តារាចម្រៀងស្រីអាមេរិក Sabrina Carpenter បានបញ្ចេញអាល់ប៊ុមចម្រៀងទី៧ របស់ខ្លួនជាផ្លូវការ ព្រមជាមួយវីដេអូចម្រៀងថ្មីមួយជាមួយតារាសម្ដែង Colman Domingo។

តារាចម្រៀង និងសម្ដែងអាមេរិក Sabrina Carpenter បានបង្ហាញវីដេអូ MV សម្រាប់បទចម្រៀងថ្មីរបស់នាងមានចំណងជើងថា “Tears” កាលពីចុងសប្ដាហ៍កន្លងទៅ ដោយមានការចូលរួមពីសំណាក់តារាសម្ដែងប្រុស Colman Domingo ព្រមទាំងបានបញ្ចេញអាល់ប៊ុមថ្មីមានចំណងជើងថា "Man's Best Friend" ក្នុងពេលតែមួយផងដែរ។

វីដេអូចម្រៀងបានបង្ហាញពីតារាស្រីរូបនេះបានជួបគ្រោះថ្នាក់នៅក្នុងព្រៃ មុនពេលដើរចូលទៅក្នុងផ្ទះដាច់ស្រយាលមួយ និងឃើញតារាប្រុស Domingo ស្លៀកពាក់ជា Drag Queen ហើយតួអង្គទាំងពីរក៏បានរាំជាមួយគ្នា។

នៅចុងបញ្ចប់វីដេអូ Carpenter បានសម្លាប់មិត្តប្រុសរបស់ខ្លួនដោយស្បែកកែងជើង និងនិយាយថា "ជារឿងធម្មតា គ្រប់វីដេអូត្រូវតែមានអ្នកស្លាប់" ។ វីដេអូចម្រៀងនេះគឺជាស្នាដៃដឹកនាំដោយលោក Bardia Zeinali ដែលធ្លាប់បានដឹកនាំ MV សម្រាប់តារាចម្រៀងល្បីៗជាច្រើនដូចជា Troye Sivan និង Conan Gray ជាដើម។

អាល់ប៊ុម " Man's Best Friend" ដែលជាអាល់ប៊ុមខ្នាតពេញទីប្រាំពីរតារាស្រីវ័យ ២៦ ឆ្នាំរូបនេះរួមមានបទចម្រៀងសរុប ១២ បទដែលត្រូវបាននិពន្ធផ្ទាល់ដោយ Carpenter និងអ្នកនិពន្ធដែលជាដៃគូសហការរបស់នាងមួយចំនួនទៀតដូចជា Amy Allen, John Ryan និង Jack Antonoff។

កន្លងមក បទ "Manchild" ដែលជាបទក្នុងអាល់ប៊ុមនេះដែរបានទទួលការពេញនិយមខ្លាំងរហូតជាប់ចំណាត់ថ្នាក់លេខ ១ នៅលើតារាង Billboard Hot 100 របស់សហរដ្ឋអាមេរិក។គួរបញ្ជាក់ដែរថា តារាចម្រៀងម្ចាស់ពានរង្វាន់ Grammy ចំនួន២ រូបនេះនឹងសម្តែងនៅកម្មវិធីពានរង្វាន់ MTV VMAs នៅថ្ងៃទី ៧ ខែកញ្ញា ខាងមុខ ៕
 

ប្រែសម្រួល៖ វ៉ាន់ថន