ក្នុងរយៈពេល ១០ខែ នៅក្នុងឆ្នាំ២០២៤នេះ ប្រទេសកម្ពុជា និងអេមីរ៉ាតអារ៉ាប់រួម សម្រេចបានទំហំពាណិជ្ជកម្មប្រមាណ ៧៥លានដុល្លារអាម៉េរិក កើនឡើង ៧% ធៀបទៅនឹងរយៈពេលដូចគ្នា ក្នុងឆ្នាំ២០២៣។ នេះបើយោងតាម ការចុះផ្សាយនៅលើគេហទំព័រផ្លូវការរបស់ ក្រសួងពាណិជ្ជកម្មកម្ពុជា។  នៅក្នុងពិធីបើកសិក្ខាសាលាផ្សព្វផ្សាយពី អត្ថប្រយោជន៍នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាង កម្ពុជានិងអេមីរ៉ាតអារ៉ាប់រួម លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម បានលើកឡើងពីសារៈសំខាន់នៃកិច្ចព្រមព្រៀងមួយនេះ ដែលបានចូលជាធរមាន កាលពីថ្ងៃទី៣១ ខែមករា ឆ្នាំ២០២៤ កន្លងទៅ ហើយវាជាសមិទ្ធិផលដែលកម្ពុជាសម្រេចបាន ក្នុងការពង្រឹងនិងពង្រីកទំនាក់ទំនងទ្វេភាគី ជំរុញការធ្វើសមាហរណកម្មស៊ីជម្រៅ ក្នុងសកម្មភាពពាណិជ្ជកម្មទំនិញ សេវាកម្ម និងការទាក់ទាញវិនិយោគ និងការធ្វើពិពិធកម្មទីផ្សារនាំចេញទំនិញ ទៅកាន់ទីផ្សារអេមីរ៉ាតអារ៉ាប់រួម តំបន់អារ៉ាប់ និងតំបន់ក្បែរខាង។ លោកជំទាវ បន្ថែមថា តាមរយៈកិច្ចព្រមព្រៀងនេះ កម្ពុជា អាចនាំទំនិញទៅទីផ្សារអេមីរ៉ាតអារ៉ាប់រួមជាមួយអត្រាពន្ធសូន្យលើមុខទំនិញសំខាន់ៗ ដូចជា៖ កាបូបធ្វើដំណើរ, ស្បែកជើង, មុខទំនិញវាយនភណ្ឌ, សម្លៀកបំពាក់, កង់, បន្ទះសូឡា, គ្រឿងបង្គុំអេឡិចត្រូនិក, រថយន្តអគ្គិសនី, កៅស៊ូ, អង្ករ, ម្ហូបអាហារកំប៉ុង អាហារកែច្នៃពីអង្ករ និងប្រភេទទំនិញកសិកម្មកែច្នៃជាច្រើនប្រភេទទៀត។ ជាក់ស្តែងក្នុងរយៈពេល ១០ខែនេះ កម្ពុជា បាននាំចេញប្រមាណ ៥៥លានដុល្លារអាម៉េរិក ទៅកាន់ទីផ្សារអេមីរ៉ាតអារ៉ាប់រួម និងនាំចូលប្រមាណ ២០លានដុល្លារអាម៉េរិក។ គួរជម្រាបថា ទំនិញនាំចេញសំខាន់ៗពីកម្ពុជាគឺ សម្លៀកបំពាក់ ស្បែកជើង កាបូប យានយន្តនិងគ្រឿងបង្គុំ ផលិតផលកៅស៊ូ រីឯទំនិញនាំចូលសំខាន់ៗពី អេមីរ៉ាតអារ៉ាប់រួម រួមមាន៖ ប្រេង និងកៅស៊ូប៊ីទីម ថ្នាំជក់ ផលិតផលប្លាស្ទិក ម៉ាស៊ីននិងឧបករណ៍អគ្គិសនី ចំណីកែច្នៃសម្រាប់សត្វ និងគ្រឿងសង្ហារឹម៕   អត្ថបទ៖ ងួន សុភ័ត្រ្តា រូបភាព៖ ឯកសារ+ក្រសួងពាណិជ្ជកម្ម  

 វិនិយោគិនកូរ៉េ មានបំណងចង់មកបណ្តាក់ទុនវិនិយោគលើសកម្មភាពកែច្នៃគ្រាប់ស្វាយចន្ទី នៅប្រទេសកម្ពុជា ដើម្បីនាំចេញ ខណៈរាជរដ្ឋាភិបាលកំពុងផ្ដោតលើការ លើកកម្ពស់ឧស្សាហកម្មកែច្នៃ តាមរយៈការជំរុញឱ្យមានការវិនិយោគលើកសិផលដែលមានសក្ដានុពល ក្នុងនោះ ដំណាំស្វាយចន្ទីជាដំណាំអាទិភាព។  នៅថ្ងៃទី១៩ ខែវិច្ឆិកា ឆ្នាំ២០២៤នេះ ឧបនាយករដ្ឋមន្ត្រីប្រចាំការ វង្សី វិស្សុត រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានអនុញ្ញាតឱ្យលោក Lee Kee Yun នាយកក្រុមហ៊ុន Heungkuk Industry និងលោកសាស្ត្រាចារ្យ Lee Changkeun នៃសកលវិទ្យាល័យ Chung-Ang University នៃសាធារណរដ្ឋកូរ៉េ ចូលជួបសម្តែងការគួរសម និងពិភាក្សាការងារ  ដោយវិនិយោគិនកូរ៉េ មានបំណងចង់វិនិយោគកែច្នៃ គ្រាប់ស្វាយចន្ទីនាំចេញ។ ស្ថិតនៅក្នុងជំនួបនោះ លោក Lee Kee Yun បានលើកឡើងថា Heungkuk Industry គឺជាក្រុមហ៊ុនផលិតសម្ភារៈ សំណង់សំខាន់មួយនៅសាធារណរដ្ឋកូរ៉េ ដែលមានគោលបំណង ចង់មកបណ្តាក់ទុនវិនិយោគលើសកម្មភាពកែច្នៃគ្រាប់ស្វាយចន្ទីនៅប្រទេសកម្ពុជា ពីព្រោះក្រុមហ៊ុនបានមើលឃើញពីសក្តានុពល និងគោលនយោបាយរបស់រាជរដ្ឋាភិបាលកម្ពុជា។ ជាការឆ្លើយតប ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានបង្ហាញការគាំទ្រ ចំពោះគម្រោងវិនិយោគរបស់ក្រុមហ៊ុន Heungkuk Industry លើការកែច្នៃគ្រាប់ស្វាយចន្ទី និងបានបញ្ជាក់នូវឆន្ទៈដ៏មុតមាំ និងគោលនយោបាយរបស់រាជរដ្ឋាភិបាល ក្នុងការគាំទ្រ និងស្វាគមន៍ការវិនិយោគមកពីបរទេស ដើម្បីជំរុញកំណើនសេដ្ឋកិច្ច និងការបង្កើតការងារ ជាពិសេសក្នុងវិស័យកសិកម្ម និងកសិ-ឧស្សាហកម្ម ដែលជាអាទិភាពដ៏សំខាន់មួយរបស់រាជរដ្ឋាភិបាល ក្នុងការលើកកម្ពស់ការផលិត និងការកែច្នៃគ្រាប់ស្វាយចន្ទី ក្នុងគោលដៅប្រែក្លាយកម្ពុជាទៅជាប្រទេសដែលនាំចេញគ្រាប់ស្វាយចន្ទីច្រើនជាងគេលើពិភពលោក ឬអធិរាជស្វាយចន្ទី។ ជាមួយគ្នានេះ អនុប្រធានសមាគមស្វាយចន្ទីកម្ពុជា លោក ស៊ុយ កុកធាន បានលើកឡើងថា គម្រោងវិនិយោគិនកូរ៉េនេះ ទទួលបានការចាប់អារម្មណ៍ទៅលើការកែច្នៃស្វាយចន្ទី និងកំពុងតែសិក្សាអំលិតពីការកែច្នៃ បរិមាណនៃការផលិត និងទំហំផ្ទៃដី ដែលវិនិយោគិនចង់មកបណ្តាក់ទុននៅកម្ពុជា។  ក្នុងនោះផងដែរ ឯកឧត្តមឧបនាយករដ្ឋមន្ត្រីប្រចាំការ បានលើកទឹកចិត្តឱ្យតំណាងក្រុមហ៊ុន Heungkuk Industry សិក្សា និងរៀបចំផែនការវិនិយោគឱ្យបានច្បាស់លាស់ ព្រមទាំងស្វែងរកដៃគូដែលមានជំនាញ និងបទពិសោធពាក់ព័ន្ធនឹងដំណាំស្វាយចន្ទី។ ទន្ទឹមនឹងនេះ ស្វាយចន្ទី គឺជាកសិផលដ៏សំខាន់ និងជាដំណាំយុទ្ធសាស្ត្រមួយរបស់កម្ពុជា។ ស្វាយចន្ទី មានសក្តានុពលខ្ពស់ ត្រូវបានប្រើប្រាស់ និងកែច្នៃចេញជាផលិតផលជាច្រើនប្រភេទ រួមទាំងផលិតផលបានជាចំណីអាហារ ប្រេង គ្រឿងសំអាង និងជីវម៉ាស (Biomass) ជាដើម។  គួរជម្រាបថា យោងតាមរបាយការណ៍របស់សមាគមស្វាយចន្ទីកម្ពុជា គិតត្រឹមរយៈពេល ១០ខែ មករា-តុលា ឆ្នាំ ២០២៤ កម្ពុជា ផលិតស្វាយចន្ទីបានចំនួន ៨៤ម៉ឺនតោន កើនឡើង ២៦% បើធៀបនឹងរយៈពេលដូចគ្នានៅឆ្នាំ ២០២៣ ក្នុងនោះ កម្ពុជាបាននាំចេញគ្រាប់ស្វាយចន្ទីឆៅ ទៅកាន់ទីផ្សារវៀតណាមបានជាង ៧៩ម៉ឺនតោន កើនឡើង ៣១% គិតជាទឹកប្រាក់មានចំនួន ១ពាន់ ១០០ លានដុល្លារ កើនឡើង៩%។  អត្ថបទ៖ ថុន សុកេតុមាលា រូបភាព៖ ឯកសារ  

 ក្រសួងពាណិជ្ជកម្មថៃ បានបញ្ជាក់ថា ក្នុងអំឡុងខែមករា ដល់ខែតុលា ឆ្នាំ ២០២៤ ការនាំចេញអង្កររបស់ថៃ បានឈានដល់ ៨លាន ៣សែនតោន កើនឡើង ២០% បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមការចេញផ្សាយ នៅថ្ងៃនេះដោយសារព័ត៌មានក្នុងស្រុកថៃ។  ក្រសួងពាណិជ្ជកម្មថៃ បានបញ្ជាក់នៅក្នុងសេចក្តីថ្លែងការណ៍មួយថា ប្រទេសថៃ បាននាំចេញអង្ករចំនួន ៨លាន ៣សែនតោន ក្នុងរយៈពេល ១០ខែដំបូងនៃឆ្នាំនេះ ហើយរំពឹងថា នឹងនាំចេញបានជាង ៩លានតោន ក្នុងរយៈពេលពេញមួយឆ្នាំ ដែលមានតម្លៃ ៦ពាន់ ៤រយលានដុល្លារអាមេរិក។ ទន្ទឹមគ្នានេះ ការបញ្ជាទិញ គឺទទួលបានបន្តពី ទីផ្សារធំៗ ដូចជាប្រទេសឥណ្ឌូនេស៊ី អ៊ីរ៉ាក់ និងសហរដ្ឋអាមេរិក ហើយជាលទ្ធផល ក្រសួងពាណិជ្ជកម្មថៃ និងសមាគមអ្នកនាំចេញអង្ករថៃ មានទំនុកចិត្តថា ការនាំចេញអង្ករនៅឆ្នាំនេះ នឹងឈានដល់ ៩លានតោន។ សម្រាប់ត្រីមាសចុងក្រោយនៃឆ្នាំនេះ ការនាំចេញអង្ករថៃ ត្រូវបានគេរំពឹងថា នឹងបន្តកើនឡើង នៅពេលដែលការប្រមូលផលខិតជិតមកដល់ ជាមួយនឹងការបញ្ជាទិញបន្ថែមដោយទីផ្សារធំៗ ក្នុងការរៀបចំសម្រាប់បុណ្យណូអែល និងឆ្នាំថ្មី។ លើសពីនេះ ក្រសួងពាណិជ្ជកម្មថៃ កំពុងត្រួតពិនិត្យរដូវប្រមូលផលស្រូវថ្មី ដោយមានផែនការអនុវត្តវិធានការគាំទ្រ តាមការអនុម័តដោយ គណៈកម្មាធិការគោលនយោបាយស្រូវអង្ករជាតិ ដើម្បីជួយកសិករ ខណៈនាយកដ្ឋានពាណិជ្ជកម្មផ្ទៃក្នុង កំពុងត្រួតពិនិត្យតម្លៃស្រូវ សម្រាប់ការប្រមូលផលឆ្នាំ ២០២៤/២០២៥។សូមជម្រាបថា ស្រូវប្រមាណ ១៣លានតោន ត្រូវបានបញ្ចូលទៅក្នុងទីផ្សារ ដែលស្មើនឹង ៥០% នៃផលិតកម្មសរុប៕   អត្ថបទ៖ ងួន សុភ័ត្រ្តា រូបភាព៖ ឯកសារ  

 វិស័យយានយន្តអគ្គិសនីរបស់ប្រទេសចិន បានឈានដល់ចំណុចសំខាន់មួយទៀតហើយ ដោយមានបរិមាណផលិតកម្មប្រចាំឆ្នាំ លើសកម្រិតកំណត់ ១០លានគ្រឿង ដែលបង្កជាការព្រួយបារម្ភអំពី សមត្ថភាពលើសចំណុះ។ នេះបើយោងតាមការចេញផ្សាយដោយ សារព័ត៌មានអន្តរជាតិធំៗ នៅថ្ងៃនេះ។  សមាគមក្រុមហ៊ុនផលិតរថយន្តចិន ដែលជាសម្ព័ន្ធឧស្សាហកម្មគាំទ្រដោយរដ្ឋាភិបាលចិន បានប្រកាសថា យានយន្តអគ្គិសនីទី ១០លាន បានបញ្ចប់ខ្សែសង្វាក់ផលិតកម្ម កាលពីពាក់កណ្តាលខែវិច្ឆិកានេះ ដែលតួលេខនេះបានកើនឡើង ៤% ធៀបនឹងរយៈពេលដូចគ្នាកាលពីឆ្នាំមុន។ ខណៈពេលដែលផលិតកម្មយានយន្តអគ្គិសនីកើនឡើង គឺឆ្លុះបញ្ចាំងពីសមត្ថភាពរបស់ប្រទេសចិន នៅក្នុងឧស្សាហកម្មរថយន្តអគ្គិសនី និងការបង្កើនចំណាប់អារម្មណ៍របស់អ្នកប្រើប្រាស់ក្នុងស្រុក ចំពោះរថយន្តឆ្លាតវៃ យ៉ាងណា វាក៏បានបង្កើនការភ័យខ្លាចនៃសមត្ថភាពលើស នៅក្នុងវិស័យរថយន្តរបស់ចិន ហើយរថយន្តដែលប្រើសាំង ត្រូវបានបដិសេធដោយអ្នកទិញ។ យោងតាមក្រុមហ៊ុនប្រឹក្សា Automobility ដែលមានមូលដ្ឋាននៅទីក្រុងសៀងហៃ ប្រទេសចិន មានសមត្ថភាពផលិតរថយន្តគ្រប់ប្រភេទ ៤០លានគ្រឿងក្នុងមួយឆ្នាំ និងការលក់បានប្រហែល ២២លានគ្រឿង។សមាគមក្រុមហ៊ុនផលិតរថយន្តចិន បានឱ្យដឹងថា ក្នុងរយៈពេល ១០ខែដំបូងនៃឆ្នាំ ២០២៤ រថយន្តសាំង និងអគ្គិសនីចំនួន ១៧លានគ្រឿង ត្រូវបានលក់នៅលើទីផ្សារប្រទេសចិន ក្នុងនោះរថយន្តអគ្គិសនីសរុប ៩លាន ៧សែនគ្រឿង ត្រូវបានប្រគល់ទៅឱ្យអតិថិជន នៅចន្លោះខែមករាដល់ខែតុលា កើនឡើង ៣៤% ធៀបនឹងឆ្នាំមុន។ សូមជម្រាបថា ប្រទេសចិន គឺជាប្រទេសនាំមុខគេលើពិភពលោកនៅក្នុងឧស្សាហកម្មរថយន្តអគ្គិសនី ជាមួយនឹងការលក់រថយន្តអគ្គិសនីសុទ្ធ និងរថយន្ត Plug-in Hybrid មានចំនួន ៦៥% នៃចំនួនសរុបទូទាំងពិភពលោក នៅក្នុងឆមាសទី១ នៃឆ្នាំ ២០២៤៕   អត្ថបទ៖ ងួន សុភ័ត្រ្តា រូបភាព៖ ឯកសារ  

 ក្នុងរយៈពេល ១០ខែ ដើមឆ្នាំ ២០២៤នេះ មហាអំណាចសេដ្ឋកិច្ចចិន បានទាក់ទាញលំហូរនិយោគផ្ទាល់ពីបរទេសប្រមាណ ៩៥ពាន់លានដុល្លារអាមេរិក ដែលបានធ្លាក់ចុះ ៣០% បើប្រៀបធៀបនឹងរយៈពេលដូចគ្នា កាលពីឆ្នាំមុន។ នេះបើយោងតាមការចេញផ្សាយដោយសារព័ត៌មានអន្តរជាតិ CCTV នៅថ្ងៃនេះ។  បើតាមទិន្នន័យពីក្រសួងពាណិជ្ជកម្មចិន បានប្រកាសថា ក្រុមហ៊ុនវិនិយោគបរទេសថ្មីជាង ៤ម៉ឺន ៦ពាន់ ត្រូវបានបង្កើតឡើង ក្នុងអំឡុងខែមករាដល់ខែតុលា កើនឡើងប្រមាណជាង ១១% ធៀបនឹងពេលដូចគ្នាកាលពីឆ្នាំមុន ខណៈអ្នកជំនាញអះអាងថា សេដ្ឋកិច្ចរបស់ប្រទេសចិន កំពុងស្ទុះងើបឡើងវិញ ជាមួយនឹងសន្ទុះខ្លាំងជាងការរំពឹងទុក ហើយសក្តានុពលទីផ្សារ កំពុងត្រូវបានបញ្ចេញក្នុងល្បឿនលឿន ចាប់តាំងពីដើមឆ្នាំនេះ។ វិស័យផលិតកម្មប្រើប្រាស់បច្ចេកវិទ្យាខ្ពស់ បានទាក់ទាញការវិនិយោគប្រមាណ ១១ពាន់លានដុល្លារអាមេរិក ឬប្រហែល ១១% នៃលំហូរវិនិយោគសរុប ហើយលំហូរវិនិយោគទៅក្នុង ការផលិតបរិក្ខារ និងឧបករណ៍ពេទ្យ បានកើនឡើង ៦១% ខណៈដែលលំហូរចូលទៅក្នុងការផលិតឧបករណ៍កុំព្យូទ័រ និងការិយាល័យ បានកើនឡើង ៤៨% ក្នុងអំឡុងពេលនេះ។ យ៉ាងណាមិញ ក្រសួងពាណិជ្ជកម្មចិន បានបន្ថែមថា ប្រទេសចិន នឹងចាត់វិធានការជាក់ស្តែង ដើម្បីពង្រីកការបើកចំហទីផ្សារបន្ថែមទៀត ដើម្បីទាក់ទាញនិងប្រើប្រាស់មូលធនបរទេស។អ្នកនាំពាក្យក្រសួងពាណិជ្ជកម្ម បានថ្លែងថា ក្រសួង នឹងប្រកាន់ខ្ជាប់នូវ គោលការណ៍រក្សាស្ថិរភាព ខណៈពេលដែលកំពុងស្វែងរកវឌ្ឍនភាព ក្នុងការអភិវឌ្ឍន៍សេដ្ឋកិច្ច និងស្ថិរភាព បង្កើន និងលើកកំពស់គុណភាពនៃការវិនិយោគបរទេស។សូមជម្រាបថា ក្នុងមួយឆ្នាំ ២០២៣ពេញ មហាអំណាចសេដ្ឋកិច្ចចិន បានទាក់ទាញលំហូរនិយោគផ្ទាល់ពីបរទេសប្រមាណ ១៥៤ពាន់លានដុល្លារអាមេរិក៕  អត្ថបទ៖ ងួន សុភ័ត្រ្តា រូបភាព៖ ឯកសារ 

គណៈកម្មការអឺរ៉ុប បានធ្វើការវាយតម្លៃ និងទម្លាក់ការព្យាករលើ ទស្សនវិស័យកំណើនរបស់ សហភាពអឺរ៉ុបសម្រាប់ឆ្នាំ ២០២៤ មកនៅត្រឹម ០,៩%។ នេះបើយោងតាមការចេញផ្សាយដោយ សារព័ត៌មានអន្តរជាតិធំៗជាច្រើន នៅថ្ងៃនេះ។របាយការណ៍របស់គណៈកម្មាការអឺរ៉ុប បានកាត់បន្ថយចក្ខុវិស័យកំណើនសេដ្ឋកិច្ចឆ្នាំ ២០២4 របស់សហភាពអឺរ៉ុប មកនៅត្រឹម ០,៩% ដោយទម្លាក់មកពី ការព្យាករណ៍ពីមុន ១,៣%។ នៅក្នុងឆ្នាំ ២០២៥ខាងមុខ សកម្មភាពសេដ្ឋកិច្ចត្រូវបានព្យាករណ៍ថា នឹងបង្កើនល្បឿនដល់ ១,៥% នៅក្នុងសហភាពអឺរ៉ុប។ទោះជាយ៉ាងណាក៏ដោយ ភាពមិនច្បាស់លាស់ និងហានិភ័យធ្លាក់ចុះ ចំពោះទស្សនវិស័យសេដ្ឋកិច្ចបានកើនឡើង តួយ៉ាង ហានិភ័យសំខាន់ៗ រួមមាន ជម្លោះដែលកំពុងបន្តនៅអ៊ុយក្រែន និងមជ្ឈិមបូព៌ា ដែលបានបង្កើនអស្ថិរភាពភូមិសាស្ត្រនយោបាយ និងកង្វល់សន្តិសុខថាមពល។ ចំពោះស្ថានភាពក្នុងស្រុក សហភាពអឺរ៉ុប ប្រឈមមុខនឹងភាពមិនប្រាកដប្រជានៃគោលនយោបាយ និងបញ្ហាប្រឈមរចនាសម្ព័ន្ធក្នុងវិស័យផលិតកម្ម ដែលអាចនាំឱ្យបាត់បង់ការប្រកួតប្រជែង កាត់បន្ថយកំណើន និងប៉ះពាល់ដល់ទីផ្សារការងារ។គណៈកម្មការអឺរ៉ុបក៏បានលើកឡើងពី គ្រោះថ្នាក់ធម្មជាតិ ដូចជាទឹកជំនន់នាពេលថ្មីៗនេះនៅក្នុងប្រទេសអេស្ប៉ាញ និងភ្លើងឆេះព្រៃនៅរដូវក្តៅ ដែលជាហានិភ័យដ៏សំខាន់។ គណៈកម្មាការបានព្រមានថា ការកើនឡើងបន្ថែមទៀតនៃ វិធានការការពារដោយដៃគូពាណិជ្ជកម្ម អាចរំខានដល់ពាណិជ្ជកម្មពិភពលោក និងដាក់បន្ទុកទៅលើ សេដ្ឋកិច្ចបើកចំហររបស់សហភាពអឺរ៉ុប។សូមជម្រាបថា នៅក្នុងសហភាពអឺរ៉ុប អតិផរណា ត្រូវបានព្យាករណ៍ថានឹងធ្លាក់ចុះពី ៥,៤% នៅឆ្នាំ ២០២៣ មកត្រឹម ២,៤% នៅឆ្នាំ ២០២៤ និងចុះដល់ ២,១% នៅឆ្នាំ ២០២៥៕  អត្ថបទ៖ ងួន សុភ័ត្រ្តា រូបភាព៖ ឯកសារ   

 រយៈពេល ៣ថ្ងៃនៃព្រះរាជពិធីបុណ្យអុំទូក ចំនួនភ្ញៀវទេសចរជាតិ និងអន្តរជាតិ មកកម្សាន្តនៅខេត្តសៀមរាប មានចំនួនប្រមាណ ៣៤ម៉ឺននាក់ មានការកើនឡើងប្រមាណ ១៦% បើធៀបនឹងពេលដូចគ្នា កាលពីឆ្នាំ២០២៣។  របាយការណ៍របស់មន្ទីរទេសចរណ៍ខេត្តសៀមរាប បានឲ្យដឹងថា ចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៤ ក្នុងរយៈពេល ៣ថ្ងៃនៃ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅឆ្នាំ២០២៤នេះ ខេត្តសៀមរាប ទទួលបានភ្ញៀវទេសចរមកកម្សាន្តប្រមាណ ៣៤ម៉ឺន ៨ពាន់នាក់ មានការកើនឡើងប្រមាណ ១៦% បើធៀបនឹងរយៈពេលដូចគ្នាឆ្នាំ២០២៣។  ក្នុងនោះ បើយោងតាមរបាយការណ៍របស់មន្ទីរទេសចរណ៍ខេត្តសៀមរាប ដដែល បានឲ្យដឹងបន្ថែមថា ចំនួនភ្ញៀវទេសចរណ៍ចូលមកទស្សនាខេត្តសៀមរាប ក្នុងរយៈពេល ៣ថ្ងៃ មានចំនួនប្រមាណ ៧ម៉ឺននាក់ មានការកើនឡើងប្រមាណ ២៩% បើធៀបនឹងរយៈពេលដូចគ្នាឆ្នាំ២០២៣។  ក្នុងនោះ មានភ្ញៀវទេសចរបរទេសមានចំនួន ៤ពាន់២រយ នាក់ មានការកើនឡើង ២០% បើធៀបនឹងរយៈពេលដូចគ្នាឆ្នាំ២០២៣ និងភ្ញៀវទេសចរជាតិ មានចំនួនប្រមាណ ៦ម៉ឺន៥ពាន់ នាក់ មានការលើកឡើងប្រមាណ ៣០% បើធៀបនឹងរយៈពេលដូចគ្នាឆ្នាំ២០២៣។  ទន្ទឹមនឹងនេះ សិ្ថតិទេសចរជាតិ និងអន្តរជាតិ ចេញដើរលេងកម្សាន្តទូទាំងប្រទេស ក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក រយៈពេល០៣ថ្ងៃ ចាប់ពីថ្ងៃទី១៤-១៦ ខែវិច្ឆិកា ឆ្នាំ២០២៤ មានដូចជា ទេសចរជាតិ សរុបប្រមាណ  ៧លាន ៨សែន៤ម៉ឺននាក់ ទេសចរជាតិប្រមាណ ៧លាន៧សែន៤ម៉ឺន នាក់ និងទេសចរអន្តរជាតិ សរុបប្រមាណ ៨ម៉ឺន៩ពាន់ នាក់។ គួរជម្រាបថា ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០២៤នេះ គឺមានទេសចរជាតិ នៅទូទាំងប្រទេស មានចំនួនកើនឡើងច្រើនជាងឆ្នាំ២០២៣៕   អត្ថបទ៖ ថុន សុកេតុមាលា រូបភាព៖ ឯកសារ+មន្ទីរទេសចរណ៍ខេត្តសៀមរាប  

 ក្នុងរយៈពេល ១០ខែ គិតចាប់ពីខែមករា ដល់ខែតុលា ឆ្នាំ ២០២៤នេះ ប្រទេសចិន នៅតែជាដៃគូពាណិជ្ជកម្មដ៏ធំរបស់កម្ពុជា ដែលមានទំហំពាណិជ្ជកម្មទ្វេភាគីជាង ១២ពាន់លានដុល្លារអាមេរិក មានកំណើន ២៣% ធៀបនឹងពេលដូចគ្នា កាលពីឆ្នាំមុន។ នេះបើយោងតាមទិន្នន័យផ្លូវការពី អគ្គនាយកដ្ឋានគយ និងរដ្ឋាករកម្ពុជា។  អគ្គនាយកដ្ឋានគយ និងរដ្ឋាករកម្ពុជា បានគូសបញ្ជាក់ថា អំឡុងពេល ១០ខែនេះ ការនាំចេញរបស់កម្ពុជា ទៅកាន់ប្រទេសចិន មានទំហំ ១ពាន់ ៤រយលានដុល្លារអាមេរិក កើន ២១% ដោយការនាំចូលមកកាន់កម្ពុជាវិញ មានដល់ទៅ ១០ពាន់ ៩រយលានដុល្លារអាមេរិក កើន ២៣% ដែលធ្វើឲ្យ កម្ពុជា កើតនូវ ឱនភាពពាណិជ្ជកម្មជាង ៩ពាន់លានដុល្លារអាមេរិក។ បន្ថែមលើនេះ កម្ពុជា ក៏ត្រូវការវត្ថុធាតុដើមច្រើននាំចូលមកពីប្រទេសចិន ដូចជា វត្ថុធាតុដើមនៅក្នុងវិស័យកាត់ដេរ កាបូប ស្បែកជើង ដើម្បីកែច្នៃ និងនាំចេញទៅវិញ។ ក្រៅពីប្រទេសចិន ដៃគូពាណិជ្ជកម្មសំខាន់របស់កម្ពុជា រួមមាន សហរដ្ឋអាមេរិក វៀតណាម ថៃ ជប៉ុន ឥណ្ឌូនេស៊ី និងកាណាដា ខណៈទីផ្សារនាំចេញធំៗរួមមាន អាមេរិក ចិន វៀតណាម ជប៉ុន ថៃ និងកាណាដា។ ជាមួយគ្នានេះ មុខទំនិញសំខាន់ៗ ដែលកម្ពុជា នាំចេញទៅកាន់ទីផ្សារអន្តរជាតិ រួមមាន ផលិតផលវាយនភណ្ឌ កាត់ដេរសម្លៀកបំពាក់ ស្បែកជើង និងផលិតផលធ្វើដំណើរ ផលិតផលកសិកម្ម គ្រឿងអេឡិចត្រូនិក ឧបករណ៍អគ្គិសនី និងផលិតផលកង់ជាដើម។ សូមបញ្ជាក់ថា ក្នុងរយៈពេល ១០ខែ ដើមឆ្នាំ ២០២៤នេះ ប្រទេសកម្ពុជា សម្រេចបាននូវទំហំពាណិជ្ជកម្មទំនិញជាង ៤៥ពាន់លានដុល្លារអាមេរិក មានការកើនឡើងប្រមាណ ១៦% បើប្រៀបធៀបនឹងពេលដូចគ្នាកាលពីឆ្នាំមុន៕   អត្ថបទ៖ ងួន សុភ័ត្រ្តា រូបភាព៖ ឯកសារ  

 វិស័យពាណិជ្ជកម្មតាមប្រព័ន្ធអេឡិចត្រូនិករបស់វៀតណាម បានបន្តកើនឡើងគួរឱ្យកត់សម្គាល់ក្នុងអត្រា ១៩% ក្នុងមួយឆ្នាំ ហើយត្រូវបានគេរំពឹងថានឹងឈានដល់ ២២ពាន់លានដុល្លារអាមេរិក ក្នុងឆ្នាំ ២០២៤នេះ។ នេះបើយោងតាមការចេញផ្សាយរបស់ សារព័ត៌មានក្នុងស្រុកវៀតណាម នៅថ្ងៃនេះ។  របាយការណ៍ដែលចេញផ្សាយដោយ ក្រុមហ៊ុនធំៗ ដូចជា Google, Temasek Holdings និងអ្នកប្រឹក្សាធុរកិច្ចសកលលោក Bain & Company បានបង្ហាញថា ទីផ្សារពាណិជ្ជកម្មតាមប្រព័ន្ធអេឡិចត្រូនិករបស់វៀតណាម ត្រូវបានប៉ាន់ប្រមាណថាមានចំនួន ២២ពាន់លានដុល្លារអាមេរិក នៅឆ្នាំនេះ ដោយជាប់ចំណាត់ថ្នាក់ទី ៣ នៅអាស៊ីអាគ្នេយ៍ បន្ទាប់ពីប្រទេសឥណ្ឌូនេស៊ី ដែលមានទំហំ ៦៥ពាន់លានដុល្លារ និងប្រទេសថៃ មាន ២៦ពាន់លានដុល្លារអាមេរិក។ ទីផ្សាររបស់វៀតណាម បានកើនឡើង ១៨% កាលពីឆ្នាំមុន ដែលជាអត្រាលឿនបំផុតទី ៣ នៅក្នុងតំបន់ ហើយត្រូវបានគេព្យាករណ៍ថា នឹងរក្សាបាននូវ អត្រាកំណើននេះជាមធ្យមជាង ១៩% ជារៀងរាល់ឆ្នាំ និងឈានដល់ ៦៣ពាន់លានដុល្លារ នៅឆ្នាំ ២០៣០។ជាក់ស្តែង វិស័យ E-commerce មានចំណែកជាង ៦០% នៃសេដ្ឋកិច្ចឌីជីថលរបស់វៀតណាម នៅឆ្នាំនេះ ហើយវា បានក្លាយទៅជា កត្តាជំរុញកំណើនដ៏សំខាន់មួយ ក្នុងចំណោមកត្តាជំរុញកំណើនដ៏សំខាន់ទាំង ២ រួមជាមួយនឹងទេសចរណ៍អនឡាញ។ យោងតាមរបាយការណ៍នេះ ចំនួនម្ចាស់អាជីវកម្មម៉ាកយីហោ នៅក្នុងប្រទេសវៀតណាម ដែលមានបណ្តាញវីដេអូផ្ទាល់ខ្លួន បានកើនឡើង ៥% ក្នុងរយៈពេល ២ឆ្នាំចុងក្រោយនេះ។សូមរម្លឹកថា នៅឆមាសទី១ ឆ្នាំនេះ វៀតណាម ប្រមូលចំណូលពន្ធអនឡាញបានប្រមាណ ១៥៨លានដុល្លារអាមេរិក ពីក្រុមហ៊ុនពាណិជ្ជកម្មអេឡិចត្រូនិក និងអាជីវកម្មឌីជីថល ដែលមិនមានមូលដ្ឋានក្នុងប្រទេសវៀតណាម៕  អត្ថបទ៖ ងួន សុភ័ត្រ្តា រូបភាព៖ ឯកសារ  

ក្រសួងពាណិជ្ជកម្មថៃ រំពឹងថា ការនាំចេញអង្ករនៅឆ្នាំនេះ នឹងកើនឡើងដល់ ៩លានតោន និងបង្កើតប្រាក់ចំណូលចំនួន ៦,៤ពាន់លានដុល្លារអាមេរិក។ នេះបើយោងតាមការចេញផ្សាយ នៅថ្ងៃនេះដោយសារព័ត៌មានក្នុងស្រុកថៃ។ រដ្ឋមន្ត្រីក្រសួងពាណិជ្ជកម្មថៃ បានថ្លែងថា ក្នុងឆ្នាំ ២០២៤នេះ ការនាំចេញអង្កររបស់ថៃ នឹងកើនឡើងដល់ ៩លានតោន បើគិតជាទឹកប្រាក់សរុបជាង ៦ពាន់ ៤រយលានដុល្លារអាមេរិក។ ជាក់ស្តែង ប្រទេសថៃ បាននាំចេញអង្ករចំនួន ៧លាន ៤សែនតោន រួចហើយ ក្នុងអំឡុងពេល ៩ខែ ឆ្នាំនេះ កើនឡើង ២២% បើធៀបនឹងរយៈពេលដូចគ្នានៃឆ្នាំមុន។ការនាំចេញអង្ករពីខែមករា ដល់ខែកញ្ញា ឆ្នាំនេះ រកចំណូលបានចំនួន ៤ពាន់ ៨រយលានដុល្លារ ខណៈតម្លៃនាំចេញអង្ករក្នុងរយៈពេល ៩ខែដំបូង បានកើនឡើង ៤៥% បើធៀបនឹងរយៈពេលដូចគ្នាកាលពីឆ្នាំមុន។ លើសពីនេះ ការបញ្ជាទិញ គឺទទួលបានបន្តពី ទីផ្សារធំៗ ដូចជាប្រទេសឥណ្ឌូនេស៊ី អ៊ីរ៉ាក់ និងសហរដ្ឋអាមេរិក ហើយជាលទ្ធផល នាយកដ្ឋានពាណិជ្ជកម្មបរទេស និងសមាគមអ្នកនាំចេញអង្ករថៃ មានទំនុកចិត្តថា ការនាំចេញអង្ករនៅឆ្នាំនេះ នឹងឈានដល់ ៩លានតោន។ ប្រធានសមាគមអ្នកនាំចេញអង្ករថៃ បានលើកឡើងថា ផលប៉ះពាល់នៃទឹកជំនន់មកលើ ផលិតកម្មស្រូវ មិនទាន់ច្បាស់នៅឡើយទេ ដោយលោកមានប្រសាសន៍ថា ដីស្រែសំខាន់ៗរបស់ប្រទេសថៃនៅភាគឦសាន គឺមិនរងផលប៉ះពាល់ដោយទឹកជំនន់នោះទេ ដូច្នេះប្រធានរូបនេះ រំពឹងថា ទិន្នផលស្រូវនៅឆ្នាំនេះ នឹងមានចំនួនប្រហែល ៣៤លានតោន ដែលខ្ពស់ជាងចំនួន ៣២លានតោន កាលពីឆ្នាំមុន ហើយការនាំចេញអាចនឹងសម្រេចទៅតាមគោលដៅ ៩លានតោន៕  អត្ថបទ៖ ងួន សុភ័ត្រ្តា រូបភាព៖ ឯកសារ  

 រដ្ឋមន្ត្រីក្រសួងផែនការ បានអះអាងថា ការចាកចេញរបស់កម្ពុជា ពីចំណាត់ក្រុមប្រទេសអភិវឌ្ឍន៍តិចតួច នឹងបង្កបញ្ហាប្រឈមមួយចំនួន តែវាក៏ជាឱកាសនៃការបើកផ្លូវថ្មី សម្រាប់កំណើនដ៏រឹងមាំ និងភាពធន់រយៈពេលវែង។  ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ និងជាប្រធានគណៈកម្មាធិការជាតិ សម្រាប់ការចាកចេញរបស់កម្ពុជាពីចំណាត់ក្រុមប្រទេសអភិវឌ្ឍន៍តិចតួច បានអញ្ជើញជាអធិបតីភាពដ៏ខ្ពង់ខ្ពស់ បើកវេទិកាសន្ទនាគោលនយោបាយក្រោមប្រធានបទ "ដំណើរឆ្ពោះទៅការចាកចេញរបស់កម្ពុជាពីចំណាត់ក្រុមប្រទេសអភិវឌ្ឍន៍តិចតួច៖ ទស្សនៈវិស័យពហុភាគីសម្រាប់អន្តរការដោយរលូន និងយូរអង្វែង" ដែលរៀបចំដោយក្រសួងផែនការ និងកម្មវិធីអភិវឌ្ឍន៍សហប្រជាជាតិ (យូអិនឌីភី) ជាផ្នែកមួយនៃការខិតខំប្រឹងប្រែងក្នុងការត្រៀមខ្លួនសម្រាប់ការចាកចេញពីចំណាត់ក្រុមប្រទេសអភិវឌ្ឍន៍តិចតួច (LDC) របស់កម្ពុជា។  នៅក្នុងឱកាសនោះ ឯកឧត្តមរដ្ឋមន្ត្រីក្រសួងផែនការ មានប្រសាសន៍ថា ការចាកចេញពីក្រុមប្រទេសអភិវឌ្ឍន៍តិចតួច គឺជាការឆ្លុះបញ្ចាំងអំពីសមិទ្ធផល និងជោគជ័យដ៏ធំធេងនៃអភិវឌ្ឍន៍សង្គម-សេដ្ឋកិច្ចរបស់កម្ពុជា ដែលការចាកចេញនេះនឹងបង្កើតបាននូវរបត់ប្រវត្តិសាស្ត្រថ្មីមួយទៀត នៃការរីកចម្រើនឥតឈប់ឈររបស់ប្រទេសកម្ពុជា ដែលជាមោទនភាពជាតិដ៏ឧត្តុង្គឧត្តមរបស់ជាតិ និងប្រជាជនកម្ពុជា។ ឯកឧត្តមរដ្ឋមន្ត្រី មានប្រសាសន៍បន្ថែមថា ដើម្បីធានាបានថា ការចាកចេញរបស់កម្ពុជាពីចំណាត់ក្រុមប្រទេសអភិវឌ្ឍន៍តិចតួច មិនក្លាយជាឧបសគ្គដល់វឌ្ឍនភាពនៃការអភិវឌ្ឍសង្គម សេដ្ឋកិច្ច និងបរិស្ថាន កម្ពុជាត្រូវអនុវត្តយុទ្ធសាស្ត្រទូលំទូលាយសម្រាប់អន្តរកាលប្រកបដោយចីរភាព ដែលទាមទារនូវការចូលរួមយ៉ាងសកម្មពី គ្រប់ភាគីពាក់ព័ន្ធទាំងអស់ រួមមាន ក្រសួង ស្ថាប័នរាជរដ្ឋាភិបាល រដ្ឋបាលថ្នាក់ក្រោមជាតិ ដៃគូអភិវឌ្ឍន៍ វិស័យឯកជន និងសង្គមស៊ីវិល ដើម្បីរៀបចំយុទ្ធសាស្ត្រអន្តរការដោយរលូនឱ្យបានគ្រប់ជ្រុងជ្រោយ។ ក្នុងកម្មវិធីនោះ អ្នកស្រី អាលីហ្សា ឆាកឃឺ អ្នកតំណាងយូអិនឌីភី ប្រចាំប្រទេសកម្ពុជា បានលើកឡើងថា ការចាកចេញពីចំណាត់ក្រុមប្រទេសអភិវឌ្ឍន៍តិចតួចរបស់ប្រទេសកម្ពុជា (LDC) នាពេលប៉ុន្មានឆ្នាំខាងមុខនេះ គឺជាសមិទ្ធិផលដ៏សំខាន់នៃដំណើរការអភិវឌ្ឍន៍របស់ប្រទេសកម្ពុជា ត្បិតវានឹងជួបនូវបញ្ហាប្រឈមមួយចំនួនដែលនឹងផលប៉ះពាល់ដល់កំណើនសេដ្ឋកិច្ចរបស់កម្ពុជា ប៉ុន្តែវាក៏នាំមកនូវឱកាសសម្រាប់បើកផ្លូវថ្មីឆ្ពោះទៅរកកំណើនដ៏រឹងមាំ និងភាពធន់រយៈពេលវែង។  ទន្ទឹមនឹងនេះ អ្នកតំណាងយូអិនឌីភី ប្តេជ្ញាចិត្តរួមដំណើរជាមួយ នឹងប្រទេសកម្ពុជា តាមរយៈការគាំទ្រការពន្លឿនការអភិវឌ្ឍមនុស្ស ការលើកកម្ពស់ការប្រកួតប្រជែង និងការធ្វើពិពិធកម្មសេដ្ឋកិច្ច ការលើកកម្ពស់សេដ្ឋកិច្ចបៃតង សម្រាប់កំណើនប្រកប ដោយភាពធន់ និងការផ្លាស់ប្តូរពីការទទួលជំនួយហិរញ្ញប្បទានទៅជាការកៀងគរហិរញ្ញប្បទានអភិវឌ្ឍន៍ ដែលបានចែងនៅក្នុងឯកសារកម្មវិធីប្រចាំប្រទេសរបស់យូអិនឌីភី (២០២៤-២០២៨)។ សូមជម្រាបថា ផ្អែកលើវឌ្ឍនភាព ក្រុមប្រឹក្សាសេដ្ឋកិច្ច និងសង្គមនៃអង្គការសហប្រជាជាតិ (ECOSOC) បានអនុម័តលើអនុសាសន៍របស់គណៈកម្មាធិការសម្រាប់គោលនយោបាយអភិវឌ្ឍន៍ (CDP) សម្រាប់ប្រទេសកម្ពុជា ដើម្បីចាកចេញពីពីចំណាត់ក្រុមប្រទេសអភិវឌ្ឍតិចតួចនៅឆ្នាំ២០២៩ ដោយមានរយៈពេលអន្តរកាលចំនួនប្រាំឆ្នាំ៕ អត្ថបទ៖ ថុន សុកេតុមាលា  រូបភាព៖ ឯកសារ+ក្រសួងផែនការ  

 គិតចាប់ពីខែមករា ដល់ខែតុលា ឆ្នាំ ២០២៤នេះ ប្រទេសកម្ពុជា សម្រេចការនាំចេញ-នាំចូលទំនិញទៅកាន់ទីផ្សារអន្តរជាតិប្រមាណ ៤៥ពាន់លានដុល្លារអាមេរិក មានការកើនឡើង ១៦% បើប្រៀបធៀបនឹងពេលដូចគ្នា កាលពីឆ្នាំមុន។ នេះបើយោងតាមទិន្នន័យផ្លូវការចេញផ្សាយដោយ អគ្គនាយកដ្ឋានគយ និងរដ្ឋាករកម្ពុជា។   អគ្គនាយកដ្ឋានគយ បានបញ្ជាក់បន្ថែមថា កម្ពុជា សម្រេចបានការនាំចេញជាង ២១ពាន់លានដុល្លារអាមេរិក ដែលកើនឡើង ១៦% ខណៈនៅពេលដូចគ្នា ឆ្នាំ ២០២៣ កម្ពុជា នាំចេញទៅកាន់ទីផ្សារអន្តរជាតិជាង ១៨ពាន់លានដុល្លារអាមេរិក។ ទាក់ទងនឹង ការនាំចូលមកវិញ កម្ពុជា បាននាំចូលទំនិញប្រមាណ ២៣ពាន់លានដុល្លារអាមេរិក ដែលមានការកើនឡើង ប្រហែល ១៦% ហើយវាបានធ្វើឲ្យ កម្ពុជា សម្រេចឱនភាពពាណិជ្ជកម្មប្រមាណ ១ពាន់ ៩រយលានដុល្លារអាមេរិក។ ដៃគូពាណិជ្ជកម្មសំខាន់របស់កម្ពុជា រួមមាន ចិន សហរដ្ឋអាមេរិក វៀតណាម ថៃ ជប៉ុន ឥណ្ឌូនេស៊ី និងកាណាដា ខណៈទីផ្សារនាំចេញធំៗរួមមាន អាមេរិក ចិន វៀតណាម ជប៉ុន ថៃ និងកាណាដា។ អំឡុងពេលនេះ ការនាំចេញរបស់កម្ពុជា ទៅកាន់ប្រទេសចិន មានទំហំ ១ពាន់ ៤រយលានដុល្លារអាមេរិក ដោយការនាំចូលមកកាន់កម្ពុជាវិញ មានដល់ទៅជាង ១០ពាន់លានដុល្លារអាមេរិក ដែលធ្វើឲ្យ កម្ពុជា កើតនូវ ឱនភាពពាណិជ្ជកម្មជាង ៩ពាន់ ៥រយលានដុល្លារអាមេរិក។ ទីផ្សារសំខាន់មួយទៀតគឺ កម្ពុជា នាំចេញទំនិញទៅកាន់អាមេរិកជាង ៨ពាន់ ២រយលានដុល្លារអាមេរិក កើនឡើងប្រមាណ ១០% ធ្វើឱ្យ អាមេរិក នៅតែជាទីផ្សារនាំចេញធំជាងគេរបស់កម្ពុជា អំឡុងពេលនេះ ហើយកម្ពុជា ក៏បាននាំចូលពីអាមេរិក មកវិញប្រមាណ ២១៧លានដុល្លារអាមេរិក មានន័យថា កម្ពុជា សម្រេចនូវអតិរេកពាណិជ្ជកម្មជាង ៨ពាន់លានដុល្លារអាមេរិក។ រីឯ វៀតណាម ឈរនៅលំដាប់លេខ ៣ ដែលមានទំហំពាណិជ្ជកម្មទ្វេភាគីជាមួយកម្ពុជា គិតជាទឹកប្រាក់ប្រមាណ ៦ពាន់ ៤រយលានដុល្លារអាមេរិក ដោយក្នុងនោះ កម្ពុជា នាំចេញទំនិញទៅកាន់វៀតណាមជាង ២ពាន់ ៩រយលានដុល្លារអាមេរិក ខណៈកម្ពុជា នាំចូលមកជាង ៣ពាន់ ៤រយលានដុល្លារអាមេរិក។ ជាមួយគ្នានេះ មុខទំនិញសំខាន់ៗ ដែលកម្ពុជា នាំចេញទៅកាន់ទីផ្សារអន្តរជាតិ រួមមាន ផលិតផលវាយនភណ្ឌ កាត់ដេរសម្លៀកបំពាក់ ស្បែកជើង និងផលិតផលធ្វើដំណើរ ផលិតផលកសិកម្ម គ្រឿងអេឡិចត្រូនិក ឧបករណ៍អគ្គិសនី និងផលិតផលកង់ជាដើម។សូមជម្រាបថា ក្នុងឆ្នាំ ២០២៣កន្លងទៅនេះ ប្រទេសកម្ពុជា សម្រេចបាននូវទំហំពាណិជ្ជកម្មប្រមាណ ៤៦ពាន់លានដុល្លារអាមេរិក ក្នុងនោះ ការនាំចេញមានទំហំ ២២ពាន់លានដុល្លារ និងការនាំចូលមានទំហំជាង ២៤ពាន់លានដុល្លារអាមេរិក៕  អត្ថបទ៖ ងួន សុភ័ត្រ្តា រូបភាព៖ ឯកសារ 

 គិតចាប់ពីខែមករា ដល់ខែតុលា ឆ្នាំ ២០២៤នេះ មហាអំណាចសេដ្ឋកិច្ចចិន សម្រេចបាននូវ ទំហំពាណិជ្ជកម្មអន្តរជាតិជាង ៥ទ្រីលានដុល្លារអាមេរិក កើនឡើង ៥% បើប្រៀបធៀបនឹងពេលដូចគ្នាកាលពីឆ្នាំមុន។ នេះបើយោងតាមការចេញផ្សាយដោយ សារព័ត៌មានអន្តរជាតិធំៗ នៅថ្ងៃនេះ។  ទិន្នន័យផ្លូវការពី អគ្គនាយកដ្ឋានគយចិន បានបង្ហាញថា ការនាំចេញរបស់ប្រទេសចិន បានកើនឡើង ៦% ដល់ជាង ២,៩ទ្រីលានដុល្លារអាមេរិក ក្នុងអំឡុងខែមករាដល់ ខែតុលា ខណៈដែលការនាំចូលបានកើនឡើង ៣% ដល់ ២,១ទ្រីលានដុល្លារអាមេរិក។ ការនាំចេញផលិតផលគ្រឿងម៉ាស៊ីន និងអគ្គិសនីរបស់ចិន បានឈានដល់ ១,៧ទ្រីលានដុល្លារ កើនឡើង ៨% ហើយស្មើនឹង ៥៩% នៃការនាំចេញសរុបរបស់ចិន។ទន្ទឹមគ្នានេះ ការនាំចូលផលិតផលមេកានិក និងអគ្គិសនី បានឈានដល់ជាង ៨០០ពាន់លានដុល្លារអាមេរិក កើនឡើង ៨% ជាពិសេសផ្នែកគ្រឿងបន្លាស់យន្តហោះ និងគ្រឿងបន្លាស់អេឡិចត្រូនិច កើនឡើងខ្ពស់ដូចគ្នា។ ប្រធាននាយកដ្ឋានវិភាគស្ថិតក្រោមអគ្គនាយកដ្ឋានគយចិន បានបញ្ជាក់ថា ក្នុងរយៈពេល ១០ខែដំបូងក្នុងឆ្នាំនេះ ពាណិជ្ជកម្មក្រៅប្រទេសរបស់ប្រទេសចិន បានកើនឡើងជាលំដាប់ ដោយមានការពង្រីកជាបន្តបន្ទាប់ក្នុងទំហំ និងការបង្កើនប្រសិទ្ធភាពនៃរចនាសម្ព័ន្ធ ដែលធ្វើឱ្យ ចិន អាចសម្រេចបាននូវ គោលដៅកំណើនប្រចាំឆ្នាំ ប្រកបដោយស្ថិរភាពទាំងគុណភាព និងបរិមាណ។សូមជម្រាបថា ការស្ទុះងើបឡើងវិញនៃតម្រូវការទីផ្សារខាងក្រៅ បានបង្កើតលក្ខខណ្ឌអំណោយផលសម្រាប់ការនាំចេញរបស់ប្រទេសចិន ហើយពាណិជ្ជកម្មរបស់ប្រទេសចិនជាមួយ ១៦០ប្រទេស និងតំបន់ជុំវិញពិភពលោក បានកើនឡើងក្នុងអំឡុងពេលនោះ៕   អត្ថបទ៖ ងួន សុភ័ត្រ្តា រូបភាព៖ ឯកសារ  

 ប្រទេសថៃ កំពុងកំណត់គោលដៅទទួលភ្ញៀវទេសចរអឺរ៉ុបចំនួន ៨លាននាក់ នៅឆ្នាំ ២០២៥ ខណៈដែលក្រសួងទេសចរណ៍ និងកីឡាថៃ សន្យាថា នឹងពន្លឿនកិច្ចខិតខំប្រឹងប្រែងជាមួយក្រុមហ៊ុនអាកាសចរណ៍ និងឯកអគ្គរដ្ឋទូត សម្រាប់ការបន្តជើងហោះហើរអន្តរជាតិឡើងវិញ។ នេះបើយោងតាមការចុះផ្សាយដោយ សារព័ត៌មានក្នុងស្រុកថៃ នៅថ្ងៃនេះ។  នៅក្នុងពិព័រណ៍ពាណិជ្ជកម្មទេសចរណ៍ដ៏ធំបំផុតមួយស្តីពី ទីផ្សារទេសចរណ៍ពិភពលោក រដ្ឋមន្ត្រីក្រសួងទេសចរណ៍ និងកីឡាថៃ បានមានប្រសាសន៍ថា អនាគតនៃវិស័យទេសចរណ៍ថៃ គឺមានភាពភ្លឺស្វាង ស្វាហាប់ និងពោរពេញដោយឱកាស។ បន្ទាប់ពីព្រឹត្តិការណ៍នេះ ក្រសួងទេសចរណ៍ថៃ នឹងអញ្ជើញឯកអគ្គរដ្ឋទូតបរទេសប្រចាំប្រទេសថៃ ដោយផ្តោតលើទីផ្សារធំៗដូចជា ចក្រភពអង់គ្លេស អាល្លឺម៉ង់ អឺរ៉ុបខាងកើត និងមជ្ឈិមបូព៌ា រួមជាមួយនឹងតំណាងក្រុមហ៊ុនអាកាសចរណ៍ ដើម្បីពិភាក្សាអំពីជើងហោះហើរ និងការត្រៀមរៀបចំសម្រាប់ឆ្នាំ ២០២៥ ជាពិសេសក្នុងអំឡុងរដូវកាលសម្បូរភ្ញៀវ។បើតាមអាជ្ញាធរទេសចរណ៍ថៃ នៅឆ្នាំនេះ ប្រទេសថៃ រំពឹងថា នឹងស្វាគមន៍ភ្ញៀវទេសចរផ្លូវឆ្ងាយចំនួន ៩លាន ៦សែននាក់ រួមទាំងជាង ៧លាននាក់មកពីអឺរ៉ុប។ជាចុងក្រោយ អាជ្ញាធរទេសចរណ៍ថៃ បានឱ្យដឹងថា ប្រទេសថៃ រំពឹងស្វាគមន៍អ្នកដំណើរអន្តរជាតិចំនួន ១០លាននាក់ ក្នុងត្រីមាសទី ៤ ដែលជាត្រីមាសចុងក្រោយនៃឆ្នាំ ២០២៤ ដើម្បីសម្រេចបានតាមគោលដៅ ៣៦លាននាក់ ក្នុងឆ្នាំ ២០២៤នេះ៕  អត្ថបទ៖ ងួន សុភ័ត្រ្តា រូបភាព៖ ឯកសារ 

 វិថីតេជោសន្តិភាពឆ្នេរអង្កោល គឺជាសរសៃឈាមទេសចរណ៍ដ៏សំខាន់ ក្នុងការតភ្ជាប់ប៉ូលទេសចរណ៍ក្រុងកែបចាស់ មកកាន់ប៉ូលទេសចរណ៍តំបន់អង្កោល ឆ្នេរមួយនេះក៏កំពុងទទួលបានការចាប់អារម្មណ៍ខ្លាំង ពីសំណាក់ភ្ញៀវទេសចរក្នុងតំបន់ ជាពិសេសភ្ញៀវទេសចរដែលចូលចិត្តការធ្វើដំណើរកម្សាន្តទៅកាន់ទីកន្លែងដែលស្ងប់ស្ងាប់។នៅថ្ងៃទី១១ ខែវិច្ឆិកា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញចូលរួមជាអធិបតី សម្ពោធដាក់ឱ្យប្រើប្រាស់ជាផ្លូវការ «វិថីតេជោសន្តិភាពឆ្នេរអង្កោល» បានលើកឡើងថា «វិថីតេជោសន្តិភាពឆ្នេរអង្កោល» នៅខេត្តកែបមានតម្លៃជាង ១០លានដុល្លារ គឺជាសរសៃឈាមមួយដ៏សំខាន់ សម្រាប់ការតភ្ជាប់សហគមន៍ទេសចរណ៍។ សម្តេចបវរធិបតី ហ៊ុន ម៉ាណែត បានលើកឡើងបន្ថែមថា វិថីតេជោសន្តិភាពឆ្នេរអង្កោល បានបម្រើប្រយោជន៍ដោយផ្ទាល់ ដល់ប្រជាពលរដ្ឋប្រមាណ ៦ពាន់គ្រួសារ។ វិថីតេជោសន្តិភាពឆ្នេរអង្កោល គឺជាខ្សែផ្លូវទេសចរណ៍ ប្របមាត់ទឹករបស់កែប ដែលបាននឹងកំពុងដើរតួនាទី ជួយសម្រួលដល់ចរាចរណ៍ដឹកជញ្ជូន និងការធ្វើដំណើរផ្សេងៗ របស់ប្រជាពលរដ្ឋ ជួយទាក់ទាញសក្តានុពលទេសចរណ៍ និងជំរុញការអភិវឌ្ឍន៍ផ្សេងៗនៅតាមតំបន់ឆ្នេរមាត់សមុទ្រទាំងមូល ឱ្យកាន់តែរីកចម្រើន និងល្អប្រសើរ។ លើសពីនេះ ថែមទាំងបានតភ្ជាប់ផ្ទៃក្នុងរបស់ខេត្តកែប ក៏ដូចជាតភ្ជាប់ទៅព្រំដែនជាមួយប្រទេសវៀតណាមផងដែរ។ទន្ទឹមនឹងនេះ វិថីតេជោសន្តិភាពឆ្នេរអង្កោល ក៏បាននិងកំពុងដើរតួនាទី ជាខ្សែផ្លូវលើកសម្រស់ទេសចរណ៍ខេត្តកែប ឱ្យកាន់តែស្រស់ស្អាត និងមានរបៀបរៀបរយ តាមរយៈការបង្កើតឱ្យមានចំណតរថយន្ត ផ្លូវជិះកង់ និងផ្លូវថ្មើរជើងសម្រាប់ការដើរកម្សាន្តរបស់ប្រជាពលរដ្ឋ និងភ្ញៀវទេសចរជាតិ-អន្តរជាតិនានា។ វិថីតេជោសន្តិភាពឆ្នេរអង្កោល គឺជាខ្សែផ្លូវលាតសន្ធឹងប្របមាត់ឆ្នេរទេសចរណ៍នៃសមុទ្រ ខេត្តកែប ដែលតភ្ជាប់ពីក្រុងកែប ទៅកាន់តំបន់សហគមន៍ទេសចរណ៍ និងនេសាទ នៅក្នុងឃុំអង្កោល និងឆ្លងកាត់តំបន់កសិកម្ម តំបន់ស្រែអំបិល តំបន់ព្រៃកោងកាង។ វិថីនេះ មានប្រវែងសរុបប្រមាណ ១២គីឡូម៉ែត្រ ស្ថិតនៅ ភូមិកែប និងភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប គឺជាអនុគម្រោងនៃគម្រោងហេដ្ឋារចនាសម្ព័ន្ធទេសចរណ៍ សម្រាប់កំណើនប្រកបដោយ បរិយាប័ន្ន ក្នុងមហាអនុតំបន់មេគង្គជំហានទី២ ដែលគ្រប់គ្រងដោយក្រសួងទេសចរណ៍។  សូមជម្រាបថា បើយោងតាមអភិបាលនៃគណ:អភិបាលខេត្តកែប បានឱ្យដឹងថា វិថីតេជោសន្តិភាពឆ្នេរអង្កោល មួយខ្សែនេះ ដែលបានប្រើប្រាស់រយៈពេលសាងសង់ចំនួន ២៤ខែ ចាប់ផ្ដើមក្នុងខែមករា ឆ្នាំ២០២២ និងបញ្ចប់ក្នុង ខែមករា ឆ្នាំ២០២៤ ដោយចំណាយថវិកាសរុប ១០លានដុល្លារអាម៉េរិក ជាកម្ចីឥណទានសម្បទាន ពីធនាគារអភិវឌ្ឍន៍អាស៊ី និងថវិកាបដិភាគមួយចំនួនរបស់រាជរដ្ឋាភិបាល សម្រាប់ការដោះស្រាយផលប៉ះពាល់ និងពន្ធអាករផ្សេងៗ៕   អត្ថបទ៖ ថុន សុកេតុមាលា រូបភាព៖ ញិល សុជា  

 នៅថ្ងៃនេះ ធនាគារជាតិនៃកម្ពុជា បានប្រកាសដាក់ឱ្យដំណើរការ Mastercard តភ្ជាប់ជាមួយកម្មវិធីទូទាត់បាគងទេសចរ ដែលអនុញ្ញាត អ្នកប្រើប្រាស់ អាចផ្ទេរប្រាក់ពីគណនី Mastercard របស់ពួកគេទៅកាន់កាបូបបាគងទេសចររបស់ពួកគេ ដើម្បីធ្វើការទូទាត់កាន់តែងាយស្រួល។  នាឱកាសសម្ពោធដាក់ឱ្យដំណើរការ Mastercard ជាមួយកម្មវិធីទូទាត់បាគងទេសចរ (Bakong Tourists App) នៅព្រឹកថ្ងៃច័ន្ទ ទី១១ ខែវិច្ឆិកានេះ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បានមានប្រសាសន៍ថា ចាប់ពីពេលឥឡូវនេះ អ្នកប្រើប្រាស់អាចផ្ទេរប្រាក់ពីគណនី Mastercard របស់ពួកគេទៅកាន់កាបូប បាគងទេសចររបស់ពួកគេ ដែលធ្វើឱ្យការទូទាត់ កាន់តែងាយស្រួល។ លោកជំទាវ បន្តថា លក្ខណៈពិសេសខាងលើនេះ ផ្តល់ភាពងាយស្រួលមួយកម្រិតទៀតដល់ភ្ញៀវទេសចរ ក្នុងការប្រើប្រាស់ទឹកប្រាក់ក្នុងគណនី Mastercard របស់ពួកគេ បញ្ចូនទៅកាន់គណនីបាគងទេសចរ ហើយអាចធ្វើការទិញ ការកក់ និងការគ្រប់គ្រងការចំណាយដោយមិនប្រើប្រាស់សាច់ប្រាក់ ឬប្រើបញ្ជរប្តូរ រូបិយប័ណ្ណជាដើម។បន្ថែមលើនេះ លោកជំទាវ បានបញ្ជាក់ថា កម្មវិធីទូទាត់បាគងទេសចរ (Bakong Tourists App) នឹងរួមចំណែកលើកកម្ពស់វិស័យទេសចរណ៍នៅកម្ពុជា តាមរយៈការផ្តល់ជាមធ្យោបាយទូទាត់តាមអេឡិចត្រូនិក ដែលអាចឱ្យទេសចរអន្តរជាតិធ្វើប្រតិបត្តិការទូទាត់ទំនិញ និងសេវា នៅតាមហាងទំនិញប្រមាណ ៤លានកន្លែងទូទាំងប្រទេសកម្ពុជា។ ស្របគ្នានេះដែរ លោក Sapan Shah អនុប្រធានជាន់ខ្ពស់នៃក្រុមហ៊ុន Mastercard ទទួលបន្ទុកផលិតផលប្រចាំនៅអាស៊ីប៉ាស៊ីហ្វិក បានមានប្រសាសន៍ដែរថា កម្មវិធីបាគងទេសចរ នឹងផ្តល់ភាពងាយស្រួល ក្នុងការប្រើប្រាស់ប្រាក់ឌីជីថលប្រកបដោយសុវត្ថិភាព ដោយគ្មានដែនកំណត់សម្រាប់ទាំងភ្ញៀវទេសចរ និងអាជីវកម្មក្នុងស្រុក ហើយវានឹងធ្វើឱ្យប្រសើរឡើងនូវបទពិសោធន៍ និងកាន់តែងាយស្រួលសម្រាប់អ្នកទេសចរក្នុងការស្វែងយល់ និងរីករាយជាមួយប្រទេសកម្ពុជា។ ជាពិសេសជាងនេះទៅទៀត កិច្ចសហប្រតិបត្តិការនេះ នឹងធ្វើឱ្យ ប្រព័ន្ធបាគងរបស់កម្ពុជា អាចផ្សារភ្ជាប់ទំនាក់ទំនងជាមួយនឹង អំណាចទិញរបស់អ្នកប្រើប្រាស់កាត Mastercard ដែលមានជាង ២ពាន់លាននាក់។ ជាក់ស្តែង ភ្ញៀវទេសចរអន្តរជាតិ ដែលមកកម្សាន្តនៅក្នុងប្រទេសកម្ពុជា អាចធ្វើការទាញយក កម្មវិធីទូទាត់បាគងទេសចរ និងចុះឈ្មោះប្រើប្រាស់តាមវិធីងាយៗ ហើយបន្ទាប់មកអាចបញ្ចូលទឹកប្រាក់ក្នុងគណនីបាគង ជាការស្រេច (ចំពោះជំហានបន្ទាប់ កម្មវិធីបាគងទេសចរ អាចភ្ជាប់ជាមួយប័ណ្ណទូទាត់អន្តរជាតិដែលពួកគាត់មាន ដើម្បីដាក់ប្រាក់ក្នុងគណនីបាន)។  សូមជម្រាបថា គិតត្រឹមឆមាសទី១ ឆ្នាំ២០២៤ នេះ ប្រព័ន្ធបាគងមានសមាជិកសរុបចំនួន ៧២ គ្រឹះស្ថាន ក្នុងនោះ មានគ្រឹះស្ថានចំនួន ៦០ បានដាក់ឱ្យដំណើរការជាផ្លូវការ និងគ្រឹះស្ថានចំនួន ១២ ទៀតបាន និងកំពុងបន្តធ្វើសន្ធានកម្មប្រព័ន្ធ។ ចំពោះប្រតិបត្តិការផ្ទេរប្រាក់ និងទូទាត់ ដែលធ្វើឡើងតាមរយៈប្រព័ន្ធបាគង មានចំនួន ២២២លានប្រតិបត្តិការ ក្នុងនោះ ៩៨លានប្រតិបត្តិការ ជាប្រាក់រៀល និង ១២៤លានប្រតិបត្តិការ ជាប្រាក់ដុល្លារអាមេរិក និងមានទំហំជាប្រាក់រៀលចំនួន ៧៧ទ្រីលានរៀល និងជាប្រាក់ដុល្លារអាមេរិកចំនួន ៤៦ពាន់លានដុល្លារអាមេរិក៕  អត្ថបទ៖ ងួន សុភ័ត្រ្តា រូបភាព៖ អ៊ិន អាត   

អគ្គនាយកដ្ឋានគយ និងរដ្ឋាករកម្ពុជា បានបង្ហាញឱ្យដឹងថា ក្នុងរយៈពេល ៣ត្រីមាស ឆ្នាំ ២០២៤នេះ អាមេរិក នៅតែជាទីផ្សារនាំចេញធំជាងគេបង្អស់របស់កម្ពុជា ខណៈអ្នកជំនាញសេដ្ឋកិច្ច ជឿជាក់ថា កម្ពុជា បន្តទទួលបានឥទ្ធិពលវិជ្ជមាន បន្ទាប់ពីការបោះឆ្នោតនៅអាមេរិក។  គិតចាប់ពីខែមករា ដល់ខែកញ្ញា ឆ្នាំ២០២៤នេះ កម្ពុជា បាននាំចេញទំនិញទៅកាន់ ទីផ្សារអាមេរិកជាង ៧ពាន់ ៦រយលានដុល្លារអាមេរិក ហើយ កម្ពុជា ក៏បាននាំចូលពីអាមេរិក មកវិញប្រមាណ ១៩៣លានដុល្លារអាមេរិក មានន័យថា កម្ពុជា សម្រេចនូវអតិរេកពាណិជ្ជកម្មជាង ៧ពាន់ ៤រយលានដុល្លារអាមេរិក និងធ្វើឱ្យ អាមេរិក នៅតែជាទីផ្សារនាំចេញធំជាងគេបង្អស់របស់កម្ពុជា។ លោកបណ្ឌិត ហុង វណ្ណៈ អ្នកជំនាញផ្នែកសេដ្ឋកិច្ចនៃរាជបណ្ឌិត្យសភាកម្ពុជា បញ្ជាក់ប្រាប់ភីអិនអិនថា កម្ពុជា ដែលមានទីផ្សារអាមេរិក និងអឺរ៉ុប ជាទីផ្សារនាំចេញធំៗនោះ នឹងបន្តទទួលបានផលវិជ្ជមាន បន្ទាប់ពី លោកដូណាល់ ត្រាំ ឈ្នះការបោះឆ្នោតនៅអាមេរិក។ ទន្ទឹមគ្នានេះដែរ ឯកឧត្តម ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជា ក៏សម្លឹងឃើញពី កត្តាវិជ្ជមានជាច្រើន ជាពិសេសការប្រែប្រួលនៃផ្សារហ៊ុន កើតចេញពីលទ្ធផលនៃការបោះឆ្នោតនៅសហរដ្ឋអាមេរិក ហើយជឿជាក់ថា វានឹងជះឥទ្ធិពលវិជ្ជមានច្រើនដល់កម្ពុជា។ ជាក់ស្តែង នៅក្នុងរយៈពេល ៣ត្រីមាស ដើមឆ្នាំ ២០២៤នេះ សហរដ្ឋអាមេរិក និងកម្ពុជា សម្រេចទំហំពាណិជ្ជកម្មទ្វេភាគីដល់ជាង ៧,៨ពាន់លានដុល្លារអាមេរិក កើនឡើង ១០% ធៀបនឹងពេលដូចគ្នាកាលពីឆ្នាំមុន។  អគ្គនាយកដ្ឋានគយ និងរដ្ឋាករកម្ពុជា បានបង្ហាញថា ប្រទេសកម្ពុជា នាំចេញផលិតផលភាគច្រើនគឺជា ផលិតផលវាយនភណ្ឌកាត់ដេរ សម្លៀកបំពាក់ ស្បែកជើង កាបូបសម្រាប់ធ្វើដំណើរ និងផលិតផលកសិកម្ម និងបាននាំចូលពី សហរដ្ឋអាមេរិក មកវិញ មានដូចជា រថយន្ត គ្រឿងអេឡិចត្រូនិក ឱសថ និងបរិក្ខាពេទ្យជាដើម។សូមជម្រាបថា រយៈពេល ៩ខែ ដើមឆ្នាំ ២០២៤នេះ ប្រទេសកម្ពុជា សម្រេចបាននូវទំហំពាណិជ្ជកម្មជាង ៤១ពាន់លានដុល្លារអាមេរិក មានការកើនឡើង ១៦% បើប្រៀបធៀបនឹងពេលដូចគ្នា កាលពីឆ្នាំមុន៕   អត្ថបទ៖ ងួន សុភ័ត្រ្តា រូបភាព៖ ឯកសារ 

 រាជរដ្ឋាភិបាលកម្ពុជា ស្វាគមន៍ក្រុមហ៊ុនចិន ដែលមានបំណងចង់ពង្រីកការវិនិយោគ បង្កើតរោងចក្រសម្លៀកបំពាក់ស្ត្រី និងកុមារនៅកម្ពុជា សម្រាប់ការនាំចេញទៅកាន់ទីផ្សារក្រៅប្រទេស។សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានអនុញ្ញាតឱ្យលោក Mu Hsin Yuan ប្រធានក្រុមហ៊ុន Fortune Rich Trade Co.,Ltd. និង Ju Wang Footwear Co.,Ltd. ចូលជួបសម្ដែងការគួរសម និងពិភាក្សាការងារ ក្នុងឱកាសអញ្ជើញចូលរួមកិច្ចប្រជុំកំពូលមហាអនុតំបន់មេគង្គ (GMS) លើកទី៨ នៅថ្ងៃទី៦-៧ ខែវិច្ឆិកា ឆ្នាំ២០២៤ នៅទីក្រុងគុនមិញ ខេត្តយូណាន សាធារណរដ្ឋប្រជាមានិតចិន។ ក្នុងឱកាសនោះ ប្រធានក្រុមហ៊ុន Fortune Rich Trade Co.,Ltd. បានលើកឡើងថា ការរីកចម្រើនលើគ្រប់វិស័យនៅកម្ពុជា និងមានជំនឿជឿជាក់ថា ប្រទេសកម្ពុជា នឹងបន្តអភិវឌ្ឍន៍រីកចម្រើនកាន់តែខ្លាំងក្លាថែមទៀត។ ប្រធានក្រុមហ៊ុន Fortune Rich បានបន្តទៀតថា រាជរដ្ឋាភិបាលកម្ពុជា ធានាបាននូវបរិយាកាសវិនិយោគមួយ ប្រកបដោយស្ថិរភាព និងអនុគ្រោះ សម្រាប់វិនិយោគិន ដូចនេះ រាជរដ្ឋាភិបាលកម្ពុជា តែងតែផ្ដល់ការគាំទ្រដល់ដំណើរការអាជីវកម្មរបស់ក្រុមហ៊ុននៅកម្ពុជា។ជាមួយគ្នានេះ ប្រធានក្រុមហ៊ុន Fortune Rich មានចំណាប់អារម្មណ៍ក្នុងការពង្រីកការវិនិយោគនៅកម្ពុជាបន្ថែមទៀត តាមរយៈការបង្កើតរោងចក្រផលិតសំលៀកបំពាក់ ស្ត្រី និងកុមារ សម្រាប់នាំចេញទៅកាន់ទីផ្សារក្រៅប្រទេស។ ជាការឆ្លើយតប សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានសាទរចំពោះជោគជ័យរបស់ក្រុមហ៊ុននៅកម្ពុជា និងបានគូសបញ្ជាក់ថា វិស័យវាយនភ័ណ្ឌ និងសម្លៀកបំពាក់ ជាវិស័យដែលកំពុងមានការរីកចម្រើនខ្លាំង ហើយរាជរដ្ឋាភិបាលតែងតែយកចិត្តទុកដាក់លើវិស័យនេះ ព្រមទាំងបានដាក់ចេញនូវគោលនយោបាយជាច្រើន ដើម្បីគាំទ្រដល់ជោគជ័យរបស់ក្រុមហ៊ុន សហគ្រាស ដែលបានបណ្ដាក់ទុនវិនិយោគនៅកម្ពុជា ក្នុងនោះ រាជរដ្ឋាភិបាល បានដាក់ចេញការលើកទឹកចិត្តចំពោះក្រុមហ៊ុន ឬរោងចក្រណាដែលអាចប្រើប្រាស់វត្ថុធាតុដើមក្នុងស្រុក សម្រាប់ការទ្រទ្រង់ដល់ខ្សែច្រវាក់ផលិតកម្ម។  គួរជម្រាបថា រាជរដ្ឋាភិបាលកម្ពុជា ស្វាគមន៍ និងបើកចំហកិច្ចពិភាក្សាជាមួយវិស័យឯកជន សំដៅរួមគ្នាធ្វើឱ្យការវិនិយោគរបស់ក្រុមហ៊ុនឯកជន ទទួលបាននូវភាពជោគជ័យបន្ថែមទៀតលើការវិនិយោគនៅកម្ពុជា៕   អត្ថបទ៖ ថុន សុកេតុមាលា  រូបភាព៖ ក្រុមការងារនាយករដ្ឋមន្ត្រី