មនុស្សពីរនាក់បានរងរបួសដោយសារហេតុការណ៍ផ្ទុះកាំជ្រួចខុសបច្ចេកទេសក្នុងការប្រគំតន្ត្រីទេសចរណ៍របស់ក្រុមចម្រៀងកូរ៉េ SEVENTEEN កាលពីចុងសប្ដាហ៍។ក្រុមចម្រៀងបុរស SEVENTEEN និងផលិតកម្មរបស់ពួកគេ Pledis Entertainment បានចេញលិខិតសុំទោសបន្ទាប់ពីមានឧបទ្ទវហេតុផ្ទុះកាំជ្រួចធ្វើឱ្យអ្នកគាំទ្រពីរនាក់រងរបួសនៅក្នុងការប្រគុំតន្ត្រីរបស់ពួកគេនៅទីក្រុងសេអ៊ូល កាលពីថ្ងៃទី១៣ ខែកញ្ញា កន្លងទៅ ។ តាមរយៈសេចក្តីថ្លែងការណ៍មួយដែលបានបង្ហោះនៅលើ Weverse ក្រុមហ៊ុនចម្រៀងកូរ៉េខាងត្បូងមួយនេះបាននិយាយថា "ក្នុងអំឡុងពេលផ្នែកចុងក្រោយនៃការប្រគំតន្ត្រី ទេសចរណ៍ពិភពកលោករបស់ Seventeen នៅ INCHEON មានកាំជ្រួចមួយចំនួនបានធ្លាក់មកលើទស្សនិកជនដោយមិននឹកស្មានដល់។  ទោះបីជាក្រុមហ៊ុនជំនាញបានធ្វើការត្រួតពិនិត្យសុវត្ថិភាពម្តងហើយម្តងទៀត រួមទាំងការកំណត់ចម្ងាយ និងទិសដៅសមស្របក៏ដោយ ប៉ុន្តែពួកយើងបានរកឃើញថាឧបទ្ទវហេតុនេះបានកើតឡើងដោយសារតែផលិតផលខូចគុណភាពមួយចំនួន។ យើងសូមអភ័យទោសដោយស្មោះចំពោះទស្សនិកជនទាំងអស់ដែលបានជួបការលំបាក ឬការរំខានដោយឧប្បត្តិហេតុដែលមិននឹកស្មានដល់នេះ។" Pledis បាននិយាយថាសមាជិកទស្សនិកជនពីរនាក់បានរងរបួសស្រាលហើយបានទទួលការព្យាបាលនៅនឹងកន្លែង ដោយអះអាងថានឹងបន្តផ្តល់ការគាំទ្រពេញទំហឹងសម្រាប់ការថែទាំតាមដានរបស់ពួកគេ ដើម្បីធានាឱ្យមានការជាសះស្បើយយ៉ាងឆាប់រហ័ស។  គួរបញ្ជាក់ថា ដំណើរប្រគំតន្ត្រីទេសចរណ៍ពិភពលោក “NEW_” បានចាប់ផ្តើមនៅនៅទីក្រុងសេអ៊ូល ប្រទេសកូរ៉េខាងត្បូង ជាមួយការសម្ដែងចំនួន២ គឺថ្ងៃទី ១៣ និង ១៤ ខែកញ្ញា នៅពហុកីឡដ្ឋាន Incheon Asiad Main Stadium មុននឹងចេញសម្ដែងនៅក្រៅប្រទេសដូចជាសហរដ្ឋអាមេរិក និងជប៉ុន។ ខណៈសមាជិកក្រុមទាំងអស់មាន ១៣ នាក់ ប៉ុន្តែសម្រាប់ការប្រគំតន្ត្រីទេសចរណ៍លើកនេះ សមាជិក ៤ នាក់រួមមាន Jeonghan, Wonwoo, Hoshi និង Woozi នឹងមិនបានចូលរួមនោះទេ ដោយសារជាប់បំពេញកាតព្វកិច្ចយោធា ៕   ប្រែសម្រួល៖ វ៉ាន់ថន  

  World Miss University  នៅចុងឆ្នាំ២០២៥នេះ កម្ពុជាយើងនឹងធ្វើម្ចាស់ផ្ទះរៀបចំកម្មវិធីលំដាប់អន្តរជាតិ និងកម្មវិធីថ្នាក់ជាតិ ២ ផ្ទួនគ្នា គឺ ទី១ «ការប្រកួតបវរកញ្ញាសាកលវិទ្យាល័យពិភពលោកលើកទី៣២ នៅកម្ពុជា» និង ទី២ «ការប្រកួតថ្នាក់ជាតិកម្មវិធី 2025 World Miss University Cambodia»។ស្ថាប័នគ្រប់គ្រងកម្មវិធី World Miss University កំពុងត្រៀមខ្លួនធ្វើជាម្ចាស់ផ្ទះរៀបចំការប្រកួតកម្មវិធីលំដាប់អន្តរជាតិ និងកម្មវិធីថ្នាក់ជាតិ ២ ផ្ទួនគ្នា នៅចុងឆ្នាំ២០២៥នេះ។  តាមការបញ្ជាក់ពី លោក ស៊ឹងមិន អ៊ី ប្រធានគណៈកម្មការរៀបចំការប្រកួត World Miss University កម្មវិធី ២ ដែល កម្ពុជា គ្រោងធ្វើជាម្ចាស់ផ្ទះនៅចុងឆ្នាំនេះគឺ ទី១. ការប្រកួតបវរកញ្ញាសាកលវិទ្យាល័យពិភពលោកលើកទី៣២ នៅកម្ពុជា (32nd World Miss University Cambodia )  ដែលនឹងប្រព្រឹត្តិឡើងចាប់ថ្ងៃទី០១-១៦ ខែវិច្ឆិកា ឆ្នាំ២០២៥ និង ទី២. ការប្រកួតថ្នាក់ជាតិកម្មវិធី 2025 World Miss University Cambodia ដែលគ្រោងរៀបចំឡើងចាប់ពីថ្ងៃទី២៣-២៨ ខែធ្នូ ឆ្នាំ២០២៥។ ប្រធានគណៈកម្មការរូបនេះ បន្តថា បវរកញ្ញាស្រស់សោភាមកពី ៤៥ ប្រទេសជុំវិញពិភពលោក នឹងធ្វើដំណើរមកកម្ពុជា ដើម្បីចូលរួមការប្រកួតបវរកញ្ញាសាកលវិទ្យាល័យពិភពលោកលើកទី៣២ ហើយគណៈកម្មការនឹងអញ្ជើញបវរកញ្ញាទាំងអស់ឲ្យឈរថតរូបនៅវិមានឯករាជ្យ និងបង្ហាញសារផ្សេងៗទៅកាន់ពិភពលោកចំថ្ងៃបុណ្យឯករាជ្យជាតិកម្ពុជា ថ្ងៃ ៩ វិច្ឆិកា តែម្តង។ ការធ្វើដូច្នេះ គឺស្របតាមកម្មវិធី WMU ដែលបង្កើតឡើងតាំងពីឆ្នាំ 1986 ដើម្បីអបអរសាទរ «ឆ្នាំសន្តិភាពអន្តរជាតិ» ដែល UN បានប្រកាស និងទទួលស្គាល់។ ជារួម WMU គឺជាវេទិកាអន្តរជាតិ ដែលយុវជនមិនត្រឹមតែមានសំឡេងសន្តិភាពទេ វាអាចត្រូវបានគេហៅថាជាវេទិកាសកលអនុវត្តសន្តិភាព។  លោករំពឹងថា ព្រឹត្តិការណ៍នេះនឹងក្លាយជាសារនិមិត្តរូប ដែលនឹងទាក់ទាញការចាប់អារម្មណ៍ពីអន្តរជាតិ ជាពិសេសគឺទិដ្ឋភាពដែលយុវជនមកពីប្រទេសនីមួយៗ ប្រកាសសន្តិភាពនៅមុខប្រាសាទអង្គរវត្ត។ មិនតែប៉ុណ្ណោះ WMU នឹងមានវេទិកាសន្តិភាព សេដ្ឋកិច្ច បរិស្ថានជាមួយនិស្សិតសាកលវិទ្យាល័យមកពីជុំវិញពិភពលោក។សម្លេងបកប្រែ៖ «កម្មវិធី World Miss University មាន slogan មួយ គឺ “ពិភពលោកតែមួយ”។ គោលបំណងនៃការរៀបចំការប្រកួតអន្តរជាតិ WMU នៅកម្ពុជា ដោយសារចង់បង្ហាញឱ្យពិភពលោកដឹងពីសិល្បៈ វប្បធម៌ និងអរិយធម៌ដ៏ផូរផង់របស់ខ្មែរយើង ពិសេសប្រាសាទអង្គរវត្ត។ ... កម្ពុជាយើងសម្បូរប្រជាជនវ័យក្មេងដែលពោរពេញដោយក្តីស្រមៃ ដូច្នេះតាមរយៈការប្រកួត WMU ពួកគេអាចបង្ហាញសមត្ថភាព ដើម្បីឈោងចាប់ក្តីស្រមៃទាំងនោះបាន។  ក្នុងកម្មវិធី WMU ផ្តោតលើមាតិកា ៣ធំៗ គឺ បរិស្ថាន សន្តិភាព និង សេដ្ឋកិច្ច រាល់មាតិកាទាំងនេះនឹងត្រូវលើកយកមកបង្ហាញ ហើយនិយាយដើម្បីជាការអភិវឌ្ឍសម្រាប់ប្រទេសកម្ពុជាផងដែរ។ ខ្ញុំសង្ឃឹមថា ប្រជាជនកម្ពុជានឹងចាប់អារម្មណ៍កម្មវិធី World Miss University ឱ្យបានច្រើនៗ ហើយខ្ញុំនឹងប្រឹងប្រែងឱ្យអស់ពីសមត្ថភាពដើម្បីរួមសហការជាមួយរាជរដ្ឋាភិបាល ដើម្បីឱ្យកម្មវិធីប្រកួតនេះដំណើរការទៅបានល្អ»៕តាមរយៈការបញ្ចប់ដោយជោគជ័យនៃ World Miss University ទី៣២ យើងនឹងចែករំលែកស្មារតី នៃការរួបរួមពិភពលោកជាមួយប្រជាជនកម្ពុជា។ ភ្ជាប់ជាមួយគ្នានោះ ការប្រកួតក៏ជំរុញឱ្យមានសកម្មភាពសប្បុរសធម៌ផ្សេងៗ រួមទាំង៖ គម្រោងដំណើរការហាងកាហ្វេ Go Peace ជាមួយនឹងអត្ថន័យនៃសន្តិភាព និងប្រើប្រាស់ប្រាក់ចំណេញដើម្បីគាំទ្រកម្មវិធីអាហារូបករណ៍ជាដើម។   ចំពោះការបោះឆ្នោតតាមអ៊ីនធឺណិត ចាប់ពីថ្ងៃទី1ខែតុលា ដល់ ថ្ងៃទី16ខែវិច្ឆិកា ឆ្នាំ2025 ដើម្បីលើកទឹកចិត្តឱ្យមានការចូលរួមជាសកល តាមរយៈប្រព័ន្ធ blockchain WMU Coin ដែលប្រកបដោយភាពសុក្រិត អ្នកបោះឆ្នោតនឹងទទួលបានCoinសម្រាប់គាំទ្របេក្ខជនរបស់ពួកគេ ដែលនឹងត្រូវបានប្រើដើម្បីផ្តល់អាហារូបករណ៍ទៅដល់បេក្ខជន។ បន្ថែមទីនេះ WMU មានចលនា mecenat ដែលមិនមែនគ្រាន់តែជាការបរិច្ចាគ ឬការឧបត្ថម្ភនោះទេ ប៉ុន្តែជាប្រព័ន្ធដែលផ្តល់ឱ្យសង្គមវិញតាមរយៈសម្បត្តិវប្បធម៌។ ជាឧទាហរណ៍ វាជាឌីជីថលដល់ស្នាដៃរបស់វិចិត្រករវ័យក្មេង ភ្ជាប់ពួកវាទៅកាន់ទីផ្សារពិភពលោក ហើយបន្ទាប់មកប្រើប្រាស់ប្រាក់ចំណេញដើម្បីផ្តល់មូលនិធិដល់គម្រោងអប់រំ និងបរិស្ថាន។  សម្រាប់សន្និសីទនេះ យើងក៏កំពុងរៀបចំពិព័រណ៍សហការជាមួយសិល្បករក្នុងស្រុកផងដែរ។ WMU Mecenat Modelដែលភ្ជាប់សិល្បៈ សេដ្ឋកិច្ច និងតម្លៃសង្គម។សូមជម្រាបឱ្យដឹងផងដែរថា សន្និសីទខាងលើនេះ ត្រូវបានរៀបចំឡើងនៅសណ្ឋាគារកំាបូឌីយ៉ាណា ដោយមានការចូលរួមពីប្រធានគណៈកម្មការរៀបចំការប្រកួត World Miss University លោក ស៊ឹងមិន អ៊ី (Seung Min Lee) ,  កញ្ញា Nagma Shrestha ម្ចាស់ជយលាភី Top3 World Miss University ឆ្នាំ ២០១៦ មកពីប្រទេសនេប៉ាល់ , កញ្ញា Karolina Chernoshei ម្ចាស់ជយលាភី Top3 World Miss University ឆ្នាំ២០១៧ មកពីប្រទេសបេឡារ៉ូស , កញ្ញា ប៊ី សុវណ្ណផន ម្ចាស់ជយលាភី 2024 World Miss University Cambodia និងបុគ្គលពាក់ព័ន្ធសំខាន់ៗជាច្រើនរូបទៀត។  បន្ទាប់ពីចប់ការប្រកួតលំដាប់អន្តរជាតិ បវរកញ្ញាសាកលវិទ្យាល័យពិភពលោកលើកទី៣២ នៅកម្ពុជា ស្ថាប័ន World Miss University នឹងបន្តរៀបចំការប្រកួតថ្នាក់ជាតិកម្មវិធី 2025 World Miss University Cambodia រយៈពេល ៦ថ្ងៃ ចាប់ពីថ្ងៃទី២៣-២៨ ខែធ្នូ ឆ្នាំ២០២៥។ សម្រាប់លក្ខខណ្ឌចុះឈ្មោះ បេក្ខនារីត្រូវតែមានសញ្ជាតិខ្មែរ ជានិស្សិត (បរិញ្ញាបត្រ , អនុបណ្ឌិត , បណ្ឌិត) អាយុ២៧ឆ្នាំចុះក្រោម ត្រូវមានភាពឆ្លាតវៃ សីលធម៌ រូបសម្បត្តិ សមរម្យ ចូលចិត្តការចូលរួមសកម្មភាពសង្គមផងដែរ។ ទទួលពាក្យចូលរួមប្រកួតចាប់ពីថ្ងៃទី១៥ ខែកញ្ញា ដល់ថ្ងៃទី២០ ខែវិច្ឆិកា ឆ្នាំ២០២៥ ខាងមុខនេះ។ រួសរាន់ឡើង កុំឱ្យឱកាសបញ្ចេញសមត្ថភាពនេះរំលងហួសទៅឱ្យសោះ ដើម្បីអ្នកមានឱកាសឈោងចាប់ក្តីស្រមៃជាតារាពន្លកថ្មីដ៏ចែងចាំង៕  អត្ថបទ៖ រ៉ាត់ ចាន់ធីតា រូបភាព៖ ឃាង ទូច និងផ្តល់ឱ្យ  

 លោក Bang Si-hyuk ដែលជាប្រធាន និងជាស្ថាបនិកនៃក្រុមហ៊ុន K-pop HYBE បានបង្ហាញខ្លួននៅចំពោះមុខប៉ូលីសសម្រាប់ការសាកសួរលើការចោទប្រកាន់ករណីឆបោករាប់រយលានដុល្លារ។ ប្រធានក្រុមហ៊ុនចម្រៀង HYBE លោក Bang Si-hyuk បានបង្ហាញខ្លួននៅប៉ុស្តិ៍ប៉ូលិសនៅថ្ងៃចន្ទ ទី១៥ ខែកញ្ញានេះ សម្រាប់ការសាកសួរជុំវិញការចោទប្រកាន់ថាលោកបានក្លែងបន្លំប្រតិបត្តិការភាគហ៊ុន និងទទួលបានប្រាក់ចំណេញមិនស្របច្បាប់រាប់រយលានដុល្លារ។ សារព័ត៌មានកូរ៉េ Yonhap បានរាយការណ៍ថា បន្ទាប់ពីការសាកសួរជាមួយប៉ូលិស និយតករហិរញ្ញវត្ថុប្រចាំប្រទេសកូរ៉េក៏បញ្ជូនលោក Bang ទៅកាន់ព្រះរដ្ឋអាជ្ញាដែរ ដើម្បីស៊ើបអង្កេតសកម្មភាពលោកក្នុងអំឡុងពេលធ្វើការចុះបញ្ជីទីផ្សារភាគហ៊ុនរបស់ក្រុមហ៊ុន។ ប្រព័ន្ធផ្សព្វផ្សាយដដែលរាយការណ៍ថា មុនពេលចុះបញ្ជីទីផ្សារភាគហ៊ុន ឬ IPO កាលពីឆ្នាំ ២០២០ លោក Bang និងនាយកប្រតិបត្តិបីនាក់ទៀតត្រូវបានចោទប្រកាន់ពីបទបំពានច្បាប់ទីផ្សារមូលធន ដោយបាន "បោកបញ្ឆោត" វិនិយោគិននានាឱ្យលក់ភាគហ៊ុនរបស់ពួកគេឱ្យក្រុមហ៊ុនវិនិយោគដែលពួកគេបានគ្រប់គ្រង។  ប៉ូលីសសង្ស័យថាក្នុងអំឡុងពេលដំណើរការ IPO របស់ HYBE ពួកគេបានបំភាន់ម្ចាស់ភាគហ៊ុនផ្សេងទៀតឱ្យជឿថាពួកគេមិនមានផែនការចុះបញ្ជី IPO នោះទេ ហើយក៏បានជំរុញឱ្យពួកគេលក់ភាគហ៊ុនរបស់ខ្លួនទៅឱ្យក្រុមហ៊ុនមួយ។ ក្រោយមក HYBE បានបន្តដំណើរការចុះ IPO និងបង្កើតប្រាក់ចំណេញមិនស្របច្បាប់បានប្រហែល ៤០០ ពាន់លានវ៉ុន (២៩០ លានដុល្លារ)។សូមបញ្ជាក់ថា HYBE គឺជាក្រុមហ៊ុនចម្រៀងធំជាងគេរបស់ប្រទេសកូរ៉េខាងត្បូង ដោយមានក្រុមចម្រៀងល្បីលំដាប់ពិភពលោក BTS ជាសិល្បករសំខាន់ ខណៈលោក Bang Si-hyuk គឺជាស្ថាបនិក និងម្ចាស់ភាគហ៊ុនធំជាងគេ ៕    ប្រែសម្រួល៖ វ៉ាន់ថន  

 Emmy Awards កម្មវិធីពានរង្វាន់ធំបំផុតសម្រាប់ភាពយន្តទូរទស្សន៍របស់អាមេរិកបានបកាលពីថ្ងៃទី១៤ ខែកញ្ញា ជាមួយវត្តមានតារាសម្ដែងជួរមុខជាច្រើនក្នុងឆ្នាំនេះ។  តារាចម្រៀង និងសម្តែង Selena Gomez ជាមួយគូដណ្ដឹងរបស់ខ្លួនគឺផលិតករតន្ត្រី Benny Blanco បានបង្ហាញខ្លួនរួមគ្នាលើកម្រាលព្រំក្រហមកម្មវិធី Emmy Awards លើកទី ៧៧ នៅទីក្រុង Los Angeles កាលពីថ្ងៃអាទិត្យ។  Selena Gomez បានចូលរួមកម្មវិធីឆ្នាំនេះ ខណៈដែលភាពយន្តភាគដែលនាងសម្ដែងរឿង “Only Murders in the Building” បានជាប់បេក្ខភាពប្រកួតប្រជែងរឿងភាគកំប្លែងល្អបំផុតប្រចាំឆ្នាំ។  តារាហូលីវូដជើងចាស់ Harrison Ford ដែលបានជាប់បេក្ខភាពតួរងប្រុសឆ្នើមសម្រាប់រឿងភាគកំប្លែង "Shrinking" ក៏បានដើរលើកម្រាលព្រំក្រហមជាមួយភរិយារបស់ខ្លួនដែរគឺតារាសម្តែង Calista Flockhart។  គូស្នេហ៍តារាផ្សេងទៀតរួមមានតួស្រីរឿង "Dying for Sex" Michelle Williams ជាមួយស្វាមីជាអ្នកដឹកនាំរឿង Thomas Kail និងមួយគូទៀតគឺអ្នកដឹកនាំរឿង Taika Waititi និងតារាចម្រៀង Rita Ora ។ក្រឡេកទៅមើលជយលាភីពានរង្វាន់ Emmy ក្នុងឆ្នាំនេះ ពានរង្វាន់ធំគឺរឿងភាគល្អបំផុតប្រចាំឆ្នាំបានទៅលើរឿងភាគក្នុងបន្ទប់សង្គ្រោះបន្ទាន់ "The Pitt" ខណៈរឿង "Adolescence" របស់ Netflix បានគ្រងតំណែងជារឿងភាគខ្នាតខ្លីល្អបំផុត។   ពានរង្វាន់តួឯកប្រុសឆ្នើមបានទៅលើ តារាសម្ដែង Noah Wyle ពីរឿងភាគ “The Pitt” ខណៈពានរង្វាន់តួឯកស្រីឆ្នើមបានលើតារាសម្ដែង Britt Lower ពីរឿងភាគ “Severance”។ពានរង្វាន់ត្រូវបានជ្រើសរើសដោយតារាសម្ដែង អ្នកដឹកនាំ ផលិតករ និងសមាជិកផ្សេងទៀតនៃស្ថាប័ន Television Academy សរុបប្រហែល ២៦០០០ នាក់ ៕   ប្រែសម្រួល៖ វ៉ាន់ថន 

  បញ្ចេញស្នាដៃសម្តែងភាពយន្តខ្នាតធំលើកដំបូងក្នុងភាពយន្តបែបរន្ធត់ «ម្ចាស់កញ្ចក់»  លី មួយលាង និង ល្អហួស រំពឹងអាចនឹងផ្ទុះការគាំទ្រទាំងក្នុង និងក្រៅស្រុក ដោយសាររឿងនេះមានចំណុចពិសេសៗច្រើន។  ក្រោយចំណាយពេលសម្រិតសម្រាំងលើការថត និងបច្ចេកទេសកាត់តអស់រយៈពេលប្រមាណ ១ឆ្នាំ ទីបំផុតវណ្ណកម្មស្នាដៃភាពយន្តខ្នាតធំបែបរន្ធត់ព្រឺព្រួចរបស់ផលិតកម្ម Mediaload Pictures ចំណងជើង «ម្ចាស់កញ្ចក់» បានសម្ភោធចាក់បញ្ចាំងជាផ្លូវការហើយ កាលពីល្ងាចថ្ងៃទី១៤ ខែកញ្ញា ម្សិលមិញ នៅបរិវេនផ្សារទំនើប K Mall។   «ម្ចាស់កញ្ចក់» ជាស្នាដៃភាពយន្តបែបភ័យរន្ធត់ដំបូង រួមគ្នារបស់កញ្ញាឯក ៣រូបមកពីប្រទេសកម្ពុជា និងឥណ្ឌូនេស៊ី គឺ ជូរី ល្អហួស Miss Pre -Teen Junior Idol Word 2024 , លី មួយលាង Miss Teen International 2024 និង Shaquila Keisha (ហ្សាគីឡា គីហ្សា) Miss Teen Icon International 2024។  ល្អហួស តួអង្គសំខាន់ក្នុងរឿង «ម្ចាស់កញ្ចក់» បានបង្ហាញក្តីរំភើបរីករាយ និងអារម្មណ៍សប្បាយចិត្តចំពោះស្នាដៃភាពយន្តខ្នាតធំលើកដំបូងនេះ។ បវរកញ្ញាវ័យក្មេងរូបនេះថា នាង និងក្រុមការងារបានខំប្រឹងអស់ពីសមត្ថភាពក្នុងការសម្តែងរឿងនេះ ដោយសង្ឃឹមថា រឿងនេះនឹងអាចផ្ទុះការគាំទ្រខ្លាំង ទាំងការបញ្ចាំងក្នុងស្រុក និងការនាំទៅបញ្ចាំងនៅក្រៅស្រុកផងដែរ។     ក្នុងនោះផងដែរ លោក អ៊ិន វិចិត្រ ចាងហ្វាងផលិតកម្ម Mediaload Pictures  បានអះអាងថា រឿង «ម្ចាស់កញ្ចក់» ជាភាពយន្តបែបរន្ធត់ព្រឺព្រួច តែរសជាតិប្លែកសម្រាប់អ្នកទស្សនា ព្រោះរឿងនេះផលិតឡើងយ៉ាងសម្រិតសម្រាំងបំផុត ទាំងសាច់រឿង ប្លង់ថត និងបច្ចេកទេសកាត់តជាដើម។ ជាងនេះទៀត រឿង «ម្ចាស់កញ្ចក់» មានប្លង់លងបន្លាចបែបព្រួព្រួចជាច្រើន អាចឱ្យអ្នកទស្សនាស្រែកលោះព្រឹលឹងតែម្តង។  ក្រៅពីការបញ្ចាំងក្នុងស្រុក រឿងនេះគ្រោងនាំចេញទៅបញ្ចាំងនៅទីផ្សារប្រទេសឥណ្ឌូនេស៊ីផងដែរ។រឿង «ម្ចាស់កញ្ចក់» ឬ «The Mirror» នឹងចាក់បញ្ចាំងនៅគ្រប់រោងភាពយន្ត ចាប់ពី ថ្ងៃទី១៨ ខែកញ្ញា ឆ្នាំ២០២៥ តទៅ! កុំភ្លេចចូលរួមទស្សនា និងគាំទ្រស្នាដៃរឿងខ្មែរឱ្យបានច្រើនកុះករ៕   អត្ថបទ៖ រ៉ាត់ ចាន់ធីតា រូបភាព៖ ឃាង ទូច  

 មិនឱ្យអ្នកគាំទ្រខកបំណងឡើយ ថៃ នារីសុជាតា ហៅ ហ្វីយ៉ាតា បានទម្លាក់បេក្ខភាពជើងខ្លាំងពីររូបដើម្បី គ្រងមកុដ Miss Universe Cambodia 2025។សមភូមិប្រកួតដ៏ក្តៅគគុកនៃកម្មវិធី Miss Universe Cambodia 2025 បានបញ្ចប់ទៅដោយជោគជ័យ កាលពីចុងសប្ដាហ៍មុន កន្លងទៅ នៅស្ថានីយ៍ទូរទស្សន៍ទំនើបភីអិនអិន។  មិនខុសពីការរំពឹងទុករបស់អ្នកគាំទ្រ អ្នកនាង ថៃ នារីសុជាតា ហៅ ហ្វីយ៉ាតា បានទម្លាក់បេក្ខភាពជើងខ្លាំងជាច្រើនរូបក្នុងថ្ងៃប្រកួតផ្តាច់ព្រ័ត្រ រហូតទទួលបានជោគជ័យក្លាយជាម្ចាស់មកុដ Miss Universe Cambodia 2025។   ហ្វីយ៉ាតា គឺជាអ្នកម្តាយកម្ពុជាទី២ ដែលបានគ្រងមកុដ Miss Universe Cambodia 2025 បន្ទាប់ពី អ្នកនាង ប្រាសាទ ដាវីន ជាម្ចាស់ជយលាភីឆ្នាំមុន។ដណ្តើមបានតំណែងកញ្ញាឯកចក្កវាឡកម្ពុជាឆ្នាំ២០២៥ ភ្លាមា ហ្វីយ៉ាតា បង្ហាញអារម្មណ៍រំភើបលាយឡំភាពភ្ញាក់ផ្អើល មិននឹកស្មានថា ខ្លួនឯងអាចក្លាយជាម្ចាស់មកុដ Miss Universe Cambodia 2025 នោះឡើយ ព្រោះមែនទែនទៅបេក្ខភាព Top3 ចុងក្រោយសុទ្ធសឹងតែជាជើងខ្លាំង ហើយមានអ្នកគាំទ្រច្រើនសន្ធឹកដូចគ្នា។   ក្រោយឈ្នះមកុដដ៏មានតម្លៃនេះ ហ្វីយ៉ាតា ប្តេជ្ញាបញ្ចេញឱ្យអស់ពីសមត្ថភាព និងខំប្រឹងហ្វឹកហាត់ពង្រឹងសមត្ថភាពបន្ថែម ត្រៀមសម្រាប់ការតំណាងកម្ពុជាទៅចូលរួមប្រកួតអន្តរជាតិ នាពេលឆាប់ៗខាងមុខនេះ។  ហ្វីយ៉ាតា គ្មានភាពស្ទាក់ស្ទើរក្នុងការតំណាងកម្ពុជាទៅប្រកួតនៅទីនោះឡើយ តែផ្ទុយទៅវិញនាងប្រមូលភាពក្លាហានទាំងអស់ទៅបង្ហាញនៅទីនោះ ដើម្បីបង្ហាញឱ្យពិភពលោកដឹងពីសម្លេងដ៏មានឥទ្ធិពលរបស់ស្ត្រីខ្មែរយើង។  ឆ្លៀតឱកាសនេះ ថៃ នារីសុជាតា ហៅ ហ្វីយ៉ាតា ម្ចាស់មកុដ Miss Universe Cambodia 2025 បានថ្លែងអំណរគុណដល់ស្ថាប័ន MUC អ្នកសហការឧបត្ថម្ភ និងបណ្តាអ្នកគាំទ្រទាំងអស់ដែលបានផ្តល់កម្លាំងចិត្តដ៏ធំធេងដល់រូបនាង និងជឿជាក់ថា នាងនឹងអាចដណ្តើមមកុដនេះបាន។ ពេលនេះនាងធ្វើបានហើយ មិនឱ្យអ្នកគាំទ្រខកបំណងមកលើរូបនាងឡើយ។  គួរបញ្ជាក់ឱ្យដឹងផងដែរថា ក្រៅពី អ្នកនាង ថៃ នារីសុជាតា ហៅ ហ្វីយ៉ាតា ដែលបានឈ្នះមកុដ Miss Universe Cambodia 2025, កញ្ញា សុខគា គីមលាង ហៅ កូនអាន បានឈ្នះតំណែងជយលាភីលំដាប់រងទី១ , កញ្ញា ពេជ្រ វត្តីសារ៉ាវឌ្ឍី ឈ្នះជយលាភីលំដាប់រងទី២។ ចំណែក ជយលាភីលំដាប់រងទី៣ បានទៅលើ កញ្ញា ហួន ស្រីខួច និងជយលាភីលំដាប់រងទី៤ បានទៅលើ កញ្ញា មួន ចាន់នឿន៕   អត្ថបទ៖ រ៉ាត់ ចាន់ធីតា រូបភាព៖ ឃាង ទូច 

ថ្មីៗនេះ ក្រុមអ្នកបុរាណវិទ្យានៅប្រទេសតួកគីទើបតែធ្វើកំណាយឃើញរូបចម្លាក់សត្វជាច្រើនប្រភេទដែលធ្វើអំពីថ្មមានដូចជាសត្វកញ្ជ្រោង ត្មាត និងជ្រូកព្រៃជាដើម។ របស់ទាំងនេះជាទុនសម្រាប់អ្នកសិក្សាស្រាវជ្រាវថយក្រោយទៅរកទៅសម័យបុរាណ។ រូបចម្លាក់ទាំងនេះមានអាយុកាលតាំងពី១១៥០០ឆ្នាំមុនមកម៉្លេះ និងជារូបចម្លាក់ដែលធ្វើកំណាយបានពីស្ថានីយបុរេប្រវត្តិការ៉ាហានតេប៉េ (Karahantepe)។ វាជាវត្ថុបុរាណដែលរៀបចំមានលក្ខណៈពិសេសដំបូងគេដើម្បីឲ្យស្របទៅតាមការនិទាន។ នេះបើតាមការអះអាងរបស់ក្រុមអ្នកបុរាណវិទ្យា។  លោកនីកមី.ការូល (Necmi Karul) ជាប្រធានផ្នែកកំណាយថ្លែងថាការតំណាលអំពីប្រវត្តិរឿងរ៉ាវអ្វីមួយច្បាស់ណាស់ថាត្រូវការចងចាំនូវរឿងនោះទុកនៅក្នុងចិត្ត។ ចំណែកការសូនរូបអំពីថ្មជាការបង្ហាញថាជាងចម្លាក់ធ្លាប់នៅទីនេះ។  វត្ថុបុរាណដែលគេជីកបានកាលពីចុងឆ្នាំ២០២៤ឥឡូវនេះត្រូវគេយកទៅដាក់បង្ហាញជាលើកដំបូងនៅវិមានប្រធានាធិបតីតួកគីប្រចាំរដ្ឋធានីអង់ការ៉ា (Ankara) រួមជាមួយវត្ថុបុរាណដទៃទៀតដែលជីកកកាយបានពីស្ថានីយបុរេប្រវត្តិការ៉ាហានតេប៉េ(Karahantepe)។  ស្ថានីយនេះមានអាយុកាល៩៥០០ឆ្នាំមុនគ្រិស្តសករាជ។ រូបចម្លាក់សត្វទាំងនេះនីមួយៗមានកម្ពស់ប្រហែល៣,៥សង់ទីម៉ែត្រ ហើយត្រូវគេរកឃើញនៅក្នុងកូនក្រឡដែលមានគម្របថ្ម និងត្រូវគេដាក់ក្នុងផើងធំមួយ។  សត្វចម្លាក់ថ្មទាំងបីនោះសុទ្ធតែមានកងថ្មរុំជុំវិញករបស់ពួកវាម្នាក់មួយៗ។ ការរៀបចំយ៉ាងមានរបៀបរៀបរយនេះបង្ហាញថារូបសត្វទាំងនោះត្រូវគេប្រើប្រាស់សម្រាប់បង្កើតសាច់រឿង។  នេះបើយោងតាមលោកការូល។កាលពីពេលកន្លងមក ក្រុមអ្នកបុរាណវិទ្យាធ្លាប់ឃើញតែរូបមុខ២ ដាច់ៗពីគ្នាដែលគេឆ្លាក់នៅលើវត្ថុបុរាណនៅនឹងមួយកន្លែង។ ស្ថានីយបុរេប្រវត្តិនេះមានទំហំ១៤ហិចតារ ប៉ុន្តែការជីកកកាយមិនទាន់បានទូលំទូលាយទេ។ ចាប់ពីឆ្នាំ២០១៩រហូតមកដល់ពេលនេះ ក្រុមអ្នកបុរាណវិទ្យាទើបតែធ្វើកំណាយបាន១ចំណែកតូចតែប៉ុណ្ណោះ។ នេះបើយោងតាមលោកការូល៕   ប្រែសម្រួល៖ អន សំអាង 

ចម្ការកាហ្វេពិសេសហាសៀនដាឡាអេសមេរ៉ាល់ដា (Hacienda La Esmeralda) នៅប្រទេសប៉ាណាម៉ាបានបង្កើតកំណត់ត្រាពិភពលោកថ្មីមួយដោយអាចលក់កាហ្វេហ្កេសាដ៏ល្បីល្បាញរបស់ខ្លួនបានក្នុងតម្លៃដ៏ថ្លៃបំផុតរហូតដល់៣០,៦០០ដុល្លារក្នុងមួយគីឡូក្រាមដែលពង្រឹងកេរ្តិ៍ឈ្មោះរបស់ប្រទេសនេះជាអ្នកផលិតកាហ្វេផ្តាច់មុខបំផុតលើពិភពលោក។  អ្នកស្រី រ៉ាឆែល ផាធើសុន (Rachel Patterson) ជាម្ចាស់ចម្ការកាហ្វេ Esmeralda បាននិយាយថា សមិទ្ធិផលនេះបានឆ្លុះបញ្ចាំងអំពីការងារជាក្រុមរយៈពេលពីរទសវត្សរ៍នៅទូទាំងវិស័យកាហ្វេពិសេសរបស់ប្រទេសនេះ។   វាមិនត្រឹមតែជាចម្ការកាហ្វេនេះប៉ុណ្ណោះទេ ប៉ុន្តែវាក៏ជាការរួមចំណែកពីផលិតករទាំងអស់នៅប្រទេសប៉ាណាម៉ាដែលបានខិតខំយ៉ាងខ្លាំងដើម្បីធ្វើឱ្យកាហ្វេហ្កេសានេះទទួលបានកេរ្តិ៍ឈ្មោះល្បីល្បាញនៅទូទាំងពិភពលោក។  អ្នកស្រីបានបន្ថែមថា ពូជកាហ្វេហ្កេសាបានមកពីប្រទេសអេត្យូពី ហើយពួកគេបានគ្រប់គ្រង និងផលិតវានៅប៉ាណាម៉ាតាមវិធីផ្សេងគ្នាដែលនាំឱ្យមានគុណភាព និងរសជាតិខុសគ្នាពីពូជកាហ្វេនៅអេត្យូពីដោយសារកត្តាអាកាសធាតុ និងការច្នៃប្រឌិតរបស់ប៉ាណាម៉ាដែលផ្តល់ឱ្យ កាហ្វេហ្កេសានូវគុណភាពដ៏ពិសេសដាច់គេនៅលើពិភពលោក។អ្នកស្រី រ៉ាឆែល បាននិយាយថា កាហ្វេពិសេសនេះមានតម្រូវការខ្លាំងបំផុតមកពីបណ្ដាប្រទេសនៅទ្វីបអាស៊ី៕  ប្រែសម្រួល៖ ប៉ិច ស៊ីនួន 

រុមអ្នកជំនាញរុស្ស៊ីបានបង្ហាញគ្រោងឆ្អឹងដំរីបុរាណដែលមានជីវិតរស់នៅលើផែនដីនេះកាលពីជាង៤ម៉ឺនឆ្នាំមុនក្រោយពីបានផ្គុំដំឡើងជារូបរាងពេញលេញដោយជោគជ័យ។ ក្រោយពីបានផ្គុំដំឡើងដោយជោគជ័យនូវគ្រោងឆ្អឹងសត្វដំរីបុរាណដែលមានជីវិតរស់នៅលើផែនដីកាលពី៤៤,០០០លានឆ្នាំមុន ក្រុមអ្នកជំនាញបុរាណវិទ្យារបស់រុស្ស៊ីបានដាក់បង្ហាញគ្រោងឆ្អឹងដំរីបុរាណនេះជាសាធារណៈក្នុងមជ្ឈមណ្ឌលស្ដារនីតិសម្បទាអន្តរជាតិនៅក្នុងភូមិមួយនៅតំបន់ឡេនីនក្រាដ (Leningrad) ប្រទេសរុស្ស៊ី។ ប្រជាពលរដ្ឋមូលដ្ឋានជាច្រើនបានធ្វើដំណើរទៅកាន់មជ្ឈមណ្ឌលនេះដើម្បីបានឃើញគ្រោងឆ្អឹងដែលគេបានផ្គុំដំឡើងពេញលេញនូវថនិកសត្វមួយនេះដែលគេសន្មតឈ្មោះថា «តាឌីបេ» (Tadibe) ដែលត្រូវបានរកឃើញជាលើកដំបូងនៅក្នុងតំបន់អ៊ូរ៉ាល់ (Ural) ប្រទេសរុស្ស៊ីនៅក្នុងឆ្នាំ២០២០។ លោក យូរី ស្តារីកូវ (Yuri Starikov) ប្រធានមជ្ឈមណ្ឌលសម្រាប់ការស្ដារឡើងវិញនូវវត្ថុជាប្រវត្តិសាស្ត្រធម្មជាតិបានពន្យល់ថា ក្រុមអ្នកជំនាញបានទទួលជោគជ័យក្នុងការកសាងក៏ដូចជាការផ្គុំដំឡើងជាថ្មីនូវគ្រោងឆ្អឹងដ៏ធំមហិមាទាំងនេះ។ លោកបាននិយាយថា បញ្ហាប្រឈមដ៏ធំបំផុតបំផុតគឺការផ្គុំដំឡើងលលាដ៍ក្បាលឡើងវិញ ដោយសារវាមានសភាពខូចខាតយ៉ាងធ្ងន់ធ្ងរ ខណៈផ្នែកជាច្រើនបានបាត់ ប៉ុន្តែក្រុមអ្នកស្រាវជ្រាវនៅតែអាចស្ដារពួកវាឡើងវិញដោយជោគជ័យ។ បើយោងតាមសេវាសារព័ត៌មានរបស់មជ្ឈមណ្ឌលនេះ ការតាំងពិព័រណ៍គ្រោងឆ្អឹងដំរីបុរាណនេះនឹងចាប់ផ្ដើមដំណើរការពីថ្ងៃទី២៩ ខែសីហារហូតដល់ថ្ងៃទី១ ខែកុម្ភៈ ឆ្នាំ២០២៦៕  ប្រែសម្រួល៖ ប៉ិច ស៊ីនួន 

សួនសត្វក្វាដាឡាចារ៉ា (Guadalajara) នៅរដ្ឋចាលីស្កូបានប្រកាសអំពីរបកគំហើញមួយជាមួយនឹងការបង្កាត់ពូជដោយជោគជ័យសម្រាប់សត្វអណ្ដើតតូចជាងគេបំផុតនៅលើពិភពលោកដែលគេហៅថាពូជអណ្ដើកវ៉ាឡាតាហែលម៉េត (Vallarta Helmet)។ លទ្ធផលនៃការភ្ញាស់ពូជអណ្ដើកតូចជាងគេបំផុតនេះគឺជាជំហានដ៏សំខាន់មួយក្នុងការការពារប្រភេទសត្វជិតផុតពូជដែលគេបានប្រទះឃើញម្ដងនៅក្នុងឆ្នាំ២០១៨នៅក្នុងតំបន់ដែលមានកំណត់ស្ថិតនៅចន្លោះពីរដ្ឋចាលីស្កូ និងរដ្ឋណាយ៉ារីត (Nayarit) នៅប្រទេសម៉ិចស៊ិក។ វីដេអូបានបង្ហាញកូនអណ្ដើកដែលទើបញាស់មានកម្ពស់ត្រឹមតែ២សង់ទីម៉ែត្រស្មើនឹងកម្រាស់លុកកាក់៥ប៉េសូរបស់ម៉ិកស៊ិក។ លោក រីខាដូ ដាវ៉ាឡូស (Ricardo Davalos) អ្នកជីវវិទូសួនសត្វបាននិយាយថា វាគ្រាន់តែជាកំណើតមួយក៏ពិតមែន ប៉ុន្តែវាបានផ្តល់ឱ្យពួកគេនូវលទ្ធភាព ឬក្តីសង្ឃឹមក្នុងការនិយាយថា ពួកគេអាចបន្តពូជ  គម្រូផ្សេងទៀត។ លោក Davalos បានកត់សម្គាល់ថា ពូជអណ្ដើកនេះមានកូនតិចខ្លាំងណាស់ដែលអាចពងបានតែ២ទៅ ៤គ្រាប់ប៉ុណ្ណោះ ហើយភាគច្រើនមិនអាចញាស់បានទាំងអស់នោះឡើយ។ លោកបានបន្ថែមថា គេជឿថា បច្ចុប្បន្នមានពូជអណ្ដើកប្រភេទនេះប្រហែល៥០០ក្បាលប៉ុណ្ណោះដែលអាចរស់នៅក្នុងព្រៃ។ កម្មវិធីបន្តពូជនេះបានចាប់ផ្តើមដំណើរការក្រោយពីអាជ្ញាធរបរិស្ថានបានផ្ដល់ឱ្យនូវអណ្តើកចំនួន៣៧ក្បាលដែលពួកគេបានរឹបអូសពីការជួញដូរខុសច្បាប់ក្នុងឆ្នាំ២០២៣៕  ប្រែសម្រួល៖ ប៉ិច ស៊ីនួន 

 តារាចម្រៀងរ៉េបកូរ៉េ និងជាមេក្រុម BTS - RM បានប្រារព្ធខួបកំណើតរបស់ខ្លួនដោយបានធ្វើការបរិច្ចាគសប្បុរសធម៌ដ៏មានអត្ថន័យសម្រាប់មន្ទីរពេទ្យចំនួនពីរ។ប្រធានក្រុមចម្រៀងកូរ៉េ BTS RM នៅថ្ងៃទី 12 ខែកញ្ញានេះបានបរិច្ចាគដល់មជ្ឈមណ្ឌលវេជ្ជសាស្ត្រ Seoul Asan និងមជ្ឈមណ្ឌលវេជ្ជសាស្ត្រសាកលវិទ្យាល័យកូរ៉េ នូវថវិកាចំនួន 100 លានវ៉ុន ស្មើនឹងប្រហែល 72,000 ដុល្លារ ក្នុងមួយមន្ទីរពេទ្យ ដែលសរុបទាំងអស់គឺចំនួន 200 លានវ៉ុន ឬប្រហែល 14 ម៉ឺនដុល្លារ។ តារាចម្រៀងដែលទើបឈានចូលវ័យ 31 ឆ្នាំរូបនេះបានកត់សម្គាល់ថា លោកសម្រេចចិត្តបរិច្ចាគព្រោះចង់ចូលរួមចំណែកក្នុងការងារដ៏មានអត្ថន័យសម្រាប់ខួបកំណើតខ្លួន។ លោកសង្ឃឹមថា ការបរិច្ចាគនេះ នឹងក្លាយជាជំនួយតិចតួចដល់អ្នកជំងឺដែលត្រូវការការព្យាបាល ប៉ុន្តែកំពុងជួបការលំបាកផ្នែកហិរញ្ញវត្ថុ។ តាមរយៈជំនួយបរិច្ចាគនេះ មជ្ឈមណ្ឌលវេជ្ជសាស្ត្រ Seoul Asan គ្រោងនឹងយកទៅប្រើប្រាស់ដើម្បីជួយរ៉ាប់រងថ្លៃព្យាបាល និងវះកាត់សម្រាប់អ្នកជំងឺងាយរងគ្រោះ ឬជួបការលំបាកផ្នែកហិរញ្ញវត្ថុ ខណៈមជ្ឈមណ្ឌលវេជ្ជសាស្ត្រសាកលវិទ្យាល័យកូរ៉េនឹងប្រើប្រាស់ការបរិច្ចាគរបស់លោកដើម្បីកែលម្អបរិយាកាសព្យាបាល និងពង្រីកសេវាកម្មវេជ្ជសាស្រ្តរបស់ខ្លួន។ កើតនៅថ្ងៃទី 12 ខែកញ្ញា ឆ្នាំ 1994 ជាមួយឈ្មោះកំណើត Kim Nam-joon, RM ត្រូវបានអ្នកគាំទ្រខេប៉ុបស្គាល់យ៉ាងច្បាស់ក្នុងនាមជាប្រធានក្រុម BTS ដែលមានសមត្ថភាពខ្លាំងខាងរ៉េប និងនិពន្ធចម្រៀងផងដែរ។ លោកបានចាប់ផ្ដើមប្រើឈ្មោះ RM ជាឈ្មោះក្នុងសិល្បៈចាប់តាំងពីឆ្នាំ 2017។  ក្នុងឆ្នាំ 2015 RM បានចេញអាល់ប៊ុម “mixtape” ដំបូងរបស់ខ្លួន និងបានចេញអាល់ប៊ុមទោលទីពីរមានចំណងជើងថា 'Mono' ក្នុងឆ្នាំ 2018។ កាលពីថ្ងៃទី 10 ខែមិថុនា លោកបានបញ្ចប់កាតព្វកិច្ចយោធាកាលជាមួយមិត្តរួមក្រុម V បន្ទាប់ពីបានបំពេញការងារបម្រើជាតិរយៈពេល 18 ខែ ៕  ប្រែសម្រួល៖ វ៉ាន់ថន 

 បន្ទាប់ពីកើបចំណូលបានយ៉ាងក្រាស់ក្រែលនៅអាស៊ី នៅពេលនេះភាពយន្តគំនូរជីវចល Demon Slayer ថ្មីរបស់ជប៉ុនក៏បានបន្តវាយលុកទីផ្សារអាមេរិកនិងអឺរ៉ុប ដោយមានតារាសម្ដែងល្បីហូលីវូដ Channing Tatum ចូលរួមបញ្ចូលសំឡេងភាសាអង់គ្លេស។ តារាសម្តែងអាមេរិក Channing Tatum និងកូនស្រីរបស់ខ្លួនឈ្មោះ Everly Tatum បានស្ថិតក្នុងចំណោមតារាជាច្រើនទៀតដែលចូលរួមការសម្ពោធបញ្ចាំងលើកដំបូងនៅទីក្រុង Los Angeles សម្រាប់ភាពយន្តគំនូរជីវចលដ៏ល្បីពីប្រទេសជប៉ុន "Demon Slayer: Kimetsu no Yaiba Infinity Castle" កាលពីថ្ងៃទី 9 ខែកញ្ញា។  ខ្សែភាពយន្តនេះគឺជាវគ្គដំបូងក្នុងចំណោមរឿងសរុប 3 ភាគដែលនិយាយពីក្រុមអ្នកកម្ចាត់បិសាច Demon Slayer Corps ខណៈពួកគេត្រូវប្រឈមមុខនឹងបិសាចលំដាប់ខ្ពស់ Upper Rank នៅក្នុងការប្រយុទ្ធដ៏អស្ចារ្យមួយ ហើយការប្រយុទ្ធចុងក្រោយជាមួយស្ដេចបិសាច Muzan Kibutsuji ត្រូវចាប់ផ្តើម។  សម្រាប់ការដាក់បញ្ចាំងជាភាសាអង់គ្លេសនៅអាមេរិក តារាសម្ដែង Channing Tatum បានចូលរួមជាអ្នកបញ្ចូលសំឡេងមួយរូប ព្រមជាមួយតារាបញ្ចូលសំឡេងពីប្រទេសជប៉ុនដូចជា Natsuki Hanae និង Aleks Le។ មុនចាប់ផ្ដើមបញ្ចាំងនៅសហរដ្ឋអាមេរិក និងប្រទេសកាណាដានៅថ្ងៃទី 12 ខែកញ្ញានេះ ភាពយន្ត "Demon Slayer: Infinity Castle" បានកើបចំណូលបានប្រមាណ 300 លានដុល្លារទៅហើយពីការបញ្ចាំងនៅទីផ្សារអាស៊ី។  មិនត្រឹមតែអាចបំបែកំណត់ត្រាប្រាក់ចំណូល Box Office ជាច្រើននោះទេ ប៉ុន្តែរឿងនេះក៏បានបង្កើតកំណត់ត្រាថ្មីសម្រាប់ចំនួនអ្នកទស្សនាផងដែរ។ ចាប់តាំងពីចេញបញ្ចាំងដំបូងនៅប្រទេសជប៉ុនកាលពីថ្ងៃទី18 ខែកក្កដា "Demon Slayer: Infinity Castle" មានអ្នកចូលទស្សនាសរុប 22 លាននាក់ហើយ ដែលធ្វើឱ្យរឿងនេះក្លាយជាភាពយន្តជប៉ុនដែលប្រើពេលលឿនបំផុតដើម្បីទទួលបានអ្នកទស្សនាច្រើនដល់កម្រិតនេះ ៕   ប្រែសម្រួល៖ វ៉ាន់ថន 

 មុនឈ្នះពាន ២ ផ្ទួនៗ មហោស្រពភាពយន្តកម្ពុជា-អាស៊ី លើកទី៣ ឆ្នាំ២០២៥ រឿង «និយាយឡើងវិញ»របស់យុវសមិទ្ធិករវ័យក្មេង កេន ស៊ីដនី និង ហ៊ុល ថៃភិរុណ ធ្លាប់ឈ្នះពានរង្វាន់ពីកម្មវិធីមហោស្រពនានាចំនួន ៤ លើករួចមកហើយ។  ចាត់ទុកជាមោទកភាពយ៉ាងក្រៃលែងសម្រាប់វិស័យភាពយន្តខ្មែរនាពេលបច្ចុប្បន្ន ដោយថ្មីៗនេះភាពយន្តកម្ពុជាចំនួន ២ចំណងជើង គឺ ភាពយន្តខ្នាតវែង រឿង «ភ្លើងឆេះក្លឹបក្រោមដី» របស់ផលិតកម្ម LD Entertainment និង ភាពយន្តខ្នាតខ្លី រឿង «និយាយឡើងវិញ» (Respoken) របស់យុវសមិទ្ធិករវ័យក្មេង លោក កេន ស៊ីដនី និង លោក ហ៊ុល ថៃភិរុណ បានឈ្នះពានរង្វាន់ ៣ ពីមហោស្រពភាពយន្តកម្ពុជា-អាស៊ី លើកទី៣ ឆ្នាំ២០២៥។   តួយ៉ាង រឿង «ភ្លើងឆេះក្លឹបក្រោមដី» បានឈ្នះពានរង្វាន់ «តួឯកស្រីឆ្នើម» (Best Leading Actress) ដែលមាន កញ្ញា ជា សុភាព ជាតួសម្តែង ពិសី រីឯ រឿង និយាយឡើងវិញ» (Respoken) បានឈ្នះពានដល់ទៅ ២ ផ្ទួនៗ គឺ ពានរង្វាន់ «Best Short Film Director» និង ពានរង្វាន់ «Best Short Film»។   យុវសមិទ្ធិករវ័យក្មេងទាំង ២រូប ម្ចាស់ស្នាដៃភាពយន្តខ្នាតខ្លីកម្ពុជា រឿង «និយាយឡើងវិញ» គឺ កេន ស៊ីដនី និង ហ៊ុល ថៃភិរុណ រំភើបខ្លាំងចំពោះពានរង្វាន់ដែលទទួលបាននាពេលនេះ។ មែនទែនទៅ អ្នកទាំងពីរមិនរំពឹងថា អាចនឹងឈ្នះពានពីមហោស្រពភាពយន្តកម្ពុជា-អាស៊ី លើកទី៣ នោះឡើយ។ ក្នុងបទសម្ផាសន៍ជាមួយភីអិនអិនក្រោយឈ្នះពាន «Best Short Film Director» និង ពាន «Best Short Film» លោក កេន ស៊ីដនី និង លោក ហ៊ុល ថៃភិរុណ ថា នេះជាលើកទី៥ ហើយដែល ភាពយន្តខ្នាតខ្លី «និយាយឡើងវិញ» បានឈ្នះពានរង្វាន់ពីកម្មវិធីមហោស្រពនានា។   កេន ស៊ីដនី និង ហ៊ុល ថៃភិរុណ យល់ថា វានឹងរឹតតែល្អប្រសើរប្រសិនបើមានមហោស្រពភាពយន្តជាតិកាន់តែច្រើនមករៀបចំធ្វើឡើងនៅកម្ពុជា។ វាប្រៀបបីដូចជាការបើកឱកាសឱ្យយុវសមិទ្ធិករវ័យក្មេងដូចរូបលោកបានបញ្ចេញស្នាដៃភាពយន្តខ្នាតខ្លីរបស់ខ្លួនឱ្យគ្រប់គ្នាបានដឹង និងទទួលស្គាល់ពីសមត្ថភាពរបស់ផលិតករវ័យក្មេងផងដែរ។   ឆ្លៀតឱកាសនេះ សមិទ្ធិករវ័យក្មេងទាំង ២រូប បានបង្ហើបឱ្យដឹង ពេលនេះអ្នកទាំងពីរកំពុងសម្រិតសម្រាំងបង្កើតស្នាដៃភាពយន្តថ្មីរៀងៗខ្លួន ដោយសង្ឃឹមថា ស្នាដៃថ្មីទាំងនោះ នឹងអាចចូលរួមជំរុញឧស្សាកម្មភាពយន្តខ្មែរឱ្យកាន់តែមានភាពរីកចម្រើនឆ្ពោះទីផ្សារអន្តរជាតិ៕   អត្ថបទ៖ រ៉ាត់ ចាន់ធីតា រូបភាព៖ ឃាង ទូច   

  បវរកញ្ញារូបស្រស់ កញ្ញា សូរ ពេជ្រវលក្ខណ៍ ចាប់ផ្តើមបង្ហាញសក្កានុពល និងការងារសង្គម ដើម្បីត្រៀមសម្រាប់ការតំណាងកម្ពុជាទៅប្រកួតលើឆាកអន្តរជាតិនៅប្រទេសជប៉ុន ចុងឆ្នាំនេះ។  Cambodia International Model បានប្រកាសតែងតាំង កញ្ញា សូរ ពេជ្រវលក្ខណ៍ ជា Miss International Cambodia 2025 ធ្វើឱ្យគ្រប់គ្នាសប្បាយចិត្តជាខ្លាំង ដែលទីបំផុតបវរកញ្ញាជើងខ្លាំងម្នាក់នេះដាច់ចិត្តត្រឡប់មកអង្រួនឆាកបវរកញ្ញាម្តងទៀតហើយ។  បវរកញ្ញារូបនេះ បានបង្ហាញអារម្មណ៍រំភើប និងមោទកភាពដែលក្រុមហ៊ុនបានផ្តល់ទំនុកចិត្តជ្រើសរើសនាងជា Miss International Cambodia 2025 ដើម្បីតំណាងកម្ពុជាទៅចូលរួមប្រកួតកម្មវិធី Miss International 2025 ដែលនឹងប្រារព្ធរៀបចំឡើងនៅប្រទេសជប៉ុន នាអំឡុងខែវិច្ឆិកា ឆ្នាំ២០២៥ ខាងមុខនេះ។   មិនបង្អស់យូរ គ្រាន់តែបានគ្រងតំណែង Miss International Cambodia 2025 ភ្លាម វលក្ខណ៍ ចាប់ផ្តើមបង្ហាញសកម្មភាពផ្សេងៗជាបន្តបន្ទាប់ ពិសេសសកម្មភាពការសង្គមរបស់នាងតែម្តង។ ជាក់ស្តែង ថ្មីៗនេះនាងទើបត្រូវប្រកាសជាជាទូតសុឆន្ទៈ របស់សមាគមសប្បុរសធម៌ មេត្តា ថែមទៀតផង។  មិនទាន់អស់នៅឡើយទេ Miss International Cambodia 2025 បានបង្កើតគម្រោងការងារសប្បុរធម៌ផ្ទាល់ខ្លួនដ៏ធំមួយ ឈ្មោះថា «Back To Pride With Pichvoleak» ដែលផ្តោតលើការសាងសង់សាលារៀនចាស់ៗឱ្យក្លាយជាសាលារៀនថ្មី ដែលអាចផ្តល់ការសិក្សាអប់រំដល់ប្អូនៗនៅតាមទីជនបទ។    ក្រៅពីការចុះទៅត្រួតពិនិត្យទីតាំងសាលាចាស់ៗត្រៀមសម្រាប់គម្រោង «Back To Pride With Pichvoleak» បវរកញ្ញារូបស្រស់ពោរពេញដោយសមត្ថភាពនេះ ក៏កំពុងសម្រុកហ្វឹកហាត់ពង្រឹងការដើរ ការនិយាយជាសាធារណៈ និងឈុតសម្លៀកបំពាក់ផ្សេងៗ រួមទាំងឈុតតំណាងជាតិផងដែរ។  សូរ ពេជ្រវលក្ខណ៍ Miss International Cambodia 2025 សង្ឃឹមថា ពុកម៉ែបងប្អូននឹងបន្តគាំទ្ររូបនាងសម្រាប់ដំណើរឆ្ពោះទៅការប្រកួតអន្តរជាតិ Miss International 2025 នៅទឹកដីប្រទេសជប៉ុន នាពេលឆាប់ៗនេះ។ វលក្ខណ៍ ថា នាងនឹងមានអ្វីថ្មីៗ update មិនឱ្យអ្នកគាំទ្រខកបំណងឡើយ៕   អត្ថបទ៖ រ៉ាត់ ចាន់ធីតា រូបភាព៖ ឃាង ទូច និងផ្តល់ឱ្យ 

 សិល្បករ ១៨០០ នាក់ដែលភាគច្រើនជាតារាហូលីវូដបានប្រកាសធ្វើពហិការមិនធ្វើការជាមួយស្ថាប័នភាពយន្តក្នុងប្រទេសអ៊ីស្រាអែល ដោយសារបញ្ហាសង្គ្រាមនៅតំបន់ Gaza។តារាសម្ដែង សិល្បករ និងផលិតករជាង ១៨០០ នាក់ បានចុះហត្ថលេខាលើញត្តិមួយបង្ហាញការប្ដេជ្ញាថានឹងមិនធ្វើការជាមួយស្ថាប័នភាពយន្តអ៊ីស្រាអែល ដោយមើលឃើញថាស្ថាប័នទាំងនោះបានសមគំនិតក្នុងការរំលោភបំពានជនជាតិប៉ាឡេស្ទីន ។  អ្នកចុះហត្ថលេខាលើលិខិតនេះរួមមានតារាសម្តែង Olivia Colman, Emma Stone, Mark Ruffalo, Tilda Swinton, Riz Ahmed, Javier Bardem និង Cynthia Nixon ជាដើម។  ក្រុមហ៊ុនមួយចំនួនបានប្រឈមមុខនឹងការអំពាវនាវឱ្យធ្វើពហិការ និងការតវ៉ាជុំវិញទំនាក់ទំនងជាមួយរដ្ឋាភិបាលអ៊ីស្រាអែល ខណៈដែលវិបត្តិមនុស្សធម៌នៅតំបន់ហ្គាហ្សាកើតឡើងពីការវាយលុកដោយយោធារបស់អ៊ីស្រាអែលមានការកើនឡើង ហើយរូបភាពប្រជាជនរួមទាំងកុមារប៉ាឡេស្ទីនស្រេកឃ្លានបានបង្កឱ្យមានការផ្ទុះកំហឹងជាសកល។ លិខិតក្នុងញត្តិបានរៀបរាប់ថា ពួកគេមិនបានជំរុញនរណាម្នាក់ឱ្យឈប់ធ្វើការជាមួយបុគ្គលពីអ៊ីស្រាអែលនោះទេ ប៉ុន្តែផ្ទុយទៅវិញ "ការអំពាវនាវនេះគឺសម្រាប់ក្រុមការងារភាពយន្តឱ្យបដិសេធមិនធ្វើការជាមួយស្ថាប័ននៅអ៊ីស្រាអែលដែលបានសមគំនិតក្នុងការរំលោភសិទ្ធិមនុស្សរបស់អ៊ីស្រាអែល"។ក្នុងលិខិតក៏បានកត់សម្គាល់ពីមតិរបស់តុលាការយុត្តិធម៌អន្តរជាតិ ICJ កាលពីឆ្នាំមុនដែលនិយាយថា ការកាន់កាប់ទឹកដីប៉ាឡេស្ទីនរបស់អ៊ីស្រាអែលគឺខុសច្បាប់ ជាមួយការវាយតម្លៃដោយអ្នកជំនាញ និងអ្នកវិភាគជាច្រើនដែលនិយាយថា ការវាយលុកដោយយោធារបស់អ៊ីស្រាអែលលើតំបន់ហ្គាហ្សា គឺជាការប្រល័យពូជសាសន៍។  កន្លងមក រដ្ឋាភិបាលអ៊ីស្រាអែលបានច្រានចោលការអំពាវនាវប្រឆាំងនឹងស្ថាប័នអ៊ីស្រាអែលដោយចាត់ទុកថាជាការរើសអើង។ អ៊ីស្រាអែលនិយាយថា សកម្មភាពរបស់ខ្លួននៅតំបន់ហ្គាហ្សា គឺស្មើនឹង "ការការពារខ្លួន" បន្ទាប់ពីការវាយប្រហារនៅខែតុលា ឆ្នាំ ២០២៣ ដោយក្រុមសកម្មប្រយុទ្ធហាម៉ាស់ប៉ាឡេស្ទីន ដែលក្នុងនោះមនុស្ស ១២០០ នាក់ត្រូវបានសម្លាប់ និងជាង ២៥០ នាក់ត្រូវបានចាប់ធ្វើជាចំណាប់ខ្មាំង។  ការវាយលុកជាបន្តបន្ទាប់របស់អ៊ីស្រាអែល ដែលជាសម្ព័ន្ធមិត្តរបស់អាមេរិកលើតំបន់ហ្គាហ្សា បានសម្លាប់មនុស្សរាប់ម៉ឺននាក់ ធ្វើឱ្យប្រជាជនទាំងមូលរបស់ហ្គាហ្សាត្រូវផ្លាស់ទីលំនៅ និងបង្កើតវិបត្តិអត់ឃ្លាន ៕    ប្រែសម្រួល៖ វ៉ាន់ថន  

 កៀកដល់ថ្ងៃដើរម៉ូដកម្មវិធីលំដាប់អន្តរជាតិ New York Fashion Week នៅសហរដ្ឋអាមេរិក អ្នកច្នៃម៉ូដស្រីដំបូងគេរបស់កម្ពុជា កញ្ញា តាំង សុខហុង ទម្លាយមូលហេតុពិតពីក្រោយការជ្រើសរើសតារាស្រី និងបវរកញ្ញា ត្រឹមតែ ៣រូប គឺ ផន ស្រីពី , ឈុំ ចាន់ដារ៉ា និង មាលា ទៅដើរម៉ូដកម្មវិធីនេះ។  ជាលើកដំបូងដែលអ្នកច្នៃម៉ូដស្រីរបស់កម្ពុជា កញ្ញា តាំង សុខហុង ធ្វើការនាំយកសម្លៀកបំពាក់ច្នៃពីថ្វីដៃកូនខ្មែរសុទ្ធសាធក្រោមស្លាកយីហោ ALmée Couture (អាល់មី ខនតួ) ទៅចូលរួមដើរបង្ហាញម៉ូដ ក្នុងកម្មវិធីលំដាប់អន្តរជាតិ New York Fashion Week 2025 Spring/Summer ’26 នៅទីក្រុងញ៉ូយ៉ក សហរដ្ធអាមេរិក នៅថ្ងៃទី១៣ ខែកញ្ញា ឆ្នាំ២០២៥ វេលាម៉ោង 7:00 យប់ (ម៉ោងនៅសហរដ្ឋអាមេរិក)។  ក្នុងនោះ អ្នកច្នៃម៉ូដ តាំង សុខហុង នឹងបញ្ចេញស្នាដៃច្នៃម៉ូដដ៏ប្រណីតជិត២០ឈុត ដើម្បីបង្ហាញលើឆាកអន្តរជាតិមួយនេះ។ គំនិតសំខាន់បង្កប់ដោយអត្ថសញ្ញាណខ្មែរ និងត្រូវឆ្លុះបញ្ចាំងនៅលើឈុតទាំងនេះ ស្របពេលដែលអ្នកតាមដានវិស័យហ្វេសសិនលើកឡើងថា សុខហុង មានជំនាញលើការរចនាឈុតបានស្រស់ស្អាត ពិសេសគឺការប៉ាក់ឌិនដែលធ្លាប់បានសាងភាពលេចធ្លោជាច្រើនដងរហូតទទួលបានការគាំទ្រយ៉ាងខ្លាំងក្លាកាលពីពេលកន្លងមក។  ពាក់ព័ន្ធឈុតសម្លៀកបំពាក់ដែលត្រៀមនាំទៅដើរម៉ូដក្នុងកម្មវិធី New York Fashion Week 2025 Spring/Summer ’26  មានឈ្មោះថា «Spirit Of The Forgotten» ជា Collection ថ្មីសន្លាងច្នៃឡើងយ៉ាងពិសេសបំផុង ប្រកបដោយភាពផ្ចិតផ្ចង់ ភាពរស់រវើកនៃដួងព្រលឹងសិល្បៈ និងអត្ថសញ្ញាណខ្មែរយើង។  បន្ថែមពីលើអត្ថន័យនៃឈុតសម្លៀកបំពាក់ អ្នកច្នៃម៉ូដវ័យក្មេងពោរពេញដោយទេពកោសល្យរូបនេះ ក៏នាំតារាស្រី និងបវរកញ្ញា ៣រូប ទៅចូលរួមដើរបង្ហាញម៉ូដក្នុងកម្មវិធី New York Fashion Week 2025 Spring/Summer ’26 នេះផងដែរ គឺ កញ្ញា ផន ស្រីពី Miss Cosmo Cambodia 2025, កញ្ញា ឈុំ ចាន់ដារ៉ា Miss Supranational Cambodia 2024 និង តារាស្រីកូនកាត់ ២ សាសន៍ ខ្មែរ-បារាំង កញ្ញា មាលា ខនស្តេនទីន (Melia Constantin)។ ជាមួយគ្នានេះ សុខហុង ក៏បានទម្លាយឱ្យដឹងមូលហេតុពីក្រោយការសម្រេចចិត្តជ្រើសរើសយកតារាស្រី និងបវរកញ្ញាត្រឹមតែ ៣រូប ទៅចូលរួមដើរម៉ូដកម្មវិធីលំដាប់អន្តរជាតិនេះផងដែរ។  សូមជម្រាបឱ្យដឹងថា ពេលនេះអ្នកច្នៃម៉ូដវ័យក្មេងកម្ពុជា កញ្ញា តាន់ សុខហុង និង តារាស្រី និងបវរកញ្ញា ៣រូប គឺ ផន ស្រីពី , ឈុំ ចាន់ដារ៉ា និង មាលា បានធ្វើដំណើរទៅដល់ទឹកដីសហរដ្ឋអាមេរិកដោយសុវត្ថិភាពហើយ និងបានកំពុងត្រៀមសម្រាប់កម្មវិធី New York Fashion Week 2025 Spring/Summer ’26 នៅថ្ងៃទី១៣ ខែកញ្ញា ឆ្នាំ២០២៥ ខាងមុខនេះ។ក្រៅពី កញ្ញា ផន ស្រីពី , ឈុំ ចាន់ដារ៉ា និង មាលា ក៏នឹងមានតារាម៉ូដែលអន្តរជាតិជាច្រើនរូបទៀតដែលនឹងត្រូវស្លៀកឈុតច្នៃឡើងដោយប្រេនកូនខ្មែរ ALmée Couture (អាល់មី ខនតួ) ដើម្បីដើរបង្ហាញម៉ូដក្នុងកម្មវីធី Fashion Show ដ៏ធំលំដាប់អន្តរជាតិនេះ៕  អត្ថបទ៖ រ៉ាត់ ចាន់ធីតា រូបភាព៖ ឃាង ទូច និងហ្វេសប៊ុក   

 ភាពយន្តនិយាយពីសង្គ្រាមដែលសហការផលិតដោយប្រទេសចិន និងប្រទេសរុស្ស៊ីត្រូវបានសម្ពោធចាក់បញ្ចាំងលើកដំបូងក្នុងទីក្រុងប៉េកាំង កាលពីពេលថ្មីៗ។ភាពយន្តសហការផលិតដោយប្រទេសចិន និងរុស្ស៊ីមានចំណងជើងថា "Red Silk" បានចាក់បញ្ចាំងសម្រាប់ទស្សនិកជនចិនជាលើកដំបូងនៅក្នុងទីក្រុងប៉េកាំងកាលពីសប្ដាហ៍មុន រយៈពេលពីរថ្ងៃមុនការចេញបញ្ចាំងទូទាំងប្រទេសចិន។  ជាគម្រោងដ៏សំខាន់មួយដែលផលិតឡើងដើម្បីអបអរឆ្នាំវប្បធម៌ចិន-រុស្ស៊ី ២០២៤ និង២០២៥ ភាពយន្តថ្មីនេះមានសាច់រឿងនិយាយពីសមមិត្តចិន និងសហភាពសូវៀតដែលត្រូវសហការគ្នាប្រយុទ្ធលើសមរភូមិលាក់កំបាំងមួយ និងរួមគ្នាការពារយុត្តិធម៌។  គួររំឭកថា ភាពយន្តនេះបានចាក់បញ្ចាំងជាលើកដំបូងនៅក្នុងប្រទេសរុស្ស៊ីកាលពីខែកុម្ភៈ និងបានបង្កើតកំណត់ត្រាចំណូលពីការលក់សំបុត្រខ្ពស់បំផុតសម្រាប់ខ្សែភាពយន្តប្រភេទសង្គ្រាមក្នុងប្រទេសរុស្ស៊ី។  ទន្ទឹមនឹងការចេញបញ្ចាំងភាពយន្តនេះក្នុងប្រទេសចិន មហោស្រពភាពយន្តរុស្ស៊ីឆ្នាំនេះក៏បាននិងកំពុងរៀបចំនៅទីក្រុងប៉េកាំង ទីក្រុងស៊ីនីង នៅខេត្តឈីងហៃ និងទីក្រុងឡានចូវ នៅខេត្តកានស៊ូ ភាគពាយ័ព្យប្រទេសចិន។ចាប់ផ្ដើមពីថ្ងៃទី ១ ដល់ថ្ងៃទី ១២ ខែកញ្ញា ព្រឹត្តិការណ៍នេះមានការចាក់បញ្ចាំងខ្សែភាពយន្តរុស្ស៊ីចំនួន ៨ ដែលគ្របដណ្តប់លើប្រធានបទ និងប្រភេទចម្រុះគ្នាជាច្រើន ៕   ប្រែសម្រួល៖ វ៉ាន់ថន   

 សមត្ថភាពសម្តែងដ៏ប៉ិនប្រសព្វរបស់ កញ្ញា ជា សុភាព ធ្វើឱ្យនាងឈ្នះពាន «តួឯកស្រីឆ្នើម» ពីមហោស្រពភាពយន្តកម្ពុជា-អាស៊ី លើកទី៣ ក្លាយជាតារាស្រីកម្ពុជាទី២ ដែលបានឈ្នះពានរង្វាន់នេះ។  តារាសម្តែងស្រករក្រោយកំពុងធ្វើព្យុះធ្វើភ្លៀងក្នុងវិស័យភាពយន្តខ្មែរ កញ្ញា ជា សុភាព បានសាងភាពភ្ញាក់ផ្អើលយ៉ាងខ្លាំង ដោយថ្មីៗនេះនាងបានឈ្នះពានរង្វាន់ «តួឯកស្រីឆ្នើម» (Best Leading Actress) ពីមហោស្រពភាពយន្តកម្ពុជា-អាស៊ី លើកទី៣ តាមរយៈស្នាដៃសម្តែងភាពយន្តខ្នាតវែង រឿង «ភ្លើងឆេះក្លឹបក្រោមដី» របស់ផលិតកម្ម LD Entertainment។  កញ្ញា ជា សុភាព គឺជាតារាស្រីកម្ពុជាទី២ ដែលបានឈ្នះពានរង្វាន់នេះ ខណៈឆ្នាំមុន កញ្ញា ស៊ីន យូប៊ីន ជាម្ចាស់ពានរង្វាន់នេះ។ តារាសម្តែងរូបស្រស់សោភាជំនាញតួអង្គខ្មោចរូបនេះ បានបង្ហាញអារម្មណ៍រំភើបរីករាយចំពោះពានរង្វាន់ «តួឯកស្រីឆ្នើម» ព្រោះនាងពុំនឹកស្មានថា ខ្លួនឯងនឹងអាចឈ្នះការពាននេះឡើយ។  សមិទ្ធិផលពានរង្វាន់នេះមិនអាចកើតឡើងបានឡើយ ប្រសិនបើគ្មានការចូលរួមប្រឹងប្រែងយ៉ាងសស្រាក់សស្រាំពីក្រុមការងារផលិតទាំងមូលរបស់ LD Entertainment។  តួអង្គ ពិសី ព្រាយរ៉ូបក្រហមដ៏ល្បីល្បាញរូបនេះថា ការឈ្នះពានរង្វាន់ «តួឯកស្រីឆ្នើម» នាពេលនេះជា ជាកម្លាំងជម្រុញចិត្តដ៏ធំធេងសម្រាប់នាងក្នុងការពង្រឹង និងអភិវឌ្ឍស្នាដៃម្តែងខ្លួនឯងទៀតសម្រាប់រឿងបន្តបន្ទាប់។  សូមបង្ហើបឱ្យដឹងផងដែរថា ឆាប់ៗខាងមុខនេះប្រិយមិត្តទស្សនិកជន ពិសេសអ្នកនិយមគាំទ្ររឿងបែបរន្ធត់ព្រឹព្រួច និងអ្នកគាំទ្រស្នាដៃរឿង «ភ្លើងឆេះក្លឹបក្រោមដី» នឹងបានទស្សនា វគ្គ២ នៃរឿងនេះដែលបច្ចុប្បន្នផលិតករ អ្នកដឹកនាំរឿង និងតួអង្គកំពុងថតយ៉ាងយកចិត្តទុកដាក់ ត្រៀមបម្រើអារម្មណ៍ពុកម៉ែបងប្អូនលើផ្ទាំងសំពត់សរនៃរោភាពយន្តទំនើបនាពេលឆាប់ៗនេះ៕   អត្ថបទ៖ រ៉ាត់ ចាន់ធីតា រូបភាព៖ ឃាង ទូច