អ្នកចិញ្ចឹមសត្វមាន់ និងអ្នកចិញ្ចឹមសត្វជ្រូក បានឲ្យដឹងថា កម្ពុជាមានសាច់គ្រាប់គ្រាន់ សម្រាប់បំពេញតម្រូវការពលដ្ឋ ដោយមិនចាំបាច់ពឹងផ្អែកការនាំចូលពីក្រៅប្រទេស ខណៈការចិញ្ចឹមសត្វនៅកម្ពុជា នាពេលបច្ចុប្បន្ននេះ កាន់តែមានភាពល្អប្រសើរឡើង ទាំងបច្ចេកទេសចិញ្ចឹម ការទទួលបានទិន្នផលប្រកបដោយគុណភាព និងសុវត្ថិភាព និងមានតម្លៃនៅលើទីផ្សារ ក៏មានភាពសមរម្យដោយមិនចាំបាច់ពឹងផ្អែកលើការនាំចូលនោះទេ។ វិស័យចិញ្ចឹមសត្វ បានជួយគាំទ្រដល់វិស័យនានានៅក្នុងវិស័យកសិកម្ម និងវិស័យផ្សេងទៀត ដូចជាការបង្កើតការងារជូនប្រជាពលរដ្ឋ ការបង្កើនចរន្តប្រមូលទិញវត្ថុធាតុដើមសម្រាប់ផលិតចំណីសត្វក្នុងស្រុក និងការបង្កើនសកម្មភាព អាជីវកម្មខ្នាតតូច និងខ្នាតមធ្យមក្នុងស្រុកឱ្យកាន់តែផុលផុសឡើងៗ ថែមទៀតផង។

ដូចនេះ វិស័យចិញ្ចឹមសត្វនៅកម្ពុជាត្រូវតែរឹងមាំ និងឈានទៅមុខដើម្បីជួយដល់កំណើនសេដ្ឋកិច្ចជាតិ។លោក ហួត រ៉ាដេត អគ្គនាយកក្រុមហ៊ុនសាច់ជ្រូកជាតិ បានលើកឡើងថា វិស័យកសិកម្ម ជាវិស័យមួយដែលពាក់ព័ន្ធទៅនិងបញ្ហាស្បៀង ក៏ជាវិស័យមួយដែលធំផងដែរ ហើយវិស័យនេះ ជាវិស័យមួយដែលអាចជួយដល់សេដ្ឋកិច្ចគ្រួសាររបស់លោក ឲ្យមានភាពល្អប្រសើរ បើទោះបីជាពេលខ្លះអាចជួបនឹងបញ្ហាប្រឈមទៅលើរឿងទីផ្សារ និងជ្រូកមានជំងឺផ្សេងៗក៏ដោយ ក៏វិស័យចិញ្ចឹមជ្រូកនៅតែមានផលជាវិជ្ជមាន ជាងអវិជ្ជមាន។

កាលពី ៥ឆ្នាំមុន កម្ពុជានៅពឹងផ្អែកលើការនាំចូលជ្រូករស់ពីប្រទេសជិតខាង ដើម្បីបំពេញតម្រូវការ ប៉ុន្តែមកដល់ពេលបច្ចុប្បន្ននេះ កម្ពុជាអាចផ្គត់ផ្គង់សាច់ជ្រូកបានដោយខ្លួនឯង ១០០% តែម្តង ដោយមិចចាំចាច់ពឹងផ្អែកលើការនាំចូលជ្រូករស់ពីក្រៅប្រទេស។ ក្នុងនោះ ស្ថានភាពចិញ្ចឹមសត្វជ្រូកសព្វថ្ងៃនេះ បើនិយាយពីតម្លៃ ក៏មានភាពល្អប្រសើរផងដែរ ដោយសារតែតម្រូវការជ្រូកក្នុងប្រទេស និងប្រទេសជិតខាងមានតម្លៃល្អដូចគ្នា ខណៈនៅក្នុងឆ្នាំ២០២៥នេះ ការចិញ្ចឹមជ្រូករបស់ លោក រ៉ាដេត ដែលមានកសិដ្ឋាននៅភូមិដំណាក់កី ឃុំជើងគ្រាវ ស្រុករលាប្អៀរ ខេត្តកំពង់ឆ្នាំង មានការកើនឡើងប្រមាណ ១០-១៥% មានភាពល្អប្រសើរជាងឆ្នាំ២០២៤ ដោយសារតែនៅឆ្នាំនេះ តម្លៃសាច់ជ្រូកកំពុងតែមានទីផ្សារល្អ។

លើសពីនេះ លោក រ៉ាដេត អគ្គនាយកក្រុមហ៊ុនសាច់ជ្រូកជាតិ បានបន្តថា លោកមានក្តីព្រួយបារម្មណ៍ខ្លះដែរ ដោយហេតុថា បច្ចុប្បន្នការផ្គត់ផ្គង់សាច់ជ្រូកអាចនឹងលើសតម្រូវការ ដោយក្រុមហ៊ុនធំៗក្នុងស្រុកមួយចំនួន មានចំនួនជ្រូកកាន់ច្រើន ដែលធ្វើឲ្យកសិដ្ឋានតូចៗមិនអាចពង្រីកបន្ថែមបានទៀតឡើយ ប្រសិនជាមានការពង្រីកបន្ថែម វិស័យនេះអាចនឹងជួបបញ្ហាទីផ្សារ ឬតម្លៃជ្រូកអាចនឹងមានការធ្លាក់ចុះ ដូចនេះ កម្ពុជាត្រូវការនាំចេញជ្រូករស់ទៅក្រៅប្រទេស។ 

បើយើងក្រឡេកទៅមើល លោក សុខ សីហា ជាម្ចាស់កសិដ្ឋានចិញ្ចឹមមាន់បីសាសន៍ និងមាន់សាច់ មានបទពិសោធន៍រយៈពេល ១២ឆ្នាំមកហើយ លោក មានរោងមាន់ដល់ទៅ ២កន្លែង រោងទី១ នៅឃុំដំណាក់រាំង ស្រុកសាមគ្គីមុនីជ័យ ខេត្តកំពង់ស្ពឺ និងរោងទី២ នៅឃុំរុងរឿង ស្រុកថ្ពង ខេត្តកំពង់ស្ពឺ បានឲ្យក្រុមការងារ សេដ្ឋកិច្ចភីអិនអិនដឹងថា ការចិញ្ចឹមសត្វនៅកម្ពុជា នាពេលបច្ចុប្បន្ននេះកាន់តែមានភាពល្អប្រសើរឡើង ទាំងបច្ចេកទេសចិញ្ចឹម ការទទួលបានទិន្នផលប្រកបដោយគុណភាព និងសុវត្ថិភាព និងមានតម្លៃល្អនៅលើទីផ្សារ។ 

ម្ចាស់កសិដ្ឋានរូបនេះ បានបន្តថា សព្វថ្ងៃនេះ កសិដ្ឋានរបស់លោកទាំងពីកន្លែង មានមាន់សរុប ៨ម៉ឺនក្បាល ក្នុងនោះ លោក មានទីផ្សារលក់មាន់ទាំងនោះនៅក្នុងមូលដ្ឋាន នៅតាមខេត្ត និងបស់តាមដេប៉ូនៅរាជធានីភ្នំពេញ។ បន្ថែមពីលើនេះ សន្ទុះនៃតម្រូវការមាន់សាច់មានការកើនឡើងនៅឆ្នាំនេះប្រមាណ ១០-១៥%។ ចាប់តាំងពីការបិទច្រកព្រំដែនកម្ពុជា-ថៃ ប្រជាពលរដ្ឋចាប់ផ្តើមងាកមកប្រើសប្រាស់ផលិតផលក្នុងស្រុក ហើយបានធ្វើឲ្យតម្លៃសាច់មាន់លក់នៅលើទីផ្សារ ក៏មានតម្លៃល្អទៅតាមហ្នឹងផងដែរ នេះក៏ជាឳកាសសម្រាប់បង្កើនការផលិតក្នុងស្រុក។ 

ចំណែក លោក ស្រ៊ុន ពៅ ប្រធានសមាគមចិញ្ចឹមសត្វកម្ពុជា បានបន្ថែមថា កម្ពុជាមិនត្រឹមមានសាច់ផ្គត់ផ្គង់ក្នុងស្រុកគ្រប់គ្រាន់ តែកំពុងសិក្សានាំចេញថែមទៀតផង។ ជាក់ស្តែង អំឡុងពេលមានបញ្ហាព្រំដែនកម្ពុជា-ថៃ រយៈពេលជាង ២ខែមកនេះ ឃើញថា កម្ពុជាពុំមានការខ្វះខាតសាច់ និងស៊ុត សម្រាប់ការផ្គត់ផ្គង់នៅលើទីផ្សារឡើយ រីឯតម្លៃ ក៏មិនឡើងថ្លៃនោះដែរ។ ផ្ទុយទៅវិញ ការបិទច្រកព្រំដែន គឺជាឳកាសមួយដែលហុចផលវិជ្ជមានជាច្រើនដល់អ្នកផលិតក្នុងស្រុក។ ប្រធានសមាគមចិញ្ចឹមសត្វកម្ពុជា បន្តថា ក្នុងមួយថ្ងៃ ពលរដ្ឋកម្ពុជាប្រើប្រាស់ជ្រូករស់អស់ប្រមាណ ១ម៉ឺនក្បាល មាន់ខ្ទង់ ២សែនក្បាល និងបន្ទាប់សន្សំដោយត្រី គោ ក្របី និងសាច់សត្វជាច្រើនប្រភេទទៀត។ 

ជាមួយគ្នានេះ វិស័យចិញ្ចឹមសត្វ នៅតែបន្តរក្សាបានវឌ្ឍនភាពពីមួយឆ្នាំទៅមួយឆ្នាំមិនឈប់ឈរ ពោលគឺយើងបានផ្តើមពីការចិញ្ចឹមដែលមានលក្ខណៈគ្រួសារ រហូតបានក្លាយជាការចិញ្ចឹមបែបពាណិជ្ជកម្មទំនើប ដូចបណ្តាប្រទេសនានា ហើយមានលទ្ធភាពផ្គត់ផ្គង់ទីផ្សារក្នុងស្រុកយ៉ាងពេញលេញទៀងទាត់ និងមានផលិតកម្មសត្វមួយចំនួន អាចនាំចេញទៅក្រៅទេសទៀតផង។ គួរជម្រាបថា វិស័យចិញ្ចឹមសត្វកម្ពុជា មានដំណើរការជាវិជ្ជមានពិសេសលើផ្នែកទីផ្សារ ដែលធ្វើឱ្យសហគ្រិនខ្មែរយើង ជាពិសេស សមាជិក សមាគមអ្នកចិញ្ចឹមសត្វកម្ពុជាដែលស្រលាញ់ពេញចិត្តវិស័យនេះមានទឹកចិត្តឡើងវិញ ហើយក៏បានជំរុញថ្នាក់ដឹកនាំសមាគមឱ្យបន្តតាមដាន និងស្វែងរកការគាំទ្រលើគោលនយោបាយ និងស្វះស្វែងចូលជួបប្រជុំពិភាក្សាការងារជាមួយក្រសួងស្ថាប័នមានសមត្ថកិច្ចពាក់ព័ន្ធ ដើម្បីជួយដល់វិស័យចិញ្ចឹមសត្វ និងធានាដល់សុខុមាលភាពសង្គមផងដែរ៕ 
 

អត្ថបទ៖ ថុន សុកេតុមាលា រូបភាព៖ អ៊ិន អាត+ឯកសារ