កម្មវិធីប្រគល់ពានរង្វាន់ដ៏ល្បីល្បាញរបស់សហរដ្ឋអាមេរិក MTV VMAs ទើបតែប្រកាសបញ្ជីឈ្មោះសិល្បករសម្រាប់ព្រឹត្តិការណ៍ឆ្នាំ២០២៥ ដែលក្នុងនោះរួមមាន Doja Cat, Sabrina Carpenter និង Mariah Carey។

តារាចម្រៀងស្រីជួរមុខដូចជា Doja Cat, Sabrina Carpenter និង Mariah Carey ត្រូវបានប្រកាសថានឹងចូលរួមសម្តែងក្នុងកម្មវិធីពានរង្វាន់វីដេអូចម្រៀង MTV Video Music Awards ឆ្នាំ ២០២៥ នៅថ្ងៃទី៧ ខែកញ្ញាខាងមុខនេះ។ 

កម្មវិធីប្រគល់ពានរង្វាន់ដ៏ល្បីល្បាញរបស់សហរដ្ឋអាមេរិកមួយនេះបានប្រកាសបញ្ជីឈ្មោះសិល្បករសម្រាប់ព្រឹត្តិការណ៍ឆ្នាំ២០២៥ ដែលនឹងរៀបចំឡើងនៅទីក្រុងញូវយ៉ក នៅលើទំព័រប្រព័ន្ធផ្សព្វផ្សាយសង្គមរបស់ពួកគេ។ 

ក្រុមអ្នករៀបចំកម្មវិធីក៏បានឱ្យដឹងដែរថា តារាចម្រៀងម្ចាស់បទ “All I Want for Christmas is You” Mariah Carey នឹងទទួលបានពានរង្វាន់កិត្តិយស គឺពាន Vanguard Award ហើយតារាចម្រៀងរ៉េប Busta Rhymes នឹងទទួលបានពានរង្វាន់កិត្តិយស MTV VMA rock the bells visionary Award។ តារាទាំងពីររូបនឹងបង្ហាញវត្តមានលើឆាកដូចគ្នា។ 

សិល្បករដែលនឹងចូលរួមសម្ដែងផ្សេងទៀតរួមមានតារាចម្រៀង Post Malone, Jelly Roll, J Balvin និង Tate McRae ខណៈពិធីករកម្មវិធីគឺតារាចម្រៀងរ៉េប LL Cool J.។

ចំណែកតារាចម្រៀង Sabrina Carpenter នឹងសម្តែងបទចម្រៀងពីអាល់ប៊ុមថ្មីរបស់នាង "Man's Best Friend"។ កាលពីឆ្នាំមុន នាងក៏បានសម្ដែងក្នុងកម្មវិធី VMAs ដែរ ដែលបានក្លាយជាការសម្ដែងមានការទស្សនាខ្ពស់បំបែកកំណត់ត្រាសម្រាប់ MTV ៕
 

ប្រែសម្រួល៖ វ៉ាន់ថន