លោក Luciano Spalletti គ្រូបង្វឹករបស់ Napoli បានស្នើសុំសម្រាកពីការប្រកួត ហើយនឹងមិនដឹកនាំក្រុមម្ចាស់ជើងឯក Serie A Napoliទៀតទេ នៅរដូវកាលក្រោយ។ Spalletti ទើបតែដឹកនាំ Napoli លើកពាន Serie A ជាលើកដំបូងចាប់តាំងពីឆ្នាំ 1990 នោះលោកបានស្នើរសុំម្ចាស់ក្លឹប Napoli លោក Aurelio De Laurentiis បាននិយាយកាលពីយប់ថ្ងៃអាទិត្យថា គ្រូបង្វឹកបានស្នើសុំថ្ងៃឈប់សម្រាក ហើយថាគ្រូបង្វឹករូបនេះបានប្រាប់ពីផែនការសម្រាករបស់លោក។ យ៉ាងណាមិញប្រព័ន្ធផ្សព្វផ្សាយអ៊ីតាលីបានប៉ាន់ស្មានថាអតីតគ្រូបង្វឹកក្រុមជម្រើសជាតិអេស្ប៉ាញលោក Luis Enrique គឺជាអ្នកជំនួសតំណែងលោក Spalletti ។  Spalletti ដែលបានមកដឹកនាំ Napoli ក្នុងឆ្នាំ 2021 បានស្រក់ទឹកភ្នែកនៅពេលដែល Napoli លើកពានក្នុងខែនេះ ដោយឧទ្ទិសដល់ក្រុមគ្រួសារ និងបងប្រុសរបស់lលោកដែលបានទទួលមរណភាពកាលពីបួនឆ្នាំមុន។គាត់បានបង្វឹកក្លឹបអ៊ីតាលីមួយចំនួនរួមទាំង AS Roma និង Inter Milan ហើយបានចំណាយពេល 5 ឆ្នាំជាមួយក្លឹបរុស្ស៊ី Zenit St Petersburg ៕

ការចាប់ឆ្នោតចែកពូល ពានរង្វាន់ AFF U23 Championship 2023 ដែលបានធ្វើឡើងនៅប្រទេសថៃ កាលពីថ្ងៃទី ២៩ឧសភាម្សិលមិញនេះ ជាលទ្ធផល ក្រុមយុវជនអាយុក្រោម ២៣ឆ្នាំ កម្ពុជា ស្ថិតនៅក្នុងពូល A ដោយរួមពូលជាមួយក្រុមម្ចាស់ផ្ទះ ថៃ ព្រុយណេ និង មីយ៉ាន់ម៉ា ។  ដោយឡែកសំរាប់ពូលBវិញ មាន៣ក្រុមប៉ុណ្ណោះ រួមមាន ទីម័រខាងកើត ម៉ាឡេស៊ី និង ឥណ្តូនេស៊ី រីឯពូលC មាន៣ក្រុមដូចពូលBដែរ ដែលក្នុងនោះរួមមាន វៀតណមា ហ្វីលីពីន ឡាវ ។ចំពោះការប្រកួត AFF U23 Championship 2023 នឹងចាប់ផ្តើម ចាប់ពីថ្ងៃទី១៧ សីហា រហូតដល់ ថ្ងៃទី២៦ សីហា ឆ្នាំ២០២៣ នៅខេត្ត Chonburi ប្រទេសថៃ ។  គួររំលឹកផងដែរថា សំរាប់ការប្រកួតបាល់ទាត់ AFF U-23 Championship កាលពីឆ្នាំ២០២២កន្លងទៅ ក្រុមU23វៀតណាម បានក្លាយជាជើងឯក ក្រោយយកឈ្នះលើក្រុមU23ថៃ នៅវគ្គផ្ដាច់ព្រ័ត្រ លើទីលានពហុកីឡដ្ឋានជាតិមរតតេជោ នៅរាជធានីភ្នំពេញ ៕ អត្ថបទដោយ៖ រេត ស្តាលីន

ប្រភេទកីឡា (Teqball) ដែលមានឈ្នោះជាភាសាខ្មែរហៅថា បាល់ទាត់លើតុ ចាប់ផ្តើមសកម្មភាព បញ្ជ្រាបការផ្សព្វផ្សាយតាមសាលា ក្រោយពីជោគជ័យ ក្នុងព្រឹត្តិការណ៍កីឡាស៊ីហ្គេម ដែលកម្ពុជាធ្វើជាម្ចាស់ផ្ទះលើកដំបូង កាលពីពេលថ្មីៗកន្លងទៅ ដើម្បីបំផុសវិស័យកីឡាមួយនេះ អោយកាន់តែមានភាពទាក់ទាញ ពីមហាជន ជាពិសេសស្រទាប់យុវជន អោយចូលរួមចាប់យកកីឡាមួយប្រភេទប្រចាំជីវិត សម្រាប់ធ្វើការហ្វឹកហាត់ ក៏ដូចជាលេងកម្សាន្ត ។ ប្រាប់មកកាន់ក្រុមការងារ PNN Sports ក្នុងឱកាសដឹកនាំក្រុមកីឡាករ កីឡាការិនី ចុះបញ្ជ្រាបប្រភេទកីឡាបាល់ទាត់លើតុ នៅវិទ្យាស្ថានបច្ចេកវិទ្យាឌីជីថលកម្ពុជា សង្កាត់ព្រែកលាប ខណ្ឌជ្រោយចង្វារ រាជធានីភ្នំពេញ ម្ចាស់មេដាយមាស ដែលទើបដណ្តើមបានមេដាយមាសពីព្រឹត្តិការណ៍កីឡាស៊ីហ្គេមលើកទី៣២ រាម សុភិរម្យ បានអោយដឹងថា «ដោយទទួលបានការគាំទ្រពីសហព័ន្ធបាល់ទាត់លើតុ កម្ពុជា និងសហព័ន្ធបាល់ទាត់នៃប្រទេសហុងគ្រី បានរៀបចំកម្មវិធីមួយដែលមានឈ្មោះថា Open House Play with Champion ក្នុងគោលបំណង ដើម្បីបង្ហាញ នឹងទាកទាញចំណាប់អារម្មណ៍របស់ មហាជន អោយបានស្គាល់ ជាពិសេសចូលរួមលេងកីឡាប្រភេទថ្មីនេះអោយកាន់តែផុសផុល ។  គួបញ្ជាក់ថា កីឡាបាល់ទាត់លើតុ ជាប្រភេទកីឡាថ្មីដែលបានដាក់បញ្ចូលក្នុងព្រឹត្តិការណ៍ប្រកួតកីឡាស៊ីហ្គេមលើកទី៣២ ឆ្នាំ២០២៣ ក្រោមការដឹកនាំពីសំណាក់ឯកឧត្តមវ៉ាត់ ចំរើន ប្រធានសហព័ន្ធ ដណ្តើមបានមេដាយមាស១គ្រឿងជូនជាតិ ពីសំណាក់កីឡាករ រាម សុភិរម្យ ៕ អត្ថបទដោយ៖ សារ៉ាន ទីងី

ការប្រកួតបាល់ទាត់វិលជុំ កុមារ និង យុវជន AIA - ISF Youth League ប្រចាំរាជធានីភ្នំពេញ បានបិតបញ្ចប់ហើយកាលពីចុងសប្តាហ៍កន្លងទៅ ដោយមានការចូលរួមពី កីឡាករកីឡាការនីសរុបចំនួន ១៨០នាក់ ដែលមកពី១២ក្រុម ទៅតាមប្រភេទ អាយុផ្សេងៗដូចជា៖ កុមារាកុមារីអាយុក្រោម ១០ឆ្នាំ, កុមារាកុមារីអាយុក្រោម ១៤ឆ្នាំ, កុមារាអាយុ ក្រោម ១៦ឆ្នាំ និងកុមារីអាយុក្រោម ១៨ឆ្នាំជាដើមនឹងមកជួបជុំគ្នាប្រកួតប្រជែងដណ្តើមយកជ័យលាភី លេខមួយ និងលេខពីរ ។  ចំពោះក្រុមជ័យលាភីនៃការប្រកួតបាល់ទាត់ AIA ISF Youth League ប្រចាំរាជធានីភ្នំពេញ នឹង ត្រៀមជួបក្រុមជ័យលាភីប្រចាំខេត្តកំពង់ធំ នាដើមខែក្រោយ ដែលជាការប្រជែងដណ្តើមយកពានរង្វាន់មួយទៀត ដែលមានឈ្មោះថា AIA ISF Grand Championship ។ ដោយឡែក តំណាង អេ អាយ អេ ខេមបូឌា អោយដឹងដែរថា តាមរយៈការចូលរួមឧបត្ថម្ភ ដល់ការប្រកួតបាល់ទាត់ កុមារ និង យុវជន AIA-ISF Youth League ដែលជាលីគបាល់ទាត់ថ្នាក់មូលដ្ឋានធំជាងគេនៅកម្ពុជា គឺជាការជួយលើកស្ទួយកុមារ ដែលជួបបញ្ហាជីវភាពរាប់ពាន់នាក់នៅកម្ពុជា ។  តំណាងខាងលើបានបន្តថា ជាងនេះទៀត សោធ យើងក៏សហការជាមួយក្លឹប Tottenham Hotspur ក្នុងក្របខណ្ឌ English Premier League ដែលជាដៃគូសកល និង ជាក្លឹបបាល់ទាត់កំពូលនៅលើពិភពលោក ដើម្បីធានាថាកុមារទាំងនោះទទួលបាន ការអប់រំ ដែលពួកគេសមនឹងទទួលបាន ។សូមបញ្ជាក់ថា ក្រុមជ័យលាភីប្រចាំរាជធានីភ្នំពេញ និង ក្រុមជ័យលាភីខេត្តកំពង់ធំ នឹងចូលរួមប្រកួតក្នុងការប្រកួត បាល់ទាត់វិលជុំកុមារ និង យុវជន វគ្គផ្តាច់ព្រ័ត្រ AIA-ISF Grand Championship ប្រចាំឆ្នាំ២០២៣ នៅថ្ងៃទី ០៤ ខែ មិថុនា ខាងមុខនេះ នៅកីឡដ្ឋាន AIA KMH Park ៕អត្ថបទដោយ៖ សារ៉ាន ទីងី

សហព័ន្ធគុនខ្មែរ នាល្ងាចថ្ងៃទី២៩ ខែឧសភាបានរៀបចំពិធីជួបសំណេះសំណាលជាមួយគ្រូបង្វឹក គ្រូជំនួយ កីឡាករកីឡាការនីជ័យលាភី និងពិសារអាហារ សាមគ្គី អបអរសាទរលទ្ធផលជ័យជំនះក្នុងការប្រកួតស៊ីហ្គេមលើកទី៣២ ឆ្នាំ២០២៣ នៅសណ្ឋាគារភ្នំពេញ ជាន់ផ្ទាល់ដី ។  បើតាមរបាយការណ៍របស់មន្ត្រីសហព័ន្ធបានអោយដឹងថា ថ្នាក់ដឹកនាំ មន្ត្រីបច្ចេកទេស គ្រូបង្វឹក គ្រូជំនួយ កីឡាករ-កីឡាការិនី ដែលទៅចូលរួមប្រកួតចំនួន២២នាក់ និងមន្ត្រីបច្ចេកទេស សរុបចំនួន ៦៤នាក់ ដោយបានធ្វើការប្រកួតលើ ១១ប្រភេទទម្ងន់ ខណៈប្រទេសចូលរួមប្រកួត មានចំនួន ០៦ប្រទេស (ប្រទេសកម្ពុជា, វៀតណាម, ឡាវ, មីយ៉ាន់ម៉ា, ហ្វីលីពីន និងប្រទេសម៉ាឡេស៊ី) ។ ក្នុងរបាយការណ៍បញ្ជាក់ថា សម្រាប់កម្ពុជា ៖ ទទួលបានមេដាយសរុបចំនួន ១៩គ្រឿង ក្នុងនោះមាន មេដាយមាសចំនួន ១៤គ្រឿង, មេដាយប្រាក់ចំនួន ៣គ្រឿង និងមេដាយ សំរិទ្ធចំនួន ២គ្រឿង ។  សូមបញ្ជាក់ថា ក្នុងពិធីសំណេះសំណាលជាមួយគ្រូបង្វឹក គ្រូជំនួយ កីឡាករកីឡាការនីជ័យលាភី និងពិសារអាហារ សាមគ្គី អបអរសាទរលទ្ធផលជ័យជំនះក្នុងការប្រកួតស៊ីហ្គេមលើកទី៣២ ឆ្នាំ២០២៣ នោះ ឆេមពានគ្រុប ក៏បានបរិច្ចាកថវិការជូន សហព័ន្ធកីឡាប្រដាល់គុនខ្មែរ ចំនួន ១០០លានរៀលថែមទៀតផង ដើម្បីយកទៅប្រើប្រាស់សម្រាប់ធ្វើការអភិវឌ្ឍ សហព័ន្ធអោយកាន់តែល្អប្រសើរ ។ អត្ថបទដោយ៖ សារ៉ាន ទីងី

Erling Haaland ត្រូវបានប្រកាសជាកីឡាករបាល់ទាត់ឆ្នើមប្រចាំឆ្នាំរបស់សមាគមអ្នកសារព័ត៍មានបាល់ទាត់កាលពីថ្ងៃព្រហស្បតិ៍ ២៥ ឧសភា នៅក្នុងពិធីមួយនៅទីក្រុងឡុងដ៍។ខ្សែប្រយុទ្ធរបស់ Man City ទទួលបាន ៨២ ភាគរយនៃការបោះឆ្នោត ហើយត្រូវបានបង្ហាញដោយពានរង្វាន់ ដែលជាលើកដំបូងដោយអ្នកឈ្នះ Ballon d'Or លោក Sir Stanley Matthews ក្នុងឆ្នាំ ១៩៤៨ និងដោយប្រធាន FWA លោក John Cross ។  កីឡាករសញ្ជាតិន័រវេសរូបនេះបានស៊ុតបញ្ចូលទីបាន ៣៦ គ្រាប់ក្នុងការបង្ហាញខ្លួនក្នុងក្របខ័ណ្ឌ Premier League ក្នុងការបង្ហាញខ្លួនចំនួន ៣៥ ដងក្នុងរដូវកាលដំបូងរបស់គាត់សម្រាប់ក្រុម មេឃខៀវ ដោយបានជំរុញឱ្យ Man City ឈ្នះពានរង្វាន់លីកជាលើកទី៣ ជាប់ៗគ្នា និងបំបែកកំណត់ត្រាស៊ុតបញ្ចូលទីក្នុងរដូវកាលតែមួយចំនួន ៣៤ ដងដែលមាន Andy Cole និង Alan Shearer ក្នុងយុគសម័យមួយដែល Premier League។ គ្រាប់បាល់សរុបរបស់កីឡាករវ័យ ២២ ឆ្នាំរូបនេះកើនឡើងដល់ ៥២ ក្នុងរដូវកាលនេះនៅគ្រប់ការប្រកួតទាំងអស់ ១៣ គ្រាប់នៃកំណត់ត្រារបស់ Dixie Dean ដែលជាវិរបុរសរបស់ Everton បានកំណត់ក្នុងឆ្នាំ ១៩២៧/១៩២៨។

អ្នកចាត់ការក្រុម Sevilla លោក Jose Luis Mendilibar បានសរសើរគ្រូ Roma លោក Jose Mourinho នៅឯថ្ងៃសារព័ត៌មានរបស់ Sevilla មុនការប្រកួតវគ្គផ្តាច់ព្រ័ត្រ Europa League ។  ខណៈដែលក្រុមទាំងពីរត្រៀមជួបប្រកួតគ្នានៅថ្ងៃពុធក្រោយនេះ Mendibilibar បាននិយាយអំពី Mourinho ថា "គាត់គឺជាគ្រូដ៏អស្ចារ្យបំផុត។ គ្រាន់តែក្រឡេកមើលក្រុមដែលគាត់បានបង្វឹក និងអ្វីដែលគាត់បានឈ្នះ វាធ្វើឱ្យអ្នកមានការភ័យបន្តិច។ ជាក់ស្តែង យើងចង់ផ្តួលគាត់។ ប៉ុន្តែខ្ញុំមានតែរឿងវិជ្ជមានដែលត្រូវនិយាយអំពីគាត់»។  ការប្រកួតវគ្គផ្តាច់ព្រ័ត្រ ប្រាកដជាមានការប៉ះទង្គិចគ្នារវាងក្រុមជើងខ្លាំងនៅអឺរ៉ុប ដែលជាអ្នកឈ្នះកំណត់ត្រារបស់ Europa League ដែលនៅតែមិនស្គាល់ចាញ់ក្នុងការបង្ហាញខ្លួនចុងក្រោយចំនួន 6 ដងទល់អ្នកចាត់ការ Mounrinho ដែលមិនទាន់ចាញ់ការប្រកួតវគ្គផ្តាច់ព្រ័ត្រនៅទ្វីបអឺរ៉ុបចំនួន 5 ដង។

 ក្រោយសំរាកជាច្រើនសប្តាហ៍កន្លងមក ការប្រកួតបាល់ទាត់ Cambodian League Cup វគ្គពាក់កណ្តាលផ្តាច់ព្រ័ត្រ ជើងទី២ នឹងឈានមកដល់នៅចុងសប្តាហ៍នេះហើយ ។ ខណៈដែលការប្រកួតកាលពីជើងទី១កន្លងទៅ ក្រុមភ្ញៀវសុទ្ធសឹងតែធ្វើបានល្អជាងក្រុមម្ចាស់ផ្ទះ ។ ដោយសំរាប់ការប្រកួតនៅចុងសប្តាហ៍នេះវិញ យើងនឹងលើកឡើងពីព័ត៌មានលំអិតពីការប្រកួតរវាងក្រុម ភ្នំពេញក្រោន ជាមួយ នឹងគិរីវង់សុខសែនជ័យ ។  សំរាប់ក្រុមម្ចាស់ផ្ទះភ្នំពេញក្រោន ហាក់មានប្រៀបជាងក្រុមភ្ញៀវគិរីវង់សុខសែនជ័យ ដ្បិតកាលពីជើងទី១កន្លងទៅ ភ្នំពេញក្រោន បានយកឈ្នះគិរីវង់សុខសែនជ័យ៣ទល់នឹង០ ហើយសំរាប់ការប្រកួតនៅជើងទី២នេះវិញ ការប្រកួតនឹងត្រូវលេងនៅកីឡដ្ឋាន Smart RSN ដែលជាទឹកដីភ្នំពេញក្រោន ។ ភ្នំពេញក្រោនបាន ប្រមូលផ្តុំកីឡាករទាំងអស់មកហ្វឹកហាត់ជុំគ្នាវិញហើយ ក្រោយព្រឹត្តការណ៍ស៊ីហ្គេមបានបញ្ចប់ ដូច្នេះក្រុមដែលមានរហ័សនាមសឹង្ហក្រហមមួយនេះ នឹងកាន់តែមានជំរើសកីឡាករច្រើនផងដែរ ។  ដោយឡែកយើងងាកមកចាប់អារម្មណ៍កីឡាករសំខាន់ៗរបស់ភ្នំពេញក្រោនវិញ រួមមាន ខ្សែប្រយុទ្ធកូឡុំប៊ី Andres Nieto ដែលតែងតែបង្កើតឱកាស និង រកគ្រាប់បាល់ជូនក្រុម ខ្សែប្រយុទ្ធអ៊ុយក្រែន Valerii Hryshyn ជាកម្លាំងសំខាន់ក្នុងការគាំទ្រនៅតំបន់ប្រយុទ្ធ និង ខ្សែបម្រើជប៉ុន Yudai Ogawa ដែលជាអ្នកនាំលេងយ៉ាងសំខាន់នៅតំបន់កណ្តាល ។ យ៉ាងណាក្តី ភ្នំពេញក្រោនក៏មានកីឡាករសំខាន់ៗជាច្រើនទៀត ដូចជាលឹម ពិសុទ្ធ ប្រាក់ ធីវ៉ា អន ចាន់ប៉ូលីន និងកីឡាករល្អជាច្រើនទៀតនៅគ្រប់តំបន់ផងដែរ ។ ដោយឡែកសំរាប់គិរីវង់សុខសែនជ័យវិញ ក្រោយការដឹកនាំរបស់លោក សាប៊ូន វ៉ិនតា បានជួយអោយក្លិបដែលមានមូលដ្ឋាននៅខេត្តតាកែវមួយនេះ បានឡើងមកកាន់វគ្គពាក់កណ្តាលផ្តាច់ព្រ័ត្រ Cambodian League Cup ជាលើកដំបូង ។ គិរីវង់សុខសែនជ័យបានហ្វឹកហាត់ជុំគ្នាពេញជើងល្អ ដ្បិតពួកគេពុំមានកីឡាករជាប់ភារកិច្ចជាមួយក្រុមជម្រើសជាតិកាលពីស៊ីហ្គេមនោះទេ ។ យ៉ាងណាក្តីពួកគេត្រូវការឈ្នះភ្នំពេញក្រោនចាប់ពី៣គ្រាប់ឡើងទៅជាចាំបាច់ ដើម្បីមានឱកាសឡើងទៅកាន់វគ្គបន្ត ។ យើងងាកមកចាប់អារម្មណ៍កីឡាករសំខាន់ៗរបស់គិរីវង់សុខសែនជ័យ រួមមាន ខ្សែប្រយុទ្ធ ម៉ុន វ៉ាន់ដា ដែលតែងតែបង្កើតឱកាសពីតំបន់ស្លាប ខ្សែប្រយុទ្ធ ណុប តុលា ជាកីឡាករដែលសំបូរបទពិសោធនៅលើទីលាន រួមជាមួយ ខ្សែបម្រើ Yannick Francois ជាកីឡាករសំខាន់នៅតំបន់កណ្តាល ។  យើងងាកមកចាប់អារម្មណ៍ ពីលទ្ធផលនៃការជួបគ្នា៣លើកចុងក្រោយ រវាងក្រុមទាំងពីរវិញកាលពីថ្ងៃទី ០២ មេសា ២០២២ ភ្នំពេញក្រោន ៦-១ គិរីវង់សុខសែនជ័យកាលពីថ្ងៃទី ២៣ កក្កដា ២០២២ គិរីវង់សុខសែនជ័យ ១-៣ ភ្នំពេញក្រោនកាលពីថ្ងៃទី ២៣ មេសា ២០២៣ គិរីវង់សុខសែនជ័យ ០-៣ ភ្នំពេញក្រោន  សូមបញ្ជាក់ថា ជំនួបជើងទី២ វគ្គពាក់កណ្តាលផ្តាច់ព្រ័ត្រ ពានរង្វាន់ Cambodian League Cup 2023 រវាងក្រុម ភ្នំពេញក្រោន ជាមួយ គិរីវង់សុខសែនជ័យ នឹងធ្វើឡើងនៅថ្ងៃទី ២៨ឧសភា នាកីឡដ្ឋាន Smart RSN ចាប់ពីម៉ោង ៦និង៣០នាទីល្ងាចតទៅ ៕  អត្ថបទ រ៉េត ស្តាលីន  

 ភ្នំពេញ៖ ឯកឧត្តម សុខ សប្បាយណា អនុរដ្ឋលេខាធិការក្រសួងអប់រំ យុវជន និងកីឡា បានអញ្ជើញជាអធិបតីភាពក្នុងពិធីបើកវគ្គបំប៉នស្ដីពី ការរៀបចំការប្រកួត ដោយមានការចូលរួមពី លោកអគ្គនាយករង ប្រធាននាយកដ្ឋាន អនុប្រធាននាយកដ្ឋាន ក្រោមចំណុះអគ្គនាយកដ្ឋានកីឡា ព្រមទាំងអស់លោកលោកស្រីដែលជាសិក្ខាកាម។ លោក ហួត សេងទ្រី ប្រធាននាយកដ្ឋានរៀបចំ និងគ្រប់គ្រងព្រឹត្តិការណ៍កីឡា បានមានប្រសាសន៍ថា វគ្គបំប៉ននេះមានសារៈសំខាន់ណាស់សម្រាប់សិក្ខាកាមដើម្បីពង្រឹងសមត្ថភាព និងបង្កើនធនធានមន្ត្រីកីឡានៅតាមមន្ទីរអប់រំ យុវជន និងកីឡា រាជធានី ខេត្ត ឲ្យការរៀបចំមានស្តង់ដាតែមួយស្របទៅតាមលក្ខណៈជាតិ និងអន្តរជាតិ។ សម្រាប់វគ្គបំប៉ននេះរៀបចំឡើងរយៈពេលបីថ្ងៃដោយមានសិក្ខាកាម ចូលរួមចំនួន ៥០នាក់ មកពីបណ្តាល មន្ទីរអប់រំ យុវជន  និងកីឡា រាជធានី ខេត្ត។ ឯកឧត្តម សុខ សប្បាយណា មានប្រសាសន៍កោតសរសើរ និងវាយតម្លៃខ្ពស់ចំពោះអង្គភាពជំនាញ របស់ក្រសួងអប់រំ យុវជន និងកីឡា ដែលបានខិតខំប្រឹងប្រែងបំពេញភារកិច្ចយ៉ាងសកម្មក្នុងការរៀបចំវគ្គបំប៉នដែលមានសារៈសំខាន់នេះ ព្រមទាំងអញ្ជើញស្ថាប័នពាក់ព័ន្ធដើម្បីពង្រឹងសមត្ថភាព និងបង្កើនធនធានមន្ត្រីកីឡានៅតាមមន្ទីរអប់រំ យុវជន និងកីឡា រាជធានី ខេត្ តឲ្យការរៀបចំមានស្តង់ដារស្របតាមការរៀបចំក្នុងតំបន់។ឯកឧត្តម បន្តទៀតថាក្រោមការដឹកនាំរបស់ ឯកឧត្តមបណ្ឌិត សភាចារ្យ ហង់ជួន ណារ៉ុន បានរៀបចំគោលនយោបាយកីឡាជាតិស្ដីពីការអភិវឌ្ឍន៍វិស័យអប់រំកាយ និងកីឡា និងបានធ្វើកំណែទម្រង់ស៊ីជម្រៅការងារអប់រំកាយ និងកីឡា ៤ចំណុច១. ការជួសជុលកែលម្អ និងកសាងហេដ្ឋារចនាសម្ព័ន្ធកីឡា២. ការបណ្ដុះបណ្ដាលធនធានមនុស្ស៣. ការកែលម្អរចនាសម្ព័ន្ធការប្រកួត៤. ការពង្រឹងសហព័ន្ធកីឡាជាតិជាចុងបញ្ចប់ ឯកឧត្តម សូមផ្តាំផ្ញើរដល់សិក្ខាកាមទាំងអស់ត្រូវយកចិត្តទុកដាក់ខិតខំប្រឹងប្រែងក្រេបយកចំណេះដឹងថ្មីៗដែលគ្រូបានផ្ដល់ឲ្យដើម្បីយកទៅអនុវត្តក្នុងការរៀបចំដឹកនាំ និងគ្រប់គ្រងការប្រកួតក្នុងកម្រិតជាតិអន្តរជាតិឲ្យមានប្រសិទ្ធភាព។    

 (ភ្នំពេញ)៖ ទោះបីព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា បានបញ្ចប់ទៅហើយក្ដី ប៉ុន្ដែទស្សនីយភាពដ៏អស្ចារ្យ នៃពិធីបើក-បិទ និងដំណើរការប្រកួតប្រកបដោយជោគជ័យដ៏ត្រចះត្រចង់ នៅតែដក់ជាប់ក្នុងចិត្តរបស់ប្រជាពលរដ្ឋកម្ពុជា ក៏ដូចជាក្នុងតំបន់ និងពិភពលោក ។ក្រៅពីជោគជ័យដ៏សម្បើម និងស្ទើរមិននឹកស្មាននេះ ក្នុងនាមម្ចាស់ផ្ទះ កម្ពុជាបានធ្វើរឿងរ៉ាវជាច្រើន ដើម្បីផ្ដល់ភាពកក់ក្ដៅដល់ប្រតិភូ អត្តពលិក និងមន្ដ្រីបច្ចេកទេសអន្ដរជាតិ កំឡុងពេលមកចូលរួម និងរួមចំណែករៀបចំការប្រកួតកីឡាស៊ីហ្គេម លើកទី៣២ ។ អ្វីដែលពិសេស គឺការមិនយកកម្រៃគ្រប់បែបយ៉ាង ដោយរាជរដ្ឋាភិបាលកម្ពុជា បានសម្រេចមិនឲ្យមានការលំបុត្រចូលទស្សនា មិនលក់សិទ្ធផ្សាយបន្ដផ្ទាល់ និងការមិនតម្រូវឲ្យប្រតិភូ និងអត្តពលិកគ្រប់បណ្ដាប្រទេសបង់ថ្លៃស្នាក់នៅ-ហូបចុកជាដើម ។ការណ៍នេះ បានធ្វើឲ្យពិភពលោក មានការភ្ញាក់ផ្អើលជាខ្លាំង ចំពោះប្រទេសកម្ពុជា ដែលជាប្រទេសតូច តែមានបេះដូងធំ ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ដែលបានដាក់ចេញនូវយុទ្ធសាស្ដ្រ និងគោលការណ៍រួមខាងលើ ក្នុងព្រឹត្តិការណ៍ដែលរៀបចំឡើងក្រោមពាក្យស្លោក «កីឡារស់ក្នុងសន្ដិភាព» ។ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) បានបញ្ជាក់ថា ការមិនយកកម្រៃក្នុងស៊ីហ្គេមនៅកម្ពុជា បានក្លាយជាកំណត់ត្រាប្រវត្តិសាស្ដ្រ ដែលនឹងត្រូវកត់ត្រាចូលក្នុងប្រវត្តិអូឡាំពិកអន្ដរជាតិ ។ លោកថា ការរៀបចំព្រឹត្តិការណ៍កីឡាធំៗ ដែលមិនយកកម្រៃបែបនេះ គឺមានតែក្នុងព្រឹត្តិការណ៍កីឡាអូឡាំពិកបុរាណ នៅចក្រភពក្រិច កាលពីជាង ២ពាន់ឆ្នាំមុនគ្រឹស្ដសករាជ(គ.ស)ប៉ុណ្ណោះ ខណៈក្នុងសម័យអូឡាំពិកទំនើប ក្រោយឆ្នាំ១៨៩៤ មិនធ្លាប់មាននោះទេ ។ លោកបន្ដថា «យើងធ្វើបានល្អហើយ បដិសណ្ឋារកិច្ចក៏ល្អ ការរៀបចំរបស់យើង ក៏ល្អ តែអ្វីដែលកាន់តែស៊ីជម្រៅនោះ គឺគេមិននឹកស្មាន កម្ពុជាយើង ធ្វើឲ្យប្រទេសម្ចាស់ផ្ទះផ្សេងៗ មានការលំបាកក្នុងការសម្រេចចិត្ត ព្រោះគាត់ថា យើង Free ដល់ពេលអ៊ីចឹង ពេលគាត់ទៅវិញ គាត់មិនដឹងថា ត្រូវសម្រេចចិត្តដូចម្ដេច ។ ជាក់ស្ដែងប្រតិភូថៃ គាត់ថា គាត់ធ្វើម៉េចឲ្យដូចទៅណ៎? ធ្វើម៉េចឲ្យឃើញថា លំនាំបានល្អ ទទួលបានការកោតសរសើរ ហើយធ្វើឲ្យមានសាមគ្គីភាពកាន់តែល្អូកល្អិន កាន់ស្រលាញ់យើង ស្រលាញ់ហើយស្រលាញ់ទៀត ។ ចឹងគាត់ថា គាត់មានការលំបាក គាត់និយាយដោយស្មោះថា ម្ចាស់ផ្ទះបន្ទាប់ហ្នឹង គឺមានការលំបាក» ។ រដ្ឋលេខាធិការក្រសួងទេសចរណ៍ដដែលបន្ថែមថា «ពួកគាត់ដែលបានគាំទ្រ កោតសរសើរ និងបានចូលរួមជាមួយយើងនេះ គាត់ថា ធ្វើឲ្យចលនាអន្ដរជាតិទាំងមូល មានការគិតគូរឡើងវិញ ។ គាត់ថា ពិបាកណាស់ អ៊ីចឹងហើយ ពួកគាត់ត្រូវមានការគិតគូរឡើងវិញ រឿងមិនយកកំរ៉ៃអ្វីៗទាំងអស់ហ្នឹង ។ កន្លែងហ្នឹងហើយ ដែលយើងឃើញថា កត់ត្រាចូលក្នុងកំណត់ត្រាប្រវត្តិសាស្ដ្ររបស់ចលនាអូឡាំពិកអន្ដរជាតិ ។ យើងនឹងធ្វើរបាយការណ៍មួយដ៏ជាក់លាក់ទៅអូឡាំពិកអន្ដរជាតិ ទៅអូឡាំពិកអាស៊ី ដើម្បីតម្កល់ទុកនូវព្រឹត្តិការណ៍ប្រវត្តិសាស្ដ្ររបស់យើង ដែលខុសប្លែកពីប្រទេសផ្សេងៗ» ។  មន្ដ្រីជំនាញខាងលើ បានពន្យល់ថា បើនិយាយពីប្រវត្តិ ក្រឡេកទៅមើលកីឡាអូឡាំពិកបុរស នៅក្រិច កាលពីជាង ២ពាន់ឆ្នាំមុនគ្រឹស្ដសករាជ ធ្វើដូចស៊ីហ្គេម នៅកម្ពុជា ដែលអនុញ្ញាតឲ្យប្រទេសចំណុះទាំងអស់ចូលរួម ដោយទទួលបាយ-ទឹក និងការរៀបចំផ្សេងៗ ដោយឥតគិតថ្លៃ ទើបតែក្រោយកីឡាអូឡាំពិកទំនើប ឆ្នាំ១៨៩៤ ទេ ដែលនាំគ្នាយកកម្រៃផ្សេងៗ ។ «នេះហើយ ដែលគេនឹងចុះកំណត់ត្រាក្នុងប្រវត្តិសាស្ដ្រអូឡាំពិកអន្ដរជាតិ ។ គេនឹងទាញចូលក្នុងកំណត់ត្រាធំៗ ដូចជា WikiLeaks ជាដើម ដែលគេកំពុងតែធ្វើ...» ។ លោក វ៉ាត់ ចំរើន បន្ថែម ៕  អត្ថបទដោយ៖ សារ៉ាន់ ទីងី  

 សមាគមបាល់ទាត់អ៊ីតាលី (FIGC) បាននិយាយថា Juventus ត្រូវបានកាត់ 10 ពិន្ទុសម្រាប់រដូវកាល Serie A បច្ចុប្បន្ន បន្ទាប់ពីសេចក្តីសម្រេចថ្មីដោយតុលាការបាល់ទាត់អ៊ីតាលីក្នុងសំណុំរឿងដែលផ្តោតលើការផ្ទេររបស់ក្លឹប ។ការកាត់ពិន្ទុចេញជាបណ្ដោះអាសន្នបានរុញច្រាន Juve ដែលជាក្រុមបាល់ទាត់ដែលជោគជ័យបំផុតរបស់អ៊ីតាលីធ្លាក់ចុះពីចំណាត់ថ្នាក់ទី 2 មកលេខ 7 ក្នុងតារាងចំណាត់ថ្នាក់កំពូលដោយមាន 59 ពិន្ទុ នឹងមិនមានកៅអីពានអឺរ៉ុបទេ។  នៅលើ Twitter ក្រុម Juventus បាននិយាយថាពួកគេ នឹងកត់ចំណាំចំនុចទាំងនេះ" នៃការសម្រេចចិត្តរបស់តុលាការបាល់ទាត់ "និងរក្សាសិទ្ធិ" ដើម្បីដាក់បណ្តឹងឧទ្ធរណ៍ថ្មីប្រឆាំងនឹងរឿងនេះ នៅឯស្ថាប័នកីឡាកំពូលរបស់ប្រទេសអ៊ីតាលី។  Juve ត្រូវបានពិន័យ 15 ពិន្ទុម្ដងហើយក្នុងខែមករា ដែលក្រោយមកត្រូវបានលុបចោលដោយស្ថាប័នកីឡាកំពូលរបស់ប្រទេសអ៊ីតាលី ដែលបានបញ្ជាឱ្យអាជ្ញាធរបាល់ទាត់ធ្វើសវនាការថ្មីមួយដែលជាលទ្ធផលនៅក្នុងការសម្រេចចិត្តកាលពីថ្ងៃចន្ទ។    

 អ្នករៀបចំព្រឹត្តកាណ៍កីឡាករអូឡាំពិកនាទីក្រុងប៉ារីសឆ្នាំ 2024 បាននិងកំពុងធ្វើការលើការដំឡើងអណ្តាតភ្លើងអូឡាំពិកនៅលើប៉ម Eiffel Tower ដើម្បីត្រៀមសម្រាប់ការប្រកួតដ័អស្ចារ្យនេះ។  តែយ៉ាងណាវាមិនច្បាស់ទេថាតើអណ្តាតភ្លើងនឹងស្ថិតនៅលើវិមាននិមិត្តនាទីក្រុងប៉ារីសនេះពេញមួយខែកក្កដាដល់ថ្ងៃទី 26 ខែសីហា។ តែក៏អាចប្រែប្រួលដែរដោយប្រភពបានបន្ថែមថា អណ្តាតភ្លើងនឹងមិនត្រូវបានដាក់នៅលើកំពូលនៃប៉ម Eiffel នោះទេ ដោយហេតុផលបច្ចេកទេស។«វាជាការងារដែលកំពុងដំណើរការក្នុងរយៈពេលពីរឆ្នាំចុងក្រោយនេះ។  ពួកគេបានបន្ថែមថា អណ្តាតភ្លើងមិនអាចស្ថិតនៅលើកំពូលប៉មនោះទេ ដោយសារតែអង់តែនបានដំឡើងរួចហើយនៅទីនោះ។ អ្នករៀបចំ កីឡាអូឡាំពិកParis 2024 មិនៅនអាចចេញបកស្រាយបានភ្លាមៗនោះទេ។   

 កីឡាករលោតទឹក 3 រូបដ៏ល្អបំផុតលើពិភពលោកបានយកជំនាញនិងសមត្ថភាពរបស់ខ្លួនទៅបង្ហាញនៅក្នុងការប្រកួតដែលធ្វើឡើងក្នុងព្រៃធម្មជាតិដ៏ឆ្ងាយពីទីប្រជុំជនចម្ងាយ 1500 ក្នុងប្រទេស ហ្គាតេម៉ាឡា ។  ម្ចាស់ជើងឯកលោតទឹកពីលើភ្នំ Cliff Diving ចំណាត់ថ្នាក់ពិភពលោកចំនួន 6 សម័យ Rhiannan Iffland រួមជាមួយកីឡាករ Jonathan Paredes ដែលឈ្នះជើងឯកពិភពលោកនៅឆ្នាំ 2017 និងម្ចាស់ជើងឯកពិភពលោកឆ្នាំ 2009 កីឡាករ Orlando Duque បានបញ្ចេញសមត្ថភាពក្នុងការលោតទឹករៀងៗខ្លួនសម្រាប់ការប្រកួតចំនួន 6 ថ្ងៃនៅ 3 ទំបន់ផ្សេងគ្នាទូទាំងបណ្តាប្រទេសនៅអាមេរិកកណ្តាល។ ការប្រកួតលោតទឹកវគ្គដំបូងនេះបានធ្វើឡើងនៅជ្រលងភ្នំ Rio Dulce ដែលជារមណីយដ្ឋានទឹកឆ្លាក់ចេញពីភ្នំថ្មកំបោរនៅភាគខាងកើតនៃប្រទេសហ្គាតេម៉ាឡា។ការប្រកួតលើកទីពីរនឹងត្រូវបានធ្វើឡើងនៅបឹង Atitlan ដែលមានកម្ពស់ 1560 ម៉ែត្រពីលើនីវ៉ូទឹកសមុទ្រ ហើយហ៊ុព័ទ្ធដោយភ្នំភ្លើងដ៏ធំចំនួនបី។ ខណៈដែលការប្រកួតលោតទឹកវគ្គចុងក្រោយដែលជាវគ្គលំបាកបំផុត ដោយអ្នកទាំងបីបានធ្វើដំណើរទៅកាន់ទឹកធ្លាក់ខ្ពស់បំផុតរបស់ប្រទេសនេះនៅ Los Amates ។រដូវកាលថ្មីនៃស៊េរីលោតទឹក Red Bull ចាប់ផ្តើមនៅបូស្តុននៅថ្ងៃទី 3 ខែមិថុនា នេះ។   

 ការប្រកួតបាល់ទាត់ ពានរង្វាន់សម្តេចអគ្គមហាសេនាបតីតេជោហ៊ុនសែនថ្នាក់ខេត្ត វគ្គសន្សំពិន្ទុនៅក្នុងពូល នឹងត្រឡប់មកបន្តសកម្មភាពប្រកួតវិញ នៅរសៀលថ្ងៃទី ២៣ ឧសភា ។សំរាប់ការប្រកួតនៅសប្តាហ៍នេះ មានចំនួន៤គូ ដោយក្នុងនោះនៅថ្ងៃអង្គារ៍ ទី២៣ ឧសភា គូទី១ កំពត អេហ្វស៊ី នឹងត្រូវជួប ភ្នំពេញហ្កាឡាក់ស៊ី នៅទីលានបាល់ទាត់វិទ្យាល័យព្រះរាជសម្ភារគូទី២ ខេត្តព្រះសីហនុ នឹងត្រូវជួប មន្ទីរ អយក ខេត្តកំពង់ស្ពឺ នៅទីលានបាល់ទាត់អនុវិទ្យាល័យសម្តេចឪ។នៅថ្ងៃពុធ ទី២៤ឧសភា ក៏មានការប្រកួត២គូ ទៀងផងដែរ  គូទី១ មន្ទីរ អយក ខេត្តកំពង់ចាម នឹងត្រូវជួប ខេត្តកណ្តាល នៅទីលានបាល់ទាត់វិទ្យាល័យព្រះសីហនុគូទី២ មន្ទីរ អយក ខេត្តត្បូងឃ្មុំ នឹងត្រូវជួប ខេត្តស្វាយរៀង នៅទីលានបាល់ទាត់វិទ្យាល័យហ៊ុនសែនមេមត់ គ្រប់ការប្រកួតទាំង៤គូខាងលើនេះ នឹងចាប់ផ្តើមការប្រកួតចាប់ពីម៉ោង ៣និង៣០នាទីរសៀលតទៅ ៕  

 ក្លិបបាល់ទាត់អង្គរថាយហ្គឺរ បានប្រកាសចែកផ្លូវគ្នាជាមួយកីឡាករវ័យក្មេងរបស់ខ្លួនចំនួន៣រូប កាលពីថ្ងៃទី ២២ ឧសភា កន្លងទៅ ក្រោយព្រឹត្តការណ៍ស៊ីហ្គេមបានបញ្ចប់ ។ សូមបញ្ជាក់ថាកីឡាករទាំង៣ ដែលក្លិបបានប្រកាសចែកផ្លូវគ្នានោះ រួមមាន៖-ខែ្សបម្រើ ម៉េង រចនា មានវ័យ១៩ឆ្នាំ-ខ្សែការពារ ថៃ ផារតនា មានវ័យ២០ឆ្នាំ-ខ្សែការពារ រឹម សុហេង មានវ័យ១៩ឆ្នាំ ។   យ៉ាងណាក្តី កាលពីពេលថ្មីៗកន្លងទៅ ក្លិបបាល់ទាត់ដែលមានមូលដ្ឋាននៅខេត្តសៀមរាបមួយនេះ ក៏បានប្រកាសពីការនាំយកកីឡាករឆ្នើមរបស់សូលទីឡូអង្គរ អ៊ីម វ៉ាឃីម ហើយក៏ទើបតែតែងតាំង គ្រូបង្វឹកចាំទីថ្មី ផងដែរ គឺ លោក Juliao Monteiro ជនជាតិទីម័រខាងកើត ដើម្បីត្រៀមខ្លួនសំរាប់រដូវកាលថ្មីនៃ Cambodian Premier League ។សូមបញ្ជាក់ថា អង្គរថាយហ្គឺរ បានធ្លាក់ចេញពីការប្រកួត Cambodian League Cup 2023 ត្រឹមវគ្គចែកពូល ដោយ៦ប្រកួត ស្មើ១ ចាញ់៥ មានត្រឹមតែ១ពិន្ទុប៉ុណ្ណោះ ៕   

 ខ្សែប្រយុទ្ធប្រេស៊ីល Vinicius Jr របស់ក្លឹប Real Madrid បានទាក់ទងទៅ LaLiga និងអេស្ប៉ាញ បន្ទាប់ពីបានទទួលការប្រមាថជាតិសាសន៍ដោយVinicius បានបង្ហោះនៅលើ Twitter ក្រោយចប់ការប្រកួតថា "វាមិនមែនជាលើកទីមួយ ឬលើកទីពីរ ឬទីបីនោះទេ។ ការរើសអើងជាតិសាសន៍គឺជារឿងធម្មតានៅក្នុង LaLiga ។LaLiga នឹងស្នើសុំរូបភាពដែលមានទាំងអស់ ដើម្បីស៊ើបអង្កេតពីអ្វីដែលបានកើតឡើងនៅក្នុងពន្លឺនៃឧប្បត្តិហេតុនេះ។  ប្រធាន LaLiga លោក Javier Tebas បានឆ្លើយតបទៅនឹងការលើកឡើងរបស់ Vinicius Jr ដោយសុំឱ្យគាត់ទទួលបានព័ត៌មានបន្ថែមទៀតអំពីអ្វីដែលអាចធ្វើបាននៅក្នុងករណីនៃការរើសអើងជាតិសាសន៍។  អ្នកចាត់ការក្រុម Real លោក Carlo Ancelotti បាននិយាយប្រឆាំងនឹងឧបទ្ទវហេតុនេះ នៅលើប្រព័ន្ធផ្សព្វផ្សាយសង្គមថា ការរើសអើងជាតិសាសន៍មិនគួរមាននៅ បាល់ទាត់ ឬក្នុងសង្គមទេ។ប្រធានសហព័ន្ធបាល់ទាត់ប្រេស៊ីល (CBF) លោក Ednaldo Rodrigues ក៏បានផ្ញើសារគាំទ្រដល់កីឡាករវ័យ 22 ឆ្នាំរូបនេះផងដែរ។  

 អគ្គលេខាធិការសហព័ន្ធកីឡាបាល់ទះកម្ពុជា លោក អាំង សិរីពិសិដ្ឋ បានលើកឡើងថាក្រោយបញ្ចប់ស៊ីហ្គេមទៅ សហព័ន្ធកីឡាបាល់ទះកម្ពុជា មានគម្រោងបង្កើតពានរង្វាន់ជាច្រើនទៀតហើយក៏មានគម្រោងបង្កើតលីគបាល់ទះដែលអនុញ្ញាត្តិអោយក្រុមនិមួយៗអាចដាក់បញ្ចូលកីឡាករបរទេសក្នុងក្រុមផងដែរ ។ លោកបន្តថាការដាក់បញ្ចូលកីឡាករបរទេសក្នុងក្រុមនឹងធ្វើអោយសមត្ថភាពក្រុម និង កីឡាកររបស់កម្ពុជាទាំងអស់នឹងកើនឡើងមួយកម្រិតថែមទៀត ។   ថ្លែងប្រាប់អ្នកសារព័ត៌មានកាលពីពេលថ្មីៗកន្លងទៅ លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានរៀបរាប់យ៉ាងដូច្នេះ ៖ “ជាចក្ខុវិស័យ ជាយុទ្ធសាស្ត្ររបស់ឯកឧត្តមនាយឧត្តមសេនីយ៍ នេត សាវឿង និង ឯកឧត្តម ស សុខា គឺលោកបានដាក់ចេញមកដល់ខ្ញុំហើយ គឺយើងមានពាន ពីរ បី ពានទៀត បន្ទាប់ពីស៊ីហ្គេមនេះ ។ ក្នុងន័យតែមួយទេ គឺយើងចង់ប្រមូតវិស័យបាល់ទះកម្ពុជាយើង អោយកាន់តែរីកចំរើនថែមទៀត ។  យើងក៏មានចេតនាក្នុងការបង្កើតលីគដែរ មូលហេតុអីដែលយើងមានវីដេអូChallenge ព្រោះយើងចង់ក្លាយលីគអាជីពរបស់យើងមានលក្ខណៈProfessional អីចឹងក្នុងការណីដែលយើងមានលីគលក្ខណៈProfessional យើងជឿជាក់ថាតាមបណ្តាក្លិបអាចប្រមូលធនធានកីឡាករសំរាប់ក្លិបរបស់គាត់ ។ ទី២ក្នុងការចែងដែលខ្ញុំបានគិត យើងនឹងចែងច្បាប់មួយ តាមបណ្តាក្លិបអាចអញ្ជើញកីឡាករបរទេសយ៉ាងតិច២ ដែលអាចចូលលេងនៅក្នុងទីលាន អីចឹងក្នុងករណីដែលក្លិបដែលមានលទ្ធភាពក្រុមកីឡាករបរទេសមកចូលរួមជាមួយក្លិបរបស់គាត់ យើងឃើញថាកម្រិតអត្តពលិករបស់គាត់នឹងមានការរីកចំរើនផងដែរ ហើយកាលណាក្លិបមានការរីកចំរើន ខ្ញុំជឿងជាក់ថាសហព័ន្ធកីឡាបាល់ទះកម្ពុជាងាយស្រួលក្នុងការរើសកីឡាករដែលមានគុណផលខ្ពស់តំណាងអោយជាតិសំរាប់លេងហ្គេមធំៗផងដែរ” ។    លោក អាំង សិរីពិសិដ្ឋ បន្ថែមថា ចំពោះការប្រកួតប្រជែងក្នុងស្រុកកាន់តែមានច្រើន ធ្វើអោយក្លិបបាល់ទះអាជីពនៅកម្ពុជាមានសមត្ថភាពកាន់តែកើនឡើង ដែលធ្វើអោយសំបូរធនធានកីឡាករបាល់ទះកាន់តែច្រើនផងដែរ ងាយស្រួលក្នុងការជ្រើសរើសកីឡាករចូលក្នុងក្រុមបាល់ទះជម្រើសជាតិ ។ លោករំពឹងថា នាឆ្នាំបន្តបន្ទាប់ក្រុមបាល់ទះជម្រើសជាតិកម្ពុជា កាន់តែមានសមត្ថភាពកើនឡើង ។  សូមបញ្ជាក់ថា កក្រុមបាល់ទះជម្រើសជាតិកម្ពុជា បានសាងស្នាដៃថ្មីជាប្រវត្តិសាស្ត្រជាច្រើននៅ២ឆ្នាំចុងក្រោយនេះ ដោយបានឈ្នះមេដាយសំរិទ្ធក្នុងព្រឹត្តការណ៍ស៊ីហ្គេមនៅវៀតណាម កាលពីឆ្នាំ២០២២ និង ឈ្នះមេដាយប្រាក់ក្នុងព្រឹត្តការណ៍កីឡាស៊ីហ្គេមឆ្នាំ២០២៣នៅកម្ពុជា ៕ អត្ថបទដោយ៖ រ៉េត ស្តាលីន  

 (ភ្នំពេញ)៖ នាល្ងាចថ្ងៃទី ២០ ខែឧសភា ឆ្នាំ ២០២៣ ក្រុមហ៊ុន ខ្មែរប៊ែវើរីជីស បានរៀបចំពិធីសំណេះសំណាលរវាងអ្នកគាំទ្រនឹងបានតម្លើងប្រាក់ឧបត្ថមរហូតដល់២ម៉ឺនដុល្លាសម្រាប់ក្រុមជម្រើសជាតិបាល់ទះបុរស កម្ពុជា ក្នុងសាល ដែលដណ្តើមបានមេដាយប្រាក់ ពីព្រឹត្តិការណ៍កីឡាស៊ីហ្គេម កាលពីពេលថ្មីៗនេះ ។ពិធីសំណេះសំណាលរវាងអ្នកគាំទ្រនិងក្រុមជម្រើសជាតិកីឡាករបាល់ទះដ៏រីករាយនេះបានរៀបចំឡើងនៅក្នុងផ្សារទំនើបយក្ស ជីបម៉ុង ២៧១ មេហ្គាម៉ល រួមជាមួយវត្តមានរបស់លោកឧកញ៉ា លាង ម៉េង ថ្នាក់ដឹកនាំកំពូលនៃក្រុមហ៊ុន ខ្មែរ ប៊ែវើរីជីស និងលោក អាំង សិរីពិសិដ្ឋ អគ្គលេខាធិការសហព័ន្ធបាល់ទះកម្ពុជា ។ ក្នុងឱកាសដ៏សប្បាយរីករាយនោះលោក អាំង សិរីពិសិដ្ឋ បានធ្វើការអរគុណដល់បងប្អូនកីឡាករនិងគ្រូបង្វឹកនៃសហព័ន្ធបាល់ទះទាំងអស់ ជាពិសេសអ្នកគាំទ្រកម្ពុជាយ៉ាងច្រើនដែលមិនបោះបង់ការគាំទ្របើទោះបីជាក្រុមកម្ពុជាដណ្តើមបានមេដាយប្រាក់ក៏ពិតមែន ។ អគ្គលេខាធិការខាងលើកឡើងថា ការគាំទ្ររបស់បងប្អូនប្រជាពលរដ្ឋនេះហើយគឺជាកម្លាំងចិត្តដែលជួយអោយក្រុមកីឡាកររបស់យើងកាន់តែមានទឹកចិត្តក្នុងការប្រកួត ។ ហើយខ្ញុំជឿជាក់ថាតាមរយៈសន្ទុះនៃការកើនឡើងសមត្ថភាព ពីមួយកម្រិតទៅមួយកម្រិត ក្រុមជម្រើសជាតិកម្ពុជា និងអាចប្រជែងបានមេដាយមាសសម្រាប់ការប្រកួតស៊ីហ្គេមលើកក្រោយមិនមែនមេដាយប្រាក់ទៀតនោះទេ ។ នេះជាការបញ្ជាក់បន្ថែមរបស់លោក អាំង សេរីពិសិដ្ឋ ។ ជាមួយគ្នានោះលោកឧកញ៉ា លាង ម៉េង ក៏បានមានប្រសាសន៍ដែលថា ដោយសារតែការស្រលាញ់ ចង់លើកស្ទួយវិស័យកីឡាបាល់ទះកម្ពុជាយើងអោយមានការរីកចម្រើនដូចបណ្តាលប្រទេសដែលមានភាពជឿនលឿន ។ លោកឧកញ៉ាបន្តថា ដោយមើលឃើញថាវិស័យបាល់ទះនៅតាមបណ្តាលប្រទេសជិតខាងមានការអភិវឌ្ឃខ្លាំងខណៈដែលកម្ពុជាក៏កំពុងស្ទុះទៅរកភាពខ្លាំងនាពេលអនាគត់ផងនោះ ។លោកឧកញ៉ា លាង ម៉េង លើកឡើងថាធម្មតាការប្រកួតប្រជែងប្រសិនបើយើងយកឈ្នះតែក្រុមដែលអន់ៗនោះសមត្ថភាពយើងក៏មិនមានការរីកចម្រើនអ្វីដែលតែបើយើងប្រកួតប្រជែងជាមួយអ្នកខ្លាំងនោះសមត្ថភាពយើងក៏រឹតតែខ្លាំង ។ ហើយខ្ញុំសង្ឃឹមថាលើកនេះយើងដណ្តើមបានមេដាយប្រាក់លើកក្រោយយើងនឹងអាចដណ្តើមបានមេដាយមាសខ្ញុំនឹងតម្តើងប្រាក់ឧបត្ថមរហូតដល់៥ម៉ឺនដុល្លា ។សូមបញ្ជាក់ថាបន្ទាប់ពីពិធីសំណេះសំណាលអ្នកគាំទ្រទាំងអស់ក៏បានធ្វើការថតរូបជាមួយក្រុមកីឡាករជម្រើសជាតិបាល់ទះដើម្បីទុកជាអនុស្សាវរីយ៍ថែមទៀតផង ។ អត្ថបទដោយ៖ សារ៉ាន ទីងី