សហព័ន្ធឧស្សាហកម្មថៃ បញ្ជាក់ថា ប្រទេសថៃ គឺជាមជ្ឈមណ្ឌលផលិតរថយន្តដ៏ធំបំផុតនៅអាស៊ីអាគ្នេយ៍ និងជាមូលដ្ឋាននាំចេញ សម្រាប់ក្រុមហ៊ុនផលិតរថយន្តកំពូលមួយចំនួនរបស់ពិភពលោក រួមទាំង Toyota និង Honda ផងដែរ។ អ្នកនាំពាក្យផ្នែកឧស្សាហកម្មរថយន្តរបស់ សហព័ន្ធឧស្សាហកម្មថៃ បានថ្លែងថា តួលេខអវិជ្ជមាន នៅក្នុងខែកុម្ភៈ មិនទាន់អាចបង្ហាញ សញ្ញានៃការងើបឡើងវិញនៅឡើយទេ ដោយសារតែចំនួននេះគឺអវិជ្ជមានខ្លាំង ហើយអត្រានៃការបដិសេធនៃប្រាក់កម្ចីរថយន្ត នៅតែមានកម្រិតខ្ពស់។ សហព័ន្ធ បានបង្ហាញថា ការលក់រថយន្តក្នុងស្រុកបានធ្លាក់ចុះ ៦% ក្នុងខែកុម្ភៈ មកត្រឹមប្រមាណ ៥ម៉ឺនគ្រឿង បន្ទាប់ពីការធ្លាក់ចុះ ១២% កាលពីខែមុន។បំណុលគ្រួសាររបស់ប្រទេសថៃមានចំនួន ៤៨១ពាន់លានដុល្លារ គិតត្រឹមចុងខែកញ្ញា ឆ្នាំ ២០២៤ ឬស្មើនឹង ៨៩% នៃផលិតផលក្នុងស្រុកសរុប ក្នុងចំណោមសមាមាត្រខ្ពស់បំផុតនៅអាស៊ី។ ដោយឡែក ការនាំចេញរថយន្ត បានធ្លាក់ចុះ ៨% នៅក្នុងខែកុម្ភៈធៀបនឹងឆ្នាំមុន មកត្រឹម ៨ម៉ឺនគ្រឿង  ដោយសារតែ ការកើនឡើងនៃការប្រកួតប្រជែងពីម៉ាករថយន្តរបស់ចិន និងការគ្រប់គ្រងការបំភាយឧស្ម័ននៅក្នុងប្រទេសមួយចំនួន។ជាចុងក្រោយ សហព័ន្ធ បានព្យាករណ៍ថា ផលិតកម្មរថយន្តនឹងកើនឡើង ២% នៅឆ្នាំនេះ បន្ទាប់ពីបានធ្លាក់ចុះ ២០% ក្នុងឆ្នាំ ២០២៤៕   អត្ថបទ៖ ងួន សុភ័ត្រ្តា រូបភាព៖ ឯកសារ  

  នាឱកាសអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ អគារសិក្សា អគារស្នាក់នៅរបស់គ្រូបង្រៀន ទីចាត់ការ និងអគារកាត់ដេរ នៅវិទ្យាល័យ ហ៊ុនសែន វាលរេញ នៅព្រឹកថ្ងៃទី២៦ ខែមីនា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា កម្ពុជាគ្រោងវិនិយោគនូវទំហំទឹកប្រាក់ជិត ១ ពាន់លានដុល្លារអាមេរិក នៅជំហានទី៣ សម្រាប់អភិវឌ្ឍចំណតកំពង់ផែខេត្តព្រះសីហនុ ដើម្បីប្រែក្លាយទឹកនៃខេត្តសមុទ្រមួយនេះទៅជាតំបន់សេដ្ឋកិច្ចពិសេសគំរូពហុបំណងនាពេលដ៏ខ្លីខាងមុខនេះ។ ក្នុងឱកាសនោះ សម្តេចមហាបវរធិបតី បានលើកឡើងថា ការសាងសង់ចំណតកំពង់ផែថ្មី ដែលចំណាយថវិការហូតដល់ទៅជិត ១ពាន់លានដុល្លារអាមេរិកនេះ គឺដើម្បីពង្រីកសមត្ថភាពដឹកជញ្ជូនទំនិញតាមផ្លូវសមុទ្រ ឱ្យកាន់តែខ្លាំងក្លាថែមទៀត ដែលឆ្លើយតមតាមកំណើនសេដ្ឋកិច្ច និងពាណិជ្ជកម្មរបស់កម្ពុជា ខណៈខេត្តព្រះសីហនុ គឺជាខេត្តនាំមុខគេនៅកំពង់ផែទឹកជ្រៅ កម្ពុជាមានកំពង់ផែខេត្តកំពត កំពង់ផែកោះកុង និងផែផ្សេងៗទៀត ដោយជំហានទី១ ចំណាយថវិកាជាង ២០០ លានដុល្លារអាមេរិក ដែលជាឥណទានរបស់ជប៉ុន។  សម្តេចមហាបវរធិបតី បានបន្ដថា នៅសល់ ២ដំណាក់កាលទៀតនូវទំហំទឹកប្រាក់ជាង ៦០០ លានដុល្លារអាមេរិក ដែលកម្ពុជាវិនិយោគធំណាស់នៅក្នុងខេត្តព្រះសីហនុ មិនត្រឹមតែជាកំពង់ផែទេ តែរៀបចំជាតំបន់ភស្តុភាកកម្ម នៃប្រព័ន្ធឡូជីស្ទីកតំបន់។ទន្ទឹមនឹងនេះ គម្រោងសាងសង់ចំណតផែកុងតឺន័រថ្មី នឹងប្រែក្លាយកំពង់ផែស្វយ័តក្រុងព្រះសីហនុ ដែលបច្ចុប្បន្នជាកំពង់ផែអន្តរជាតិខ្នាតតូច ឱ្យទៅជាកំពង់ផែអន្តរជាតិខ្នាតធំដែលអនុញ្ញាតឱ្យនាវាកុងតឺន័រធុនធំមានផ្លូវដឹកជញ្ជូន ពីគ្រប់តំបន់នៅក្នុងពិភពលោកអាចចូលចតបាន ដោយពុំមានឧបសគ្គលើជម្រៅទឹកទៀតឡើយ។ គម្រោងទាំងនេះនឹងផ្តល់ផលចំណេញសេដ្ឋកិច្ចប្រមាណ ២៣% និងផលប្រយោជន៍ហិរញ្ញវត្ថុប្រមាណ ៧% ផងដែរ។ សូមបញ្ជាក់ថា គម្រោងកំពង់ផែសាងសង់ទាំង ៣ជំហាន នឹងប្រើប្រាស់ថវិកាសរុបប្រមាណ ៩៧៣ លានដុល្លារអាមេរិក ក្នុងនោះ ឥណទានសម្បទានពីរដ្ឋាភិបាលនៃប្រទេសជប៉ុនចំនួនប្រមាណ ៧៦០ លានដុល្លារអាមេរិក ថវិកាបដិភាគរបស់រាជរដ្ឋាភិបាលកម្ពុជា សម្រាប់ពន្ធអាករផ្សេងៗមានចំនួនប្រមាណ ១៩២ លានដុល្លារអាមេរិក និងថវិកាផ្ទាល់របស់កំពង់ផែស្វយ័តក្រុងព្រះសីហនុមានចំនួនប្រមាណ ២១ លានដុល្លារអាមេរិក៕    អត្ថបទ៖ ថុន សុេកតុមាលា រូបភាព៖ ក្រុមការងារនាយករដ្ឋមន្ត្រី  

 និយ័តករមូលបត្រកម្ពុជា និង UN Women សហការជាមួយផ្សារមូលបត្រកម្ពុជា និងធនាគារ អេស៊ីលីដា ភីអិលស៊ី បានរៀបចំព្រឹត្តិការណ៍បន្លឺសំឡេងកណ្តឹងដើម្បីសមភាពយេនឌ័រ ជាលើកដំបូងនៅក្នុងប្រទេសកម្ពុជា។ នារសៀលថ្ងៃទី ២៥ ខែមីនា ឆ្នាំ ២០២៥ UN Women សហការជាមួយ និយ័តករមូលបត្រកម្ពុជា ផ្សារមូលបត្រកម្ពុជា និងធនាគារ អេស៊ីលីដា បានរៀបចំកម្មវិធី បន្លឺសំឡេងកណ្តឹង ដើម្បីសមភាពយេនឌ័រ សម្រាប់ស្ត្រី និងយុវតីទាំងអស់ ដោយព្រឹត្តិការណ៍នេះ គឺជាផ្នែកមួយនៃគំនិតផ្តួចផ្តើមពិភពលោកដោយផ្សារហ៊ុនអន្តរជាតិ ដើម្បីអបអរសាទរទិវាអន្តរជាតិនារី និងជំរុញសកម្មភាពឆ្ពោះទៅរក សមភាពយេនឌ័រ។ លោកជំទាវ កែវ ចរិយា រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមការងារយេនឌ័រនៃក្រសួងសេដ្ឋកិច្ច បានគូសបញ្ជាក់ថា កម្មវិធីបន្លឺសំឡេងកណ្តឹង ដើម្បីសមភាពយេនឌ័រ ប្រព្រឹត្តទៅលើកដំបូងនៅកម្ពុជា គឺជាគំនិតផ្តូចផ្តើមសកលមួយ ដែលមានគោលបំណងលើកកម្ពស់ការយល់អំពី សារៈសំខាន់ និងតួនាទីស្នូល នៃសមភាពយេនឌ័រ ក្នុងការសម្រេចឱ្យបាននូវ កំណើនសេដ្ឋកិច្ចមួយ ប្រកបដោយនិរន្តរភាព និងបរិយាបន្ន។នាឱកាសនោះ ឯកឧត្តម ស៊ូ សុជាតិ អគ្គនាយកនៃនិយ័តករមូលបត្រកម្ពុជា បានមានប្រសាសន៍ថា សម្រាប់វិស័យមូលបត្រ អ្នកបើកគណនីជួញដូរប្រមាណ ៣៨% គឺជាស្រ្តី ហើយនិយ័តករមូលបត្រកម្ពុជា នឹងរៀបចំដាក់ចេញនូវ វិធានការផ្សេងៗ ដើម្បីចូលរួមចំណែកលើកកម្ពស់ដល់ សមភាពយេនឌ័រ បន្ថែមទៀត។ លោកស្រី ម៉ារ អមរា ប្រធាននាយកប្រតិបត្តិស្តីទី ធនាគារ អេស៊ីលីដា ភីអិលស៊ី បានមានប្រសាសន៍ថា  ក្នុងនាមជាធនាគារពាណិជ្ជនាំមុខក្នុងវិស័យធនាគារ ធនាគារ អេស៊ីលីដា ចូលរួមក្នុងការប្រកួតប្រជែងលក្ខណៈចម្រុះ និងបរិយាបន្ន ដោយធានាថា សំឡេងរបស់ស្ត្រីត្រូវបានឮ និងឱ្យតម្លៃដល់កម្មករនិយោជិតគ្រប់ជាន់ថ្នាក់ ហើយនឹងបន្តលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី និងយុវតីគ្រប់រូប និងធានានូវផលប្រយោជន៍សម្រាប់សង្គម និងសេដ្ឋកិច្ចឱ្យបានកាន់តែទូលំទូលាយ។ សូមបញ្ជាក់ថា នៅដំណាច់ខែកុម្ភៈ ឆ្នាំ២០២៥ ធនាគារអេស៊ីលីដា មានចំនួនបុគ្គលិកសរុបទាំងអស់ចំនួនជិត ១ម៉ឺន ២ពាន់នាក់ ដោយស្រ្តីមានចំណែកស្មើនឹង ៣៩% (ក្នុងនោះមានស្ត្រី ៤ រូប និងបុរស ៤រូប ជាគណៈគ្រប់គ្រងជាន់ខ្ពស់) ព្រមទាំងមានចំនួនបុគ្គលិក ដែលជាស្ថិតក្នុងលំដាប់គណៈគ្រប់គ្រងសរុបទាំងអស់ចំនួនជាង ២ពាន់នាក់ ក្នុងនោះស្រ្តីមានចំនួនជិត ៧០០នាក់ ស្មើនឹង ៣២%។ បន្ថែមពីនេះ ធនាគារ អេស៊ីលីដា មានភាគហ៊ុនិកសាធារណៈសរុបចំនួនជិត ២ម៉ឺននាក់ ក្នុងនោះមានស្រ្តី ៨ពាន់នាក់ ស្មើនឹង ៤០%៕   អត្ថបទ៖ ងួន សុភ័ត្រ្តា រូបភាព៖ អ៊ិន អាត 

 ក្នុងរយៈពេល ២ខែ ដើមឆ្នាំ ២០២៥នេះ កម្ពុជា ទាក់ទាញរំហូរទុនវិនិយោគប្រមាណ ១ពាន់លានដុល្លារអាមេរិក ដោយចិន កាន់កាប់ចំណែកវិនិយោគប្រមាណ ៨០% នៃទុនវិនិយោគសរុប។  ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានគូសរំលេចថា ស្ថានភាពវិនិយោគនៅកម្ពុជា ដែលមានកំណើនពីមួយឆ្នាំទៅមួយឆ្នាំ ជាពិសេសប្រភពទុនវិនិយោគមកពី ប្រទេសចិន បានឈរនៅលំដាប់លេខរៀងទី១ ឬទី២ ជាបន្តបន្ទាប់ក្នុងរយៈពេលជាង១ទសវត្សរ៍ចុងក្រោយ។ ជាក់ស្តែង ក្នុងរយៈពេល ២ខែ ដើមឆ្នាំ ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ១១២ ក្នុងទុនវិនិយោគប្រមាណជាង ១ពាន់លានដុល្លារអាម៉េរិក ហើយការវិនិយោគមកពីប្រទេសចិនបានរួមចំណែកដល់ទៅប្រមាណជិត ៨០% នៃទុនវិនិយោគសរុប។ ឯកឧត្តម ជា វុទ្ធី ក៏បានលើកឡើងពី ចំណងមិត្តភាពដ៏ជិតស្និទ្ធ និងយូរអង្វែងរវាងកម្ពុជា និងចិន ដោយរដ្ឋាភិបាលចិន តែងតែជួយឧបត្ថម្ភគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា ជាពិសេស ឯកឧត្តមអគ្គលេខាធិការ បានថ្លែងអំណរគុណដល់ ខេត្តជាំងស៊ូ ដែលតែងតែជំរុញវិនិយោគិននៅក្នុងខេត្ត មកបណ្តាក់ទុនវិនិយោគនៅកម្ពុជា។ ពិតណាស់ តំបន់សេដ្ឋកិច្ចពិសេសក្រុងព្រះសីហនុ គឺជាសក្ខីភាពមួយ ដែលបច្ចុប្បន្នមានក្រុមហ៊ុនវិនិយោគរហូតដល់ទៅប្រមាណជិត ២០០ ហើយក៏មានការបណ្តាក់ទុនវិនិយោគបង្កើតតំបន់សេដ្ឋកិច្ចពិសេសមួយទៀត ស្ថិតនៅក្នុងភូមិសាស្ត្រខេត្តកំពង់ចាម ដែលជាប្រភពទុនវិនិយោគមកពី ខេត្តជាំងស៊ូ ផងដែរ។គួររម្លឹកថា ក្នុងឆ្នាំ ២០២៤កន្លងទៅនេះ ក្រុមប្រឹក្សាអភិវឌ្ឍន៍កម្ពុជា បានទាក់ទាញគម្រោងវិនិយោគសរុបប្រមាណ ៤១៤គម្រោង គិតជាទឹកប្រាក់ជាង ៦,៩ពាន់លានដុល្លារអាមេរិក ដោយវិស័យឧស្សាហកម្ម ជាវិស័យលេចធ្លោជាងគេក្នុងការស្រូបទាញវិនិយោគក្នុងឆ្នាំ ២០២៤៕   អត្ថបទ៖ ងួន សុភ័ត្រ្តា រូបភាព៖ ឯកសារ 

 កម្ពុជា លើកទឹកចិត្តដល់សាជីវកម្មហិរញ្ញវត្ថុអន្តរជាតិ (IFC) សម្លឹងមើលឱកាសពង្រីកការវិនិយោគរបស់ខ្លួន ទៅលើវិស័យសក្តានុពលផ្សេងទៀតរបស់កម្ពុជា ដែលជាការចូលរួមចំណែកអភិវឌ្ឍសេដ្ឋកិច្ចកម្ពុជា។  ក្នុងឱកាសទទួលជួបពិភាក្សាការងារជាមួយ លោកស្រី Towfiqua Hoque ប្រធានស្ថានតំណាងសាជីវកម្មហិរញ្ញវត្ថុអន្តរជាតិ (IFC) ប្រចាំកម្ពុជា នៅទីស្តីការគណៈរដ្ឋមន្ត្រី នៅថ្ងៃទី២៤ ខែមីនា ឆ្នាំ២០២៥ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានស្នើ និងជំរុញសាជីវកម្មហិរញ្ញវត្ថុអន្តរជាតិ (IFC) សិក្សាពង្រីកប្រតិបត្តិការនៅកម្ពុជា ទាំងទំហំនិងវិសាលភាពនៃការវិនិយោគលើវិស័យផ្សេងទៀត ក្រៅពីវិស័យធនាគារ និងហិរញ្ញវត្ថុ។ ក្នុងឱកាសនោះ ឧបនាយករដ្ឋមន្ត្រីប្រចាំការ បានចែករំលែកជាសង្ខេបអំពីសាវតា និងដំណើរការវិវត្តនៃវិស័យធនាគារ និងមីក្រូហិរញ្ញវត្ថុនៅកម្ពុជា និងបានសម្តែងនូវការកោតសរសើរចំពោះកិច្ចខិតខំប្រឹងប្រែងរបស់ IFC នៅកម្ពុជាក្នុងការចូលរួមចំណែកអភិវឌ្ឍសេដ្ឋកិច្ច ជាពិសេសក្នុងការវិនិយោគ។  ជាមួយគ្នានេះ ឧបនាយករដ្ឋមន្ត្រីប្រចាំការ បានលើកឡើង ពីភាពមិនប្រាកដប្រជានៃស្ថានភាពភូមិសាស្ត្រនយោបាយនៅលើសាកលលោក ជាពិសេសការធ្វើពាណិជ្ជកម្មដែលជាកត្តាចាំបាច់ នៃការបន្តពង្រឹងភាពជាដៃគូ និងកិច្ចសហប្រតិបត្តិការរវាង IFC និងការអភិវឌ្ឍរបស់ប្រទេសកម្ពុជា បញ្ហាប្រឈម និងកាលានុវត្តភាពនានា។ ជាការឆ្លើយតប លោកស្រី Towfiqua Hoque បានទទួលយកសំណើ និងសន្យានាំសំណើរាយការណ៍ជូនថ្នាក់ដឹកនាំ IFC ដើម្បីពិនិត្យលទ្ធភាពពង្រីកប្រតិបត្តិការបន្ថែមទៀតនៅកម្ពុជា ដោយផ្ដោតលើវិស័យពាណិជ្ជកម្ម វិនិយោគ ហិរញ្ញវត្ថុ កសិកម្ម កសិ-ពាណិជ្ជកម្ម ឧស្សាហកម្ម ថាមពល ហេដ្ឋារចនាសម្ព័ន្ធ ឡូជីស្ទីក និងការដឹកជញ្ជូន ខណៈភាគីទាំងពីរក៏បានពិភាក្សា អំពីស្ថានភាពនៃវិស័យឥណទាន និងការធានាស្ថិរភាពហិរញ្ញវត្ថុ ដោយរួមទាំងយន្តការបង្ការវិបត្តិផងដែរ។ ជាចុងក្រោយ ឯកឧត្តមឧបនាយករដ្ឋមន្ត្រីប្រចាំការ បានវាយតម្លៃខ្ពស់ចំពោះតួនាទី និងការរួមចំណែករបស់ IFC ក្នុងការទ្រទ្រង់ដល់កិច្ចអភិវឌ្ឍវិស័យឯកជននៅកម្ពុជា ដែលដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ច និងការអភិវឌ្ឍសេដ្ឋកិច្ចប្រកបដោយភាពធន់ និងចីរភាព៕   អត្ថបទ៖ ថុន សុកេតុមាលា រូបភាព៖ ឯកសារ 

 ក្រុមហ៊ុន Hyundai Motor Group របស់កូរ៉េខាងត្បូង នឹងបង្កើនការវិនិយោគប្រមាណ ២១ពាន់លានដុល្លារអាម៉េរិក នៅសហរដ្ឋអាមេរិក ដោយរួមមានការបង្កើតរោងចក្រផលិតដែក និងបន្ថែមការវិនិយោគលើរោងចក្រផលិតរថយន្តដែលមានស្រាប់។  ការវិនិយោគរបស់ក្រុមហ៊ុន Hyundai រួមមានរោងចក្រផលិតដែក Hyundai Steel ថ្មីតម្លៃ ៥ពាន់ ៨រយលានដុល្លារអាម៉េរិក នៅរដ្ឋ Louisiana ដែលនឹងផលិតដែកថែបបានជាង ២លាន ៧សែនតោនក្នុងមួយឆ្នាំ បង្កើតការងារជាង ១៤០០កន្លែង។រោងចក្រដែកថែបនេះ ត្រូវបានគេរំពឹងថា នឹងផ្គត់ផ្គង់ដែក ដល់រោងចក្រផលិតរថយន្ត នៅរដ្ឋអាឡាបាម៉ា និងហ្សកហ្ស៊ី។ ក្នុងចំណោមទឹកប្រាក់វិនិយោគសរុប ក្រុមហ៊ុន Hyundai ក៏មានគម្រោងវិនិយោគ ៩ពាន់លានដុល្លារនៅឆ្នាំ ២០២៨ ដើម្បីបង្កើនសមត្ថភាពផលិតកម្មរថយន្ត របស់សហរដ្ឋអាមេរិកដល់ ១លាន ២សែនគ្រឿងនៅក្នុងសហរដ្ឋអាមេរិក និងវិនិយោគ ៦ពាន់លានដុល្លារ ដើម្បីពង្រីកភាពជាដៃគូយុទ្ធសាស្ត្រជាមួយក្រុមហ៊ុនអាមេរិក ក្នុងការបើកបរដោយស្វ័យប្រវត្តិ វិនិយោគលើមនុស្សយន្ត បញ្ញាសិប្បនិម្មិត និងយាន្តហោះហើរតាមអាកាសកម្រិតខ្ពស់។ លោក ដូណាល់ ត្រាំ ប្រធានាធិបតីអាមេរិក បានបញ្ជាក់ថា ការវិនិយោគនេះ គឺជាការបង្ហាញយ៉ាងច្បាស់ថា គំនាបពន្ធគយ គឺដំណើរការយ៉ាងខ្លាំង ដោយបន្ថែមថាពន្ធបន្ថែមលើរថយន្ត ទំនងជាត្រូវបានប្រកាសនៅសប្តាហ៍នេះ។សូមជម្រាបថា ក្រុមហ៊ុនផលិតរថយន្តជាច្រើន បាននិងកំពុងបញ្ចុះបញ្ចូលយ៉ាងខ្លាំងដល់សេតវិមានអាមេរិក មិនឱ្យដាក់ពន្ធថ្មីដ៏ធំលើរថយន្ត និងគ្រឿងបន្លាស់ដែលនាំចូល៕  អត្ថបទ៖ ងួន សុភ័ត្រ្តា រូបភាព៖ ឯកសារ 

 រដ្ឋមន្ត្រីក្រសួងពាណិជ្ជកម្មរបស់ប្រទេសចិន បានប្រាប់ដល់ នាយកប្រតិបត្តិក្រុមហ៊ុន Apple ថាចិន ស្វាគមន៍ក្រុមហ៊ុន Apple ជានិច្ច ក្នុងការពង្រីកការវិនិយោគនៅក្នុងប្រទេសចិន។ នេះបើយោងតាមការចេញផ្សាយដោយ សារព័ត៌មានអន្តរជាតិធំៗ នៅថ្ងៃនេះ។ លោក Wang Wentao រដ្ឋមន្ត្រីពាណិជ្ជកម្មរបស់ប្រទេសចិន បានប្រកាសស្វាគមន៍ក្រុមហ៊ុន Apple ក្នុងការពង្រីកការវិនិយោគនៅក្នុងប្រទេសចិន។ ជាក់ស្តែង រដ្ឋមន្ត្រីក្រសួងពាណិជ្ជកម្មចិន និងលោក Tim Cook នាយកប្រតិបត្តិក្រុមហ៊ុន Apple បានផ្លាស់ប្តូរទស្សនៈលើប្រធានបទដូចជា ការអភិវឌ្ឍន៍អាជីវកម្មរបស់ក្រុមហ៊ុន Apple នៅក្នុងប្រទេសចិន និងទំនាក់ទំនងប្រទេសចិន-សហរដ្ឋអាមេរិកជាដើម។លើសពីនេះ រដ្ឋមន្ត្រីក្រសួងពាណិជ្ជកម្មចិន ក៏បានបើកកិច្ចប្រជុំដាច់ដោយឡែក ជាមួយនាយកប្រតិបត្តិនៃក្រុមហ៊ុនអន្តរជាតិធំៗចំនួន ៣ នៅទីក្រុងប៉េកាំង ដើម្បីពិភាក្សាអំពីកិច្ចសហប្រតិបត្តិការអាជីវកម្មនៅក្នុងឧស្សាហកម្មសំខាន់ៗ។ លោក Wang បានជួបជាមួយនាយកប្រតិបត្តិជាន់ខ្ពស់របស់ក្រុមហ៊ុនផ្នែកឱសថ Eli Lilly, ក្រុមហ៊ុនគ្រឿងអេឡិចត្រូនិក Broadcom និងក្រុមហ៊ុនរថយន្ត Mercedes-Benz របស់អាល្លឺម៉ង់ ដែលតំណាងឱ្យវិស័យយុទ្ធសាស្ត្រចំនួន ៣ ដែលប្រទេសចិនបាននិងកំពុងខិតខំប្រឹងប្រែងយ៉ាងខ្លាំងដើម្បីឈានទៅមុខ ពោលគឺ ឱសថ គ្រឿងអេឡិចត្រូនិក និងរថយន្ត។ លោក Wang បាននិយាយថា ប្រទេសចិនកំពុងពន្លឿនការអភិវឌ្ឍន៍នៃកម្លាំងផលិតភាព ប្រកបដោយគុណភាពថ្មី ជំរុញយ៉ាងសកម្មការរួមបញ្ចូលយ៉ាងស៊ីជម្រៅនៃអ៊ីនធឺណិត ទិន្នន័យធំ បញ្ញាសិប្បនិម្មិត និងសេដ្ឋកិច្ចពិតប្រាកដ ជំរុញគំនិតផ្តួចផ្តើម "AI Plus" និងជំរុញកំណើននៃឧស្សាហកម្មឆ្លាតវៃ។គួរជម្រាបថា នៅចំពោះមុខទិដ្ឋភាពអន្តរជាតិដ៏ស្មុគស្មាញ និងប្រឈមមុខ ប្រទេសចិន នៅតែប្រកាន់ខ្ជាប់នូវ ការប្តេជ្ញាចិត្តរបស់ខ្លួន ក្នុងការពង្រីកការបើកចំហររបស់ខ្លួនទៅកាន់ពិភពលោក៕  អត្ថបទ៖ ងួន សុភ័ត្រ្តា រូបភាព៖ ឯកសារ 

 អ្នកនាំពាក្យសមាគមធនាគារនៅកម្ពុជា បានចេញមកពន្យល់ជុំវិញ ស្ថានភាពបំណុលក្នុងប្រព័ន្ធធនាគារនៅកម្ពុជានេះ បន្ទាប់ពីមានការចាប់អារម្មណ៍ខ្លាំងលើ របាយការណ៍របស់ការិយាល័យព័ត៌មានឥណទាន (CBC)។ក្នុងរយៈពេលប៉ុន្មានថ្ងៃចុងក្រោយនេះ បន្ទាប់ពីការិយាល័យព័ត៌មានឥណទាន (CBC) ចេញផ្សាយរបាយការណ៍របស់ខ្លួន ជុំវិញទំហំឥណទានក្នុងគ្រឹះស្ថានធនាគារ និងហិរញ្ញវត្ថុមានជិត ៦០ពាន់លានដុល្លារ បង្កើតឱ្យមានការចាប់អារម្មណ៍ ដែលមតិខ្លះថាទំហំឥណទាននេះ ឡើងហួសទំហំសេដ្ឋកិច្ចកម្ពុជា ដែលអាចបង្កើតនូវ ហានិភ័យជាយថាហេតុ។ លោក សុខ ចាន់ អ្នកនាំពាក្យសមាគមធនាគារនៅកម្ពុជា បានពន្យល់ថា ជាការពិតណាស់ ដូចទិន្នន័យដែលបានលើកឡើងទំហំឥណទាន ឬកម្ចីពីគ្រឹះស្ថានធនាគារនិងហិរញ្ញវត្ថុ ដែលទទួលអាជ្ញាបណ្ណពីធនាគារជាតិនៃកម្ពុជា មានប្រមាណជិត ៦០ពាន់លានដុល្លារ គិតត្រឹមដំណាច់ឆ្នាំ២០២៤កន្លងទៅនេះ។ បើតាមទិន្នន័យពីធនាគារជាតិនៃកម្ពុជា យើងកត់សម្គាល់ឃើញថា ឥណទានក្នុងវិស័យធនាគារ និងហិរញ្ញវត្ថុ កើនឡើងក្នុងល្បឿនយឺតប្រមាណជា ៣%ប៉ុណ្ណោះ ធៀបនឹងឆ្នាំ ២០២៣ កំណើនមានប្រមាណ ៥% ក្នុងនោះអតិថិជនប្រើប្រាស់សេវាឥណទាននេះ មានប្រមាណជាង ៤លានគណនី ឬប្រមាណជា ៥លាននាក់។ លោកបន្តថា ការថមថយនេះ គឺដោយសារកត្តាតម្រូវការ និងផ្គត់ផ្គង់។ ចំពោះកត្តាតម្រូវការ គឺដោយសារការងើបឡើងយឺតនៃ វិស័យមួយចំនួនដូចជា វិស័យសំណង់និងអចលនទ្រព្យ ទេសចរណ៍ និងលក់ដុំនិងរាយ ដែលនាំឱ្យអតិថិជនកាត់បន្ថយការខ្ចី ហើយចំពោះកត្តាផ្គត់ផ្គង់ គឺដោយសារគ្រឹះស្ថានធនាគារ និងហិរញ្ញវត្ថុ បង្កើនការប្រុងប្រយ័ត្នក្នុងការផ្តល់ឥណទាន ក្នុងស្ថានភាពដែលសេដ្ឋកិច្ចតំបន់ និងពិភពលោកមានភាពមិនប្រាកដប្រជាខ្ពស់។ យ៉ាងណាមិញ បើយើងក្រឡេកមើលមួយជ្រុងទៀត ប្រាក់បញ្ញើបានបន្តកើនឡើងល្អ ដោយមានអត្រាកំណើន ១៦% ជាមួយនឹងស្ថានភាពរឹងមាំនៃដើមទុន និងលទ្ធភាពបញ្ចេញសាច់ប្រាក់មានកម្រិតខ្ពស់ ដែលបង្ហាញថា ប្រព័ន្ធធនាគារមានភាពធន់ ជាមួយនឹងជំនឿទុកចិត្តរឹងមាំ។ក្នុងគិតត្រឹមដំណាច់ឆ្នាំ២០២៤ បញ្ញើអតិថិជនក្នុងប្រព័ន្ធធនាគារ មានរហូតដល់ ៥៧ពាន់លានដុល្លារ ។ ជាចុងក្រោយ សមាគមធនាគារនៅកម្ពុជា ក៏បានបញ្ជាក់ដែរថា បំណុល ឬឥណទាន មិនមែនសុទ្ធតែអាក្រក់នោះទេ ហើយឥណទាននៅកម្ពុជាត្រូវបានបញ្ចេញជូនអតិថិជនក្នុងវិស័យផ្សេងៗគ្នា (ពិពិធកម្ម) ដូចជា ការជួញដូររាយ ទិញផ្ទះជាកម្មសិទ្ធិផ្ទាល់ខ្លួន ការជួញដូរអចលនទ្រព ការខ្ចីជាបុគ្គល សំណង់ កសិកកម្មរុក្ខាប្រមាញ់និងនេសាទ ការជូញដូរដុំ កម្មន្តសាល សណ្ឋាគារនិងភោជនីយដ្ឋាន និងផ្សេងៗ៕ អត្ថបទ៖ ងួន សុភ័ត្រ្តា រូបភាព៖ ឯកសារ  

 ក្រុមប្រឹក្សាជាតិគាំពារសង្គម ប្រកាសដាក់ឱ្យប្រើប្រាស់ផែនការប្រតិបត្តិ ស្តីពីយន្តការជំរុញការចុះបញ្ជីក្នុងប្រព័ន្ធសន្តិសុខសង្គម ដើម្បីគាំទ្រការអភិវឌ្ឍសេដ្ឋកិច្ចក្រៅប្រព័ន្ធ។   ក្នុងពិធីប្រកាសដាក់ឱ្យប្រើប្រាស់ជាផ្លូវការ ផែនការប្រតិបត្តិស្តីពីយន្តការជំរុញការចុះបញ្ជី ក្នុងប្រព័ន្ធសន្តិសុខសង្គម ឆ្នាំ២០២៤-២០២៦ នៅថ្ងៃទី២៤ ខែមីនា ឆ្នាំ២០២៥ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានគណៈកម្មាធិការសម្របសម្រួល ការអភិវឌ្ឍសេដ្ឋកិច្ចក្រៅប្រព័ន្ធ បានមានប្រសាសន៍ថា ការអភិវឌ្ឍសេដ្ឋកិច្ចក្រៅប្រព័ន្ធ និងប្រព័ន្ធគាំពារសង្គម គឺជាមូលដ្ឋាន គ្រឹះដ៏រឹងមាំដែលមានភាពប្រទាក់ក្រឡា និងបំពេញគ្នាទៅវិញទៅមកក្នុងការចូលរួមលើកកម្ពស់សេដ្ឋកិច្ចជាតិ និងសុខុមាលភាពពលរដ្ឋគ្រប់រូប។ ក្នុងឱកាសនោះ ឯកឧត្តម ហែម វណ្ណឌី បានបន្ថែមថាការចុះបញ្ជីក្នុងប្រព័ន្ធសន្ដិសុខសង្គម គឺជាយន្តការដ៏សំខាន់ ក្នុងការគាំទ្រដល់ការអនុវត្តយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ ជាពិសេសការគិតគូរអំពីលទ្ធភាព របស់អ្នកសេដ្ឋកិច្ចក្រៅប្រព័ន្ធដែលបានចុះឈ្មោះ លើថ្នាលឌីជីថល ក្នុងការចុះបញ្ជី និងបង់ភាគទានឱ្យបេឡាជាតិសន្ដិសុខសង្គម។ បន្ថែមពីលើនេះ រាជរដ្ឋាភិបាលកម្ពុជា បានបង្កើនការយកចិត្តទុកដាក់លើការអភិវឌ្ឍសេដ្ឋកិច្ចក្រៅប្រព័ន្ធ ដើម្បីពង្រឹងសមត្ថភាព ភាពធន់ និងការប្រកួតប្រជែងលើទីផ្សារ ជាពិសេសចំពោះសុខុមាលភាព ភាពធន់នឹងវិបត្តិ និងយន្តការគាំទ្រដល់បងប្អូនអ្នកសេដ្ឋកិច្ចក្រៅប្រព័ន្ធ។ ទន្ទឹមនឹងនេះ ផែនការប្រតិបត្តិស្តីពី យន្តការជំរុញការចុះបញ្ជីក្នុងប្រព័ន្ធសន្តិសុខសង្គមនេះ ត្រូវបានរំពឹងថា នឹងក្លាយជាកាតាលីករចូលរួមចំណែកយ៉ាងសំខាន់ ក្នុងការជំរុញកម្មករ-និយោជិត និងអ្នកសេដ្ឋកិច្ចក្រៅប្រព័ន្ធ ឱ្យចុះបញ្ជីក្នុងប្រព័ន្ធសន្ដិសុខសង្គមឱ្យបានជាអតិបរមា ដើម្បីទទួលបានអត្ថប្រយោជន៍ពីរបបសន្ដិសុខសង្គម ជាពិសេសរបបថែទាំ សុខភាព ស្របតាមស្មារតី មិនបោះបង់ពលរដ្ឋណាម្នាក់ឡើយ។  សូមជម្រាបថា គិតត្រឹមថ្ងៃទី២២ ខែមីនា ឆ្នាំ២០២៥នេះ ថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ ទទួលបានសំណើចំនួន ៣ម៉ឺន ៦ពាន់ ក្នុងនោះ សំណើចុះឈ្មោះជាកម្មករ-និយោជិតមានចំនួនជិត ២ពាន់ សហគ្រាសធុនមីក្រូចំនួន ១ពាន់ ២រយ និងបុគ្គលស្វ័យនិយោជន៍មានចំនួន ៣ម៉ឺន ៣ពាន់ សំណើ៕  អត្ថបទ៖ ថុន សុកេតុមាលា រូបភាព៖ ឯកសារ  

 ប្រទេសថៃ បានសម្រេចការនាំចេញប្រមាណ ២៦ពាន់លានដុល្លារអាម៉េរិក ក្នុងខែកុម្ភៈ ឆ្នាំ ២០២៥នេះ កើនឡើង ១៤% រុញច្រានដោយតម្រូវការពីដៃគូពាណិជ្ជកម្ម និងការកើនឡើងវិញនៃ សកម្មភាពឧស្សាហកម្ម។ នេះបើយោងតាម សារព័ត៌មានក្នុងស្រុកថៃ ចេញផ្សាយនៅថ្ងៃនេះ។  ក្រសួងពាណិជ្ជកម្ម បញ្ជាក់ថា ការនាំចេញរបស់ថៃ បានកើនឡើងជាបន្តបន្ទាប់ក្នុងរយៈពេល ៨ខែចុងក្រោយ ខណៈការនាំចេញឈានដល់ ២៦ពាន់លានដុល្លារ ក្នុងខែកុម្ភៈ ធៀបនឹងពេលដូចគ្នា កាលពីឆ្នាំមុន។អំឡុងពេលនេះ ការនាំចូលក៏កើនឡើង ៤% ដល់ ២៤ពាន់លានដុល្លារ ដែលបណ្តាលឱ្យមានអតិរេកពាណិជ្ជកម្មចំនួន ២ពាន់លានដុល្លារ។ ការនាំចេញ បានកើនឡើង ១៤% ក្នុងរយៈពេល ២ខែដំបូងនៃឆ្នាំនេះ ហើយទស្សនវិស័យសម្រាប់ខែមីនា នៅតែមានភាពវិជ្ជមាន ដែលជំរុញដោយការបង្កើនការវិនិយោគ និងការនាំចូលវត្ថុធាតុដើមសម្រាប់ផលិតកម្មនាំចេញ។ អគ្គនាយកនៃការិយាល័យគោលនយោបាយ និងយុទ្ធសាស្ត្រពាណិជ្ជកម្ម បាននិយាយថា កំណើនការនាំចេញក្នុងខែកុម្ភៈ ត្រូវបានជំរុញដោយវិស័យកសិកម្ម និងកសិឧស្សាហកម្ម ដែលបានកើនឡើង ៤% ធៀបនឹងពេលដូចគ្នា កាលពីឆ្នាំមុន។ ទន្ទឹមនឹងនេះដែរ ការនាំចេញឧស្សាហកម្មបានកើនឡើង ១៧% ក្នុងខែកុម្ភៈ ដោយរួមមានរថយន្ត និងគ្រឿងបន្លាស់រថយន្ត កុំព្យូទ័រ ត្បូងនិងគ្រឿងអលង្ការ (មិនរាប់បញ្ចូលមាស) ផលិតផលកៅស៊ូជាដើម។ គួរជម្រាបថា ក្រសួងពាណិជ្ជកម្មថៃ បានព្យាករកំណើននៃការនាំចេញ យ៉ាងហោចណាស់ ១០% នៅក្នុងត្រីមាសទី ១ ឆ្នាំ ២០២៥នេះ ដែលត្រូវបានជំរុញដោយ ផលិតកម្មដ៏រឹងមាំ ការកើនឡើងនៃតម្រូវការអេឡិចត្រូនិក និងការបន្ធូរបន្ថយភាពតានតឹងភូមិសាស្ត្រនយោបាយ៕    អត្ថបទ៖ ងួន សុភ័ត្រ្តា រូបភាព៖ ឯកសារ  

 វៀតណាម បាននាំចេញបន្លែ និងផ្លែឈើ ក្នុងទំហំទឹកប្រាក់សរុបប្រមាណ ៣០៦លានដុល្លារ ទៅកាន់ប្រទេសចិន ក្នុងរយៈពេល ២ខែដើមឆ្នាំ ២០២៥នេះ ដែលធ្លាក់ចុះដល់ទៅ ៣៩% ដោយសារប្រទេសចិន បានរឹតបន្តឹង លក្ខខណ្ឌសុវត្ថិភាព។ នេះបើយោងតាមការចេញផ្សាយដោយ សារព័ត៌មានក្នុងស្រុកវៀតណាម នៅថ្ងៃនេះ។  សមាគមផ្លែឈើ និងបន្លែវៀតណាម បានលើកឡើងថា នាឥឡូវនេះ ចិន ទាមទារឱ្យមានការធ្វើតេស្តរកសារធាតុគីមីដែលអាចបង្កមហារីក ដែលបណ្តាលឱ្យការដឹកជញ្ជូនទុរេនជាច្រើន ជាប់គាំងនៅត្រឹមគយចិន។ យ៉ាងណាមិញ ការនាំចេញទៅកាន់សហរដ្ឋអាមេរិក បានកើនឡើង ៦៦% ដល់ ៦៥លានដុល្លារ និងនាំចេញទៅកាន់ជប៉ុន កើន ២៣% ដល់ ៣៣លានដុល្លារ។ទន្ទឹមគ្នានេះ វៀតណាម បាននាំចេញបន្លែ និងផ្លែឈើ ក្នុងទំហំទឹកប្រាក់សរុបប្រមាណ ៦៨៧លានដុល្លារ ក្នុងរយៈពេល ២ខែ ធ្លាក់ចុះ ១៥% ដោយសារការនាំចេញទុរេន ដែលជាផលិតផលសំខាន់ ធ្លាក់ចុះខ្លាំង នាពេលនេះ។ ដើម្បីស្តារការនាំចេញ ក្រសួងកសិកម្ម និងបរិស្ថានវៀតណាម កំពុងរឹតបន្តឹងការត្រួតពិនិត្យគុណភាព ដើម្បីធានាបាននូវ ការអនុលោមតាមតម្រូវការនាំចូលក្នុងទីផ្សារមួយចំនួន។អាជ្ញាធរពាក់ព័ន្ធ កំពុងត្រួតពិនិត្យយ៉ាងតឹងរ៉ឹង ចេញការព្រមាន និងបង្ក្រាបបទល្មើសនានា ដើម្បីការពារកេរ្តិ៍ឈ្មោះផលិតផលកសិកម្មវៀតណាម។សូមជម្រាបថា ការនាំចេញផ្លែឈើ និងបន្លែរបស់វៀតណាម បានកើនឡើងដល់កំណត់ត្រា ៧ពាន់លានដុល្លារក្នុងឆ្នាំ ២០២៤ កើនឡើង ២៧% ធៀបនឹងឆ្នាំមុន៕   អត្ថបទ៖ ងួន សុភ័ត្រ្តា រូបភាព៖ ឯកសារ 

 មុខរបរចិញ្ចឹមឃ្មុំក្នុងប្រអប់ ឬកេះ តាមបែបធម្មជាតិកំពុងតែពេញនិយម ក្នុងនោះ ដើម្បីអាចរក្សាបាននូវតម្លៃ ក៏ដូចជាទំហំទីផ្សារ បណ្តាអ្នកចិញ្ចឹមឃ្មុំភាគច្រើនបាននាំគ្នាចងក្រង បង្កើតជាសហគមន៍ចិញ្ចឹមឃ្មុំយកទឹកឃ្មុំលក់ ដោយអ្នកដែលមានបទពិសោធន៍ច្រើន ជួយណែនាំអ្នកដែលមានមានបទពិសោធន៍តិច ធ្វើយ៉ាងណាអាចចិញ្ចឹម និងទទួលបានទិន្នផលល្អទាំងអស់គ្នា។   ទឹកឃ្មុំជាសារធាតុរាវម្យ៉ាង ដែលមានរសជាតិផ្អែមឈ្ងុយប្រជាជនខ្មែរនិយមទទួលទានជាមួយទឹកក្ដៅ ឬក្រូចឆ្មារដែលអាចផ្ដល់នូវគុណប្រយោជន៍ដ៏លើសលប់ចំពោះការបំប៉នសុខភាព និងការរក្សាសម្រស់យ៉ាងមានប្រសិទ្ធភាព និងកំពុងជំរុញឲ្យមានកំណើនតម្រូវការលើទីផ្សារគួរឲ្យកត់សម្គាល់ផងដែរ។ ជាមួយគ្នានេះ អាស្រ័យដោយតម្រូវការទីផ្សារមានការកើនឡើងច្រើនបានធ្វើឲ្យទឹកធម្មជាតិ ឬទឹកឃ្មុំព្រៃមិនអាចបំពេញតាមតម្រូវការបាន ទើបគេមានជាការចិញ្ចឹមឃ្មុំនៅក្នុងកសិដ្ឋាន ដើម្បីបំពេញតម្រូវការទីផ្សារក្នុងស្រុក និងការនាំចេញ។   លោកស្រី ទិត សុធារ៉ា ស្ថាបនិកក្រុមហ៊ុនទឹកឃ្មុំវាល់ហាន់នី អហ្គេនិកប្រូដាក់ខេមបូឌា បានឲ្យក្រុមការងារ សេដ្ឋកិច្ចភីអិនអិនដឹងថា កសិដ្ឋានចិញ្ចឹមឃ្មុំ និងផលិតទឹកឃ្មុំ ដាក់ប្រអប់ ឬកេះ ឬអាចហៅម៉្យាងទៀតថា ផ្ទះឃ្មុំ មានប្រមាណ ២០០ផ្ទះ ធ្វើនៅលើទំហំដី ១៥ហិកតា (ក្នុង ១ផ្ទះឃ្មុំ មានចំនួន ២ម៉ឺនក្បាលឃ្មុំ) បើគិតជាមធ្យម ១ធុងអាចប្រមូលផលបានចន្លោះ ៤-៥ លីត្រ (ឃ្មុំដែលមានសុខភាពល្អ) ប្រសិនជាឃ្មុំមានសុខភាពខ្សោយ ការប្រមូលផលអាចបានចន្លោះ ៣លីត្រប៉ុណ្ណោះ ខណៈការចិញ្ចឹមឃ្មុំបែបនេះ កំពុងតែទទួលបានការពេញនិយម និងទទួលបានផលអាចផ្គត់ផ្គង់តម្រូវការទីផ្សារក្នុងស្រុក នឹងកំពុងត្រៀមនាំចេញទៅកាន់ទីផ្សារអន្តរជាតិផងដែរ ខណៈបច្ចុប្បន្នកម្ពុជានាំចេញទឹកឃ្មុំទៅកាន់ទីផ្សារប្រទេសចិន និងកូរ៉េ។ តទៅនេះ សូមស្តាប់ការលើកឡើងពី លោកស្រី ទិត សុធារ៉ា ស្ថាបនិកក្រុមហ៊ុនទឹកឃ្មុំវាល់ហាន់នី អំពីការចិញ្ចឹមឃ្មុំ តម្លៃទីផ្សារ ថែមទាំងបានជួយដល់ប្រជាជនខ្មែរប្រមាណ ២០០គ្រួសារ ឲ្យទទួលបានការបង្រៀនបន្ថែម ពីការថែទាំឃ្មុំឲ្យទទួលបានទិន្នផលខ្ពស់ ពិសេសការផ្ដល់ជម្រើសមុខរបរថ្មី បង្កើតឱកាសការងារ និងប្រាក់ចំណូលបន្ថែម ដើម្បីលើកកម្ពស់ជីវភាព ប្រជាពលរដ្ឋ នៅតាមសហគមន៍មូលដ្ឋាន កាន់តែប្រសើរ។ សូមបញ្ជាក់ថា ការចិញ្ចឹមឃ្មុំ ខុសពីការចិញ្ចឹមសត្វផ្សេងៗ គឺខុសទាំងការរៀបចំកន្លែងឱ្យវារស់នៅ ការជ្រើសទីតាំងចិញ្ចឹម ហើយសត្វប្រភេទនេះក៏មិនសូវត្រូវការចំណីណាក្រៅតែពីលម្អងផ្កា ផ្កាឈើព្រៃ ឬផ្កាដំណាំធម្មជាតិនោះឡើយ ហើយខេត្តដែលមានការចិញ្ចឹមឃ្មុំ ភាគច្រើនមាននៅខេត្តសៀមរាប កំពង់ចាម ខេត្តត្បូងឃ្មុំ ប៉ៃលិន និងខេត្តបាត់ដំបង ជាដើម ដែលជាតំបន់សំបូរចម្ការផ្លែឈើ៕    អត្ថបទ៖ ថុន សុកេតុមាលា រូបភាព៖ អ៊ិន អាត 

  រដ្ឋមន្រ្តីក្រសួងទេសចរណ៍ ចាត់ទុកព្រលានយន្តហោះអន្តរជាតិតេជោថ្មី គឺជាតម្លៃបន្ថែមថ្មីសម្រាប់វិស័យទេសចរណ៍ និងសេដ្ឋកិច្ចកម្ពុជា។នៅព្រឹកថ្ងៃទី ១៩ ខែមីនា ឆ្នាំ ២០២៥នេះ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងគណៈប្រតិភូប្រមាណជាង ១០០នាក់ បានធ្វើដំណើរទស្សនកិច្ចមកកាន់ ព្រលានយន្តហោះអន្តរជាតិតេជោ ដែលគ្រោងនឹងបើកដំណើរការ នៅក្នុងខែកក្កដា ឆ្នាំ២០២៥ខាងមុខនេះ។ នាឱកាសនោះ ឯកឧត្តមរដ្ឋមន្រ្តី បានរំលេចថា ព្រលានយន្តហោះអន្តរជាតិតេជោថ្មី គឺជាតម្លៃបន្ថែមថ្មីសម្រាប់វិស័យទេសចរណ៍ និងសេដ្ឋកិច្ចកម្ពុជា ជាក់ស្តែងនៅពេលដែល សកម្មភាពជើងហោះហើរកើនឡើង ចំនួនភ្ញៀវទេសចរអន្តរជាតិ ដែលមកកម្សាន្តនៅកម្ពុជា នឹងកើនឡើងដូចគ្នាដែរ។ ឯកឧត្តម ហួត ហាក់ បានបញ្ជាក់បន្ថែមថា ការសម្រេចបាននូវ សមិទ្ធផលព្រលានយន្តហោះលំដាប់អន្តរជាតិមួយនេះ ដែលមានសមត្ថភាពទទួល យន្តហោះខ្នាតធំ គឺពិតជាបានជួយសម្រួលដល់ វិស័យទេសចរណ៍ច្រើនណាស់ ជាពិសេសគឺលើកមុខមាត់របស់ប្រទេសកម្ពុជាតែម្តង។ ទន្ទឹមគ្នានេះ លោកឧកញ៉ា ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន (CAIC) បានដឹកនាំគណៈប្រតិភូប្រមាណជាង ១០០នាក់ មកពីក្រសួងទេសចរណ៍ និងស្ថាប័នពាក់ព័ន្ធ ដើម្បីពិនិត្យវឌ្ឍនភាពព្រលានយន្តហោះអន្តរជាតិតេជោ និងបានគូសបង្ហាញបន្ថែមអំពី ផែនការអភិវឌ្ឍន៍ដ៏គួរឱ្យចាប់អារម្មណ៍ជាច្រើនទៀត នៅក្នុងគម្រោងព្រលានយន្តហោះនេះ ដែលរួមមាន គម្រោងភូមិវប្បធម៌ សណ្ឋាគារក្នុងព្រលានយន្តហោះ សាលសន្និបាតលំដាប់អន្តរជាតិ កន្លែងទទួលភ្ញៀវលំដាប់ VIP និងគម្រោងចំណតប្រើប្រាស់ដំបូលសូឡា សម្រាប់សាកថ្មឱ្យរថយន្តអគ្គិសនីជាដើម។ សូមជម្រាបថា រហូតមកដល់ពេលនេះ អាកាសយានដ្ឋានអន្តរជាតិតេជោក្រុងតាខ្មៅ សម្រេចការសាងសង់ ប្រមាណជាង ៩៥% នឹងគ្រោងដាក់ឲ្យដំណើរការនៅខែកក្កដា ខាងមុខនេះ។ ព្រលានយន្តហោះថ្មីនេះ សាងសង់ឡើងលើផ្ទៃដីជាង ២.៦០០ហិកតា ជាព្រលានយន្តហោះលំដាប់ 4F ដែលអាចធ្វើអោយយន្តខ្នាតធំចុះចតបានដូចជា ប្រភេទ Airbus A380 និងប្រភេទ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុងដំណាក់កាលទី១៕  អត្ថបទ៖ ងួន សុភ័ត្រ្តា រូបភាព៖ អ៊ិន អាត  

 អាជ្ញាធរខេត្តសៀមរាប ត្រៀមរៀបចំយុទ្ធនាការផ្សព្វផ្សាយ ការចុះឈ្មោះអ្នកសេដ្ឋកិច្ចក្រៅប្រព័ន្ធតាមថ្នាលឌីជីថល ខណៈការអភិវឌ្ឍសេដ្ឋកិច្ចក្រៅប្រព័ន្ធជាកិច្ចការអាទិភាព និងចាំបាច់ដើម្បីជំរុញការចូលរួមរបស់អ្នកសេដ្ឋកិច្ចក្រៅប្រព័ន្ធ ក្នុងខ្សែច្រវាក់ផ្គត់ផ្គង់ និងការបង្កើតតម្លៃបន្ថែមក្នុងសកម្មភាពសេដ្ឋកិច្ចជាតិ ព្រមទាំងចូលរួមដោយផ្ទាល់ក្នុងការកាត់បន្ថយអត្រាភាពក្រីក្រ និងវិសមភាពសង្គម។  ក្នុងកិច្ចប្រជុំស្តីពីការត្រៀមរៀបចំយុទ្ធនាការផ្សព្វផ្សាយការចុះឈ្មោះ អ្នកសេដ្ឋកិច្ចក្រៅប្រព័ន្ធតាមថ្នាលឌីជីថល នៅថ្ងៃទី១៧ ខែមីនា ឆ្នាំ ២០២៥ លោក ង៉ូវ សេងកាក់ អភិបាលរងខេត្តសៀមរាប បានមានប្រសាសន៍ថា ការរៀបចំឱ្យមានការចុះឈ្មោះតាមថ្នាលឌីជីថលសម្រាប់អ្នកសេដ្ឋកិច្ចក្រៅប្រព័ន្ធ មានគោលបំណងសំខាន់ គឺដើម្បីជួយ និងមិនមែនដាក់បន្ទុកបន្ថែមដល់អ្នកសេដ្ឋកិច្ចក្រៅប្រព័ន្ធ ដោយផ្អែកលើគោលការណ៍ស្ម័គ្រចិត្ត និងមិនមានការបង្ខិតបង្ខំនោះឡើយ ហើយនេះជាយន្តការដែលរាជរដ្ឋាភិបាលរៀបចំឡើង ដើម្បីបង្កើតនូវទំនាក់ទំនងរវាងអ្នកសេដ្ឋកិច្ចក្រៅប្រព័ន្ធ ជាមួយនឹងរាជរដ្ឋាភិបាល ក្នុងការគិតគូរនិងជួយដល់អ្នកសេដ្ឋកិច្ចក្រៅប្រព័ន្ធ ឲ្យកាន់តែមានប្រសិទ្ធភាព។ អភិបាលរងខេត្តសៀមរាប បានបន្តថា ថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធនេះ នឹងអនុញ្ញាតឱ្យមានមធ្យោបាយចុះឈ្មោះជាច្រើនជម្រើស ជូនប្រជាពលរដ្ឋដោយឥតបង់ថ្លៃសេវា និងតាមការស្ម័គ្រចិត្តដោយពឹងផ្អែកលើព័ត៌មានពីការធ្វើស្វ័យប្រកាស។ ការចុះឈ្មោះនេះ ផ្តោតចំពោះក្រុមគោលដៅរួមមាន សហគ្រាសធុនមីក្រូ កម្មករ-និយោជិតនៃសហគ្រាសធុនមីក្រូ កម្មករ-និយោជិតម្តងម្កាល និងបុគ្គលស្វ័យនិយោជន៍ ដែលប្រកបអាជីវកម្ម មុខរបរ និង ការងារនៅក្នុងសេដ្ឋកិច្ចក្រៅប្រព័ន្ធ។  ចំណែក លោក ឡី សុភាព ប្រធានសមាគមសហព័ន្ធយុវជនសេដ្ឋកិច្ចកម្ពុជា បានលើកឡើងថា រាជរដ្ឋាភិបាលកម្ពុជា បានបង្កើនការយកចិត្តទុកដាក់លើការអភិវឌ្ឍសេដ្ឋកិច្ចក្រៅប្រព័ន្ធ ជាពិសេសចំពោះសុខមាលភាព និងជីវភាពរស់នៅរបស់ពលរដ្ឋ តាមរយៈការពង្រឹងសមត្ថភាព ភាពធន់ និងភាពប្រកួតប្រជែងលើទីផ្សារ។ ការអភិវឌ្ឍសេដ្ឋកិច្ចក្រៅប្រព័ន្ធជាកិច្ចការអាទិភាព និងចាំបាច់ ដើម្បីជំរុញការចូលរួមក្នុងខ្សែច្រវាក់ផ្គត់ផ្គង់ និងបង្កើតតម្លៃបន្ថែមក្នុងសកម្មភាពសេដ្ឋកិច្ចជាតិ និងរួមចំណែកដល់ការកាត់បន្ថយភាពក្រីក្រ និងវិសមភាពសង្គម។ទន្ទឹមនឹងនេះ ដើម្បីពង្រីកការចុះឈ្មោះនៅទូទាំងខេត្ត ប្រធានសមាគមសហព័ន្ធយុវជនសេដ្ឋកិច្ចកម្ពុជា បានអំពាវនាវឱ្យរដ្ឋបាលខេត្ត រដ្ឋបាលក្រុង ស្រុក បង្កើនយុទ្ធនាការផ្សព្វផ្សាយ និងបន្តរៀបចំអត្ថប្រយោជន៍សម្រាប់អ្នកសេដ្ឋកិច្ចក្រៅប្រព័ន្ធ ដោយលើកឡើងជាឧទាហរណ៍ពីគម្រោងពង្រឹងស្តង់ដារអនាម័យ និងរបៀបរៀបរយសម្រាប់អ្នកលក់អាហារតាមចិញ្ចើមថ្នល់ និងតាមផ្សារជាដើម។ សូមជម្រាបថា ថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ ត្រូវបានសម្ពោធដាក់ឱ្យដំណើរការ កាលពីថ្ងៃទី១៦ ខែធ្នូ ឆ្នាំ ២០២៤ ដើម្បីសម្រួលដល់ការចុះឈ្មោះឱ្យមានភាពងាយស្រួល និងសាមញ្ញ។ ថ្នាលនេះប្រើប្រាស់បច្ចេកវិទ្យាទំនើប រួមទាំងជំនួយបញ្ញាសប្បនិម្មិតសម្រាប់ចាប់យកទិន្នន័យពីអត្តសញ្ញាណប័ណ្ណ, ថ្នាល CamDigiKey សម្រាប់កំណត់សុវត្ថិភាពនៃអត្តសញ្ញាណ, ថ្នាលផ្លាស់ប្តូរទិន្នន័យកម្ពុជា (CamDx), និងថ្នាល verify.gov.kh សម្រាប់ការផ្ទៀងផ្ទាត់និន្ន័យជាដើម៕  អត្ថបទ៖ ថុន សុកេតុមាលា រូបភាព៖ ឯកសារ 

 អង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច បានព្យាករថាកំណើនសេដ្ឋកិច្ចសកល អាចសម្រេចបានក្នុងកម្រិតមធ្យម ៣,១% នៅឆ្នាំ ២០២៥នេះ ហើយចុះមក ៣% ក្នុងឆ្នាំ ២០២៦ខាងមុខ។ នេះបើយោងតាមការចេញផ្សាយ ដោយ សារព័ត៌មានអន្តរជាតិធំៗ នៅថ្ងៃនេះ។ អង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច ហៅកាត់ថា OECD បានបង្ហាញថា សេដ្ឋកិច្ចពិភពលោកនឹងកើនឡើង ៣,១% នៅឆ្នាំនេះ ហើយថមថយចុះមកវិញត្រឹម ៣% នៅឆ្នាំ ២០២៦ខាងមុខ ដោយសារកំណើនសេដ្ឋកិច្ចរបស់សហរដ្ឋអាមេរិក និងតំបន់អឺរ៉ូ អាចនឹងចុះទាបជាងការរំពឹងទុក។ អង្គការ OECD បានទម្លាក់ការព្យាករណ៍ទាបជាងមុន គឺដោយសារតែ របាំងពាណិជ្ជកម្មកាន់តែខ្ពស់នៅក្នុងសេដ្ឋកិច្ច G20 និងការកើនឡើងនូវភាពមិនច្បាស់លាស់ខាងភូមិសាស្ត្រនយោបាយ និងគោលនយោបាយដែលដាក់បន្ទុកលើការវិនិយោគ និងការចំណាយគ្រួសារ។អង្គការ OECD បានសង្កត់ធ្ងន់ថា ហានិភ័យសំខាន់ៗនៅតែមាន ខណៈដែលពន្ធបន្ថែមរវាងសេដ្ឋកិច្ចពិភពលោកសំខាន់ៗ នឹងប៉ះពាល់ដល់កំណើននៅជុំវិញពិភពលោក ហើយបន្ថែមបន្ទុកលើអតិផរណា។ អតិផរណាខ្ពស់ជាងការរំពឹងទុក នឹងជំរុញឱ្យគោលនយោបាយរូបិយវត្ថុមានភាពតឹងរ៉ឹងជាងមុន ហើយអាចបណ្តាលឱ្យមានការរំខានដល់ ទីផ្សារហិរញ្ញវត្ថុ។កំណើនផលិតផលក្នុងស្រុកសរុបរបស់សហរដ្ឋអាមេរិក ត្រូវបានព្យាករណ៍ថា នឹងមាន ២,២% នៅឆ្នាំ ២០២៥ ធ្លាក់ចុះពីការព្យាករ ២,៤% កាលពីខែធ្នូ ឆ្នាំមុន ហើយសេដ្ឋកិច្ចអាមេរិក ធ្លាក់ចុះដល់ ១,៦% ក្នុងឆ្នាំ ២០២៦។ ដូចគ្នាដែរ ការព្យាករណ៍កំណើនតំបន់ចាយប្រាក់អឺរ៉ូគឺ ១% នៅឆ្នាំ ២០២៥ និង ១,២% នៅឆ្នាំ ២០២៦ ដោយសារភាពមិនច្បាស់លាស់នៃសេដ្ឋកិច្ចសកល។សូមជម្រាបថា អង្គការ ក៏បានកត់សម្គាល់ផងដែរថា ធនាគារកណ្តាល គួរតែរក្សាការប្រុងប្រយ័ត្ន ដោយសារភាពមិនច្បាស់លាស់ដែលកំពុងកើនឡើង និងតម្លៃពាណិជ្ជកម្ម ត្រូវចំណាយកាន់តែខ្ពស់ ដែលដាក់បន្ទុកដល់ ប្រាក់ឈ្នួល និងតម្លៃទំនិញ៕  អត្ថបទ៖ ងួន សុភ័ត្រ្តា រូបភាព៖ ឯកសារ 

 ប្រទេសកម្ពុជា និងប្រទេសចិន បានដាក់ឱ្យដំណើរការផ្លូវដឹកជញ្ជូនថ្មី ជាប្រភេទខ្សែសង្វាក់ត្រជាក់ និងទំនិញទូទៅ តភ្ជាប់ពីកំពង់ផែ ហ្វាងឆេងហ្គាង ប្រទេសចិន មកកាន់កំពង់ផែកោះកុង ចំណេញទាំងពេលវេលា និងថ្លៃដឹកជញ្ជូន។  បើតាមគេហទំព័របណ្តាញសង្គមផ្លូវការរបស់ ឯកឧត្តម វ៉ាង វិនពីន ឯកអគ្គរដ្ឋទូតចិនប្រចាំកម្ពុជា បានអបអរសាទរចំពោះ ដំណើរលើកដំបូងនៃផ្លូវ ខ្សែសង្វាក់ត្រជាក់ និងទំនិញទូទៅ ពីកំពង់ផែ វាងឆេងហ្គាង ប្រទេសចិន ទៅកាន់កំពង់ផែកោះកុង ប្រទេសកម្ពុជា ដោយខ្សែដំណើរមានរយៈពេល ៧ថ្ងៃ ដែលអាចកាត់បន្ថយពេលវេលាដឹកជញ្ជូនបានជាង ៥០% និងថ្លៃដឹកជញ្ជូនជាង ២០%។ លោកឧកញ៉ាបណ្ឌិត ស៊ិន ចន្ធី អគ្គនាយកក្រុមហ៊ុន ឡាញហល អេចប្រេស ខេមបូឌា និងអ្នកជំនាញក្នុងវិស័យភស្តុភារកម្ម និងដឹកជញ្ជូនកម្ពុជា ដែលមានបទពិសោធន៍ជាង ៣០ឆ្នាំនៅក្នុងវិស័យមួយនេះ បានគូសបញ្ជាក់ប្រាប់ដល់ ក្រុមការងារសេដ្ឋកិច្ចភីអិនអិន ឱ្យបានដឹងថា លោកគាំទ្រ និងសាទរចំពោះផ្លូវដឹកជញ្ជូនថ្មីនេះ ដោយវានឹងជួយកាត់បន្ថយចំណាយទាំងពេលវេលា និងថ្លៃដឹក ព្រោះវាជាផ្លូវដឹកដោយផ្ទាល់ ពុំមានឆ្លងកាត់។ គួរជម្រាបផងដែរថា បើតាមប្រភពពី ឯកអគ្គរដ្ឋទូតចិនប្រចាំកម្ពុជា បានបង្ហាញឱ្យដឹងថា នៅក្នុងដំណាក់កាលដំបូងនៃប្រតិបត្តិការផ្លូវថ្មីនេះ មានក្រុមហ៊ុនវិនិយោគលើនាវាចំនួន ២ ដែលមានសមត្ថភាពដឹកជញ្ជូនពហុគោលបំណងចន្លោះពី ៥ពាន់តោន ដល់ ៦ពាន់តោន និងបំពាក់ទូកុងតឺន័រត្រជាក់ផងដែរ៕   អត្ថបទ៖ ងួន សុភ័ត្រ្តា រូបភាព៖ ឯកសារ   

 គម្រោងសហប្រតិបត្តិការ ចិន-កម្ពុជា-យូនីសេហ្វ ត្រូវបានប្រកាសដាក់ឱ្យអនុវត្ត គម្រោងទឹកស្អាត ដើម្បីពង្រីកសេវាទឹកស្អាត និងអនាម័យនៅកម្ពុជា។  ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ រួមជាមួយក្រសួងធនធានទឹក នៃសាធារណៈរដ្ឋប្រជាមានិតចិន និងអង្គការយូនីសេហ្វ នៅថ្ងៃទី១៧ ខែមីនា ឆ្នាំ២០២៥ បានប្រកាសដាក់ឱ្យអនុវត្ត គម្រោងទឹកស្អាត និងអនាម័យដែលមានភាពធន់ នឹងអាកាសធាតុនៅកម្ពុជា។ ក្នុងឱកាសនោះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា ប្រទេសកម្ពុជាបានបោះជំហានទៅមុខ គួរឱ្យកត់សម្គាល់ ក្នុងការពង្រីកលទ្ធភាពទទួលបានសេវាទឹកស្អាត និងអនាម័យ ឆ្ពោះទៅការសម្រេចបាននូវគោលដៅអភិវឌ្ឍន៍ប្រកបដោយចីរភាពកម្ពុជា ៦.១ និង ៦.២។  គោលដៅនេះត្រូវធានាថា មានទឹកបរិភោគដែលមានសុវត្ថិភាព និងតម្លៃសមរម្យ និងមានសេវាអនាម័យសម្រាប់ប្រជាជន ទាំងអស់ត្រឹមឆ្នាំ២០៣០ ដោយផ្តល់អាទិភាពដល់ស្ត្រី ក្មេងស្រី និងប្រជាពលរដ្ឋងាយរងគ្រោះ ខណៈគំនិតផ្តួចផ្តើមនេះ គឺជាការប្តេជ្ញាចិត្តរួមគ្នា ក្នុងការធានាថាសហគមន៍ដែលងាយរងគ្រោះបំផុត មានលទ្ធភាពទទួលបានសេវាទឹកស្អាត និងអនាម័យដែលមានសុវត្ថិភាព និងមានភាពធន់ នឹងអាកាសធាតុដោយកាត់បន្ថយការគំរាមកំហែងដែលបង្កឡើងដោយការប្រែប្រួលអាកាសធាតុ។ ជាមួយគ្នានេះ ឯកឧត្តម Li Guoying រដ្ឋមន្ត្រីក្រសួងធនធានទឹក នៃសាធារណៈរដ្ឋប្រជាមានិតចិន បានលើកឡើងថា ប្រទេសចិន បានត្រៀមខ្លួនជាស្រេច ក្នុងការសហការជាមួយកម្ពុជា អង្គការយូនីសេហ្វ ប្រទេសផ្សេងៗ និងអង្គការអន្តរជាតិនានា ដើម្បីពង្រឹងការផ្លាស់ប្តូរ និងកិច្ចសហប្រតិបត្តិការ ក្នុងគោលនយោបាយអភិបាលកិច្ច ការចែករំលែកបទពិសោធន៍ និងបច្ចេកវិទ្យាគ្រប់គ្រងទឹក ប្រកបដោយចីរភាពនៅឆ្នាំ២០៣០ របស់អង្គការសហប្រជាជាតិ និងកសាងសហគមន៍ ចិន-កម្ពុជា ជាមួយនឹងអនាគតរួមគ្នាក្នុងយុគសម័យថ្មី។  សូមជម្រាបថា ចិន-កម្ពុជា គម្រោងសហប្រតិបត្តិការនេះ មានគោលដៅនាំយកបច្ចេកវិទ្យាទំនើបថ្មីៗ គំរូអាជីវកម្មនិរន្តរភាព និងដំណោះស្រាយដែលមានប្រសិទ្ធភាពខ្ពស់ ដើម្បីពង្រឹងភាពធន់នៃសេវាទឹកស្អាត និងអនាម័យ ដោយលើកកម្ពស់សុខមាលភាពរបស់សហគមន៍ សាលារៀន និងមូលដ្ឋានសុខភិបាល នៅក្នុងតំបន់គោលដៅ ព្រមទាំងជំរុញការអភិវឌ្ឍប្រកបដោយចីរភាព ភាពធន់ និងបរិយាបន្ន៕     អត្ថបទ៖ ថុន សុកេតុមាលា រូបភាព៖ ឯកសារ  

 ប្រទេសចិន និងអាស៊ាន រក្សាបាននូវ ទំនាក់ទំនងសេដ្ឋកិច្ច និងពាណិជ្ជកម្មរបស់ពួកគេកាន់តែរីកចម្រើនខ្លាំងឡើង ដោយអាស៊ាន នៅតែជាដៃគូពាណិជ្ជកម្មដ៏ធំបំផុតរបស់ប្រទេសចិន សម្រាប់រយៈពេល ៥ឆ្នាំជាប់ៗគ្នា។ នេះបើយោងតាមការចេញផ្សាយដោយ សារព័ត៌មានអន្តរជាតិ CCTV នៅថ្ងៃនេះ។  ទិន្នន័យផ្លូវការពី អគ្គនាយកដ្ឋានគយចិន បានបង្ហាញថា តម្លៃពាណិជ្ជកម្មរបស់ចិន ជាមួយបណ្តាប្រទេសអាស៊ានឈានដល់ ១៤៣ពាន់លានដុល្លារអាម៉េរិក ក្នុងរយៈពេល ២ខែដំបូងនៃឆ្នាំ ២០២៥ ដែលជាការកើនឡើង ៤% ហើយតួលេខនេះ ស្មើនឹង ១៥% នៃបរិមាណនាំចូល-នាំចេញសរុបរបស់ប្រទេសចិន ក្នុងអំឡុងពេលនោះ។ក្នុងរយៈពេល ២ខែដំបូង អត្រាកំណើននៃការនាំចូល និងនាំចេញរបស់ចិន ជាមួយបណ្តាប្រទេសអាស៊ានគឺ ៥% ខ្ពស់ជាងមធ្យមភាគ ហើយបានកើនឡើង ១២ខែជាប់ៗគ្នា។ ចំណុចសំខាន់នៃពាណិជ្ជកម្មចិន-អាស៊ាន គឺការអនុវត្តន៍ដ៏រឹងមាំនៃតំបន់ក្វាងស៊ី នៅភាគខាងត្បូងប្រទេសចិន ដែលជាព្រំដែននៃការបើកទ្វាររបស់ប្រទេសចិន ទៅកាន់បណ្តាប្រទេសអាស៊ាន។ ចាប់ពីខែមករាដល់ខែកុម្ភៈ ខេត្តក្វាងស៊ី បានឃើញតម្លៃពាណិជ្ជកម្មទ្វេភាគីខ្ពស់ ដោយការនាំចូល និងការនាំចេញឈានដល់ ៨,៧ពាន់លានដុល្លារអាម៉េរិក កើនឡើង ១៤%។ សូមរម្លឹកថា ការិយាល័យស្ថិតិជាតិចិន បានបង្ហាញថា ផលិតផលក្នុងស្រុកសរុបរបស់មហាអំណាចសេដ្ឋកិច្ច បានកើនឡើង ៥% ក្នុងឆ្នាំ ២០២៤ ខណៈពាណិជ្ជកម្មក្រៅប្រទេស បន្តគាំទ្រដល់កំណើនសេដ្ឋកិច្ចចិន ដោយការនាំចូល និងនាំចេញទំនិញសរុបបានកើនឡើង ៥% ក្នុងឆ្នាំ ២០២៤កន្លងទៅនេះ៕   អត្ថបទ៖ ងួន សុភ័ត្រ្តា រូបភាព៖ ឯកសារ