ថ្ងៃអង្គារ៍ ទី២៧ ខែតុលា ឆ្នាំ២០២០

ព័ត៌មានជាតិ

ក្រសួងអប់រំ អនុញ្ញាតឱ្យដំណើរការ រថយន្តដឹកសិស្ស បណ្ណាល័យ និងអាហារដ្ឋាន សម្រាប់សាលាឯកជន

ក្រសួងអប់រំ អនុញ្ញាតឱ្យដំណើរការ រថយន្តដឹកសិស្ស បណ្ណាល័យ និងអាហារដ្ឋាន សម្រាប់សាលាឯកជន

ឥឡូវនេះ ក្រសួងអប់រំ បានអនុញ្ញាតឲ្យដំណើរការឡើងវិញហើយ នូវសេវារថយន្តដឹកសិស្ស សេវាបណ្ណាល័យ សកម្មភាពអប់រំកាយ និងកីឡា និងសេវាអាហារដ្ឋាន នៅតាមគ្រឹះស្ថានសិក្សាឯកជន។ ប៉ុន្តែគ្រឹះស្ថានសិក្សាឯកជនទាំងនោះ ត្រូវតែអនុវត្តឱ្យបានខ្ជាប់ខ្ជួននូវគោលការណ៍ណែនាំផ្សេងៗ ដើម្បីការពារនូវការឆ្លងជំងឺកូវីដ១៩។ ចំណែកសាលារដ្ឋ ត្រូវរង់ចាំតទៅទៀតសិន។ លិខិតរបស់ក្រសួងអប់រំយុវជន និងកីឡា ចុះថ្ងៃទី២២ ខែតុលា ម្សិលម៉ិញនេះ បានថ្លែងថា ដើម្បីឆ្លើយតបតាមតម្រូវការចាំបាច់របស់គ្រឹះស្ថានសិក្សា សិស្សានុសិស្ស និងអ្នកអាណាព្យាបាល ក្នុងការប្រើប្រាស់សេវារថយន្តដឹកសិស្ស សេវាបណ្ណាល័យ សកម្មភាពអប់រំកាយ និង កីឡា និងសេវាអាហារដ្ឋាន ក្រសួងអប់រំ អនុញ្ញាតជាគោលការណ៍ឲ្យគ្រឹះស្ថានសិក្សាទាំងអស់ ដែលទទួលបានលិខិតអនុញ្ញាត ឲ្យបើកដំណើរការគ្រឹះស្ថានសិក្សាឡើងវិញ អាចដំណើរការនូវសេវាខាងលើនេះ ដោយត្រូវអនុវត្តតាមគោលការណ៍ប្រតិបត្តិស្តង់ដា SOP  ឲ្យបានម៉ឺងម៉ាត់ និង ខ្ជាប់ខ្ជួនបំផុត ប្រកបដោយស្មារតីទទួលខុសត្រូវ ។ ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និង កីឡា  បានប្រាប់ PNN នៅថ្ងៃទី ២៣ ខែ តុលា ឆ្នាំ ២០២០ នេះ ថា ក្រសួងអប់រំ នឹងបន្តតាមដានពិនិត្យមើលយ៉ាងយកចិត្តទុកដាក់ ចំពោះគ្រឹះស្ថានសិក្សាទាំងឡាយ ដែលត្រូវបានអនុញ្ញាត ករណីគ្រឹះស្ថានសិក្សាណាមួយ មិនបានអនុវត្តតាមគោលការណ៍ ប្រតិបត្តិស្តង់ដា SOP ឱ្យបានត្រឹមត្រូវ និង ដោយខ្ជាប់ខ្ជួនទេនោះ ក្រសួងនឹងអនុវត្តវិធានការនានា ដែលនៅជាធរមាន។ ជាមួយគ្នានឹងការអនុញ្ញាតខាងលើនេះ ក្រសួងអប់រំ ក៏បានដាក់ចេញនូវគោលការណ៍ប្រតិបត្តិស្តង់ដា SOP សម្រាប់សេវារថយន្តដឹកសិស្ស សេវាបណ្ណាល័យ សកម្មភាពអប់រំកាយ និង កីឡា សកម្មភាពសិល្បៈ និង សេវាអាហារដ្ឋាន នៅតាមគ្រឹះស្ថានសិក្សាក្នុងបរិបទជំងឺកូវីដ ១៩ ដែរ ដែលក្នុងនោះមានដូចជាសម្រាប់រថយន្តដឹកសិស្ស ត្រូវរម្ងាប់មេរោគក្នុងរថយន្ត នៅមុនពេល និង ក្រោយពេលដឹកសិស្ស , បើកបង្អួច ឬ វាំងននរថយន្តឱ្យខ្យល់ចេញចូលបានល្អ ករណីរថយន្តបើកម៉ាស៊ីនត្រជាក់ ត្រូវរក្សាសីតុណ្ហភាពមិនឱ្យទាបជាង ២៤ អង្សាសេជាដើម ។ ចំណែកសេវាអាហារដ្ឋាននៅតាមសាលារៀនឯកជនវិញ ត្រូវអនុវត្តឱ្យបានខ្ជាប់ខ្ជួននូវសេចក្តីណែនាំលេខ ១៨ ចុះថ្ងៃទី ២ ខែ ឧសភា ឆ្នាំ ២០១៩ ហើយឯកឧត្តម រស់ សុវាចា បានពន្យល់ឡើងវិញថា គោលការណ៍ប្រតិបត្តិស្តង់ដា SOP នេះ ដើម្បី ឱ្យគ្រឹះស្ថានសិក្សាអាចរៀបចំ និង ត្រៀមលក្ខណៈដំណើរការសេវានានា ក្នុងគ្រឹះស្ថានសិក្សាពេញលេញ ក៏ដូចជាការបន្តអភិវឌ្ឍគ្រឹះស្ថានសិក្សានីមួយៗ ឲ្យមាននិរន្តរភាព ធានាបាននូវសុវត្ថិភាព សុខភាពសម្រាប់បុគ្គលិកសិក្សា គ្រូបង្រៀន និង សិស្សានុសិស្សក្នុងបរិបទកូវីដ១៩ ហើយថាក្រសួងសង្ឃឹមយ៉ាងមុតមាំថា ប្រធានអង្គភាពថ្នាក់ជាតិ ថ្នាក់ដឹកនាំមន្ទីរអប់រំ យុវជន និងកីឡារាជធានីខេត្ត ការិយាល័យអប់រំ យុវជន និងកីឡា នៃរដ្ឋបាលក្រុង ស្រុក ខណ្ឌ និងគណៈគ្រប់គ្រងគ្រឹះស្ថានសិក្សាគ្រប់កម្រិត គ្រប់ប្រភេទ ទាំងសាធារណៈ និងឯកជន អាជ្ញាធរពាក់ព័ន្ធ មាតាបិតា អ្នកអាណាព្យាបាលសិស្ស និងសិស្សានុសិស្ស នឹងចូលរួមអនុវត្តគោលការណ៍ប្រតិបត្តិស្តង់ដានេះ ឲ្យ មានប្រសិទ្ធភាព ។ ដោយឡែកសម្រាប់គ្រឹះស្ថានសិក្សាសាធារណៈ ឬ សាលារដ្ឋ វិញ មិនឃើញត្រូវបានរាប់បញ្ចូលនៅក្នុងសេចក្តីជូនដំណឹង អនុញ្ញាតនេះទេ ហើយឯកឧត្តម រស់ សុវាចា បញ្ជាក់ថា ក្រសួងអប់រំ នឹងជូនដំណឹងនៅពេលក្រោយ ៕អត្ថបទ៖ ខឿន សាឃាង     រូបភាព៖ ឯកសារ

២៦ តុលា ២០២០
ជំនន់ទឹកភ្លៀង ប៉ះពាល់ដល់ប្រជាជន កើនឡើងជាង ៤៨ម៉ឺននាក់ និងអ្នកស្លាប់ កើនដល់ ៣៩នាក់

ជំនន់ទឹកភ្លៀង ប៉ះពាល់ដល់ប្រជាជន កើនឡើងជាង ៤៨ម៉ឺននាក់ និងអ្នកស្លាប់ កើនដល់ ៣៩នាក់

គណៈកម្មាធិការជាតិគ្រប់គ្រងគ្រោះមហន្តរាយ បានប្រកាសថា គិតត្រឹមថ្ងៃទី២២ ខែតុលា ឆ្នាំ២០២០ ជំនន់ទឹកភ្លៀង បានប៉ះពាល់ដល់ប្រជាជន កើនឡើងជាង ៤៨ម៉ឺននាក់ និងអ្នកស្លាប់ កើនដល់ ៣៩នាក់។របាយការណ៍ប្រចាំថ្ងៃរបស់គណៈកម្មាធិការជាតិគ្រប់គ្រងគ្រោះមហន្តរាយ បង្ហាញថា មកដល់ថ្ងៃទី២២ ខែតុលា ជំនន់ទឹកភ្លៀង បានបន្តកើតឡើង នៅ ១១០ ក្រុងស្រុកខណ្ឌ ក្នុង ១៩រាជធានីខេត្ត រួមមាន៖ ខេត្តពោធិ៍សាត់ ប៉ៃលិន បន្ទាយមានជ័យ ភ្នំពេញ បាត់ដំបង ស្វាយរៀង ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង និងខេត្តកំពង់ធំ។ របាយការណ៍បន្ថែមថា ជំនន់ទឹកភ្លៀង បានបង្កផលប៉ះពាល់ដល់ប្រជាជនប្រមាណ ១២០ ៧៨៥គ្រួសារ ស្មើប្រមាណ ៤៨៣ ១៤០ នាក់។ ក្នុងនោះ ប្រជាជនជម្លៀស មានប្រមាណ ១១ ៥៥៤ គ្រួសារ ស្មើប្រមាណ ៤៦ ២១៦ នាក់។ ប្រជាជនស្លាប់ ៣៩នាក់ ដោយកាលពីថ្ងៃទី២២ ខែតុលា ចំនួនអ្នកស្លាប់ បានកើតឡើង នៅខេត្តបន្ទាយមានជ័យ ចំនួន ៣នាក់។ រីឯផ្ទះលិចទឹក មាន ១១១ ៣៥៤ ខ្នង និងខូចខាត ៦៣ខ្នង។ សាលារៀនលិចទឹក ៧០៧ កន្លែង។ ស្រូវលិចទឹក ប្រមាណ ២៣២ ៥៥១ ហិកតា និងដំណាំរួមផ្សំ លិចទឹក ៨៣ ៩១៨ ហិកតា។ ជំនន់ទឹកភ្លៀង ក៏បានធ្វើឲ្យផ្លូវជាតិ ផ្លូវខេត្ត និងផ្លូវគ្រួសក្រហម ប៉ះពាល់ប្រមាណ ៤៦៥ គ.ម និងផ្លូវលំជនបទ លិចទឹកប្រមាណ ១ ៦៦៥ គ.ម៕អត្ថបទ និងរូបភាព៖ ក្រុមការងារព័ត៌មាន PNN 

២៦ តុលា ២០២០
កម្ពុជា នឹងវិនិយោគអភិវឌ្ឍវារីអគ្គិសនីស្ទឹងតាតៃលើ និងអភិវឌ្ឍខ្សែបណ្ដាញបញ្ជូនអគ្គិសនី៥០០ គីឡូវ៉ុល ទៅកាន់ព្រំដែនឡាវ និងថៃ

កម្ពុជា នឹងវិនិយោគអភិវឌ្ឍវារីអគ្គិសនីស្ទឹងតាតៃលើ និងអភិវឌ្ឍខ្សែបណ្ដាញបញ្ជូនអគ្គិសនី៥០០ គីឡូវ៉ុល ទៅកាន់ព្រំដែនឡាវ និងថៃ

កិច្ចប្រជុំពេញអង្គគណៈរដ្ឋមន្ត្រី ដែលដឹកនាំដោយសម្តេចតេជោ ហ៊ុន សែន នាយករដ្ឋមន្ត្រី នៅថ្ងៃទី២៣ ខែតុលានេះ បានសម្រេចជាផ្លូវការហើយ លើគម្រោងវិនិយោគអភិវឌ្ឍវារីអគ្គិសនីស្ទឹងតាតៃលើ និងអភិវឌ្ឍខ្សែបណ្ដាញបញ្ជូនអគ្គិសនី ៥០០គីឡូវ៉ុល ទៅកាន់ព្រំដែនឡាវ និងថៃ នៅពេលខាងមុខ។  បន្ថែមលើសពីនេះ កិច្ចប្រជុំពេញអង្គគណៈរដ្ឋមន្ត្រី នៅថ្ងៃនេះ ក៏បានអនុម័តនូវសេចក្តីព្រៀងច្បាប់សំខាន់ ចំនួន ២ផ្សេងទៀត គឺសេចក្តីព្រាងច្បាប់ស្ដីពីការទូទាត់ថវិកាទូទៅរបស់រដ្ឋ សម្រាប់ការគ្រប់គ្រង ឆ្នាំ២០១៩ និងសេចក្ដីព្រាងច្បាប់ ស្ដីពី ហិរញ្ញវត្ថុសម្រាប់ការគ្រប់គ្រង ឆ្នាំ២០២១។អត្ថបទ៖ ហ៊ុន ឌីណូ     រូបភាព៖ ក្រុមការងារសម្តេច 

២៦ តុលា ២០២០
រដ្ឋបាលជលផលទទួលស្គាល់ថា ត្រីធម្មជាតិពេលនេះ សម្បូរត្រីតូចៗ តែខ្សត់ត្រីធំ

រដ្ឋបាលជលផលទទួលស្គាល់ថា ត្រីធម្មជាតិពេលនេះ សម្បូរត្រីតូចៗ តែខ្សត់ត្រីធំ

រដ្ឋបាលជលផល បានថ្លែង ទទួលស្គាល់ថា ត្រីធម្មជាតិ នៅតាមដងទន្លេ បឹងស្ទឹង ព្រែក ក្នុងប្រទេសកម្ពុជា បច្ចុប្បន្ននេះ សម្បូរតែត្រីតូចៗប៉ុណ្ណោះ ខណៈត្រីធំ កាន់តែខ្សត់ទៅៗ។ ឯកឧត្តម អេង ជាសាន ប្រតិភូរាជរដ្ឋាភិបាល ទទួលបន្ទុករដ្ឋបាលជលផល បានអះអាងថា ជាវិធានការសំខាន់ គឺជំរុញការចិញ្ចឹមត្រី ឲ្យបានកាន់តែខ្លាំងក្លា។ ថ្លែងក្នុងពិធីប្រលែកូនត្រីនៅទន្លេចតុមុខដើម្បីអបអរសាទរទិវានៃការធ្វើចរាចរណ៍ផ្លាស់ទីរបស់ត្រីពិភពលោកនៅព្រឹកថ្ងៃទី២៣ ខែតុលានេះ ឯកឧត្តម អេង ជា សាន ប្រតិភូរាជរដ្ឋាភិបាលទទួលបន្ទកប្រធានរដ្ឋបាលជលផល បានទទួលស្គាល់ថាកម្ពុជាពេលនេះ សម្បូតែត្រីល្អិតៗប៉ុណ្ណោះ ប៉ុន្តែប្រភេទពូជត្រីធំៗកាន់តែមានការថមយ ដោយតែវាគឺជាគោលដៃរបស់ក្រុមអ្នកនេសាទ។ សូមបញ្ជាក់ថានៅព្រឹកមិញនេះ ក្នុងចំណោមពូជត្រីជាង៥ម៉ឺនក្បាលដែលត្រូវបានរដ្ឋបាលជលផលសហការជាមួយក្រុមការងារអច្ចរិយៈភាពនៃទន្លេមេគង្គគាំទ្រដោយទីភ្នាក់ងារ USAID របស់អាមេរិក។ តាមរយៈព្រឹត្តិការណ៍នេះមានត្រីជាង៥ម៉ឺនក្បាល ក្នុងនោះក៏មានមេពូជត្រីធំៗ ដូចជាត្រីគង់រាំង ត្រីប្រាធំ និងត្រីព្រួលជាដើម។ បើតាមមន្រ្តីនៃក្រុមការងារអច្ឆៈរយភាពនៃទន្លេមេគង្គ ត្រីពូជធំទាំងអស់សុទ្ធតែត្រូវបានកឹបស្លាកសំគាល់ ដើម្បីដឹងថានៅពេលវាត្រូវបានគេចាប់បាននោះ តើចេញពីទីតាំងប្រលែងទៅវានឹងផ្លាស់ទីដល់ទីណា មានទំហំប៉ុណ្ណា និងមានស្ថានភាពប្រែប្រួលអ្វីខ្លះជាដើម ដោយតាមទំលាប់ អ្នកនេសាទនឹងទាក់ទងប្រាប់ព័ត៌មាននេះមករដ្ឋបាលជលផលពេលពួកគាត់ចាប់បានត្រីដែលមានកឹបស្លាកសំគាល់។ បច្ចុប្បន្ននេះ រដ្ឋបាលជលផលបានបើកឲ្យមានការនេសាទត្រីហើយ បន្ទាប់ពីផ្អាកមួយរយៈក្នងរដូវត្រីពងកូន។ បើតាមក្រុមការងារអច្ឆិរយៈភាពទន្លេមេគង្គ នៅក្នុងខែវិច្ឆិការ ឬខែខ្មែត្រូវនឹងខែកក្ដិកខ្យល់បក់ពីជើងនេះ បណ្ដាត្រីនៅបឹងទន្លេសាប ពិសេសត្រីរៀល នឹងផ្លាស់ទីដោយហែលគោចរចេញពីបឹងទន្លេសាបឆ្ពោះទៅកាន់ទន្លេនានា ពិសេសទន្លេមេគង្គលើ មុននឹងវាត្រឡប់ទៅបឹងទន្លេសាបវិញនៅអំឡុងពេលទឹកទន្លេចាប់ផ្ដើមជោកល់ និងហក់ឡើង៕អត្ថបទ៖ រ៉េន រតនៈ     រូបភាព៖ សែត ប៊ុនថាន់ 

២៦ តុលា ២០២០
កំណាត់ផ្លូវជាតិលេខ៥ ចន្លោះក្រុងសិរីសោភ័ណ្ឌ និងក្រុងប៉ោយប៉ែត ក្លាយជាទីតាំងទេសចរណ៍ ក្រោយទឹកជំនន់ បានស្រកចុះបន្តិច

កំណាត់ផ្លូវជាតិលេខ៥ ចន្លោះក្រុងសិរីសោភ័ណ្ឌ និងក្រុងប៉ោយប៉ែត ក្លាយជាទីតាំងទេសចរណ៍ ក្រោយទឹកជំនន់ បានស្រកចុះបន្តិច

កំណាត់ផ្លូវជាតិលេខ ៥ ចន្លោះពីក្រុងសិរីសុភ័ណ្ឌ ទៅកាន់ក្រុងប៉ោយប៉ែត ក្នុងខេត្តបន្ទាយមានជ័យ បានក្លាយទៅជាទីតាំងទេសចរណ៍ថ្មី ក្រោយទឹកជំនន់ បានស្រកចុះបន្តិច នៅថ្ងៃទី២៣  ខែតុលានេះ។ប្រជាពលរដ្ឋ បាននាំគ្នា ទៅហែលទឹកលេង បង់ត្រី លក់ដូរអាហារសម្រន់ និងទទួលទានអាហារជុំគ្នាជាលក្ខណៈគ្រួសារ នៅលើទីតាំង ដែលធ្លាប់ទទួលរងនូវការជន់លិចដោយជំនន់ទឹកភ្លៀង។ ទិដ្ឋភាពលើកំណាត់ផ្លូវជាតិលេខ៥ នេះ សព្វថ្ងៃ មើលទៅហាក់ដូចជាទីតាំងទេសចរណ៍ថ្មីមួយ នៅក្នុងខេត្តបន្ទាយមានជ័យ។ លោក ហ៊ុន ឌីណូ រាយការណ៍...  រាយការណ៍៖ ហ៊ុន ឌីណូ       រូបភាព៖ ឈាវ ថុក វីរ:

២៦ តុលា ២០២០
ក្រសួង អំពាវនាវឲ្យប្រយ័ត្ន ព្រោះទឹកទន្លេមេគង្គនឹងហក់ឡើង ខណៈភ្លៀងនៅតែបន្តធ្លាក់

ក្រសួង អំពាវនាវឲ្យប្រយ័ត្ន ព្រោះទឹកទន្លេមេគង្គនឹងហក់ឡើង ខណៈភ្លៀងនៅតែបន្តធ្លាក់

នៅថ្ងៃទី២០ ខែតុលា ឆ្នាំ២០២០នេះ ក្រសួងធនធានទឹក និងឧតុនិយម បានចេញផ្សាយឲ្យដឹងជាបន្តបន្ទាប់អំពីស្ថានភាពកម្ពស់ទឹកទន្លេមេគង្គ និងស្ថានភាពអាកាសធាតុ នៅទូទាំងប្រទេស​។ បើតាមក្រសួង ទឹកទន្លេមេគង្គ នឹងហក់ឡើង ហើយភ្លៀងនឹងបន្តធ្លាក់រាយប៉ាយ ដោយសារឥទ្ធិពលវិសម្ពាធ និងឥទ្ធិពលព្យុះ។ យោងតាមសេចក្ដីប្រកាសព័ត៌មានរបស់ក្រសួងធនធានទឹក និងឧតុនិយម ចេញផ្សាយ នៅថ្ងៃអង្គារនេះ ឥទ្ធិពលនៃប្រព័ន្ធសម្ពាធទាប ITCZ ភ្ជាប់នឹងវិសម្ពាធ ដែលបាន និងកំពុងអូសបន្លាយលើប្រទេសកម្ពុជា បានធ្វើឲ្យមានភ្លៀងធ្លាក់ច្រើនៅអាងទន្លេមេគង្គក្នុងប្រទេសឡាវ និងតំបន់ភូមិភាគឥសានប្រទេសកម្ពុជា។ ក្រសួងបន្តថាស្ថានភាពនេះ នឹងធ្វើឲ្យទឹកទន្លេមេគង្គនៅភាគខាងលើបន្តហក់ឡើងជាលំដាប់ ក្នុងរយៈពេលពី៤ទៅ៦ថ្ងៃខាងមុខ នៅស្ថាននីយជលសាស្រ្តមេគង្គស្ទឹងត្រែង, មេគង្គក្រចេះ, មេគង្គកំពង់ចាម។ យ៉ាងណាក៏ដោយក្រសួងបញ្ជាក់ថាការហក់ឡើងនេះនៅមានកម្រិតទាបជាងកម្រិតប្រកាសឲ្យប្រុងប្រយ័ត្ន។ បែបនេះក្ដីក្រសួងនៅតែអំពាវនាវ អាជ្ញាធរ ប្រជាពលរដ្ឋ រស់នៅតាមតំបន់ដងទន្លេមេគង្គ បង្កើនការប្រុងប្រយ័ត្នខ្ពស់ដើម្បីចៀសវាងនូវគ្រោះថ្នាក់ផ្សេងៗ និងត្រូវត្រៀមបើកទឹកបង្ហូរចូលទៅកាន់ស្ទឹង ព្រែក អាង បឹង និងតំបន់ទំនាបនានា។ នៅថ្ងៃនេះដែរ ក្រសួងធនធានទឹក ក៏បានចេញសេចក្ដីជូនដំណឹងដាច់ដោយឡែកមួយទៀតអំពីស្ថានភាពអាកាសធាតុ ដោយអះអាថាពេលនេះកម្ពុជាកំពុងទទួលនូវខ្យល់មូសុងនិរតិកម្រិតមធ្យម និងប្រព័ន្ធសម្ពាធទាបកំពុងអូសបន្លាយពីលើស្របពេលដែលព្យុះសូដែលអាចនឹងកើតមាននៅលើប្រទេសហ្វីលីពីនឆ្ពោះមកកាន់វៀតណាមប៉ែកខាងជើងនាថ្ងៃទី២៥ដល់២៦តុលា។ បើតាមក្រសួងស្ថានភាពនេះ នឹងធ្វើឲ្យតំបន់ទំនាបកណ្ដាល តំបន់ជាប់ជួរភ្នំដងរែង ខ្ពង់រាបឥសាន និងតំបន់មាត់សមុត្រមានភ្លៀងធ្លាក់រាយប៉ាយពីតិចទៅមធ្យម និងបង្គួរ។ ក្រសួងបានបន្តអំពាវនាវឲ្យប្រជាពលរដ្ឋបង្កើនការប្រុងប្រយ័ត្នចំពោះស្ថានភាពនេះ ពិសេសពីថ្ងៃទី២៤ដល់​២៨ខែតុលា អាចនឹងមានខ្យល់បោកបក់ខ្លាំងនៅតំបន់សមទ្រ៕ អត្ថបទ៖ រ៉េន រតនៈ ​រូបភាព៖ ឯកសារ

២៥ តុលា ២០២០
រាជបណ្ឌិត្យសភាកម្ពុជា នឹងយករូបបដិមាព្រះបាទជ័យវរ្ម័នទី៧ ទាំងអស់ ចងក្រងជាសៀវភៅ

រាជបណ្ឌិត្យសភាកម្ពុជា នឹងយករូបបដិមាព្រះបាទជ័យវរ្ម័នទី៧ ទាំងអស់ ចងក្រងជាសៀវភៅ

រូបបដិមារបស់ព្រះបាទជ័យវរ្ម័នទី៧ ទាំងអស់ នឹងត្រូវរៀបចំចងក្រងជាសៀវភៅ ដោយរាជបណ្ឌិត្យសភាកម្ពុជា។ នៅពេលនេះ ព្រះបរមរូបព្រះបាទជ័យវរ្ម័នទី៧ ត្រូវបានក្រុមអ្នកស្រាវជ្រាវ កំពុងកំណត់អត្តសញ្ញាណ ដែលមានទម្រង់ផ្សេងៗគ្នា។  ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានលើកឡើងថា ក្នុងនាមជាស្ថាប័នសិក្សាស្រាវជ្រាវ រាជបណ្ឌិត្យសភា នឹងរៀបចំរូបបដិមារបស់ព្រះបាទជ័យវរ្ម័នទី៧ទាំងអស់ ចងក្រងជាសៀវភៅ ក្នុងដំណាក់កាលទី១ តាមប្រវត្តិនីមួយៗ រូបភាពនីមួយៗ នៅតាមប្រាង្គប្រាសាទនានា ឬជាស្នាដៃរបស់ព្រះអង្គ ដើម្បីផ្សព្វផ្សាយជាសាធារណៈ។ ឯកឧត្តមបានឲ្យដឹងបែបនេះ ក្នុងវេទិកាពិភាក្សាស្តីពី «អត្តសញ្ញាណបដិមាព្រះបាទជ័យវរ្ម័នទី៧» ដែលរៀបចំឡើងនៅរាជបណ្ឌិត្យសភាកម្ពុជា នៅថ្ងៃទី២២ ខែតុលានេះ។ វេទិកាពិភាក្សានេះ ធ្វើឡើងក្នុងគោលបំណង ដើម្បីកំណត់ជ្រើសរើសរូបណាមួយសម្រាប់យកមកសិតជាបដិមាទោលរបស់ព្រះអង្គជាទម្រង់ជាព្រះមហាក្សត្រក្នុងកាយវិការគ្រងរាជ្យ ឬក្នុងកិច្ចធ្វើព្រះរាជ្យសវនាការ ដោយសារកន្លងមក យើងឃើញមានតែការឆ្លាក់រូបព្រះអង្គ ក្នុងទម្រង់សមាធិ ដោយមិនមានគ្រងគ្រឿងរណ្ដាប់រាជអ្វីឡើយ។ អគ្គលេខាធិការរាជបណ្ឌិត្យសភាកម្ពុជា ឯកឧត្តម យង់ ពៅ បានឲ្យដឹងថា ក្រុមស្រាវជ្រាវរបស់រាជបណ្ឌិត្យសភាកម្ពុជា បានធ្វើការសិក្សាស្រាវជ្រាវ រកអត្តសញ្ញាណព្រះបរមរូបរបស់ព្រះបាទជ័យវរ្ម័នទី៧ ក្នុងទម្រង់ផ្សេងៗទៀត ក្រៅពីទម្រង់អង្គុយពែនភ្នែន សម្មាធិ ឬសំពះ។ ការស្រាវជ្រាវនេះ មានគោលបំណងស្ថាបនាបដិមាទោល ព្រះបាទជ័យវរ្ម័នទី៧ (ក្នុងទម្រង់ខុសពីទម្រង់ធ្លាប់មាន) ដើម្បីតម្កល់ក្នុងអគារ «ខេមរវិទូ» ក្នុងបរិវេណអគាររាជបណ្ឌិត្យសភា ដែលនឹងសាងសង់រួចរាល់នាពេលឆាប់ៗនេះ៕អត្ថបទ៖ អឿន ភារ៉ា     រូបភាព៖ សុខជួប រិទ្ធីបញ្ញា 

២៥ តុលា ២០២០
កម្មវិធីឧបត្ថម្ភសាច់ប្រាក់ខែតុលានេះ មានឧបសគ្គច្រើន ប៉ុន្តែទទួលបានផលវិជ្ជមាន

កម្មវិធីឧបត្ថម្ភសាច់ប្រាក់ខែតុលានេះ មានឧបសគ្គច្រើន ប៉ុន្តែទទួលបានផលវិជ្ជមាន

អ្នកពាក់ព័ន្ធទាំងឡាយ បានអះអាងថា ឧបសគ្គធំបំផុត សម្រាប់កម្មវិធីឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះ អំឡុងពេលប្រយុទ្ធនឹងជំងឺកូវីដ១៩ នៅខែតុលានេះ គឺទឹកជំនន់។ តែទោះយ៉ាងណា ដោយសារកិច្ចខិតខំប្រឹងប្រែងជម្នះឧបសគ្គ ធ្វើឱ្យកម្មវិធីសម្រេចបានលទ្ធផលល្អ ខណៈធនាគារពិភពលោក បានអះអាងថា កម្មវិធីឧបត្ថម្ភសាច់ប្រាក់នេះ បានជួយទប់ទល់ដ៏សំខាន់ ដល់ជីភាពរបស់ប្រជាជន ក្នុងគ្រាកំពុងជួបក្តីលំបាក។ ទឹកជំនន់គឺជាឧបសគ្គដ៏ធំបំផុតសម្រាប់កម្មវិធីឧបត្ថម្ភសាច់ប្រាក់ដល់គ្រួសារក្រីក្រ និង ងាយរងគ្រោះ អំឡុងពេលប្រយុទ្ធនឹងជំងឺកូវីដ ១៩ នៃ តុលា នេះ ដោយហេតុថា ទឹកជំនន់ ធ្វើឱ្យមនុស្សគ្រប់គ្នា ជាពិសេសអ្នកផ្តល់សេវា និង ទាំងអ្នកទទួលផល រវល់ច្រើន ជាពិសេសរវល់ក្នុងការចាត់ចែងគ្រួសារ ផ្ទះសម្បែងដែលរងទឹកជំនន់ ហើយទឹកជំនន់លិចផ្លូវ លិចភូមិស្រុក  ក៏បានបង្កក្តីលំបាកមួយកម្រិតទៀត សម្រាប់ការធ្វើដំណើរទៅផ្តល់សេវា និង ទៅបើកប្រាក់ឧបត្ថម្ភ រួមទាំងបញ្ជបើកប្រាក់ជូនអ្នកទទួលផលមួយចំនួន ។ ម្យ៉ាងទៀតទឹកជំនន់ ក៏បានធ្វើឱ្យមានភាពរអាក់រអួលដល់អ៊ីនធឺណេត ដែលជាកត្តាដ៏ចាំបាច់ក្នុងកិច្ចប្រតិបត្តិការនានាពាក់ព័ន្ធនឹងការផ្តល់សាច់ប្រាក់នេះផងដែរ ។ នេះបើតាមរបាយការណ៍ដែលត្រូវបានបង្ហាញនៅក្នុងកិច្ចប្រជុំបូកសរុបលទ្ធភាពការងារ ផ្តល់សាច់ប្រាក់ដល់គ្រួសារក្រីក្រ និង ងាយរងគ្រោះ អំឡុងពេលប្រយុទ្ធនឹងជំងឺកូវីដ ១៩ សម្រាប់ ខែ តុលា ដែលធ្វើឡើងនៅឯក្រសួងសង្គមកិច្ច នាព្រឹកថ្ងៃទី ២២ ខែ តុលា ឆ្នាំ ២០២០ នេះ ។ ទោះយ៉ាងណា ទឹកជំនន់ មិនអាចបន្ទច់បង្អាក់ដល់ប្រតិបត្តិការ នៃ កម្មវិធីឧបត្ថម្ភសាច់ប្រាក់នេះឡើយ ដោយសារកិច្ចខិតខំប្រឹងប្រែងខ្នះខ្នះជម្នះរបស់អ្នកពាក់ព័ន្ធ តាំងពីថ្នាក់ជាតិ ដល់ថ្នាក់មូលដ្ឋាន ធ្វើឱ្យកម្មវិធីឧបត្ថម្ភសាច់ប្រាក់សម្រេចបានលទ្ធផលគួរជាទីសោមនស្ស ដោយគិតត្រឹមម៉ោង ៦ និង ០០ នាទីល្ងាចថ្ងៃទី ២១ ខែ តុលា នេះ កម្មវិធីបានបើកប្រាក់ជូនអ្នកទទួលផលសរុបជិត ៥៥ ម៉ឺនគ្រួសារ ពីក្នុងចំណោមប្រជាជនជាង ៥៩ ម៉ឺនគ្រួសារដែលមានឈ្មោះក្នុងបញ្ជី សម្រាប់ខែ តុលា នេះ ដោយកម្មវិធីចំណាយថវិកា អស់ជាង ២៨ លានដុល្លារអាមេរិក ។ របាយការណ៍អង្កេតរបស់ធនាគារពិភពលោក ដោយមានកិច្ចសហការដោយវិទ្យានស្ថានជាតិស្ថិតិ សហភាព អឺរ៉ុប ឬ EU និង Australian Aid  បានអះអាងថា ប្រជាជន ៩១ ភាគរយ នៃ អ្នកមានប័ណ្ណសមធម៌ ឬ ប័ណ្ណក្រីក្រ បានទទួលជំនួយសង្គមចាប់តាំងពីខែ មិថុនា មកម៉្លេះ ហើយភាគច្រើនបំផុតតាមរយៈកម្មវិធីឧបត្ថម្ភសាច់ប្រាក់ដល់គ្រួសារក្រីក្រ និង ងាយរងគ្រោះ អំឡុងពេលប្រយុទ្ធនឹងជំងឺកូវីដ ១៩ ហើយគ្រួសារភាគច្រើនបំផុត បានយកប្រាក់ទាំងនោះទៅប្រើប្រាស់ក្នុងការទិញស្បៀងអាហារសម្រាប់គ្រួសារ ដោយសារសេដ្ឋកិច្ច នៃ គ្រួសារទាំងនោះ បានចាប់ផ្តើមធ្លាក់ចុះតាំងពីមានកូវីដ ១៩ មកម៉្លេះ ហើយថវិកាដែលពួកគេទទួលបានតាមរយៈកម្មវិធីឧបត្ថម្ភសាច់ប្រាក់នេះបានជួយទប់ទល់សេដ្ឋកិច្ចគ្រួសាររបស់ពួកគេយ៉ាងសំខាន់ ដែលបានសេចក្តីថា ជំនួយសង្គមតាមរយៈកម្មវិធីឧបត្ថម្ភសាច់ប្រាក់ដល់គ្រួសារក្រីក្រ និង ងាយរងគ្រោះ អំឡុងពេលប្រយុទ្ធនឹងជំងឺកូវីដ ១៩ បានធ្វើឡើងចំពេលវេលា និង មានប្រសិទ្ធភាព ។  សូមជម្រាបរថា កម្មវិធីឧបត្ថម្ភសាច់ប្រាក់ដល់គ្រួសារក្រីក្រ និង ងាយរងគ្រោះ អំឡុងពេលប្រយុទ្ធនឹងជំងឺកូវីដ ១៩ បានចាប់ផ្តើមកាលពីថ្ងៃទី ២៥ ខែ មិថុនា ហើយគិតត្រឹមថ្ងៃទី ២១ ខែ តុលា ម្សិលម៉ិញនេះ កម្មវិធីបានចំណាយថវិកា អស់ប្រមាណជាជាង ១០៨ លាដុល្លារអាមេរិក ហើយ ដែលជាថវិការបស់រាជរដ្ឋាភិបាល កម្ពុជា សុទ្ធសាធ ។ រាជរដ្ឋាភិបាល កម្ពុជា ក៏បានប្រកាសថា នឹងបន្តកម្មវិធីឧបត្ថម្ភសាច់ប្រាក់នេះរយៈពេល ៣ ខែ ទៀត ដែលនឹងចាប់ផ្តើមពីថ្ងៃទី ២៥ ខែ ទុលា ឆ្នាំ ២០២០ នេះ រហូតដល់ថ្ងៃទី ២៤ ខែ មករា ឆ្នាំ ២០២១ ៕អត្ថបទ៖ ខឿន សាឃាង រូបភាព៖ និន សុខលី 

២៥ តុលា ២០២០
ក្នុងឆ្នាំ២០២០នេះ ចំនួនសត្វផ្សោតមេគង្គ នៅកម្ពុជា ពុំមានការធ្លាក់ចុះឡើយ

ក្នុងឆ្នាំ២០២០នេះ ចំនួនសត្វផ្សោតមេគង្គ នៅកម្ពុជា ពុំមានការធ្លាក់ចុះឡើយ

ការសិក្សាពីចំនួនសត្វផ្សោតទន្លេមេគង្គ នៅឆ្នាំ២០២០នេះ បានបង្ហាញថា ចំនួនសត្វផ្សោតមេគង្គនៅកម្ពុជា ពុំមានការធ្លាក់ចុះនោះឡើយ គឺមានប្រមាណ ៨៩ក្បាល។ ប៉ុន្តែ សត្វផ្សោតទាំងនោះ កំពុងប្រឈមការគំរាមកំហែងពីបទល្មើសនេសាទ ភាគច្រើនជាមងនេសាទ។ តាមការសិក្សាអំពីចំនួនសរុបនៃសត្វផ្សោតទន្លេមេគង្គនៅកម្ពុជាក្នុងឆ្នាំ២០២០នេះ បានបង្ហាញថា ចំនួនសត្វផ្សោតនៅក្នុងខេត្តក្រចេះ និងស្ទឹងត្រែង គឺមានប្រមាណ៨៩ក្បាល ខណៈចំនួនដែលបានកត់ត្រានៅក្នុងឆ្នាំ២០១៧ មានប្រហែល៩២ក្បាល។ ចំនួននេះ អ្នកជំនាញអះអាងថា ពុំមានការធ្លាក់ចុះនោះឡើយ គឺស្ថិរក្នុងចំនួនថេរ និងអាចគ្រប់គ្រងបាន។ ក្នុងកិច្ចប្រជុំផ្សព្វផ្សាយរបាយការណ៍បច្ចេកទេសអំពី ការសិក្សាអំពីចំនួនសរុបនៃសត្វផ្សោតទន្លេមេគង្គក្នុងឆ្នាំ២០២០ ធ្វើឡើងនៅរដ្ឋបាលជលផល នៅថ្ងៃទី២២ ខែតុលានេះ លោក សេង ទៀក នាយកអង្គការមូលនិធិសកលសម្រាប់ធម្មជាតិហៅកាត់ WWF ប្រចាំកម្ពុជា បានបញ្ជាក់ថា ចាប់ពីឆ្នាំ២០១៧ ដល់ឆ្នាំ២០២០នេះ អត្រាថយចុះរបស់ផ្សោតគឺស្ថិតក្នុងស្ថានភាពល្អ ពោលគឺចំនួនកូនផ្សោតដែលធំពេញវ័យអាចបន្តពូជបានមានដល់ទៅ ៤.២២ភាគរយ ដែលជាចំនួនផ្សោតថ្មីត្រូវបានកត់ត្រា។ លោក អ៊ុក វិបុល ប្រធាននាយកដ្ឋានអភិរក្សជលផល បានលើកឡើងថា ការរក្សាបាននូវកូនផ្សោតដែលកើតថ្មីរហូតដល់ពួកវាពូជ នឹងធ្វើឲ្យចំនួនមានការកើនឡើង។ ប៉ុន្តែការងារសំខាន់ គឺធ្វើយ៉ាងណាទប់ស្កាត់បទល្មើសនេសាទ ដែលនៅតែបន្តកើតមាន និងគំរាមកំហែងដល់ជីវិតសត្វផ្សោតក្នុងទន្លេមេគង្គ។  សូមជម្រាបថា បច្ចុប្បន្ន រដ្ឋបាលជលផលមានស្នាក់ល្បាតចំនួន១៦ ចាប់ពីព្រែកកាំពី ខេត្តក្រចេះរហូតដល់ខេត្តស្ទឹងត្រែងទល់ដែនឡាវ និងមានឆ្មាំទន្លេចំនួន ៧២នាក់ ដែលធ្វើការចុះល្បាតចល័តជាប្រចាំ។ ក្នុងរយៈពេល៣ឆ្នាំនៃការអនុវត្តច្បាប់តាមដងទន្លេមេគង្គ ចាប់ពីឆ្នាំ២០១៧ មកដល់ខែតុលានេះ មងនេសាទរហូតដល់ទៅ ២២ម៉ឺនម៉ែត្រ ត្រូវបានរឹបអូសពីអន្លង់ផ្សោត សន្ទូចរនង ១២ម៉ឺនម៉ែត្រ ឧបករណ៍ឆក់ ៦៤ករណី និងជនល្មើស១៣នាក់ ត្រូវបានចាប់ខ្លួន និងកសាងសំណុំរឿងបញ្ជូនទៅតុលាការ៕អត្ថបទ៖ អឿន ភារ៉ា     រូបភាព៖ សុខ ពិសិដ្ឋ

២៥ តុលា ២០២០
ទូតមិត្តបរទេស បង្ហាញការយកចិត្តទុកដាក់ ចំពោះគ្រោះជំនន់ទឹកភ្លៀង នៅកម្ពុជា

ទូតមិត្តបរទេស បង្ហាញការយកចិត្តទុកដាក់ ចំពោះគ្រោះជំនន់ទឹកភ្លៀង នៅកម្ពុជា

ជំនន់ទឹកភ្លៀង ដែលវាយប្រហារតំបន់ជាច្រើន ក្នុងរាជធានីខេត្តចំនួន១៩ នៅកម្ពុជា ត្រូវបានយកចិត្តទុកដាក់តាមដាន និងចូលរួមរំលែកការលំបាកពីបណ្ដាស្ថានទូតមិត្តភក្ដិបរទេស ប្រចាំនៅកម្ពុជា។ តាមរយៈទំព័រហ្វេសប៊ុករៀងៗខ្លួន ស្ថានទូតទាំងនោះ បានបង្ហោះសាររំលែកសេចក្ដីទុក្ខលំបាក ភ្ជាប់ដោយសកម្មភាពមនុស្សធម៌ ជាមួយប្រជាជនកម្ពុជា ក្នុងគ្រាដ៏លំបាកនេះ។ ស្ថានទូតប្រទេសជាមិត្តប្រចាំនៅកម្ពុជា មានជាអាទិ៍ ស្ថានទូតជប៉ុន ចិន អាម៉េរិក ឥណ្ឌា ឥណ្ឌូនេសុី និងស្ថានវៀតណាម និងទីម័រខាងកើតជាដើម សុទ្ធតែបានបង្ហោះសារចូលរួមរំលែកទុក្ខលំបាកជាមួយរាជរដ្ឋាភិបាល និងប្រជាជនកម្ពុជាដែលបាន និងកំពុងរងគ្រោះដោយមហន្តរាយធម្មជាតិជំនន់ទឹកភ្លៀង។ តាមរយៈទំព័រហ្វេសប៊ុករបស់ខ្លួន ស្ថានទូតជប៉ុនបានបង្ហោះសារបួងសួងសូមឲ្យពលរដ្ឋកម្ពុជាមានសុខសុវត្ថិភាព ដោយភ្ជាប់ជាមួយនូវប្រសាសន៍ឯកអគ្គរាជទូត មិកាមិ មាសាហីរ៉ូ ថា ខ្ញុំមានការព្រួយបារម្ភជាពន់ពេកនៅពេលបានឮដំណឹងអំពីគ្រោះទឹកជំនន់នៅតាមបណ្តាខេត្តជាច្រើននៃប្រទេសកម្ពុជា ដែលបានបង្កគ្រោះថ្នាក់ដល់អាយុជីវិតប្រជាជន និងបង្ខំចិត្តឲ្យប្រជាជនជាច្រើនត្រូវជម្លៀសទៅកាន់ទីទួលសុវត្ថិភាព។ឯកឧត្តម Masahiro បានចូលរួមរំលែកទុក្ខក្រុមគ្រួសារជនគ្រោះដល់អាយុជីវិត និងបង្ហាញក្ដីរំពឹងថាជីវភាពរស់នៅរបស់ប្រជាជនរងគ្រោះនឹងវិលមកដូចធម្មតាវិញនាពេលឆាប់ៗខាងមុខ ដោយភ្ជាប់នូវប្រយោគប្រកបអត្ថន័យមិត្តភាព និងសាមគ្គីភាពថាប្រទេសជប៉ុននឹងនៅគាំទ្រជាមួយប្រជាជនកម្ពុជា។ លើសពីស្ថានទូត ក្នុងជំនួបតាមទូរសព្ទជាមួយឯកឧត្តុំឧបនាយករដ្ឋមន្ត្រី ប្រាក់ សុខុន រដ្ឋមន្ត្រីកាបរទេសកម្ពុជា កាលថ្ងៃពុធម្សិលមិញនេះ ប្រមុខការទូតជប៉ុន ឯកឧត្តម Motegi Toshimitsu ក៏បានថ្លែងចូលរួមសោកស្តាយផងដែរ ដោយបានសន្យាថា ជប៉ុនផ្តល់ជំនួយគ្រប់បែបយ៉ាងតាមដែលអាចធ្វើទៅបាន។ ចំណែកស្ថានទូតមិត្តដែកថែបកម្ពុជាឯណោះវិញ ក៏បានបង្ហោះរូបភាពឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា ចូលរួមផ្តល់អំណោយជាសម្ភារចាំបាច់ប្រចាំថ្ងៃដល់ពលរដ្ឋរងគ្រោះដោយទឹកជំនន់នៅក្នុងខណ្ឌដង្កោ ជាមួយឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា។ ស្ថានទូតបានស្រង់ប្រសាសន៍ឯកអគ្គរដ្ឋទូតមកបង្ហោះថា ចិននិងកម្ពុជាជាបងប្អូនល្អដែលជួយគ្នាទៅវិញទៅមក និងរួមសុខរួមទុក្ខជាមួយគ្នា ភាគីចិនមានអារម្មណ៍ដូចគ្នាចំពោះគ្រោះមហន្តរាយដែលកម្ពុជាកំពុងជួបប្រទះយ៉ាងធ្ងន់ធ្ងរនេះ និងរីករាយរួមចំណែកជាកម្លាំងយ៉ាងសកម្មក្នុងការទប់ស្កាត់និងជួយសង្គ្រោះក្នុងគ្រោះទឹកជំនន់។ បន្ទាប់ពីមហាយក្សចិន ស្ថានទូតមហាអំណាចអាម៉េរិក ក៏បានបង្ហោះខ្លឹមសារភ្ជាប់ដោយសកម្មភាពឯកឧត្តម W. Patrick Murphy ដែលបានដឹកនាំសហការីទៅពិនិត្យមៀលស្ថានភាពជាក់ស្តែងរបស់ពលរដ្ឋកម្ពុជាដែលកំពុងរងគ្រោះដោយទឹកជំនន់នៅខេត្តកំពង់ធំ សៀមរាប បាត់ដំបង និងប៉ៃលិន។ បើតាមស្ថានទូត ក្រោមភាពជាដៃគូជាមួយអង្គការស្បៀងអាហារពិភពលោក ការិយាល័យជំនួយមនុស្សធម៌នៃទីភ្នាក់ងារផ្តល់ជំនួយរបស់សហរដ្ឋអាមេរិក (USAID) បានផ្តល់ថវិកា១០ម៉ឺនដុល្លារ ដើម្បីសង្គ្រោះប្រជាជនកម្ពុជាដែលកំពុងរងគ្រោះ។ បន្ថែមពីនេញ តាមរយៈ Twitter របស់ខ្លួន ឯកអគ្គរដ្ឋទូតអាមេេិក បានសរសេរថា Murphy «បេះដូងរបស់យើង នៅជាមួយពលរដ្ឋទាំងអស់ដែលស្ថិតក្រោមការគំរាមកំហែងគ្រោះមហន្តរាយនេះ»។ងាកមកមើលប្រទេសក្បែរខាងកម្ពុជា គឺវៀតណាម ថ្នាក់ដឹកនាំកម្ពុជា-វៀតណាម ទាំងកម្រិតរដ្ឋមន្ត្រីការពារជាតិ និងប្រមុខរដ្ឋាភិបាល បានសួរសុខទុក្ខគ្នាទៅវិញទៅមកអំពីទឹកជំនន់ដែលកំពុងញាំញីប្រទេសជិតខាងទាំងពីរ។ ស្ថានទូតវៀតណាមបានបង្ហោះសារនាយករដ្ឋមន្ត្រីវៀតណាម ង្វៀន សួនហ៊្វុក ផ្ញើសារលើកទឹកចិត្តសម្តេចតេជោ ហ៊ុន សែនថា «ខ្ញុំមានក្តីជឿជាក់ដ៏មុតមាំថា ក្រោមការដឹកនាំ និងយកចិត្តទុកដាក់ពីសម្តេច ប្រជាជនកម្ពុជានឹងជម្នះលើការលំបាកទាំងនេះ និងរកជីវភាពប្រក្រតីឡើងវិញនាពេលឆាប់ៗ»។ ដោយឡែក ស្ថានទូតឥណ្ឌូណេស៊ីប្រចាំកម្ពុជា ក៏បានបង្ហោះឱ្យដឹងថាស្ថានទូតបានឧបត្ថម្ភ មី Indomie ចំនួន១០០កេស ដល់មូលនិធិមុទិតា ដើម្បីជាការចូលរួមចំណែកជួយជនរងគ្រោះដោយសារជំនន់ទឹកភ្លៀង ខណៈទីម័រខាងកើតដែលបានឯករាជពីឥណ្ឌូនេសុីនោះ ស្ថានទូតប្រចាំកម្ពុជាក៏បានបង្ហោះឱ្យដឹងថាឯកអគ្គរដ្ឋទូតទីម័រ បានរួមចំណែកបរិច្ចាគថវិកាផ្ទាល់ខ្លួន១០០០ដុល្លារជូនដល់សម្តេចតេជោរួមចំណែកជួយដល់ជនរងគ្រោះ។ក៏មិនខុសគ្នាដែរ ស្ថានទូតឥណ្ឌា បានបង្ហោះសារសន្យាថឥណ្ឌា ត្រៀមខ្លួនរួចជាស្រេចក្នុងការជួយតាមអ្វីដែលអាចធ្វើបានក្នុងគ្រាដ៏លំបាក ដោយបន្ថែមថាយើងឈរជាមួយប្រជាជន និងរាជរដ្ឋាភិបាលកម្ពុជា ខណៈជួបគ្រាលំបាកដោយសារទឹកជំនន់»។ សូមបញ្ជាក់ថា ក្នុងជំនួបជាមួយពលរដ្ឋរងគ្រោះដោយទឹកជំនន់នៅស្រុកមង្គលបូរី ខេត្តបន្ទាយមានជ័យ កាលពីថ្ងៃម្សិលមិញ សម្តេចនាយករដ្ឋមន្ត្រី ហ៊ុន សែន បានអរគុណដល់បណ្តាសប្បុរសជនដែលចូលរួមបរិច្ចាគថវិកាសម្រាប់ជនរងគ្រោះ រួមទាំងការយកចិត្តទុកដាក់របស់បណ្តាស្ថានទូត។ សម្តេចក៏បានលើកឡើងពីភាពរឹងមាំរបស់កម្ពុជាដើម្បីជម្នះគ្រាដ៏លំបាកទាំងកូវីដ-១៩ និងគ្រោះទឹកជំនន់៕អត្ថបទ៖ រ៉េន រតនៈ         រូបភាព៖ ឯកសារ 

២៥ តុលា ២០២០
ប្រជាពលរដ្ឋនៅខណ្ឌទួលគោក ទទូចស្នើសុំអោយអាជ្ញាធរជួយដោះស្រាយបញ្ហាហេដ្ឋារចនាសម្ព័ន្ធប្រព័ន្ធលូ និងផ្លូវថ្នល់ខូចនៅក្នុងមូលដ្ឋាន

ប្រជាពលរដ្ឋនៅខណ្ឌទួលគោក ទទូចស្នើសុំអោយអាជ្ញាធរជួយដោះស្រាយបញ្ហាហេដ្ឋារចនាសម្ព័ន្ធប្រព័ន្ធលូ និងផ្លូវថ្នល់ខូចនៅក្នុងមូលដ្ឋាន

បញ្ហាហេដ្ឋារចនាសម្ព័ន្ធប្រព័ន្ធលូ ផ្លូវថ្នល់ខូច បានក្លាយជាបញ្ហាកង្វល់មួយដែលត្រូវបានក្រុមប្រជាពលរដ្ឋ នៅក្នុងខណ្ឌទួលគោក រាជធានីភ្នំពេញ ទទូចស្នើសុំអោយអាជ្ញាធរជួយដោះស្រាយជាបន្ទាន់។  ការលើកឡើងពីបញ្ហាកង្វល់របស់ប្រជាពលរដ្ឋនេះ បានធ្វើឡើង នៅក្នុងវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សារាជធានីភ្នំពេញ នៅខណ្ឌទួលគោក នៅព្រឹកថ្ងៃទី២២ តុលានេះ។  ការទទូចសុំទទូចស្នើសុំអោយអាជ្ញាធរជួយដោះស្រាយជាបន្ទាន់ហេដ្ឋារចនាសម្ព័ន្ធប្រព័ន្ធលូ និងជួសជុលផ្លូវថ្នល់ដែលខូចនេះ ត្រូវបានក្រុមប្រជាពលរដ្ឋលើកឡើងនៅក្នុងវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សារាជធានីភ្នំពេញ នៅខណ្ឌទួលគោក នៅព្រឹកថ្ងៃទី២២ តុលានេះ។ ជាការឆ្លើយតបនឹងការស្នើរបស់ប្រជាពលរដ្ឋខាងលើ ប្រធានក្រុមប្រឹក្សារាជធានីភ្នំពេញ ឯកឧត្តម ប៉ា សុជាតិវង្ស ក៏បានទទួលយកសំណើរ និងសន្យាពិនិត្យសិក្សាលើកគម្រោងផែនការធ្វើការដោះស្រាយជូនប្រជាពលរដ្ឋតាមដំណាក់កាល និងជំរុញល្បឿនដោះស្រាយអោយបានកាន់តែលឿនផងដែរ។ ឯកឧត្តម ប្រធានក្រុមប្រឹក្សារាជធានីភ្នំពេញ បានបន្តថា វេទិកាផ្សព្វផ្សាយនិងពិគ្រោះយោបល់របស់ ក្រុមប្រឹក្សារាជធានីភ្នំពេញ នឹងផ្តល់ឲ្យប្រជាពលរដ្ឋ ក្នុងការចូលរួម ក្នុងដំណើរអភិបាលកិច្ច និងជា ឧបករណ៍មួយ សម្រាប់លើក កម្ពស់គណនីភាព តម្លាភាព ក្នុងដំណើរការពិនិត្យលើការផ្តល់ សេវា សាធារណៈ របស់រដ្ឋបាលរាជធានីភ្នំពេញ ។ គួរបញ្ជាក់ថា វេទិកាផ្សព្វផ្សាយ និងពិគ្រោះយល់បល់ នេះធ្វើឡើងក្នុងគោលបំណង ដើម្បីធានាថា រាល់បញ្ហាអតិភាព របស់ប្រជាពលរដ្ឋក្នុងមូលដ្ឋាន ត្រូវបានពិនិត្យដោះស្រាយ និងឆ្លើយតបទៅគ្រប់ អ្នកពាក់ព័ន្ធទាំងអស់ ក្នុងមូលដ្ឋានត្រូវបានរួមបញ្ចូល បរិយាប័ន្ន នៅក្នុងដំណើរការ នៃការអភិវឌ្ឍ បែបប្រជាធិបតេយ្យ នៅថ្នាក់ក្រោមជាតិ ៕អត្ថបទ៖ សន រដ្ឋា     រូបភាព ញិល សុជា 

២៥ តុលា ២០២០
លទ្ធផលចុងក្រោយ បង្ហាញថា មានពលរដ្ឋជាង ២សែន ៦ម៉ឺននាក់ បានចុះឈ្មោះបោះឆ្នោត

លទ្ធផលចុងក្រោយ បង្ហាញថា មានពលរដ្ឋជាង ២សែន ៦ម៉ឺននាក់ បានចុះឈ្មោះបោះឆ្នោត

លទ្ធផលសរុបចុងក្រោយ បានឱ្យដឹងថា ក្នុងដំណើរការចុះឈ្មោះបោះឆ្នោត រយៈពេល ១៩ថ្ងៃ ពីថ្ងៃទី១ ដល់ថ្ងៃទី១៩ ខែតុលាកន្លងទៅ មានពលរដ្ឋបានចុះឈ្មោះបោះឆ្នោតសរុបចំនួន ២សែន ៦ម៉ឺន ១ពាន់ ៥៦៧នាក់។ នេះបើតាមទិន្នន័យរបស់ គ.ជ.ប។ នេះគឺជាទិន្នន័យបឋមដែល គ.ជ.ប នឹងត្រូវសម្រេចយកជាផ្លូវការ នាពេលខាងមុខ។ យោងតាមទិន្នន័យបឋមដែលត្រូវបានគណៈកម្មាធិការជាតិរៀបចំការបោះឆ្នោត បូកសរុបក្រោយពីបិទបញ្ចប់ដំណើរការពិនិត្យ និងចុះឈ្មោះបោះឆ្នោតរយៈពេល១៩ថ្ងៃមកនោះ មានេះពលរដ្ឋបានចុះឈ្មោះបោះឆ្នោតថ្មីនៅឆ្នាំ២០២០នេះសរុបចំនួន២សែន៦ម៉ឺន១ពាន់៥៦៧នាក់។  ការិយាល័យដែលមានអ្នកចុះឈ្មោះច្រើនជាងគេមាននៅខេត្តបាត់ដំបង២ម៉ឺន៤៨នាក់, តាមពីក្រោយដោយខេត្តកណ្ដាល១ម៉ឺន៩ពាន់៣៣៥នាក់ និងខេត្តកំពង់ស្ពឺមាន១ម៉ឺន៩ពាន់១៦១នាក់ ខណៈខេត្តដែលមានអ្នកចុះបោះឆ្នោតតិចជាងគេ គឺខេត្តកែប មាន៧៤៧នាក់ និងប៉ែលិនមាន១២៦៩នាក់។  គ.ជ.ប បានប៉ានប្រមាណថា មានពលរដ្ឋត្រូវចុះឈ្មោះថ្មីប្រមាណ៣សែននាក់។ យ៉ាងណាអ្នកនាំពាក្យ គ.ជ.ប អះអាងថាអត្រាអ្នកចុះឈ្មោះជាង២សែន៦ម៉ឺននាក់នៅឆ្នាំនេះ គឺជាចំនួនច្រើន ដោយសារតែពលរដ្ឋជាពលករមិនបានវិលទៅក្រៅប្រទេសដោយសារកូវីដបានទៅចុះឈ្មោះបោះឆ្នោត។ ផ្អែកលើលទ្ធផលនៃការចុះឈ្មោះបោះឆ្នោតឆ្នាំ២០២០នេះ គ.ជ.ប បានឲ្យដឹងថាលទ្ធផលបណ្ដោះអាសន្នក្នុងបញ្ជីបោះឆ្នោតបានកើនឡើងដល់៨លាន៨សែន៣ម៉ឺន៧៨៧នាក់។ អត្រានេះបើគិតជាភាគរយ ធៀបនឹងពលរដ្ឋគ្រប់អាយុបោះឆ្នោតទូទាំងប្រទេសសរុបចំនួនជាង១០លាន៣សែន៨ម៉ឺន២ពាន់នាក់ គឺស្មើនឹងប្រមាណ៨៥ភាគរយ៕អត្ថបទ៖ រ៉េន រតនៈ     រូបភាព៖ ឯកសារ

២២ តុលា ២០២០
រដ្ឋមន្ត្រីសង្គមកិច្ចថា កម្មវិធីឧបត្ថម្ភសាច់ប្រាក់ ប្រព្រឹត្តទៅ ដោយរលូន និងប្រកបដោយគុណប្រយោជន៍

រដ្ឋមន្ត្រីសង្គមកិច្ចថា កម្មវិធីឧបត្ថម្ភសាច់ប្រាក់ ប្រព្រឹត្តទៅ ដោយរលូន និងប្រកបដោយគុណប្រយោជន៍

បន្ទាប់ពីបានជួបសំណេះសំណាល និងចុះពិនិត្យស្ថានភាពជាក់ស្តែដល់ខ្នងផ្ទះ ប្រជាជនគោលដៅចំនួន ៤ ខេត្ត នៅជុំវិញបឹងទន្លេសាប រួចមក រដ្ឋមន្ត្រីក្រសួងសង្គមកិច្ច បានអះអាងថា កម្មវិធីឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះអំឡុងពេលប្រយុទ្ធនឹងជំងឺកូវីដ ១៩ បានប្រព្រឹត្តទៅដោយរលូន សូម្បីទឹកជំនន់ ក៏មិនអាចជាឧបសគ្គដែរ ហើយជាពិសេស គឺអ្នកទទួលផលភាគច្រើនបំផុត បានប្រើប្រាស់ថវិកាចំគោលដៅ ជាប្រយោជន៍ដល់ជីវភាពគ្រួសារ ខណៈគ្រួសារខ្លះ បានយកថវិកា ដែលរាជរដ្ឋាភិបាលបើកផ្តល់ជូននោះ ទៅផ្តួចផ្តើមមុខរបររបស់ពួកគាត់ទៀតផង។ សូមទស្សនាសេចក្តីរាយការណ៍របស់លោក ខឿន សាឃាង ពីខេត្តកំពង់ធំ៖  រាយការណ៍៖ ខឿន សាឃាង     រូបភាព៖ ឆិល សុភ័ស្ត

២២ តុលា ២០២០
ស្ថានទូតថៃ ប្រចាំកម្ពុជា ដឹកនាំក្រុមហ៊ុនចំនួន ៧ យកអំណោយឧបត្ថម្ភដល់គណៈកម្មាធិការជាតិគ្រប់គ្រងគ្រោះមហន្តរាយ

ស្ថានទូតថៃ ប្រចាំកម្ពុជា ដឹកនាំក្រុមហ៊ុនចំនួន ៧ យកអំណោយឧបត្ថម្ភដល់គណៈកម្មាធិការជាតិគ្រប់គ្រងគ្រោះមហន្តរាយ

ក្នុងនាមជាប្រទេសជិតខាង ស្ថានទូតថៃប្រចាំកម្ពុជានៅព្រឹកមិញនេះ បានដឹកនាំក្រុមហ៊ុនចំនួន៧ ដែលកំពុងធ្វើពាណិជ្ជកម្មនៅកម្ពុជា នាំយកអំណោយឧបត្ថម្ភដល់គណៈកម្មាធិការគ្រប់គ្រងគ្រោះមហន្តរាយ ដើម្បីនាំយកចែកជូនប្រជាពលរដ្ឋកម្ពុជាកំពុងរងគ្រោះដោយសារទឹកជំនន់។ អំណោយទាំងនោះមានសម្ភារៈប្រើប្រាស់ ថ្នាំពេទ្យ និងគ្រឿងឧបភោគបរិភោគ ជាដើម។ ពិធីប្រគល់ និងទទួលជំនួយនេះ ធ្វើឡើងរវាងលោក ប៉ាន់យ៉ារ៉ាក់ ភូនសាប់ ឯកអគ្គរាជទូតនៃព្រះរាជាណាចក្រថៃប្រចាំព្រះរាជាណាចក្រកម្ពុជា និងឯកឧត្ដមហង្ស សាមឿន អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ និងសហការី ព្រមទាំងមានការចូលរួមពីតំណាងរបស់ក្រុមហ៊ុនផ្សារម៉ាក្រូ និងក្រុមហ៊ុន៦ផ្សេងទៀត ដែលកំពុងធ្វើពាណិជ្ជកម្មនៅក្នុងប្រទេសកម្ពុជា។ បើតាមឯកអគ្គរាជទូតថៃប្រចាំកម្ពុជា កម្ពុជា និងប្រជាជនកម្ពុជា កំពុងតែទទួលរងគ្រោះដោយសារទឹកជំនន់ចំនួន១៩រាជធានីខេត្ត ក្នុងនោះខេត្តកណ្ដាល និងបន្ទាយមានជ័យរងផលប៉ះពាល់ខ្លាំង។ ជំនួយថ្ងៃនេះ មានអាហារ ថ្នាំពេទ្យ និងសម្ភារៈប្រើប្រាស់ចាំបាច់មួយចំនួន ហើយមិនមែនសម្រាប់តែប្រជាពលរដ្ឋរងគ្រោះនោះទេ ក៏សម្រាប់មន្ត្រីជួយសង្គ្រោះផងដែរ។ លោកបន្តថា ក្នុងនាមប្រទេសជិតខាងគ្នា គឺត្រូវជួយគ្នា ក្នុងគ្រាមានអាសន្នយ៉ាងដូច្នេះ។ ក្នុងឱកាសទទួលជំនួយ ឯកឧត្ថម ហង្ស សាមឿន អនុប្រធានគណៈកម្មាធិការជាតិគ្រប់គ្រងគ្រគ្រោះមហន្តរាយ បានចាត់ទុកជំនួយទាំងអស់នេះ គឺមានអត្ថន័យជ្រាលជ្រៅ ហើយចំពេលវេលាដែលកម្ពុជាកំពុងវមានតម្រូវការ ខណៈប្រជាពលរដ្ឋកម្ពុជាមួយចំនួន កំពុងរងផលប៉ះពាល់ដោយសារជំនន់ទឹកភ្លៀងរយៈពេលខ្លី។ ហើយនេះសកម្មភាពដ៏ប្រពៃក្នុងនាមជាប្រទេសជាប់របងគ្នា។ កម្ពុជាថ្លែងអំណរគុណចំពោះស្ថានទូតថៃ ដែលឈឺឆ្កាលពីសុខទុក្ខរបស់កម្ពុជានាពេលនេះ។បើតាមឯកឧត្ដម ទោះបីជារាជរដ្ឋាភិបាល មិនទាន់បានប្រកាសសុំជំនួយយ៉ាងណាក៏ដោយ ប៉ុន្តែជាការកត់សម្គាល់ មានសប្បុរសជនក្នុងស្រុកជាច្រើនចូលរួមជាមួយរាជរដ្ឋាភិបាល ក្នុងការជួយដល់ប្រជាពលរដ្ឋរងគ្រោះតាមលទ្ធភាព និងគ្រប់រូបភាព សរបញ្ជាក់ពីស្មារតីសាមគ្គី និងជួយគ្នាទៅវិញទៅមក។ យោងតាមរបាយការណ៍បឋមរបស់គណៈកម្មាធិការជាតិគ្រប់គ្រងគ្រោះមហន្តរាយចាប់ពីថ្ងៃទី១កញ្ញាដល់ថ្ងៃទី២០តុលាឆ្នាំ២០២០នេះ បានប៉ះពាល់ជាង១០ម៉ឺនគ្រួសារ ស្មើនឹងចំនួនប្រជាជនជាង៤១ម៉ឺននាក់។ អាជ្ញាធរបានជម្លៀសប្រជាជនជាង៤ម៉ឺន២ពាន់នាក់ មកកាន់ទីទូលសុវត្ថិភាពផងដែរ។ ក្រៅពីបំផ្លិចបំផ្លាញទ្រព្យសម្បត្តិ និងហេដ្ឋារចនាសម្ព័ន្ធ និងផលដំណាំរាប់ម៉ឺនហិចតា ទឹកជំនន់ក៏បានបណ្ដាលអោយប្រជាជនបាត់បង់ជីវិតកើនឡើងរហូតដល់៣៤នាក់ហើយ៕អត្ថបទ៖ សំ ជំនាញ     រូបភាព៖ និន សុខលី 

២២ តុលា ២០២០
កំណាត់ផ្លូវជាតិលេខ៤ បន្ដបិទរថយន្ដធុនធំ មិនឲ្យធ្វើដំណើរ ខណៈទឹកមិនទាន់ស្រក

កំណាត់ផ្លូវជាតិលេខ៤ បន្ដបិទរថយន្ដធុនធំ មិនឲ្យធ្វើដំណើរ ខណៈទឹកមិនទាន់ស្រក

ស្ថានភាពទឹកលិចលើកំណាត់ផ្លូវជាតិលេខ ៤ នៅមិនទាន់ស្រកអស់នៅឡើយទេ ហើយអាជ្ញាធរ នៅតែបន្តបិទចរាចរណ៍បណ្តោះអាសន្ន។ ជាមូយគ្នានេះ អភិបាលខណ្ឌកំបូល បានអំពាវនាវដល់អ្នកធ្វើដំណើរទាំងអស់ អាចវៀងផ្លូវចេញពីតំបន់នេះ ដើម្បីកុំឲ្យខូចខាតមធ្យោបាយ ដោយសារទឹកជន់លិច។ ប្រាប់ភីអិនអិននៅថ្ងៃទី២១ ខែតុលានេះ លោក ឃឹម ស៊ុនសូដា អភិបាលខណ្ឌកំបូល បានឲ្យដឹងថា កំណាត់ផ្លូវជាតិលេខ៤ នៅតែបន្ដបិទរថយន្ដធុនធំមិនឲ្យធ្វើដំណើរ ខណៈស្ថានភាពទឹកស្រកយឺត និងមិនទាន់ស្រកអស់នៅឡើយទេ។សូមបញ្ជាក់ថា ជំនន់ទឹកភ្លៀងបានតម្រូវឲ្យផ្អាកការធ្វើដំណើឆ្លងកាត់ជាបណ្តោះអាសន្ននូវកំណាត់ផ្លូវជាតិលេខ៤ ចាប់ពីចំនុចព្រំប្រទល់ស្រុកអង្គស្នួលមកដល់ព្រំប្រទល់ខណ្ឌពោធិ៍សែនជ័យ។ កាលពីថ្ងៃម្សិលមិញ អ្នកបើកបររថយន្តធុនធ្ងន់ចំនួន ១៥នាក់ ដែលបើកល្មើសនឹងបំរាមហាមឃាត់នេះ ត្រូវបានអភិបាលខណ្ឌកំបូលយកមកអប់រំណែនាំរួចអនុញ្ញាតឲ្យត្រឡប់ទៅវិញ។ លោកអភិបាលខណ្ឌបានបញ្ជាក់ថា ការសម្រេចបិទចរាចរណ៍រថយន្ដធុនធំមិនឲ្យឆ្លងកាត់នេះ ព្រោះដើម្បីការពារហានិភ័យ ដែលអាចកើតឡើងជាយថាហេតុ និងធ្វើឲ្យខូចខាតធ្ងន់ធ្ងរដល់ផ្លូវជាតិ។ ជាមួយគ្នានេះ អាជ្ញាធរក៏បានអំពាវនាវដល់អ្នកធ្វើដំណើរទាំងអស់ ពិសេសមធ្យោបាយទាបៗ អាចវៀងផ្លូវចេញពីតំបន់នេះ ដើម្បីកុំឲ្យខូចខាតមធ្យោបាយដោយសារទឹកជន់លិច។ដោយឡែក ម្ចាស់រថយន្តដឹកធុនធ្ងន់ទាំងអស់អាចបង្វែរទិសចរាចរណ៍នៅផ្លូវជាតិលេខ៤ ចំណុចស្តុបផ្សារបែកចាន ឃុំបែកចាន តាមផ្លូវលខ៤២ ឆ្ពោះទៅផ្លូវជាតិលេខ៣ ឬធ្វើដំណើតាមផ្លូវលេខ៥១ ទៅផ្លូវជាតិលេខ៥ ជំនួសវិញក្នុងអំឡុងពេលនេះ។ គួរជម្រាបដែរថា ក្រៅពីការផ្អាកចរាចរណ៍លើកំណាត់ផ្លូវជាតិលេខ៤ ផ្លូវជាតិដែលត្រូវបានទទួលរងនូវការលិចលង់ ក្នុងនោះរួមមាន៖ ផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៥ និងបណ្ដាផ្លូវជាតិ ផ្លូវខេត្តជាច្រើនខ្សែថែមទៀតផងដែរ។របាយការណ៍របស់ក្រសួងសាធារណការ និងដឹកជញ្ជូន បានឲ្យដឹងថា គិតត្រឹមដើមសប្តាហ៍នេះ ជំនន់ទឹកភ្លៀង បានប៉ះពាល់ផ្លូវថ្នល់ចំនួន ជាង១២០ខ្សែ មានចំនួនជាង ៣០០កំណាត់ និងមានប្រវែងជាង ៤០០គីឡូម៉ែត្រ ក្នុងនោះផ្លូវដីក្រួសក្រហមជាង ១៤០គីឡូម៉ែត្រ៕អត្ថបទ៖ អឿន ភារ៉ា រូបភាព៖ ឯកសារ

២២ តុលា ២០២០
ពលរដ្ឋរងគ្រោះ ដោយទឹកជំនន់ ក្នុងខណ្ឌដង្កោ ជាង ៣០០គ្រួសារ ទទួលបានអំណោយមនុស្សធម៌ របស់សម្តេចតេជោហ៊ុនសែន និងសម្តេចកិត្តិព្រឹទ្ធបណ្ឌិត

ពលរដ្ឋរងគ្រោះ ដោយទឹកជំនន់ ក្នុងខណ្ឌដង្កោ ជាង ៣០០គ្រួសារ ទទួលបានអំណោយមនុស្សធម៌ របស់សម្តេចតេជោហ៊ុនសែន និងសម្តេចកិត្តិព្រឹទ្ធបណ្ឌិត

ប្រជាពលរដ្ឋចំនួនជាង ៣០០គ្រួសារ ដែលរងគ្រោះដោយជំនន់ទឹកស្ទឹងព្រែកត្នោត នៅខណ្ឌដង្កោ បានទទួលអំណោយមនុស្សធម៌ របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន តាមរយៈឯកឧត្តម ហ៊ុន ម៉ានី សមាជិករដ្ឋសភា និងជាប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា។ ពិធីប្រគល់ទទួលអំណោយមនុស្សធម៌នេះ បានធ្វើឡើង កាលរសៀលថ្ងៃទី២០ ខែតុលា នៅទីតំាងចំនួន២ គឺនៅក្នុងសង្កាត់ក្រាំងពង្រ និងនៅទីទួលសុវត្ថិភាព ក្នុងតំបន់រង្វង់មូលកួរស្រូវ។ ឯកឧត្តម ហ៊ុន ម៉ានី សមាជិករដ្ឋសភា និងជាប្រធានគណៈកម្មការ អប់រំ យុវជន កីឡា ធម្មការ កិច្ចការសាសនា វប្បធម៌និងទេសចរណ៍នៃរដ្ឋសភា បាននាំយកអំណោយមនុស្សធម៌ របស់សម្តេចតេជោហ៊ុនសែន នាយករដ្ឋមន្រ្តីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ចែកជូនប្រជាពលរដ្ឋចំនួន៣៧៥គ្រួសារដែលរងគ្រោះដោយជំនន់ទឹកស្ទឹងព្រែកត្នោត នៅខណ្ឌដង្កោ ។ ពិធីប្រគល់ទទួលអំណោយមនុស្សធម៌នេះបានធ្វើឡើងកាលរសៀលថ្ងៃទី២០ ខែតុលា នៅទីតំាងចំនួន២គឺនៅក្នុងសង្កាត់ក្រាំងពង្រ និងនៅទីទួលសុវត្ថិភាពក្នុងតំបន់រង្វង់មូលកួរស្រូវ។ ឯកឧត្តម ហ៊ុន ម៉ានី សមាជិករដ្ឋសភា និងជាប្រធានគណៈកម្មការអប់រំយុវជនកីឡា ធម្មការ កិច្ចការសាសនា វប្បធម៌និងទេសចរណ៍នៃរដ្ឋសភា បានវាយតម្លៃខ្ពស់ចំពោះកិច្ចខិតខំប្រឹងប្រែង របស់ រដ្ឋបាលរាជធានីភ្នំពេញ ដែលបានដឹកនាំកងកម្លំាងនិងមធ្យោបាយសរុប ក្នុងការជួយ សង្គ្រោះប្រជាពលរដ្ឋបានទាន់ពេលវេលាមកកាន់ទីទួលសុវត្ថិភាព ដែលធានាឱ្យប្រជាពលរដ្ឋមានសុវត្ថិភាព និងរស់នៅសមរម្យនៅតំបន់ទីទួលសុវត្ថិភាព។ ជាមួយគ្នានោះ ឯកឧត្តម ក៏បានផ្តំាផ្ញើដល់ពលរដ្ឋរងគ្រោះត្រូវគិតគូរពីបញ្ហាសុវត្ថិភាព និងបង្កើនការប្រុងប្រយ័ត្នពីគ្រោះថ្នាក់ដែលបង្កឡើងដោយទឹកជំនន់ ជាពិសេសកុមារដែលងាយប្រឈមនឹងគ្រោះថ្នាក់ សំខាន់ត្រូវគិតគូរថែទាំសុខភាពឱ្យបានល្អ រក្សាអនាម័យស្អាត បរិភោគទឹកដាំឆ្អិនឬអាហារដែលចម្អិនបានល្អ ចៀសវាងជំងឺរាតត្បាតនានា ដែលបង្កឡើងដោយទឹក និងប្រុងប្រយ័ត្នពីសត្វអាសិរពិសគ្រប់ប្រភេទ។ គួរបញ្ជាក់ថា ពិធីប្រគល់អំណោយមនុស្សធម៌នេះ បានធ្វើឡើងនៅទីតំាងចំនួន២ គឺទីតាំងទី១ មានចំនួន២៧៥គ្រួសារនៅក្នុងសង្កាត់ក្រាំងពង្រ និងទី២ មានចំនួន១០០គ្រួសារទៀត នៅតំបន់ទីទួលសុវត្ថិភាព ក្នុងតំបន់រង្វង់មូលកួរស្រូវ៕អត្ថបទ៖ សន រដ្ឋា ,រូបភាព៖ ញិល សុជា 

២២ តុលា ២០២០
សម្តេចតេជោ ហ៊ុន សែន ផ្តល់អំណោយបឋមដល់ជនរងគ្រោះ ដោយទឹកជំនន់ទឹកភ្លៀង  ជាង ១ម៉ឺនគ្រួសារ នៅខេត្តបន្ទាយមានជ័យ នៅថ្ងៃនេះ

សម្តេចតេជោ ហ៊ុន សែន ផ្តល់អំណោយបឋមដល់ជនរងគ្រោះ ដោយទឹកជំនន់ទឹកភ្លៀង  ជាង ១ម៉ឺនគ្រួសារ នៅខេត្តបន្ទាយមានជ័យ នៅថ្ងៃនេះ

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២១ ខែតុលានេះ បានអញ្ជើញជួបសំណេះសំណាល និងផ្តល់អំណោយបឋម ជាស្បៀងអាហារ និងថវិកាដល់ជនរងគ្រោះ ដោយជំនន់ទឹកភ្លៀង ជាង ១ ម៉ឺនគ្រួសារ នៅក្នុងឃុំបត់ត្រង់ និងឃុំឬស្សីក្រោក ក្នុងស្រុកមង្គលបុរី  ខេត្តបន្ទាយមានជ័យ។ សម្តេចតេជោ នៅតែបន្តដាក់ចេញបទបញ្ជា អោយអាជ្ញាធរ និងកងកម្លាំងគ្រប់ប្រភេទ ជួយសង្គ្រោះអាយុជីវិតប្រជាពលរដ្ឋ ជាអាទិភាពពីជំនន់ទឹកភ្លៀងដោយជម្លៀស មកកាន់ទីទួលមានសុវត្តិភាព ផ្តល់អាហារ និងការថែទំាសុខភាព ក៏ដូចជាជួយស្តារការខួចខាតរបស់ពលរដ្ឋឡើងវិញ ក្រោយទឹកជំនន់។ ដើម្បីលើកទឹកចិត្តប្រជាជន ក្រៅពីការផ្តល់អំណោយសម្រាលបន្ទុក និងការលំបាកបឋម ព្រមទាំងដោះស្រាយផលប៉ះពាល់ចំពោះមុខនៃជំនន់ទឹកភ្លៀង ក្នុងខេត្តបន្ទាយមានជ័យ សម្តេចតេជោ ក៏នឹងបន្តស្នាក់នៅក្នុងខេត្តជាប់ព្រំដែនថៃនេះ រហូតដល់ថ្ងៃសៅរ៍ ទី២៤ ខែតុលា ខាងមុខផងដែរ។រាយការណ៍៖ហ៊ុន ឌីណូ      រូបភាព៖ ឈាវ ថុកវីរៈ 

២២ តុលា ២០២០
រយៈពេល ២ ថ្ងៃ រដ្ឋមន្ត្រីសង្គមកិច្ច ជួបអ្នកទទួលផលពីកម្មវិធីឧបត្ថម្ភសាច់ប្រាក់ អំឡុងពេលប្រយុទ្ធនឹងជំងឺកូវីដ និងអ្នករងគ្រោះ ដោយទឹកជំនន់ ៨០០ គ្រួសារ

រយៈពេល ២ ថ្ងៃ រដ្ឋមន្ត្រីសង្គមកិច្ច ជួបអ្នកទទួលផលពីកម្មវិធីឧបត្ថម្ភសាច់ប្រាក់ អំឡុងពេលប្រយុទ្ធនឹងជំងឺកូវីដ និងអ្នករងគ្រោះ ដោយទឹកជំនន់ ៨០០ គ្រួសារ

រយៈពេល ២ ថ្ងៃ គឺថ្ងៃទី១៩ និងថ្ងៃទី២០ ខែតុលា ឆ្នាំ២០២០ នេះ រដ្ឋមន្ត្រីក្រសួងសង្គមកិច្ច បានចុះជួបសំណេះសំណាល សួរសុខទុក្ខ  ពិនិត្យមើលស្ថានភាពជីវភាពរបស់បងប្អូន អ្នកទទួលផលពីកម្មវិធីឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះអំឡុងពេលប្រយុទ្ធនឹងជំងឺកូវីដ ១៩ និងបងប្អូនដែលជាអ្នករងគ្រោះ ដោយទឹកជំនន់សរុបចំនួន ៨០០ គ្រួសារ នៅខេត្ត បាត់ដំបង ខេត្តបន្ទាយមានជ័យ និងខេត្តសៀមរាប។ ក្នុងដំណើរស្វែងយល់ពីសុខទុក្ខរបស់បងប្អូនប្រជាពលរដ្ឋ ជុំវិញបឹងទន្លេសាបនេះ ឯកឧត្តមរដ្ឋមន្ត្រី ក៏បាននាំយកទេយ្យទានប្រគេនព្រះសង្ឃ និងអំណោយចែកជូនបងប្អូនប្រជាពលរដ្ឋរងគ្រោះទាំងនោះផងដែរ។ សូមទស្សនាសេចក្តីរាយការណ៍របស់លោក ខឿន សាឃាង ពីខេត្តសៀមរាប៖  រាយការណ៍៖ ខឿន សាឃាង    រូបភាព៖ ឆិល សុភ័ស្ត 

២១ តុលា ២០២០
ព័ត៌មានជាតិផ្សេងទៀត

Copyright © 2016 PNN NEWS. All Rights Reserved.