ស្ថាប័ន Miss Universe Cambodia គ្រប់គ្រងដោយ លោក ឈួង យីវឆូយ បានប្រកាសពន្យាពេលការប្រកួតផ្តាច់ព្រ័ត្រកម្មវិធីកញ្ញាឯកចក្កវាឡកម្ពុជាឆ្នាំ២០២៥ (Miss Universe Cambodia 2025) ភ្លាមៗក្រោយចប់ការប្រកួតបឋម កាលពីថ្ងៃទី២៥ ខែកក្កដា ឆ្នាំ២០២៥ កន្លងទៅ ដោយសារតែបញ្ហាជម្លោះតាមបន្ទាត់ព្រំដែនរវាងកម្ពុជាថៃដែលបន្តអូសបន្លាយរហូតមកទល់ពេលបច្ចុប្បន្ន។

ក្រោយដកឃ្លាសម្រាកអស់មួយរយៈ ពេលនេះស្ថាប័ន MUC បានសម្រេចកំណត់ថ្ងៃថ្មីសម្រាប់ការប្រកួតផ្តាច់ព្រ័ត្រ Miss Universe Cambodia 2025 គឺនៅថ្ងៃទី ១២ ខែកញ្ញា ឆ្នាំ២០២៥ ខាងមុខ នៅស្ទូឌីយ៉ូស្ថានីយទូរទស្សន៍ PNN ចាប់ពីម៉ោង៤ល្ងាចតទៅ និងមានការផ្សាយផ្ទាល់លើកញ្ចក់ទូរទស្សន៍ ភីអិនអិន PNN TV និងយូធូប Miss Universe ចាប់ពីម៉ោង៧យប់តទៅ។ នេះបើយោងតាមការបញ្ជាក់ជាសាធារណៈរបស់ទំព័រហ្វេសប៊ុកផ្លូវការ Miss Universe Cambodia ។

ឃើញបែបនេះភ្លាម បណ្តាអ្នកគាំទ្រ និងអ្នកនិយមតាមដានការប្រកួតបវរកញ្ញានាំគ្នាអន្ទះសាចង់ឱ្យការប្រកួតមកដល់ឆាប់ៗ ដើម្បីឆាប់ស្វែងរកឃើញរាជនីសម្រស់ដែលអាចឆក់បានមកុដ Miss Universe Cambodia 2025 និងតំណាងឱ្យកម្ពុជាទៅប្រកួតលើវេទិកាអន្តរជាតិ។ 

យ៉ាងណាមិញ មកទល់ពេលនេះ ស្ថាប័ន Miss Universe Cambodia ដែលមានលោក ឈួង យីវឆូយ ជាអ្នកគ្រប់គ្រងថ្នាក់ជាតិ មិនទាន់បញ្ជាក់ពីការបញ្ចូនបវរកញ្ញាតំណាង កម្ពុជា ទៅចូលរួមប្រកួតកម្មវិធីអន្តរជាតិនោះឡើយ ដោយហេតុថា ថៃ ជាម្ចាស់ផ្ទះរៀបចំការប្រកួតអន្តរជាតិ ហើយពេលនេះស្ថានភាពជម្លោះនៃប្រទេសទាំងពីរនៅមិនទាន់ចប់សព្វគ្រប់។

 មួយវិញទៀត ដោយសារកន្លងទៅថ្មីៗនេះ លោក ណាវ៉ាត់ អ៊ីសារ៉ាក្រៃសីល អ្នកគ្រប់គ្រងកម្មវិធី Miss Universe Thailand ធ្លាប់ព្រហើនហ៊ានប្រើវេទិកា MUT វាយប្រហារ បង្កាច់បង្ខូច និងប្រមាថតិះដៀលប្រមុខថ្នាក់ដឹកនាំនៃព្រះរាជាណាចក្រកម្ពុជាយ៉ាងធ្ងន់ធ្ងរជាសាធារណៈ រហូតស្ថាប័ន Miss Universe Cambodia (MUC) សេចក្តីថ្លែងការណ៍ថ្កោលទោសយ៉ាងដាច់អហង្ការបុគ្គលអគិតនេះភ្លាមៗតែម្តង។

មិនខ្វល់ថា អនាគតនឹងទៅជាយ៉ាងណា? តែសម្រាប់ លោក ឈួង យីវឆូយ ចាត់ទុកថា ឱ្យតែការប្រកួតក្នុងស្រុកដំណើរការទៅដោយរលូន ហើយយើងអាចស្វែងបានម្ចាស់ជយលាភីដ៏ល្អស័ក្កសមសម្រាប់ឈរជាសម្លេងឱ្យស្ត្រីទាំងឡាយ ប៉ុណ្ណឹងជាភាពជោគជ័យដ៏ធំធេងពេកហើយ ដូច្នេះការបញ្ចូនបវរកញ្ញាទៅប្រកួតលើឆាកអន្តរជាតិ ឬអត់ អាស្រ័យលើស្ថានភាព និងភាពជាក់ស្តែង៕

អត្ថបទ៖ រ៉ាត់ ចាន់ធីតា រូបភាព៖ ឃាង ទូច និងហ្វេសប៊ុក