ព្យុះទីហ្វុងកម្លាំងខ្លាំង បានបោកបក់ទៅដល់ឆ្នេរភាគអាគ្នេយ៍របស់ប្រទេសចិននៅល្ងាចថ្ងៃព្រហស្បតិ៍ ក្រោយបោកបក់លើកោះតៃវ៉ាន់បង្កឱ្យបាក់ដី និងទឹកជំនន់នៅតំបន់ទំនាប ហើយឆក់យកជីវិតមនុស្ស៣នាក់។  មុនទៅដល់កោះតៃវ៉ាន់ ព្យុះGaemi បានបង្កឱ្យមានភ្លៀងធ្លាក់ខ្លាំង និងទឹកជំនន់ នៅប្រទេសហ្វីលីពីន។ ហើយមកដល់ពេលនេះតួលេខមនុស្សស្លាប់នៅប្រទេសហ្វីលីពីនដោយសារព្យុះGaemi បានកើនឡើងដល់២២នាក់។  ការិយាល័យធ្វើការនិងសាលារៀននៅកោះតៃវ៉ាន់ ត្រូវបិទ២ថ្ងៃ គិតនៅត្រឹមថ្ងៃព្រហស្បតិ៍ ហើយប្រជាជនត្រូវបានអាជ្ញាធរណែនាំឱ្យស្ថិតនៅក្នុងលំនៅដ្ឋានជៀសវាងចេញទៅក្រៅ និងហាមមិនឱ្យទៅតំបន់ឆ្នេរ។ ទីភ្នាក់ងារព័ត៌មានកណ្តាលកោះតៃវ៉ាន់ឱ្យដឹងថា មនុស្ស២នាក់ស្លាប់នៅថ្ងៃពុធមុនពេលព្យុះបោកបក់ទៅដល់កោះតៃវ៉ាន់ និងបុរសម្នាក់អាយុ៧៨ឆ្នាំស្លាប់ក្រោយលំនៅដ្ឋានរបស់លោករងគ្រោះដីបាក់នៅរសៀលថ្ងៃព្រហស្បតិ៍។ ជាមួយគ្នា មនុស្ស៣៨០នាក់ផ្សេងទៀតរងរបួស។  សារព័ត៌មានចិនXinhua ឱ្យដឹងថា នៅខេត្តFujian  ប្រទេសចិន, ជើងហោះហើរ , រថភ្លើង ,និងសេវាកម្មសាឡាង ត្រូវលុបចោល ហើយប្រជាជនច្រើនជាង២៤០,០០០នាក់ ត្រូវជម្លៀស ជាការបង្ការជាមុន។ ព្យុះ រំពឹងនឹងថមថយកម្លាំង ប៉ុន្តែនៅតែបង្កឱ្យមានភ្លៀងធ្លាក់ខ្លាំង នៅតំបន់ជាច្រើននៅរយៈពេល៣ថ្ងៃក្រោយ រួមទាំងទីក្រុងប៉េកាំងផងដែរ។    ប្រែសម្រួល៖ណាវ័ន្ត

 លោក បៃដិន បានថ្លែងសុន្ទរកថាចេញពីសេតវិមានជាលើកដំបូង បន្ទាប់ពីលោកបានបោះបង់បេក្ខភាពជាប្រធានាធបតីសម្រាប់គណបក្សប្រជាធិបតេយ្យ ហើយបានគាំទ្រឱ្យអនុប្រធានាធិបតីលោកស្រី កាម៉ាឡា ហារីស ជាបេក្ខភាពវិញម្ដង។ លោក បៃដិន បាននិយាយថា មូលហេតុនៃការបោះបង់បេក្ខភាពនេះគឺដោយសារលោកមានការព្រួយបារម្ភអំពីអនាគតរបស់សហរដ្ឋអាម៉េរិក និងចង់ឃើញការឯកភាពគ្នានៅក្នុងជួរគណបក្សរបស់លោកផងដែរ។ លោក បៃដិន បានរៀបរាប់ពីសេចក្តីស្រឡាញ់របស់លោកចំពោះការិយាល័យ ដែលលោកនឹងត្រូវចាកចេញរយៈពេល ៦ ខែទៀត។ លោកបាននិយាយថា លោកគោរពការិយាល័យនេះ ប៉ុន្តែលោកស្រឡាញ់ប្រទេសជាតិច្រើនជាង។ ក្នុងសារវីដេអូរយៈពេល១១នាទីនេះ លោកបៃដិន បាននិយាយទៀតថា មធ្យោបាយដ៏ល្អបំផុតឆ្ពោះទៅមុខគឺការបោះឱកាសដឹកនាំទៅឱ្យមនុស្សជំនាន់ថ្មី នោះហើយគឺជាមធ្យោបាយដ៏ល្អបំផុតក្នុងការបង្រួបបង្រួមជាតិរបស់ពួកគេ។ លោក បៃដិន បានបន្ថែមថា ការចាកចេញពីការប្រកួតរបស់លោកនេះក៏ដើម្បីជួយបង្រួបបង្រួមគណបក្សប្រជាធិបតេយ្យផងដែរ ហើយគ្មានអ្វីអាចរារាំងការសង្គ្រោះលទ្ធិប្រជាធិបតេយ្យរបស់ពួកគេបានឡើយ៕ ប្រែសម្រួល៖ ប៉ិច ស៊ីនួន 

  មន្ត្រីអាជ្ញាធរនៅក្នុងទីក្រុងខាកៀវបាននិយាយថា ប្រទេសរុស្ស៊ីបានវាយប្រហារគ្រាប់រ៉ុក្កែតទៅលើទីប្រជុំជន ឡូហ្សូវ៉ា (Lozova) ស្ថិតនៅភាគខាងត្បូងនៃរដ្ឋធានី ខាកៀវ ដោយបានបំផ្លាញអគារមួយនិងបណ្ដាលឱ្យស្លាប់មនុស្ស ៣ នាក់ និងរបួស ៦ នាក់កាលពីព្រឹកថ្ងៃពុធ ខណៈដែលក្រុមជួយសង្គ្រោះបានបន្តប្រតិបត្តិការរបស់ពួកគេរហូតដល់ល្ងាចថ្ងៃដដែលនោះ។  មន្ត្រីអាជ្ញាធរបានបន្ថែមថា ការវាយប្រហារនេះក៏បានបំផ្លាញការិយាល័យអង្គការមូលធិនិសម្រាប់សកម្មភាពដោះមីន (FSD) របស់ប្រទេសស្វីសនៅក្នុងអគារនោះ និងបំផ្លាញរថយន្តរបស់អង្គការនេះចំនួន ៦ គ្រឿងផងដែរ។ ទោះយ៉ាងណា មិនមានរបាយការណ៍អំពីបុគ្គលិករបស់អង្គការនេះស្លាប់ ឬរបួសនោះទេ ដោយសារការវាយប្រហារនេះបានកើតឡើងនៅពេលព្រឹកជាពេលដែលបុគ្គលិកមិនទាន់ទៅដល់កន្លែងធ្វើការនៅឡើយ។  សូមរំលឹកថា អង្គការ FSD បានបង្កើតឡើងតាំងពីឆ្នាំ១៩៩៧ មានមូលដ្ឋាននៅទីក្រុងហ្សឺណែវ ប្រទេសស្វីស ហើយអង្គការមនុស្សធម៌មិនរកប្រាក់ចំណេញមួយនេះបានធ្វើប្រតិបត្តិការដោះមីននៅក្នុងប្រទេសជាង៣០។ សម្រាប់សកម្មភាពដោះមីននៅអ៊ុយក្រែន បុគ្គលិកអង្គការ FDS ត្រូវបានដាក់ពង្រាយនៅតំបន់រងគ្រោះដោយគ្រាប់មីនមួយចំនួនរួមទាំងតំបន់ខាកៀវផងដែរដើម្បីឈូសឆាយដីកសិកម្ម និងបង្កើនការយល់ដឹងអំពីគ្រោះថ្នាក់នៃអាវុធយុទ្ធភណ្ឌមិនទាន់ផ្ទុះ៕ ប្រែសម្រួល៖ ប៉ិច ស៊ីនួន 

   ប្រទេសកូរ៉េខាងជើង បានបញ្ជូនបាឡុងសំរាមចំនួនប្រហែល៥០០បាឡុង ចូលប្រទេសកូរ៉េខាងត្បូងក្នុងរយៈពេល២៤ម៉ោងកន្លងទៅ។ យោងអាជ្ញាធរកូរ៉េខាងត្បូងឱ្យដឹងនៅថ្ងៃព្រហស្បតិ៍(២៥កក្កដា)នេះ។ បាឡុងសំរាមប្រទេសកូរ៉េខាងជើង បានរំខានដល់ការហោះហើរ និងបង្កឱ្យកើតមានអគ្គីភ័យនៅលើដំបូលអាគារលំនៅដ្ឋានប្រជាជន។  បាឡុងសំរាម ជាចំណែកមួយនៃយុទ្ធនាការផ្សព្វផ្សាយរបស់រដ្ឋាភិបាលទីក្រុងព្យុងយ៉ាងប្រឆាំងនឹងប្រជាជនកូរ៉េខាងជើងដែលចុះចូលនិងកូរ៉េខាងត្បូង និងសកម្មជននៅប្រទេសកូរ៉េខាងត្បូង។ ពួកគេទាំងអស់នេះ ក៏តែងតែបញ្ជូនបាឡុងដែលមានខិតប័ណ្ណប្រឆាំងរដ្ឋាភិបាលទីក្រុងព្យុងយ៉ាង , លុយ ,និងUSBវីដេអូនិងភាពយន្តតារាK-pop ទៅប្រទេសកូរ៉េខាងជើងផងដែរ។ បាឡុងសំរាម ធ្លាក់នៅអាកាសយានដ្ឋានGimpo Airport  ទីក្រុងសេអ៊ូលនៅល្ងាចថ្ងៃពុធ ។ យោងអាជ្ញាធរអាកាសយានដ្ឋានកូរ៉េខាងត្បូង។ បាឡុងជាច្រើនក៏បានប៉ះពាល់ដល់ចរាចរណ៍នៅអាកាសយានដ្ឋានIncheon ដែលជាអាកាសយានដ្ឋានអន្តរជាតិធំរបស់ប្រទេសកូរ៉េខាងត្បូង ជាច្រើនដងក្នុងរយៈពេលប៉ុន្មានសប្តាហ៍ចុងក្រោយនេះ។ នៅខេត្តGyeonggi ជិតទីក្រុងសេអ៊ូល បាឡុងសំរាមប្រទេសកូរ៉េខាងជើង បានឆេះនៅលើដំបូលអាគារប្រជាជនរស់នៅ។ ក្រុមពន្លត់អគ្គីភ័យបានពន្លត់ភ្លើង។     ប្រែសម្រួល៖ណាវ័ន្ត

  ព្យុះទីហ្វុងGaemi បោកបក់លើតំបន់ភាគខាងជើងកោះតៃវ៉ាន់ នៅថ្ងៃព្រហស្បតិ៍(២៥កក្កដា)នេះ បានសម្លាប់មនុស្ស២នានក់ បង្កឱ្យមានទឹកជំនន់ និងនាំឱ្យស្ទះចរាចរណ៍ មុនពេលព្យុះបោកបក់បន្តទៅកាន់សមុទ្រ ហើយបក់ទៅប្រទេសចិន ដែលតាមការព្យាករណ៍ព្យុះនឹងបង្កឱ្យមានភ្លៀងធ្លាក់ខ្លាំងនៅប្រទេសចិន។ ព្យុះGaemi  បោកបក់លើកោះតៃវ៉ាន់ប្រហែលពាក់កណ្តាលយប់ នៅឆ្នេរភាគឦសានកោះតៃវ៉ាន់ ក្នុងតំបន់Yilan។ ព្យុះ  Gaemi ជាព្យុះទីហ្វុងកម្លាំងខ្លាំងបំផុតដែលបានបោកបក់លើកោះតៃវ៉ាន់ក្នុងរយៈពេល៨ឆ្នាំ និងមានកម្លាំងខ្យល់រហូតដល់ទៅ២២៧គីឡូម៉ែត្រក្នុងមួយម៉ោងមុនពេលព្យុះថមថយកម្លាំង។ យោងរដ្ឋបាលអាកាសធាតុកោះតៃវ៉ាន់។  នៅត្រឹមម៉ោង៨និង៣០នាទីព្រឹកថ្ងៃព្រហស្បតិ៍នេះ ព្យុះGaemi  ស្ថិតនៅច្រកសមុទ្រតៃវ៉ាន់ និងបោកបក់បន្តឆ្ពោះទៅខេត្តFujian ប្រទេសចិន។  ការិយាល័យធ្វើការ និងសាលារៀន នៅទូទាំងដែនកោះតៃវ៉ាន់ រួមនិងទីផ្សារហិរញ្ញវត្ថុ បានបិទរយៈពេល២ថ្ងៃមកហើយនៅថ្ងៃព្រហស្បតិ៍នេះ ដោយសារបារម្ភថានឹងមានភ្លៀងធ្លាក់ខ្លាំង។ រថភ្លើង រួមទាំងរថភ្លើងល្បឿនលឿនភ្ជាប់ភាគខាងជើងនិងខាងត្បូងកោះតៃវ៉ាន់ នឹងត្រូវបិទដល់ម៉ោង៣ល្ងាច។ ជើងហោះហើរក្នុងស្រុកទាំងអស់និងជើងហោះហើរអន្តរជាតិ ត្រូវបានលុបចោល។ ផ្លូវជាច្រើន នៅទូទាំងកោះតៃវ៉ាន់ លិចទឹក។  មនុស្ស២នាក់ស្លាប់ និង២៦៦នាក់រងរបួសដោយសារព្យុះ។ យោងទិន្នន័យរដ្ឋាភិបាល។​    ប្រែសម្រួល៖ណាវ័ន្ត

 ទីភ្នាក់ងារសារព័ត៌មានរ៉យទ័រ និងដៃគូរបស់ខ្លួនបានរៀបចំការស្ទង់មតិមួយចាប់ពីថ្ងៃចន្ទដល់ថ្ងៃអង្គារនៅក្នុងចំណោមអ្នកមានសិទ្ធិបោះឆ្នោតប្រធានាធិបតីអាម៉េរិក នាថ្ងៃទី៥ ខែវិច្ឆិកា ចុងឆ្នាំនេះ។ ការស្ទង់មតិនេះបានបង្ហាញថា លោកស្រី ហារីស បាននាំមុខបន្តិចលើលោក ត្រាំ ដែលជាបេក្ខជនមកពីគណបក្សសាធារណរដ្ឋ ដោយលោកស្រី ហារីស បានទទួលសំឡេងគាំទ្រ ៤៤% រីឯលោក ត្រាំ វិញបាន ៤២%។ បន្ទាប់ពីប្រធានាធិបតីលោក ចូ បៃដិន បានបោះបង់ការប្រកួតបោះឆ្នោតកាលពីថ្ងៃអាទិត្យ និងបានគាំទ្រឱ្យលោកស្រី ហារីស ជាបេក្ខជនប្រធានាធិបតីសម្រាប់គណបក្សប្រជាធិបតេយ្យហើយនោះ លោកស្រី ហារីស បានវាយប្រហារពាក្យសម្ដីលើលោក ត្រាំ នៅក្នុងយុទ្ធនាការលើកដំបូងរបស់លោកស្រីកាលពីថ្ងៃអង្គារ។ លោកស្រី ហារីស បានប្រាប់ហ្វូងអ្នកគាំទ្រជាច្រើនពាន់នាក់នៅវិទ្យាល័យមួយ ក្នុងទីក្រុងមីលវ៉ូគី (Milwaukee) ថា លោកស្រីស្គាល់ក្រយៅរបស់លោក ត្រាំ ច្បាស់ ហើយបានសន្យាថានឹងប្រើជំនាញជារដ្ឋអាជ្ញារបស់លោកស្រីតទល់នឹងលោក ត្រាំ នៅថ្ងៃណាមួយនៅក្នុងសប្តាហ៍នេះ៕ ប្រែសម្រួល៖ ប៉ិច ស៊ីនួន 

កោះ តៃវ៉ាន់ បានធ្វើសមយុទ្ធបាញ់គ្រាប់ពិតប្រឆាំងនឹងការចុះចត នៅលើកោះផេងហ៊ូ (Penghu) ដែលស្ថិតនៅឆ្ងាយពីដែនដីកោះតៃវ៉ាន់នៅថ្ងៃពុធនេះ ខណៈដែលកោះនេះកំពុងត្រៀមខ្លួនសម្រាប់ការមកដល់នៃព្យុះទីហ្វុងហ្កេមី (Gaemi)នៅល្ងាចថ្ងៃពុធនេះ។ សមយុទ្ធបាញ់គ្រាប់ពិតនេះគឺជាថ្ងៃទីបីហើយនៃសមយុទ្ធប្រចាំឆ្នាំហានគួង (Han Kuang) ក្នុងបំណងត្រៀមខ្លួនឱ្យកាន់តែខ្លាំងសម្រាប់ការប្រយុទ្ធជាក់ស្តែងណាមួយ និងហ្វឹកហាត់ពីរបៀបវាយទប់ទល់កងទ័ពរបស់ចិនផងដែរ។ នៅលើឆ្នេរកោះ ផេងហ៊ូ កងទ័ពកោះតៃវ៉ាន់បានបើករថក្រោះបណ្ដើរ និងបាញ់គ្រាប់ពិតបណ្ដើរសំដៅទៅលើគោលដៅដែលមានភ្លើងឆេះនៅលើផ្ទៃមហាសមុទ្រ ខណៈដែលទាហានផ្សេងទៀតបានបាញ់កាំភ្លើងចល័តនៅតាមឆ្នេរសមុទ្រ។  សមយុទ្ធបាញ់គ្រាប់ពិតនេះនឹងធ្វើតែនៅលើប្រជុំកោះដាច់ស្រយាលរបស់តៃវ៉ាន់មួយចំនួនរួមមាន កោះ ឃីនម៉េន ម៉ាតស៊ូ និងកោះ ផេងហ៊ូ ដែលស្ថិតនៅក្បែរឆ្នេរសមុទ្រប្រទេសចិនតែប៉ុណ្ណោះ។ នៅថ្ងៃពុធនេះដែរ តៃវ៉ាន់កំពុងត្រៀមខ្លួនសម្រាប់ព្យុះទីហ្វុង ហ្កេមី ដែលនឹងធ្វើដំណើរទៅដល់កោះនេះនៅល្ងាចថ្ងៃនេះ។  ដូច្នេះហើយអាជ្ញាធរបានជូនដំណឹងដល់សមាជិកសហគមន៍នេសាទនៅកោះកេលុង (Keelung) ឱ្យប្រញាប់ប្រញាល់ឡើងគោកនៅមុនពេលព្យុះទីហ្វុងនេះមកដល់។ បើតាមរដ្ឋបាលអាកាសធាតុតៃវ៉ាន់បានឱ្យដឹងថា ព្យុះហ្កេមីនេះគឺជាព្យុះទីហ្វុងលើកដំបូងនៃរដូវកាលព្យុះភ្លៀងឆ្នាំនេះ ហើយគេរំពឹងថាវានឹងបោកបក់នៅតំបន់ឆ្នេរសមុទ្រភាគឦសាននៃកោះនេះនៅល្ងាចថ្ងៃពុធនេះ៕ ប្រែសម្រួល៖ ប៉ិច ស៊ីនួន 

  នៅទីក្រុងវៀងច័ន្ទន៍ ប្រទេសឡាវ នៅថ្ងៃពុធ(២៤កក្កដា)នេះ មានការពង្រឹងសន្តិសុខយ៉ាងខ្លាំង ខណៈកិច្ចប្រជុំរដ្ឋមន្ត្រីការបរទេសអាស៊ានចាប់ផ្តើមធ្វើឡើងនៅមជ្ឈមណ្ឌលសន្និបាតជាតិរបស់ប្រទេសឡាវ។  ប៉ូលីស និងកងកម្លាំងសន្តិសុខប្រដាប់អាវុធយ៉ាងច្រើន បានបង្ហាញវត្តមាន ខណៈរដ្ឋមន្ត្រីការបរទេសនិងមន្ត្រីជាន់ខ្ពស់មកពីបណ្តាប្រទេសអាស៊ាន បានចាប់ផ្តើមទៅដល់កន្លែងប្រជុំ។ ប្រតិភូ និងរដ្ឋមន្ត្រីការបរទេសនៃ​ប្រទេសអាស៊ានទាំង១០ គ្រោងនឹងចូលរួមក្នុងកិច្ចខិតខំប្រឹងប្រែងកសាងសហគមន៍អាស៊ាន​ និងបញ្ជាក់ឡើងវិញនូវភាពជាកណ្តាល និងឯកភាពរបស់អាស៊ាន ចំពេលមានការអភិវឌ្ឍន៍ភូមិសាស្ត្រនយោបាយបច្ចុប្បន្ន។  លោក Wang Yi រដ្ឋមន្ត្រីការបរទេសចិន នឹងចូលរួមក្នុងកិច្ចប្រជុំនេះផងដែរ។ យោងក្រសួងការបរទេសចិន។     ប្រែសម្រួល៖ណាវ័ន្ត

  ដែនកោះតៃវ៉ាន់ បានត្រៀមបម្រុងជាមុន នៅថ្ងៃពុធ(២៤កក្កដា)នេះ មុនពេលព្យុះទីហ្វុង Gaemi បោកបក់ទៅដល់។ ទីផ្សារហិរញ្ញវត្ថុបិទ , ប្រជាជនមិនទៅធ្វើការ, ជើងហោះហើរត្រូវលុបចោល ហើយយោធា ត្រៀមប្រុងជើងការជាមុន និងមានការព្យាករណ៍ពីភ្លៀងធ្លាក់ខ្លាំង និងខ្យល់ខ្លាំង។  ព្យុះGaemi នឹងបោកបក់លើឆ្នេរសមុទ្រភាគឦសាននៅល្ងាចថ្ងៃពុធ។ យោងរដ្ឋបាលកណ្តាលអាកាសធាតុកោះតៃវ៉ាន់។ បច្ចុប្បន្ន អាជ្ញាធរកោះតៃវ៉ាន់ បានចាត់ថ្នាក់ព្យុះហ្គេមី(Gaemi) ជាព្យុះទីហ្វុងកម្លាំងមធ្យម ។ ព្យុះនេះនឹងបោកបក់កាត់កោះតៃវ៉ាន់ ហើយបន្តទៅខេត្តហ្វូជៀន(Fujian) ភាគអាគ្នេយ៍ប្រទេសចិននៅព្រឹកថ្ងៃសុក្រ(២៦កក្កដា)។ ការិយាល័យធ្វើការ និងសាលារៀន ត្រូវផ្អាក នៅទូទាំងដែនកោះតៃវ៉ាន់។ នៅតាមដងផ្លូវជាច្រើនក្នុងទីក្រុងតៃប៉ិ ស្ទើគ្មានមនុស្សដើរអំឡុងពេលម៉ោងធ្វើដំណើរមមាញឹក។  ក្រសួងដឹកជញ្ជូនកោះតៃវ៉ាន់ ឱ្យដឹងថា ជើងហោះហើរក្នុងស្រុកស្ទើរតែទាំងអស់ត្រូវលុបចោល និងជើងហោះហើរអន្តរជាតិចំនួន២៧។ រដ្ឋបាលអាកាសធាតុឱ្យដឹងថា តំបន់ភ្នំកណ្តាល និងភាគខាងត្បូងនៃកោះតៃវ៉ាន់ នឹងមានភ្លៀងធ្លាក់សរុបរហូតដល់ ១៨០០ មីលីម៉ែត្រ ក្នុងអំឡុងពេលព្យុះទីហ្វុង។ មនុស្សច្រើនជាង២០០០នាក់ ត្រូវជម្លៀសចេញពីតំបន់ភ្នំ ដោយសារបារម្ភពីគ្រោះមហន្តរាយបាក់ដីដោយសារភ្លៀងធ្លាក់ខ្លាំង។     អត្ថបទ៖ណាវ័ន្ត

ខ្យល់ព្យុះឈ្មោះ ព្រះពិរុណ កំពុងបោកបក់ខ្លាំងទៅលើតំបន់មាត់សមុទ្រប្រទេសចិន ហើយនឹងបន្តដំណើរទៅប្រមូលផ្ដុំកម្លាំងគ្នានៅព្រំដែនចិន និងវៀតណាម។ ខ្យល់ព្យុះនេះវាយប្រហារខ្លាំងទៅលើខេត្តហាយណាន (Hainan) ហើយធ្វើឲ្យមានភ្លៀងធ្លាក់ខ្លាំងស្ទើរតែគ្រប់ទីកន្លែង។ ឥឡូវនេះប្រទេសវៀតណាមក៏កំពុងត្រៀមទប់ទល់នឹងគ្រោះធម្មជាតិនេះផងដែរ។  គេឃើញថានៅហាយណាន ប្រទេសចិន ខ្យល់ព្យុះបានធ្វើឲ្យមានរលកសមុទ្រខ្ពស់ៗ។ ពេលខ្លះរលកសមុទ្រហក់ឡើងខ្ពស់ដល់៣ម៉ែត្រ។ លោកលីប៉ិនសៀ (Le Benxia) ជាប្រធានផ្នែកព្យាករអាកាសធាតុចិនថ្លែងថាខ្យល់ព្យុះនឹងបន្តបោកបក់ទៅឈូងសមុទ្រប៉ីពូ (Beibu)។ ដូច្នេះ ខេត្តហាយណាននៅតែបន្តប្រុងប្រយ័ត្នខ្ពស់។ ជាពិសេសតំបន់ភ្នំនៅជាប់នឹងមាត់សមុទ្រ។  គេរំពឹងថារហូតដល់ល្ងាចថ្ងៃពុធ ទើបខ្យល់ព្យុះស្ងប់ស្ងាត់ទៅវិញ។ សម្រាប់ពេលនេះ ខ្យល់ព្យុះនៅតែបង្កការរំខានសម្រាប់ការធ្វើដំណើរ។ គ្រាន់តែថាការដឹកជញ្ជូនតាមរថភ្លើងល្បឿនលឿនអាចចាប់ផ្ដើមដំណើរការឡើងវិញជាបណ្ដើរៗ។ ប៉ុន្តែទូកនេសាទតូចធំគ្រប់ប្រភេទត្រូវតែបន្តស្ថិតនៅមាត់កំពង់,តំបន់ទេសចរណ៍នានានៅតាមមាត់សមុទ្រត្រូវបន្តបិទទ្វារ។   ខ្យល់ព្យុះព្រះពិរុណនឹងបោកបក់ទៅដល់ព្រំដែនចិន និងវៀតណាមនៅមាត់សមុទ្រខេត្តក្វាងស៊ី (Guangxi) និងវៀតណាមខាងជើងនៅព្រឹកថ្ងៃចន្ទ និងល្ងាចថ្ងៃអង្គារ។  នៅហាយណាន ខ្យល់ព្យុះបានធ្វើឲ្យដើមឈើដួលរលំទាំងឫស។ ក្រុមអ្នកពន្លត់អគ្គិភ័យត្រូវតែធ្វើការទាំងយប់ទាំងថ្ងៃដើម្បីបោសសម្អាតផ្លូវនៅទីក្រុងវេននីង (Wanning) ដែលមានសុទ្ធតែសំរាម និងគំនរបាក់បែក។ អាជ្ញាធរនៅតែប្រកាសអាសន្នកម្រិត៤នៅខេត្តហាយណានព្រោះភ្លៀងបន្តធ្លាក់ខ្លាំងមិនទាន់ថយចុះទៅវិញនៅឡើយទេ។ នៅឈូងសមុទ្រប៉ីពូ អាជ្ញាធរនៅតែបន្តប្រកាសអាសន្នឲ្យប្រុងប្រយ័ត្នព្រោះមានភ្លៀងធ្លាក់ខ្លាំងទាំងយប់ទាំងថ្ងៃរហូតដល់ថ្ងៃពុធ៕ ប្រែ​សម្រួល​៖ អន សំអាង 

   កីឡាករអ៊ីស្រាអ៊ែល នឹងទទួលបានកិច្ចការពារពេញ២៤ម៉ោង​លើ២៤ម៉ោង អំឡុងពេលកីឡាអូឡាំពិកនៅទីក្រុងប៉ារីស។ នេះបើតាមការឱ្យដឹងពីរដ្ឋមន្ត្រីក្រសួងមហាផ្ទៃរបស់ប្រទេសបារាំង។  ចំណាត់ការនេះ បានធ្វើឡើងក្រោយសមាជិកសភាឆ្វេងនិយមជ្រុលបានលើកឡើងថា  មិនស្វាគមន៍ប្រតិភូអ៊ីស្រាអ៊ែល ហើយក៏បានអំពាវនាវឱ្យធ្វើបាតុកម្មប្រឆាំងនឹងការចូលរួមរបស់កីឡាករអ៊ីស្រាអ៊ែលផងដែរ។  កីឡាអូឡាំពិក ចាប់ផ្តើមធ្វើនៅប្រទេសបារាំងនៅថ្ងៃសុក្រ(២៦កក្កដា) ចំពេលមានកង្វល់លើបញ្ហាសន្តិសុខ និងភាពតានតឹងភូមិសាស្ត្រនយោបាយកើនឡើងលើសង្គ្រាមនៅអ៊ុយក្រែននិងតំបន់ហ្គាហ្សា។ សង្គ្រាមអ៊ីស្រាអ៊ែលប្រឆាំងនឹងក្រុមហាម៉ាស់ដែលបានបំផ្លិចបំផ្លាញតំបន់ហ្គាហ្សា បានក្លាយជាដំបងដែករបស់ក្រុមឆ្វេងនិយមជ្រុលនៅប្រទេសបារាំង រហូតដល់មានអ្នករិះគន់មួយចំនួន បានចោទប្រកាន់អ្នកគាំទ្រប៉ាលេស្ទីនថា លំអៀង។ ក្នុងកិច្ចសម្ភាសន៍ លោក  Gerald Darmanin រដ្ឋមន្ត្រីក្រសួងមហាផ្ទៃបារាំង បានលើកឡើងថា កីឡាករអ៊ីស្រាអ៊ែលនឹងទទួលបានកិច្ចការពារពេញ២៤ម៉ោងអំឡងពេលកីឡាអូឡាំពិក។  លោក Darmanin ប្រកាសខាងលើនេះ ក្រោយពីលោកThomas Portesសមាជិកសភាឆ្វេងនិយមជ្រុល បាននិយាយថា កីឡាករអូឡាំពិកពីប្រទេសអ៊ីស្រាអ៊ែល មិនស្វាគមន៍នៅបារាំង ហើយក៏គួរតែប្រឆាំងនឹងការចូលរួមរបស់ពួកគេនៅក្នុងកីឡានេះផងដែរ។   លោកThomas Portes មិនមានការឆ្លើយតបណាមួយនិងសារព័ត៌មានរ៉យទ័រដែលសុំការអត្ថាធិប្បាយនោះឡើយ។ ហើយស្ថានទូតអ៊ីស្រាអ៊ែល ក៏បដិសេធធ្វើអត្ថាធិប្បាយផងដែរ។     ប្រែសម្រួល៖ណាវ័ន្ត

   លោកស្រី Kamala Harris អនុប្រធានាធិបតីសហរដ្ឋអាមេរិកនៅថ្ងៃចន្ទ (២២កក្កដា)  បានឈ្នះការគាំទ្រដ៏សំខាន់ពីអ្នកនយោបាយគណបក្សប្រជាធិបតេយ្យដ៏មានឥទ្ធិពលលោកស្រី Nancy Pelosi ដើម្បីដឹកនាំគណបក្សប្រឆាំងនឹងលោកDonald Trump នៅក្នុងការបោះឆ្នោតខែវិច្ឆិកាខាងមុខ បន្ទាប់ពីលោកJoe Bidenដកខ្លួនចេញពីបេក្ខភាពប្រធានាធិបតីអាមេរិក។ ខណៈការគាំទ្រលោកស្រីពីបណ្តាអ្នកនយោបាយគណបក្សប្រជាធិបតេយ្យមានការកើនឡើង លោកស្រីHarris អាយុ៥៩ឆ្នាំ បានបង្ហាញវត្តមានជាសាធារណៈជាលើកដំបូងចាប់តាំងពីការប្រកាសរបស់លោកBidenនៅសេតវិមាន។  នៅពេលមិនសូវទទួលបានការទុកចិត្តថានឹងទទួលបានជ័យជំនះ ប៉ុន្តែឥឡូវនេះ លោកស្រីHarris មានអារម្មណ៍ថា ដៃម្ខាងរបស់លោកស្រីកាន់ពានរង្វាន់ បន្ទាប់ពីទទួលបានការគាំទ្រពីលោកស្រីPelosi អតីតប្រធានសភាអាមេរិក និងជាមនុស្សសំខាន់ក្នុងគណបក្សប្រជាធិបតេយ្យ។ នៅលើបណ្តាញទំនាក់ទំនងសង្គមអនឡាញX , លោកស្រីPelosi អាយុ៨៤ឆ្នាំ បានលើកឡើងថា «ជាមួយនឹងមោទនភាពដ៏ក្រៃលែង និងសុទិដ្ឋិនិយមគ្មានដែនកំណត់សម្រាប់អនាគតរបស់ប្រទេសយើង, ខ្ញុំសូមគាំទ្រអនុប្រធានាធិបតី Kamala Harris សម្រាប់ប្រធានាធិបតីសហរដ្ឋអាមេរិក»។ «ខ្ញុំ​មាន​ទំនុក​ចិត្ត​យ៉ាង​ពេញ​ទំហឹង​ថា នាង​នឹង​នាំ​យើង​ទៅ​រក​ជ័យ​ជម្នះ​ក្នុង​ខែ​វិច្ឆិកា»។ លោក Joe Biden ប្រធានាធិបតីសហរដ្ឋអាមេរិក បានប្រកាសដកខ្លួនពីយុទ្ធនាការបោះឆ្នោត នៅថ្ងៃអាទិត្យ(២១កក្កដា) បន្ទាប់ពីគណបក្សប្រជាធិបតេយ្យ បានបាត់បង់ជំនឿពីសំណាក់អ្នកគាំទ្រ។ លោក Biden បានប្រកាសលើបណ្តាយសង្គម X ថា លោកនឹងនៅតែមានតួនាទីជាប្រធានាធិបតី រហូតដល់ខែមករា ឆ្នាំ២០២៥។ លោកស្រី Kamala Harris ស្ត្រីទី១ក្នុងតំណែងអនុប្រធានាធិបតីអាមេរិកមានដើមកំណើតជនជាតិស្បែកខ្មៅនិងអាស៊ីខាងត្បូង នៅក្នុងប្រវត្តិសាស្ត្រអាមេរិក។    ប្រែសម្រួល៖ណាវ័ន្ត

 នាយករដ្ឋមន្ត្រី អូស្ត្រាលី លោក អាល់បានីស បាននិយាយក្នុងសារវីដេអូមួយដោយបានសម្ដែងការគោរពចំពោះការសម្រេចចិត្តរបស់លោក  បៃដិន ក្នុងការបញ្ឈប់ការប៉ុនប៉ងជាប់ឆ្នោតជាថ្មី និងបានកោតសរសើរថាជា «កំណត់ត្រាដ៏អស្ចារ្យ» របស់លោក បៃដិន។ លោក អាបាល់នីស បានបន្ថែមថា លោកកំពុងទន្ទឹងរង់ចាំជួបជាមួយនឹងលោក បៃដិន នៅក្នុងកិច្ចប្រជុំកំពូលជី២០ និងកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅចុងឆ្នាំនេះ។សូមរំលឹកថា លោក បៃដិន កាលពីថ្ងៃអាទិត្យ បានសម្រេចបោះបង់ការប៉ុនប៉ងជាប់ឆ្នោតជាថ្មី ហើយលោកបានគាំទ្រពេញទំហឹងឱ្យអនុប្រធានាធិបតីគឺលោកស្រី កាម៉ាឡា ហារីស ជាបេក្ខជនរបស់គណបក្សប្រជាធិបតេយ្យសម្រាប់ការបោះឆ្នោតនៅដើមខែវិច្ឆិកាចុងឆ្នាំនេះ។  ទោះយ៉ាងណាលោក បៃដិន អាយុ ៨១ ឆ្នាំ ដែលជាប្រធានាធិបតីទី៤៦ និងដែលចាស់ជាងគេបំផុតសម្រាប់តំណែងកំពូលមួយនេះបាននិយាយថា លោកនឹងបន្តកាន់តំណែងនេះរហូតដល់ចប់អាណត្តិនៅថ្ងៃទី២០ ខែមករា ឆ្នាំ ២០២៥។ លោកបាននិយាយថា លោកមានកិត្តិយសណាស់ដែលបានធ្វើជាប្រធានាធិបតីរបស់ពលរដ្ឋអាម៉េរិក ហើយលោកជឿថាវាជាផលប្រយោជន៍ដ៏ល្អបំផុតរបស់គណបក្ស និងសហរដ្ឋអាម៉េរិក ដែលលោកត្រូវបោះបង់ការប្រកួតនេះ និងផ្តោតតែលើតួនាទីជាប្រធានាធិបតីរហូតដល់ផុតអាណត្តិតែប៉ុណ្ណោះ។  ចំណែកលោកស្រី ហារីស បាននិយាយថា លោកស្រីមានកិត្តិយសណាស់ដែលទទួលបានការយល់ព្រមពីលោក បៃដិន សម្រាប់បេក្ខភាពប្រធានាធិបតីបែបនេះ ហើយនេះគឺជាកេរដំណែលដ៏អស្ចារ្យរបស់លោកដែលមិនអាចប្រៀបផ្ទឹមបានឡើយនៅក្នុងប្រវត្តិសាស្ត្រអាមេរិកសម័យទំនើបនេះ ពោលគឺវាលើសពីកេរ្តិ៍ដំណែលរបស់ប្រធានាធិបតីជាច្រើនដែលបានកាន់តំណែងពីរអាណត្តិពីមុនៗមកទៀត។ ទោះយ៉ាងណា នេះជាគ្រាន់តែជាការយល់ព្រមរបស់លោក បៃដិន តែប៉ុណ្ណោះ ហើយលទ្ធផលជាក់ស្ដែង គឺត្រូវរង់ចាំមើលការបោះឆ្នោតសម្រេចចុងក្រោយនៅក្នុងសន្និបាតជាតិរបស់គណបក្សនេះនៅក្នុងខែសីហាក្រោយនេះ។លោកស្រី ហារីស បាននិយាយថា លោកស្រីគម្រោងនឹងស្វែងរកការគាំទ្រពេញទំហឹងពីសមាជិកគណបក្សប្រជាធិបតេយ្យ ហើយប្រសិនបើជាប់ឆ្នោតជាបេក្ខជនសម្រាប់គណបក្សនេះមែន លោកស្រីអាចនឹងក្លាយជាស្ត្រីស្បែកខ្មៅកាត់អាស៊ីនិងអាម៉េរិកដំបូងគេដែលបានក្លាយជាប្រធានាធិបតីសហរដ្ឋអាម៉េរិក៕ ប្រែសម្រួល៖ ប៉ិច ស៊ីនួន 

ប្រជាជនកូរ៉េខាងត្បូង បានបង្ហាញភាពធូរស្រាលក្រោយលោក Joe Biden សម្រេចដកខ្លួនពីបេក្ខភាពប្រធានាធិបតីអាមេរិក ប៉ុន្តែបាន បង្ហាញក្តីកង្វល់ចំពោះលោក Dpnald Trump ទៅវិញ។    ប្រជាជនកូរ៉េខាងត្បូងមួយចំនួននៅថ្ងៃច័ន្ទ(២២កក្កដា)នេះ បានបង្ហាញពីភាពធូរស្រាលរបស់ខ្លួនដែលលោកJoe Biden ប្រធានាធិបតីអាមេរិក បានសម្រេចដកខ្លួនចេញពីការបោះឆ្នោតប្រធានាធិបតីនៅខែវិច្ឆិកាខាងមុខ ប៉ុន្តែពួកគេនៅតែបង្ហាញក្តីកង្វល់ចំពោះលោក Donald Trump បេក្ខជនប្រធានាធិបតីគណបក្សសាធារណៈរដ្ឋទៅវិញ ។ លោក Kim Jae-hyun អាយុ៦៤ឆ្នាំ បាននិយាយថា លោកមានការកង្វល់ចំពោះសមត្ថភាពចងចាំ និងការវិនិច្ឆ័យរបស់លោកBidenប្រធានាធិបតីបច្ចុប្បន្ន ហើយក៏មានការធូរស្រាលដែលលោកធ្វើការសម្រេចចិត្តដកខ្លួនដែលជាការសម្រេចចិត្ត ដ៏មានហេតុផលមួយ។  ជាមួយគ្នា កញ្ញា Lee Chae-hwan អាយុ២៤ឆ្នាំបានលើកឡើងថា ការចាកចេញរបស់លោកBiden ប៉ុន្តែលោកTrumpបែរជាធ្វើឱ្យមានកង្វល់ទៅវិញ ព្រោះនយោបាយលោកTrumpគឺជ្រុលពេក ហើយមានផលប៉ះពាល់អវិជ្ជមានក្នុងពិភពលោកអំឡុងពេលលោកកាន់តំណែងជាប្រធានាធិបតីអាមេរិកកាលពីអណត្តិមុន។ ប្រធានាធិបតីសហរដ្ឋអាមេរិក លោក Joe Biden បានប្រកាសដកខ្លួនពីយុទ្ធនាការបោះឆ្នោត នៅថ្ងៃអាទិត្យ(២១កក្កដា) បន្ទាប់ពីគណបក្សប្រជាធិបតេយ្យបានបាត់បង់ជំនឿពីសំណាក់អ្នកគាំទ្រ។ លោក Biden បានប្រកាសលើបណ្តាយសង្គម X ថា លោកនឹងនៅតែមានតួនាទីជាប្រធានាធិបតី រហូតដល់ខែមករា ឆ្នាំ២០២៥។ ទន្ទឹមនិងការប្រកាសដកខ្លួននេះ លោក Biden ក៏បានឧទ្ទេសនាមអនុប្រធានាធិបតី លោកស្រី Kamala Harris ឈរតំណាងបក្សដើម្បីបន្តវេនពីលោក។      ប្រែសម្រួល៖ណាវ័ន្ត

  លោក Donald Trump បេក្ខជនប្រធានាធិបតីអាមេរិកគណបក្សសាធារណៈរដ្ឋនៅថ្ងៃអាទិត្យ(២១កក្កដា) បាននិយាយដូច្នេះថា«លោកគិតថា លោកស្រី Kamala Harris អនុប្រធានាធិបតីអាមេរិក នឹងងាយស្រួលផ្តួលច្រើនជាងលោក Joe Biden នៅក្នុងការបោះឆ្នោតខែវិច្ឆិកាខាងមុខ»។ នៅមុននេះ លោក Joe Biden បានប្រកាសដកខ្លូនពីយុទ្ធនាការបោះឆ្នោត នៅថ្ងៃអាទិត្យ ទី២១ ខែកក្កដា បន្ទាប់ពីគណបក្សប្រជាធិបតេយ្យបានបាត់បង់ជំនឿពីសំណាក់អ្នកគាំទ្រ។ លោក Biden បានប្រកាសលើបណ្តាយសង្គម X ថា លោកនឹងនៅតែមានតួនាទីជាប្រធានាធិបតី រហូតដល់ខែមករា ឆ្នាំ២០២៥។ លោក Trump  បានថ្លែងទៅកាន់សារព័ត៌មានCNN ថា «Harris នឹងងាយស្រួលផ្តួលជាង Joe Biden»។  លោកTrump និងក្រុមយុទ្ធនាការបោះឆ្នោតរបស់លោកក្រោយមក ក៏បានវាយប្រហារលើលោកBiden និងលោកស្រីHarris នៅលើបណ្តាញសង្គម ស្របពេលនិយាយថា លោកBiden មិនសមនឹងបន្តការងារជាប្រធានាធិបតីអាមេរិក។  អ្នកនយោបាយជាន់ខ្ពស់គណបក្សសាធារណៈរដ្ឋដទៃទៀតមាន ប្រធានសភាលោកMike Johnson ក៏បាននិយាយផងដែរថា លោកBiden ​មិនសមនឹងបន្តការងារជាប្រធានាធិបតីអាមេរិក ហើយបញ្ចប់អណត្តិរបស់ជាប្រធានាធិបតីរបស់លោក ប្រសិនបើលោកលាលែងចេញពីមុខងារបេក្ខភាពប្រធានាធិបតីអាមេរិកគណបក្សប្រជាធិបតេយ្យ។ លោកJohnson  បានអំពាវនាវយ៉ាងច្បាស់ឱ្យលោក Biden លាលែងពីតំណែង។  លោក Biden អាយុ៨១ឆ្នាំ ដែលជាប្រធានាធិបតីចាស់បំផុតសម្រាប់សហរដ្ឋអាមេរិក បាននិយាយថា លោក នឹងបន្តកាន់តំណែងជាប្រធានាធិបតីអាមេរិក រហូតដល់អណត្តិរបស់លោកបញ្ចប់នៅថ្ងៃទី២០ខែមករាឆ្នាំ២០២៥ ហើយលោកនឹងថ្លែងសន្ទរកថាទៅកាន់ប្រជាជាតិនៅសប្តាហ៍នេះ។      ប្រែសម្រួល៖ណាវ័ន្ត

  សហរដ្ឋអាមេរិក បានបើកស្ថានទូតនៅប្រទេសដែនកោះតំបន់ប៉ាស៊ីហ្វិចVanuatu(វ៉ានូអាទូ) នៅថ្ងៃព្រហស្បតិ៍។​ ចំពោះការបើកស្ថានទូតនេះត្រូវបានគេមើលឃើញថាជាចំណាត់ការថ្មីចុងក្រោយបំផុតរបស់សហរដ្ឋអាមេរិកនៅក្នុងប្រកួតប្រជែងជាមួយប្រទេសចិនដែលជាដៃគូយូអង្វែងមកហើយសម្រាប់ឥទ្ធិពលនៅតំបន់អាស៊ីប៉ាស៊ីហ្វិច។  យោងសារព័ត៌មានរ៉យទ័រផ្សាយ(១៩កក្កដា)។ ក្រសួងការបរទេសអាមេរិកបានលើកឡើងក្នុងសេចក្តីថ្លែងការណ៍ដូច្នេះថា «ការបើកស្ថានទូតកសាងកិច្ចប្រឹងប្រែងរបស់យើងដើម្បីផ្តល់វត្តមានការទូតបន្ថែមទៀតនៅទូទាំងតំបន់និងដើម្បីចូលរួមកាន់តែជិតស្និទ្ធិជាមួយប្រទេសតំបន់ប៉ាស៊ីហ្វិច»។  នៅមុននេះ សហរដ្ឋអាមេរិក បានបើកស្ថានទូតនៅក្នុងប្រទេសកោះចំនួន២ផ្សេងទៀតមានកោះ Solomon និង Tonga ហើយបានគ្រោងនឹងបើកមួយបន្ថែមទៀតនៅ ប្រទេសKiribati។ យោងមន្ត្រីក្រសួងការបរទេស ថ្លែងប្រាប់សភាអាមេរិកកាលពីខែមីនា។ នៅ ប្រទេសKiribati កំពុងរង់ចាំការយល់ព្រមពីសភា។ រដ្ឋាភិបាលទីក្រុងវ៉ាស៊ីនតោន បាននឹងកំពុងបង្កើនវត្តមានការទូតរបស់ខ្លួននៅក្នុងតំបន់ប៉ាស៊ីហ្វិក ដើម្បីប្រឆាំងនឹងអ្វីដែលខ្លួនមើលឃើញថាជាការគំរាមកំហែងកាន់តែខ្លាំងឡើងពីប្រទេសចិន ដែលជាគូប្រជែងយុទ្ធសាស្ត្រដ៏សំខាន់របស់ខ្លួន។    ប្រែសម្រួល៖ណាវ័ន្ត

  លោកDonald Trumpបេក្ខជនប្រធានាធិបតីគណបក្សសាធារណៈរដ្ឋ នៅថ្ងៃសុក្រ(១៩កក្កដា) បាននិយាយថា លោក បានជជែកតាមទូរស័ព្ទជាមួយលោកប្រធានាធិបតីអ៊ុយក្រែន Volodymyr Zelenskyy និងបានសន្យាបញ្ចាប់សង្គ្រាមរបស់ប្រទេសតំបន់សហភាពអ៊ឺរ៉ុបមួយនេះជាមួយនិងប្រទេសរុស្ស៊ី។   លោកTrump នៅលើបណ្តាញទំនាក់ទំនងសង្គមអនឡាញរបស់លោកTruth Social បានលើកឡើងដូច្នេះថា ដោយសារលោកជាប្រធានាធិបតីអាមេរិកបន្ទាប់ លោកនឹងនាំមកសន្តិភាពឱ្យពិភពលោកនិងបញ្ចប់សង្គ្រាម ដែលធ្វើឱ្យមនុស្សជាច្រើនស្លាប់ និងបំផ្លិចបំផ្លាញគ្រួសារស្លូតត្រង់រាប់ភ្លេច។ លោកTrumpបន្តថា «ភាគីទាំងពីរ នឹងអាចចូលមកចរចារកិច្ចព្រមព្រៀងជាមួយគ្នាដែលបញ្ចប់ហិង្សានិងបើកផ្លូវឈានឆ្ពោះទៅរកវិបុលភាព។ លោកប្រធានាធិបតីអ៊ុយក្រែន Volodymyr Zelenskyy ក៏បានបញ្ជាក់ដែលថាលោកបានជជែកជាមួយលោកTrump ហើយលោកក៏បានអបអរលោកTrumpដែលទទួលបានការតែងតាំងក្លាយជាបេក្ខជនប្រធានាធិបតីគណបក្សសាធារណៈរដ្ឋជាផ្លូវការ រួមនិងជូនពរឱ្យបេក្ខជនប្រធានាធិបតីអាមេរិកអាយុ៧៨ឆ្នាំរូបនេះមានសុខភាពល្អ ក្រោយរួចផុតរងគ្រោះប៉ុនប៉ងធ្វើឃាតមិនបានសម្រេចកាលពីសប្តាហ៍មុន។  លោក Zelenskyy នៅលើបណ្តាញទំនាក់ទំនងសង្គមអនឡាញ X បានរៀបរាប់ថា «យើងបានព្រមព្រៀងជាមួយលោកប្រធានាធិបតីTrump ដើម្បីពិភាក្សានៅកិច្ចប្រជុំអំពីជំហានដែលអាចបង្កើតសន្តិភាព និងយូរអង្វែងតទៅ»។    ប្រែសម្រួល៖ណាវ័ន្ត 

នៅរសៀលនេះ មានបញ្ហាប្រឈមដ៏ធំមួយផ្នែកប្រព័ន្ធព័ត៌មានវិទ្យានៅតាមប្រទេសមួយចំនួនដូចជាសហរដ្ឋអាមេរិក អូស្ត្រាលី និងសិង្ហបុរីជាដើម។ គេទទួលដំណឹងថាក្រុមហ៊ុនអាកាសចរណ៍ធំៗរបស់សហរដ្ឋអាមេរិកបានបញ្ជាឲ្យបញ្ឈប់ការហោះហើររបស់ខ្លួនជាបណ្ដោះអាសន្នដោយសារបញ្ហារអាក់រអួលផ្នែកប្រព័ន្ធទំនាក់ទំនង។ ក្រុមហ៊ុនដឹកជញ្ជូន ក្រុមហ៊ុនប្រព័ន្ធផ្សព្វផ្សាយ ធនាគារ និងក្រុមហ៊ុនទូរគមនាគមន៍នៅទូទាំងពិភពលោកក៏ជួបប្រទះនឹងបញ្ហារំខានបែបនេះដូចគ្នាដែលធ្វើឲ្យប៉ះពាល់ខ្លាំងចំពោះប្រតិបត្តិការរបស់ខ្លួន។  ក្រុមហ៊ុនអាកាសចរណ៍ធំៗរបស់សហរដ្ឋអាមេរិកដូចជាអាមេរិកអ៊ែរឡាញ (American Airlines), ដែលតាអ៊ែរឡាញ (Delta Airlines), យូណាយធីតអ៊ែរឡាញ (United Airlines) និងក្រុមហ៊ុនមួយចំនួនទៀតត្រូវបង្ខំចិត្តផ្អាកជើងហោះហើររបស់ខ្លួនទាំងស្រុង។ ចំណាត់ការនេះធ្វើឡើងមិនដល់១ម៉ោងទេបន្ទាប់ពីក្រុមហ៊ុនម៉ៃក្រូសូហ្វប្រកាសថាខ្លួនទើបតែដោះស្រាយឡើងវិញនូវបញ្ហាផ្ទុកទិន្នន័យនៅលើសេវាក្លោត (cloud service) របស់ខ្លួនដែលបានបង្កការរំខានចំពោះក្រុមហ៊ុនដឹកជញ្ជូន។រហូតមកដល់ពេលនេះ គេមិនទាន់ដឹងច្បាស់ថាតើការសម្រេចផ្អាកជើងហោះហើររបស់ក្រុមហ៊ុនអាកាសចរណ៍ដូចរៀបរាប់ខាងលើនេះមានជាប់ពាក់ព័ន្ធនឹងសេចក្ដីប្រកាសរបស់ម៉ៃក្រូសូហ្វដែរឬទេ។ បើគេក្រឡេកទៅមើលសភាពការណ៍នៅអូស្ត្រាលីឯណោះវិញ គេឃើញថាក្រុមហ៊ុនប្រព័ន្ធផ្សព្វផ្សាយ ធនាគារ និងទូរគមនាគមន៍រងការរំខានខ្លាំងដោយសារការរអាក់រអួលផ្នែកព័ត៌មានវិទ្យាថ្ងៃនេះ។ រដ្ឋាភិបាលអូស្ត្រាលីប្រកាសថាបញ្ហានេះពាក់ព័ន្ធនឹងអ្វីដែលកើតឡើងទៅលើក្រុមហ៊ុនសន្តិសុខព័ត៌មានវិទ្យាឈ្មោះក្រោតស្ត្រាយ (Crowdstrike)។  គេហទំព័រឈ្មោះ Downdetector បង្ហាញការរំខានផ្នែកព័ត៌មានវិទ្យានេះនៅតាមធនាគារ និងក្រុមហ៊ុនទូរគមនាគមន៍មួយចំនួន។ ក្រុមហ៊ុន Crowdsrike ថ្លែងថាខ្លួនបានទទួលព័ត៌មានរួចហើយថាមានបញ្ហាប៉ះពាល់ចំពោះប្រព័ន្ធប្រតិបត្តិការវីនដូស (Windows) របស់ក្រុមហ៊ុនម៉ៃក្រូសូហ្វ។ ប៉ុន្តែក្រុមហ៊ុននេះមិនបាននិយាយអំពីបញ្ហាដែលកើតឡើងនៅអូស្ត្រាលីទេ។មិនទាន់មានព័ត៌មានបញ្ជាក់ថាករណីរំខានតាមប្រព័ន្ធព័ត៌មានវិទ្យាលើកនេះជាឧបទ្ទវហេតុពាក់ព័ន្ធនឹងសន្តិសុខព័ត៌មានវិទ្យាឬយ៉ាងណាទេ។ នេះបើយោងតាមលោកមីឈែល.ម៉ាក់ហ្គីននីស (Michelle McGuinness) ជាអ្នកសម្របសម្រួលសន្តិសុខព័ត៌មានវិទ្យាថ្នាក់ជាតិរបស់អូស្ត្រាលីសរសេររៀបរាប់នៅលើបណ្ដាញអ៊ិច។ គួរកត់សម្គាល់បញ្ហារំខានផ្នែកព័ត៌មានវិទ្យាលើកនេះហាក់ដូចជាធំទូលាយ សូម្បីតែប្រទេសអេស្ប៉ាញក៏មានបញ្ហារអាក់រអួលនៅក្នុងប្រព័ន្ធកុំព្យូទ័រនៅអាកាសយានដ្ឋានរបស់ខ្លួនទាំងអស់។ ចំណែកក្រុមហ៊ុនអាកាសចរណ៍ដែលធំជាងគេនៅអឺរ៉ុបឈ្មោះរីយ៉ាន់អ៊ែរ (Ryanair) បានប្រកាសប្រាប់អ្នកដំណើរអំពីបញ្ហារំខានដែលប៉ះពាល់ប្រព័ន្ធប្រតិបត្តិការនៅលើបណ្ដាញណិតវើក (Network)។ គ្រាន់តែថាក្រុមហ៊ុនមិនបានបញ្ជាក់ឲ្យបានចំៗថាតើការរំខាននេះបណ្ដាលមកពីមូលហេតុអ្វី។ក្រុមហ៊ុនផ្ដល់សេវាផ្ទុកទិន្នន័យតាមសេវាក្លោតឈ្មោះ AWS ចេញសេចក្ដីប្រកាសថាខ្លួនកំពុងស៊ើបអង្កេតរបាយការណ៍ដែលថាមានបញ្ហាផ្នែកការតភ្ជាប់បណ្ដាញទៅប្រព័ន្ធ Windows EC2 និង Workspaces របស់ក្រុមហ៊ុន AWS។ គេមិនទាន់ដឹងច្បាស់ថាតើរាល់បញ្ហារអាក់រអួលលើប្រព័ន្ធប្រតិបត្តិការទាំងប៉ុន្មានដូចរៀបរាប់ខាងលើនេះមានជាប់ពាក់ព័ន្ធគ្នានឹងបញ្ហាដែលកើតឡើងចំពោះបណ្ដាញ Crowdstrike ឬក៏ជាបញ្ហាដាច់ដោយឡែកមួយទៀត៕ ប្រែសម្រួល៖ អន សំអាង