ថ្ងៃសុក្រ ទី២២ ខែតុលា ឆ្នាំ២០២១

ព័ត៌មានជាតិ

សម្ដេចតេជោ ហ៊ុន សែន បញ្ជាក់ថា មិនមានការអនុញ្ញាតឱ្យរៀបចំអាពាហ៍ពិពាហ៍ឡើងវិញនោះឡើយ  

សម្ដេចតេជោ ហ៊ុន សែន បញ្ជាក់ថា មិនមានការអនុញ្ញាតឱ្យរៀបចំអាពាហ៍ពិពាហ៍ឡើងវិញនោះឡើយ  

     សម្ដេចតេជោ ហ៊ុន សែន បានបញ្ជាក់នៅថ្ងៃនេះថា មិនមានការអនុញ្ញាត ឱ្យរៀបចំអាពាហ៍ពិពាហ៍ឡើងវិញនោះឡើយ។ សារសំឡេងរបស់សម្ដេច ដែលត្រូវបានចែកចាយ តាមបណ្ដាញសង្គម នៅថ្ងៃនេះ គឺជាសារសំឡេងចាស់របស់សម្ដេច កាលពីខែវិច្ឆិកា ឆ្នាំ២០២០។ ការបញ្ជាក់របស់សម្ដេចតេជោ ហ៊ុន សែន ដូច្នេះ បានធ្វើឡើងតាមរយៈការផ្សាយរបស់បណ្ដាញព័ត៌មាន Fresh News នារសៀលថ្ងៃទី២១ ខែតុលានេះ។  តាមការចុះផ្សាយដដែល នៅថ្ងៃនេះ មានបងប្អូនប្រជាពលរដ្ឋ និងសារព័ត៌មានជាច្រើននាក់ បានចែកចាយសារសំឡេងរបស់សម្តេចតេជោ ហ៊ុន សែន ដែលមានរយៈពេលជិត ១នាទី នៅតាមបណ្ដាញសង្គម ដូចជា Facebook និង Telegram ពីការអនុញ្ញាត ឱ្យប្រជាពលរដ្ឋអាចរៀបចំអាពាហ៍ពិពាហ៍ឡើងវិញបាន ដែលធ្វើឱ្យមានការយល់ច្រឡំ ពីព្រោះសារសំឡេងនេះ គឺជាសារសំឡេងតាំងពីខែវិច្ឆិកា ឆ្នាំ២០២០ មកម្ល៉េះ។  តាមការចុះផ្សាយ រហូតមកដល់ពេលនេះ រាជរដ្ឋាភិបាលកម្ពុជា មិនទាន់បានប្រកាសបើកដំណើរការប្រទេសជាតិឡើងវិញទាំងមូលនោះឡើយ ពោលគឺគ្រាន់តែឱ្យអាជ្ញាធរតាមរាជធានី-ខេត្ត បើកដំណើរការលើសកម្មភាពសេដ្ឋកិច្ចមួយផ្នែក ពាក់ព័ន្ធនឹងអាជីវកម្មដែលមានហានិភ័យទាប នៃការចម្លងជំងឺកូវីដ១៩ ជាមួយនឹងការរឹតបន្ដឹងលើវិធានការសុខាភិបាល។  កាលពីប៉ុន្មានថ្ងៃមុន នៅរាជធានីភ្នំពេញ អាជ្ញាធរបានអនុញ្ញាតឱ្យអាជីវកម្មមួយចំនួន ដែលមានហានិភ័យទាប នៃការចម្លងជំងឺកូវីដ-១៩ អាចបើកដំណើរការឡើងវិញ។ ប៉ុន្តែអាជីវកម្មមួយចំនួនទៀត ដូចជា ក្លិបកម្សាន្ត រោងភាពយន្ត ខារ៉ាអូខេ និងឌីស្កូតែកជាដើម នៅមិនទាន់អនុញ្ញាតឱ្យដំណើការនោះឡើយ៕   អត្ថបទ៖ លី ម៉េងហួរ    រូបភាព៖ ឯកសារ   

២១ តុលា ២០២១
ជប៉ុន ផ្តល់កម្ចីបន្ថែមប្រមាណ ៥៨លានដុល្លារអាមេរិក សម្រាប់គម្រោងផ្គត់ផ្គង់ទឹកស្អាត នៅខេត្តសៀមរាប

ជប៉ុន ផ្តល់កម្ចីបន្ថែមប្រមាណ ៥៨លានដុល្លារអាមេរិក សម្រាប់គម្រោងផ្គត់ផ្គង់ទឹកស្អាត នៅខេត្តសៀមរាប

 កិច្ចព្រមព្រៀងឥណទាន សម្បទានបន្ថែម សម្រាប់គម្រោងពង្រីកសមត្ថភាពផ្គត់ផ្គង់ទឹកស្អាតសៀមរាប ក្នុងទឹកប្រាក់ចំនួន ៦ ៣៣៦លានយ៉េន ស្មើប្រមាណ ៥៨លានដុល្លារអាមេរិក ត្រូវបានចុះហត្ថលេខា កាលពីព្រឹកថ្ងៃទី២១ ខែតុលានេះ។ ពិធីចុះហត្ថលេខាតាមប្រព័ន្ធ Video Conference លើកិច្ចព្រមព្រៀង ធ្វើឡើងដោយឯកឧត្តម ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកស្រី កាម៉ី ហារុកូ ( KAMEI Haruko ) ប្រធានទីភ្នាក់ងារសហប្រតិបត្តិការនៃប្រទេសជប៉ុន ប្រចាំនៅកម្ពុជា។សេចក្ដីប្រកាស លើកឡើងថា គម្រោងពង្រីកសមត្ថភាពផ្គត់ផ្គង់ទឹកស្អាតសៀមរាប មានទិសដៅសាងសង់រោងចក្រផលិតទឹកស្អាតមួយ ដែលមានសមត្ថភាពផលិតទឹកស្អាតបាន ៦ម៉ឺនម៉ែត្រគូប ក្នុង១ថ្ងៃ ដោយយកប្រភពទឹកពីបឹងទន្លេសាប។ ក្នុងនោះ មានការសាងសង់ប្រព័ន្ធបណ្តាញស្ថានីយបូមទឹក សាងសង់ប្រព័ន្ធចែកចាយទឹក និងសាងសង់រោងចក្រប្រព្រឹត្តកម្មទឹកស្អាត។ គម្រោងនេះ នឹងដើរតួនាទីយ៉ាងសំខាន់ ក្នុងការផ្គត់ផ្គង់ និងចែកចាយប្រព័ន្ធទឹកស្អាតជូនដល់ប្រជាពលរដ្ឋ ទូទាំងក្រុងសៀមរាប។ សេចក្តីប្រកាស លើកឡើងថា កិច្ចព្រមព្រៀងឥណទានសម្បទាន ដែលត្រូវបានចុះហត្ថលេខា នៅពេលនេះ គឺជាឯកសារគតិយុត្តិមួយទៀត បន្ទាប់ពីលិខិតប្តូរសារ ដែលបានចុះហត្ថលេខា កាលពីថ្ងៃទី១១ ខែតុលា ឆ្នាំ២០២១ កន្លងទៅ រវាងក្រសួងការបរទេស និងសហប្រតិបត្តិការអន្តរជាតិកម្ពុជា និងស្ថានទូតជប៉ុនប្រចាំនៅកម្ពុជា។ តាមសេចក្តីប្រកាស សមិទ្ធផល ដែលទទួលបានពីគម្រោងនេះ នឹងចូលរួមចំណែកយ៉ាងសំខាន់ ក្នុងការជួយដល់រាជរដ្ឋាភិបាលកម្ពុជា ឲ្យសម្រេច «ផែនការយុទ្ធសាស្ត្រអភិវឌ្ឍន៍ជាតិ» លើវិស័យផ្គត់ផ្គង់ទឹកស្អាត តាមរយៈការគាំទ្រដល់រដ្ឋាករទឹកស្វយ័តសៀមរាប ដែលឆ្លើយតបយ៉ាងជាក់ច្បាស់ទៅនឹងសេចក្តីត្រូវការជាអាទិភាពរបស់កម្ពុជា ក្នុងការពង្រីកប្រព័ន្ធផ្គត់ផ្គង់ទឹកស្អាត ស្របទៅនឹងមុំទី១ នៃចតុកោណទី៤ ដូចមានចែងក្នុងឯកសារយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាលកម្ពុជា។  សេចក្តីប្រកាសដដែល លើកឡើងថា ក្នុងនាមជាដៃគូអភិវឌ្ឍន៍ដ៏សំខាន់មួយ នៅក្នុងវិស័យផ្គត់ផ្គង់ទឹកស្អាត រដ្ឋាភិបាលជប៉ុន តាមរយៈ JICA តែងតែប្រកាន់ភ្ជាប់នូវវិធីសាស្ត្រអភិវឌ្ឍន៍ ដែលមានលក្ខណៈគ្រប់ជ្រុងជ្រោយ ក្នុងការពង្រឹងពង្រីកភាពជាដៃគូ ជាយុទ្ធសាស្ត្ររយៈពេលវែង ជាមួយរាជរដ្ឋាភិបាលកម្ពុជា ដើម្បីឲ្យប្រជាជនគ្រប់រូប ទទួលបាននូវទឹកស្អាត និងមានសុវត្ថិភាពប្រើប្រាស់។  ស្ថិតក្នុងបរិការណ៍នៃការរីករាលដាលនៃជំងឺកូវីដ១៩ ថ្មីៗនេះ រដ្ឋាភិបាលជប៉ុន ទើបតែបានបន្តសន្យាផ្តល់ហិរញ្ញប្បទានឥតសំណង ដែលមានទឹកប្រាក់ ១៦០០លានយ៉េន ស្មើនឹងជាង ១៤លានដុល្លារអាមេរិក សម្រាប់កម្មវិធីអភិវឌ្ឍន៍សេដ្ឋកិច្ច និងសង្គម ដល់រាជរដ្ឋាភិបាលកម្ពុជា៕  អត្ថបទ៖ លី ម៉េងហួរ    រូបភាព៖ ឯកសារ  

២១ តុលា ២០២១
នាវាកងទ័ពជើងទឹក អូស្ត្រាលីបានចាកចេញពីកំពង់ផែក្រុងព្រះសីហនុវិញហើយ ក្រោយបញ្ចប់ទស្សនកិច្ច៣ថ្ងៃនៅកម្ពុជា 

នាវាកងទ័ពជើងទឹក អូស្ត្រាលីបានចាកចេញពីកំពង់ផែក្រុងព្រះសីហនុវិញហើយ ក្រោយបញ្ចប់ទស្សនកិច្ច៣ថ្ងៃនៅកម្ពុជា 

នាវាHMAS Anzac 150 របស់កងទ័ពជើងទឹក អូស្ត្រាលីប្រចាំតំបន់ឥណ្ឌូប៉ាសុីហ្វិក បានចាកចេញពីកំពង់ផែក្រុងព្រះសីហនុវិញហើយ នៅព្រឹកថ្ងៃទី២០ ខែតុលា ឆ្នាំ២០២១ ក្រោយបញ្ចប់ទស្សនកិច្ចនៅកម្ពុជារយៈពេល៣ថ្ងៃ ជាមួយនឹងការនាំយកនូវសម្ភារៈវេជ្ជសាស្ត្រ ប្រយុទ្ធប្រឆាំងកូវីដ១៩ឧបត្ថម្ភដល់កម្ពុជាផង។លោកឧត្តមនាវីទោ រស់ វាសនា មេបញ្ជាការរងមូលដ្ឋានសមុទ្រ កងទ័ពជើងទឹក នៃកងយោធពលខេមរភូមិន្ទ បានដឹកនាំនាយនាវី នាយនាវីរង ជូនដំណើរនិវត្តន៍របស់នាវាHMAS Anzac 150 កងទ័ពជើងទឹក អូស្ត្រាលីពេលចាកចេញពីកំពង់ផែក្រុងព្រះសីហនុ។ សុំបញ្ជាក់ថា នាវាចំបាំងកងទ័ពជើងទឹកអូស្ត្រាលី០១គ្រឿងដឹកនាំដោយលោក ឧត្តមនាវីត្រី Mal Wise មេបញ្ជាការនាវា ឥណ្ឌូ ប៉ាស៊ីហ្វិក នៃកងទ័ពជើងទឹកអូស្ត្រាលី បានចូលចតនៅកំពង់ផែស្វយត័ក្រុងព្រះសីហនុ កាលព្រឹកថ្ងៃ១៨តុលា២០២១ ដើម្បីបំពេញទស្សនកិច្ចជាមិត្តភាពនៅកម្ពុជា រយៈពេល៣ថ្ងៃ  ចាប់ពីថ្ងៃទី ១៨តុលា ដល់ ថ្ងៃទី២០តុលា២០២១ ក្នុងនយ័រឹតចំណងសាមគ្គីភាព មិត្តភាពរវាងកងទ័ពជើងទឹកប្រទេសទាំងពីរ កម្ពុជា និងអូស្ត្រាលី និងបាននាំយកនូវសម្ភារៈវេជ្ជសាស្ត្រប្រយុទ្ធប្រឆាំងមេរោគកូវីដ-១៩ ពីអូស្ត្រាលីឧបត្ថម្ភដល់ប្រទេសកម្ពុជាផងដែរ។  ជំនួយវេជ្ជសាស្ត្រ ប្រយុទ្ធប្រឆាំងមេរោគកូវីដ-១៩ ដែលប្រទេសអូស្ត្រាលីជូនដល់កម្ពុជានេះ បានផ្តល់ជូនដល់រដ្ឋបាលខេត្តព្រះសីហនុ ,អង្គភាពកងទព័ជើងទឹកមូលដ្ឋានសមុទ្ររាម, យោធភូមិភាគទី៤ និងទី៥ កងទព័ជើងគោក នៃកងយោធពលខេមរភូមិន្ទ។  អត្ដបទ និង រូបភាព៖ ហ៊ុយ ប៊ុនឡេង

២០ តុលា ២០២១
សម្តេចវិបុលសេនាភក្តី សាយ ឈុំ  អញ្ជើញជាអធិបតី ក្នុងពិធីប្រកាសតែងតាំង ឯកឧត្តម ស្វាយ សំអ៊ាង ជាប្រធានគណៈកម្មាធិការគណៈបក្សប្រជាជនកម្ពុជាខេត្តស្ទឹងត្រែង 

សម្តេចវិបុលសេនាភក្តី សាយ ឈុំ  អញ្ជើញជាអធិបតី ក្នុងពិធីប្រកាសតែងតាំង ឯកឧត្តម ស្វាយ សំអ៊ាង ជាប្រធានគណៈកម្មាធិការគណៈបក្សប្រជាជនកម្ពុជាខេត្តស្ទឹងត្រែង 

ស្ទឹងត្រែង ៖ នៅថ្ងៃទី១៩ ខែតុលា ឆ្នាំ២០២១ សម្តេចវិបុលសេនាភក្តី សាយ ឈុំ អនុប្រធានគណបក្ស និងជាប្រធានគណៈប្រចាំការ នៃគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធីផ្ទេរតំណែង ឯកឧត្តម ស្វាយ សំអ៊ាង ប្រធានគណៈកម្មាធិការគណៈបក្សប្រជាជនកម្ពុជាខេត្តមណ្ឌលគីរី មកជាប្រធានគណៈកម្មាធិការគណៈបក្សប្រជាជនកម្ពុជាខេត្តស្ទឹងត្រែងជំនួស ឯកឧត្តម ម៉ុម សារឿន ដែលត្រូវតែងតាំងជាអនុប្រធានក្រុមការងារ គណបក្សប្រជាជនកម្ពុជាចុះជួយមូលដ្ឋានខេត្តរតនគិរី ដែលនឹងត្រូវទទួលភារកិច្ចថ្មី ។  ឯកឧត្តម ស្វាយ សំអ៊ាង ប្រធានគណៈកម្មាធិការគណៈបក្សប្រជាជនកម្ពុជាខេត្តស្ទឹងត្រែង បានប្ដេជ្ញាថា ឯកឧត្តម នឹងខិតខំប្រឹងប្រែង បំពេញការងារ ឱ្យបានល្អខិតខំធ្វើការអភិវឌ្ឍ រីកចម្រើន និងអភិវឌ្ឍន៍ថ្មីៗ បន្ថែមទៀត ស្របតាមគោលការណ៍ដឹកនាំចង្អុលបង្ហាញ និងរាល់ការផ្ដល់នូវអនុសាសន៍ដ៏ខ្ពង់ខ្ពស់ របស់ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និង ថ្នាក់ដឹកនាំគណបក្សប្រជាជនកម្ពុជា ដើម្បីពង្រឹងការគ្រប់គ្រងដឹកនាំគណបក្សខេត្តនិងអង្គការចាត់តាំងគណបក្សគ្រប់លំដាប់ថ្នាក់ប្រកបដោយការទទួលខុសត្រូវនិងប្រសិទ្ធភាពខ្ពស់។   មានប្រសាសន៍ក្នុងឱកាសនោះសម្តេចវិបុលសេនាភក្តី សាយ ឈុំ បានលើកសរសើរដល់ស្នាដៃអភិវឌ្ឍន៍របស់ ឯកឧត្តម ម៉ុម សារឿន  ដែលបានធ្វើឱ្យខេត្តស្ទឹងត្រែង មានការរីកចម្រើន គួរកត់សំគាល់ ជាមួយគ្នានេះដែរសម្តេចវិបុលសេនាភក្តី ក៍បានផ្តាំផ្ញើ ឯកឧត្តម ស្វាយ សំអ៊ាង ដែលចូលមកកាន់តំណែងជាប្រធានគណៈកម្មាធិការគណៈបក្សប្រជាជនកម្ពុជាខេត្តស្ទឹងត្រែង  ត្រូវបន្តការងារខិតខំប្រឹងប្រែងធ្វើឲ្យខេត្តស្ទឹងត្រែង កាន់តែមានការរីកចម្រើនជាបន្តទៀត ។  ក្នុងនោះដែរ សម្តេចវិបុលសេនាភក្តី សាយ ឈុំ បានផ្តោតសំខាន់ទៅលើការដឹកនាំចំពោះមុខត្រូវក្តាប់ឱ្យជាប់នូវលក្ខន្តិកៈបក្ស កម្មវិធីនយោបាយគោលការណ៍ គោលនយោបាយ និងសេចក្តីសម្រេចរបស់បក្ស ច្បាប់របស់រដ្ឋ ចាត់តាំងអនុវត្តន៍ឱ្យបានត្រឹមត្រូវ និងត្រូវប្រកាន់ភ្ជាប់នូវគោលការណ៍ជាមូលដ្ឋាន សមូហភាពដឹកនាំបុគ្គលទទួលខុសត្រូវភាគតិចគោរពភាគច្រើន។ ដោយដឹកនាំល្អត្រូវគិតគូរខាងអាកប្បកិរិយា ពាក្យសម្តីសុភាពរាបសារចាស់ទុំនយោបាយ តែត្រូវម៉ឺងម៉ាត់ខាងគោលជំហរ។ ឆ្លៀតក្នុងឱកាសនោះ សម្តេចវិបុលសេនាភក្តី សាយ ឈុំ ក៏បានផ្តាំផ្ញើឱ្យជម្រុញសមាជិក សមាជិការបស់បក្ស ពិនិត្យបញ្ជីឈ្មោះបោះឆ្នោត ធ្វើអត្តសញ្ញាណប័ណ្ណដល់អ្នកដែលគ្រប់អាយុ ដើម្បីឈានទៅរកភាពជោគជ័យទៅថ្ងៃខាងមុខ។នឹងជំរុញដល់សមាជិក សមាជិកា នៃក្រុមការងារគណបក្សចុះមូលដ្ឋានតាម ភូមិ ឃុំ ស្រុក ក្រុង ធ្វើយ៉ាងសហការសាមគ្គីគ្នាឱ្យបានល្អ រក្សាឱ្យបានសមាជិកចាស់ ហើយបន្តពង្រីកកំលាំងថ្មីឱ្យមានការគាំទ្រគោលនយោបាយគណបក្សប្រជាជនកម្ពុជាកាន់តែច្រើន និងត្រូវរៀបចំផែនការសកម្មភាពដើម្បីសម្រេចឱ្យបាននូវគោលនយោបាយរបសគណបក្ស និងរាជរដ្ឋាភិបាល ជាពិសេសត្រូវដោះស្រាយសំណូមពរចាំបាច់ និងបំរើសេវាជូនប្រជាពលរដ្ឋឱ្យបានទាន់ពេលវេលាតាមជំនាញ និងតួនាទីភារកិច្ចរបស់ខ្លួន ៕  អត្ថបទ និង រូបភាព៖ ឡន វណ្ណា  

២០ តុលា ២០២១
សមត្ថកិច្ចបង្រ្កាបបទល្មើសគ្រឿងញៀន បានជាង ៤០០ករណី ចាប់ខ្លួនជនសង្ស័យជាង ១ពាន់នាក់ ក្នុងខែកញ្ញា

សមត្ថកិច្ចបង្រ្កាបបទល្មើសគ្រឿងញៀន បានជាង ៤០០ករណី ចាប់ខ្លួនជនសង្ស័យជាង ១ពាន់នាក់ ក្នុងខែកញ្ញា

 ក្នុង១ខែកញ្ញាកន្លងទៅនេះ សមត្ថកិច្ចកម្ពុជា បានប្រតិបត្តិការបង្ក្រាបបទល្មើសគ្រឿងញៀនទូទាំងប្រទេសបានសរុបជាង ៤០០ករណី ក្នុងនោះជាប់ខ្លួនជនសង្ស័យជាង១ពាន់នាក់។ រដ្ឋមន្រ្តីក្រសួងមហាផ្ទៃបានបង្ហោះព័ត៌មានជូនជនរួមជាតិលើបណ្ដាញសង្គម និងជំរុញឱ្យមន្រ្តីរួមទាំងពលរដ្ឋបន្តចូលរួមអនុវត្តទិសស្លោក ៣កុំ ១រាយការណ៍ ដើម្បីប្រយុទ្ធប្រឆាំងនឹងគ្រឿងញៀន។ ក្នុងកិច្ចប្រតិបត្តិការបង្ក្រាបគ្រឿងញៀន ក្នុងខែកញ្ញា ឆ្នាំ២០២១ សមត្ថកិច្ចបង្ក្រាបបានបទល្មើសគ្រឿងញៀនសរុបចំនួន៥៣៩ករណី ធៀបនឹងខែសីហា ឆ្នាំ២០២១ មាន៤៤០ករណី កើនលើស៩៩ករណី ស្មើនឹង២២,៥ភាគរយ។  ព័ត៌មាននេះត្រូវបានសម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បង្ហោះលើផេកហ្វេសប៊ុកផ្លូវការដូចដែលធ្លាប់ជារៀងរាល់ខែ។ បើតាមសម្ដេច សមត្ថកិច្ចបានចាប់យកគ្រឿងញៀនសរុបចំនួនជាង២៦គីឡូក្រាម ធៀបនឹងខែសីហា ឆ្នាំ២០២១ មានជាង៥៧គីឡូក្រាម ថយចុះជាង៣១គីឡូក្រាម ស្មើនឹងជាង៥៤ភាគរយ។ គ្រឿងញៀនបង្ក្រាបបានរួមមាន មេតំហ្វេតាមីនក្រាមម្សៅ ជាង១៣គីឡូក្រាម មេតំហ្វេតាមីនគ្រាប់ជាង១៣១ក្រាម អ៊ិចស្តាស៊ីជាង៨គីឡូក្រាម កេតាមីនជាង១គីឡូក្រាម Nimetazepam ជាង១គីឡូក្រាម សាធាតុគីមីផ្សំជាង៤គីឡូក្រាម និងកញ្ឆាស្ងួតជាង៤គីឡូក្រាម។ ក្នុងចំណោមបទល្មើសគ្រឿងញៀននោះ មានករណីជួញដូរ រក្សាទុក៤៦៣ករណី ករណីប្រើប្រាស់៧៥ករណី ករណីសំយោគ កែច្នៃ១ករណី និងបានឃាត់ខ្លួនជនសង្ស័យសរុបចំនួន១០៣៩នាក់ ស្រី៧៣នាក់ ធៀបនឹងខែសីហា ឆ្នាំ២០២១ មាន៨៦១នាក់ កើនលើស១៧៨នាក់ ស្មើនឹង២០,៦ភាគរយ ក្នុងនោះជនស្ស័យជួញដូរ រក្សាទុក៨៣២ករណី ជនសង្ស័យប្រើប្រាស់គ្រឿងញៀន២០៥នាក់ ជនសង្ស័យសំយោគ កែច្នៃ២នាក់។ មានជនបរទេស៤១នាក់ស្ថិតក្នុងចំណោមជនសង្ស័យទាំងនោះដែរ។សម្ដេចបានបន្តថា ក្នុងចំណោមបទល្មើសគ្រឿងញៀន៥៣៩ករណីនោះ ករណីគ្រឿងញៀនធំៗដែលមានប្រភពចរាចរណ៍ឆ្លងកាត់តាមច្រកព្រំដែនគោកក្នុងភូមិសាស្រ្តរាជធានីភ្នំពេញ ត្រូវបានសមត្ថកិច្ចជំនាញស្រាវជ្រាវឃើញ និងបង្ក្រាបបានចាប់ពី១គីឡូក្រាមឡើងទៅមានចំនួន៤ករណី ស្មើនឹង៤ក្រុម ឃាត់ខ្លួនជនសង្ស័យ៦នាក់ និងរឹបអូសគ្រឿងញៀនសរុបបានជាង១៦គីឡូក្រាម និងសាធាតុគីមីផ្សំបានជង៤គីឡូក្រាម។នៅក្នុងខែកញ្ញានោះដែរ សមត្ថកិច្ចក៏បានអនុវត្តវិធានការរដ្ឋបាលបានចំនួន១៣១លើក បានអញ្ជើញម្ចាស់អាជីវកម្ម និងអ្នកពាក់ព័ន្ធមកស្ដាប់ការណែនាំចំនួន២៨លើក ស្មើនឹង៦៥៧នាក់ ចុះអប់រំម្ចាស់ទីតាំងអាជីវកម្មចំនួន១០៣លើក និង១គោលដៅ ចុះធ្វើតេស្តរកសាធាតុញៀនក្មេងទំនើង ជនមានតម្រុយប្រើប្រាស់គ្រឿងញៀន និងឆ្មក់ត្រួតពិនិត្យអ្នកបើកបររថយន្តដឹកទំនិញ ដឹកកម្មករ ដឹកអ្នកដំណើរ បុគ្គលិកកំសាន្ត កាស៊ីណូ សណ្ឋាគារ ខារ៉ាអូខេ សរុប៥០លើក ស្មើនឹង១៣៤នាក់ រកឃើញអ្នកផ្ទុកសាធាតុញៀន៤៨នាក់យកទៅទទួលសេវាបន្សាប និងព្យាបាល។ក្នុងនាមសម្ដេចអគ្គមហាសេនាបតីតេជោនាយករដ្ឋមន្រ្តីនៃកម្ពុជា ក្នុងនាមក្រសួងមហាផ្ទៃ និងក្នុងនាមជាប្រធានយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៦ សម្ដេចឧបនាយករដ្ឋមន្រ្តីបានសម្ដែនូវការកោតសរសើរ និងការលើកទឹកចិត្តខ្ពស់ ជូនចំពោះថ្នាក់ដឹកនាំ និងមន្រ្តីពាក់ព័ន្ធទាំងអស់ ទាំងស៊ីវិល នគរបាល និងកងរាជអាវុធហត្ថ ដែលបានរួមសហការគ្នាយ៉ាល្អក្នុងកិច្ចប្រតិបត្តិការបង្ក្រាបគ្រឿងញៀន ដើម្បីរួមចំណែកការពារសន្តិសុខ សណ្ដាប់ធ្នាប់សាធារណៈ សុវត្ថិភាពសង្គម ជូនជាតិ និងប្រជាជន។ពាក់ព័ន្ធនឹងបញ្ហាគ្រឿងញៀននេះដែរ នៅក្នុងការថ្លែងសុន្ទកថាជាបន្តបន្តាប់ សម្ដេចក្រឡាហោមបានកត់សំគាល់ថាបញ្ហាគ្រឿងញៀននៅតែជាបញ្ហាអាទិភាពត្រូវដោះស្រាយដើម្បីសេចក្ដីសុខ សុវត្ថិភាព និងអនាគតកូនចៅប្រជាពលរដ្ឋ។ បើតាមសម្ដេចបញ្ហាកូវីដ-១៩គង់មានថ្ងៃបញ្ចប់នៅថ្ងៃណាមួយ ក៏ប៉ុន្តែបញ្ហាគ្រឿងញៀននេះនឹងនៅតែបន្តយាយីសង្គមប្រសិនបើមិនរួមគ្នាទប់ស្កាត់។ ថ្មីម្ដងទៀត សម្ដេចបានបន្តផ្ញើសារជូនជនរួមជាតិ គ្រប់មជ្ឈដ្ឋានសង្គម និងកម្លាំងអនុវត្តច្បាប់ទាំងអស់ សូមចូលរួមគាំទ្រ និងអនុវត្តពាក្យស្លោកជាតិ ៣ការពារ ១រាយការណ៍ គឺ កុំពាក់ព័ន្ធ កុំអន្តរាគមន៍ កុំលើកលែង  និងត្រូវរាយការណ៍ ផ្តល់ព័ត៌មាន ដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃផលិតនិងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ច៕  អត្ថបទ៖ រ៉េន រតនៈ  រូបភាព៖ ឯកសារ  

២០ តុលា ២០២១
មន្ត្រីធម្មការថា ទោះជាក្នុងសម័យកាលកូវីដ ក៏ព្រះសង្ឃ នៅតែចូលរួមការងារសង្គមយ៉ាងសកម្មដែរ

មន្ត្រីធម្មការថា ទោះជាក្នុងសម័យកាលកូវីដ ក៏ព្រះសង្ឃ នៅតែចូលរួមការងារសង្គមយ៉ាងសកម្មដែរ

បើទោះបីជាកម្ពុជា ត្រូវបានរាតត្បាតញាំញីដោយជំងឺកូវីដ-១៩ ក៏ដោយ ក៏ព្រះសង្ឃ នៅរាជធានីភ្នំពេញ នៅតែចូលរួមការងារសង្គមយ៉ាងសកម្មដែរ ដូចជាជួយអប់រំផ្សព្វផ្សាយអំពីរបៀបការពារជំងឺកូវីដ-១៩ និងបរិច្ចាកគ្រឿងឧបភោគ បរិភោគ ដល់ប្រជាជនដែលជួបក្តីខ្វះខាត ដល់កាកបាទក្រហម ក៏ដូចជាដល់អាជ្ញាធរ មានអាជ្ញាធរខណ្ឌសង្កាត់ និងពេលមានគ្រោះធម្មជាតិ ដូចជាគ្រោះទឹកជំនន់ជាដើម ។ នេះគឺជាការលើកឡើងរបស់លោក ទេព គង្គា ប្រធានមន្ទីរធម្មការ និងសាសនា រាជធានីភ្នំពេញ នាឱកាសចូលរួមក្នុងពិធីប្រគេនប្រកាសនីយបត្រដល់មន្ត្រីសង្ឃ សាលាអនុគណខណ្ឌដង្កោ នាព្រឹកថ្ងៃទី១៨ ខែតុលា ឆ្នាំ២០២១ នេះ ។  ជាការកត់សម្គាល់ ជារៀងរាល់ឆ្នាំ បន្ទាប់ពីពិធីបុណ្យទានធំៗ ដូចជាបុណ្យចូលឆ្នាំខ្មែរ និង បុណ្យភ្ជុំបិណ្ឌ ជាដើមទៅ វត្តអារាមនានា តែងតែបិរច្ចាគទេយ្យទានដល់ ស្ថាប័នមនុស្សធម៌នានា ដូចជាកាកបាទក្រហម មណ្ឌលកុមារកំព្រា មន្ទីរពេទ្យ និង ពន្ធនាគារជាដើម ។ ដោយឡែកបន្ទាប់ពីបុណ្យភ្ជុំបិណ្ឌ នាឆ្នាំ២០២១ នេះ លោក ទេព គង្គា បានកត់សម្គាល់ថា មានវត្តតែប្រមាណជា ១០ ភាគរយប៉ុណ្ណោះ បើធៀបទៅនឹងបណ្តាឆ្នាំធម្មតា ដែលបានបរិច្ចាគទេយ្យទានអត្ថបបរិក្ខាដល់កាកបាទក្រហមជាដើម ។  ក៏គប្បីរំឭកផងដែរថា បច្ចុប្បន្ននេះ ក្នុងចំណោមវត្តទាំង ២៤ នៅក្នុងខណ្ឌដង្កោ មានវត្តយ៉ាងហោចណាស់ចំនួន ៥  ដែលកំពុងប្រឈមនឹងទឹកជំនន់ កៀកនឹងចូលដល់គ្រាអាសន្ន ហើយជាផ្នែកមួយ នៃ ការត្រៀបង្ការទឹកជំនន់នោះ សាលាអនុគណខណ្ឌដង្កោ ទទួលបានគ្រឿងឧបភោគ បរិភោគមួយចំនួនពីបណ្តាវត្តនានាដែលមិនប្រឈមនឹងទឹកជំនន់ និង មានលទ្ធភាព មានអង្គរ មី ត្រីខ ទឹកត្រី ទឹកស៊ីអ៊ីវជាដើម ទៅតម្កល់ទុកនៅក្នុងសាលាអនុគណខណ្ឌបណ្តើរៗហើយ ហើយព្រះភិក្ខុ ចឹក ចុន ព្រះអនុគណខណ្ឌដង្កោ បានមានព្រះសង្ឃដីកាថា ទាំងសាលាអនុគណខណ្ឌដង្កោ ក៏ដូចជាព្រះសង្ឃដែលគង់នៅតាមបណ្តាវត្តទាំងឡាយ ដែលកំពុងប្រឈមនោះ បាន និង កំពុងតាមដានយ៉ាងយកចិត្តទុកដាក់អំពីស្ថានភាពទឹក ហើយសាលាអនុគណខណ្ឌ នឹងធ្វើអន្តរាគមន៍ភ្លាម ប្រសិនបើមានវត្តណាមួយ ចូលដល់គ្រាអាសន្នទឹកជំនន់ ឬ មានបញ្ហាខ្វះចង្ហាន់ ។ ទោះយ៉ាងណា រហូតមកដល់ពេលនេះ មិនទាន់មានវត្តណាមួយក្នុងខណ្ឌដង្កោ មានបញ្ហាខ្វះចង្ហាន់នៅឡើយទេ ។ នេះបើតាមការអះអាងរបស់ព្រះភិក្ខុ ចឹក ចុន ។ ស្រដៀងគ្នានេះដែរ លោក ទេព គង្គា បានអះអាងក្នុងក្របខណ្ឌរាជធានីភ្នំពេញទាំងមូលថា មិនទាន់មានវត្តណាមួយមានបញ្ហាខ្វះចង្ហាន់នៅឡើយដែរ ហើយថាប្រសិនបើវត្តអារាម ឬ វិហារសាសនាណាមួយក៏ដោយ មានបញ្ហាចង្ហាន់ ឬ ស្បៀងអាហារនោះ សូមជូនដំណឹងដល់អាជ្ញាធរមូលដ្ឋាន មានសង្កាត់ និង ខណ្ឌជាដើម ឬ ជូនដំណឹងទៅមន្ទីរធម្មការ និងសាសនារាជធានីភ្នំពេញដោយផ្ទាល់តែម្តងក៏បាន ៕   អត្ថបទ៖ ខឿន សាឃាង​   រូបភាព៖ ឆិល សុភ័ស្ត

១៩ តុលា ២០២១
ជំនន់ទឹកភ្លៀង ថមថយនៅបាត់ដំបង តែគំរាមកំហែងនៅរតនគិរី ខណៈទឹកទន្លេមេគង្គ បន្តហក់ឡើង

ជំនន់ទឹកភ្លៀង ថមថយនៅបាត់ដំបង តែគំរាមកំហែងនៅរតនគិរី ខណៈទឹកទន្លេមេគង្គ បន្តហក់ឡើង

គិតត្រឹមថ្ងៃម្សិញមិញនេះ ស្ថានភាពជំនន់ទឹកភ្លៀង នៅស្ទឹងសង្កែខេត្តបាត់ដំបង បានថមថយឥទ្ធិពលទៅវិញហើយ។ នេះបើតាមការប្រកាសរបស់រដ្ឋបាលខេត្តបាត់ដំបង។ យ៉ាងណាក៏ដោយ ជំនន់ទឹកភ្លៀង បានធ្វើឱ្យទឹកទន្លេស្រែពក ក្នុងខេត្តរតនគិរី ហក់ឡើង រហូតលើកម្រិតប្រកាសអាសន្ន។ ទន្លេមេគង្គឯណោះវិញ ទឹកនៅតែបន្តហក់ឡើង។  ជំនន់ទឹកភ្លៀងដែលធ្វើឱ្យទឹកស្ទឹងសង្កែឡើងខ្ពស់រហូតលិចលង់តំបន់មួយចំនួនក្នុងក្រុងបាត់ដំបង បានថមថយឥទ្ធិពលទៅវិញហើយ។ ស្ថានភាពទឹកស្ទឹងសង្កែបានស្រុកចុះមកនៅត្រឹមកម្រិតធម្មតាវិញតាំងតែពីយប់ថ្ងៃទី១៧ ខែតុលាម្សិលមិញមកម្លេះ។ នេះបើតាមការបង្ហោះឱ្យដឹងដោយរដ្ឋបាលខេត្តបាត់ដំបងលើបណ្ដាញសង្គមហ្វេសប៊ុក។  យ៉ាងណាក៏ដោយ សម្រាប់ក្រុងបាត់ដំបង បើទោះបីជាទឹកស្ទឹងសង្កែបានស្រកចុះក៏ពិតមែន ប៉ុន្តែទឹកដែលឡើងជនលិចតំបន់មួយចំនួននាប៉ុន្មានថ្ងៃមកនោះ មានសភាពស្រុកចុះយឺតជាងទឹកស្ទឹង ដោយសារតែប្រព័ន្ធលូរំដោះទឹកមានសភាពតូច និងលាយឡំដោយដី និងសំរាម។ អភិបាលខេត្តបាត់ដំបង ឯកត្តម សុខ លូ ដែលទើបចូលកាន់តំណែងកាលពីសប្ដាហ៍មុននោះបានប្រកាសថានឹងដោះស្រាយបញ្ហានេះមិនឱ្យមានសម្រាប់ឆ្នាំក្រោយទៀតនោះឡើយ។ងាកទៅមើលរតនគិរីឯណោះវិញ ទឹកទន្លេស្រែពកដែលបានហក់ឡើងនាប៉ុន្មានថ្ងៃមកហើយនោះ ឥលូវនេះបានជនឡើងលើសកម្រិតប្រកាសអាសន្នហើយ។ បើតាមលោក អ៊ុ វណ្ណា ប្រធានមន្ទីរធនធានទឹក និងឧតុនិយមខេត្តរតនគិរី ជំនន់នេះលើសកម្រិតប្រកាសអាសន្នននេះរួមទាំងទន្លេសេសាន្តផងដែរ ហើយទឹកបានជនលិចតំបន់មួយចំនួនតាមដងទន្លេក្នុងភូមិសាស្ត្រស្រុកកូនមុំ ស្រុកលំផាត់ ស្រុកតាវែង ស្រុកវ៉ៃនសៃ និងស្រុកអណ្ដូងមាសា។  ខណៈទឹកនៅតែបន្តហក់ឡើង លោកប្រធានមន្ទីរក៏បានឱ្យដឹងដែរថានៅព្រឹកមិញនេះ នៅទន្លេស្រែពក ទឹកមានកម្ពស់១៣ម៉ែត្រលើសកម្រិតប្រកាសអាសន្ន២កន្លះម៉ែត្រ ខណៈទន្លេសេសាន្តវិញ ទឹកមានកម្ពស់លើសកម្រិតប្រកាសអាសន្ន៨ម៉ែត្រកន្លះហើយ។ បើតាមលោកប្រធាន ប្រសិនបើជំនន់នេះឆាប់ស្រកទៅវិញមិនជាបញ្ហាទេ ប៉ុន្តែបើជនលិច​លើស១សប្ដាហ៍ ប្រកាដជាខូចខាតដំណាំកសិករមិនខានឡើយ ពបិសេសគឺស្រូវ។ជុំវិញស្ថានភាពជំនន់ទឹកនៅខេត្តរតនគិរីនេះដែរ ឯកឧត្តម ញ៉ែម សំអឿន អភិបាលនៃគណៈអភិបាលខេត្តរតនគិរីកាលពីម្សិលមិញនេះ ក៏បានចុះពិនិត្យដល់ទីតាំងដែលរងការជន់លិច ដោយបានផ្ដល់ជំនួយសង្រោះដល់ពលរដ្ឋ និងដឹកនាំអាជ្ញាធរត្រៀមជួយសង្គ្រោះប្រជាពលរដ្ឋឱ្យបានទាន់ពេលវេលា។ ការជួយដោះស្រាយបញ្ហាពលរដ្ឋរងគ្រោះដោយទឹកជំនន់អាចនិយាយបានថាជាវិញ្ញាសារដំបូងសម្រាប់អភិបាលខេត្តថ្មីថ្មោងរូបនេះ។  ចំពោះស្ថានភាពទឹកទន្លេមេគង្គវិញ បើទោះបីជាចូលដល់ពាក់កណ្ដាលខែវិច្ឆិការក៏ដោយ ក៏ស្ថានភាពទឹកនៅតែបន្តហក់ឡើងជាបន្តបន្តាប់ដែរ។ បើតាមព្រឹត្តិបត្តិព័ត៌មាន និងការព្យាករណ៍កម្ពស់ទឹកជំនន់ចេញោផ្សាយដោយក្រសួងធនធានទឹក និងឧតនិយមនៅថ្ងៃទី១៨តុលានេះ គ្រប់ស្ថាននីយ៍ជលសាស្រ្ត ទឹកបានហក់ឡើង ប៉ុន្តែស្ថិតនៅកម្រិតមួយមិនទាន់មានហានិភ័យនៅឡើយទេ។សូមបញ្ជាក់ថា នារយៈពេលប៉ុន្មានឆ្នាំចុងក្រោយនេះ ពោលគឺចាប់តាំងពីក្រោយឆ្នាំ២០១១មក ស្ថានភាពជំនន់ទឹកជំនន់ទន្លេមេគង្គមិនបានគំរាមកំហែងជីវភាពរស់នៅរបស់ពលរដ្ឋតាមដងទន្លេនោះទេ ពោលគឺមានតែឆ្នាំខ្លះទឹកមានសភាពទាបខុសពីធម្មតា និងបង្កការលំបាកសម្រាប់ពលរដ្ឋដែលត្រូវការឱ្យដីលិចទឹកដើម្បីបង្កបង្កើនផលពេលទឹកស្រកទៅវិញ។ យ៉ាងណាក៏ដោយ ទឹកជំនន់ទឹកភ្លៀងបានកើតមានច្រើនទៅវិញ ពិសេសខេត្តជាប់ព្រំដែនកម្ពុជាថៃដែលមានភាពធ្ងន់ធ្ងរកាលពីឆ្នាំ២០២០កន្លងទៅ៕   អត្ថបទ៖ រ៉េន រតនៈ

១៩ តុលា ២០២១
នាវាចំបាំងកងទ័ពជើងទឹកអូស្ត្រាលី០១គ្រឿងដឹកសម្ភារៈវេជ្ជសាស្ត្រប្រយុទ្ធប្រឆាំងមេរោគកូវីដ-១៩ ពីអូស្ត្រាលីជូនដល់កម្ពុជា បានចូលចតកំពង់ផែក្រុងព្រះសីហនុដោយសុវត្ថិភាព

នាវាចំបាំងកងទ័ពជើងទឹកអូស្ត្រាលី០១គ្រឿងដឹកសម្ភារៈវេជ្ជសាស្ត្រប្រយុទ្ធប្រឆាំងមេរោគកូវីដ-១៩ ពីអូស្ត្រាលីជូនដល់កម្ពុជា បានចូលចតកំពង់ផែក្រុងព្រះសីហនុដោយសុវត្ថិភាព

 នាវាចំបាំងកងទ័ពជើងទឹកអូស្ត្រាលី០១គ្រឿងដឹកនាំដោយលោក ឧត្តមនាវីត្រី Mal Wise មេបញ្ជាការនាវា ឥណ្ឌូ ប៉ាស៊ីហ្វិក នៃកងទ័ពជើងទឹកអូស្ត្រាលី បានចូលចតនៅកំពង់ផែស្វយត័ក្រុងព្រះសីហនុ នាព្រឹកថ្ងៃ១៨តុលា២០២១ ដោយសុវត្ថិភាព  ដើម្បីបំពេញទស្សនកិច្ចជាមិត្តភាពនៅកម្ពុជា រយៈពេល៣ថ្ងៃ  ចាប់ពីថ្ងៃទី ១៨តុលា ដល់ ថ្ងៃទី២០តុលា២០២១ ក្នុងនយ័រឹតចំណងសាមគ្គីភាព មិត្តភាពរវាងកងទ័ពជើងទឹកប្រទេសទាំងពីរ កម្ពុជា និងអូស្ត្រាលី និងបាននាំយកនូវសម្ភារៈវេជ្ជសាស្ត្រប្រយុទ្ធប្រឆាំងមេរោគកូវីដ-១៩ ពីអូស្ត្រាលីឧបត្ថម្ភដល់ប្រទេសកម្ពុជាផងដែរ។ ឯកឧត្តម ឧត្តមនាវីឯកអ៊ុក សីហា មេបញ្ជាការរងកងទព័ជើងទឹក និងជាមេបញ្ជាការមូលដ្ឋានសមុទ្រ ព្រមទាំងមន្ត្រីកងយោធពលខេមរភូមិន្ទច្រើនរូបទៀត ក្នុងនោះក៍មានវត្តមាន លោក គង់ វិតាណៈអភិបាលរងខេត្តព្រះសីហនុក្នុងនាមថ្នាក់ដឹកនាំរដ្ឋបាលខេត្ត  បានអញ្ជើញទៅទទួលជំនួយនេះ ជាមួយភាគីអូស្ត្រាលីតំណាងដោយឯកឧត្តម Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា នៅកំពង់ផែក្រុងព្រះសីហនុក្រោយនាវាចូលចត។  បើតាមមន្ត្រីកងទព័ជើងទឹកកម្ពុជាឲ្យដឹងថាជំនួយវេជ្ជសាស្ត្រ ប្រយុទ្ធប្រឆាំងមេរោគកូវីដ-១៩ ដែលប្រទេសអូស្ត្រាលីជូនដល់កម្ពុជានេះ នឹងផ្តល់ជូនដល់រដ្ឋបាលខេត្តព្រះសីហនុ ,អង្គភាពកងទព័ជើងទឹកមូលដ្ឋានសមុទ្ររាម, យោធភូមិភាគទី៤ និងទី៥ កងទព័ជើងគោក នៃកងយោធពលខេមរភូមិន្ទ។ ឯកឧត្តមឯកអគ្គរដ្ឋទូតអូស្ត្រាលី ប្រចាំនៅកម្ពុជា មានប្រសាសន៍ថា អូស្ត្រាលី និងកម្ពុជា មានភាពជាដៃគូបន្តយូរអង្វែងមកហើយ ដូចគ្នានេះដែរ ទំនាក់ទំនងការពារជាតិរបស់យើងក៏មានមូលដ្ឋានយ៉ាងរឹងមាំផងដែរ និងថានេះជាលើកដំបូង ចាប់តាំងពីឆ្នាំ២០១៦ មក ដែលនាវាកងទ័ពជើងទឹកអូស្រ្តាលី បានចូលសំចតនៅកំពង់ផែនៅក្នុងប្រទេសកម្ពុជា និងថាដំណើរទស្សនកិច្ចនេះ បង្កើតបាននូវកិច្ចសហប្រតិបត្តិការបន្ថែមរវាងកងទ័ពជើងទឹកប្រទេសទាំង២ និងផ្លាស់ប្តូរយោបល់អំពីសន្តិភាព និងសន្តិសុខស្ត្រី តាមរយៈសិក្ខាសាលាអនឡាញដែលនឹងត្រូវរៀបចំឡើងក្នុងអំឡុងពេលដំណើរទស្សនកិច្ចនេះ។ ឯកឧត្តម ឧត្តមនាវីឯក អ៊ុក សីហា មានប្រសាសន៍ថ្លែងអំណរគុណដល់ប្រទេស អូស្ត្រាលី ដែលបានផ្តល់ជំនួយសម្ភារៈវេជ្ជសាស្ត្រប្រយុទ្ធប្រឆាំងមេរោគកូវីដ១៩ដល់ប្រទេសកម្ពុជាតាមរយៈដំណើរទស្សនកិច្ចរបស់នាវានេះ និងបានជម្រាបជូនប្រតិភូនាវា អំពីការខិតខំរបស់សម្តេចអគ្គមហាសេនាបតីតេជោហ៊ុន សែន ប្រមុខរាជរដ្ឋាភិបាលកម្ពុជាក្នុងការស្វែងរកសន្តិភាពជូនប្រទេសកម្ពុជា ការអភិវឌ្ឍន៍ប្រទេសជាតិនិងការខិតខំគ្រប់សកម្មភាព ការពារសុខភាពប្រជាពលរដ្ឋកម្ពុជា ទប់ស្កាត់ការឆ្លងរាលដាលមេរោគកូវីដ១៩៕   អត្ថបទ និងរូបភាព ហ៊ុយ ប៊ុនឡេង

១៨ តុលា ២០២១
វត្តអារាម នៅខណ្ឌដង្កោ កំពុងត្រៀមបង្ការទឹកជំនន់

វត្តអារាម នៅខណ្ឌដង្កោ កំពុងត្រៀមបង្ការទឹកជំនន់

វត្តអារាម នៅក្នុងខណ្ឌដង្កោ ជាតំបន់ ដែលប្រឈមនឹងទឹកជំនន់ជាងគេ ក្នុងរាជធានីភ្នំពេញ។ ពេលនេះ មិនទាន់ចូលដល់ដំណាក់កាលអាសន្ន ដោយសារទឹកជំនន់នៅឡើយទេ ប៉ុន្តែកៀកនឹងដល់ដំណាក់កាលអាសន្នហើយ។ អ្នកពាក់ព័ន្ធ បាន និងកំពុងប្រុងប្រៀប និងតាមដានយ៉ាងយកចិត្តទុកដាក់។ នេះបើតាមការឱ្យដឹងរបស់ព្រះអនុគណ ( អនុគុណ ) ខណ្ឌដង្កោ។ រហូតមកដល់ពេលនេះ វត្តអារាមទាំងឡាយ នៅក្នុងវត្តដង្កោ ជាពិសេសវត្តចំនួន ៥ ដែលមានទីតាំងប្រឈមនឹងទឹកជំនន់ជាងគេនោះ មិនទាន់ដល់គ្រាអាសន្នដោយសារទឹកជំនន់ទេ ប៉ុន្តែកៀកនឹងចូលដល់គ្រាអាសន្នហើយ ហើយប្រសិនបើកម្ពស់ទឹកឡើងត្រឹមតែប្រមាណជា ២ ទៅ ៣ តឹកទៀតនោះ វត្តទាំងនោះ នឹងចូលដល់គ្រាអាសន្នហើយ ។ ហេតុនេះទាំងសាលាអនុគណខណ្ឌ ក៏ដូចជាព្រះសង្ឃ នៅតាមបណ្តាវត្តនានាទាំងនោះ បាន និង កំពុងតាមដានយ៉ាងយកចិត្តទុកដាក់ចំពោះស្ថានភាពទឹក ក្នុងគោលបំណងបញ្ចៀសនូវរាល់គ្រោះថ្នាក់ដល់អាយុជីវិត ក៏ដូចជាសម្ភារនានា គ្នុងករណីទឹកជំនន់បុកមកបន្ទាន់ ដូចឆ្នាំទៅម៉ិញ ។ នេះគឺជាការឱ្យដឹងរបស់ព្រះភិក្ខុ ចឹក ចុន ព្រះអនុគណខណ្ឌដង្កោ រាជធានីភ្នំពេញ មានព្រះសង្ឃដីកា ប្រាប់ PNN តាមទូរស័ព្ទ នៅថ្ងៃទី១៥ ខែតុលា ឆ្នាំ២០២១ នេះ ។ព្រះអនុគណខណ្ឌដង្កោ ចឹក ចុន បានបន្ថែមថា រហូតមកដល់ពេលនេះ បណ្តាវត្តទាំងឡាយនៅក្នុងដណ្ឌដង្កោ ជាពិសេសវត្តដែលកំពុងប្រឈមនឹងទឹកជំនន់ទាំង ៥ នោះ មិនទាន់មានបញ្ហាចង្ហាន់នៅឡើយទេ គ្រាន់តែថាមិនសូវសម្បូរដូចបណ្តាឆ្នាំកាលមិនទាន់មានជំងឺកូវីដ-១៩។ម្យ៉ាងទៀត ក្រៅតែពីការតាមដានស្ថានភាពទឹក និង ក្រើនរំឭកដល់វត្តទាំងឡាយ ឱ្យចាត់ចែងទុកដាក់របស់របរចាំបាច់នៅទីកន្លែងមានសុវត្ថិភាពទៅ សាលាអនុគណខណ្ឌដង្កោ ក៏បាន និង កំពុងប្រគេនដំណឹងដល់បណ្តាវត្តទាំងឡាយដែលមិនប្រឈមនឹងទឹកជំនន់ និង ដែលមានលទ្ធភាព ក៏សូមបរិច្ចាគធនធានបណ្តើរៗ តម្កល់ទុកនៅសាលាអនុគណខណ្ឌដង្កោ ជាការត្រៀមបម្រុងទុក ក្នុងករណីវត្តណាមួយមានបញ្ហាចង្ហាន់ ជាពិសេស វត្តណាមួយចូលដល់គ្រាអាសន្នទឹកជំនន់នោះ សាលាអនុគណខណ្ឌង្កោ នឹងចាត់ចែងអន្តរាគមន៍ភ្លាមៗ។ ជាការកត់សម្គាល់វត្តអារាមនៅក្នុងខណ្ឌដង្កោ គឺជាវត្តដែលងាយរងគ្រោះទឹកជំនន់ជាងគេ ក្នុងចំណោមខណ្ឌនានានៅរាជធានីភ្នំពេញ ពីព្រោះភូមិសាស្ត្រ នៃ ខណ្ឌមួយនេះ នៅចំមុខទឹក ខណៈវត្តខ្លះស្ថិតនៅតាមមាត់ស្ទឹង ហើយខ្លះទៀត ដូចជាវត្តចម្ការខ្សាច់ និង វត្តហារជាដើម នៅក្នុងតំបន់ទីទំនាប ដែលស្ទើរតែអាចនិយាយបានថាជាតំបន់ក្នុងបឹងទៅហើយ  ។ សូមជម្រាបជូនផងដែរថា បច្ចុប្បន្ននេះខណ្ឌដង្កោ មានវត្តចំនួន ២៤ វត្ត៕   អត្ថបទ៖ ខឿន សាឃាង  រូបភាព៖ ឆិល សុភ័ស្ត  

១៥ តុលា ២០២១
រាជធានីភ្នំពេញ បន្តផ្អាកអាជីវកម្ម មានហានិភ័យនៃការឆ្លងរាលដាលជំងឺកូវីដ-១៩ និងការជួបជុំមនុស្សចូលរួមលើសពី ៥០នាក់ រយៈពេល ២សប្តាហ៍ទៀត

រាជធានីភ្នំពេញ បន្តផ្អាកអាជីវកម្ម មានហានិភ័យនៃការឆ្លងរាលដាលជំងឺកូវីដ-១៩ និងការជួបជុំមនុស្សចូលរួមលើសពី ៥០នាក់ រយៈពេល ២សប្តាហ៍ទៀត

ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩ អាជ្ញាធររាជធានីភ្នំពេញ បានបន្តដាក់ចេញនូវវិធានការរដ្ឋបាល សម្រាប់រយៈពេល ១៤ថ្ងៃទៀត ដោយគិតចាប់ពីថ្ងៃទី១៥ ខែតុលានេះ រហូតដល់ថ្ងៃទី២៨ ខែតុលា។ ក្នុងការបន្តវិធានការរដ្ឋបាលនេះ អាជ្ញាធររាជធានីភ្នំពេញ តម្រូវអោយផ្អាកជាបណ្ដោះអាសន្ននូវអាជីវកម្ម ដែលមានហានិភ័យខ្ពស់នៃការឆ្លងរាលដាលជំងឺកូវីដ-១៩ ដូចជា រោងភាពយន្ត ខារ៉ាអូខេ រង្គសាល ឌីស្កូតែក និងអាជីវកម្មក្លឹបកម្សាន្តគ្រប់ប្រភេទ និងការជួបជុំ ឬការប្រមូលផ្តុំមនុស្សជាលក្ខណៈឯកជន ដែលមានមនុស្សចូលរួមលើសពី ៥០នាក់។ អាជ្ញាធររាជធានីភ្នំពេញ បានបន្តដាក់ចេញនូវវិធានការរដ្ឋបាល សម្រាប់រយៈពេល ១៤ថ្ងៃទៀត ចាប់ពីថ្ងៃទី១៥ រហូតដល់ថ្ងៃទី២៨ ខែតុលា ដោយផ្អាកជាបណ្ដោះអាសន្នចំពោះសកម្មភាពការងារ មុខរបរ ឬ អាជីវកម្មដែលមានហានិភ័យខ្ពស់នៃការឆ្លងរាលដាលជំងឺកូវីដ-១៩ ដូចជា រោងភាពយន្ត ខារ៉ាអូខេ រង្គសាល ឌីស្កូតែក និងអាជីវកម្មក្លឹបកម្សាន្តគ្រប់ប្រភេទ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩។ ក្នុងវិធានការរដ្ឋបាលនោះ អាជ្ញាធររាជធានីភ្នំពេញ ក៏កំណត់ហាមឃាត់ការជួបជុំ ឬ ការប្រមូលផ្តុំ មនុស្សជាលក្ខណះឯកជនដែលមានមនុស្សចូលរួមលើសពី៥០នាក់ លើកលែងតែការជួបជុំក្នុងចំណោមសមាជិកគ្រួសារ ដែលរស់នៅក្នុងលំនៅឋាន ឬ ទីសំណាក់ជាមួយគ្នា ការរៀបចំពិធីបុណ្យសពដោយគោរពតាមការកំណត់របស់អាជ្ញាធរមានសមត្ថកិច្ច ការជួបជុំរបស់ស្ថាប័នសាធារណៈ ការប្រមូលផ្តុំមនុស្ស និងការជួបជុំរបស់បុគ្គលិកសុខាភិបាលដែលបំពេញការងារ ផ្សេង និងការចាក់វ៉ាក់ការពារជំងឺកូវីដ-១៩ និងការជួបជុំរបស់អាជ្ញាធរមានសមត្ថកិច្ច បំពេញការងារថែរក្សាសន្តិសុខ សណ្តាប់ធ្នាប់ និងរបៀបរៀបរយសាធារណៈ ជាដើម។  អាជ្ញាធររាជធានីភ្នំពេញ ក៏ព្រមានអនុវត្តទណ្ឌកម្ម រដ្ឋបាល និងទណ្ឌកម្មច្បាប់ រួមទាំងការផ្សព្វផ្សាយជាសាធារណះចំពោះបុគ្គលល្មើស ស្របតាមច្បាប់ ដោយគ្មានការលើកលែងឡើយ ក្នុងករណីរកឃើញថាបុគ្គល ឬ នីតិបុគ្គលទាំងឡាយណា ដែលបំពានវិធានការរដ្ឋបាលនេះផងដែរ៕   អត្ថបទ៖ សន រដ្ឋា   រូបភាព៖ ឯកសារ  

១៥ តុលា ២០២១
ក្រសួងធម្មការ និងសាសនា ប្រកាសថា បុណ្យកឋិនទាន ឆ្នាំនេះ ហាមឃាត់ផ្សព្វផ្សាយកម្មវិធីបុណ្យ និងដង្ហែតាមដងផ្លូវ ឬជុំវិញព្រះវិហារ

ក្រសួងធម្មការ និងសាសនា ប្រកាសថា បុណ្យកឋិនទាន ឆ្នាំនេះ ហាមឃាត់ផ្សព្វផ្សាយកម្មវិធីបុណ្យ និងដង្ហែតាមដងផ្លូវ ឬជុំវិញព្រះវិហារ

 បុណ្យកឋិនទាន នៅឆ្នាំនេះ ត្រូវបានក្រសួងធម្មការ និងសាសនា ប្រកាសហាមឃាត់ មិនឲ្យផ្សព្វផ្សាយកម្មវិធីបុណ្យ និងដង្ហែតាមដងផ្លូវ ឬជុំវិញព្រះវិហារ ឡើយ។ វិធានការនេះ ដើម្បីទប់ស្កាត់ការឆ្លងរាលដាលជំងឺកូវីដ១៩។សេចក្តីណែនាំបន្ថែម លើកឡើងថា បុណ្យកឋិនទាន ជាកាលទានមួយដ៏ថ្លៃថ្លាក្នុងព្រះពុទ្ធសាសនា មាន ផលានិសង្សខ្ពស់ ទាំងទាយក ទាយិកា និងបដិគ្គាហក (ប៉ាក់ ដិ គា ហាក់ កាក់) ជាទីជ្រះថ្លារបស់ពុទ្ធបរិស័ទខ្មែរ តែងតែប្រារព្ធធ្វើឡើង រៀងរាល់ឆ្នាំ មានរយ:ពេលកំណត់តែ ២៩ថ្ងៃ ដោយវត្តនីមួយៗ ទទួលអង្គកឋិនបានតែមួយលើកប៉ុណ្ណោះ។ក្រសួងធម្មការ និងសាសនា បន្ថែមថា សម្រាប់ឆ្នាំ២០២១នេះ ពិធីបុណ្យកឋិនទាន នឹងប្រព្រឹត្តទៅចាប់ពីថ្ងៃសុក្រ ១រោច ខែអស្សុជ ដល់ថ្ងៃសុក្រ ១៥កើត ខែកត្តិក ត្រូវនឹងថ្ងៃទី២២ ខែតុលា ដល់ថ្ងៃទី១៩ ខែវិច្ឆិកា ឆ្នាំ២០២១។  សេចក្តីណែនាំនេះ ត្រូវបានក្រសួងធម្មការ និងសាសនា ធ្វើឡើង ដើម្បីរៀបចំបុណ្យកឋិនទានឱ្យដំណើរការ នឹងប្រព្រឹត្តទៅស្របតាមទំនៀមទម្លាប់ប្រពៃណីព្រះពុទ្ធសាសនា និងចូលរួមបដិបត្តិតាមសេចក្ដីណែនាំនានារបស់រាជរដ្ឋាភិបាល ក្រសួងសុខាភិបាល និងអាជ្ញាធរដែនដី តាមសភាពជាក់ស្តែងនៃទីកន្លែងនីមួយៗ ក្នុងការអនុវត្តវិធានការចាំបាច់នានា សំដៅកាត់ផ្តាច់ និងក្នុងការទប់ស្កាត់ ការឆ្លងរីករាលដាលនៃជំងឺកូវីដ-១៩ នៅទូទាំងប្រទេស ជាពិសេសមេរោគបំប្លែងខ្លួនថ្មី ប្រភេទដែលតា (Delta) ដែលមានកម្រិតនៃការឆ្លងរាលដាលឆាប់រហ័ស និងយោងលើភាពចាំបាច់ ដើម្បីធានាការពារអាយុជីវិត និងសុខភាពរបស់ប្រជាជន ខណៈដែលព្រះរាជាណាចក្រកម្ពុជា ឈានឆ្ពោះទៅបើកដំណើរការប្រទេសពេញលេញឡើងវិញ នាពេលខាងមុខ។ ក្រសួងធម្មការ និងសាសនា បានណែនាំដល់មន្ទីរធម្មការ និងសាសនា រាជធានីខេត្ត ២ចំណុច គឺទី១-ត្រូវយកចិត្តទុកដាក់បង្កលក្ខណ:ឱ្យបានល្អប្រសើរ ប្រគេនព្រះសង្ឃ ជូនពុទ្ធបរិស័ទ ប្រារព្ធពិធីបុណ្យ កឋិនទានស្របតាមប្រពៃណីព្រះពុទ្ធសាសនា ដោយត្រូវអនុវត្តឱ្យបានយ៉ាងម៉ឺងម៉ាត់នូវវិធានការការពារនានា របស់ក្រសួងសុខាភិបាល វិធានការរដ្ឋបាល និងជាពិសេសត្រូវប្រកាន់ភ្ជាប់ជានិច្ចនូវវិធានការ “៣ការពារ ៣កុំ” របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ ទី២- ហាមឃាត់ផ្សព្វផ្សាយកម្មវិធីបុណ្យ ដង្ហែតាមដងផ្លូវ ឬជុំវិញព្រះវិហារ ដោយគ្រាន់តែវេរប្រគេនត្រៃចីវរ ជាកិច្ចសម្រេចបុណ្យ៕ អត្ថបទ៖ លី ម៉េងហួរ    រូបភាព៖ ឯកសារ 

១៥ តុលា ២០២១
តាមបណ្តាខេត្ត រៀបចំពិធីគោរពព្រះវិញ្ញាណក្ខន្ធ សម្តេចព្រះបរមរតនកោដ្ឋ នរោត្តម សីហនុ

តាមបណ្តាខេត្ត រៀបចំពិធីគោរពព្រះវិញ្ញាណក្ខន្ធ សម្តេចព្រះបរមរតនកោដ្ឋ នរោត្តម សីហនុ

ក្រៅពីការរៀបចំ នៅវិមានស្ដូបព្រះបរមរូប លើសួនច្បារវិមានឯករាជ្យ ក្នុងរាជធានីភ្នំពេញ នាព្រឹកថ្ងៃទី១៥ ខែតុលានេះ នៅតាមបណ្តាខេត្តនានា ទូទាំងប្រទេស ក៏បានរៀបចំពិធីជួបជុំ ដាក់កម្រងផ្កា និងគោរពព្រះវិញ្ញាណក្ខន្ធ ព្រះករុណា ព្រះមហាវីរក្សត្រ សម្តេចព្រះបរមរតនកោដ្ឋ នរោត្តម សីហនុ។ ពិធីដាក់កម្រងផ្កា គោរពព្រះវិញ្ញាណក្ខន្ធ ព្រះមហាវីរក្សត្រ សម្តេចព្រះ នរោត្តម សីហនុ គម្រប់ខួប ៩ឆ្នាំ នាថ្ងៃទី១៥ ខែតុលានេះ បានធ្វើឡើង នៅសាលាខេត្តនិមួយៗ ចូលរួមដោយប្រធានក្រុមប្រឹក្សាខេត្ត និងអភិបាលខេត្ត រួមទាំងមន្ត្រីរាជការជុំវិញខេត្ត និងកងកម្លាំងប្រដាប់អាវុធ ទាំងបីប្រភេទ។ ការប្រារព្ធពិធីនេះ ដើម្បីបង្ហាញនូវការគោរពស្រឡាញ់ ពោរពេញទៅដោយភក្ដីភាពដ៏ជ្រាលជ្រៅ មិនអាចកាត់ថ្លៃបានរបស់ប្រជានុរាស្ត្ររបស់ព្រះអង្គ។  ការសម្រួមកាយវាចារចិត្ត គោរពព្រះវិញ្ញាណក្ខន្ធ សម្តេចព្រះបរមរតនកោដ្ឋ នាថ្ងៃ១៥តុលានេះ ក៏ដើម្បីរំលឹកនូវគុណូបការៈរបស់ព្រះអង្គ ដែលបានបន្សល់ទុកនូវស្នាព្រះហស្ថជាច្រើន ជាពិសេសគឺជោគជ័យ ដែលកម្ពុជា ដណ្តើមយកឯករាជ្យជាតិ ពីអាណានិគមនិយមបារាំង នាថ្ងៃ៩វិច្ឆិកា ឆ្នាំ១៩៥៣ និងការទាមទារប្រាសាទព្រះវិហារ នាឆ្នាំ១៩៦២ ការបង្រួបបង្រួមផ្សះផ្សាជាតិ និងសមិទ្ធផលធំៗជាច្រើនទៀតរបស់ព្រះអង្គ៕   អត្ថបទ និងរូបភាព៖ ក្រុមការងារព័ត៌មាន PNN 

១៥ តុលា ២០២១
រដ្ឋមន្ត្រីមហាផ្ទៃ ប្រកាសតែងតាំងអភិបាលខេត្តពោធិ៍សាត់ ដែលប្ដូរមកពីខេត្តកំពត

រដ្ឋមន្ត្រីមហាផ្ទៃ ប្រកាសតែងតាំងអភិបាលខេត្តពោធិ៍សាត់ ដែលប្ដូរមកពីខេត្តកំពត

នៅថ្ងៃនេះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានបន្តអញ្ជើញប្រកាសចូលកាន់មុខតំណែងឯកឧត្តម ជាវ តាយ ជាអភិបាលខេត្តពោធិ៍សាត់ ជំនួសឯកឧត្តម ម៉ៅ ធនិន ដែលបានផ្ទេរភារកិច្ច ជាអភិបាលនៃគណៈអភិបាលខេត្តកំពតវិញ។  ក្នុងចំណោមអភិបាលខេត្តចំនួន៧ ដែលសម្ដេចតេជោនាយករដ្ឋមន្ត្រីទូលថ្វាយព្រះមហាក្សត្រត្រាស់បង្គាប់តែងតាំង និងផ្ទេរភារកិច្ចនោះ នៅថ្ងៃនេះ ឯកឧត្តម ជាវ តាយ គឺជាអភិបាលខេត្តចុងក្រោយ ដែលត្រូវបានសម្ដេចក្រឡាហោម ស ខេង អញ្ជើញជាអធិបតីពិធីប្រកាសចូលកាន់មុខតំណែង។   ឯកឧត្តម ជាវ តាយ ដែលជាអតីតអភិបាលខេត្តកំពត ត្រូវបានផ្ទេរភារកិច្ចមកជាអភិបាលខេត្តពោធិ៍សាត់ជំនួសឯកឧត្តម ម៉ៅ ធនិន ដែលត្រូវបានត្រាស់បង្គាប់ផ្ទេរពីអភិបាលខេត្តពោធិ៍សាត់មកជាអភិបាលខេត្តកំពតជំនួសឯកឧត្តម ជាវ តាយ វិញ។  ក្នុងដើមសប្ដាហ៍នេះ សម្ដេចក្រឡាហោម ស ខេង បានធ្វើដំណើតាមឧទ្ធម្ភាចក្រផង តាមរថយន្តផង ដើម្បីធ្វើជាអធិបតីពិធីប្រកាសចូលកាន់មុខតំណែងអភិបាលខេត្តរួមមាន ឯកឧត្តម សុខ លូ ជាអភិបាលខេត្តបាត់ដំបង, ឯកឧត្តម ងួន រតនៈ ជាអភិបាលខេត្តកំពង់ធំ, ឯកឧត្តម ស្វាយ សំអ៊ាង ជាអភិបាលខេត្តស្ទឹងត្រែង, ឯកឧត្តម ថង សាវុន ជាអភិបាលខេត្តមណ្ឌលគិរី, ឯកឧត្តម ម៉ៅ ធនិន ជាអភិបាលខេត្តកំពត និងនៅថ្ងៃនេះគឺឯកឧត្តម ជាវ តាយ ពីអភិបាលខេត្តកំពត ទៅជាអភិបាលខេត្តពោធិ៍សាត់។ ពីវេទិការអធិបតីនៅសាលាខេត្តពោធិ៍សាត់សម្ដេចក្រឡាហោម  ស ខេង បានគូសបញ្ជាក់ពីភាពចាំបាច់តាមផ្លូវច្បាប់ ជីវភាពនយយោបាយ និងរដ្ឋបាល ដែលនាំឱ្យរាជរដ្ឋាភិបាលសម្រេចទូលថ្វាយព្រះមហាក្សត្រផ្លាស់ប្ដូរមុខតំណែងអភិបាលខេត្តមួយចំនួននាពេលកន្លងមក និងបានផ្ដល់ការពន្យល់ថារដ្ឋបាលខេត្តនីមួយៗមិនអាស្រ័យលើខេត្តតូច ឬធំនោះទេ សំខាន់គឺបំរើសេវាសាធារណៈជូនប្រជាពលរដ្ឋឱ្យបានល្អ៕  អត្ថបទ៖ រ៉េន រតនៈ  រូបភាព៖ ផេកសម្ដេចក្រឡាហោម 

១៥ តុលា ២០២១
សម្តេចតេជោ ហ៊ុន សែន៖ វត្តមានវ៉ាក់សាំងរបស់ចិន បានធ្វើឱ្យកម្ពុជា សម្រេចផែនការចាក់វ៉ាក់សាំង ជូនប្រជាពលរដ្ឋបានយ៉ាងឆាប់រហ័ស និងមុនផែនការគ្រោងទុក

សម្តេចតេជោ ហ៊ុន សែន៖ វត្តមានវ៉ាក់សាំងរបស់ចិន បានធ្វើឱ្យកម្ពុជា សម្រេចផែនការចាក់វ៉ាក់សាំង ជូនប្រជាពលរដ្ឋបានយ៉ាងឆាប់រហ័ស និងមុនផែនការគ្រោងទុក

 នៅពេលវ៉ាក់សាំងបង្ការជំងឺកូវីដ១៩ ប្រភេទស៊ីណូវ៉ាក់(Sinovac) ចំនួន ២លានដូស ដែលជាជំនួយរដ្ឋាភិបាលចិន បានមកដល់កម្ពុជា នៅព្រឹកថ្ងៃទី១៤ ខែតុលានេះ សម្តេចតេជោ ហ៊ុន សែន បានចាត់ទុកថា វត្តមានវ៉ាក់សាំងរបស់ចិន បានធ្វើឱ្យកម្ពុជា សម្រេចផែនការចាក់វ៉ាក់សាំង ជូនប្រជាពលរដ្ឋ បានយ៉ាងឆាប់រហ័ស និងមុនផែនការគ្រោងទុក។នៅព្រឹកថ្ងៃទី១៤ ខែតុលា ឆ្នាំ២០២១នេះ រាជរដ្ឋាភិបាលកម្ពុជា ទទួលបានវ៉ាក់សាំងបង្ការជំងឺកូវីដ១៩ ស៊ីណូវ៉ាក់ (Sinovac) ចំនួន ២លានដូសទៀតហើយ ដែលជាជំនួយរបស់រដ្ឋាភិបាល និងប្រជាជនចិន ជូនរាជរដ្ឋាភិបាលកម្ពុជា។ សម្តេចតេជោ ហ៊ុន សែន បានលើកឡើងថា ប្រទេសចិន គឺជាប្រទេសដំបូងគេ ដែលបានផ្តល់ជំនួយវ៉ាក់សាំងបង្ការជំងឺកូវីដ១៩ មកកាន់ប្រទេសកម្ពុជា កាលពីខែកុម្ភៈ ឆ្នាំ២០២១។ មកដល់ពេលនេះ វ៉ាក់សាំងដែលរដ្ឋាភិបាលចិន បានផ្តល់ជាជំនួយមកកម្ពុជា មានចំនួនសរុប ៦លាន ៨០ម៉ឺនដូស ហើយមកដល់ពេលនេះ កម្ពុជា បានទទួលវ៉ាក់សាំងពីប្រទេសចិនទាំងជំនួយ និងការបញ្ជាទិញមានចំនួនសរុប ៣២លាន ៨សែនដូស។   សម្តេចតេជោ ហ៊ុន សែន បញ្ជាក់ថា វត្តមានវ៉ាក់សាំងរបស់ចិន បានធ្វើឱ្យកម្ពុជាសម្រេចផែនការចាក់វ៉ាក់សាំងជូនប្រជាពលរដ្ឋបានយ៉ាងឆាប់រហ័ស និងមុនផែនការគ្រោងទុក។   គិតត្រឹមថ្ងៃទី១៣ ខែតុលាម្សិលមិញ កម្ពុជាចាក់វ៉ាក់សាំងជូនប្រជាពលរដ្ឋអាយុចាប់ពី ៦ឆ្នាំឡើង បានចំនួនជាង ១៣លាន ៥សែននាក់ហើយ ស្មើនឹងប្រមាណ ៨៤.៦៦ភាគរយ ធៀបនឹងចំនួនប្រជាពលរដ្ឋសរុបប្រមាណ ១៦លាននាក់។ ក្នុងនោះ អ្នកចាក់បានទាំងពីរដូស មានចំនួនជាង ១២លាននាក់ ហើយអ្នកចាក់ដូសទី៣ ឬដូសជំរុញ បានជាង ១លាននាក់៕  អត្ថបទ៖ លី ម៉េងហួរ    រូបភាព៖ ញិល សុជា 

១៥ តុលា ២០២១
រដ្ឋសភា ចាប់ផ្ដើមដំណើរការពិនិត្យសិក្សាច្បាប់វិសោធនកម្មរដ្ឋធម្មនុញ្ញ

រដ្ឋសភា ចាប់ផ្ដើមដំណើរការពិនិត្យសិក្សាច្បាប់វិសោធនកម្មរដ្ឋធម្មនុញ្ញ

  គណៈកម្មាធិការអចិន្ត្រៃយ៍រដ្ឋសភា នៅព្រឹកថ្ងៃទី១៤ ខែតុលានេះ បានបើកកិច្ចប្រជុំតាមប្រព័ន្ធវីដេអូ ដើម្បីពិភាក្សា និងអនុម័តរបៀបវារៈមួយចំនួន ក្នុងនោះ ក៏មានសេចក្តីព្រាងច្បាប់ធម្មនុញ្ញ ស្តីពី វិសោធនកម្មមាត្រាមួយចំនួននៃរដ្ឋធម្មនុញ្ញផងដែរ។ កិច្ចប្រជុំនេះ ដឹកនាំដោយសម្ដេចពញាចក្រី ហេង សំរិន ប្រធានរដ្ឋសភា។ ក្នុងកិច្ចប្រជុំនាព្រឹកមិញនេះ គណៈកម្មាធិការអចិន្ត្រៃយ៍រដ្ឋសភា បានអនុម័តប្រគល់សេចក្តីព្រាងច្បាប់ធម្មនុញ្ញស្តីពី វិសោធនកម្មមាត្រា១៩ថ្មី មាត្រា៨២ថ្មី មាត្រា១០៦ថ្មី(មួយ) មាត្រា១១៩ថ្មី និងមាត្រា១៣៧ថ្មី នៃរដ្ឋធម្មនុញ្ញ និងមាត្រា៣ និងមាត្រា៤ នៃច្បាប់ធម្មនុញ្ញបន្ថែម សំដៅធានានូវដំណើរការជាប្រក្រតី នៃស្ថាប័នជាតិ ជូនដល់គណៈកម្មការនីតិកម្ម និងយុត្តិធម៌ នៃរដ្ឋសភា ពិនិត្យ សិក្សា ហើយធ្វើរបាយការណ៍ជូនគណៈកម្មាធិការអចិន្រ្តៃយ៍រដ្ឋសភា វិញ។ សូមបញ្ជាក់ថា សេចក្តីព្រាងច្បាប់ ស្តីពីវិសោធនកម្មរដ្ឋធម្មនុញ្ញ និងធម្មនុញ្ញបន្ថែម ពាក់ព័ន្ធនឹងការកំណត់ឱ្យមានសញ្ជាតិខ្មែរតែមួយ សម្រាប់មេដឹកនាំស្ថាប័នកំពូលៗរួមមាន ប្រធានរដ្ឋសភា ប្រធានព្រឹទ្ធសភា នាយករដ្ឋមន្រ្តី និងប្រធានក្រុមប្រឹក្សាធម្មនុញ្ញ ត្រូវបានគណៈរដ្ឋមន្រ្តីអនុម័តទាំងស្រុង ក្នុងប្រជុំពេញអង្គ នាព្រឹកថ្ងៃទី៨ ខែតុលា  ហើយបានបញ្ជូនបន្តទៅកាន់រដ្ឋសភា កាលពីល្ងាចថ្ងៃទី១១ ខែតុលា ឆ្នាំ២០២១។បណ្តាក្រសួង ស្ថាប័ន សមាគម គណបក្សនយោបាយជាច្រើន បានប្រកាសគាំទ្រចំពោះគំនិតផ្តួចផ្តើមរបស់ សម្តេចតេជោ ហ៊ុន សែន ក្នុងការរៀបចំវិសោធនកម្មកំណត់ឱ្យមានសញ្ជាតិខ្មែរតែមួយសម្រាប់ អ្នកកាន់តំណែងកំពូលទាំង៤នេះ ដោយពួកគេយល់ថា ដើម្បីភាពស្មោះត្រង់ និងឧត្តមប្រយោជន៍សម្រាប់ជាតិខ្មែរ។  ព្រះករុណាជាម្ចាស់ជីវិតលើត្បូងក៏រាជានុញ្ញាតចំពោះដំណើរការវិសោធនកម្មនេះដែរ។ ដោយឡែកពាក់ព័ន្ធនឹងកិច្ចប្រជុំនាព្រឹកមិញនេះដែរ គណៈកម្មាធិការអចិន្ត្រៃយ៍រដ្ឋសភា ក៏បានអនុម័តយល់ព្រម សំណើសុំបោះឆ្នោតផ្តល់សេចក្តីទុកចិត្តលើការបំពេញបន្ថែមសមាសភាពសមាជិកនៃរាជរដ្ឋាភិបាលដល់ ឯកឧត្តម ប៉ា សុជាតិវង្ស ជាទេសរដ្ឋមន្រ្តី ទទួលបន្ទុកបេសកកម្មពិសេស ដើម្បីដាក់ជូនសម័យប្រជុំរដ្ឋសភា លើកទី៦ នីតិកាលទី៦ ធ្វើការបោះឆ្នោតផ្តល់សេចក្តីទុកចិត្ត។ ឯកឧត្តម ប៉ា សុជាតិវង្ស គឺជាអតីតអភិបាលរាជធានីភ្នំពេញ៕   អត្ថបទ៖ រ៉េន រតនៈ  រូបភាព៖ រដ្ឋសភា  

១៥ តុលា ២០២១
វ៉ាក់សាំងកូវីដ១៩ ដែលជាជំនួយរបស់ចិន ចំនួន ២លានដូស បានដឹកមកដល់កម្ពុជា

វ៉ាក់សាំងកូវីដ១៩ ដែលជាជំនួយរបស់ចិន ចំនួន ២លានដូស បានដឹកមកដល់កម្ពុជា

វ៉ាក់សាំងបង្ការជំងឺកូវី១៩ ចំនួន ២លានដូសទៀត ដែលជាជំនួយរបស់រដ្ឋាភិបាល និងប្រជាជនចិន បានដឹកមកដល់កម្ពុជាហើយ នៅថ្ងៃទី១៤ ខែតុលានេះ។ លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល បានបញ្ជាក់ថា វ៉ាក់សាំងនេះ នឹងបម្រើដល់ការចាក់ដូសជំរុញជូនប្រជាជាពលរដ្ឋ ហើយបូករួមទាំងវ៉ាក់សាំង ដែលដឹកមកដល់នៅថ្ងៃនេះ គឺកម្ពុជាទទួលបានវ៉ាក់សាំងសរុប ជាង ៣៦លានដូសហើយ។  នៅឱកាសអញ្ជើញទទួលវ៉ាក់សាំងបង្ការជំងឺកូវីដ១៩ នៅអាកាសយាន្តដ្ឋានអន្តរជាតិភ្នំពេញ លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល បានបញ្ជាក់ថា វ៉ាក់សាំងបង្ការជំងឺកូវីដ-១៩ ចំនួន ២លានដូស ដែលជាជំនួយរបស់រដ្ឋាភិបាល និងប្រជាជនចិន ជូនរាជរដ្ឋាភិបាលកម្ពុជា នឹងបម្រើដល់ការចាក់ដូសជំរុញជូនប្រជាជាពលរដ្ឋ ហើយវ៉ាក់សាំងនេះ នឹងជួយរួមចំណែកប្រកបដោយប្រសិទ្ធភាព ក្នុងការទប់ស្កាត់ និងកាត់ផ្តាច់នៃការឆ្លងជំងឺកូវីដ-១៩ ប្រភេទថ្មី ដែលតានៅក្នុងសហគមន៍នៅកម្ពុជា។ លោកជំទាវ បានបន្ថែមថា រាជរដ្ឋាភិបាលកម្ពុជា បានកំពុងជំរុញការចាក់វ៉ាក់សាំងឱ្យបានលឿនដើម្បីបង្កើតភាពស៊ាំនៅក្នុងសហគមន៍ ខណៈបច្ចុប្បន្ននេះករណីឆ្លងដែលមានប្រមាណជិត៣០០នាក់ក្នុង១ថ្ងៃៗនេះ អ្នកបានចាក់វ៉ាក់សាំងមានកម្រិតស្រាលៗ និងបានធ្វើការព្យាបាលនៅតាមផ្ទះ។ សូមជម្រាបថា ចាប់តាំងពីមានការឆ្លងរាលដាលជំងឺកូវីដ១៩នៅក្នុងប្រទេសកម្ពុជា កាលពីខែកុម្ភៈ ឆ្នាំ២០២១ នេះមក ដើម្បីឆ្លើយតបសំណើររបស់ភាគីកម្ពុជា ប្រទេសចិនបានបង្កើនកិច្ចខិតខំប្រឹងប្រែងក្នុងការផ្តល់ជំនួយជាវ៉ាក់សាំងនិងសម្ភារៈទប់ស្កាត់ជំងឺវីរុសដល់ភាគីកម្ពុជា ជួយសម្របសម្រួលដល់កម្ពុជាក្នុងការប្រយុទ្ធប្រឆាំងនឹងជំងឺវីរុសកូវីដ១៩ ។ ដោយឡែក គិតបូកទាំងវ៉ាក់សាំងដែលមកដល់ថ្ងៃនេះ កម្ពុជា មានវ៉ាក់សាំងសរុបចំនួនជាង ៣៦លានដូស ក្នុងនោះមានទាំងវ៉ាក់សាំងជាជំនួយឥតសំណង និងជាការបញ្ជាទិញរបស់រាជរដ្ឋាភិបាលកម្ពុជា៕    អត្ថបទ៖ សន រដ្ឋា   រូបភាព៖ ញិល សុជា  

១៥ តុលា ២០២១
មន្ត្រីនាំពាក្យថា ការអប់រំបែបឌីជីថល នៅតែជាមធ្យោបាយដ៏សំខាន់ នៃការអប់រំនៅកម្ពុជា

មន្ត្រីនាំពាក្យថា ការអប់រំបែបឌីជីថល នៅតែជាមធ្យោបាយដ៏សំខាន់ នៃការអប់រំនៅកម្ពុជា

បើទោះបីជាពេលនេះ សាលារៀននៅទូទាំងប្រទេស ត្រូវបានបើកដំណើរការឡើងវិញបណ្តើរៗ ហើយត្រូវបានរំពឹងថា នឹងមានការបើកសាលារៀនជាបន្តបន្ទាប់ទៀតក្តី ប៉ុន្តែមន្ត្រីនាំពាក្យក្រសួងអប់រំ អះអាងថា ការអប់រំបែបឌីជីថល នៅតែជាមធ្យោបាយដ៏សំខាន់បំផុតមួយដដែល ដែលតាមពិតទៅ ការអប់រំបែបឌីជីថល គឺជាគោលដៅរបស់ក្រសួងអប់រំ នៅក្នុងសតវត្សរ៍ទី២១ នេះ តែម្តង ។  បើទោះបីជាសាលារៀនត្រូវបានបើកដំណើរការឡើងវិញជាបណ្តើរៗហើយក្តី ក៏ការអប់រំបែបឌីជីថល នៅតែជាមធ្យោបាយដ៏សំខាន់បំផុតមួយ សម្រាប់វិស័យអប់រំនៅកម្ពុជា ដែលរហូតមកដល់បច្ចុប្បន្ននេះ មធ្យោបាយ ឬ វេទិការ អប់រំបែបឌីជីថលសំខាន់ៗរបស់ក្រសួងអប់រំមានចំនួន ៥ ។ នេះគឺជាការអះអាងរបស់ឯកឧត្តមបណ្ឌិត រស់ សុវាចា មន្ត្រីនាំពាក្យក្រសួងអប់រំ យុវជន និងកីឡា ថ្លែងប្រាប់ PNN តាមតេឡេហ្ក្រាម នៅថ្ងៃទី១៤ ខែតុលា ឆ្នាំ២០២១ នេះ ។ គប្បីរំឭកឡើងវិញថា ការអប់រំបែបឌីជីថល រួមទាំងការសិក្សាពីចម្ងាយ និង ការអប់រំបែបចម្រុះផងនេះ មិនមែនទើបតែត្រូវបានក្រសួងអប់រំ ផ្តួចផ្តើម និង ដាក់ឱ្យអនុវត្តបន្ទាប់ពីកម្ពុជា រងការរាតត្បាតញាំញី ដោយជំងឺកូវីដ-១៩ នេះទេ មែនទែនទៅ ចក្ខុវិស័យ និង យន្តការ នៃ ការអប់រំបែបឌីជីថល នេះ ត្រូវបានក្រសួងអប់រំ និង ស្ថាប័នពាក់ព័ន្ធ បានដាក់ចេញ និង ខិតខំជំរុញឱ្យអនុវត្តតាំងពីប៉ុន្មានឆ្នាំមកហើយ ដែលមធ្យោបាយ នៃ ការអប់រំបែបឌីជីថល នេះ ត្រូវបានក្រសួងអប់រំ និង ស្ថាប័នពាក់ព័ន្ធទទួលស្គាល់ និង ចាត់ទុកថាជាមធ្យោបាយអប់រំដ៏សំខាន់មួយ ដើម្បី ឆ្លើយតបទៅនឹងការអភិវឌ្ឍន៍ឧស្សាហកម្មបច្ចេកវិទ្យា ៤.០ របស់ពិភពលោក នៃ សតវត្សរ៍ទី២១ នេះ ។ គួរកត់សម្គាល់ផងដែរថា ជាផ្នែកមួយ នៃ ការពង្រឹងបន្ថែមនូវគុណភាពអប់រំ ដោយរួមទាំងការអប់រំបែបឌីជីថល ផង ក្នុងឆ្នាំ ២០២១ នេះ ក្រសួងអប់រំ យុវជន និងកីឡា បាន និង កំពុងបណ្ដុះបណ្ដាលជាស៊េរី តាមប្រព័ន្ធអនឡាញ ក្រោមប្រធានបទសំខាន់ៗមួយចំនួនដូចជា ៖១ វេទិការអប់រំអេឡិចត្រូនិកសម្រាប់បឋមសិក្សា និងមធ្យមសិក្សា ២ វិធីសាស្ត្របង្រៀនពីចម្ងាយតាមប្រព័ន្ធអេឡិចត្រូនិកដោយប្រើប្រាស់ Google Workspace for Education ៣ ការប្រើប្រាស់បច្ចេកវិទ្យាជំរុញដល់ការសិក្សាបែបចម្រុះក្នុងបរិបទកូវីដ-១៩ ៤ របៀបងាយៗក្នុងការផលិតមាតិកាអប់រំឌីជីថល ៥ មូលដ្ឋានគ្រឹះ នៃ អក្ខរកម្មទិន្នន័យ ៦ ការរក្សាសុវត្ថិភាពលើបណ្ដាញអ៊ីនធឺណិតក្នុងបរិបទកូវីដ-១៩ ដែលវគ្គបណ្ដុះបណ្ដាលពីចម្ងាយជាស៊េរីតាមប្រព័ន្ធអេឡិចត្រូនិកទាំងនេះ ត្រូវបានផ្ដល់ជូនដល់ បុគ្គលិកអប់រំនៅតាមមន្ទីរ និងការិយាល័យអប់រំ យុវជន និងកីឡាទូទាំងប្រទេស គណៈគ្រប់គ្រងសាលារៀន និងលោកគ្រូ អ្នកគ្រូ ចាប់ពីកម្រិតបឋមសិក្សារហូតដល់កម្រិតមធ្យមសិក្សាទុតិយភូមិ ដែលស្ថិតក្នុងក្របខ័ណ្ឌក្រសួងអប់រំ យុវជន និងកីឡា ៕  អត្ថបទ៖ ខឿន សាឃាង  រូបភាព៖ ឯកសារ ( Education-Digital )  

១៥ តុលា ២០២១
ប្រមុខរាជរដ្ឋាភិបាល ណែនាំ ៤ចំណុច ដើម្បីទប់ស្កាត់ការវាយកម្ទេច និងបំផ្លិចបំផ្លាញសំណង់អគារបេតិកភណ្ឌ

ប្រមុខរាជរដ្ឋាភិបាល ណែនាំ ៤ចំណុច ដើម្បីទប់ស្កាត់ការវាយកម្ទេច និងបំផ្លិចបំផ្លាញសំណង់អគារបេតិកភណ្ឌ

សម្តេចតេជោ នាយករដ្ឋមន្ត្រី ហ៊ុន សែន បានចេញសរាចរ ៤ចំណុច ដើម្បីទប់ស្កាត់ការវាយកម្ទេច និងបំផ្លិចបំផ្លាញសំណង់អគារបេតិកភណ្ឌ។ ក្នុងនោះ រាល់សំណង់អគារបេតិកភណ្ឌ ដែលត្រូវជួសជុល កែប្រែរូបរាង ឬវាយកម្ទេចចោល ត្រូវស្នើសុំការពិនិត្យ និងសម្រេចពីក្រសួងវប្បធម៌ និងវិចិត្រសិល្បៈ និងអាជ្ញាធរពាក់ព័ន្ធជាមុនសិន។ សារាចរ ចុះថ្ងៃទី១២ ខែតុលា ឆ្នាំ២០២១ ចុះហត្ថលេខាដោយសម្តេចតេជោ ហ៊ុន សែន បង្ហាញថា រាជរដ្ឋាភិបាល បានពិនិត្យឃើញថា សព្វថ្ងៃ ដោយសារទំនើបកម្ម បណ្តាលឲ្យមានការបាត់បង់ ការវាយបំផ្លិចបំផ្លាញ ការធ្វើឲ្យខូចខាតតាមគ្រប់រូបភាពជាបន្តបន្ទាប់ ចំពោះសំណង់អគារបេតិកភណ្ឌ ដែលស្ថិតនៅក្នុងតំបន់បេតិកភណ្ឌទីក្រុង តាមបណ្តារាជធានីខេត្ត ដែលជាសម្បត្តិបេតិកភណ្ឌជាតិដ៏មានតម្លៃ ហើយមានការប្រឈមនឹងហានិភ័យ និងស្ថិតក្រោមការគំរាមកំហែងខ្ពស់ដោយការអភិវឌ្ឍ ដែលទាមទារឲ្យមានការថ្លឹងថ្លែងរវាងការអភិរក្ស និងការអភិវឌ្ឍ គឺត្រូវតែមានតុល្យភាព។ហេតុនេះ ដើម្បីឲ្យការងារអភិរក្សតំបន់បេតិកភណ្ឌទីក្រុង ដែលមានសំណង់អគារសាសនាផ្សេងៗ សំណង់សាធារណៈ សំណង់ឯកជន ភូមិដ្ឋាន និងផ្ទះបុរាណ ស្របតាមច្បាប់ ស្តីពី កិច្ចការពារបេតិកភណ្ឌវប្បធម៌ ដែលប្រកាសឲ្យប្រើដោយព្រះរាជក្រម ចុះថ្ងៃទី២៥ ខែមករា ឆ្នាំ១៩៩៦ រាជរដ្ឋាភិបាល សូមធ្វើការណែនាំ ដូចខាងក្រោម៖១-ហាមឃាត់ចំពោះការកែប្រែ ការប្តូររូបរាងខាងក្រៅ ឬធ្វើឲ្យខូចខាតសោភ័ណភាពចំពោះសំណង់នៃតំបន់បេតិកភណ្ឌទីក្រុង។២-ទប់ស្កាត់ការវាយកម្ទេច និងបំផ្លិចបំផ្លាញសំណង់វប្បធម៌ ប្រវត្តិសាស្ត្រ សំណង់បុរាណ និងសំណង់អគារបេតិកភណ្ឌ ដើម្បីការពារឲ្យបានគង់វង្ស។៣-បញ្ឈប់ជាបន្ទាន់ចំពោះការបំផ្លាញអគារបេតិកភណ្ឌក្នុងតំបន់ការពារ និងក្រៅតំបន់ការពារ ដោយផ្តោតលើយុទ្ធសាស្ត្រ គោលនយោបាយ និងផែនទីចង្អុលបង្ហាញ ដើម្បីជំរុញការអភិរក្ស និងការអភិវឌ្ឍទីក្រុងបេតិកភណ្ឌប្រកបដោយនិរន្តរភាព។៤-សំណង់អគារបេតិកភណ្ឌ ដែលនឹងត្រូវធ្វើការជួសជុល កែប្រែរូបរាង ឬវាយកម្ទេចចោល ត្រូវស្នើសុំការពិនិត្យ និងសម្រេចពីក្រសួងវប្បធម៌ និងវិចិត្រសិល្បៈ និងអាជ្ញាធរពាក់ព័ន្ធជាមុនសិន។ សម្តេចតេជោ ហ៊ុន សែន បានណែនាំដល់គ្រប់ក្រសួង ស្ថាប័ន រដ្ឋបាលរាជធានី ខេត្ត ត្រូវអនុវត្តឲ្យមានប្រសិទ្ធភាព និងដោយស្មារតីទទួលខុសត្រូវខ្ពស់នូវសារាចរថ្មីនេះ៕  អត្ថបទ៖ លី ម៉េងហួរ        រូបភាព៖ ឯកសារ  

១៥ តុលា ២០២១
ព័ត៌មានជាតិផ្សេងទៀត

Copyright © 2016 PNN NEWS. All Rights Reserved.