២ នាក់ និងនាវិក ១៥៨ នាក់)៕អត្ថបទ៖ ហ៊ុយ ប៊ុនឡេងរូបភាព៖ ឡេង ប៊ុននី 

ក្រសួងអភិវឌ្ឍន៍ជនបទ ដោយមានជំនួយឧបត្ថម្ភពីមូលនិធិសហប្រតិបត្តិការអភិវឌ្ឍន៍សេដ្ឋកិច្ចកូរ៉េ បានអភិវឌ្ឍន៍ផ្លូវជនបទ ដែលធ្លាប់តែអភិវឌ្ឍន៍ត្រឹមជាផ្លូវក្រួសក្រហម បានកែប្រែទៅជាផ្លូវបេតុងក្រាស់ល្អ កំពុងជួយលើកកម្ពស់ជីវភាពពលរដ្ឋជនបទ នៅឯខេត្តព្រែវែង។គម្រោងផ្លូវជនបទដំបូងគេកម្រិតស្តង់ដាដែលកាលពីមុនធ្លាប់តែអភិវឌ្ឍន៍ត្រឹមតែផ្លូវគ្រួសក្រហម បានកែប្រែទៅផ្លូវបេតុងកំរើសក្រាស់ កំពុងសម្រួលដល់ការធ្វើដំណើរ និងដឹកកសិផលរបស់ប្រជាកសិករយ៉ាងល្អប្រសើរ ព្រមទាំងលើកកម្ពស់ជីវភាពរបស់ពលរដ្ឋថែមទៀតផង។ មេឃុំក្រ្តឿងរាយ លោក ប៉ែន ខុន បានផ្តល់កិច្ចសម្ភាសន៍ដល់ទូរទស្សន៍ភីអិនអិនឱ្យដឹងថា នៅក្នុងឃុំក្តឿងរាយ ផ្ទៃដីដាំដុះមានជាង៤ពាន់ហិកតាដែលបច្ចុប្បន្នពលរដ្ឋអាចធ្វើស្រែរហូតដល់ទៅ២ទៅ៣ដងក្នុងមួយឆ្នាំ ហើយកាលពីដើមឡើយ ផ្លូវនៅតាមជនបទ មានការលំបាកច្រើនដែលប្រជាកសិករ ពិបាកដឹកជញ្ជូនកសិផល ហើយផ្លូវដែលអភិវឌ្ឍន៍ទៅជាផ្លូវបេតុងក្រាស់ល្អនេះ កំពុងជួយលើកស្ទួយជីវភាពរបស់យ៉ាងល្អប្រសើរ។ ប្រជាកសិករដែលប្រើប្រាស់ផ្លូវនេះជាប្រចាំថ្ងៃ បានលើកឡើងថា កាលពីមុន នៅរដូវវស្សា ផ្លូវសុទ្ធតែភក់ស្អិតពិបាកធ្វើដំណើរ ហើយនៅពេលចង់ឆ្លងកាត់ ផ្លូវត្រឹមតែ៧គីឡូម៉ែត្រ ត្រូវចំនាយពេលរហូតដល់ទៅ១ម៉ោង ហើយនៅពេលមានផ្លូវល្អបែបនេះ ពួកគាត់ អះអាងថា បានជួយលើកកម្ពស់ជីវភាពពួកគាត់មួយកម្រិត។  កន្លងទៅ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានជំរុញឱ្យក្រសួងអភិវឌ្ឍន៍ជនបទ ត្រូវបន្តយកចិត្តទុកដាក់លើការរៀបចំយុទ្ធសាស្ត្រអភិវឌ្ឍជនបទ ឈានឆ្ពោះទៅសម្រេចឱ្យបាននូវគោលដៅរបស់ខ្លួន គឺធានាការបង្កើនប្រាក់ចំណូល សម្រាប់គ្រួសារនៅជនបទប្រកបដោយចីរភាព និង ធានាសុខុមាលភាពនៃការរស់នៅរបស់ប្រជាជននៅជនបទឱ្យកាន់តែប្រសើរឡើង សំដៅរួមចំណែកដល់ការសម្រេចបានចក្ខុវិស័យកម្ពុជាឆ្នាំ ២០៣០ ជាប្រទេសចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលខ្ពស់។  សូមជម្រាបថា ក្នុងរយៈពេល២៧ឆ្នាំចុងក្រោយនេះ កូរ៉េខាងត្បូង បានផ្តល់ជំនួយអភិវឌ្ឍន៍ជាច្រើនដល់កម្ពុជា រហូតទាល់តែសាធារណរដ្ឋកូរ៉េ បានក្លាយជាដៃគូអភិវឌ្ឍន៍ជាមួយកម្ពុជាលំដាប់ទី៣ បន្ទាប់ពីប្រទេសចិន និងជប៉ុន។ ជាមួយគ្នានោះ សាធារណរដ្ឋកូរ៉េ ក៏កំពុងក្លាយជាដៃគូសេដ្ឋកិច្ច ពាណិជ្ជកម្មសំខាន់ឡើងជាលំដាប់របស់ប្រទេសកម្ពុជា។ លើសពីនេះ ទំហំពាណិជ្ជកម្មកូរ៉េខាងត្បូង-កម្ពុជា កើនដល់៧៥០លានដុល្លារ។ ចំពោះការវិនិយោគផ្ទាល់ពីសាធារណរដ្ឋកូរ៉េនៅកម្ពុជា មានជាង៥ពាន់លានដុល្លារ គិតមកដល់ពេលបច្ចុប្បន្ននេះ៕    អត្ថបទ៖ តុល សុភ័ណ រូបភាព៖ ឆិល សុភ័ស្ត  

មន្រ្តីកសិកម្មឃុំម្នាក់ នៅខេត្តព្រៃវែង បានអះអាងថា គ្មានទេ អំពើពុករលួយ និងបក្សពួកនិយម សម្រាប់ការប្រឡងចូលក្របខ័ណ្ឌមន្រ្តីកសិកម្មឃុំ។ ការបើកឱកាស សម្រាប់អ្នកមានបទពិសោធន៍ផ្នែកកសិកម្ម កំពុងជំរុញឱ្យវិស័យនេះ កាន់តែរីកចម្រើន និងអភិវឌ្ឍន៍ចំគោលដៅល្អ។     អត្ថបទ៖ តុល សុភ័ណ  រូបភាព៖ ឆិល សុភ័ស្ត    

ក្រសួងកសិកម្ម បានរៀបចំឱ្យក្រុមនិស្សិត ចុះកម្មសិក្សា នៅតាមគោលដៅសហគមន៍កសិកម្មមួយចំនួន ដើម្បីជួយគាំទ្រការងារបច្ចេកទេសនៃការដាំដុះ។ ការរៀបចំនេះ ក៏ជាផ្នែកមួយ ផ្តល់ឱកាសឱ្យនិស្សិត អនុវត្តផ្ទាល់ជាមួយកសិករ ដើម្បីដកស្រង់បទពិសោធន៍បន្ថែមពីលើការសិក្សា។ នៅពេលនេះ និស្សិតកសិកម្ម ១ក្រុម កំពុងជួយកសិករ ក្នុងសហគមន៍កសិកម្មទំនើប «បន្លែផ្ទះសំណាញ់ត្រាំកក់»។   ក្រុមនិស្សិតកសិកម្ម កំពុងចុះកម្មសិក្សានៅតាមសហគមន៍កសិកម្មទំនើប«បន្លែផ្ទះសំណាញ់ត្រាំកក់» ចំនួន ៥នាក់ បាននឹងកំពុងចូលរួមយ៉ាងសកម្មជាមួយប្រជាកសិករនៅក្នុងសហគមន៍ ក្នុងការផ្តល់ចំណេះដឹងនៃការដាំដុះ បច្ចេកទំនើប និងការងារជាច្រើនផ្សេងទៀត។ ក្រុមនិស្សិតកសិកម្មកំពុងចុះកម្មសិក្សានេះ ត្រូវបានជ្រើសរើស និងគាំទ្រដោយក្រសួងកសិកម្ម រុក្ខាប្រមាញ់ និងនេសាទ ក្នុងគោលបំណងគាំទ្របច្ចេកទេសដល់សហគមន៍ទំនើប ក៏ដូចជាផ្តល់ឱកាសដល់ប្អូនៗនិស្សិតអាចដកស្រង់បទពិសោធន៍ជាក់ស្តែង។  កញ្ញា សឿង សុភា ជានិស្សិតឆ្នាំទី៤ ផ្នែកវិទ្យាសាស្ត្រកសិកម្ម នៃសាកលវិទ្យាល័យភូមិន្ទកសិកម្ម និងកំពុងចុះកម្មសិក្សានៅក្នុងសហគមន៍កសិកម្មទំនើបត្រាំកក់ បានលើកឡើងថា ការចុះមកដល់សហគមន៍នេះ គឺជាបទពិសោធន៍ថ្មីស្រឡាងរបស់ខ្លួន ដែលកន្លងមកកញ្ញាធ្លាប់តែរៀនពីទ្រឹស្តីច្រើនជាការអនុវត្តផ្ទាល់។ ការដែលចុះមកអនុវត្តផ្ទាល់នេះ កញ្ញាថាជាឱកាសមួយដ៏ល្អសម្រាប់ខ្លួន ដើម្បីរៀនសូត្រពីកសិករត្រឡប់ទៅវិញ។  បច្ចុប្បន្នក្រុមនិស្សិតចុះកម្មសិក្សានេះកំពុងជួយគាំទ្រការងារសហគន៍មួយចំនួនដូចជា បច្ចេកទេសក្នុងការដាំដុះ បច្ចេកទេសក្នុងការស្រោចស្រព ការគ្រប់គ្រងជំងឺ និងសត្វល្អិតជាដើម។ ជាមួយគ្នានេះ ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ក៏បានឱ្យដឹងដែរថា ការដាក់និស្សិតឱ្យចុះកម្មសិក្សានៅតាមសហគមន៍បែបនេះ គឺជាផ្នែកមួយនៃកម្មវិធីគាំទ្របច្ចេកទេសដល់សហគមន៍ទំនើប ក៏ដូចជាផ្តល់ឱកាសដល់ប្អូនៗនិស្សិតអាចដកស្រង់បទពិសោធន៍ និងអាចស្វែងរកការងារអចិន្ត្រៃយ៍ជាមួយសហគមន៍ក្រោយពេលដែលពួកគេបញ្ចប់កម្មសិក្សាផងដែរ។ ឯកឧត្តមថា ក្រុមនិស្សិតរបស់យើង គឺដើរតួនាទីដូចជាអ្នកគ្រប់គ្រងសហគន៍យ៉ាងដូច្នោះដែរ ដោយពួកគេមើលទៅលើការងាររបស់កម្មករសហគមន៍ផ្ទាល់ដូចជា ការងារដាំដុះ ការប្រមូលផល និងការងារថែទាំជាដើម។ ឯកឧត្តមបន្ថែមទៀតថា ក្នុងរយៈពេល ៣ខែនៃការចុះកម្មសិក្សារបស់ពួកគេ ហើយប្រសិនបើសហគមន៍ពេញចិត្តទៅលើការងាររបស់ក្រុមនិស្សិតយើងពួកគេក៏អាចចរចារដើម្បីទទួលការងារពីសហគមន៍បន្តទៀតផងដែរ៕    អត្ថបទ៖ អ៊ីសា ហាសាណះ  រូបភាព៖ ហ៊ុន សុជាតា