ក្រោយទាក់ទងគ្នា ៦ឆ្នាំពិធីករកម្មវិធី "អ្នកជិតខាង" របស់ PNN  លោក ខេង រតនៈ ហៅ នាយព្រែក សម្រេចចិត្តលុតជង្គង់សុំមិត្តស្រីកញ្ញា ឈិន មុន្នីនាថ រៀបការយ៉ាងរ៉ូមែនទិក។

ក្រោយចំណាយពេលមើលចិត្ត និងស្វែងយល់ពីគ្នាក្នុងនាមគូស្នេហ៍អស់រយៈពេលប្រមាណ ៦ឆ្នាំរួចមក ទីបំផុត ពិធីករប្រចាំកម្មវិធី «អ្នកជិតខាង» ភីអិនអិន នាយព្រែក សម្រេចចិត្តផ្តល់ភាពច្បាស់លាស់ឥតងាករ៉េជូនទៅគូស្នេហ៍បណ្តូលចិត្តរបស់ខ្លួន គឺកញ្ញា ឈិន មុន្នីនាថ ដែលគ្រប់គ្នាស្គាល់តាមរយៈការសម្តែងតួឯកស្រីក្នុងរឿងភាគខ្មែរដ៏ល្បីរបស់ភីអិនអិន ចំណងជើង «អ្នកម៉ាក់វ័យក្មេង»។

កូនប្រុសតារាកំប្លែង យាយ យយ បានបង្កើតបរិយាកាសសែនរ៉ូមែនតិចនៅសណ្ឋាគារទំនើបលំដាប់ផ្កាយ អមដោយការចូលរួមពីមិត្តភ័ក្តជិតស្និទ្ធរបស់អ្នកទាំងពីរ ដើម្បីធ្វើជាសាក្សីសម្រាប់ថ្ងៃដ៏រំភើបនេះ។ ភក្តីភាពដ៏ស្មោះសរពី នាយព្រែក ធ្វើឱ្យ មុន្នីនាថ រំភើបត្រេកអរលាយឡំជាមួយទឹកភ្នែក និយាយថា «បាន» សំដៅដល់ពាក្យយល់ព្រមរៀបការសាងគ្រួសារជាមួយគ្នា។

ក្នុងថ្ងៃដ៏ពិសេស និងជាទីចងចាំសម្រាប់ជីវិតជាមនុស្សស្រីនាយព្រែក និង ឈិន មុន្នីនាថ ក៏បង្ហាញថ្ងៃរៀបការតែម្តង ដោយអ្នកទាំងពីរសម្រេចចិត្តជ្រើសរើសថ្ងៃទី៧ ខែធ្នូ ឆ្នាំ២០២៥ ជាថ្ងៃបញ្ចប់ភាពនៅលីវ បញ្ចប់ភាពជាគូស្នេហ៍ ហើយប្តូរទៅជាប្តីប្រពន្ធតាមប្រពៃណីវិញម្តង។

ក្រោយវីដេអូសុំរៀបការរបស់ ខេង រតនៈ ហៅ នាយព្រែក បានបង្ហោះលើបណ្ដាញសង្គមជាសាធារណៈ អ្នកគាំទ្រជាច្រើនបានចូលរួមអបអរសាទរ និងជូនពរគូស្នេហ៍ទាំង ២ ឲ្យកាន់តែស្រលាញ់គ្នាខ្លាំងជាងមុន ហើយគ្រប់គ្នាពិតជារំភើបជាមួយដំណឹងដ៏រីករាយនេះ ខណៈដែលអនាគតកូនក្រមុំរូបស្រស់ មុន្នីនាថ បានប្រកាសប្រាប់ឱ្យមិត្តភ័ក្ត និងអ្នកជុំវិញខ្លួនកាត់ឈុតត្រៀមសម្រាប់មង្គលការអ្នកទាំង ដែលនឹងឈានមកដល់នៅចុងឆ្នាំ២០២៥នេះ។

ទោះសាម៉ីខ្លួនទាំងពីរមិនទាន់បញ្ជាក់ តែគេជឿជាក់ថា ពិធីមង្គលការរបស់ នាយព្រែក និង មុន្នីនាថ ច្បាស់ជាធំសម្បើមមិនខានឡើយ ព្រោះអ្នកទាំងពីរមានឈាមជ័រជាកូនអ្នកសិល្បៈដូចគ្នា ថែមទាំងជាបុគ្គលមានកេរ្តិ៍ឈ្មោះ មានស្នាដៃក្នុងវិស័យសិល្បៈជាច្រើនឆ្នាំមកហើយ៕

អត្ថបទ៖ រ៉ាត់ ចាន់ធីតា រូបភាព៖ ភីអិនអិន និងហ្វេសប៊ុក