កម្មវិធី Freshy Winner របស់ស្ថានីយទូរតស្សន៍ PNN នាថ្ងៃ អាទិត្យទី ២៩ ខែមិថុនា ឆ្នាំ២០២៥ ចុងសប្ដាហ៍នេះ ពិតជាប្លែកអារម្មណ៍ និងធ្វើឱ្យទស្សនិកជនទប់សំណើចមិនបាន ជាមួយវត្តមានតារាល្បីៗ ដែលបង្ហាញវត្តមានក្នុងកម្មវិធីនេះ។  កម្មវិធី Freshy Winner ដែលតែងតែពាំនាំយកអ្វីដែលថ្មីៗប្លែកៗមកចែកជូនទស្សនិកជនទស្សនាមិនអោយមានអារម្មណ៍ធុញទ្រាន់នោះឡើយ។ សប្តាហ៍កាន់តែប្លែកអារម្មណ៍ជាមួយវត្តមានតាកិត្តិយសល្បីៗ។   វត្តមាន កញ្ញា គុនថង ដែលនឹងចាប់ដៃគូរជាមួយ លោក ស៊ូ យ៉ាទី នៅក្នុងក្រុម (ទឹកត្រឡាច) នឹងប្រកួតជា កញ្ញា ផាត់ ធីយ៉ា ចាប់ដៃគូជាមួយ ចែស្រម៉ូម នៅក្នុងក្រុម (តែទឹកឃ្មុំ)។   បេក្ខជនទាំងបួនរូបនឹងត្រូវឆ្លងកាត់វិញ្ញាសារដែរកម្មវិធីបានដាក់ជូនរួចជាស្រេចក្នុងនោះរួមមាន៖ហ្គេមទី១ លូកស្ទាប , ហ្គេមទី២ ហាមងាកក្រោយ Version២ ? , ហ្គេមទី៣ នៅឯណា? និង ហ្គេមទី៤ Version បំពេញចន្លោះ ។   ចំពោះហ្គេមទាំងបួននេះ តម្រូវអោយបេក្ខជនទាំងពីរក្រុមមានភាពឆ្លាតវៃ រហ័សរហួន ព្រមជាមួយនឹងទេពកោសល្យ ទើបអាចទទួលបានជ័យជំនះបានប្រាក់លានពីកម្មវិធីវិលត្រលប់ទៅផ្ទះវិញ។  ទន្ទឹមនឹងការឆ្លងកាត់វិញ្ញាសារ ទស្សនិកជនក៏នៅតែទទួលបាននៅភាពសប្បាយរីករាយ ពីកាយវិការ នឹងពាក្យសំដីនិយាយឌឺដងផ្លែផ្កា ដែលញុំាងអោយកម្មវិធីកាន់តែមានភាពរស់រវើកថែមទៀត។  ចង់ដឹងថា តើទាំងពីរក្រុមនឹងត្រូវឆ្លងកាត់វិញ្ញាសារយ៉ាងណាខ្លះ? សូមកុំភ្លេចរង់ចាំទស្សនាក្មុងកម្មវិធី Freshy Winner ដែលនឹងចាក់ផ្សាយនៅលើកញ្ចក់ទូរទស្សន៍ ភីអិនអិន នៅថ្ងៃ អាទិត្យ ទី ២៩ ខែមិថុនា  ឆ្នាំ២០២៥ វេលាម៉ោង៦ដល់ម៉ោង ៧យប់តទៅ៕     អត្ថបទ និងរូបភាព៖ PNN   

 ឆ្លងកាត់ការហ្វឹកហាត់យ៉ាងស្វិតស្វាញជាច្រើនសប្តាហ៍ជាមួយបេក្ខភាពផ្លូវការផ្សេងទៀត ហ្វីយ៉ាតា ហ៊ានបង្ហាញក្តីរំពឹងខ្ពស់ក្នុងការដណ្តើមមកុដ Miss Universe Cambodia 2025 បន្ទាប់ពីត្រៀមខ្លួនដាក់ចិត្តដាក់កាយ ១០០ភាគរយ។  ចំណាយពេលឆ្លងកាត់ការហ្វឹកហាត់ជាច្រើនសប្តាហ៍ជាមួយបេក្ខភាពផ្លូវការផ្សេងទៀត អ្នកនាង ថៃ នារីសុជាតា ហៅ ហ្វីយ៉ាតា ដែលជាអតីតហ្វរ្េសស៊ីលេខ១ផង ហ៊ានបង្ហាញក្តីរំពឹងខ្ពស់ជាងមុនក្នុងការដណ្តើមមកុដ Miss Universe Cambodia 2025 មកគ្រប់គ្រង ដើម្បីក្លាយជាបវរកញ្ញាតំណាងកម្ពុជាទៅប្រកួតលើឆាកអន្តរជាតិ។  បេក្ខនារីស្លាកលេខ MUC07 ហ៊ានអះអាងបែបនេះដោយក្តីជឿជាក់ និងទំនុកចិត្តលើខ្លួនឯង ថែមទាំងសរសើរពីការរៀបចំការប្រកួតរបស់អ្នកគ្រប់គ្រងថ្នាក់ជាតិទៀតផង។  ហ្វីយ៉ាតា ថា នាងនិងមិនបន្ថយដៃឱ្យបេក្ខភាពផ្សេងទៀតនោះឡើយ ប៉ុន្តែមនោសញ្ចេតនាក្រោយឆាករវាងនាង និងបេក្ខភាពនៅតែល្អដូចបងប្អូន។គួររំឮកឱ្យដឹងផងដែរថា មកទល់ពេលនេះការប្រកួត Miss Universe Cambodia 2025 កាន់តែខិតជិតមកដល់ការប្រកួតវគ្គផ្តាច់ព្រ័ត្រហើយ ខណៈដែលបេក្ខភាពម្នាក់ៗកំពុងប្រឹងសន្សំពិន្ទុរៀងៗខ្លួនឆ្ពោះទៅរកតំណែង Top ចុងក្រោយ។  កម្មវិធីប្រកួតវគ្គផ្ដាច់ព្រ័ត្រ Miss Universe Cambodia 2025 ដែលសម្បូរទៅដោយបេក្ខភាពខ្លាំងៗ ឆ្នើមៗ នឹងមានការឡាយផ្ទាល់ពីស្ថានីយទូរទស្សន៍ PNN និងផេកផ្លូវការ Miss Universe Cambodia ផងដែរ៕    អត្ថបទ៖ រ៉ាត់ ចាន់ធីតា រូបភាព៖ ឃាង ទូច និង ហ្វេសប៊ុក  

 រយៈពេលប្រមាណ ៧ ឆ្នាំបន្ទាប់ពីចេញអាល់ប៊ុមដំបូង នៅពេលនេះតារារ៉េបស្រីល្បីឈ្មោះ Cardi B ក៏បានប្រកាសដំណឹងដ៏គួរឱ្យរំភើបសម្រាប់អ្នកគាំទ្ររបស់ខ្លួនពាក់ព័ន្ធការចេញអាល់ប៊ុមថ្មី។ តារារ៉េបស្រីដ៏ល្បីរបស់អាមេរិក Cardi B ថ្មីៗនេះបានប្រកាសកាលបរិច្ឆេទចេញអាល់ប៊ុមពេញទីពីររបស់ខ្លួនមានចំណងជើងថា "AM I THE DRAMA" ដែលជាអាល់ប៊ុមដំបូងរបស់នាងក្នុងរយៈពេលប្រាំពីរឆ្នាំ។ តារាស្រីវ័យ ៣២ ឆ្នាំរូបនេះបានចែករំលែកវីដេអូមួយនៅលើគណនី Instagram បង្ហាញពីការប្រកាស មុននឹងបង្ហោះរូបភាពគម្របអាល់ប៊ុម ជាមួយ Caption សរសេរថា "AM I THE DRAMA?  អាល់ប៊ុមថ្មីរបស់នឹងខ្ញុំចេញនៅថ្ងៃទី ១៩ ខែកញ្ញា! Preorder LINK IN BIO"។ការប្រកាសពីអាល់ប៊ុមថ្មីនេះ គឺមានរយៈពេលប៉ុន្មានថ្ងៃបន្ទាប់ពីនាងបានចេញបទចម្រៀងថ្មីមានចំណងថា “Outside” កាលពីថ្ងៃទី២០ ខែមិថុនា។ គួររំឭកថា Cardi B បានបង្ហាញមុខដំបូងក្នុងឆ្នាំ ២០១៥ និងបានចេញចម្រៀងទោលដំបូងមានចំណងជើងថា "Bodak Yellow" ក្នុងឆ្នាំ ២០១៧។ តារារ៉េបស្រីរូបនេះត្រូវបានស្គាល់ច្រើនតាមរយៈបទល្បីៗកំពូលតារាងដូចជាបទ "WAP" ដែលច្រៀងជាមួយ Megan Thee Stallion, បទ "I Like It" ច្រៀងជាមួយ Bad Bunny & J Balvin ព្រមទាំងបទ "Up" ជាដើម។ អាល់ប៊ុមពេញទីមួយរបស់នាងមានចំណងជើងថា “Invasion of Privacy” បានចេញផ្សាយក្នុងឆ្នាំ២០១៨ ដែលទទួលបានជោគជ័យខ្លាំង និងជួយឱ្យនាងបានឈ្នះពានរង្វាន់ Grammy ផ្នែកអាល់ប៊ុមរ៉េបល្អបំផុតប្រចាំឆ្នាំ ៕   ប្រែសម្រួល៖ វ៉ាន់ថន  

 មហាសេដ្ឋីអាមេរិក Jeff Bezos និងស្នេហាក្រោយគឺអ្នកកាសែតស្រី Lauren Sanchez បានចាប់ផ្ដើមរៀបចំមង្គលការរបស់ពួកគេនៅថ្ងៃទី២៦ ខែមិថុនានេះហើយ ខណៈមានសេចក្ដីរាយការណ៍ថាមង្គលការទាំងមូលអាចចំណាយដល់ខ្ទង់ ៥០ លានដុល្លារ។  មហាសេដ្ឋីប្រធានក្រុមហ៊ុន Amazon និងជាស្ថាបនិកក្រុមហ៊ុនយានអវកាស Blue Origin លោក Jeff Bezos ជាមួយគូដណ្តឹងជាអ្នកកាសែត Lauren Sanchez ត្រូវបានគេឃើញចាកចេញពីសណ្ឋាគារប្រណីតមួយនៅទីក្រុង Venice កាលពីល្ងាចថ្ងៃពុធ ទី២៥ ខែមិថុនា ខណៈពួកគេកំពុងត្រៀមខ្លួនសម្រាប់ពិធីមង្គលការលំដាប់ VIP រយៈពេល ៣ ថ្ងៃនៅទីក្រុងដៃសមុទ្រនៃប្រទេសអ៊ីតាលីនេះ។ សេចក្ដីរាយការណ៍ពីសារព័ត៌មានរ៉យទ័របានឱ្យដឹងថា យន្តហោះឯកជនប្រហែល ៩០ គ្រឿង គ្រោងនឹងចុះចតនៅអាកាសយានដ្ឋានទីក្រុង Venice ក្នុងសប្តាហ៍នេះ ដោយនាំយកនូវភ្ញៀវកិត្តិយសលំដាប់ A ជាច្រើនរូបមានតាំងពីអ្នកជំនួញ អ្នកសិល្បៈ អ្នកនយោបាយ និងបុគ្គលល្បីៗក្នុងវិស័យផ្សេងៗទៀត។ ពិធីមង្គលការដ៏ធំប្រចាំសតវត្សរ៍នេះត្រូវបានគេវាយតម្លៃថានឹងចំណាយប្រាក់អស់ចន្លោះ ៤៦ ដល់ ៥៦ លានដុល្លារអាមេរិក។ ប្រភពជិតស្និទ្ធនឹងអ្នករៀបចំកម្មវិធីបានប្រាប់រ៉យទ័រថា កម្មវិធីនឹងចាប់ផ្តើមនៅយប់ថ្ងៃព្រហស្បតិ៍ជាមួយនឹងការជួបជុំគ្នានៃបរិវេណខាងក្រៅព្រះវិហារ Madonna dell'Orto ដែលត្រូវបានគេស្គាល់ផងដែរថាជាកន្លែងកម្សាន្តពេលរាត្រីដ៏រស់រវើក។  គួររំឭកថា មហាសេដ្ឋីវ័យ ៦១ ឆ្នាំ Bezos និងគូដណ្ដឹងវ័យ ៥៥ ឆ្នាំបានភ្ជាប់ពាក្យជាមួយគ្នានៅឆ្នាំ ២០២៣។ យ៉ាងណាមិញ ទំនាក់ទំនងរបស់ពួកគេត្រូវបានលេចឮតាំងពី ៤ ឆ្នាំមុន ភ្លាមៗបន្ទាប់ពី លោក Bezos និងភរិយាមុនរបស់លោកឈ្មោះ Mackenzie Scott បានប្រកាសលែងលះគ្នាក្រោយរៀបការបាន ២៥ ឆ្នាំ។ កាលពីខែមេសា Lauren Sanchez និងស្ត្រីប្រាំរូបទៀត រួមទាំងតារាចម្រៀងប៉ុប Katy Perry បានធ្វើដំណើរទៅកាន់ទីអវកាសតាមរយៈយានរ៉ុក្កែត Blue Origin និងបានវិលត្រឡប់មកផែនដីវិញដោយជោគជ័យ ដែលក្លាយជាការហោះទៅកាន់ទីអវកាសរបស់អ្នកដំណើរជាស្ត្រីលើកដំបូងក្នុងរយៈពេលជាង ៦០ ឆ្នាំចុងក្រោយ ៕   ប្រែសម្រួល៖ វ៉ាន់ថន 

  សមាជិកក្រុមចម្រៀងរ៉េបល្បីឈ្មោះ La Cima Cartel ថ្មីៗនេះទើបបង្ហើបឱ្យដឹងថា ឆាប់ៗនេះគ្រប់គ្នានឹងបានស្តាប់ស្នាដៃបទចម្រៀងថ្មីជាច្រើន ច្រើនរសជាតិពីសមាជិក La Cima Cartel ក្នុងនោះអាចនឹងមានការ collaborate ជាមួយសិល្បករក្រៅប្រទេសទៀតផង។  ខាងលើនេះជាការបង្ហើបដោយផ្ទាល់ពី លោក All3rgy (អលជ្ជី) សមាជិកក្រុមចម្រៀងរ៉េបល្បីឈ្មោះ La Cima Cartel ជុំវិញស្នាដៃចម្រៀងថ្មីៗដែលត្រៀមបញ្ចេញលើទីផ្សារនាពេលឆាប់ៗខាងមុខនេះ ដើម្បីបម្រើអារម្មណ៍ប្រិយមិត្តទស្សនិកជន ពិសេសអ្នកគាំទ្រស្មោះស្ម័គ្ររបស់ក្រុម La Cima Cartel។   តាមការបញ្ជាក់របស់សមាជិក លោក All3rgy (អលជ្ជី) ថា La Cima Cartel មិនដែលធ្វើឱ្យអ្នកគាំទ្រខកបំណងចំពោះស្នាដៃថ្មីៗឡើយ ព្រោះសមាជិកម្នាក់ៗបានខិតខំរិះរកគំនិតច្នៃប្រតិដ្ឋថ្មីមកបញ្ជូលក្នុងបទភ្លេង និង រសជាតិចម្រៀងថ្មីប្លែកឱ្យជឿនលឿនស័ក្កសមនឹងរបត់សង្គមយុវវ័យសម័យថ្មីផងដែរ។   រឹតតែពិសេស ថ្មីៗនេះ Plus 855 Music ទើបប្រកាសសិល្បករទោលទាំង ៣រូបទៀតជាសមាជិកពេញសិទ្ធិ រួមមាន៖ មន្ត្រីយ៍ ឯក , ឌីលុច និងកញ្ញា ចាន់ ស្រីខួច ដែលអ្នកទាំង៣ នឹងមករួមដំណើរទៅមុខយ៉ាងវែងឆ្ងាយជាមួយ La Cima Cartel ក្នុងការពង្រីកសក្កានុពលវិស័យចម្រៀងខ្មែរឱ្យរឹតតែមានភាពរីកចម្រើនទៅមុខជាដរាប។  តាមគម្រោងផែនការដែល លោក ស៊ីវ រិទ្ធី ស្ថាបនិក និងជានាយកគ្រប់គ្រង Plus 855 Music បានចង្អុលបង្ហាញក្នុងពិធីសម្ពោធជាផ្លូវការ Plus 855 ស្នាដៃចម្រៀងថ្មីរបស់ក្រុម La Cima Cartel នឹងចាប់ផ្តើមចេញចម្រៀងរបស់ All3rgy (អលជ្ជី) រួចទើបបន្តទៅសិល្បករបន្តបន្ទាប់តាមខ្សែបន្ទាប់ដែលក្រុមហ៊ុនបានកំណត់ទុក។  គ្រប់គ្នាបានបង្កើតរសជាតិចម្រៀងថ្មីរៀងៗខ្លួន បញ្ចូលដោយអារម្មណ៍មនោសញ្ចេតនា និងការរៀបរាប់បង្កប់អត្ថន័យអ្វីម៉្យាងសម្រាប់អ្នកស្តាប់ រួមទាំងការព្យាបាលផ្លូវចិត្តផងដែរ។  ឆ្លៀតឱកាសនេះ លោក All3rgy សូមថ្លែងអំណរគុណដល់អ្នកគាំទ្រទាំងអស់ដែលតែងតែគាំទ្ររាល់ស្នាដៃបទចម្រៀងរបស់ក្រុម La Cima Cartel តាំងពីចំនុចចាប់ផ្តើមរហូតមកទល់ពេលនេះ ហើយឆាប់ៗនេះលោកអ្នកនឹងបានរីករាយសន្តាប់បទចម្រៀងថ្មីៗជាច្រើនបទ ដែលក្នុងនោះអាចនឹងមានការ collaborate ជាមួយសិល្បករក្រៅប្រទេសថែមទៀតផង៕  អត្ថបទ៖ រ៉ាត់ ចាន់ធីតា រូបភាព៖ ឃាង ទូច 

 រ៉ូលីន នឹងលេចវត្តមានក្នុងកម្មវិធី CAMBODIA LITE Station របស់PNN ស្អែកនេះ។ អ្វីធ្វើឱ្យទស្សនិកជនអាចនឹងទប់សំណើចមិនបានគឺនាងនឹងបកស្រាយចម្រៀងបែបចម្រុះមិនក្រោម ៥ភាសានោះទេ។ រ៉ូលីន ដែលទស្សនិកជនស្គាល់ថាជាតារាចម្រៀងពូកែច្រៀងចម្រៀងចម្រុះភាសាក្នុងពេលតែមួយ ធ្វើឱ្យទស្សនិកជនទប់សំណើចមិនបាននោះ នឹងបង្ហាញវត្តមាននៅក្នុងកម្មវិធី CAMBODIA LITE Station របស់ PNN នាយប់ថ្ងៃទី ២៧ ខែ មិថុនា ឆ្នាំ២០២៥ ស្អែកនេះ ជាមួយតារាចម្រៀងប្រុសរូបសង្ហាម្នាក់ទៀតគឺលោក ម៉ានុត។  ទស្សនិកជនដែលទន្ទឹងរង់ចាំទស្សនា ដឹងតែសប្បាយប្លែកពីភាពប៉ិនប្រសព្វ ដោយវត្តមានរបស់តារាកិត្តិយសមកចូលរួមមានទាំងពីរ រ៉ូលីន និងបុរសសង្ហាលោក ម៉ានុត អមដោយពិធីករពូកែវោហាសព្ទលោក យ៉ារ៉ូ ទៀតនោះ ធានាថា នឹងធ្វើអោយទស្សនិកជនផ្ទុះសំណើចតាំងពីដើមដល់ចប់។   តារាចម្រៀង រ៉ូលីន នឹងពាំនាំភាពសប្បាយរីករាយ តាមរយៈការបកស្រាយបទចម្រៀងជាច្រើនបទ មានទាំងបទខ្មែរ និងបទចម្រៀងចម្រុះភាសាដទៃទៀត ជាពិសេសតារារូបនេះ នឹងលើកយកបទចម្រៀងនៅទសវត្សរ៍ទី៦០មកបកស្រាយថែមទៀតផង។  រីឯវត្តមានតារាចម្រៀងម្ចាស់បទ កុមារី២៥ឆ្នាំ លោក ម៉ានុត ក៏ត្រៀមជាមួយបទចម្រៀងជាច្រើនបទដូចគ្នា សុទ្ធសឹងតែជាបទបែបយុវវ័យ ចាក់ដោតអារម្មណ៍ អមជាមួយនឹងសាច់ភ្លេងបែប Acoustic ទៀត កាន់តែញុំាងបរិកាសអោយកាន់តែរំភើបបន្ថែមទៀត។  ការចាប់ដៃគ្នារបស់ រ៉ូលីន និងម៉ានុ ក្នុងកម្មវិធី CAMBODIA LITE Station សប្ដាហ៍នេះពិតណាស់ ទស្សនិកជននឹងទទួលបានចំណីអារម្មណ៍ប្លែក មិនធ្លាប់មានពីមុនមក។  ជាពិសេសបរិយាកាសដ៏រ៉ូមែនទិក ធ្វើឱ្យទស្សនិកជន មិនត្រឹមតែសប្បាយរីករាយបាត់អស់ទុក្ខកង្វល់ទេ ថែមទាំងបានស្ដាប់ពីភាពប៉ិនប្រសព្វនៃការបកស្រាយបទចម្រៀងរបស់តារាចម្រៀងល្បីឈ្មោះទាំងពីរនេះថែមទៀត។  ដូច្នេះកុំភ្លេចណា រង់ចាំតាមដានទស្សនាកម្មវិធី CAMBODIA LITE Station ចាក់ផ្សាយនៅថ្ងៃសុក្រ ទី២៧ ខែមិថុនា ឆ្នាំ២០២៥ ស្អែកនេះវេលាម៉ោង ៨យប់តទៅ នៅលើកញ្ចក់ទូរទស្សន៍ភីអិនអិន៕    អត្ថបទ និងរូបភាព៖ PNN 

   តារា​ចម្រៀង​ម្ចាស់បទ “Price Tag” Jessie J បានបង្ហោះសារ​​លើ​បណ្ដាញ​សង្គម Instagram ​កាលពីថ្ងៃទី២៣ ខែមិថុនា ដោយបង្ហើបថា នាង​ទើបតែបានទទួល​ការ​វះកាត់ដំបូងដើម្បីព្យាបាលជំងឺ​មហារីក​សុដន់។  នៅក្នុង Caption ​អម​ជាមួយ​វីដេអូ​នោះ តារាចម្រៀងវ័យ ៣៧ឆ្នាំ​បាន​សរសេរ​ថា៖ "ការ​បង្ហោះ​នេះ​គឺ​ជាការបង្ហាញដ៏ស្មោះត្រង់ពីស្ថានភាពខ្ញុំ​ក្នុង​រយៈ​ពេល ៤៨ ម៉ោង​ចុង​ក្រោយ​។ ខ្ញុំ​នឹងបន្តចែករំលែក​អ្នកទាំងអស់គ្នាទៀតពីដំណើរការ​ល្អ និងការ​លំបាក​នៃ​​ការព្យាបាលដែល​ខ្ញុំ​ឆ្លងកាត់"។ នៅក្នុងវីដេអូមួយ នាងបាននិយាយថា នាងបានរង់ចាំ ៦ ម៉ោងកន្លះនៅក្នុងមន្ទីរពេទ្យសម្រាប់ការវះកាត់។  តារាចម្រៀងដែលមានឈ្មោះពេញថា Jessica Ellen Cornish បានប្រកាសថានាងត្រូវបានគ្រូពេទ្យធ្វើរោគវិនិច្ឆ័យឃើញថាមានជំងឺមហារីកសុដន់ តាមរយៈវីដេអូមួយដែលនាងបានបង្ហោះនៅលើ Instagram កាលពីថ្ងៃទី ៤ ខែមិថុនា។  កាល​ពី​ថ្ងៃ​ទី ១៥ ខែ​មិថុនា នាង​បាន​បន្ត​សម្តែង​បទ​ចម្រៀងល្បីៗរបស់នាងដូចជាបទ "Price Tag" និង "Domino" នៅក្នុងកម្មវិធីប្រគំតន្ត្រីធំប្រចាំឆ្នាំរបស់អង់គ្លេសគឺ Capital's Summertime Ball នៅពហុ​កីឡដ្ឋាន Wembley។  នៅចំពោះមុខទស្សនិកជនជាច្រើនក្នុងកម្មវិធីនោះ Jessie J បានបង្ហើបថានេះគឺជាការសម្ដែងចុងក្រោយរបស់នាង មុននឹងចាប់ផ្ដើមការតស៊ូជាមួយជំងឺមហារីក។  ព័ត៌មាននៃជំងឺមហារីកនេះបានលេចឡើងរយៈពេល២ឆ្នាំបន្ទាប់កាលពីឆ្នាំ ២០២៣ Jessie J បានសម្រាលបានកូនប្រុសម្នាក់ ដែលជាកូនដំបូងរបស់នាងជាមួយនឹងអ្នកលេងបាល់បោះ Chanan Colman ៕  ប្រែសម្រួល៖ វ៉ាន់ថន  

 តារាសម្ដែងហូលីវូដល្បីៗពីភាពយន្តដាយណូស័រវគ្គថ្មីមានចំណងជើងថា 'Jurassic World: Rebirth' បានបង្ហាញខ្លួនជុំគ្នាម្ដងទៀតក្នុងពិធីសម្ពោធនៅញូវយ៉ក សហរដ្ឋអាមេរិក។ តារាសម្តែងអាមេរិក Scarlett Johansson និងតារាសម្តែងឈ្នះពានរង្វាន់អូស្ការ Mahershala Ali ស្ថិតក្នុងចំណោមតារាល្បីជាច្រើនដែលបានចូលរួមក្នុងពិធីសម្ពោធបញ្ចាំងភាពយន្ត "Jurassic World: Rebirth" នៅញូវយ៉កកាលពីថ្ងៃទី២៣ ខែ មិថុនា។ ដឹកនាំដោយលោក Gareth Edwards ភាពយន្ត "Jurassic World: Rebirth" មិនមានសាច់រឿងពាក់ព័ន្ធនឹងភាពយន្តពិភពដាយណូស័រ "Jurassic World” វគ្គមុនៗនោះទេ ប៉ុន្តែនឹងនិយាយពីរឿងរ៉ាវរបស់តួអង្គថ្មីមួយក្រុមនាំមុខដោយតារាស្រី Scarlett Johansson និងតារាប្រុស  Jonathan Bailey ដោយពួកគេត្រូវបំពេញបេសកកម្មលើកោះហាមឃាត់ ដើម្បីតាមរកគំរូ DNA ពីដាយណូស័រ ៣ ប្រភេទដើម្បីយកមកធ្វើជាថ្នាំសង្គ្រោះជីវិតមនុស្ស។ ភាពយន្តនេះត្រូវបានចេញបញ្ចាំងរយៈពេល៣ឆ្នាំបន្ទាប់ពីវគ្គមុនគឺរឿង Jurassic World Dominion ដែលមានតារាសម្ដែង Chris Pratt ជាតួឯកបានចេញកាលពីឆ្នាំ២០២២ និងរកចំណូលពីការលក់សំបុត្របានដល់ ១ ពាន់លានដុល្លារ។ នៅក្នុងបទសម្ភាសន៍ជាមួយអ្នកសារព័ត៌មានក្នុងកម្មវិធីសម្ពោធនេះ តារាសម្ដែង Jonathan Bailey បាននិយាយថា ភាពយន្តនេះនឹងជាឱកាសពិសេសសម្រាប់សមាជិកគ្រួសារគ្រប់ជំនាន់មកទស្សនាជាមួយគ្នា ជាពិសេសសម្រាប់អ្នកគាំទ្រសែស្រឡាយភាពយន្តពិភពដាយណូស័រ Jurassic World ជាង ៣០ឆ្នាំកន្លងមក។ អ្នកដឹកនាំរឿងលោក Gareth Edwards ក៏ស្ថិតក្នុងចំណោមអ្នកចូលរួមកម្មវិធីសម្ពោធនៅញូវយ៉កនេះដែរ ព្រមជាមួយតារាសម្ដែងផ្សេងៗទៀតដូចជា Rupert Friend, Ed Skrein, Luna Blaise, Bechir Sylvain និង Audrina Miranda។សូមបញ្ជាក់ថា ភាពយន្ត "Jurassic World: Rebirth" នឹងចាក់បញ្ចាំងនៅរោងកុនចក្រភពអង់គ្លេស និងសហរដ្ឋអាមេរិកនៅថ្ងៃទី ២ ខែកក្កដា ៕   ប្រែសម្រួល៖ វ៉ាន់ថន 

 ពូកែទាំងព្រមតែម្តង ទើបឈ្នះតំណែងជយលាភីលំដាប់រងទី១ ពីការប្រកួត Face of Cambodia 2025 កាលពីពេលថ្មីៗ ស្រាប់តែពេលនេះម៉ូដែលពន្លកថ្មី ហ៊ែល សាលាភី ឈ្នះមេដៃ Global Citizen Award មួយទៀត ធ្វើឱ្យអ្នកជុំវិញខ្លួនកោតស្ងប់ស្ងែងគ្រប់ៗគ្នា។  ហ៊ែល សាលាភី ជាតារាម៉ូដែលមុខថ្មីដ៏មានសក្កានុពល ពោរពេញដោយថាមពលក្នុងការប្រកួតប្រជែង ដោយថ្មីៗនេះ លាភី ទើបឈ្នះតំណែងជយលាភីលំដាប់រងទី១ ពីការប្រកួត Face of Cambodia 2025 ក្រោមការរៀបចំរបស់ក្រុមហ៊ុន Cambodia International Models (CIM)។   រូបសម្រស់ សមត្ថភាព ភាពជឿជាក់ និងការខិតខំប្រឹងប្រែងរបស់តារាស្រីវ័យ១៧ឆ្នាំ ធ្វើឱ្យអ្នកជុំវិញខ្លួនកោតស្ងប់ស្ងែងចំពោះរូបនាងជាខ្លាំង ដោយមិននឹកស្មានថា ម៉ូដែលមុខថ្មីរូបនេះមានសមត្ថភាពខ្ពស់អាចទម្លាក់បេក្ខភាពជើងខ្លាំងជាច្រើនរូប ឡើងទៅគ្រងតំណែង 1st Runner up ទាំងវ័យក្មេង ថែមទាំងឈ្នះពានរង្វាន់ពិសេសដល់ទៅ ៣ ថែមទៀតផង រួមមាន៖ Best inTranditional Wear, Miss Personality និងពាន DNA Award។   រឹតតែគួរឱ្យភ្ញាក់ផ្អើល ទើបឈ្នះតំណែង 1st Runner up Face of Cambodia 2025 ក្តៅៗ ស្រាប់តែ ហ៊ែល សាលាភី បង្ហាញសមិទ្ធិផលថ្មីមួយទៀតឱ្យគ្រប់គ្នាបានឃើញ គឺការឈ្នះមេដៃ Global Citizen Award ពីសាលាអន្តរជាតិ CIA First សម្រាប់ឆ្នាំសិក្សា 2024-2025។  សមិទ្ធិផលធំ ២ផ្ទួនៗគ្នានេះសរបញ្ជាក់ឱ្យឃើញពីសមត្ថភាពដ៏ខ្លាំងពូកែរបស់ម៉ូដែលពន្លកថ្មីរូបនេះ ដែលមានទាំងសម្រស់ និងចំណេះដឹង ស័ក្កសមជាអ្នកតំណាងកម្ពុជាលើឆាកអន្តរជាតិណាមួយនាថ្ងៃអនាគត។  តាមដែលដឹងមក បច្ចុប្បន្ន លាភី កំពុងសំងំហ្វឹកហាត់ពង្រឹងសមត្ថភាពសិល្បៈគ្រប់ផ្នែក និងចំណេះដឹងផ្នែកភាសាផងដែរ ជាការត្រៀមសម្រាប់ឱកាសដ៏ល្អស័ក្កសមណាមួយសម្រាប់ខ្លួនឯង ព្រោះនាងក៏មានមហិច្ឆិតាចង់នាំយកទង់ជាតិប្រទេសកម្ពុជាទៅត្រដាងលើឆាកអន្តរជាតិ ឱ្យបរទេសបានឃើញពីភាពអស្ចារ្យរបស់ស្ត្រីខ្មែរ ដែលមានថាមពលភ្លឺថ្លាទាំងក្នុងនិងក្រៅ ប្រៀបបីដូចសម្រស់របស់នាងដូច្នោះដែរ។  បន្ថែមពីលើការហ្វឹកហាត់ លាភី ក៏ឆ្លៀតពេលចូលរួមការងារសង្គមផ្សេងៗ និងធ្លាប់បានស្ម័គ្រចិត្តចូលរួមកម្មវិធីអង្គរសង្ក្រាន្តថែមទៀតផង។ ទៀតសោត នាងក៏បានឆ្លៀតពេលទំនេរពីការសិក្សាមកបង្កើតគម្រោងសប្បុរធម៌ជួយដល់អ្នកខ្វះខាតតាមលទ្ធភាពដែលអាចធ្វើបានផងដែរ៕   អត្ថបទ៖ រ៉ាត់ ចាន់ធីតា រូបភាព៖ ឃាង ទូច និងហ្វេសប៊ុក  

   កម្មវិធីប្រឡងចម្រៀងរ៉េបដ៏ល្បីរបស់ PNN Rapper Fighter  ផ្ដើមបើកទទួលប្រកួតជាពាក្យជាផ្លូវការហើយ ដោយរដូវកាលទី២នេះ កាន់តែពិសេសប្លែក និងទាក់ទាញជាងរដូវកាលទី១ទៅទៀត។   កម្មវិធីប្រឡងចម្រៀងរ៉េបដ៏ល្បីរបស់ស្ថានីយទូរទស្សន៍ PNN Rapper Fighter ដែលទទួលបានការគាំទ្រជាខ្លាំងពីមហាជនក្នុងរដូវកាលទី១ ពេលនេះ រដូវកាលទី២ បានចាប់ផ្ដើមហើយ ដោយបើកទទួលពាក្យប្រកួតប្រជែងពីបេក្ខភាពនានាជាផ្លូវការចាប់ពីថ្ងៃនេះតទៅ។ រដូវកាលទី២នេះ កាន់តែថ្មីប្លែកថែមទៀតសម្រាប់ទស្សនិកជន ជាពិសេសបេក្ខភាពដែលដាក់ពាក្យចូលរួមប្រកួតប្រជែងតែម្ដង។ ក្នុងនោះមិនត្រឹមមានអ្្វីដែលថ្មីប្លែកប៉ុណ្ណោះទេ កម្មវិធីទាំងមូលនឹងមានប្រាក់រង្វាន់ដ៏ធំថែមទៀត ដែលជាការសហការឧបត្ថម្ភពី GANGZBERG SNOW ។  នៅចាំអីទៀត ទស្សនិកជន និងមិត្តៗយុវវ័យដែលស្រលាញ់ គាំទ្រការប្រឡងមច្រៀងរ៉េបដ៏ធំប្រចាំឆ្នាំរបស់ PNN អាចដាក់ពាក្យចូលប្រជែងបាន។ សម្រាប់លក្ខខណ្ឌ ក្នុងការចូលរួមប្រកួតប្រជែងមិត្តៗយុវវ័យអាចចូលទៅកាន់ផេកផ្លូវការ Rapper Fighter ដើម្បីដឹងពីព័ត៌មានសម្អិត។សូមចុចតំណភ្ជាប់នេះដើម្បីចូលទៅកាន់ការដាក់ពាក្យ  Rapper Fighter ជាកម្មវិធីប្រឡងចម្រៀងរ៉េបដ៏ធំបង្កើតឡើងដោយស្នាដៃកូនខ្មែរសុទ្ធសាធ។ ក្រោមការសម្រិតសម្រាំងយ៉ាងយកចិត្តទុកដាក់របស់ក្រុមការងារ និងផលិតករនៃស្ថានីយ៍ទូរទស្សន៍ទំនើបភីអិនអិន រដូវកាលទី១នៃការប្រឡងចម្រៀងរ៉េប Rapper Fighter បានបញ្ចប់ទៅភាពជោគជ័យគួរជាទីមោទនៈ ដោយយើងជ្រើសរើសបានជយលាភី Top 5 យ៉ាងល្អស័ក្កសមជាពន្លឺដ៏ត្រចះត្រចង់នៃសិល្បៈរ៉េបជំនាន់ថ្មី។   ដ្បិតជាការរៀបចំលើកទី១ តែកម្មវិធី Rapper Fighter ផ្ទុះការគាំទ្រយ៉ាងភ្លូកទឹកភ្លូកដីពីប្រជាជនកម្ពុជាទូទាំងប្រទេស ដោយវីដេអូចម្រៀងរ៉េបចាស់ៗរបស់បេក្ខភាពឆ្នើមៗនៃកម្មវិធី Rapper Fighter រដូវកាលទី១ មានអ្នកចុចចូលទស្សនាជិត 300M views ហើយវីដេអូភាគច្រើនដែលចែកចាយលើបណ្តាញសង្គមសុទ្ធតែមានអ្នកចុចចូលទស្សនាខ្ទង់លានដង ដែលនេះបង្ហាញពីសក្កានុពលដ៏ខ្លាំងក្លារបស់សិល្បៈរ៉េប និងជយលាភី Top 5 របស់ Rapper Fighter រដូវកាលទី១។  សម្រាប់រដូវកាលទី២នេះ កម្មវិធីនឹងរៀបចំកាន់តែប្លែកទាក់ទាញថែមទៀត ជាមួយបេក្ខភាពដែលគេជឿជាក់ថាកាន់តែមានការប្រកួតប្រជែងដ៏ស្វិតស្វាញ។ Rapper Fighter រដូវកាលទី២ នឹងបើកធ្វើសន្និសីទសារព័ត៌មាន ដោយមានបេក្ខភាពឆ្នើមៗទាំង៥រូបកាលពីរដូវកាលទី១ និងសិល្បករ សិល្បការិនីជាច្រើនរូបផ្សេងទៀតនៅថ្ងៃទី ២ ខែ កក្កដា ឆ្នាំ២០២៥ សប្ដាហ៍ក្រោយ នៅស្ទូឌីអូ PNN ព្រែកព្នៅ៕  អត្ថបទ៖ PNN រូបភាព៖ ឃាង ទូច និង ហ្វេសប៊ុក  

 នៅទីបំផុតយើងបានរកឃើញម្ចាស់ជយលាភី Face Of Cambodia 2025 ហើយ គឺបានទាំងស្អាតឆ្លាតមានព្រមជាកញ្ចប់ត្រៀមនឹងតំណាងកម្ពុជាទៅប្រកួតនៅប្រទេសកូរ៉េនាអំឡុងខែវិច្ឆិកា ឆ្នាំ២០២៥ ខាងមុខនេះ។  កម្មវិធីប្រកួត Face of Cambodia 2025 ត្រូវបានបញ្ចប់ទៅដោយជោគជ័យ កាលពីរាត្រីយប់ថ្ងៃទី២០ ខែមិថុនា ឆ្នាំ២០២៥ កន្លងទៅ នៅមជ្ឈមណ្ឌលពិព័រណ៌កោះពេជ្រ ដោយមានការចូលរួមគាំទ្រពីទស្សនិកជនយ៉ាងច្រើនកុះករ។  ក្នុងនោះ ជយលាភីផ្នែកមនុស្សពេញវ័យបានទៅលើ សោភារូបស្រស់ សារុន វីរៈធីតា ហៅ Feng Yuu (ហ្វែង យូរ) និងកំលោះសង្ហា ធុល សុគន្ធរង្សី ដែលអ្នកទាំងពីរនឹងតំណាងកម្ពុជាទៅចូលរួមប្រកួតកម្មវិធី Asia Model Festival 2025 រួមមាន ការដើរបង្ហាញម៉ូដ Asia Opening Collection , ការប្រកួត Face of Asia និងការប្រកាសពានរង្វាន់ Asia Model Award ដែលនឹងរៀបចំឡើងនៅប្រទេសកូរ៉េខាងត្បូង នៅអំឡុងខែវិច្ឆិកា ឆ្នាំ២០២៥ ខាងមុខនេះ។   ក្រៅពីភាពស្រស់ស្អាត ភាពឆ្លាតវ័យ សមត្ថភាព ទេពកោសល្យដែលមានមកជាកញ្ចប់ ម្ចាស់ជយលាភីទាំង២រូប ប្តេជ្ញាខំប្រឹងហ្វឹកហាត់ស្វែងយល់ពីកម្មវិធី Asia Model Festival បន្ថែមទៀត ដើម្បីមានឱកាសដណ្តើមភាពជោគជ័យជូនប្រទេសកម្ពុជាយើង។  សូមជម្រាបផងដែរថា ក្រៅពី កញ្ញា សារុន វីរៈធីតា និង លោក ធុល សុគន្ធរង្សី ដែលបានឈ្នះតំណែងជយលាភី Face of Cambodia 2025 ហើយនោះ ជយលាភីលំដាប់រងទី១ នៃកម្មវិធី Face of Cambodia 2025 បានទៅលើកំលោះសង្ហា ធិន ធារ៉ា និងស្រីស្រស់ ហ៊ែល សាលាភី រីឯជយលាភីលំដាប់រងទី២ បានទៅលើលោក ធឿន ស៊ីម៉េង និងកញ្ញា ស្វាង លីនជឺ។   មិនទាន់អស់នៅឡើយទេ ឆ្នាំនេះក៏មានការសម្រិតសម្រាំងជ្រើសរើសបានម្ចាស់ជយលាភី Face of Cambodia Kid 2025 ជាច្រើនរូបផងដែរ ដែលគ្រប់គ្នាសុទ្ធសឹងតែមានសមត្ថភាពខ្ពស់ មានថាមពលក្នុងការប្រកួតប្រជែង នឹងបានត្រៀមជាស្រេចសម្រាប់ការតំណាងកម្ពុជាទៅប្រកួតលើវេទិកាអន្តរជាតិ។ឆ្លៀតឱកាសដ៏ពិសេសនេះ ក្រុមហ៊ុន Cambodia International Models ក៏បានរៀបចំពិធីបំពាក់ឈៀងផ្លូវការ Man of The Year Cambodia 2025 ជូន លោក ហម វណ្ណា ផងដែរ ដោយបុរសឯករូបសង្ហានេះនឹងតំណាងកម្ពុជាទៅប្រកួតលើវេទិកាអន្តរជាតិ Man of The Year 2025 នាពេលឆាប់ៗខាងមុខនេះ៕  អត្ថបទ៖ រ៉ាត់ ចាន់ធីតា រូបភាព៖ ឃាង ទូច   

 ក្រុមចម្រៀងនារី BLACKPINK នឹងបង្ហាញបទចម្រៀងថ្មីរបស់ពួកគេនៅឯកម្មវិធីប្រគំតន្ត្រីទេសចរណ៍ពិភពលោករបស់ពួកគេ ក្រោយខកខានចេញបទថ្មីអស់រយៈពេលជាង ៣ឆ្នាំ។  ប្រព័ន្ធផ្សព្វផ្សាយកូរ៉េជាច្រើនបានរាយការណ៍ថា ក្រុមចម្រៀងនារី BLACKPINK នឹងបង្ហាញបទចម្រៀងថ្មីរបស់ពួកគេនៅឯកម្មវិធីប្រគំតន្ត្រីទេសចរណ៍ពិភពលោក DEADLINE ។  តំណាងរបស់ YG Entertainment បានបញ្ជាក់ប្រាប់សារព័ត៌មានកូរ៉េខាងត្បូង NEWSEN កាលពីថ្ងៃទី២៣ ខែមិថុនាថា ឆ្លងកាត់ការពិភាក្សាជាច្រើនអំពីរបៀបចេញបទចម្រៀងថ្មី ចុងក្រោយពួកគេបានសម្រេចចិត្តថានឹងចាក់ផ្សាយបទថ្មីនេះនៅឯការប្រគំតន្ត្រីនៅពហុកីឡដ្ឋាន Goyang ដែលជាចំណុចចាប់ផ្តើមនៃដំណើរទេសចរណ៍ពិភពលោក 'DEADLINE'។ ប្រភពដដែលបន្តថា ពួកគេនឹងចែករំលែកព័ត៌មានលម្អិតបន្ថែមទៀតអំពីកាលបរិច្ឆេទចេញបទចម្រៀងនាពេលឆាប់ៗ។ ជាក្រុមចម្រៀងស្រីមួយក្រុមដែលទទួលបានជោគជ័យបំផុតក្នុងពិភពលោកនាពេលបច្ចុប្បន្ន BLACKPINK គឺជាក្រុម K-pop ដំបូងបង្អស់ដែលបានសម្ដែងលើឆាកធំរបស់មហោស្រពតន្ត្រីអាមេរិក Coachella និងមហោស្រពតន្ត្រីអង់គ្លេស British Summer Time Festival ។  សមាជិកទាំងបួននាក់បានបន្តកិច្ចសន្យាការងារក្រុមជាមួយភ្នាក់ងារចាស់របស់ពួកគេគឺផលិតកម្ម YG Entertainment ក្នុងឆ្នាំ ២០២៣ ប៉ុន្តែក៏បានបង្កើតក្រុមហ៊ុនរៀងៗខ្លួន និងចុះកុងត្រាជាមួយក្រុមហ៊ុនផ្សេងសម្រាប់សកម្មភាពទោល។  ចាប់តាំងពីអាល់ប៊ុម “BORN PINK” បានចេញក្នុងខែកញ្ញា ឆ្នាំ២០២២ ពួកគេមិនទាន់បានចេញបទចម្រៀងថ្មីជាក្រុមឡើយ ប៉ុន្តែកំលុងពេលនេះសមាជិកម្នាក់ៗបានបញ្ចេញ Solo Album រៀងៗខ្លួនទាំងអស់។គួរបញ្ជាក់ថា កម្មវិធីប្រគំតន្ត្រីទេសចរណ៍ “DEADLINE WORLD Tour” នឹងចាប់ផ្តើមនៅថ្ងៃទី ៥ ខែកក្កដា នៅទីក្រុងសេអ៊ូល ប្រទេសកូរ៉េខាងត្បូង នៅកីឡដ្ឋាន Goyang ហើយបន្ទាប់មកនឹងបន្តទៅប្រទេសផ្សេងទៀតរួមមានសហរដ្ឋអាមេរិក កាណាដា ចក្រភពអង់គ្លេស បារាំង សិង្ហបុរី និងជប៉ុន ៕   ប្រែសម្រួល៖ វ៉ាន់ថន 

 .តារាសម្ដែង Tom Cruise បានបង្ហាញការគាំទ្រដល់មិត្តចាស់របស់ខ្លួនគឺ Brad Pitt ដែលបានធ្វើការសម្ពោធភាពយន្តថ្មីរបស់ខ្លួនមានចំណងជើងថា “F1” នៅទីក្រុងឡុងដ៍។  ចូលរួមកម្មវិធី Tom Cruise បានថតរូប និងស្វាគមន៍រាក់ទាក់ជាមួយ Brad Pitt ក៏ដូចជានាយកប្រតិបត្តិក្រុមហ៊ុន Formula One លោក Stefano Domenicali និងអ្នកដឹកនាំរឿង Joseph Kosinski ប៉ុន្តែមិនដើរថតរូបលើកម្រាលព្រំក្រហមទេ។  សូមបញ្ជាក់ថា នៅក្នុងខ្សែភាពយន្ត “F1” តារាសម្ដែង Brad Pitt បានដើរតួជាអ្នកប្រណាំងឡានចូលនិវត្តន៍ដែលសម្រេចចិត្តចូលសមរភូមិប្រកួតវិញដើម្បីជួយសង្រ្គោះក្រុមប្រណាំងរបស់មិត្តខ្លួនដែលកំពុងជួបការលំបាក ដោយមកធ្វើជាគ្រូបង្វឹករបស់អ្នកប្រណាំងឡានវ័យក្មេងសម្ដែងដោយ Damson Idris។  ផលិតឡើងក្រោមការសហការរបស់ក្រុមហ៊ុន Dawn Apollo Films និងក្រុមហ៊ុន Apple ភាពយន្តនេះមានការចូលរួមពីកីឡាករប្រណាំងរថយន្ត Formula One គឺ Lewis Hamilton ដែលបានចូលសម្ដែង និងធ្វើជាផលិតករមួយរូបផងដែរ ខណៈផលិតករផ្សេងទៀតរួមមាន Brad Pitt, លោកJoseph Kosinski និងលោក Jerry Bruckheimer។ ផ្នែកខ្លះនៃខ្សែភាពយន្តត្រូវបានថតក្នុងអំឡុងពេលព្រឹត្តិការណ៍ប្រណាំងរថយន្ត Formula One ពិតៗនៅទីក្រុង Abu Dhabi ទីក្រុងម៉ិកស៊ិក និងការប្រកួតនៅកន្លែងផ្សេងៗទៀត ដោយក្រុមការងារភាពយន្តនឹងធ្វើការថតក្នុងកំលុងពេលសម្រាកខ្លីនៃការប្រណាំង។ទទួលសិទ្ធិចែកចាយដោយក្រុមហ៊ុន Warner Bros ភាពយន្ត "F1” នឹងត្រូវចាក់បញ្ចាំងក្នុងរោងភាពយន្តទូទាំងសកលលោកចាប់ពីថ្ងៃទី ២៥ ខែមិថុនា ៕   ប្រែសម្រួល៖ វ៉ាន់ថន  

 ជារឿងស្ទើរមិនគួរឱ្យជឿនោះទេសម្រាប់កម្មវិធីកម្សាន្តធំៗល្បីឈ្មោះទាំងពីររបស់ PNN គឺ Freshy Winner និង Idol Fun House កាលពីខែ ឧសភា ឆ្នាំ២០២៥ កន្លងទៅ ដែលចំណាយលើអ្នកចូលលេងកម្សាន្តប្រមាណជាជាង ១០លានរៀល និងទទួលការគាំទ្រខ្លាំងពីអ្នកទស្សនា។ កម្មវិធីកម្សាន្តធំៗ២ដ៏ល្បី របស់ PNN គឺ Freshy Winner និង Idol Fun House កាលពីខែ ឧសភា ឆ្នាំ២០២៥ កន្លងទៅនេះ បានចំណាយប្រាក់លើការចូលលេងកម្សាន្តរបស់ សិល្បករ សិល្បការិនី និងទស្សនិកជនផ្សេងទៀតប្រមាណជាជាង ១០លានរៀល ហើយថែមទាំងក្លាយជាកម្មវិធីទាក់ទាក់ការគាំទ្រខ្លាំងពីមហាជនថែមទៀតផង។  កម្មវិធី Freshy Winner ក្នុងសប្ដាហ៍ទី១ អ្នកឈ្នះទទួលបានទឹកប្រាក់ ៨សែនរៀល សប្ដាហ៍ទី២ ១លាន ៣សែនរៀល សប្ដាហ៍ទី៣ ៥សែនរៀល និងសប្ដាហ៍ទី៤ ៣សែនរៀល ដោយទឹកប្រាក់សរុបសម្រាប់ខែ ឧសភា មានប្រមាណ ២លាន ៩សែនរៀល។  ដោយឡែកសម្រាប់កម្មវិធី Idol Fun House វិញ ក្នុងសប្ដាហ៍ទី១ អ្នកឈ្នះទទួលបានទឹកប្រាក់ ៤លានរៀល សប្ដាហ៍ទី២ ៧សែនរៀល សប្ដាហ៍ទី៣ ៦សែនរៀល សប្ដាហ៍ទី៤ ៧សែនរៀល និងសប្ដាហ៍ទី៥ ១លាន ៤សែនរៀល។ សរុបទឹកប្រាក់ប្រមាណ ៧លាន ៤សែនរៀល។  ដូច្នេះមានន័យថាគ្រាន់តែខែ ឧសភា ឆ្នាំ២០២៥ កន្លងទៅកម្មវិធីធំៗទាំងពីរខាងលើចំណាយលើអ្នកឈ្នះទឹកប្រាក់ប្រមាណ ១០លាន ៣សែនរៀល ទៅកាន់អ្នកចូលលេង ដោយមិនត្រឹមតែបានបង្កលក្ខណៈសប្បាយរីករាយប៉ុណ្ណោះទេ ហើយថែមទាំងឈ្នះរង្វាន់ធំៗថែមទៀត។  មិនតែប៉ុណ្ណោះទេកម្មវិធី ដែលសម្បូរដោយរូបភាពថ្មីប្លែកទាក់ទាញទាំងពីរនេះ ទទួលបានការគាំទ្រខ្លាំងពីទស្សនិកជនថែម ដោយរាល់កម្មវិធីនីមួយៗតែងមានអ្នកទស្សនារាប់លានអ្នកនៅលើបណ្ដាញសង្គម។  ដោយឡែកសម្រាប់ខែ មិថុនា ឆ្នាំ២០២៥ នេះវិញ កម្មវិធីទាំងពីរខាងលើក៏មានអ្នកឈ្នះរង្វាន់ទឹកប្រាក់រាប់លានរៀលថែមទៀតផងដែរ ក្រៅតែពីពួកគេបានបង្កើតបរិយាកាសសប្បាយរីករាយជាមួយនឹងកម្មវិធី។  សូមបញ្ជាក់ថាកម្មវិធី «Idol Fun House» នឹងចាក់ផ្សាយលើកញ្ចក់ទូរទស្សន៍ PNN រៀលរាល់ថ្ងៃ សុក្រ ចាប់ពីម៉ោង៦ រហូតដល់ម៉ោង ៨យប់ ។ ដោយឡែក Freshy Winner ចាក់ផ្សាយនៅលើកញ្ចក់ទូរទស្សន៍ ភីអិនអិន នៅរៀងរាល់ថ្ងៃ អាទិត្យ  វេលាម៉ោង៦ដល់ម៉ោង ៧យប់តទៅ៕   អត្ថបទ និងរូបភាព៖ PNN   

 បវរកញ្ញាវ័យក្មេងកូនកាត់ខ្មែរ-បារាំង ហាមមើឡិត វ៉េណេសា បានធ្វើដំណើរចាកចេញពីកម្ពុជាទៅចូលរួមប្រកួតកម្មវិធី World Junior Tourism Ambassador 2025 ប្រកបដោយភាពជឿជាក់ ជាមួយក្តីរំពឹងថា នឹងអាចបង្កើតប្រវត្តិសាស្រ្ត សម្រាប់កម្ពុជា ។  ហាមមើឡិត វ៉េណេសា កូនស្រីឈាមផ្សំខ្មែរ-បារាំង អាយុ៨ឆ្នាំ បានធ្វើដំណើរចាកចេញពីកម្ពុជាទៅចូលរួមប្រកួតប្រជែងកម្មវិធី World Junior Tourism Ambassador 2025 កាលពីព្រឹកមិញនេះ ដោយការប្រកួតអន្តរជាតិនឹងប្រព្រឹត្តទៅនៅថ្ងៃទី ២៣-២៧ ខែមិថុនា ឆ្នាំ២០២៥ នៅប្រទេសម៉ាឡេស៊ី។  រៀមច្បងសិល្បករ បវរកញ្ញា-បុរសឯក រួមទាំងក្រុមគ្រួសារបាននាំគ្នាមកជូនដំណើរបវរកញ្ញាវ័យក្មេងរូបនេះប្រកបដោយភាពកក់ក្តៅ និងការលើកចិត្តយ៉ាងពេញទំហឹងសម្រាប់ការតំណាងកម្ពុជាទៅប្រកួតលើឆាកអន្តរជាតិនេះ។   ក្រឡេកទៅមើលសាម៉ីខ្លួនឯណោះវិញ បានបង្ហាញអារម្មណ៍រំភើបរីករាយ និងក្តីមោទនភាពដែលបានតំណាងកម្ពុជាទៅប្រកួតកម្មវិធី World Junior Tourism Ambassador 2025 ថែមទាំងរំពឹងថា នឹងអាចបង្កើតប្រវត្តិសាស្រ្ត B2B (Back to Back) សម្រាប់កម្ពុជាទៀត ព្រោះម្ចាស់មកុដអន្តរជាតិឆ្នាំមុន គឺ ថៃ ដារ៉ូត ជាបវរកញ្ញាកម្ពុជាយើង។រៀបរាប់ដោយអារម្មណ៍ក្តុកក្តួលជំនួសកូនស្រីអាយុ៨ឆ្នាំដែលក្លាហានហ៊ានតំណាងប្រទេសកម្ពុជាទៅប្រកួតលើឆាកអន្តរជាតិ អ្នកម្តាយរបស់ វ៉េណេសា ថា ក្នុងនាមជាឪពុកម្តាយអ្នកទាំងពីរពិតជាមានមោទនភាពចំពោះកូនស្រីខ្លាំងណាស់។  ដ្បិតតែហត់នឿយបន្តិចជាមួយការរៀបចំផ្សេងៗ ប៉ុន្តែលោកស្រីពិតជាសប្បាយចិត្ត និងជឿជាក់លើសមត្ថភាពកូនស្រីម្នាក់នេះ ដែលមានភាពអត់ធ្មត់ហ្មត់ចត់ចំពោះការងារមិនចាញ់មនុស្សធំនោះឡើយ។លោក Romeo Awayan JR ជំនួយការរបស់ស្ថាបនិក The RAMP Academy បានប្រាប់ឱ្យដឹងពីការត្រៀមខ្លួន និងការហ្វឹកហាត់យ៉ាងដិតដល់របស់ វ៉េណេសា រយៈពេលប្រមាណា ៣ខែមុនចេញទៅប្រកួតនៅម៉ាឡេស៊ី ហើយលោកពិតជាសង្ឃឹមថា ហាមមើឡិត វ៉េណេសា នឹងអាចដណ្តើមបានមកុដអន្តរជាតិត្រឡប់មកកម្ពុជាវិញ៕ #បកប្រែ៖ «ពេលនេះខ្ញុំពិតជាសប្បាយចិត្ត ព្រោះពេលនេះការប្រកួតចាប់ផ្តើមហើយ ហើយ វ៉េណេសា ជាបវរកញ្ញាតំណាងរបស់កម្ពុជា។ The RAMP Academy បានរៀបចំសម្រាប់ការប្រកួតរបស់ វ៉េណេសា រយៈពេលច្រើនខែមកហើយ ដោយផ្តោតលើការពង្រឹងសមត្ថភាព ទេពកោល្យពិសេស និងការដើរ Catwalk ជាពិសេស ការឆ្លើយសំនួរ និងការសម្ភាសន៍តែម្តង។ ... ជាការពិតខ្លាំងណាស់ដែល The RAMP Academy រំពឹងថា វ៉េណេសា អាចឈ្នះការប្រកួតនេះ ព្រោះពួកយើងដឹងច្បាស់ពីសមត្ថភាពរបស់ក្មេងស្រីរូបនេះ»។  សូមជម្រាបថា ការប្រកួត World Junior Tourism Ambassador 2025 នឹងប្រព្រឹត្តឡើងចាប់ពីថ្ងៃទី ២៣-២៧ ខែមិថុនា ឆ្នាំ២០២៥ នៅទឹកដីប្រទេសម៉ាឡេស៊ី។ ក្នុងនោះ បវរកញ្ញាវ័យក្មេងកូនកាត់ខ្មែរ-បារាំង ហាមមើឡិត វ៉េណេសា បានត្រៀមឈុតសម្លៀកបំពាក់យ៉ាងទាក់ទាញច្នៃម៉ូដពីសូត្រខ្មែរ រួមទាំងឈុតតំណាងជាតិយ៉ាងមានអត្ថន័យសម្រាប់បង្ហាញលើឆាកអន្តរជាតិនាពេលឆាប់ៗនេះ ដូច្នេះកុំភ្លេចរង់ចាំតាមដានទស្សនាដំណើរការប្រកួតរបស់បវរកញ្ញាវ័យក្មេងរូបនេះទាំងអស់គ្នា!  អត្ថបទ៖ រ៉ាត់ ចាន់ធីតា រូបភាព៖ ឃាង ទូច  

 ក្រុមចម្រៀង i-dle ក្លាយជាក្រុមចម្រៀងនារីដំបូងបំផុតក្នុងរយៈពេល ១៤ ឆ្នាំដែលបានឈ្នះពានធំនៅកម្មវិធី Seoul Music Awards លើកទី៣៤ ដែលរៀបចំឡើងកាលពីចុងសប្ដាហ៍កន្លងទៅ។ ក្រុមចម្រៀងជើងខ្លាំងពីផលិតកម្ម CUBE គឺ i-dle (អាយដល) បានបង្កើតកំណត់ត្រាថ្មីដោយក្លាយជាក្រុមចម្រៀងនារីដំបូងគេក្នុងរយៈពេល ១៤ ឆ្នាំចុងក្រោយដែលបានឈ្នះរង្វាន់ធំ Daesung Award ក្នុងកម្មវិធីប្រគល់ពានរង្វាន់ Seoul Music Awards ឆ្នាំ២០២៥ ដែលបានប្រារព្ធឡើងកាលពីចុងសប្ដាហ៍កន្លងទៅនៅ Inspire Arena។  បន្ថែមពីនេះ ក្រុមចម្រៀងដែលគ្រប់គ្នាកន្លងមកតាមរយៈឈ្មោះ (G)-Idle ក៏បានឈ្នះរង្វាន់ធំមួយទៀតដែរគឺពាន Bonsang ដែលជាពានរង្វាន់រួមជាមួយនឹងសិល្បករជាច្រើនទៀត។ ជយលាភីធំបន្តមកទៀតគឺក្រុម TXT បានឈ្នះពានបទចម្រៀងល្អបំផុត សម្រាប់បទចម្រៀង “Deja Vu” ព្រមទាំងពានអាល់ប៊ុមល្អបំផុតសម្រាប់អាល់ប៊ុម “Minisode 3: Tomorrow” ខណៈក្រុម ZEROBASEONE ក៏បានឈ្នះពានរង្វាន់នេះដែរសម្រាប់អាល់ប៊ុម “Blue Paradise”។  ដោយឡែកពានរង្វាន់ Rookie of the Year ដែលសំដៅដល់សិល្បករថ្មីលេចធ្លោប្រចាំឆ្នាំគឺបានទៅក្រុមចម្រៀងចំនួនបីរួមមានក្រុមចម្រៀងស្រី Hearts2Hearts មកពី SM Entertainment, ក្រុមចម្រៀងប្រុស KickFlip មកពី JYP Entertainment និងក្រុមចម្រៀងស្រី KiiiKiii មកពីផលិតកម្ម Starship ។  ផ្នែកពានរង្វាន់ពិសេសរួមមានពានរង្វាន់ Best Group បានទៅលើ ILLIT និង NCT Wish ខណៈពានរង្វាន់ Best Solo បានលើ Doyoung ពី NCT, ពានរង្វាន់ World Best Artist បានទៅលើ ROSÉ និង aespa និងពានរង្វាន់ K-Pop World Choice-Group បានទៅលើ BABYMONSTER។ ចុងក្រោយក្រុម BTS បានឈ្នះពានរង្វាន់ចំនួនពីរគឺមួយសម្រាប់ RM ក្នុងផ្នែក R&B/Hip-Hop Award និងមួយទៀតសម្រាប់សមាជិក Jimin ក្នុងផ្នែក Hallyu Star Award ៕    ប្រែសម្រួល៖ វ៉ាន់ថន  

 Suga សមាជិកក្រុមចម្រៀងកូរ៉េ BTS បានបង្ហាញទឹកចិត្តសប្បុរសតាមរយៈការបរិច្ចាគប្រាក់ ៣,៦ លានដុល្លារ ដើម្បីបង្កើតមជ្ឈមណ្ឌលថែទាំពិសេសមួយដែលផ្ដល់ការគាំទ្រជាពិសេសដល់អ្នកមានជំងឺអូទីស្សឹម។នៅថ្ងៃទី២៣ ខែមិថុនានេះ សមាជិកក្រុម BTS, Suga បានបរិច្ចាគប្រាក់ចំនួន ៥ ពាន់លានវ៉ុន (ស្មើនឹងប្រហែល ៣,៦ លានដុល្លារ) ដើម្បីបង្កើតមជ្ឈមណ្ឌលថែទាំពិសេសមួយដែលផ្ដល់ការគាំទ្រដល់អ្នកមានជំងឺអូទីស្សឹម និងជួយឱ្យពួកគេចូលរួមចំណែកបានកាន់តែល្អប្រសើរក្នុងសង្គម។  ដាក់ឈ្មោះតាមឈ្មោះពិតរបស់លោក មជ្ឈមណ្ឌល Min Yoon-gi នឹងមានទីតាំងនៅជាន់ទី ១ នៃអគារ Jejung Hall នៅសាខា Sinchon របស់មន្ទីរពេទ្យ Severance។ មជ្ឈមណ្ឌលនេះនឹងផ្តល់ការគាំទ្រផ្នែកភាសា សតិអារម្មណ៍ និងអាកប្បកិរិយាសម្រាប់អ្នកជំងឺអូទីស្សឹមវ័យក្មេង រួមជាមួយនឹងការព្យាបាល និងកម្មវិធីផ្សេងៗដែលបង្កើតឡើងដោយសហការជាមួយគ្លីនិកស្រាវជ្រាវ ។ យោងតាមមន្ទីរពេទ្យ Severance បានឱ្យដឹងថា Suga បានបង្ហាញចំណាប់អារម្មណ៍យ៉ាងជ្រាលជ្រៅចំពោះការគាំទ្រដល់កុមារ និងក្មេងជំទង់ដែលមានជំងឺអូទីស្សឹម ជាពិសេសក្នុងការទប់ស្កាត់ជំងឺធ្លាក់ទឹកចិត្ត និងប្រើតន្ត្រីដើម្បីជួយដល់ដំណើរការនោះ។ តារាប្រុសវ័យ ៣២ឆ្នាំរូបនេះបានចូលរួមផ្ទាល់ក្នុងការបង្កើតកម្មវិធីព្យាបាលតន្ត្រីដោយចូលរួមវគ្គពាក់ព័ន្ធពីខែមីនាដល់ខែមិថុនាឆ្នាំនេះនៅរៀងរាល់ចុងសប្តាហ៍ក្នុងអំឡុងពេលឈប់សម្រាកការងារបម្រើសេវាសង្គមរបស់លោក។ បន្ទាប់ពីចាប់ផ្តើមធ្វើការជាមួយសាស្រ្តាចារ្យពីនាយកដ្ឋានចិត្តសាស្ត្រនៅមន្ទីរពេទ្យ Severance មក Suga បានដឹងថាការព្យាបាលរយៈពេលខ្លីដែលមានស្រាប់គឺមិនគ្រប់គ្រាន់សម្រាប់អ្នកមានជំងឺអូទីស្សឹមនោះទេ។ ដូច្នេះហើយ លោកក៏បានបរិច្ចាគថវិកាដើម្បីជួយដល់កម្មវិធីព្យាបាលរយៈពេលវែងដល់ ១០ ឆ្នាំ ដែលនេះជាការបរិច្ចាគដ៏ធំបំផុតមិនធ្លាប់មានពីសំណាក់សិល្បករ។ សូមបញ្ជាក់ថា Suga គឺជាសមាជិកចុងក្រោយក្នុងចំណោមសមាជិកទាំង ៧ របស់ BTS ដែលបានបញ្ចប់កាតព្វកិច្ចជាតិ ដោយលោកទើបតែបានបញ្ចប់កាតព្វកិច្ចផ្នែកបម្រើសេវាសង្គម កាលពីថ្ងៃទី ២១ ខែមិថុនា ៕   ប្រែសម្រួល៖ វ៉ាន់ថន  

  ក្រោយឆ្លងកាត់ការហ្វឹកហាត់ប៉ុន្មានសប្តាហ៍រួចមក ម្ចាស់មកុដ MUC 2024 ប្រសាទ ដាវីន  និងអ្នកគ្រប់គ្រងថ្នាក់ជាតិ លោក ឈួង យីវឆួយ នាំគ្នាស្រឡាំងកាំង ស្ទើរតែមិនជឿពីការវិវត្តន៍យ៉ាងឆាប់រហ័សរបស់បេក្ខភាព Miss Universe Cambodia 2025 ។  សមរភូមិការប្រកួតសម្រស់ដ៏ចំណាស់នៅលើពិភពលោក Miss Universe Cambodia 2025 កាន់តែឡើងកំដៅក្តៅឡើងរាល់ថ្ងៃ ខណៈដែលបេក្ខភាពផ្លូវការទាំងអស់កំពុងប្រឹងប្រែងបញ្ចេញសមត្ថភាព ទេពកោសល្យ ភាពឆ្លាតវ័យ និងគំនិតច្នៃប្រតិដ្ឋរបស់ពួកគេ ដើម្បីប្រកួតដណ្តើមពិន្ទុពីគណៈកម្មការជំនាញ។   តួយ៉ាង ក្រោយឆ្លងកាត់ហ្វឹកហាត់ និងការរៀនសូត្រចំណេះដឹងជាច្រើនផ្នែករួចមក បេក្ខភាពម្នាក់ៗរឹតតែមានភាពជឿជាក់ខ្លាំងឡើង បើនិយាយពីការរៀបចំខ្លួនវិញនោះ គឺខ្ញង់ខ្លាំងតែម្តង រហូតសូម្បីតែ លោក ឈួង យីវឆូយ អ្នកគ្រប់គ្រងថ្នាក់ជាតិ MUC 2025 និង អ្នកនាង ប្រាសាទ ដាវីន Miss Universe Cambodia 2024 ក៏ស្រឡាំងកាំងពេលឃើញការវិវត្តន៍យ៉ាងឆាប់រហ័សរបស់បេក្ខភាពទាំងអស់។   ផ្តល់បទសម្ផាសន៍ក្នុងថ្ងៃចុះ MOU ជាមួយ Unilever Cambodia  ៤ប្រភេទ កាលពីថ្ងៃទី ២០ ខែមិថុនា ឆ្នាំ២០២៥ កន្លងទៅ អ្នកគ្រប់គ្រងថ្នាក់ជាតិ MUC 2025 បានឱ្យដឹងថា ឆ្នាំនេះយើងបានសម្រិតសម្រាំងទម្រង់នៃការប្រកួតមួយចំនួន ដែលមានភាពខុសប្លែកពីឆ្នាំរាល់ដង និងមានភាពថ្មីប្លែកសម្រាប់វិស័យប្រកួតសម្រស់នៅក្នុងប្រទេសកម្ពុជាផងដែរ។ លោកបានពួតដៃគ្នាជាមួយម្ចាស់មកុដ ប្រាសាទ ដាវីន ក្នុងការដុះខាតសមត្ថភាពរបស់បេក្ខភាពឱ្យអស់ពីលទ្ធភាព ទាំងចំណេះដឹង សម្រស់ និងការប្រតិបត្តិខ្លួនផ្សេងៗ និងបានបញ្ចូលនូវវិញ្ញាសារថ្មីៗពុំធ្លាប់មានពីមុនមកទៀតផង។   ក្នុងនោះផងដែរ លោក ឈួង យីវឆូយ ក៏បានឆ្លើយតបទៅកាន់បារម្ភរបស់អ្នកគាំទ្រជុំវិញបញ្ហាដែលកំពុងកើតឡើង ខណៈឆ្នាំនេះថៃជាម្ចាស់ផ្ទះរៀបចំការប្រកួតអន្តរជាតិ ហើយស្ថាប័នរបស់លោកក៏កំពុងប្រកួតចម្រាញ់យកបេក្ខភាពដើម្បីតំណាងកម្ពុជាទៅប្រកួតលើវេទិកាអន្តរជាតិនោះ ស្របពេលស្ថានភាពជាក់ស្តែងកំពុងតានតឹងគួរឱ្យព្រួយបារម្ភ។   ទោះជាយ៉ាងណាជាមួយនឹងឆន្ទៈ និងចក្ខុវិស័យច្បាស់លាស់ លោក ឈួង យីវឆូយ ក៏សង្ឃឹមថា កម្ពុជានឹងកាន់តែមានកេរ្តិ៍ឈ្មោះរីកសុះសាយនៅលើពិភពលោក តាមរយៈវេទិកាប្រកួតសម្រស់បវរកញ្ញាចក្កវាឡកម្ពុជានេះផងដែរ។សូមបញ្ជាក់ថាកម្មវិធីប្រកួតវគ្គផ្ដាច់ព្រ័ត្រ Miss Univer Cambodia 2025 ដែលសម្បូរទៅដោយបេក្ខភាពខ្លាំងៗ ឆ្នើមៗ នឹងមានការឡាយផ្ទាល់ពីស្ថានីយទូរទស្សន៍ PNN និងផេកផ្លូវការ Miss Universe Cambodia ផងដែរ៕    អត្ថបទ៖ រ៉ាត់ ចាន់ធីតា រូបភាព៖ ឃាង ទូច