សមាជិកក្រុមនារីខេប៉ុប NewJeans បាននាំគ្នា Live ទម្លាយរឿងដែលពួកគេរងអំពើអយុត្តិធម៌ និងបានស្នើសុំឱ្យក្រុមហ៊ុន HYBE ប្រគល់តំណែង CEO ឱ្យ Min Hee-jin ដែលជាអ្នកចាត់ការដើមរបស់គេវិញជាបន្ទាន់។ កាលពីថ្ងៃទី១១ ខែកញ្ញា សមាជិកទាំង ៥ របស់ NewJeans បាននាំគ្នាចូល Live លើ YouTube ដើម្បីនិយាយពីបញ្ហាដែលពួកគេកំពុងប្រឈម ជាពិសេសបានជំរុញឱ្យ HYBE តែងតាំង Min Hee Jin ជានាយកប្រតិបត្តិនៃ ADOR ឡើងវិញឱ្យបានមុនថ្ងៃទី២៥ ខែកញ្ញានេះ។ សមាជិក Minji បាននិយាយអំពីភាពតានតឹងកំពុងបន្តរវាង Min Hee Jin និង HYBE ថា៖ "អស់រយៈពេលកន្លះឆ្នាំ រឿងដែលមិនចាំបាច់ និងគួរឱ្យហត់នឿយទាំងអស់នៅតែបន្ត។ ក្នុងនាមជាអ្នកពាក់ព័ន្ធផ្ទាល់ ពួកយើងពិតជាមិនស្រួលចិត្តនោះទេ”។  គួររំឭកថា HYBE ដែលជាផលិតកម្មខេប៉ុបធំបំផុត និងជាទ្រនំក្រុមចម្រៀង BTS បានដាក់ពាក្យបណ្តឹងប្រឆាំងនឹងផលិតករស្រី Min Hee Jin កាលពីខែមេសាកន្លងទៅ ពីបទបំពានអំណាចគ្រប់គ្រង ហើយនៅថ្ងៃទី ២៧ ខែសីហា ពួកគេបានតែងតាំង Kim Joo Young អតីតប្រធានផ្នែកធនធានមនុស្សរបស់ HYBE ជានាយកប្រតិបត្តិថ្មីរបស់ក្រុមហ៊ុនបុត្រសម្ព័ន្ធ ADOR ដែលជាក្រុមហ៊ុនគ្រប់គ្រង NewJeans។  ជាលទ្ធផល Min Hee Jin ត្រូវបានដកហូតសិទ្ធិគ្រប់គ្រងរបស់នាងបន្ទាប់ពីបម្រើការជានាយកប្រតិបត្តិរបស់ ADOR អស់រយៈពេលប្រហែល ២ ឆ្នាំ ៩ ខែចាប់តាំងពីខែវិច្ឆិកា ឆ្នាំ ២០២១។ ក្នុងវីដេអូ Live នេះដែរ Hanni ក៏បានចែករំលែករឿងមួយនៅពេលដែលអ្នកចាត់ការតារាម្នាក់របស់ HYBE បានណែនាំក្រុមចម្រៀងរបស់ពួកគេឱ្យព្រងើយកន្តើយនឹងនាង ទោះបីជាតារាទាំងនោះបានស្វាគមន៍នាងរួចហើយក៏ដោយ។  នៅពេលនាងយករឿងនេះនិយាយប្រាប់ នាយកប្រតិបត្តិថ្មី ពួកគេបែរជាគ្មានដំណោះស្រាយអ្វីទាល់តែសោះ។ការចេញ Live លើកនេះធ្វើឱ្យមានមតិជាច្រើនបង្ហាញការព្រួយបារម្ភកាន់តែខ្លាំងឡើងពីអនាគតរបស់ក្រុមចម្រៀង NewJeans ស្របពេលដែលសង្គ្រាមថ្នាក់ដឹកនាំនៅតែបន្ត ៕ ប្រែសម្រួល៖ វ៉ាន់ថន  

 បវរកញ្ញា អ៊ិន លក្ខិណា មានកម្លាំងចិត្តខ្លាំងណាស់សម្រាប់តំណាងកម្ពុជាទៅប្រកួតកម្មវិធី Miss Cosmo 2024 នៅវៀតណាម ក្រោយ ND និងអ្នកគាំទ្រទៅជូនដំណើរលើកទឹកចិត្តដល់ព្រលានយន្តហោះអន្តរជាតិភ្នំពេញ នាព្រឹកមិញនេះ។  បវរកញ្ញាដែលល្បីថាដំណើរ Catwalk ស្អាត កញ្ញា អ៊ិន លក្ខិណា ត្រូវបានស្ថាប័នជ្រើសតាំងជា Miss Cosmo Cambodia 2024 ដើម្បីតំណាងប្រទេសកម្ពុជាទៅចូលរួមប្រកួតកម្មវិធី Miss Cosmo 2024 ដែលរៀបចំធ្វើឡើងនៅទឹកដីប្រទេសវៀតណាម ចាប់ពីថ្ងៃទី១២ ខែកញ្ញា ដល់ថ្ងៃទី០៦ ខែតុលា ឆ្នាំ២០២៤។  ពេលវេលាដែលពុកម៉ែបងប្អូន អ្នកស្នេហាវិស័យបវរកញ្ញា និងអ្នកគាំទ្រ លក្ខិណា រង់ចាំជាយូរបានមកដល់ហើយ ដោយបវរកញ្ញារូបស្រស់នេះ បានចាកចេញពីព្រះរាជណាចក្រកម្ពុជាឆ្ពោះទៅទឹកដីប្រទេសវៀតណាម នាព្រឹកមិញនេះ ជាមួយការជូនដំណើរផ្ទាល់ពី អ្នកស្រី អ៊ឹម សុគន្ធា អ្នកគ្រប់គ្រងថ្នាក់ជាតិកម្មវិធី Miss Grand Cambodia និងអ្នកទិញសិទ្ធិបញ្ជូនបេក្ខភាពទៅប្រកួតកម្មវិធី Miss Cosmo ដំបូងគេបង្អស់ផងដែរ។  ស្ថិតនៅបរិវេនច្រកចូលព្រលានយន្តហោះអន្តរជាតិភ្នំពេញ បវរកញ្ញារាងខ្ពស់ស្រឡះ អ៊ិន លក្ខិណា បានបង្ហាញអារម្មណ៍រំភើបក្រៃលែង ពេលឃើញហ្វេនៗមកជូនដំណើរច្រើនកុះករ ជាពិសេសវត្តមាន អ្នកស្រី អ៊ឹម សុគន្ធា ដែលបានមកចូលរួមលើកទឹកចិត្តនាងដោយផ្ទាល់។  Miss Cosmo Cambodia 2024 បានរៀបរាប់ឱ្យដឹងពីការត្រៀមខ្លួនយ៉ាងល្អសម្រាប់ការប្រកួតប្រជែងលំដាប់អន្តរជាតិនេះ អ្វីដែលសំខាងគឺនាងត្រៀមសម្លៀកបំពាក់ប្រណីតៗជិត ១០០ឈុតដើម្បីប្រើប្រាស់ក្នុងការប្រកួតនេះ។ បវរកញ្ញាតំណាងកម្ពុជារូបនេះ ប្តេជ្ញាបញ្ចេញឱ្យអស់ពីសមត្ថភាពដើម្បីដណ្តើមភាពជោគជ័យជូនប្រទេសកម្ពុជាឱ្យបាន។  ដោយឡែក អ្នកស្រី អ៊ឹម សុគន្ធា អ្នកគ្រប់គ្រងថ្នាក់ជាតិកម្មវិធី Miss Grand Cambodia បង្ហាញការគាំទ្រចំពោះ លក្ខិណា យ៉ាងពេញទំហឹង និងបានផ្តាំផ្ញើរ លើកទឹកចិត្តនាងយ៉ាងកក់ក្តៅថែមទៀតផង។ មិនតែប៉ុណ្ណោះ NDរូបនេះបានបង្ហើបឱ្យដឹងថា ប្រសិនឆ្នាំនេះ លក្ខិណា ទទួលបានលទ្ធផលល្អត្រឡប់មកវិញ អ្នកស្រីអាចនឹងពិចារណារៀបចំការប្រកួតថ្នាក់ជាតិ Miss Cosmo Cambodia នៅឆ្នាំក្រោយផងដែរ។  សូមជម្រាបផងដែរថា នេះជាឆ្នាំដំបូងដែលកម្ពុជាយើងបញ្ជូនបេក្ខភាពទៅចូលរួមប្រកួតកម្មវិធី Miss Cosmo ហើយ កញ្ញា អ៊ិន លក្ខិណា ជាបវរកញ្ញាកម្ពុជាដំបូងគេបង្អស់ដែលបាននាំយកទង់កម្ពុជាទៅប្រកួតកម្មវិធីអន្តរជាតិដ៏ធំនេះ។ពេលនេះ លក្ខិណា កំពុងត្រូវការការជួយពីអ្នកទាំងអស់គ្នាសម្រាប់ការបោះឆ្នោតគាំទ្រឱ្យនាងបានឈ្នះពាន Cosmo People's Choice ដែលអ្នកឈ្នះពានរង្វាន់នេះ នឹងបានចូលទៅវគ្គ Top 10 ចុងក្រោយដោយស្វ័យប្រវត្តិតែម្តង៕  អត្ថបទ៖ រ៉ាត់ ចាន់ធីតា រូបភាព៖ ឃាង ទូច  

 តារាចម្រៀងកូរ៉េ Baekhyun ដែលជាសមាជិកក្រុម EXO បានបង្កើតប្រវត្តិសាស្ត្រថ្មីក្នុងវិស័យខេប៉ុប ដោយបានក្លាយជាតារាខេប៉ុបទោលដំបូងគេអាចលក់អាល់ប៊ុមដាច់សរុបលើស ៣ លានបន្ទះ។ កាលពីថ្ងៃទី៦ ខែកញ្ញា សមាជិកក្រុម EXO, Baekhyun (ផេកខ្យន) បានបញ្ចេញមីនីអាល់ប៊ុមទោលទី៤របស់ខ្លួនមានចំណងជើងថា "Hello, World” ព្រមជាមួយវីដេអូចម្រៀងសម្រាប់បទនាំមុខរបស់អាល់ប៊ុមមានចំណងជើងថា “Pineapple Slice”។ រហូតមកដល់ថ្ងៃទី១០ ពោលរយៈពេល ៥ថ្ងៃបន្ទាប់ពីចេញលក់ អាល់ប៊ុមថ្មីនេះបានលក់ដាច់ដល់ ១ លានបន្ទះនៅលើវិបសាយ Hanteo (ហានថូ) ដោយនេះជាអាល់ប៊ុមទី ៣ហើយរបស់ Baekhyun (ផេកខ្យន) ដែលអាចលក់ដាច់បានលើស ១ លានបន្ទះ បន្ទាប់ពីអាល់ប៊ុម “Delight” និងអាល់ប៊ុម “Bambi”។  ជាមួយតួលេខលក់សរុបជាង ៣ លានបន្ទះ ធ្វើឱ្យតារាវ័យ ៣២ឆ្នាំក្លាយជាតារាខេប៉ុបទោលដែលអាចលក់អាល់ប៊ុមដាច់ច្រើនបំផុតលើវិបសាយ Hanteo (ហានថូ)  ចាប់តាំងពីឆ្នាំ២០០៤មក។ មិនតែប៉ុណ្ណោះ បទចម្រៀងរបស់ Baekhyun (ផេកខ្យន) បានទទួលការចូលស្ដាប់សរុបរហូតដល់ ១ ពាន់លានដងនៅលើវេទិកាស្ដាប់ចម្រៀងអន្តរជាតិ Spotify និង ២ ពាន់លានដងនៅលើវេទិកាស្ដាប់ចម្រៀងកូរ៉េ Melon ដែលបង្ហាញយ៉ាងកាន់តែច្បាស់ពីភាពជោគជ័យមិនធម្មតារបស់គេក្នុងនាមជាតារាចម្រៀងទោល។ គួររំឭកថា Baekhyun (ផេកខ្យន) បានបង្ហាញមុខលើកដំបូងជាមួយក្រុម EXO ក្នុងឆ្នាំ២០១២ និងបានចេញអាល់ប៊ុមដំបូងមានចំណងជើងថា “City Lights” ក្នុងឆ្នាំ២០១៩។  អាល់ប៊ុម "Hello, World” គឺជាអាល់ប៊ុមដំបូងដែលរូបគេបានចេញក្រោមផលិតកម្ម INB100 ជាក្រុមហ៊ុនដែលគេបានបង្កើតរួមគ្នាជាមួយសមាជិក EXO, Xiumin (ស៊ីវមីន) និង Chen (ឆេន) ក្រោយចាកចេញពីផលិតកម្ម SM Entertainment ៕   ប្រែសម្រួល៖ វ៉ាន់ថន 

 តារាចម្រៀង Katy Perry និងតារាល្បីៗជាច្រើនរូបទៀតបានចូលរួមកម្មវិធីសប្បុរសធម៌ Caring for Women ជាកម្មវិធីរៃអង្គាសប្រាក់ជួយដល់ការងារលុបបំបាត់អំពើហិង្សាលើស្ត្រី។ សិល្បករ មហាសេដ្ឋី និងបុគ្គលល្បីៗក្នុងវិស័យសិល្បៈនិងហ្វេសិនជាច្រើនរូបបានជួបជុំគ្នាក្នុងកម្មវិធីជប់លៀងសប្បុរសធម៌របស់មូលនិធិ Caring for Women ដែលបានរៀបចំឡើងនៅមជ្ឈមណ្ឌលកម្សាន្ត The Pool ទីក្រុងញូវយ៉ក សហរដ្ឋអាមេរិក កាលពីថ្ងៃទី៩ ខែកញ្ញា។ វត្តមានតារាល្បីៗចូលរួមក្នុងកម្មវិធីដែលទទួលបានការចាប់អារម្មណ៍ច្រើនមានជាអាទិ៍ដូចជាតារាទូរទស្សន៍ Kim Kardashian, តួឯកស្រីរឿង “Fifty Shades of Grey” Dakota Johnson, តារាចម្រៀង Ricky Martin, តារាសម្ដែងឥណ្ឌា Priyanka Chopra, តារាសម្ដែង Linsay Lohan, តារាចម្រៀង Katy Perry និងគូស្នេហ៍របស់នាងគឺតារាសម្ដែង Orlando Bloom ផងដែរ។  គួរបញ្ជាក់ថាមូលនិធិ Caring for Women ត្រូវបានបង្កើតឡើងដោយក្រុមហ៊ុន Kering ដែលជាក្រុមហ៊ុនមេរបស់ម៉ាកយីហោប្រណិតល្បីៗលំដាប់ពិភពលោកជាច្រើនដូចជា Gucci (គូឈី), Balenciaga (បាលេនសៀអាហ្កា) និង Yves Saint Laurent (អ៊ីហ្វ សេនឡូរ៉ង់) ជាដើម។ មូលនិធិនេះដែរគឺមានគោលដៅគាំទ្រដល់ការងារលុបបំបាត់អំពើហិង្សាពាក់ព័ន្ធយេនដ័រ ជាពិសេសអំពើហិង្សាមកលើស្ត្រី។  គួរបញ្ជាក់ដែរថា កម្មវិធីជប់លៀងកាលពីថ្ងៃច័ន្ទនេះ ត្រូវបានរៀបចំឡើងដោយតារាសម្ដែង Salma Hayek (សេលម៉ា ហាយេក) និងស្វាមីរបស់នាង គឺមហាសេដ្ឋី François-Henri Pinault (ហ្វ្រង់ស្វ័រ ហេនរី ភីណល) ដែលជាម្ចាស់ក្រុមហ៊ុន Kering ផ្ទាល់តែម្ដង ៕   ប្រែសម្រួល៖ វ៉ាន់ថន   

  ប្រលូកក្នុងសិល្បៈអស់ពេលជាង ៤០ ឆ្នាំ តារាកំប្លែងវ័យ ៦៨ ឆ្នាំនាយ កុយ នៅតែប្រឹងប្រែងរកប្រាក់ចំណូលពីវិស័យចាស់របស់ខ្លួន និងបានព្យាយាមលើកស្ទួយវិស័យល្ខោនបាសាក់ ខ្មែរ ឱ្យកាន់តែមានតម្លៃ និងមានអ្នកចាប់អារម្មណ៍ ។   ល្បីឈ្មោះក្នុងសិល្បៈជាង ៤០ ឆ្នាំ តារាកំប្លែងនាយ កុយ នៅតែបន្តអាជីពចាស់របស់ខ្លួន បើទោះបីជាពេលនេះលោកមានវ័យ ៦៨ ឆ្នាំ ប៉ុន្តែសុខភាពរបស់លោកនៅតែមាំទាំ និងអាចចេញសម្តែង និង ច្រៀងបានដូចដើម អ្វីដែលតារាកំប្លែងរូបនេះកំពុងបន្តធ្វើនោះ គឺលោកនៅតែជ្រើសរើសការសម្តែងល្ខោនបាសាក់ ខ្មែរ រាល់ពេលមានកម្មវិធីផ្សេងៗ ដើម្បីលើកស្ទួយវិស័យនេះកុំឱ្យបាត់បង ។   ថ្វីដ្បិតតែមានវ័យច្រើនបន្តិចក្តីតារាកំប្លែងនាយ កុយ នៅតែអះអាងថា លោកនៅតែបន្តអាជីពសិល្បៈដូចមុនដដែល ពីព្រោះលោកនៅមានសុខភាពល្អ នៅមានកម្លាំង ដែលអាចរកប្រាក់ចំណូលចិញ្ចឹមជីវិតបាន ។ អ្វីដែលពិសេសជាងនេះទៅទៀតគឺលោកនៅតែជ្រើសរើសការសម្តែង ល្ខោនបាសាក់ ដើម្បីសម្តែងជូនបងប្អូនទស្សនាតាមខេត្តក្រុងនានា ។    ស្ថិតក្នុងវ័យ ៦៨ ឆ្នាំ ឈានចូល ៦៩ ឆ្នាំ តារាកំប្លែងនាយ កុយ នៅតែមានសុខភាពល្អ មិនដូចកាលពីប៉ុន្មានឆ្នាំមុនៗឡើយ នាយ កុយ បានឱ្យដឹងផងដែរថា លោកមានសុខភាពល្អដូចសព្វថ្ងៃនេះ ដោយសារបានអនុវត្តរបបអាហារបានត្រឹមត្រូវ រូមទាំងទៅពិនិត្យសុខភាពជាប្រចាំ ។   មកទល់ពេលនេះតារាកំប្លែងនាយ កុយ មានចៅសរុបជាង ២០ នាក់ហើយ ប៉ុន្តែក្នុងចំណោមចៅទាំងអស់ មានតែ ចៅម្នាក់ប៉ុណ្ណោះដែលចាប់អាជីពសិល្បៈ ។ លោកសង្ឃឹមថាទៅថ្ងៃអនាគតចៅៗរបស់លោកនឹងបន្តស្នងមករតកនេះពីលោកឱ្យកាន់តែច្រើនឡើង ៕    អត្ថបទ ៖ ម៉ា រីសា រូបភាព ៖ អ៊ិន អាត   

  បងប្អូនបង្កើតស្រី ២រូប គឺ ដូរមីនិច អូនលី និង សូហ្វីយ៉ា អូនលី បានដឹកដៃគ្នាចូលប្រឡូកសិល្បៈទាំងវ័យក្មេង ជាមួយក្តីសង្ឃឹមចង់ក្លាយជាបវរកញ្ញា និងជាតារាម៉ូដែលល្បីឈ្មោះនៅថ្ងៃអនាគត។  កុមារីគួរឱ្យស្រលាញ់ ២រូប គឺ ដូរមីនិច អូនលី និង សូហ្វីយ៉ា អូនលី ជាបងប្អូនបង្កើតនឹងគ្នា បានដឹកដៃគ្នាចូលវិស័យសិល្បៈទាំងវ័យក្មេង តាមរយៈការដើរបង្ហាញម៉ូដ។ ម៉ូដែលតូច ដូរមីនិច មានអាយុ ៧ឆ្នាំ រីឯក្មេងតូច សូហ្វីយ៉ា មានអាយុ ៥ឆ្នាំ។  អាយុនៅតិចក៏ពិតមែន តែបងប្អូនបង្កើតស្រីទាំង ២រូប សាងស្នាដៃសិល្បៈបានច្រើនគួរសម ដោយបានលេចមុខតាមកម្មវិធីដើរបង្ហាញម៉ូដតូចធំជាច្រើន ធ្វើឱ្យពួកគេមានភាពក្លាហានក្នុងការបញ្ចេញសមត្ថភាពចំពោះមុខទស្សនិកជន។   ផ្តល់បទសម្ភាសន៍ជាមួយកម្មវិធីជីវិតកម្សាន្តភីអិនអិន កាលពីពេលថ្មីៗ ដូរមីនិច និងប្អូនស្រី សូហ្វីយ៉ា រំភើបចិត្តជាខ្លាំងដែលត្រូវបានអញ្ញើញឱ្យចូលរួមដើរបង្ហាញម៉ូដជាមួយម៉ូដែលវ័យក្មេងផ្សេងៗទៀត។  អ្នកទាំងពីរពិតជាស្រលាញ់ការដើរម៉ូដខ្លាំងណាស់ បើមានឱកាសក្រោយៗអ្នកទាំងពីរ នឹងចូលរួមដើរម៉ូដបន្តទៀត ដើម្បីទទួលបានបទពិសោធន៍កាន់តែច្រើនឡើង ព្រោះធំឡើងក្មេងឆ្លាតទាំង ២រូបនេះចង់ក្លាយជាតារាម៉ូដែលល្បីឈ្មោះ និងជាបវរកញ្ញាម្នាក់ផងដែរ។  ក្រោយមើលឃើញពីភាពប៉ិនប្រសព្វ និងដុងទេពកោសល្យសិល្បៈរបស់កូនស្រី អ្នកម្តាយក្មេងស្រីសែនឆ្លាតទាំងពីរគ្រោងឱ្យកូនស្រីរៀនរាំ K-POP បន្ថែមទៀត ដើម្បីបង្កើនចំណេះដឹង និងភាពរឹងមាំរបស់កូនស្រី ខណៈដែលការរាំ K-POP កំពុងទទួលការពេញនិយមពីសំណាក់តារាម៉ូដែលវ័យក្មេងនាពេលបច្ចុប្បន្ន។ អ្នកម្តាយ អូនតូច ដូរមីនិច និង សូហ្វីយ៉ា ក៏ស្វាគមន៍ផលិតករ និងបណ្តាក្រុមហ៊ុនដែលចាប់អារម្មណ៍ចង់ហៅម៉ូដែលតូចទាំងពីរទៅរួមការងារផងដែរ ព្រោះអ្នកស្រីចង់ឱ្យកូនៗមានបទពិសោធន៍ចូលរួមការងារជាមួយសង្គមឱ្យច្រើន សូម្បីតែការងារសប្បុរសធម៌ផ្សេងៗក៏អ្នកស្រីរីករាយឱ្យកូនៗចូលរួមដូចគ្នា។  តាមការបង្ហើបពីអ្នកម្តាយ ឆាប់ៗខាងមុខនេះម៉ូដែលតូចទាំងពីរអាចនឹងចូលរួមដើរបង្ហាញម៉ូដកម្មវិធីអន្តរជាតិមួយ តែពេលនេះសុំលាក់សិន ដល់ពេលវេលានឹងបង្ហាញឱ្យទស្សនិកជនដឹងតែម្តង៕  អត្ថបទ៖ រ៉ាត់ ចាន់ធីតា រូបភាព៖ ឃាង ទូច និងផ្តល់ឱ្យ  

  លោក ព្រហ្ម ពន្លឺ សិល្បករ និងជាឪពុករបស់កុមារា ឆលី បានប្រកាសរៀបចំការដេញថ្លៃលក់ស្នាដៃគំនូរ ដើម្បីប្រមូលថវិកាព្យាបាលជម្ងឺមហារីកដំណាក់កាលចុងក្រោយរបស់ ឆលី។ ឆ្លងកាត់ការព្យាបាលពីមួយដំណាក់កាលទីមួយដំណាក់កាល ពេលនេះស្ថានភាពជំងឺរបស់កុមារា ពន្លឺ វីរៈបុត្រ ហៅ ឆលី មានភាពល្អប្រសើរបានប្រមាណ ៦០ ភាគរយហើយ។  ប៉ុន្តែគ្រូពេទ្យជំនាញតម្រូវឱ្យបន្តព្យាបាលជំងឺរបស់ ឆលី ដោយការចាក់ថ្នាំគីមីបន្ថែមទៀត ដើម្បីឱ្យកុមារារូបនេះឆាប់ជាសះស្បើយ ១០០ភាគរយ។ នេះបើតាមការឱ្យដឹងពី សិល្បករ ព្រហ្ម ពន្លឺ ដែលត្រូវជាឪពុករបស់ ឆលី ក្នុងពិធីសន្និសីទសារព័ត៌មានប្រកាសពីការដេញថ្លៃផ្ទាំងគំនូរលើកទី២។ សិល្បករដ៏មានទេពកោសល្យរូបនេះបន្តថា ការរៀបចំបង្កើតពិធីដេញថ្លៃផ្ទាំងគំនូរលើកទី២ គឺដើម្បីបន្តកៀរគរថវិកាព្យាបាលជំងឺមហារីកលើកចុងក្រោយរបស់ ឆលី ព្រោះការព្យាបាលពីមួយដំណាក់កាលទៅមួយដំណាក់កាលត្រូវការខ្ទង់ចំណាយច្រើន ដែលវាហួសពីដែនលទ្ធភាពដែលលោកមាន។ ដូច្នេះ ទើបលោកសម្រេចចិត្តរៀបចំកម្មវិធីដេញថ្លៃគំនូរជាលើកទី ២ នេះ ដោយមានការសហការពីសាលាបណ្តុះបណ្តាលផ្នែកសិល្បៈពហុជំនាញ Lotus Dance Studio។  បន្ថែមពីលើការលើកឡើងរបស់ សិល្បករ ព្រហ្ម ពន្លឺ អ្នកនាង សុភ័ក្រ ហៅ អ៊ីវ៉ា ជាស្ថានិក Lotus Dance Studio បានរៀបរាប់ឱ្យដឹងពីការចូលរួមចំណែកក្នុងពិធីដេញថ្លៃផ្ទាំងគំនូរលើកទី២ យ៉ាងដូច្នេះថា៖   សូមជម្រាបថា កម្មវិធីដេញថ្លៃគំនូរលើកទី ២ ដើម្បីរ៉ៃអង្គាសថវិកាជួយដល់ការព្យាបាលជំងឺមហារីករបស់អូនតូច ឆាលី នឹងធ្វើឡើងនៅថ្ងៃទី១៣ ខែកញ្ញា ឆ្នាំ ២០២៤ នៅក្នុងបរិវេណអាគារ CEO Center ដែលតម្លៃសំបុត្រចូលរួម ៨ ដុល្លារ៕   អត្ថបទ៖ រ៉ាត់ ចាន់ធីតា រូបភាព៖ ឃាង ទូច 

   ម៉េង កែវពេជ្ជតា ត្រៀមទម្លាក់បទចម្រៀងថ្មីមួយបទទៀត ចំណងជើង «ចាប៉ីផ្អែម» ដែល ជាស្នាដៃចម្រៀងរៀបរាប់ពីភាពអស្ចារ្យនៃសិល្បៈវប្បធម៌ជាតិខ្មែរកំពុងទទួលការគាំទ្រពីទស្សនិកជន។គួរឱ្យភ្ញាក់ផ្អើលខ្លាំង ថ្មីៗនេះតារាចម្រៀង ម៉េង កែវពេជ្ជតា បានបើកដៃស្វាគមន៍សិល្បករស្រករក្រោយ ព្រីន មកបកស្រាយចម្រៀងរួមគ្នា ចំណងជើងថា «ពេលណាបងមករកអូន» ដែលស្នាដៃរួមគ្នាលើកដំបូងនេះផ្ទុះការគាំទ្រយ៉ាងខ្លាំងក្លា និងមានអ្នកចុចចូលស្តាប់កម្សាន្តលើឆានែលយូធូបប្រមាណជាង ៣លានដងឯណោះ។  មិនបង្អង់យូរ តារាចម្រៀងជើងចាស់រូបនេះ បានសម្រិតសម្រាំងផលិតបទចម្រៀងថ្មីៗបន្តទៀត ដើម្បីបម្រើអារម្មណ៍ប្រិយមិត្តទស្សនិកជន។ ប៉ុន្តែ លើកនេះរៀងប្លែកបន្តិច ព្រោះ ពេជ្ជតា បែរជាចាប់អារម្មណ៍ផលិតបទចម្រៀងបែបបុរាណ ដែលជួយផ្សព្វផ្សាយពីភាពអស្ចារ្យនៃប្រាង្គប្រាសាទអង្គរវត្ត ជាសម្បត្តិដូនតាខ្មែរដ៏ថ្លាថ្លៃមិនអាចកាត់ថ្លៃបាន។  «ចាប៉ីផ្អែម» ជាចំណងជើងបទចម្រៀងថ្មីរបស់ ម៉េង កែវពេជ្ជតា និងកូនស្រី ម៉េង ពេជ្ជតាសង្វាពេជ្រ ហៅ អូនផ្អែម ដែលនាងជាអ្នកលេងចាប៉ីដងវែងដោយផ្ទាល់តែម្តង។ក្រៅពីការច្រៀងរាប់ពីភាពអច្ឆរិយៈនៃសម្បិត្តវប្បធម៌ និងកេរមរតកដែលបុព្វបុរសខ្មែរបានបន្សល់ទុកឱ្យកូនចៅជំនាន់ក្រោយ តារាចម្រៀងជើងចាស់រូបនេះ បាននាំកូនស្រីបណ្តូលចិត្តគ្រងឈុតបុរាណ អប្សរាអង្គរ ពត់ពែនខ្លួនយ៉ាងល្វត់ល្វន់នៅបរិវេនប្រាសាទអង្គរវត្តបង្កើតជាផ្ទាំងទស្សនីយភាពដ៏អស្ចារ្យក្រៃលែងសម្រាប់ពុកម៉ែបងប្អូនស្តាប់កម្សាន្ត និងបានទស្សនាពីភាពអស្ចារ្យនៃដែនដីកម្ពុជាអច្ឆរិយៈ។   រឹតតែវិសេសវិសាលជាងនេះទៀត ក្នុងបទ «ចាប៉ីផ្អែម» នេះ ក៏ស្តែងបង្ហាញពីគុណតម្លៃនៃឧបករណ៍តន្ត្រីបុរាណខ្មែរ ចាប៉ីដងវែង ឱ្យពិភពលោកកាន់តែបានស្គាល់ និងឱ្យប្រជាជាតិកម្ពុជាកាន់តែស្រលាញ់ហើយចេះថែរក្សាសម្បត្តិវប្បធម៌ខ្មែរយើង។  តាមរយៈខមមិនឆ្លើយឆ្លងជាមួយអ្នកគាំទ្រ រាជនីសម្លេងមាស ម៉េង កែវពេជ្ជតា បានឱ្យដឹងថា នេះជាលើកទី១ ដែលនាងនិងកូនស្រីបានគ្រងឈុតអប្សរាអង្គរលើទឹកដីអង្គរអច្ឆរិយៈ ខេត្តសៀមរាប។  ដំបូងនាងគិតថា ការស្លៀកឈុតបុរាណថតចម្រៀងអាចនឹងជួបផលលំបាកច្រើន តែប្រហែលដោយសារបុណ្យបារមីដូនតាខ្មែរជួយឱ្យការថតបទចម្រៀងនេះដំណើរការទៅយ៉ាងរលូន គ្មានបញ្ហាអ្វីសោះឡើយ។ ដូច្នេះ នាងសង្ឃឹមថា ស្នាដៃនេះនឹងក្លាយជាប្រវត្តិសាស្ត្រសម្រាប់មនុស្សជាតិរហូតតទៅ។  ចម្រៀងពេញនៃបទ «ចាប៉ីផ្អែម» នឹងទម្លាក់ជូនប្រិយមិត្តស្តាប់កម្សាន្តនាពេលឆាប់ៗខាងមុខនេះ លើឆានែលយូធូប MKP Meng Keo Pichda ឬលោកអ្នកអាចតាមដានការ update ថ្មីៗលើទំព័រហ្វេសប៊ុក Meng Keo Pichenda - ពេជ្ជតា៕  អត្ថបទ៖ រ៉ាត់ ចាន់ធីតា រូបភាព៖ ផ្តល់ឱ្យ និងហ្វេសប៊ុក  

  ចូលសិល្បៈអស់ពេល ២២ ឆ្នាំហើយលោក ប៉ែន ចំរុង ទើបតែមានឱកាសល្អរៀបចំកម្មវិធីពិធីធំ ៣ ក្នុងពេលមួយ ដោយបានអញ្ជើញមិត្តសិល្បករជាច្រើនចូលរួមអបអសាទរ ។   ពិធីករល្បីឈ្មោះលោក ប៉ែន ចំរុង បានរៀបចំកម្មវិធីពិសេសរបស់ខ្លួនឡើង ដោយបានអញ្ជើញមិត្តសិល្បករជាច្រើនចូលរួមអបអរសាទរ ។ ក្នុងថ្ងៃពិសេសនេះលោកបានរៀបចំកម្មវិធីចំនួន ៣ ក្នុងពេលតែមួយ ដើម្បីរំលឹកជីវិតតស៊ូក្នុងសិល្បៈ ២២ ឆ្នាំរបស់ខ្លួនផង ដើម្បីធ្វើខួបកំណើតដល់កូនស្រីទាំង២ផង ជាពិសេសគឺបង្ហាញពីការដឹងគុណព្រមទាំងបង្ហាញពីអាជីវកម្មថ្មីរបស់ខ្លួនដែលទើបនិងចាប់ផ្តើម ។  កម្មវិធីខូបកំណើតកូនស្រីទាំងពីររបស់តារារូបនេះ បានរៀបចំឡើងកាលពីថ្ងៃទី ០៩ ខែ កញ្ញា ឆ្នាំ២០២៤ម្សិលមិញនេះ ប៉ែន ចំរុង ពិតជារំភើបចិត្តខ្លាំងណាស់នៅ ពេលឃើញមិត្តភក្តិក្នុងនិងក្រៅសិល្បៈចូលរួមយ៉ាងច្រើនកុះករ ជាពិសេសកម្មវិធីនោះវត្តមានលោកជំទាវចិត្តធម៌ ហ៊ុន ស៊ីណាត ចូលរូមអបអរសាទរផងដែរ ។  ក្នុងទឹកមុខញញឹម ប៉ុន្តែក្នុងចិត្តពោរពេញដោយអារម្មណ៍ក្តុកក្តួលចិត្ត និងអួលដើមករ លោក បានឱ្យដឹងថា ថ្ងៃនេះពិតលោកពិតជារំភើបចិត្តរកអ្វីប្រៀបផ្ទឹមពុំបាន ដោយសារតែថ្ងៃនេះលោកបានរៀបចំកម្មវិធីពិសេសៗជាច្រើនក្នុងពេលតែម្តង ។  លោក ប៉ែន ចំរុងក៏បានរំលឹកពីជីវិតដល់ជីវិត ២២ ឆ្នាំក្នុងសិល្បៈរបស់ខ្លួនថា លោកស្ទើរតែបោះបង់ខ្លួនឯងចោលទៅហើយ នៅពេលដែលលោកបានជួបព្យុះភ្លៀងដ៏ខ្លាំងក្លាកាលពីប៉ុន្មានឆ្នាំមុន ប៉ុន្តែបានៅរិយា និងមិត្តភក្តិនៅជុំវិញខ្លួនផ្តល់កម្លាំងចិត្ត និងលើកទឹកចិត្តដល់លោក ទើបលោកតស៊ូក្នុងជីវិតរហូតមកដល់សព្វថ្ងៃនេះ ។  លោក ប៉ែន ចំរុង ក៏បានលុតជង្គង់ និងជូនភួងផ្កាម្លិះលាយជាមួយផ្កាឈូកយ៉ាងស្រស់ស្អាតជូនដល់អ្នកមានគុណទាំងអស់ដែលបានជួយជ្រោមជ្រោងលោកក្នុងវិស័យសិល្បៈដូចជាលោក គឹមហេង , សោម ធីសែន , ហ្វៃ សំអាង , អ្នកស្រី ពាន់ ភួងបុប្ជា , ខាត់ សុឃីម , យុគ ចិន្តា ជាដើម... ។  ក្រៅពីបង្ហាញពីជីវិតតស៊ួក្នុងវិស័យសិល្បៈអស់ពេល ២២ ឆ្នាំយ៉ាងជូរចត់ លោក ប៉ែន ចំរុង ក៏បានខំប្រឹងប្រែងធ្វើការងារដែលខ្លួនស្រឡាញ់ និងបានបើកអាជីវកម្មបន្ថែមដើម្បីរកប្រាក់ចំណូល ដោយលោកបានបើកក្រុមហ៊ុន 4U Media និងចំរុង Entertainment  ផ្តល់នូវសេវាកម្មរៀបចំការប្រគំតន្រ្តីខ្នាតតូចនិងខ្នាតធំ ។   ជាមួយគ្នានោះផងដែរតារាល្បីឈ្មោះខាងលើ ក៏បានទទួលស្គាល់ផងដែរថា ការរៀបចំពិធីខួបកំណើតសម្រាប់កូនស្រីទាំងពីរនៅក្នុងថ្ងៃនោះ គឺទទួលបានការជួយជ្រោមជ្រែងពីអ្នកនៅជុំវិញខ្លួន បើតាមសមត្ថភាព គឺលោកមិនអាចរៀបចំកម្មវិធីនេះឡើងបានឡើយ ។ ចំណែកភរិយាលោក ប៉ែន ចំរុង វិញរំភើបស្ទើរស្រក់ទឹកភ្នែកនៅពេលដែលឃើញស្វាមីរៀបចំកម្មវិធីនេះឡើងយ៉ាងធំដុំ និងនឹកស្មានមិនដល់ ពីព្រោះដើមឡើយនិយាយគ្នាថា ធ្វើតូចតាចប៉ុណ្ណោះ ជាក់ស្តែង ហួសពីការរំពឹងទុក  ៕   អត្ថបទ ៖ ម៉ា រីសា រូបភាព ៖ ឃាង ទូច 

 កម្មវិធីបង្ហាញម៉ូដរបស់ម៉ាកសម្លៀកបំពាក់ល្បីអាមេរិក Tommy Hilfiger បានប្រមូលផ្ដុំដោយតារាល្បីៗជាច្រើនពីជុំវិញពិភពលោក ខណៈពីប្រទេសកម្ពុជា គឺតារាចម្រៀងជី ដេវីត និងទេព បូព្រឹក្សបានចូលរួម។ កម្មវិធីបង្ហាញម៉ូដសម្លៀកបំពាក់រដូវផ្ការីកឆ្នាំ២០២៥ របស់ប្រេន Tommy Hilfiger (ថមមី ហ៊ីលហ្វីហ្កឺ) ដែលរៀបចំឡើងក្នុងព្រឹត្តិការណ៍ New York Fashion Week កាលពីថ្ងៃអាទិត្យកន្លងទៅថ្មីៗនេះបានទទួលការចាប់អារម្មណ៍យ៉ាងខ្លាំង ជាមួយវត្តមានភ្ញៀវកិត្តិយសល្បីៗចម្រុះជាតិសាសន៍។  ខណៈពីប្រទេសកម្ពុជា តារាចម្រៀងជី ដេវីត និងទេព បូព្រឹក្ស ត្រូវបានអញ្ជើញចូលរួមជាភ្ញៀវកិត្តិយស សិល្បករល្បីៗអន្តរជាតិផ្សេងទៀតដែលបានចូលរួមក្នុងកម្មវិធីនេះដែរដូចជា សមាជិកក្រុមចម្រៀងនារីកូរ៉េ BLACKPINK - Jisoo, សមាជិកក្រុមចម្រៀងបុរស Stray Kids – Felix និង Lee Know (ហ្វេលីកស៍ និង លីណូ) តារាសម្ដែងថៃ Pon, Phuwin, Fourth និង Gemini (ប៉ន ភូវីន ហ្វស និងជេមីណាយ) តារាសម្ដែងអាមេរិក Brooke Shields (ប្រ៊ូក ស្ហៀលស៍) និង Keith Powers (ឃាស ផោវើស៍) តារាម៉ូដែលប្រេស៊ីល Jade Picon (ចេត ភីកខន) និងតារាហ៊ីបហប់ Questlove (ខ្វេសលើហ្វ) ជាដើម។  កម្មវិធីនេះត្រូវបានរៀបចំលើនាវាដ៏ធំមួយ ដោយអ្នកច្នៃម៉ូដ Tommy Hilfiger (ថមមី ហ៊ីលហ្វីហ្កឺ) ដែលជាម្ចាស់ប្រេនបានឱ្យដឹងថា លោកចង់រៀបចំកម្មវិធីបង្ហាញម៉ូដលើទឹក ឬលើទូក ដើម្បីឱ្យត្រូវនឹង Concept សម្លៀកបំពាក់ដែលមានលក្ខណៈ Chill និង relaxed។ ជាក់ស្ដែង សម្លៀកបំពាក់ដែលត្រូវបានបង្ហាញភាគច្រើនមានដូចជា ខោជើងរលុង អាវរងា Oversize និងរ៉ូបបែបរលុងៗដូចគ្នា។  សូមបញ្ជាក់ថាព្រឹត្តិការណ៍សប្ដាហ៍ម៉ូដក្រុងញូវយ៉ក ឬ New York Fashion Week នឹងបន្តរហូតដល់ថ្ងៃទី១១ ខែកញ្ញា ខណៈមានក្រុមហ៊ុននិងអ្នកច្នៃម៉ូដល្បីៗជិត ៦០ ចូលរួមបង្ហាញ Collection ថ្មីរបស់ខ្លួន ៕  ប្រែសម្រួល៖ វ៉ាន់ថន  

 តារាសម្ដែងស្រីជួរមុខពីររូបរបស់ហូលីវូដគឺ Angelina Jolie និង Salma Hayek បានបង្ហាញខ្លួនរួមគ្នាក្នុងកម្មវិធីមហោស្រពភាពយន្តអន្តរជាតិតូរ៉ុនតូ ប្រទេសកាណាដា។ តារាសម្ដែង Angelina Jolie និង Salma Hayek (សេលម៉ា ហាយេក) បានធ្វើឱ្យអ្នកគាំទ្រភាពយន្តជ្រួលច្របល់ ខណៈអ្នកទាំងពីរបានចូលរួមក្នុងកម្មវិធីមហោស្រពភាពយន្តអន្តរជាតិតូរ៉ុនតូ កាលពីថ្ងៃទី៨ ខែកញ្ញា ដើម្បីសម្ពោធភាពយន្ត “Without Blood”។ "Without Blood" គឺជាភាពយន្តទី ៥ របស់ Angelina Jolie ក្នុងតួនាទីជាអ្នកដឹកនាំរឿង ដោយមានតារាស្រី Salma Hayek ដែលជាមិត្តជិតស្និទ្ធសម្ដែងជាតួឯក។គួរបញ្ជាក់ថាតារាស្រីទាំងពីររូបចាប់ផ្ដើមស្និទ្ធស្នាលនឹងគ្នានៅពេលដែលពួកគេបានសម្ដែងក្នុងខ្សែភាពយន្ត “Eternals” របស់ Marvel Studios។  ក្នុងបទសម្ភាសជាមួយអ្នកសារព័ត៌មាន តារាសម្ដែង Salma Hayek បាននិយាយថាឆ្នាំនេះគឺជាឆ្នាំអស្ចារ្យសម្រាប់ Angelina Jolie ខណៈដែលកាលពីខែមុន នាងបានបង្ហាញស្នាដៃសម្ដែងថ្មីក្នុងរឿង “Maria” នៅមហោស្រពភាពយន្តក្រុង Venice ប្រទេសអ៊ីតាលី។ គួរបញ្ជាក់ថា ភាពយន្ត “Without Blood” គឺជាស្នាដៃនិពន្ធ ដឹកនាំ និងផលិតដោយ Angelina Jolie ផ្ទាល់ ដោយមានសាច់រឿងនិយាយពីដំណើរស្វែងរកការសងសឹក និងព្យាបាលផ្លូវចិត្តរបស់ក្មេងស្រីម្នាក់ក្នុងអំឡុងសង្គ្រាម។ បន្ទាប់ពីសម្ពោធបញ្ចាំងនៅមហស្រពភាពយន្តតូរ៉ុនតូ ភាពយន្តនេះនឹងត្រូវចែកចាយទូទាំងពិភពលោកតាមរយៈក្រុមហ៊ុន Fremantle (ហ្វ្រីមេនថល) ប៉ុន្តែកាលបរិច្ឆេទចេញបញ្ចាំងជាក់លាក់មិនទាន់មានការបញ្ជាក់នៅឡើយទេ ៕   ប្រែសម្រួល៖ វ៉ាន់ថន 

 លោក Mathew Tan (ម៉ាតសៀវ តាន់) អ្នកគ្រប់គ្រងថ្នាក់ជាតិ និងជាម្ចាស់ The RAMP Academy បានរៀបចំពិធីអបអរសាទរភាពជោគជ័យរបស់ម៉ូដែលតូច ២រូប គឺ ថៃ ដារ៉ូត និង ប៊ុន សុភ័ក្រទេវី ដើម្បីចែករំលែកបទពិសោធន៍ការប្រកួតលើឆាកអន្តរជាតិ។ ដើម្បីអបអរសាទរភាពជោគជ័យរបស់ម៉ូដែលតូច ២រូប គឺ កុមារី ថៃ ដារ៉ូត និងកុមារី ប៊ុន សុភ័ក្រទេវី អ្នកគ្រប់គ្រងថ្នាក់ជាតិ លោក Mathew Tan (ម៉ាតសៀវ តាន់) និងជាម្ចាស់ The RAMP Academy បានរៀបចំពិធី Meet & Greet យ៉ាងអធិកអធម កាលពីល្ងាចថ្ងៃទី៧ ខែកញ្ញា កន្លងទៅ ទុកជាការតបស្នងការខិតខំប្រឹងប្រែងរបស់កុមារីកម្ពុជាទាំង ២រូប។  ក្នុងរាត្រីដ៏សប្បាយរីករាយនេះ ម៉ូដែលវ័យក្មេង ថៃ ដារ៉ូត ម្ចាស់មកុដ World Junior Tourism Ambassador 2024 ពិតជាសប្បាយចិត្តដែល លោកគ្រូ ម៉ាតសៀវ រៀបចំកម្មវិធី Meet & Greet នេះឡើងមក ជាការស្វាគមន៍ និងជាការអបអរសាទរសម្រាប់ខ្លួនដែលបានឈ្នះមេដាយ ពានរង្វាន់ និងមកុដពីឆាកអន្តរជាតិ។ បន្ថែមពីលើនោះ ម្ចាស់មេដាយមាសពីកម្មវិធីប្រកួត World Championship of Performing Arts ក៏បានចែករំលែកបទពិសោធន៍ផ្សេងៗជុំវិញការប្រកួត និងបានផ្តាំឱ្យប្អូនៗកុមារមានភាពក្លាហាន ហ៊ានបញ្ចេញសមត្ថភាពលើឆាកប្រកួត ដើម្បីបង្ហាញឱ្យពិភពលោកឃើញពីភាពពូកែរបស់កុមារកម្ពុជាយើង។  អ្នកគ្រប់គ្រងថ្នាក់ជាតិ និងជាម្ចាស់ The RAMP Academy លោក Mathew Tan (ម៉ាតសៀវ តាន់) ពិតជារំភើបដែលអាចរៀបចំពិធី Meet & Greet ជូនកូនសិស្សទាំង ២រូប តែគួរឱ្យស្តាយដែលកុមារី ប៊ុន សុភ័ក្រទេវី អវត្តមានក្នុងពិធីជួបជុំនេះ ដោយសារតែបញ្ហាសុខភាព។ យ៉ាងណាមិញ នេះជាភាពជោគជ័យដ៏ធំធេងសម្រាប់លោក ដារ៉ូត និង ទេវី ហើយលោកនឹងបន្តពង្រឹងសមត្ថភាពម៉ូដែលក្មេងបន្តបន្ទាប់ទៀត ដើម្បីជំរុញពួកគេឱ្យឈានទៅដល់ការប្រកួតអន្តរជាតិ។ ឆ្លៀតឱកាសនេះ ម៉ាតសៀវ ក៏បានបង្ហើបគម្រោងថ្មីៗពី The RAMP Academy ឱ្យអាណាព្យាបាលរបស់ប្អូនៗកុមារបានដឹងផងដែរ។  បកប្រែ៖ «គម្រោងបន្ទាប់សម្រាប់សាលារបស់ខ្ញុំ គឺចង់បង្កើតថ្នាក់រៀនបន្ថែម ដើម្បីពង្រឹងការអភិវឌ្ឍសមត្ថភាពបុគ្គលិកលក្ខណៈ ពង្រឹងសមត្ថភាពពួកគេឱ្យកាន់តែល្អខ្លាំងជាងមុនក្នុងឧស្សាហកម្មនេះ ហើយយើងក៏មានគម្រោងរៀបចំកម្មវិធី I Am Model Search Cambodia ដែលនេះជាលើកទី១សម្រាប់កម្ពុជា តាំងពីយើងឈ្នះជយលាភី I Am Model Search International ហើយ ដារ៉ូត ក៏ជាម្ចាស់ជយលាភីលំដាប់រងទី២ ពីការប្រកួតអន្តរជាតិនេះ។ ... សម្រាប់កម្មវិធីប្រកួត World Championship of Performing Arts គឺឥឡូវនេះយើងកំពុងបើកទទួលពាក្យ ព្រោះវាពិតជាពិបាកខ្លាំងក្នុងការតំណាងកម្ពុជាទៅប្រកួតនៅសហរដ្ឋអាមេរិក ដូចដែលយើងដឹងស្រាប់ហើយថា ការចូលរួមប្រកួតនៅសហរដ្ឋអាមេរិកយើងត្រូវតែមានសមត្ថភាពខ្ពស់ក្នុងការប្រកួតប្រជែង ហើយយើងត្រូវតែប្រកួតប្រជែងខ្លាំងសម្រាប់ការប្រកួតនេះ»។  ក្នុងពិធី Meet & Greet នេះផងដែរ ក៏មានការដើរបង្ហាញម៉ូដពីតារាម៉ូដែលវ័យក្មេងជាច្រើនរូប ដែលពួកគេបានបញ្ចេញសមត្ថភាពដើរម៉ូដយ៉ាងស្ទាត់ជំនាញចំពោះមុខអ្នកចូលរួម ហើយស្នូរសម្លេងទះដៃត្រូវបានបន្លឺឡើងកងរំពងជាការអបអរ និងជាការលើកទឹកចិត្តដល់ម៉ូដែលតូចៗគួរឱ្យស្រលាញ់របស់យើង។ រឹតតែពិសេសជាមួយការបកស្រាយចម្រៀងយ៉ាងពីរោះរណ្តំរបស់សិល្បករពហុជំនាញ វ៉ាត វ៉ាន់ ដែលបានចូលរួមញ៉ាំងពិធី Meet & Greet ឱ្យកាន់តែសប្បាយរីករាយ និងមានភាពអធិកអធមខ្លាំងឡើង។  គិតត្រឹមខែកញ្ញា ឆ្នាំ២០២៤ ដារ៉ូត ឈ្នះជយលាភីអន្តរជាតិ ៣ កម្មវិធីផ្សេងៗគ្នា រួមមាន៖ ជយលាភី 2nd Runner up ពីការប្រកួត I Am Model Search International 2024 លើវិញ្ញាសារផ្នែកកុមារ (Kids Category) នៅម៉ាឡេស៊ី កាលអំឡុងខែមករា ឆ្នាំ២០២៤ , ដណ្តើមបានមេដាយមាស និងសំរិទ្ធសរុបចំនួន ៦ ពីការប្រកួតសិល្បៈលំដាប់ពិភពលោក WCOPA (World Championship of Performing Arts) នៅក្រុងឡងប៊ិច រដ្ឋកាលីហ្វ័ញ៉ា សហរដ្ឋអាមេរិក កាលពីដើមខែកក្កដា ឆ្នាំ២០២៤ ហើយថ្មីៗនេះ កុមារីវ័យ១០ឆ្នាំនេះ ទើបតែដណ្តើមបានមកុដ World Junior Tourism Ambassador 2024 និងពានរង្វាន់ចំនួន ២ គឹ Best in National Costume , Best in Video Tourism ពីការប្រកួតនៅម៉ាឡេស៊ី។  ចំណែក កុមារីឆ្លាតវ័យ សុភ័ក្រទេវី ក៏បានឈ្នះមេដាយមាសក្នុងវគ្គ Ellimination Round និងមេដាយប្រាក់វគ្គ Pageant Category រួមទាំងជយលាភីលំដាប់រងទី២ ពីការប្រកួត World Junior Tourism Ambassador 2024 និងពានរង្វាន់ Rising Star ថែមទៀតផង៕  អត្ថបទ៖ រ៉ាត់ ចាន់ធីតា រូបភាព៖ ឃាង ទូច   

 តារាស្រីចម្រៀងនិងសម្ដែងស្រីល្បីអាមេរិក Selena Gomez បានក្លាយជាមហាសេដ្ឋីមានទ្រព្យសម្បត្តិពាន់លានដុល្លារទាំងវ័យក្មេង ក្រោយជោគជ័យខ្លាំងក្នុងជំនួញគ្រឿងសម្អាង។ តារាសម្តែង ចម្រៀង និងជាសហគ្រិនវ័យ ៣២ ឆ្នាំ Selena Gomez ទើបតែសម្រេចបានជោគជ័យដ៏ធំផ្នែកហិរញ្ញវត្ថុ ធ្វើឱ្យនាងក្លាយជាមហាសេដ្ឋីវ័យក្មេងបំផុតមួយរូបនៅសហរដ្ឋអាមេរិក។ យោងតាមសារព័ត៌មាន Bloomberg ទ្រព្យសម្បត្តិរបស់នាងត្រូវបានគេវាយតម្លៃថាមានប្រមាណ ១,៣ ពាន់លានដុល្លារ។ បើទោះបីទ្រព្យសម្បត្តិមួយចំនួនរបស់ម្ចាស់បទ “Same Old Love” បានមកពីការច្រៀង ការធ្វើ BA ឱ្យម៉ាកល្បីៗ និងការសម្តែងក៏ពិតមែន ប៉ុន្តែផ្អែកតាមប្រភពព័ត៌មានដដែល ទ្រព្យសម្បត្តិភាគច្រើនរបស់នាង គឺបានមកពីភាគហ៊ុនរបស់នាងក្នុងក្រុមហ៊ុនគ្រឿងសម្អាង Rare Beauty ដែលនាងបានបង្កើតផ្ទាល់កាលពី៥ឆ្នាំមុន។ បច្ចុប្បន្នក្រុមហ៊ុននេះមានតម្លៃសរុបប្រមាណ ២ ពាន់លានដុល្លារ។ គួរបញ្ជាក់ថា Selena Gomez គឺជាបុគ្គលល្បីដែលមានអ្នកតាមដានច្រើនបំផុតលំដាប់ទី៣ លើ Instagram ពោលគឺប្រមាណ ៤២៤ លាននាក់ ធ្វើឱ្យនាងអាចទទួលបានតម្លៃខ្លួនខ្ពស់ក្នុងការផ្សព្វផ្សាយពាណិជ្ជកម្មម្ដងៗ។ ជាក់ស្ដែងនាងធ្លាប់បានចុះកិច្ចសន្យាផ្សព្វផ្សាយតម្លៃ ៣០ លានដុល្លារជាមួយក្រុមហ៊ុន Puma និងកិច្ចសន្យាតម្លៃ ១០ លានដុល្លារពីក្រុមហ៊ុន Coach។ ប្រាក់ចំណូលមួយចំណែកតូចទៀតគឺមកពីការសម្ដែងរឿងភាគទូរទស្សន៍ "Only Murders in the Building" ដែលបច្ចុប្បន្នបានបន្តដល់រដូវកាលទី ៥ ហើយ ខណៈដែលនាងអាចរកបាន ៦ លានដុល្លារក្នុងមួយរដូវកាល ៕   ប្រែសម្រួល៖ វ៉ាន់ថន  

តារាសម្ដែងល្បីកូរ៉េ Hyun Bin និង Lee Dong-Wook បានទាក់ទាញអ្នកគាំទ្រកកកុញខណៈចូលរួមកម្មវិធីសម្ពោធបញ្ចាំងភាពយន្តថ្មីរបស់ខ្លួននៅក្នុងព្រឹត្តិការណ៍មហោស្រពភាពយន្តទីក្រុង Toronto ប្រទេសកាណាដា។ អ្នកគាំទ្រភាពយន្តជាច្រើននាក់បានរង់ចាំអស់ជាច្រើនម៉ោងនៅខាងក្រៅរោងភាពយន្ត សម្រាប់ការសម្ពោធបញ្ចាំងភាពយន្តកូរ៉េ "Harbin" នៅទីក្រុង Toronto ប្រទេសកាណាដា កាលពីថ្ងៃអាទិត្យ ដោយសង្ឃឹមថានឹងបានជួបតារាសម្ដែង Lee Dong-Wook (លី ដុងវុក) និង Hyun Bin (យុន ប៊ីន) ដែលទើបតែចាប់ដៃគូសម្ដែងរួមគ្នាលើកដំបូងក្នុងរឿងថ្មីនេះ។ តារាសម្ដែង Lee Don-Wook ដែលល្បីល្បាញខ្លាំងតាមរយៈភាពយន្តភាគ “My Girl” បាននិយាយថា នេះជាលើកទីមួយរបស់លោកដែលបានចូលរួម និងមានភាពយន្តបញ្ចាំងក្នុងកម្មវិធីនេះ ហើយលោកពិតជាអរគុណ និងរីករាយណាស់ដែលបានជួបអ្នកគាំទ្រនេះទីនេះ។ សម្រាប់តារាសម្ដែង Hyun Bin ដែលល្បីល្បាញសម្រាប់ការសម្ដែងភាពយន្តភាគ “Crash Landing on You” នេះក៏ជាលើកដំបូងដូចគ្នា។ គួរបញ្ជាក់ថា "Harbin" គឺជាភាពយន្តបែបប្រវត្តិសាស្ត្រនិយាយអំពីការតស៊ូរបស់កងទ័ពតូច ប៉ុន្តែក្លាហាន ដែលបានប្រយុទ្ធដើម្បីរំដោះប្រទេសកូរ៉េពីការគ្រប់គ្រងគាបសង្កត់របស់ជប៉ុននៅដើមសតវត្សទី ២០ ។  ការប្រយុទ្ធតស៊ូនេះបាននាំឱ្យពួកគេទៅដល់ទីក្រុង Harbin ភាគឦសាននៃប្រទេសចិន ដើម្បីអនុវត្តផែនការធ្វើឃាតនាយករដ្ឋមន្ត្រីទីមួយរបស់ប្រទេសជប៉ុន។ ភាពយន្តនេះដែរជាស្នាដៃដឹកនាំដោយ លោក Woo Min-ho ដែលត្រូវបានស្គាល់ថាជាអ្នកដឹកនាំរឿង "The Man Standing Next" ជាភាពយន្តតំណាងកូរ៉េខាងត្បូងចូលរួមប្រកួតកម្មវិធីអូស្កាឆ្នាំ ២០២១ ៕    ប្រែសម្រួល៖ វ៉ាន់ថន 

 រស់នៅជាមួយជំងឺមហារីកសុដន់អស់ពេល ២ ឆ្នាំ និងបានបាញ់គីមីចំនួន ៨ ដង បានជាសះស្បើយពីជំងឺហើយ តារាសម្តែង អេង វ៉ាណងបានទទូចសុំការងារធ្វើពីបណ្តាផលិតករក្នុងនិងក្រៅប្រទេស ដើម្បីរកប្រាក់ចិញ្ចឹមខ្លួន និង កូន ៣ នាក់ក្នុងបន្ទុក ។   តារាសម្តែង អេង វ៉ាណង បានរស់នៅជាមួយជំងឺមហារីកសុដន់អស់ពេល ២ ឆ្នាំ ដោយបានបាញ់គីមីចំនួន ៨ ដងដើម្បីព្យាបាលជំងឺ ពេលនេះតារាសម្តែងស្រីរូបនេះបានជាសះស្បើយពីជំងឺដ៏កាចសាហាវនេះហើយ ដោយនាងទទួចសុំការងារពីបណ្តាផលិតករក្នុងនិងក្រៅស្រុកធ្វើការងារ ដើម្បីទទួលបានប្រាក់ចំណូលខ្លះចិញ្ចឹមខ្លួន និងកូនទាំង ៣ នាក់ ។ រស់នៅជាស្រ្តីមេម៉ាយមានកូន ៣នាក់ក្នុងបន្ទុកមិនមែនជារឿងងាយស្រួលទេ ប៉ុន្តែតារាសម្តែង អេង វ៉ាណង មិនដែលត្អូញត្អែរក្នុងជីវិត ទោះបីជាត្រូវគេមើលងាយមើលថោក នាងបានតស៊ូរហូតកូនទាំង ៣ បានធំធាត់ និងបានចូលសាលារៀនត្រឹមត្រូវ ។   អ្វីដែលកាន់តែរន្ធត់ចិត្តទៀតនោះគឺ ២ ឆ្នាំមកនេះ តារាសម្តែងខាងលើ បានរស់នៅជាមួយជំងឺដ៏កាចសាហាវមហារីកសុដន់ ដែលបានញុំាញីជីវិតរបស់ខ្លួនឱ្យធ្លាក់ដល់សូន្យ ស្ទើរតែគ្មានជីវិតរស់ តែសំណាងល្អ នាងទទួលបានការជួយពីសប្បុរសជន មិត្តភក្តិក្នុងនិងក្រៅសិល្បៈ នាងបានយកលុយទៅបាញ់គីមីចំនួន ៨ ដង ទើបអាចមានជីវិតរស់ដល់សព្វថ្ងៃនេះ ។    តារារូបនេះទទួលបានកម្លាំងចិត្តយ៉ាងធំធេងក្នុងការតស៊ូប្រយុទ្ធប្រឆាំងជាមួយជំងឺដ៏កាចសាហាវនេះ គឺកូនៗទាំង ៣ នាក់របស់ខ្លួន ថ្វីដ្បិតតែពេលនេះនាងបានជាសះស្បើយពីជំងឺក៏ពិតមែន តែនាងត្រូវតបអាហារ និង រស់នៅស្អាត ត្រូវទៅជួបគ្រូពេទ្យតាមការណាត់ ។     តារាសម្តែង អេង វ៉ាណង បានប្រលូកក្នុងសិល្បៈអស់រយៈពេល ២០ ឆ្នាំហើយ ប៉ុន្តែនាងពុំទាន់មានផ្ទះសំបែងរស់នៅត្រឹមត្រូវនិងគេនៅឡើយទេ សព្វថ្ងៃនេះនាងរស់នៅផ្ទះជួលតូចចង្អៀត នាងសង្ឃឹមថា ពេលដែលជំងឺរបស់ខ្លួនជាសះស្បើយ នឹងទទួលបានការងារច្រើនពីសំណាក់ផលិតករ ខ្មែរ ដើម្បីរកប្រាក់ចំណូលចិញ្ចឹមជិវិត និងកូនៗទាំង ៣ នាក់ ៕    អត្ថបទ ៖ ម៉ា រីសា រូបភាព ៖ ឃាង ទូច និង ហ្វេសប៊ុក   

ដោយមានការជំរុញពីបច្ចេកវិទ្យាថ្មីៗផងនោះ វិស័យទេសចរណ៍ឆ្លាតវៃបានក្លាយជាពាក្យពេចន៍ដ៏ពេញនិយមដែលចង់សំដៅទៅលើឧស្សាហកម្មគ្មានផ្សែងរបស់ប្រទេសចិនដែលទាក់ទាញអ្នកទេសចរមកពីគ្រប់ទិសទីជុំវិញពិភពលោក។ ក្រុមអ្នកទេសចរនៅទូទាំងពិភពលោកដែលធ្វើដំណើរកម្សាន្តនៅប្រទេសចិនកាន់តែច្រើនឡើងៗកំពុងសិក្សាស្វែងយល់អំពីទិដ្ឋភាពដ៏សម្បូរបែបនៃប្រទេសចិន។ ពោលគឺចាប់តាំងពីតំបន់ទីប្រជុំជនដែលសម្បូរមនុស្សធ្វើដំណើរយ៉ាងច្រើនកកកុញដូចជានៅប៉េកាំង សៀងហៃ និងក្វាងចូវជាដើមឆ្ពោះទៅតំបន់ដែលមិនសូវមានគេស្គាល់ ប៉ុន្តែមានចំណុចទាក់ទាញខ្លាំងដូចគ្នា។ នវានុវត្តន៍ចុងក្រោយនៅក្នុងវិស័យទេសចរណ៍វៃឆ្លាតរបស់ចិនគេអាចមើលឃើញនៅមហាកំផែងទីក្រុងប៉េកាំងត្រង់ចំណុចបាដាលីង (Badaling)។   នៅទីនោះ អាជ្ញាធរទីក្រុងប៉េកាំងប្រើប្រាស់ដ្រូនដឹកជញ្ជូនភស្តុភារ។ អ្នកទេសចរអាចប្រើប្រាស់ស្មាតហ្វូនស្កេនឃ្យូអ័រកូត (QR code) និងចូលទៅមើលរបាយការណ៍នៃការដឹកជញ្ជូន។ ត្រឹមតែរយៈពេល៥នាទីប៉ុណ្ណោះ ពួកគេអាចទទួលបានបញ្ញើជាថ្នាំពេទ្យ, ទឹកសុទ្ធ និងចំណីអាហារដែលបញ្ជូនតាមយន្តហោះដ្រូន។   អ្នកទេសចរជនជាតិព័រទុយហ្កាល់ម្នាក់ប្រាប់ថាគាត់បានកុម្ម៉ង់ឲ្យដឹកឆ័ត្រ១ទៅឲ្យគាត់។ គាត់ទទួលបានឆ័ត្រ។ ពិតជារឿងដែលមិននឹកស្មានដល់មែន។ នៅតំបន់ទេសចរណ៍ដ៏ពេញនិយមដទៃទៀតនៅប្រទេសចិនក៏មានសេវាទេសចរណ៍ឆ្លាតវៃនេះផងដែរដែលប្រើប្រាស់វិធីដឹកជញ្ជូនតាមទម្លាប់ចាស់ផង និងប្រើប្រាស់វិធីដឹកជញ្ជូនតាមបច្ចេកវិទ្យាទំនើបផងដើម្បីផ្ដល់ជូនអ្នកទេសចរនូវបទពិសោធវប្បធម៌ដ៏គួរឲ្យទាក់ទាញ និងប្រកបដោយគំនិតច្នៃប្រឌិត។   ដោយមានជំនួយពីបច្ចេកវិទ្យាស៊្រីឌី (3D) និងវីអ័រ (VR) ផងនោះ អ្នកទេសចរបរទេសអាចមានឱកាសទស្សនាសិល្បៈចម្លាក់នៅតាមល្អាងភ្នំដែលមានអាយុកាលពាន់ឆ្នាំនៅល្អាងម៉ូកាវ.ក្រូតូ (Mogao Grottoes) និងរូបចម្លាក់ដ៏អស្ចារ្យនៅសារមន្ទីរឌុនហួង(Dunhuang)នៃខេត្ត កានស៊ូ (Gansu)៕  ប្រែសម្រួល៖ អន សំអាង 

 ស្ថិតនៅក្នុងគ្រួសារដែលមានជីវភាពធូធារគ្រាន់តារាសម្ដែងវ័យ១៧ ឆ្នាំ ឃុល សាមេនតា ត្រូវបានឪពុកម្តាយរៀបចំ និងចង់ឱ្យនាងចេញទៅបន្តការសិក្សានៅក្រៅប្រទេស ជាជាងចាប់អាជីពសម្តែង ។  ស្របពេលមានវត្តមាននៅក្នុងភាពយន្តថ្មីរបស់ខ្លួន កញ្ញាវ័យ ១៧ ឆ្នាំ ឃុល សាមេនតា កាន់តែទទួលបានការចាប់អារម្មណ៍ពីមហាជន នាងមិនត្រឹមត្រូវមានទេពកោសល្យសម្តែងល្អប៉ុណ្ណោះទេ នាងថែមទាំងមានរូបសម្រស់ស្រស់ស្អាត មិនចាញ់តារាស្រីមួយចំនួនឡើយ។ ប៉ុន្តែអ្វីដែលគួរឱ្យស្តាយនោះ គឺនៅពេលដែលកំពុងល្បីឈ្មោះស្រាប់តែនាងត្រៀមនឹងចេញទៅបន្តការសិក្សានៅក្រៅប្រទេសតាមបំណងគ្រួសារទៅវិញ ។   ក្នុងមួយឆ្នាំៗតារាសម្តែងវ័យក្មេងរូបនេះ ទទួលថតរឿងតិចតួចបំផុត ភាគច្រើននាងទទួលថតរឿងខ្នាតធំប៉ុណ្ណោះជាក់ស្តែងកន្លងមកនាងលេចធ្លោខ្លាំងក្នុងរឿង « នាឡិកាដាស់វិញាណ » ដែលល្បីល្បាញទាំងក្នុងនិងក្រៅប្រទេស ហើយនាងថែមទាំងទទួលបានពានរង្វាន់ពីស្នាដៃនោះផងដែរ ។   ថ្មីៗនេះ ឃុល សាមេនតា ក៏កំពុងមានវត្តមាននៅក្នុងរឿង« ព្រាយផ្ទះកន្លង » របស់ផលិតកម្ម LD  ដោយនាងបានសម្តែងជាតួឯកស្រីនៅក្នុងរឿងនេះតែម្តង ស្នាដៃថ្មីនេះកាន់តែបង្ហាញឱ្យឃើញថា ឃុល សាមេនតា ខ្លាំងមិនធម្មតាទេ ។   បច្ចុប្បន្នតារាសម្ដែងវ័យក្មេងរូបនេះ ជាសិស្សថ្នាក់ទី ១២ នៅក្នុងសាលាឯកជនមួយ នៅពេលបញ្ចប់ការសិក្សា នាងមានបំណងនឹងចេញទៅបន្តការសិក្សានៅក្រៅប្រទេសតាមការពេញចិត្តរបស់ឪពុកម្តាយ ។  កញ្ញា បានប្រាប់ថា ពេលប្រលងចប់នាងនឹងធ្វើតាមសំណូមពររបស់ឪពុកម្តាយ ប៉ុន្តែនាងក៏មិនបោះបង់អាជីពសិល្បៈចោលដែរ បើមានឱកាសល្អនាងនៅតែទទួលសម្តែងដូចដើម ។   កញ្ញា ឃុល សាមេនតា ជាតារាសម្តែងស្រីវ័យក្មេងដ៏មានទេពកោសល្យម្នាក់នាពេលបច្ចុប្បន្ន សូម្បីតែអ្នកដឹកនាំរឿងល្បីៗជាច្រើនក៏បានសរសើរពីស្នាដៃសម្តែងរបស់នាង រហូតធ្វើឱ្យនាងមានទីផ្សារខ្ពស់ក្នុងវិស័យសិល្បៈ ប៉ុន្តែពេលនេះដោយសារមមាញឹក និងត្រៀមខ្លួនដើម្បីប្រលងបញ្ចប់ថ្នាក់បាក់ឌុបរបស់ខ្លួនក្នុងឆ្នាំ ២០២៥ ខាងមុខ នាងសុំមិនទទួលថតរឿងច្រើនឡើយ ៕   អត្ថបទ ៖ ម៉ា រីសា រូបភាព ៖ ឃាង ទូច  

  បេក្ខភាពផ្លូវការ ១១នាក់  Miss Queen Phnom Penh 2025 កំពុងពង្រឹងសមត្ថភាព និងបានប្ដេជ្ញាចិត្តនឹងព្យាយាមដណ្ដើមមកុដរៀងៗខ្លួន ខណៈផ្ដាច់ព្រ័ត្រនឹងចូលមកដល់ឆាប់ៗ។  ចំណាយពេលក្នុងការប្រកួតជាច្រើនសប្តាហ៍រួចមក ការប្រកួត Miss Queen Phnom Penh 2025 ឈានដល់វិញ្ញាសាររឹតតែសំខាន់ មុនរាត្រីផ្តាច់ព្រ័ត្រត្រូវប្រារព្ធឡើងនាចុងខែកញ្ញា ឆ្នាំ២០២៤ នេះ។  លោក មឿកដេត ដេវ៉ីត អ្នកគ្រប់គ្រងថា្នក់ខេត្ត Miss Queen Phnom Penh 2025 បានឱ្យដឹងថា បច្ចុប្បន្នបេក្ខភាពផ្លូវការ មានចំនួន ១១នាក់ ដោយពួកគេត្រៀមជាស្រេចសម្រាប់ការប្រកួតវគ្គផ្តាច់ព្រ័ត្រដែលនឹងឈានមកដល់នាពេលឆាប់ៗនេះ។  ដើម្បីពង្រឹងសមត្ថភាពបេក្ខភាពឱ្យមានការប្រកួតប្រជែងខ្ពស់វិញ្ញាសារសំខាន់ៗមានដូចជា ការប្រកួតឈុតប្រពៃណីខ្មែរ , ការប្រកួតឈុតហែលទឹក និងការប្រកួតឈុតរាត្រីស្រមោលសរ ដែលទស្សនិកជនអាចចូលរួមបោះឆ្នោតជូនបេក្ខភាពដែលលោកអ្នកពេញចិត្តបានដោយស៊េរី។   អ្នកគ្រប់គ្រងថា្នក់ខេត្តរូបនេះ បញ្ជាក់ឱ្យដឹងទៀតថា មែនទែនទៅ ការប្រកួតបវរកញ្ញាផ្សេងៗ រួមទាំងការប្រកួតថ្នាក់ជាតិ Miss Queen Cambodia ក៏មានដាក់បញ្ចូលវិញ្ញាសារទាំង ៣ ខាងលើនេះផងដែរ ទើបលោកចង់ឱ្យបេក្ខភាពទាំងអស់ទទួលបានបទពិសោធន៍ ដើម្បីភាពងាយស្រួលដល់ការប្រកួតថ្នាក់ជាតិ។  សំខាន់ជាងនេះទៀតនោះ គឺលោកចង់ឱ្យបវរកញ្ញាភេទទី៣កម្ពុជា បានសាកល្បងសកម្មភាពផ្សេងៗដូចដែលបុរសស្រ្តីបានធ្វើ ឱ្យត្រូវទៅនឹងទស្សនៈវិស័យរបស់កម្មវិធីបវរកញ្ញាភេទទី៣កម្ពុជាតែម្តង ដែលចង់ចូលរួមលើកតម្កើងភេទី៣ក្នុងសង្គមកម្ពុជា។  បន្ថែមពីលើនោះ បេក្ខភាពផ្លូវការទាំង ១១រូប ក៏ចូលរួមចែករំលែកក្តីស្រលាញ់តាមរយៈការធ្វើសកម្មភាពសប្បុរសធម៌ផ្សេងៗតាមលទ្ធភាពដែលអាចធ្វើបានផងដែរ។ អ្នករៀបចំខាងលើ សង្ឃឹមថានឹងអាចជ្រើសរើសបានម្ចាស់ជយលាភីដ៏ស័ក្កសមម្នាក់ ដើម្បីតំណាងរាជធានីភ្នំពេញចូលរួមការប្រកួតថ្នាក់ជាតិ នាចុងខែកញ្ញាខាងមុខនេះ៕* អត្ថបទ៖ រ៉ាត់ ចាន់ធីតា រូបភាព៖ ឃាង ទូច