សហរដ្ឋអាមេរិក និងប្រទេសវៀតណាម បង្កើនកិច្ចសហការបន្ថែមទៀត ទៅលើពាណិជ្ជកម្មលើ ឈើ និងគ្រឿងសង្ហារឹម ដែលសម្រេចបានប្រមាណ ៩ពាន់លានដុល្លារ កាលពីឆ្នាំ ២០២៤ កើនឡើង ២៤%។ នេះបើយោងតាមការចុះផ្សាយដោយ សារព័ត៌មានក្នុងស្រុកវៀតណាម នៅថ្ងៃនេះ។ វៀតណាម កំពុងក្លាយជាអ្នកផ្គត់ផ្គង់ឈើ និងផលិតផលឈើឈានមុខគេមួយទៅកាន់ សហរដ្ឋអាមេរិក ក៏ដូចជាអ្នកនាំចូលឈើពីអាមេរិកផងដែរ នេះបើយោងតាមការបញ្ជាក់នៅក្នុងជំនួបរវាង រដ្ឋបាលព្រៃឈើវៀតណាម ក្រោមក្រសួងកសិកម្មនិងបរិស្ថាន អង្គការនិន្នាការព្រៃឈើ រួមទាំងសមាគមនិងម្ចាស់អាជីវកម្មឈើជាច្រើន។ អគ្គលេខាធិកាសមាគមឈើ និងផលិតផលព្រៃឈើវៀតណាម បានលើកឡើងថា ការនាំចេញឈើ និងផលិតផលឈើរបស់វៀតណាម ទៅកាន់ សហរដ្ឋអាមេរិកបានឈានដល់ ៩ពាន់លានដុល្លារ កាលពីឆ្នាំមុន ពោលគឺកើនឡើង ២៤%។បច្ចុប្បន្ន សហរដ្ឋអាមេរិកគឺជាទីផ្សារធំជាងគេ ដោយប្រើប្រាស់ ៥៥% នៃការនាំចេញឈើ និងផលិតផលឈើសរុបរបស់វៀតណាម បន្ទាប់មកគឺប្រទេសចិន ១២% ជប៉ុន ១១% កូរ៉េខាងត្បូង ៥% និងសហភាពអឺរ៉ុប ៤%។ការនាំចេញសំខាន់ៗរបស់វៀតណាមទៅកាន់សហរដ្ឋអាមេរិក រួមមាន គ្រឿងសង្ហារឹមឈើ បន្ទះឈើ ទ្វារឈើ និងផលិតផលឈើ។ ផ្ទុយទៅវិញ វៀតណាមបាននាំចូលឈើ និងផលិតផលឈើមានតម្លៃ ៣១៦លានដុល្លារពី សហរដ្ឋអាមេរិក កាលពីឆ្នាំ ២០២៤ កើនឡើង ៣៣% ធៀបនឹងឆ្នាំ ២០២៣ ដែលស្មើនឹង ១១% នៃការនាំចូលឈើ និងផលិតផលឈើសរុបរបស់ប្រទេសវៀតណាម។សូមជម្រាបថា ពាណិជ្ជកម្មឈើរវាងវៀតណាម និងអាមេរិក មិនត្រឹមតែរួមចំណែកយ៉ាងសំខាន់ក្នុងតម្លៃប៉ុណ្ណោះទេ ប៉ុន្តែក៏នាំមកនូវអត្ថប្រយោជន៍បន្ថែមទៀត អ្នកប្រើប្រាស់អាមេរិក រីករាយនឹងជម្រើសកាន់តែច្រើន សម្រាប់ផលិតផលដែលមានគុណភាពខ្ពស់ តម្លៃសមរម្យ និងស្របតាមច្បាប់៕   អត្ថបទ៖ ងួន សុភ័ត្រ្តា រូបភាព៖ ឯកសារ 

 សហគមន៍ និងអាជីវកម្មគ្រឿងសមុទ្រវៀតណាម បានបង្ហាញគោលបំណងធ្វើទំនើបកម្ម និងការអភិវឌ្ឍវិស័យប្រកបដោយនិរន្តរភាព ធ្វើឱ្យ ការនាំចេញគ្រឿងសមុទ្រ កាន់តែមានការប្រកួតប្រជែងជាសកល នៅឆ្នាំ ២០៣០។ នេះបើតាមការចេញផ្សាយដោយ សារព័ត៌មានក្នុងស្រុកវៀតណាម នៅថ្ងៃនេះ។  សមាគមអ្នកនាំចេញ និងផលិតអាហារសមុទ្រវៀតណាម បានឱ្យដឹងថា បច្ចុប្បន្ន វៀតណាមជាប់ចំណាត់ថ្នាក់លេខ ៣ លើពិភពលោក សម្រាប់ការនាំចេញអាហារសមុទ្រ ដែលមានចំនួនជាង ៧%នៃចំណែកទីផ្សារពិភពលោក តាមពីក្រោយប្រទេសចិន និងន័រវេស។ ទោះជាយ៉ាងណាក៏ដោយ ឧស្សាហកម្មនេះកំពុងប្រឈមមុខនឹងបញ្ហាប្រឈមជាច្រើន និងការប្រកួតប្រជែងដ៏ខ្លាំងក្លា ចំពេលមានការប្រែប្រួលពាណិជ្ជកម្មសកល។ការអភិវឌ្ឍន៍របស់វិស័យមួយនេះ មិនត្រឹមតែផ្អែកលើតួលេខនាំចេញប៉ុណ្ណោះទេ ប៉ុន្តែថែមទាំងលើការកែលម្អប្រសិទ្ធភាពនៃខ្សែសង្វាក់ផ្គត់ផ្គង់ និងប្រាក់ចំណេញក្នុងខ្សែសង្វាក់តម្លៃទាំងមូលផងដែរ។ បញ្ហាសំខាន់មួយដែលឧស្សាហកម្មគ្រឿងសមុទ្រវៀតណាម ត្រូវដោះស្រាយគឺ ការនាំចេញនៅទ្រឹងដែលខ្លួនបានជួបប្រទះក្នុងរយៈពេល ៥ឆ្នាំកន្លងមកនេះ ដោយមានទំហំប្រហែល ៨ ទៅ ១០ពាន់លានដុល្លារក្នុងមួយឆ្នាំ ខណៈតួលេខនេះ គឺនៅឆ្ងាយពីគោលដៅ ១៤ ទៅ ១៦ពាន់លានដុល្លារ ដែលបានកំណត់នៅក្នុងយុទ្ធសាស្ត្រអភិវឌ្ឍន៍នៃវិស័យអាហារសមុទ្រសម្រាប់ឆ្នាំ ២០៣០។អនុប្រធាន VASEP លោក Truong Thi Lê Khanh បានមានប្រសាសន៍ថា ឧស្សាហកម្មគ្រឿងសមុទ្រកំពុងប្រឈមមុខនឹងបញ្ហាទាំងខាងក្រៅ និងខាងក្នុង។ គួរជម្រាបថា ទីផ្សារអាហារសមុទ្រសំខាន់ៗ ក៏កំពុងអនុវត្តស្តង់ដារតឹងរ៉ឹងកាន់តែខ្លាំងឡើង ទាក់ទងនឹងគុណភាព សុវត្ថិភាពចំណីអាហារ និងនិរន្តរភាពបរិស្ថាន ដោយដាក់កម្រិតលើសមត្ថភាពរបស់អាជីវកម្មវៀតណាម ក្នុងការចូលទៅកាន់ទីផ្សារទាំងនេះ ហើយការប្រកួតប្រជែងអន្តរជាតិកាន់តែខ្លាំង មកពីប្រទេសមួយចំនួនដូចជា ឥណ្ឌា អេក្វាឌ័រ ថៃ និងចិន ដែលពួកគេ កំពុងបន្តធ្វើឱ្យប្រសើរឡើងនូវបរិមាណ និងគុណភាពនៃការនាំចេញអាហារសមុទ្ររបស់ពួកគេ៕    អត្ថបទ៖ ងួន សុភ័ត្រ្តា រូបភាព៖ ឯកសារ  

  បើតាមព្រឹត្តិបត្រស្រាវជ្រាវអេឡិចត្រូនិកលេខ ២ សម្រាប់ខែមីនា របស់ក្រសួងពាណិជ្ជកម្ម បានបង្ហាញឱ្យដឹងថា តម្លៃទីផ្សារសរុបនៃពាណិជ្ជកម្មអេឡិចត្រូនិកនៅកម្ពុជា ក្នុងឆ្នាំ ២០២៤ មានចំនួន ១ពាន់ ៥រយលានដុល្លារអាមេរិក ហើយរំពឹងនឹងកើនដល់ ១ពាន់ ៧រយលានដុល្លារអាមេរិក នៅឆ្នាំ ២០២៥នេះ ដែលជាកំណើនប្រមាណ ១៧%។ ជាក់ស្តែង វិស័យពាណិជ្ជកម្មអេឡិចត្រូនិករបស់កម្ពុជា ក្នុងឆ្នាំ ២០២៤ ដែលមានទំហំ ១ពាន់ ៥រយលានដុល្លារអាមេរិក បានរួមចំណែកប្រមាណ ៦% នៃផលិតផលក្នុងស្រុកសរុបរបស់កម្ពុជា។លើសពីនេះ កម្ពុជា បានរួមចំណែក ១,៣% នៃចំណែកពាណិជ្ជកម្មអេឡិចត្រូនិកក្នុងទីផ្សារអាស៊ាន ដែលទីផ្សារសរុបមានទំហំជាង ១១៦ពាន់លានដុល្លារអាមេរិក ក្នុងឆ្នាំ ២០២៤។ យ៉ាងណាចំពោះពាណិជ្ជកម្មអេឡិចត្រូនិកក្នុងទីផ្សារអាស៊ាន រំពឹងនឹងកើនឡើង ១៧% ដល់ ១៣៧ពាន់លានដុល្លារអាមេរិក ក្នុងឆ្នាំ ២០២៥នេះ។ចំពោះវិធីទូទាត់តាមប្រព័ន្ធអេឡិចត្រូនិកវិញ គឺការទូទាត់តាមប្រព័ន្ធ QR កូដ មានចំណែកធំជាងគេ ៤៧% នៃការទូទាត់សរុប ខណៈការទូទាត់ជាសាច់ប្រាក់មានជាង ២៦%។ រីឯបណ្តាញសង្គម Facebook, TikTok និង Telegram បានគ្របដណ្តប់លើ ទីផ្សារអនឡាញនៅកម្ពុជា ខណៈថ្នាលទិញទំនិញសំខាន់ៗ គឺមាន Facebook ដែលមានអ្នកប្រើប្រាស់ ១១លានគណនី និង TikTok ដែលមានជិត ១០លានគណនី ដោយអ្នកទិញភាគច្រើនចំណាយមួយដងក្នុងមួយខែចន្លោះពី ១១ដុល្លារ ទៅ ៥០ដុល្លារ។សូមបញ្ជាក់ដែរថា អ្នកប្រើប្រាស់ទូរសព្ទចល័តលើបណ្តាញសង្គមនៅកម្ពុជា ក្នុងឆ្នាំ ២០២៤ មានជិត ២២លានគណនី៕  អត្ថបទ៖ ងួន សុភ័ត្រ្តា រូបភាព៖ ឯកសារ  

 ក្រុមប្រឹក្សាអភិវឌ្ឍន៍កម្ពុជា បានឲ្យដឹងថា ក្រុមហ៊ុន ភេសជ្ជៈកម្ពុជា កូកា កូឡា បានបង្ហាញការប្តេជ្ញាចិត្តស្វែងរកដៃគូផ្គត់ផ្គង់វត្ថុធាតុដើម និងពង្រីកប្រតិបត្តិការវិនិយោគនៅកម្ពុជា។   នៅថ្ងៃទី២៤ ខែមិថុនា ឆ្នាំ២០២៥ ក្នុងជំនួបសម្តែងការគួរសម និងពិភាក្សាការងារជាមួយ គណៈប្រតិភូក្រុមហ៊ុនភេសជ្ជៈកម្ពុជា (កូកា-កូឡា) និង ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ឯកឧត្តមឧបនាយករដ្ឋមន្ត្រី បានលើកឡើងថា នាយកប្រតិបត្តិក្រុមហ៊ុនភេសជ្ជៈកម្ពុជា កូកា-កូឡា បានបង្ហាញពីការតាំងចិត្តខ្ពស់ក្នុងការស្វែងរក ដៃគូផ្គត់ផ្គង់វត្ថុធាតុដើមនៅក្នុងស្រុក ដែលមានគុណភាព និងកម្លាំងផលិតភាពស្របទៅតាមតម្រូវការផលិតកម្មរបស់ក្រុមហ៊ុន។  ក្នុងឱកាសនោះ ឯកឧត្តមឧបនាយករដ្ឋមន្ត្រី បានបន្តថា រាជរដ្ឋាភិបាលកម្ពុជា បានចាត់ទុកការវិនិយោគផ្ទាល់ពីបរទេស (FDI) ជាកត្តាដ៏សំខាន់នៃកំណើនសេដ្ឋកិច្ចជាតិ។ ក្នុងនោះ ការទិញធាតុចូល ឬប្រើប្រាស់វត្ថុធាតុដើមនៅក្នុងស្រុក វិនិយោគិន នឹងទទួលបានការលើកចិត្តបន្ថែម ដែលនេះគឺជាការលើកទឹកចិត្តមួយក្នុងចំណោមយន្តការលើកទឹកចិត្តជាច្រើនដែលរាជរដ្ឋាភិបាលបានដាក់ចេញ ដើម្បីទាក់ទាញ និងជំរុញការវិនិយោគប្រកបដោយគុណភាព ប្រសិទ្ធភាព និងចីរភាព។  ជាការឆ្លើយតប លោក Paulo Gaspar Rodrigues នាយកប្រតិបត្តិក្រុមហ៊ុន ភេសជ្ជៈកម្ពុជា (កូកា-កូឡា) ក៏បានបង្ហាញនូវការប្តេជ្ញាចិត្តខ្ពស់ក្នុងការបន្តពង្រឹង និងពង្រីកប្រតិបត្តិការវិនិយោគរបស់ខ្លួននៅកម្ពុជា សំដៅជាចំណែកដល់ការចូលរួម អភិវឌ្ឍសេដ្ឋកិច្ចជាតិផងដែរ។ ទន្ទឹមនឹងនេះ ផលិតភាព ពិពិធកម្ម និងការវិនិយោគក្នុងស្រុក ជាកត្តាគន្លឹះសម្រាប់ការងើបឡើងវិញនៃសេដ្ឋកិច្ចកម្ពុជា។ សូមជម្រាបថា ជំនួបនេះ ត្រូវបានរៀបចំឡើងក្នុងគោលបំណង ដើម្បីពិភាក្សា អំពីបច្ចុប្បន្នភាពនៃដំណើរការវិនិយោគរបស់ក្រុមហ៊ុននៅកម្ពុជា និងចំណុចគន្លឹះពាក់ព័ន្ធនានា សំដៅលើកកម្ពស់កិច្ចសហការឱ្យកាន់តែរឹងមាំថែមមួយកម្រិតទៀត រវាងផ្នែករដ្ឋ និងក្រុមហ៊ុនផ្ទាល់៕   អត្ថបទ៖ ថុន សុកេតុមាលា  រូបភាព៖ ឯកសារ   

 ក្រុមហ៊ុន China State Railway Group ដែលជាប្រតិបត្តិករផ្លូវដែករបស់ចិន បានរាយការណ៍ថា ក្នុងរយៈពេល ៥ខែ ឆ្នាំ ២០២៥នេះ ការដឹកជញ្ជូនទំនិញតាមផ្លូវដែករបស់ចិន ឈានដល់ ១,៦ពាន់លានតោន កើនឡើងប្រមាណ ៣%។ នេះបើយោងតាមការចុះផ្សាយដោយ សារព័ត៌មានអន្តរជាតិធំៗ នៅថ្ងៃនេះ។  ក្រុមហ៊ុន China State Railway Group បានអះអាងថា បរិមាណផ្ទុកទំនិញ និងដឹកជញ្ជូនប្រចាំថ្ងៃជាមធ្យម មាន ១៨ម៉ឺនទូ កើនឡើង ៤%។ជាមួយគ្នានេះ ផ្លូវដែកជាតិចិន បានដឹកជញ្ជូនធ្យូងថ្ម ៨៤៥លានតោន ពីខែមករា ដល់ខែឧសភា រួមទាំង ៥៧៥លានតោនសម្រាប់ផលិតថាមពល។ ក្នុងរយៈពេល ៥ខែដំបូងក្នុងឆ្នាំនេះ កិច្ចសន្យាដឹកជញ្ជូនទូទៅ គឺមានចំនួន ៦៥៥ ត្រូវបានចុះហត្ថលេខា ខណៈប្រតិបត្តិករផ្លូវដែក បានបន្តថា នឹងធ្វើឱ្យប្រសើរឡើងនូវ គុណភាពនៃសេវាកម្មដឹកជញ្ជូន។ ដោយឡែក ការដឹកជញ្ជូនឆ្លងដែន គឺនៅមានស្ថិរភាព និងរលូន ក្នុងរយៈពេល ៥ខែដំបូង ខណៈ ប្រតិបត្តិការផ្លូវដែកល្បឿនលៀនចិន-អឺរ៉ុប នៅតែមានស្ថេរភាព។ចំពោះរថភ្លើងដឹកទំនិញរវាងចិន-អាស៊ីកណ្តាល បានធ្វើដំណើរចំនួន ៦ពាន់ដង កើនឡើង ២៣% ធៀបនឹងពេលដូចគ្នាកាលពីឆ្នាំមុន។ទន្ទឹមនឹងនេះ ផ្លូវដែករវាងចិន-ឡាវ បានដឹកជញ្ជូនទំនិញឆ្លងកាត់ព្រំដែនចំនួន ២ពាន់ ៥រយលានតោន កើនឡើង ៨%។សូមជម្រាបថា កាលពីឆ្នាំ ២០២៤ ការវិនិយោគទ្រព្យសកម្មថេរក្នុងវិស័យផ្លូវដែក បានឈានដល់ ៤៧ពាន់លានដុល្លារអាមេរិក កើនឡើង ១០% ហើយថែមទាំងឈានដល់កម្រិតខ្ពស់បំផុតផងដែរ៕  អត្ថបទ៖ ងួន សុភ័ត្រ្តា រូបភាព៖ ឯកសារ  

 សមាគមក្រុមហ៊ុនផលិតរថយន្តវៀតណាម បានបង្ហាញថា សមាជិករបស់ខ្លួន បានរាយការណ៍ពីការលក់រថយន្តសរុបចំនួនជិត ៣ម៉ឺនគ្រឿងក្នុងខែឧសភា កើនឡើង ១៣% ធៀបនឹងពេលដូចគ្នា កាលពីឆ្នាំមុន។ នេះបើយោងតាមការចុះផ្សាយដោយ សារព័ត៌មានក្នុងស្រុកវៀតណាម នៅថ្ងៃនេះ។សមាគមក្រុមហ៊ុនផលិតរថយន្តវៀតណាម បានរាយការណ៍ពី ការលក់រថយន្តដឹកអ្នកដំណើរសរុបជាង ២ម៉ឺនគ្រឿង, រថយន្តពាណិជ្ជកម្មចំនួន ៩ពាន់គ្រឿង និងរថយន្តមុខងារពិសេសចំនួន ២០០គ្រឿងទៀត ក្នុងខែឧសភា។ ជាមួយគ្នានេះ ការលក់រថយន្តដែលបានដំឡើងក្នុងស្រុក បានធ្លាក់ចុះប្រមាណ ១% ដោយសម្រេចបាន ១ម៉ឺន ៣ពាន់គ្រឿង ខណៈដែល រថយន្តនាំចូល មានការលក់ធ្លាក់ចុះ ២% មកនៅត្រឹម ១ម៉ឺន ៥ពាន់គ្រឿង។សមាគម បានបង្ហាញសុទិដ្ឋិនិយមថា ជាមួយនឹងស្ថិរភាពម៉ាក្រូសេដ្ឋកិច្ច និងគោលនយោបាយគាំទ្រ ទីផ្សារ នឹងបន្តកត់ត្រានូវ សន្ទុះកំណើនដ៏រឹងមាំ នៅក្នុងឆមាសទី ២ នៃឆ្នាំនេះ ជាពិសេសនៅក្នុងផ្នែករថយន្តដឹកអ្នកដំណើរ និងរថយន្តដែលគិតគូរដល់បរិស្ថាន។ អ្នកជំនាញក្នុងឧស្សាហកម្មបានព្យាករថា ការលក់រថយន្តសរុបក្នុងឆ្នាំ ២០២៥ អាចលើសពី ២៥ម៉ឺនគ្រឿង ដែលតំណាងឱ្យកំណើនប្រហែល ១០% ធៀបនឹងឆ្នាំ ២០២៤។ការលក់ដែលប្រកបដោយនិរន្តរភាព រួមមានរថយន្តកូនកាត់ និងរថយន្តសន្សំសំចៃប្រេង ត្រូវបានគេរំពឹងថា នឹងសម្រេចបាននូវអត្រាកំណើនការលក់ ៤០% ឬខ្ពស់ជាងនេះ។ ក្នុងរយៈពេល ៥ខែ ដើមឆ្នាំ ២០២៥ ការលក់សរុបនៅលើទីផ្សារវៀតណាម បានឈានដល់ ១០ម៉ឺនយូនីត ដែលជាការកើនឡើង ១២% ធៀបនឹងពេលដូចគ្នា កាលពីឆ្នាំមុន។គួរជម្រាបថា ទីផ្សាររថយន្តរបស់វៀតណាម ត្រូវបានគេរំពឹងថា នឹងរក្សាបាននូវគន្លងកំណើនរបស់ខ្លួនពេញមួយឆមាសទី ២ នៃឆ្នាំនេះ ដោយផ្អែកលើស្ថិរភាពសេដ្ឋកិច្ច និងការពេញចិត្តរបស់អតិថិជនចំពោះយានយន្តដែលមានប្រសិទ្ធភាព សន្សំសំចៃ និងសុវត្ថិភាព៕   អត្ថបទ៖ ងួន សុភ័ត្រ្តា រូបភាព៖ ឯកសារ  

 ក្នុងខែឧសភា ឆ្នាំ ២០២៥ ក្រុមប្រឹក្សាអភិវឌ្ឍន៍កម្ពុជា បានចុះបញ្ជីគម្រោងវិនិយោគសរុបចំនួន ៥៩គម្រោង ក្នុងទុនវិនិយោគសរុបប្រមាណ ៨១៦លានដុល្លារអាម៉េរិក និងអាចបង្កើតការងារបានប្រមាណជិត ៤ម៉ឺន ៤ពាន់កន្លែង។  ក្រុមប្រឹក្សាអភិវឌ្ឍន៍កម្ពុជា បានគូសបញ្ជាក់ថា ក្នុងខែឧសភា ឆ្នាំ ២០២៥ ក្រុមប្រឹក្សាអភិវឌ្ឍន៍កម្ពុជា បានចុះបញ្ជីគម្រោងវិនិយោគសរុបចំនួន ៥៩គម្រោង ក្នុងទុនវិនិយោគសរុបប្រមាណ ៨១៦លានដុល្លារអាម៉េរិក មានការកើនឡើងខ្ពស់ បើធៀបនឹងខែឧសភា ឆ្នាំ ២០២៤ ដែលមានគម្រោងវិនិយោគ ត្រូវបានចុះបញ្ជីចំនួន ២៥គម្រោង គិតជាដើមទុនសរុប ២៤៦លានដុល្លារអាមេរិក។ ក្នុងចំណោមគម្រោងវិនិយោគសរុបចំនួន ៥៩គម្រោង គឺមានគម្រោងនៅក្រៅតំបន់សេដ្ឋកិច្ចពិសេសចំនួន ៣៨គម្រោង និងនៅក្នុងតំបន់សេដ្ឋកិច្ចពិសេសចំនួន ២១គម្រោង។ ការវិនិយោគក្នុងខែឧសភា បានគ្របដណ្តប់លើវិស័យឧស្សាហកម្មប្រមាណ ៥៧៩លានដុល្លារ បន្ទាប់មកគឺ វិស័យហេដ្ឋារចនាសម្ព័ន្ធនិងផ្សេងៗប្រមាណ ២៣៧លានដុល្លារ។ចំពោះប្រភពទុនវិនិយោគឈានមុខ គឺប្រទេសចិន មានចំណែក ៨៤%, សិង្ហបុរី មានចំណែក ៣% ខណៈកម្ពុជា មានចំណែក ៨% នៃទុនវិនិយោគសរុប។ ទន្ទឹមគ្នានេះ រយៈពេល ៥ខែ ដើមឆ្នាំ ២០២៥នេះ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងថ្មី និងគម្រោងពង្រីកផលិតកម្មសរុបចំនួន ២៩០គម្រោង ដោយគម្រោងទាំងអស់ មានទុនវិនិយោគសរុបប្រមាណ ៤ពាន់ ២រយលានដុល្លារអាម៉េរិក។ សូមបញ្ជាក់ថា ក្នុងឆ្នាំ ២០២៤កន្លងទៅនេះ ក្រុមប្រឹក្សាអភិវឌ្ឍន៍កម្ពុជា បានទាក់ទាញគម្រោងវិនិយោគសរុបប្រមាណ ៤១៤គម្រោង គិតជាទឹកប្រាក់ប្រមាណ ៧ពាន់លានដុល្លារអាមេរិក ដោយវិស័យឧស្សាហកម្ម ជាវិស័យលេចធ្លោជាងគេក្នុងការស្រូបទាញវិនិយោគក្នុងឆ្នាំ ២០២៤៕   អត្ថបទ៖ ងួន សុភ័ត្រ្តា រូបភាព៖ ឯកសារ 

 រដ្ឋមន្រ្តីក្រសួងទេសចរណ៍ បានឲ្យដឹងថា អនាគតនៃវិស័យទេសចរណ៍កម្ពុជា មិនអាចកាត់ផ្តាច់ពីការស្រូបទាញកំណើននៃលំហូរទេសចរ និងវិនិយោគិនឥណ្ឌាបានឡើយ។   ក្នុងទិវាយោគៈអន្តរជាតិលើកទី១១ ក្រោមប្រធានបទ "យោគៈសម្រាប់ផែនដីតែមួយ សុខភាពតែមួយ" នៅខេត្តសៀមរាប និងរាជធានីភ្នំពេញ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានលើកឡើងថា អនាគតនៃវិស័យទេសចរណ៍កម្ពុជា គឺមិនអាចកាត់ផ្តាច់ពីការស្រូបទាញកំណើននៃលំហូរទេសចរ និងវិនិយោគិនឥណ្ឌាបានឡើយ ខណៈដែលកម្ពុជាបានត្រៀមលក្ខណៈសម្បត្តិគ្រប់គ្រាន់ក្នុងការទទួលទេសចរ និងវិនិយោគិនអន្តរជាតិ ជាពិសេសជនជាតិឥណ្ឌា តាមរយៈការសម្រួលបរិយាកាសបដិសណ្ឋារកិច្ចល្អ និងការទទួលស្វាគមន៍យ៉ាងកក់ក្តៅដល់ទេសចរ និងវិនិយោគិនទាំងអស់។ ក្នុងឱកាសនោះ រដ្ឋមន្ត្រីក្រសួងទេសចរណ៍ គូសបញ្ជាក់ថា ការប្រារព្ធទិវាយោគៈលើកទី១១នេះ ពុំត្រឹមតែបានចូលរួមក្នុងការលើកកម្ពស់គុណប្រយោជន៍សុខភាព ដែលកើតចេញពីការហាត់យោគៈ ដែលត្រូវបានទទួលស្គាល់ជាលក្ខណៈសកល និងក៏បានជួយជំរុញការផ្សព្វផ្សាយ គោលដៅទេសចរណ៍កម្ពុជា ឱ្យកាន់តែទូលំទូលាយទៅកាន់ទីផ្សារឥណ្ឌា ស្របពេលដែលឆ្នាំ២០២៥ ត្រូវបានបន្តជា «ឆ្នាំទេសចរណ៍កម្ពុជា-ឥណ្ឌា» ពិសេសគឺការផ្សព្វផ្សាយ កាន់តែទូលំទូលាយ នូវវប្បធម៌ អរិយធម៌ ប្រពៃណី ម្ហូបអាហារ និងសក្តានុពលទេសចរណ៍ដ៏សម្បូរបែបរបស់ប្រទេសទាំងពីរ ដែលនឹងចូលរួមដល់ការពង្រឹងចំណងមិត្តភាព ការបង្កើនទំនាក់ទំនងលើវិស័យទេសចរណ៍ ពាណិជ្ជកម្ម និងការផ្លាស់ប្តូរវប្បធម៌គ្នាទៅវិញទៅមក រវាងកម្ពុជា និងឥណ្ឌាកាន់តែស៊ីជម្រៅ។ ទន្ទឹមនឹងនេះ វេទិកានេះ នឹងចាប់យកសក្តានុពលនេះបន្ថែមទៀត ក៏ដូចជាទាក់ទាញភ្ញៀវទេសចរឥណ្ឌាកាន់តែច្រើនមកកាន់គោលដៅសំខាន់ៗរបស់កម្ពុជា ដូចជា ប្រាសាទអង្គរវត្ត និងខេត្តសៀមរាប ជាដើម។  បន្ថែមពីលើនេះ រដ្ឋមន្ត្រីក្រសួងទេសចរណ៍ បានស្នើដល់ស្ថានទូតឥណ្ឌាប្រចាំកម្ពុជា និងរដ្ឋបាលរាជធានីភ្នំពេញ បន្តគាំទ្រ និងចូលរួមក្នុងសកម្មភាពនានា និងសហការជាមួយក្រសួងទេសចរណ៍ ក្នុងការរៀបចំព្រឹត្តិការណ៍រួមគ្នាផ្សេងទៀត ទាំងនៅក្នុងប្រទេសកម្ពុជា និងនៅក្នុងប្រទេសឥណ្ឌា។  គួររំលឹកថា វេទិកាទេសចរណ៍កម្ពុជា-ឥណ្ឌា ធ្លាប់រៀបចំម្តងរួចមកហើយ កាលពីឆ្នាំមុន យុទ្ធនាការ «ឆ្នាំទេសចរណ៍កម្ពុជា-ឥណ្ឌា លើកទី១ ២០២៤ និង «ទស្សនាសៀមរាបឆ្នាំ២០២៤» ក្នុងគោលបំណងចូលរួមលើកកម្ពស់ និងផ្លាស់ប្តូរវប្បធម៌ ពិសេសពង្រឹងកិច្ចសហប្រតិបត្តិការទេសចរណ៍ទ្វេភាគី ជំរុញលំហូរទេសចរ និងទាក់ទាញវិនិយោគិនឥណ្ឌាមកវិនិយោគ លើវិស័យទេសចរណ៍កម្ពុជា ខណៈកម្ពុជារំពឹងទទួលបានទេសចរអន្តរជាតិយ៉ាងហោចឱ្យបានចាប់ពី ៧,២លាននាក់ទៅ ៧,៥លាននាក់ នៅឆ្នាំ២០២៥នេះ៕  អត្ថបទ៖ ថុន សុកេតុមាលា រូបភាព៖ ឯកសារ   

 ទំហំពាណិជ្ជកម្មរបស់វៀតណាម ជាមួយសិង្ហបុរី បានឡើងដល់កម្រិតខ្ពស់ប្រមាណ ១២ពាន់លានដុល្លារអាម៉េរិក ក្នុងរយៈពេល ៥ខែ ដើមឆ្នាំ ២០២៥នេះ។ នេះបើយោងតាមការចុះផ្សាយដោយ សារព័ត៌មានក្នុងស្រុកវៀតណាម នៅថ្ងៃនេះ។  ក្រសួងឧស្សាហកម្ម និងពាណិជ្ជកម្មវៀតណាម បានឲ្យដឹងថា វៀតណាម ជាប់ចំណាត់ថ្នាក់ជាទីផ្សារនាំចេញធំបំផុតទី ៨ របស់សិង្ហបុរី ជាមួយនឹងចំណូលនៃការនាំចេញច្រើនជាង ៩ពាន់លានដុល្លារ ក្នុងរយៈពេល ៥ខែដំបូងនៃឆ្នាំនេះ ដែលខ្ពស់ជាងរយៈពេលដូចគ្នា កាលពីឆ្នាំមុន។ ក្នុងរយៈពេលប្រាំខែដំបូងនៃឆ្នាំនេះ ចំណូលពាណិជ្ជកម្មទ្វេភាគីឈានដល់ជាង ១២ពាន់លានដុល្លារអាមេរិក កើនឡើង ២៨% បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ ការនាំចេញរបស់វៀតណាម ទៅកាន់សិង្ហបុរី បានកើនឡើងយ៉ាងខ្លាំង ៣៧% ឈានដល់ជាង ៣ពាន់ ៥រយលានដុល្លារអាមេរិក ហើយការនាំចូលឈានដល់ជាង ៩ពាន់លានដុល្លារ កើនឡើង ២៤%។  ភាគច្រើននៃទំនិញដែល វៀតណាម បាននាំចេញទៅកាន់ប្រទេសសិង្ហបុរី រួមមាន គ្រឿងម៉ាស៊ីន ទូរស័ព្ទចល័ត គ្រឿងបន្លាស់គ្រប់ប្រភេទ ឧបករណ៍អេឡិចត្រូនិក កញ្ចក់ គ្រឿងស្រវឹង និងភេសជ្ជៈជាដើម។  ចំពោះទំនិញនាំចូលពីសិង្ហបុរី មកវៀតណាមវិញ រួមមាន បរិក្ខារប្រើប្រាស់ ទូរសព្ទដៃ និងគ្រឿងបន្លាស់គ្រប់ប្រភេទ និងប្រេងសាំង។គួររម្លឹកថា ទិន្នន័យពី សហគ្រាសសិង្ហបុរី បានបង្ហាញថា ក្នុងឆ្នាំ ២០២៤ តម្លៃពាណិជ្ជកម្មរវាងប្រទេសវៀតណាម និងសិង្ហបុរី បានឡើងដល់កម្រិតខ្ពស់លើសពី ២៣ពាន់លានដុល្លារ ហើយសម្រាប់រយៈពេលពេញមួយឆ្នាំ ការនាំចេញរបស់វៀតណាម ទៅកាន់ប្រទេសសិង្ហបុរី មានចំនួនសរុបជាង ៦ពាន់ ៣រយលានដុល្លារអាមេរិក ខណៈការនាំចូលពី សិង្ហបុរី មកវិញបានកើនឡើង ៣% ដល់ជាង ១៧ពាន់លានដុល្លារ៕  អត្ថបទ៖ ងួន សុភ័ត្រ្តា រូបភាព៖ ឯកសារ 

 ក្រុមហ៊ុន Toyota Motor របស់ប្រទេសជប៉ុន បានសម្រេចដំឡើងថ្លៃរថយន្តជាមធ្យម ២៧០ដុល្លារ ចាប់ពីខែកក្កដា សម្រាប់រថយន្តដែលដាក់លក់នៅក្នុង សហរដ្ឋអាមេរិក។ នេះបើយោងតាមការចុះផ្សាយដោយ សារព័ត៌មានអន្តរជាតិធំៗ នៅថ្ងៃនេះ។ក្រុមហ៊ុន Toyota Motor បានសម្រេចដំឡើងថ្លៃរថយន្ត បន្ទាប់ពី ប្រធានាធិបតីសហរដ្ឋអាមេរិកលោក ដូណាល់ ត្រាំ បានដាក់ពន្ធ ២៥% លើរថយន្ត និងគ្រឿងបន្លាស់ដែលបាននាំចូល។ ទោះជាយ៉ាងណាក៏ដោយ អ្នកនាំពាក្យក្រុមហ៊ុន Toyota បានបដិសេធមិនបកស្រាយថា ពន្ធគយនេះគឺពិតជាមានឥទ្ធិពលដោយផ្ទាល់ទៅលើ ការកើនឡើងនៃតម្លៃរថយន្ត។អ្នកនាំពាក្យក្រុមហ៊ុន Toyota បានបន្តថា ការដំឡើងតម្លៃចុងក្រោយបំផុត គឺជាផ្នែកមួយនៃការត្រួតពិនិត្យជាប្រចាំរបស់ក្រុមហ៊ុន អំពីតម្លៃ។ចំពោះ តម្លៃរថយន្ត Lexus ដែលជាម៉ាកយីហោប្រណីតរបស់ Toyota ក៏នឹងកើនឡើងជាមធ្យម ២០៨ ដុល្លារផងដែរ។ ការដំឡើងតម្លៃនេះ ធ្វើឡើងបន្ទាប់ពីការប្រកាសស្រដៀងគ្នាពី ក្រុមហ៊ុនផលិតរថយន្តជប៉ុនមួយផ្សេងទៀតគឺក្រុមហ៊ុន Mitsubishi Motors Corp ដែលថ្មីៗនេះ បានបង្ហាញពី ការកើនឡើងតម្លៃសម្រាប់ម៉ូដែលចំនួន ៣ ដែលដាក់លក់នៅសហរដ្ឋអាមេរិក ដោយលើកឡើងពីការកែសម្រួលតម្លៃស្តង់ដារ ដោយផ្អែកលើ ការគណនាអតិផរណា។ គួរជម្រាបថា ទីផ្សារអាមេរិកសម្រាប់រថយន្តជប៉ុន ពឹងផ្អែកយ៉ាងខ្លាំងលើការនាំចូល ហើយកំពុងប្រឈមមុខនឹង ផលប៉ះពាល់នៃវិធានការពន្ធរបស់ប្រធានាធិបតី ដូណាល់ ត្រាំ ដែលបានដាក់ពន្ធ ២៥% លើរថយន្ត និងគ្រឿងបន្លាស់រថយន្ត ដែលចូលជាធរមានរួចហើយ៕  អត្ថបទ៖ ងួន សុភ័ត្រ្តា រូបភាព៖ ឯកសារ  

  សម្តេចមហាបវរធីបតី បានអំពាវនាវដល់អាជីវករលក់ដូរបន្លែ និងផ្លែឈើ កុំឆ្លៀតឱកាសតម្លើងថ្លៃទំនិញ ដោយយកចំណេញហួសប្រមាណ ដែលនាំឲ្យមានការលំបាកដល់ប្រជាពលរដ្ឋអ្នកប្រើប្រាស់ក្នុងស្រុក។  នៅថ្ងៃទី២៣ ខែមិថុនា ឆ្នាំ២០២៥នេះ ក្នុងឱកាសអញ្ជើញជាអធិបតី បិទកិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជា នៅខេត្តសៀមរាប សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា បានអំពាវនាវដល់ប្រជាពលរដ្ឋដែលជាអ្នកលក់ដូរបន្លែ និងផ្លែឈើ កុំឆ្លៀតឱកាសតម្លើងថ្លៃទំនិញ ដោយយកចំណេញហួសប្រមាណ ដែលនាំឲ្យមានការលំបាកដល់ប្រជាពលរដ្ឋអ្នកប្រើប្រាស់ក្នុងស្រុកខ្លួនឯង ពោលត្រូវរួមគ្នា សាមគ្គីគ្នា បន្ទាប់ពីកម្ពុជាមានការប្រមាថនិងគំរាមគំហែងពីភាគីយោធាថៃ ខណៈសម្តេចមហាបវរធីបតី មានការជឿជាក់ថា អាជីវករខ្មែរមិនតម្លើងថ្លៃទំនិញនៅពេលនេះឡើយ។   ក្នុងឱកាសនោះ សម្តេចមហាបវរធីបតី ក៏បានស្នើដល់ក្រសួងពាណិជ្ជកម្ម ត្រួតពិនិត្យមុខទំនិញ ការចែកចាយទំនិញនៅតាមទីផ្សារ ទាំងគុណភាព និងត្រូវយកចិត្តទុកដាក់គ្រប់គ្រងតម្លៃលក់ដូរទំនិញលើទីផ្សារ សំដៅបញ្ចៀសការឆ្លៀតឱកាសលួចតម្លើងថ្លៃមុខទំនិញមួយចំនួនផ្សេងៗ បន្ទាប់ពីការផ្ដាច់ទំនិញមួយចំនួនមិនឲ្យថៃនាំចូលមកកម្ពុជា មានដូចជា បន្លែ ផ្លែឈើ ភេសជ្ជៈគ្រប់ប្រភេទ ប្រេងសាំង និងឧស្ម័នគ្រប់ប្រភេទ ត្រូវបានកាត់ផ្ដាច់ចោលទាំងស្រុង មិនឲ្យនាំចូលពីប្រទេសថៃឡើយ។ជាមួយគ្នានេះ រាជរដ្ឋាភិបាលកម្ពុជា បានងាកមកជំរុញឲ្យមានការប្រើប្រាស់ និងគាំទ្រផលិតផលក្នុងស្រុកជំនួសវិញ ខណៈកម្ពុជាមានលទ្ធភាពម្ចាស់ការណ៍គ្រប់គ្រាន់ និងឯករាជ្យក្នុងការរស់នៅ ដោយមិនពឹងដង្ហើមប្រទេសជិតខាងដើម្បីដកនោះឡើយ ពោល បើទោះបីមិនមានទំនិញមួយចំនួននាំចូល តែអាចផ្គត់ផ្គង់បាននៅក្នុងស្រុក។  លើសពីនេះ ក្រសួងពាណិជ្ជកម្ម នឹងអនុវត្តយ៉ាងម៉ឺងម៉ាត់តាមការណែនាំរបស់ថ្នាក់ដឹកនាំរាជរដ្ឋាភិបាលកម្ពុជា ដើម្បីរក្សាស្ថិរភាពតម្លៃទំនិញនៅលើទីផ្សារ។ ក្រសួង នឹងប្រើប្រាស់យន្តការដែលមានស្រាប់ ដើម្បីធ្វើការពង្រឹងលើមុខទំនិញយុទ្ធសាស្រ្ត ក្នុងនោះ ក៏មានការសម្របសម្រួលរបស់មន្ទីរនៅតាមបណ្ដាខេត្តជាប់ព្រំដែន ដើម្បីសម្រួលឱ្យមានលំហូរទំនិញទៅកាន់ទីផ្សារ និងការអន្តរាគមន៍លើថ្លៃទំនិញផងដែរ។   ទន្ទឹមនឹងនេះ ក្រសួងពាណិជ្ជកម្ម បានស្នើឱ្យពលរដ្ឋខ្មែរងាកមកប្រើប្រាស់កសិផល និងទំនិញផលិតក្នុងស្រុក ហើយជៀសវាងការដំឡើងថ្លៃណាមួយនៅក្នុងស្ថានភាព ដែលប្រទេសជាតិ កំពុងមានបញ្ហាប្រឈម។ សូមជម្រាបថា យោងតាមអគ្គនាយកដ្ឋានគយ និងរដ្ឋាករកម្ពុជា បានបង្ហាញថា ក្នុងរយៈពេល ៥ខែ (ខែមករា-ឧសភា) កម្ពុជា-ថៃ សម្រេចទំហំពាណិជ្ជកម្ម រួមគ្នាមានចំនួន ១ ៨៧៩លានដុល្លារអាម៉េរិក។ ក្នុងនោះ ទំហំពាណិជ្ជកម្មទ្វេភាគីមានកំណើន ៨% បើធៀបនឹងរយៈពេលដូចគ្នាកាលពីឆ្នាំ២០២៤៕  អត្ថបទ៖ ថុន សុកេតុមាលា រូបភាព៖ ក្រុមការងារនាយករដ្ឋមន្ត្រី  

 រដ្ឋមន្ត្រីក្រសួងពាណិជ្ជកម្ម បានបន្តជំរុញ និងលើកទឹកចិត្តឱ្យ វិនិយោគិនកូរ៉េ មកបណ្តាក់ទុន និងធ្វើប្រតិបត្តិការអាជីវកម្មឱ្យកាន់តែច្រើនបន្ថែមទៀត នៅកម្ពុជា ជាពិសេសក្នុងវិស័យសក្តានុពល ដូចជាកសិកម្មទំនើប ឧស្សាហកម្មកែច្នៃចំណីអាហារ វិស័យយានយន្ត អេឡិចត្រូនិក និងបច្ចេកវិទ្យាឌីជីថល។  លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានថ្លែងក្នុងពិធីបើកព្រឹត្តិការណ៍ Mini-Korea Brand & Entertainment Expo 2025 ឱ្យបានដឹងថា ក្នុងបរិការណ៍បច្ចុប្បន្ន ព្រឹត្តិការណ៍ពិព័រណ៍នេះ បាននិងកំពុងដើរតួនាទីយ៉ាងសំខាន់ ក្នុងការជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ រវាង កម្ពុជានិងសាធារណរដ្ឋកូរ៉េ និងការបង្កើនទំនាក់ទំនងរវាងប្រជាជន និងប្រជាជន ដែលជាផ្នែកមួយក្នុងការជួយបង្កើនគុណតម្លៃនៃទំនាក់ទំនងកិច្ចសហប្រតិបត្តិការទ្វេភាគី ការផ្លាស់ប្តូរប្រពៃណី វប្បធម៌ ក្នុងស្មារតីលើកកម្ពស់មិត្តភាពឱ្យកាន់តែរឹងមាំនិងស៊ីជម្រៅ។ លើសពីនេះ ព្រឹត្តិការណ៍ពិព័រណ៍នេះ ក៏នឹងបង្កើនតម្លៃបន្ថែម ដោយនាំមកនូវកាលានុវត្តភាពរួមគ្នាលើផ្នែកពាណិជ្ជកម្មនិងវិនិយោគ ព្រមទាំងការស្វែងរកកិច្ចសហការ ដើម្បីផលប្រយោជន៍រួមនៃប្រទេសទាំង២ ផងដែរ។លោកជំទាវ ក៏បានបន្តជំរុញ និងលើកទឹកចិត្តឱ្យ វិនិយោគិនកូរ៉េមកបណ្តាក់ទុន និងធ្វើប្រតិបត្តិការអាជីវកម្មឱ្យកាន់តែច្រើនបន្ថែមទៀតនៅកម្ពុជា ជាពិសេសក្នុង វិស័យមានសក្តានុពលខ្ពស់ ដែលអាចថ្ពក់ទៅនឹងខ្សែច្រវាក់ផលិតកម្មនៅកូរ៉េ។ ជាចុងក្រោយ ក្រសួងពាណិជ្ជកម្ម ក៏បន្តលើកទឹកចិត្តឱ្យ ទីភ្នាក់ងារជំរុញពាណិជ្ជកម្មនិងវិនិយោគកូរ៉េ ពិនិត្យលទ្ធភាពចាប់ដៃគូសហការជាមួយ ក្រុមការងារជំរុញការនាំចេញ និងអគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្ម ដើម្បីរៀបចំជាកម្មវិធី Roadshow, សិក្ខាសាលាផ្សព្វផ្សាយអំពីតម្រូវការផលិតផល/សេវាកម្មនៅទីផ្សារកូរ៉េ-កម្ពុជា និងនីតិវិធីនាំចូលនានា, ជំនួបផ្គូរផ្គងធុរកិច្ច, និងកម្មវិធីតាំងពិព័រណ៍រួមគ្នា ជាដើម ដើម្បីបន្តនិងពង្រីកវិសាលភាពក្នុងការបង្កើតឱកាសដល់វិស័យឯកជនទាំងពីរ៕   អត្ថបទ៖ ងួន សុភ័ត្រ្តា រូបភាព៖ ឯកសារ  

 ក្រុមប្រឹក្សាអភិវឌ្ឍន៍កម្ពុជា ជំរុញការវិនិយោគបៃតងក្នុងតំបន់សេដ្ឋកិច្ចពិសេសនៅកម្ពុជា តាមរយៈការទាក់ទាញវិនិយោគិនផ្ទាល់ពីបរទេស ជំរុញកំណើនឧស្សាហកម្មនិងការធ្វើពិពិធកម្មសេដ្ឋកិច្ច បង្កើតការងារ និងរួមបញ្ចូលកម្ពុជាទៅក្នុងខ្សែច្រវាក់តម្លៃសកល។ ក្នុងសិក្ខាសាលាស្តីពីការជំរុញការវិនិយោគបៃតងក្នុងតំបន់សេដ្ឋកិច្ចពិសេសនៅកម្ពុជា ឯកឧត្តមបណ្ឌិត សរ សិនិរ៉ា អគ្គលេខាធិការរងគណៈកម្មាធិការវិនិយោគកម្ពុជា បានលើកឡើងថា កម្ពុជា និងជំរុញការវិនិយោគបៃតងក្នុងតំបន់សេដ្ឋកិច្ចពិសេសនៅកម្ពុជា ដោយការទាក់ទាញវិនិយោគិនផ្ទាល់ពីបរទេស ជំរុញកំណើនឧស្សាហកម្ម និងការធ្វើពិពិធកម្មសេដ្ឋកិច្ច បង្កើតការងារ និងរួមបញ្ចូលកម្ពុជាទៅក្នុងខ្សែច្រវាក់តម្លៃសកល។ ជាការកត់សម្គាល់ ការនាំចេញផលិតផលពីតំបន់សេដ្ឋកិច្ចពិសេសមានរហូតដល់ទៅ ២៣-២៥% នៃការនាំចេញសរុបរបស់កម្ពុជាលើទីផ្សារពិភពលោកក្នុងឆ្នាំ ២០២២-២០២៤ កាលពីពេលកន្លងទៅ។ ជាមួយគ្នានេះ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) ធ្លាប់បានគូសបញ្ជាក់ថា តំបន់សេដ្ឋកិច្ចពិសេសមិនត្រឹមតែចូលរួមចំណែកក្នុងការទាក់ទាញវិនិយោគិនជាតិ និងអន្តរជាតិ ឱ្យបើករោងចក្រ ឬ សហគ្រាស នៅក្នុងប្រទេសកម្ពុជា និងជួយលើកកម្ពស់សមត្ថភាពនាំចេញទំនិញ ទៅទីផ្សារអន្តរជាតិប៉ុណ្ណោះទេ ប៉ុន្តែក៏ជួយបំពេញតម្រូវការប្រើប្រាស់ក្នុងស្រុកផងដែរ។  ទន្ទឹមនឹងនេះ តំបន់សេដ្ឋកិច្ចពិសេស ដើរតួនាទីយ៉ាងសំខាន់ក្នុងការជួយទាក់ទាញ និងលើកទឹកចិត្តឱ្យអ្នកវិនិយោគចម្រុះជាតិសាសន៍ ចូលមកបណ្តាក់ទុននៅកម្ពុជាកាន់តែច្រើន។ តំបន់សេដ្ឋកិច្ចពិសេស បានផ្តល់ការងារដល់ប្រជាជន និងរួមចំណែកយ៉ាងសំខាន់ដល់ចំណូលសេដ្ឋកិច្ច។ គួរជម្រាបថា កម្ពុជា មានច្បាប់ស្តីពីវិនិយោគនៃព្រះរាជាណាចក្រកម្ពុជា និងអនុក្រឹត្យស្តីពីការអនុវត្តច្បាប់ដែលជំរុញ និងលើកទឹកចិត្តការវិនិយោគបៃតង ដែលរួមមានការវិនិយោគ ក្នុងវិស័យថាមពលបៃតង បច្ចេកវិទ្យា ដែលរួមចំណែកដល់ការបន្សុំា និងការកាត់បន្ថយការប្រែប្រួលអាកាសធាតុការគ្រប់គ្រង ការការពារបរិស្ថាន និងការអភិរក្សជីវៈចម្រុះ និងសេដ្ឋកិច្ចចក្រា ជាដើម៕  អត្ថបទ៖ ថុន សុកេតុមាលា រូបភាព៖ ឯកសារ  

 នៅសប្តាហ៍ទី៤ ខែមិថុនានេះ តម្លៃប្រេងឆៅសកល បានកើនឡើងប្រមាណ ២% បន្ទាប់ពី អាមេរិក ចាប់ផ្តើមចូលរួមជាមួយ អ៊ីស្រាអែល វាយប្រហារ ប្រទេសអ៊ឺរ៉ង់។ នេះបើយោងតាមការចេញផ្សាយដោយ សារព័ត៌មានអន្តរជាតិធំៗ នៅថ្ងៃនេះ។ នៅលើទីផ្សារប្រេងសកល ក្នុងសប្តាហ៍ទី៤ ខែមិថុនានេះ តម្លៃប្រេងឆៅ Brent របស់អង់គ្លេស ស្ថិតនៅរង្វង់ ៧៨ដុល្លារអាមេរិកក្នុងមួយបារ៉ែល បន្ទាប់ពីកើនឡើង ២% ខណៈប្រេងឆៅ West Texas Intermediate របស់អាមេរិក ស្ថិតនៅរង្វង់ ៧៥ដុល្លារអាមេរិកក្នុងមួយបារ៉ែល ដែលមានការកើនឡើងប្រមាណ ២% ដូចគ្នា។ ការកើនឡើងនៃតម្លៃប្រេង បានកើតឡើងភ្លាមៗ បន្ទាប់ពីប្រធានាធិបតីអាមេរិកលោក ដូណាល់ ត្រាំ បានបញ្ជាក់ថា លោកបាន បំផ្លាញ ទីតាំងនុយក្លេអ៊ែរសំខាន់ៗរបស់អ៊ីរ៉ង់ នៅក្នុងការវាយប្រហារ កាលពីចុងសប្តាហ៍ ដោយចូលរួមក្នុងការវាយលុកជាមួយ អ៊ីស្រាអែល ក្នុងជម្លោះនៅមជ្ឈិមបូព៌ាមួយនេះ។ជាក់ស្តែង អ៊ីរ៉ង់ គឺជាប្រទេសផលិតប្រេងឆៅធំលំដាប់ទី ៣ របស់អង្គការ OPEC។ អ្នកនៅក្នុងទីផ្សារប្រេង រំពឹងទៀតថា ប្រេងនឹងកើនឡើងតម្លៃបន្ថែមទៀត បើសិនជា អ៊ីរ៉ង់ សងសឹកដោយបិទច្រកសមុទ្រ Hormuz ដែលជាផ្លូវទឹកដឹកជញ្ជូនប្រេងដ៏សំខាន់ និងរួមចំណែករហូតដល់ទៅ ២០% នៃលំហូរផ្គត់ផ្គង់ប្រេងឆៅសកល។ អ៊ីរ៉ង់ និងអ៊ីស្រាអែលបានផ្លាស់ប្តូរការវាយប្រហារតាមផ្លូវអាកាស និងកាំជ្រួចកាលពីថ្ងៃចន្ទ ខណៈដែលភាពតានតឹងជាសកលបានកើនឡើងជុំវិញការឆ្លើយតបដែលរំពឹងទុករបស់ទីក្រុងតេអេរ៉ង់ចំពោះការវាយប្រហាររបស់សហរដ្ឋអាមេរិកលើទីតាំងនុយក្លេអ៊ែររបស់ខ្លួន។ ក្រុមហ៊ុន Goldman Sachs បានរាយការណ៍ថា តម្លៃប្រេងឆៅ Brent អាចឡើងដល់កំពូល ក្នុងរយៈពេលខ្លីត្រឹម ១១០ដុល្លារក្នុងមួយបារ៉ែល ប្រសិនបើប្រេង ដឹកជញ្ជូនតាមផ្លូវទឹកដ៏សំខាន់ ត្រូវបានកាត់បន្ថយពាក់កណ្តាល សម្រាប់រយៈពេល ១ខែ ហើយធ្លាក់ចុះមកវិញ ១០% សម្រាប់រយៈពេល ១១ខែបន្ទាប់។ ជាចុងក្រោយអ្នកវិភាគនៅក្នុងទីផ្សារប្រេងសកល បានលើកឡើងថា ដោយសារច្រកសមុទ្រ Hormuz គឺជាច្រកមិនអាចខ្វះបាន សម្រាប់ការនាំចេញប្រេងផ្ទាល់របស់អ៊ីរ៉ង់ ដែលជាប្រភពសំខាន់នៃប្រាក់ចំណូលជាតិរបស់ខ្លួន ដូច្នេះ ការបិទច្រកនេះ នឹងធ្វើឱ្យខូចខាតសេដ្ឋកិច្ចយ៉ាងធ្ងន់ធ្ងរលើ អ៊ីរ៉ង់ខ្លួនឯង ដែលធ្វើឱ្យវាក្លាយជា ដាវមុខពីរ៕   អត្ថបទ៖ ងួន សុភ័ត្រ្តា រូបភាព៖ ឯកសារ 

 ប្រធានសមាគមអ្នកផលិតអំបិលកំពត-កែប បានឱ្យដឹងថា កម្ពុជាប្រមូលផលអំបិលបានប្រមាណ ៣ម៉ឺនតោន ថយចុះ ៦០% ខណៈទិន្នផលអំបិលកំពត កែប ធ្លាក់ចុះដោយសារកត្តាអាកាសធាតុ ត្បិតតែឆ្នាំនេះមានភ្លៀងធ្លាក់ច្រើន នាំឱ្យការប្រមូលផលអំបិលមិនបានច្រើនក៏ពិតមែន ប៉ុន្តែកម្ពុជានៅតែមានអំបិលសម្រាប់ការផ្គត់ផ្គង់តម្រូវការទីផ្សារក្នុងស្រុក។កត្តាអាកាសធាតុមានភ្លៀងធ្លាក់ច្រើនចាប់តាំងខែមីនា-មេសា បានធ្វើឱ្យការប្រមូលផលអំបិលកំពត កែប ដែលជាផលិតផលម៉ាកសម្គាល់ភូមិសាស្ត្រ«GI» ក្នុងឆ្នាំ២០២៥នេះ ធ្លាក់ចុះយ៉ាងច្រើនបើធៀបនឹងឆ្នាំ២០២៤ ដោយសម្រេចបានត្រឹមជាង ៣ម៉ឺន១ពាន់តោន ប៉ុណ្ណោះ។  លោក ប៊ុន ណារិន ប្រធានសមាគមអ្នកផលិតអំបិលកំពត-កែប បានឲ្យក្រុមការងារ សេដ្ឋកិច្ចភីអិនអិនដឹងថា កត្តាទឹកភ្លៀង បានធ្វើឱ្យការធ្វើស្រែអំបិលឆ្នាំនេះមិនសមប្រកប ព្រោះវាបានធ្វើឱ្យពេលវេលានៃការផលិត និងការប្រមូលផលអំបិលកាន់តែមានពេលខ្លី។ ដូច្នេះ ការប្រមូលផលអំបិលនៅឆ្នាំនេះ ទទួលបានចំនួន ៣ម៉ឺន១ពាន់៨រយតោន មានការថយចុះ ៦០% បើធៀបទៅនឹងឆ្នាំមុន។ ទោះបីឆ្នាំនេះ ទិន្នផលធ្លាក់ចុះច្រើន តែពលរដ្ឋមិនខ្វះខាតអំបិលបរិភោគនោះទេ ព្រោះកម្ពុជានៅសល់អំបិលក្នុងឃ្លាំងប្រមាណ ៥ម៉ឺនតោនទៀត កាលពីឆ្នាំ២០២៤ វាមិនប៉ះពាល់ដល់ការផ្គត់ផ្គង់ក្នុងស្រុកនោះឡើយ។  លោក ប៊ុន ណារិន បានឲ្យដឹងថា កសិករប្រាកដណាស់នឹងជួបបញ្ហាប្រឈមខ្លាំង ទៅលើការប្រមូលផលបានចំនួនតិច ចំណាយដើមទុនច្រើន នៅពេលដែលអំបិលចុះថោកខ្លាំង កសិករត្រូវបង្ខំចិត្តលក់ដើម្បីប្រមូលលុយមកបន្តការផលិត។ លើសពីនេះ បញ្ហាប្រឈមមួយទៀត គឺនៅរដូវប្រមូលផលកម្ពុជាខ្វះកំលាំងពលកម្ម ផលិតកម្មពឹងផ្អែកលើអាកាសធាតុអំបិលពុំមានគុណភាពតាមស្តង់ដា បច្ចេកទេសតាមបែបបុរាណ មិនទាន់មានទំនើបកម្ម និងហេដ្ឋារចនាសម្ព័ន្ធសិប្បកម្មអំបិល មានសភាពចាស់ទ្រុឌទ្រោម ខ្វះទុនបន្ថែមសម្រាប់ជួសជុល និងកែលម្អរ។ ប្រធានសមាគមអ្នកផលិតអំបិលកំពត-កែប រូបនេះ បានគូសបញ្ជាក់ថា កាលពីមុនពលករមិនទាន់នាំគ្នាទៅធ្វើការនៅប្រទេសថៃ មានពលករជាច្រើននាំគ្នាមករកការងារធ្វើនៅតំបន់ស្រែអំបិលចន្លោះពី ៥ពាន់ ទៅ១ម៉ឺននាក់ ក្នុងមួយឆ្នាំៗ ខណៈនៅពេលនេះដល់រដូវប្រមូលផលម្តងៗ រកបានពលករត្រឹមតែ ១៥នាក់ ប៉ុណ្ណោះ។  ប្រធានសមាគម សំណូមពរនិងលើកទឹកចិត្តទៅដល់អ្នកដែលកំពុងស្វែងរកការងារធ្វើក្នុងស្រុក ងាកមកសម្លឹងមើលការងារណាដែលអ្នកពេញចិត្ត មិនចាកឆ្ងាយពីស្រុកកំណើត។ លោក ប៊ុន ណារិន បានបន្តថា ចំពោះតម្លៃអំបិលវិញ ហាក់កើនឡើនជាងមុនបន្ដិច ដោយអំបិលលេខ១ អាចលក់ចេញបានចន្លោះពី ១ម៉ឺន១ពាន់រៀល ទៅ ១ម៉ឺន២ពាន់រៀល ក្នុង១បាវ ទម្ងន់៥០គីឡូ ចំណែក អំបិលលេខ២ និង លេខ៣វិញ លក់ចេញក្នុងតម្លៃចន្លោះពី ៧ពាន់រៀល ទៅ ៨ពាន់រៀល ក្នុង១បាវ។ ប្រធានសមាគមរូបនេះ បានបន្ថែមថា អំបិលសម្គាល់ភូមិសាស្ត្រទំនិញអំបិលកំពត-កែប កំពុងចរាចរនៅលើទីផ្សារក្នុងស្រុក និងនាំចេញក្នុងបរិមាណតិចតួចទៅកាន់ប្រទេសជប៉ុន និងសហភាពអឺរ៉ុប។  យ៉ាងណា ក្រោយកើតមានសង្រ្គាមរុស្សី និងអ៊ុយក្រែន ការនាំចេញទៅអឺរ៉ុប បានថមថយដោយមិនមានការបញ្ជាទិញបន្ត ខណៈសមាគមកំពុងព្យាយាមបន្តចរចានាំចេញទៅកាន់ប្រទេសជប៉ុនបន្ថែម។គួររំលឹកថា ក្នុងជំនួបសវនាការការងារជាមួយគណៈកម្មការទី៩ នៃព្រឹទ្ធសភា កាលពីថ្ងៃទី៦ ខែកុម្ភៈ ឆ្នាំ២០២៥ រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឯកឧត្តម ហែម វណ្ណឌី បានឲ្យដឹងថា ការអភិវឌ្ឍស្រែអំបិល គឺកម្ពុជាមានស្រែអំបិលចំនួនពីរកន្លែង លើផ្ទៃដីសរុបជិត ៤ពាន់ហិកតា ក្នុងនោះ ស្រែអំបិលនៅខេត្តកំពតមានចំនួន ៣ពាន់ហិកតា និងនៅខេត្តកែប ៤៩៧ ហិកតា។  យោងតាមក្រសួងឧស្សាហកម្ម ផលិតកម្មអំបិលកម្ពុជាសម្រេចបានជាង ១៦ម៉ឺនតោន នៅក្នុងឆ្នាំ ២០២៤ លើផ្ទៃដីស្រែអំបិលជិត ៤ពាន់ហិកតា ក្នុងខេត្តកំពត និងខេត្តកែប។ កម្ពុជាត្រូវការអំបិលចន្លោះពី ៧-១០ ម៉ឺនតោន ដើម្បីបំពេញតម្រូវការក្នុងស្រុក។ ក្រៅពីផលអំបិលក្នុងស្រុក បណ្តាខេត្តនៅជាប់ព្រំដែនថៃ និងវៀតណាម ក៏តែងនាំចូលអំបិលមកដាក់លក់ផងដែរ ប៉ុន្តែនៅឆ្នាំ ២០២៤ ពុំមានការនាំអំបិលចូលពីបរទេសនោះទេ។ ក្រសួង ក៏បានកំណត់វិធាននៃការបង្កើត និងគ្រប់គ្រងសហគមន៍អំបិលខេត្តកំពត កែប ដើម្បីលើកកម្ពស់ការផលិត ការធ្វើពិពិធកម្មផលិតកម្មអំបិល ការអភិរក្ស និងការអភិវឌ្ឍដីស្រែអំបិល ដើម្បីលើកកម្ពស់គុណភាពការផលិត និងស្តង់ដារសម្រាប់ផលិតកម្ម។សូមជម្រាបថា យុទ្ធសាស្ត្របញ្ចកោណដំណាក់កាលទី១ របស់រដ្ឋាភិបាល ដោយគូសរំលេចពីអាទិភាពនៃការអភិវឌ្ឍសហគ្រាសធុនតូច និងមធ្យមក្នុងស្រុក ដែលអាទិភាពមួយរបស់រាជរដ្ឋាភិបាល គឺការចលនាដើម្បីលើកកម្ពស់ការផលិតក្នុងស្រុក ដោយផ្តោតលើគុណភាព ផលិតភាព និងភាពប្រកួតប្រជែងលើទីផ្សារ អំបិលជាទំនិញយុទ្ធសាស្ត្រមួយ ដែលត្រូវបានប្រើប្រាស់ប្រចាំថ្ងៃ និងសម្រាប់ការកែច្នៃផលិតផលផ្សេងៗ។ ជាយុទ្ធសាស្ត្រអភិវឌ្ឍន៍អំបិល ឆ្នាំ២០២២ -២០២៦ និងបានជំរុញឲ្យអ្នកផលិតអំបិល ឲ្យស្វែងរកទីផ្សារថ្មីៗ ដែលមិនមែនជាទីផ្សារប្រពៃណី ដូចជា ការប្រើប្រាស់អំបិលធ្វើជាក្ល័រដើម្បីប្រព្រឹត្តកម្មទឹកស្អាតជាដើម។ ក្រសួង កំពុងអនុវត្តកំណែទម្រង់មួយចំនួន រួមទាំងការកែសម្រួលថ្លៃ រយៈពេល និងសុពលភាពនៃសេវាសាធារណៈរបស់ខ្លួន និងកំពុងប្រែក្លាយមន្ទីរពិសោធន៍ជាតិ ទៅជាគ្រឹះស្ថានរដ្ឋបាលសាធារណៈ ក្នុងគោលបំណងផ្តល់សេវាប្រកបដោយវិជ្ជាជីវៈជូនដល់វិស័យឯកជន៕   អត្ថបទ៖ ថុន សុកេតុមាលា រូបភា៖ ឯកសារ 

 ក្រសួងសេដ្ឋកិច្ច និងហិរញ្ញវត្ថុកម្ពុជា បានប្រកាសឱ្យដឹងថា ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ស្វាគមន៍នូវ ក្រុមហ៊ុនចុះបញ្ជីសរុបជាង ៤ម៉ឺន ៦ពាន់ក្រុមហ៊ុន គិតត្រឹមថ្ងៃទី ៣១ ខែឧសភា ឆ្នាំ ២០២៥នេះ ដែលមានទុនចុះបញ្ជីសរុបលើសពី ១៨ពាន់លានដុល្លារអាមេរិក។  បើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុកម្ពុជា បានបង្ហាញថា អំឡុងពេល ៥ឆ្នាំមកនេះ ក្រុមហ៊ុនចំនួនជាង ៤ម៉ឺន ៦ពាន់ បានចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន និងទទួលបានការអនុម័ត ដែលមានទំហំទឹកប្រាក់ជាង ១៨ពាន់លានដុល្លារអាមេរិក។ ចំពោះ អាជីវកម្មដែលបានចុះបញ្ជីគិតជាដើមទុនវិនិយោគតាមកម្មវត្ថុអាជីវកម្ម គឺមានចំនួន ៥ លេចធ្លោជាងគេ រួមមាន ការសាងសង់អគារ មានទឹកប្រាក់ ១,៤ពាន់លានដុល្លារអាមេរិក, សកម្មភាពសេវាកម្មស្នាក់នៅ មានប្រមាណ ១,៥ពាន់លានដុល្លារអាមេរិក, សកម្មភាពអចលនទ្រព្យ ដោយប្រើអចលនទ្រព្យផ្ទាល់ខ្លួន ឬជួលពីគេ មានទុនចុះបញ្ជី ១,៤ពាន់លានដុល្លារ, សកម្មភាពពិគ្រោះយោបល់ផ្នែកគ្រប់គ្រង មាន ៨៨៤លានដុល្លារ, កម្មន្តសាលសម្លៀកបំពាក់ លើកលែងសម្លៀកបំពាក់ធ្វើពីរោមសត្វ មាន ៨៩២លានដុល្លារ, និងវិស័យផ្សេងទៀតគឺប្រមាណ ១២ពាន់លានដុល្លារ។ រីឯ កម្មវត្ថុអាជីវកម្មដែលបានចុះបញ្ជីច្រើនជាងគេគឺ សកម្មភាពសេវាកម្មភោជនីយដ្ឋាន និងសេវាកម្មផ្គត់ផ្គង់អាហារចល័តមានជាង ៤ពាន់សហគ្រាស ការលក់ដុំឯកទេសផ្សេងៗមានជាង ២ពាន់ ៦រយសហគ្រាស, ការលក់ដុំទំនិញប្រើប្រាស់ក្នុងផ្ទះមាន ២ពាន់ ៣រយ, ការសាងសង់អគារ មាន ១ពាន់ ៨រយ និងកម្មវត្ថុផ្សេងៗមានជាង ៣ម៉ឺន ៣ពាន់សហគ្រាស ស្មើនឹង ៧២% នៃចំនួនក្រុមហ៊ុន/សហគ្រាសសរុប។ ចំពោះម្ចាស់ក្រុមហ៊ុន/សហគ្រាស ដែលបានចុះបញ្ជី ដែលជាស្រ្តី មានប្រមាណ ៣៧% នៃចំនួនសរុប ១ម៉ឺន ៧ពាន់នាក់។សូមជម្រាបថា ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ត្រូវបានដាក់ឱ្យប្រើប្រាស់ជាផ្លូវការ បានរយៈពេល ៥ឆ្នាំមកហើយ ដោយបានជួយសម្រួលដល់ នីតិវិធីនៃការចុះបញ្ជីអាជីវកម្មរបស់ធុរជន រួមទាំងបានចូលរួមចំណែកក្នុងការលើកកម្ពស់បរិយាកាសធុរកិច្ច និងសេដ្ឋកិច្ចឌីជីថល ក្នុងប្រទេសកម្ពុជា៕  អត្ថបទ៖ ងួន សុភ័ត្រ្តា រូបភាព៖ ឯកសារ 

 រដ្ឋមន្ត្រីក្រសួងទេសចរណ៍ អំពាវនាវ ឱ្យចូលរួមលើកតម្លៃ និងប្រើប្រាស់ផលិតផលក្នុងស្រុក ជាពិសេសផលិតផល មានម៉ាកសម្គាល់ភូមិសាស្រ្តទំនិញជាការជំរុញកំណើនទាំងសេដ្ឋកិច្ចជាតិ និងសេដ្ឋកិច្ចពលរដ្ឋ។  នៅថ្ងៃទី១៧ ខែមិថុនា ឆ្នាំ២០២៥ ក្នុងឱកាសអញ្ជើញជាអធិបតីក្នុងពិធីបើកសិក្ខាសាលា ស្តីពីការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ក្នុងវិស័យទេសចរណ៍ នៅមជ្ឈមណ្ឌលសហប្រតិបត្តិការ កម្ពុជា-កូរ៉េ (CKCC) ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអំពាវនាវឱ្យចូលរួមលើកតម្លៃ និងប្រើប្រាស់ផលិតផលក្នុងស្រុក ជាពិសេសផលិតផល ដែលមានម៉ាកសម្គាល់ភូមិសាស្រ្តទំនិញ ជួយជំរុញកំណើនសេដ្ឋកិច្ចជាតិ និងសេដ្ឋកិច្ចរបស់ប្រជាពលរដ្ឋ (GI) ព្រមទាំងចូលរួមប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ក្នុងវិស័យទេសចរណ៍។ ក្នុងឱកាសនោះ រដ្ឋមន្ត្រីក្រសួងទេសចរណ៍ បានលើកឡើងថា ផលិតផលក្លែងក្លាយ មិនត្រឹមតែបានប៉ះពាល់ដល់សុខភាព និងសុវត្ថិភាពអ្នកប្រើប្រាស់ប៉ុណ្ណោះទេ ប៉ុន្តែថែមទាំងបានធ្វើឱ្យបាត់ជំនឿទុកចិត្តដល់វិស័យទេសចរណ៍ និងកិត្តិនាមកម្ពុជា ថែមទៀតផងដែរ ខណៈការចុះបញ្ជីម៉ាកសម្គាល់ភូមិសាស្ត្រទំនិញ រួមចំណែកក្នុងការអភិវឌ្ឍសង្គម សេដ្ឋកិច្ច វប្បធម៌ និងទេសចរណ៍។ បន្ថែមពីលើនេះ ឯកឧត្តមរដ្ឋមន្ត្រី បានជំរុញការលើកតម្កើងផលិតផលខ្មែរ និងគាំទ្រកសិករ និងអ្នកផលិតក្នុងស្រុក ឱ្យផ្តោតលើគុណភាព ជាពិសេសលើកទឹកចិត្តភ្ញៀវទេសចរ ឱ្យទិញវត្ថុអនុស្សាវរីយ៍ ដែលធ្វើដោយដៃ និងផលិតនៅកម្ពុជា។ ជាមួយគ្នានេះ រដ្ឋមន្ត្រីក្រសួងទេសចរណ៍ បានអំពាវនាវឱ្យម្ចាស់សណ្ឋាគារ ភោជនីយដ្ឋាន អាហារដ្ឋាន និងប្រតិបត្តិករក្នុងវិស័យទេសចរណ៍ ត្រូវចូលរួមអនុវត្តច្បាប់ និងលិខិតបទដ្ឋានគតិយុត្ត ពាក់ព័ន្ធនឹងការគ្រប់គ្រងគុណភាព និងសុវត្ថិភាពម្ហូបអាហារ ដោយណែនាំឱ្យមានការយកចិត្តទុកដាក់ រៀបចំឱ្យមានបន្ទប់ទឹកនិងបន្ទប់ទឹក ឱ្យមានអនាម័យស្អាតបាត ប្រកបដោយគុណភាព។ ទន្ទឹមនឹងនេះ ម៉ាកសម្គាល់ភូមិសាស្ត្រទំនិញ គឺជាឧបករណ៍កម្មសិទ្ធិបញ្ញាមួយដែលដើរតួនាទីយ៉ាងសំខាន់ក្នុងការលើកកម្ពស់សហគ្រិនភាព ការអភិវឌ្ឍសហគមន៍កសិកម្ម បង្កើនចំណូលរបស់សហគមន៍ បង្កើតភាពប្រកួតប្រជែងផ្នែកពាណិជ្ជកម្ម ដែលរួមចំណែកក្នុងការអភិវឌ្ឍសង្គម សេដ្ឋកិច្ច វប្បធម៌ និងទេសចរណ៍។ សូមជម្រាបថា សិក្ខាសាលា ស្តីពីការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គមក្នុងវិស័យទេសចរណ៍ បានផ្តោតសំខាន់លើ ប្រធានបទសំខាន់ៗចំនួន៣ រួមមាន៖ ទី១.កម្មសិទ្ធិបញ្ញាក្នុងវិស័យទេសចរណ៍ ទី២.ការប្រយុទ្ធប្រឆាំង ផលិតផលក្លែងក្លាយ ក្នុងវិស័យទេសចរណ៍ និងទី៣. ការពង្រឹងគុណភាពសេវាកម្មទេសចរណ៍៕   អត្ថបទ៖ ថុន សុកេតុមាលា រូបភា៖ ឯកសារ  

 ធនាគារពិភពលោក បានព្យាករថា សេដ្ឋកិច្ចសកល អាចសម្រេចអត្រាកំណើន ២,៣% ក្នុងឆ្នាំ ២០២៥នេះ ថយចុះពី ២,៧% ដែលបានព្យាករកាលពីខែមករា។ នេះបើតាម សារព័ត៌មានអន្តរជាតិធំៗ ចេញផ្សាយនៅថ្ងៃនេះ។ធនាគារពិភពលោក បានកាត់បន្ថយការព្យាករណ៍កំណើនសេដ្ឋកិច្ចសកល នៅក្នុងសប្តាហ៍នេះ ដោយលើកឡើងពី ភាពតានតឹងពាណិជ្ជកម្ម បន្តកើនឡើង និងភាពមិនច្បាស់លាស់នៃគោលនយោបាយរបស់បណ្តាប្រទេសមហាអំណាច។ ភាពចលាចលនេះ បានបណ្តាលឱ្យមានការព្យាករណ៍កំណើនទាប នៅក្នុងស្ទើរតែ ៧០% នៃសេដ្ឋកិច្ចទាំងអស់នៅទូទាំងតំបន់ នេះបើយោងតាមរបាយការណ៍ប្រចាំឆ្នាំចុងក្រោយបំផុតនៃ ទស្សនវិស័យសេដ្ឋកិច្ចសកលរបស់ធនាគារពិភពលោក។ របាយការណ៍នេះ បានកាត់បន្ថយការព្យាករណ៍កំណើនសេដ្ឋកិច្ចសកល ឆ្នាំ ២០២៥ មកនៅត្រឹម ២,៣% ធ្លាក់ចុះពី ២,៧% ដែលបានព្យាករនៅក្នុងខែមករា ហើយក៏បានព្យាករកំណើនឆ្នាំ ២០២៦ ត្រឹម ២,៤% ថយចុះពី ២,៧% ដែលបានព្យាករពីពេលមុន។ បណ្តាប្រទេសសេដ្ឋកិច្ចជឿនលឿន ត្រូវបានគេរំពឹងថា នឹងមានកំណើនត្រឹម ១,២% នៅឆ្នាំនេះ ធ្លាក់ចុះពី ១,៧% នៅក្នុងការព្យាករណ៍មុន ខណៈ ទីផ្សារដែលកំពុងរីកចម្រើន និងសេដ្ឋកិច្ចកំពុងអភិវឌ្ឍន៍ ត្រូវបានបន្ទាបមកត្រឹម ៣,៨%។ ជាមួយគ្នានេះ សេដ្ឋកិច្ចសហរដ្ឋអាមេរិក ត្រូវបានគេរំពឹងថា នឹងកើនឡើង ១,៤% ក្នុងឆ្នាំ ២០២៥ ពោលគឺទាបជាងមុនដល់ទៅ ០,៩%។ទោះយ៉ាងណា សេដ្ឋកិច្ចសកល ត្រូវបានគេរំពឹងថា នឹងមានការងើបឡើងវិញយ៉ាងឆាប់រហ័សនៅឆ្នាំ ២០២៦ និង ២០២៧ ប៉ុន្តែទិន្នផលពិភពលោក នឹងនៅតែទាបជាងការព្យាករណ៍ដែលបានធ្វើឡើងនៅក្នុងខែមករា៕  អត្ថបទ៖ ងួន សុភ័ត្រ្តា រូបភាព៖ ឯកសារ