ផ្សារម៉ាក្រូ ដែលទើបតែបើកសម្ពោធសាងសង់ កាលពីចុងខែឧសភាកន្លងទៅនេះ គ្រោងនឹងបញ្ចប់រួចរាល់ព្រម​ទាំង​បើកដំណើរការលក់ នៅចុងខែតុលាខាងមុខនេះ​។ តំណាងក្រុមហ៊ុនមួយនេះ អះអាងថា គ្រោងនឹងពង្រីកសាខាឲ្យបាន ៩កន្លែង នៅទូទាំងប្រទេសកម្ពុជា បន្ទាប់ពីគម្រោងទី១របស់ផ្សារលក់ទំនិញបោះដុំនេះ បើកលក់ជាផ្លូវការ។ ការ​ដំណើរ​ការ​ផ្សារទំនើបនេះ រំពឹង​ថា​នឹងផ្ដល់ឱកាសការងារជាង ២៧០កន្លែងដល់​ប្រជាជនកម្ពុជា។  នាយកគ្រប់គ្រងទូទៅផ្សារម៉ាក្រូ លោក ថាណាភុប ប្រាកខនសុង បានលើកឡើងថា គិតមកទល់ពេលនេះ ផ្សារម៉ាក្រូ ត្រូវបានសាងសង់រួចរាល់ប្រមាណ ៧០%ហើយ ខណៈដែលបច្ចុប្បន្នក្រុមហ៊ុននេះ បាននិងកំពុងតែធ្វើការជ្រើសរើសបុគ្គលិកបន្ថែម និងបំពាក់បំប៉នសមត្ថភាពដល់ពួកគេ ដើម្បីអាចចូលធ្វើការបាននៅទីតាំងផ្សារម៉ាក្រូ ដែលសាងសង់រួច នៅចុងខែតុលាខាងមុខនេះ។ លោក ថាណាភុប បានបន្ដទៀតថា ក្រោយពីគម្រោងទី១នេះ បានបញ្ចប់ ក្រុមហ៊ុនក៏គ្រោងនឹងពង្រីកគម្រោងទី២ របស់ខ្លួន ក្នុងពេលឆាប់ៗខាងមុខ និងគ្រោងពង្រីកសាខាបន្ថែមទៀតឲ្យបានដល់ ៩សាខា នៅទូទាំងប្រទេសកម្ពុជា។  ផ្សារម៉ាក្រូនេះ បាននិងកំពុងសាងសង់លើផ្ទៃដីសរុប ៥ហិកតា ក្នុងនោះមាន ១ម៉ឺនម៉ែត្រការ៉េ គឺជាទីតាំងសំខាន់ សម្រាប់ការលក់ទំនិញ​ប្រកបដោយផាកសុកភាព ព្រមជាមួយនឹងចំណតយានយន្ដជាង ៥០០គ្រឿងផងដែរ។ សូមជម្រាបដែរថា ផ្សារម៉ាក្រូ ត្រូវបានវិនិយោគរួមគ្នា រវាងក្រុមហ៊ុនក្នុងស្រុក អិលវ៉ាយភី គ្រុប ជាមួយនឹងក្រុមហ៊ុន ស៊ីភី គ្រុប របស់ថៃ។ បើតាមការអះអាងពីនាយកគ្រប់គ្រទូទៅផ្សារមួយនេះ ក្រៅពីមានលក់ទំនិញបោះដុំ ផ្សារ​ទំនើបនេះ អាចនឹងមានហាងលក់ និងផ្ដល់សេវាកម្មប្រមាណតែ ៥កន្លែងប៉ុណ្ណោះ ដែលជាដៃគូ និងជាក្រុមហ៊ុនបុត្រសម្ព័ន្ធរបស់ស៊ីភីគ្រុប៕  ប្រភព៖ PNN News

ជំនាញគ្រប់គ្រង បានក្លាយជាប្រភេទការងារ ដែលបានផ្តល់ឳកាសការងារច្រើនបំផុត ​ក្នុងរយៈពេលពីរឆ្នាំ​ចុងក្រោយនេះ។ ហើយជាជំនាញ ដែលមានការចាប់អារម្មណ៍ខ្លាំងជាងគេ ក្នុងចំនោមអ្នករកការងារធ្វើផងដែរ។ តម្រូវការនេះ បានជំរុញឲ្យ មុខតំណែងគ្រប់គ្រង មានកំណើនប្រមាណ ២៥០០ កន្លែង និង បានទាក់ទាញ បេក្ខជនជិត ៧០០០នាក់ សម្រាប់មុខតំណែងនេះ។ នេះបើយោងតាមរបាយការណ៍សង្ខេបរបស់វ៉េបសាយការងារ everjobs ដែលទើបចេញផ្សាយថ្មីៗនេះ។          ហេតុអ្វីបានជាមានការកើនឡើង នៅចំនួនអ្នកជំនាញគ្រប់គ្រងច្រើនយ៉ាងដូច្នេះ? អ្នកជំនាញ​ បាន​អះ​អាងថា ការកើនឡើងនៃតម្រូវការមុខតណែង​គ្រប់គ្រងនេះ វាស្រប​ទៅនឹងការកើន​ឡើង​នៃក្រុមហ៊ុនដែលបានចុះបញ្ជីបើកអាជីវកម្មថ្មីៗ នៅប្រទេសកម្ពុជាយើង ហើយហេតុការ​ទំាងអស់នេះ វាកើតចេញពីកំណើនសេដ្ឋកិច្ច និង ស្ថេរភាពនយោយជាដើម។ រូបភាព៖ លោកប៉ែន បូណា នាយកគ្រប់គ្រងផ្នែកព័ត៌មាន​របស់​ស្ថានីយទូរទស្សន៍ភីអិនអិន។ របាយការណ៍ពីក្រសួងពាណិជ្ជកម្ម បង្ហាញថា ក្រុមហ៊ុនចុះបញ្ជីថ្មី ការិយាល័យតំណាង​ពាណិជ្ជ​កម្ម និង សាខាក្រុមហ៊ុនបរទេសមានចំនួនជិត ៣០០០ ក្រុមហ៊ុន ក្នុងឆ្នាំ ២០១៦កន្លងមក។  របាយការណ៍ដដែលនេះ បានបង្ហាញថា បានធ្វើការវិភាគលើការងារផ្នែកគ្រប់គ្រងនេះ បានបង្ហាញថានិយោជកជ្រើសបុគ្គលិកផ្នែក​គ្រប់គ្រងនេះ គឺពឹងផ្អែកលើជំនាញការធ្វើផែនការប្រមាណ២៣% ជំនាញផ្នែកលក់ ២០% ជំនាញផ្នែកទីផ្សារ​ប្រមាណ​១៤% ក្រៅពីនោះគឺត្រូវមានជំនាញផ្សេងៗទៀត៕ ប្រភព៖ PNN News

អ្នកជំនាញវិស័យអភិវឌ្ឍន៍អលចនទ្រព្យ នៅកម្ពុជា បានលើកឡើងថា ​ការបើកអាជីវកម្ម​​ភោជនីយ​ដ្ឋាន សណ្ឋាគារ អគារការិយាល័យ អគារអាផាតមិន និងលំនៅដ្ឋានជួល​អាចនឹង បាត់​បង់​តម្លៃ​​ទីផ្សារ ប្រសិន​បើខ្វះចំណត។ អ្នកជំនាញ បានចាត់ទុកបញ្ហានេះថា ជារបាំងដែល មិន​អាចធ្វើឲ្យ​អាជីវកម្មឈានទៅរកភាពជោគជ័យ។  លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ KFA បានប្រាប់ភីអិនអិនថា​ ការ​អភិវឌ្ឍន៍​​វិស័យសំណង់ បានឈានមកដល់ដំណាក់កាលមួយរីកចម្រើនហើយ ប៉ុន្តែបញ្ហា នៃការៀបចំចំណតនៅ​មាន​ចំណុចខ្វះខាត និង​នៅតែជាឧបសគ្គ​ ខណៈ​ការចតរថយន្ត​នៅ​លើផ្លូវកើនឡើង។ លោកថា ចំណត​គឺជារឿងសំខាន់​ ក្នុងការកំណត់ភាពជោគជ័យរបស់​អាជីវកម្ម។  រាល់ការអភិវឌ្ឍន៍សំណង់ទាំងអស់​ ត្រូវតែគោរពទៅតាមបទដ្ឋាន​បច្ចេកទេសសំណង់ របស់​ក្រសួងរៀបចំដែនដីនគរូបនីយកម្ម និងសំណង់​ ដែលបានកំណត់​ទៅលើចំណត ចំណីផ្លូវ និង​លំហ​បៃតង​។  លោកឧកញ៉ា ចេង ខេង អគ្គនាយកក្រុមហ៊ុនអលនទ្រព្យ ស៊ីភីអិល ថ្លែងថា ការសាងសង់ ដែល​រក្សាទុកចិញ្ចើមផ្លូវ លំហបៃតង និងកន្លែងចតរថយន្ត ងាយស្រួលគ្រប់គ្រាន់ ធ្វើឲ្យអចលនទ្រព្យ​នោះ មានតម្លៃថ្លៃ និងមានការគាំទ្រពីអតិថិជន។   សូមជម្រាបថា បើទោះបីកន្លងមកសាលារាជធានីភ្នំពេញ​ មាន​គម្រោងលុប​ចំណតរថយន្តតាម​ផ្លូវ​សំខាន់ៗ​មួយចំនួន ​នៅ​រាជធានីភ្នំពេញក៏ដោយ ក៏ការចតរថយន្ត​នៅលើផ្លូវ នៅតែបន្ត​កើត​មាន​​ច្រើនដដែល។ ហើយនៅបច្ចុបប្បន្ននេះ ការចតរថយន្តនៅលើផ្លូវសាធារណៈនេះ មិន​ត្រឹម​តែ​បង្ក​ឲ្យមាន​​បញ្ហា​កកស្ទះប៉ុណ្ណោះទេ ថែមទាំងធ្វើ​ឲ្យ​មានគ្រោះ​ថ្នាក់ចរាចរណ៍កើត​ឡើងជា​ច្រើន​ផងដែរ៕  សូមទស្សនាព័ត៌មានជាវីដេអូ៖   ប្រភព៖ PNN News

 ២ឆ្នាំចុងក្រោយនេះ គម្រោងការផ្លាស់ប្តូរអំពូលភ្លើងដែលមានស្រាប់ នៅតាមទីសាធារណៈ ក្នុងរាជធានីភ្នំពេញ របស់ក្រុមហ៊ុន ភ្នំពេញ អភិវឌ្ឍន៍ វិស្វកម្ម និង សំណង់ សម្រេចលទ្ធផលប្តូរអំពូលភ្លើងបានជាង ១ម៉ឺន៤ពាន់គ្រាប់ហើយ។ គម្រោងប្តូរអំពូលភ្លើងនេះ ត្រូវបានធ្វើឡើង កាលពីខែកក្កដា ឆ្នាំ ២០១៦ រវាងសាលារាជធានីភ្នំពេញ និងក្រុមហ៊ុនភ្នំពេញ អភិវឌ្ឍន៍ វិស្វកម្ម និងសំណង់។  ការកែប្រែហេដ្ឋារចនាសម្ព័ន្ធតភ្ជាប់អំពូលភ្លើងនេះ គឺធ្វើឡើងក្នុងគោលបំណងមួយផ្នែកធំ ដើម្បីជួយសន្សំសំចៃថាមពលអគ្គីសនី និងជួយលើកសម្រស់រាជធានីភ្នំពេញ ក៏ដូចជាជួយ អភិវឌ្ឍន៍ សង្គមផងដែរ។ លោកឧកញ៉ា ហ៊ុន ឡាក់ អគ្គនាយក ក្រុមហ៊ុន ភ្នំពេញ អភិវឌ្ឍន៍ វិស្វកម្ម និងសំណង់ បានប្រាប់ភីអិនអិនថា គិតមកដល់ពេលនេះ ក្រុមហ៊ុនភ្នំពេញ អភិវឌ្ឍន៍ វិស្វកម្ម និងសំណង់ បានធ្វើការជួសជុល ដោះដូរបង្គោលភ្លើង និងបំពាក់អំពូលប្រភេទ LED នៅតាមមហាវិថីធំៗ ក្នុងរាជធានី និង តាមដងវិថីថ្មីជាច្រើនទៀត។ ពិសេសជាងនេះទៅទៀត ក្រុមហ៊ុនលោកឧកញ៉ា ក៏បានរៀបចំតុបតែងអំពូលអគ្គិសនី នៅទីតំាងសំខាន់ៗ ដូចជា វិមានឯករាជ្យ វត្តភ្នំ សួនច្បារសម្តេចហ៊ុន សែន រូបសំណាកសម្តេចសង្ឈជូន ណាត ទីតម្កល់ព្រះបរមរូប ព្រះបរមរតនកោដ ព្រះបាទសម្តេចនរោត្តម សីហនុ និង កន្លែងផ្សេងទៀត។ លោកឧកញ៉ា ហ៊ុន ឡាក់ គម្រោងការផ្លាស់ប្តូរអំពូលនេះ នឹងជួយសន្សំសំចៃថាមពលអគ្គីសនី បានរហូតដល់ ៤៥ ទៅ៥០ភាគរយ។ ចំណែកសេវាសាធារណៈ នឹងកាន់តែល្អជាងមុន។ លោកឧកញ៉ា បន្តថា នេះគឺជាការចូលរួមចំណែក ក្នុងស្តារ និង អភិវឌ្ឍន៍រាជធានីភ្នំពេញ ឲ្យមានការជឿនលឿន ដូចបណ្តាប្រទេសក្នុងតំបន់។ សូមជម្រាបផងដែរថា ការផ្តល់សិទ្ធិប្រតិបត្តិការគម្រោងនេះគឺក្រុមហ៊ុនភ្នំពេញអភិវឌ្ឍន៍ វិស្វកម្ម និងសំណង់ ត្រូវចំនាយទុនវិនិយោគរយៈពេលវែងប្រមាណ ២០លានដុល្លារ ហើយក្រុមហ៊ុននេះ មានសិទ្ធិអនុវត្តគម្រោងនេះរយៈពេល ២០ ឆ្នាំ ចាប់ពីឆ្នាំ ២០១៦ រហូតដល់ឆ្នាំ ២០៣៦៕ ប្រភព៖ PNN News

ការចំណាយលើប្រាក់បៀវត្សរបស់មន្ត្រីរាជការ ត្រូវបានប្រមុខដឹកនាំ​កម្ពុជា លើកឡើងនូវក្ដីព្រួយបារម្ភ ខណៈដែលចំនួនមន្ត្រីរាជការកាន់តែមានច្រើន និងការដំឡើងប្រាក់បៀវត្ស ក៏ទើបតែមានជាបន្តបន្ទាប់ផងដែរ។ សម្តេចតេជោ ហ៊ុន សែន បានថ្លែងកាលពីថ្ងៃទី ២២សីហា ឆ្នាំ២០១៧ថា ការចំណាយ​ថវិការដ្ឋ​លើ​បុគ្គលិក​មន្ត្រីរាជការមានជាង ៥០ ភាគរយ​​​នៃ​ចំណាយ​ចរន្ត និង​ស្មើ ៦ ភាគរយ​នៃ​ផលិតផល​ក្នុងស្រុក​សរុប។ (រូបភាពពី ទំព័រហ្វេសប៊ុកសម្តេច ហ៊ុន សែន។)  ឆ្លើយតបទៅនឹងការចំណាយលើសកំណត់នេះ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ក៏បានណែនាំឲ្យរដ្ឋមន្ត្រីក្រសួងសេដ្ឋកិច្ច ធ្វើការកាត់បន្ថយចំនួនមន្ត្រីរាជការថ្មីៗ ដែលស្ថានប័ននានាស្នើសុំដើម្បីចូលក្របខណ្ឌរដ្ឋនៅឆ្នាំ២០១៨នេះ និងសំដៅធ្វើយ៉ាងប្រើប្រាស់ធនធានមនុស្សដែលមានស្រាប់​ឲ្យអស់សមត្ថភាព។ សូមទស្សនាព័ត៌មានជាវីដេអូ៖    គួររម្លឹក​​ដែរថា យោងតាមរបាយការណ៍របស់ធនាគារពិភពលោក កម្មវិធីបង្កើនប្រាក់ខែ ៤ដងក្នុងវិស័យសាធារណៈរបស់កម្ពុជា នៅចន្លោះឆ្នាំ ២០១៣ ដល់ឆ្នាំ២០១៨នេះ កំពុងបង្កើនសម្ពាធសារពើពន្ធ ដោយហេតុថា បញ្ជីប្រាក់ខែសាធារណៈ ឬមន្ត្រីរាជការនេះ មានទំហំប្រមាណ ៤០%នៃចំណូលជាតិរួចទៅហើយ។ របាយការណ៍ដដែលបង្ហាញទៀតថា សម្ពាធនៃការចំណាយក្នុងវិស័យសាធារណៈនេះ ក៏ជាហានិភ័យមួយ​ដែល​កំពុង​លេច​ឡើង​អាច​ប៉ះពាល់ដល់លំអានអភិវឌ្ឍសេដ្ឋកិច្ចកម្ពុជាផងដែរ៕   ប្រភព៖ PNN News

លោក Eguchi Takashi ប្រធានក្រុមហ៊ុន Creed Cambodia បានលើកឡើងថា រហូតមកទល់ពេលនេះ​ ក្រុមហ៊ុនរបស់លោក បានវិនិយោគលើគម្រោងអចលនទ្រព្យនៅកម្ពុជា ៣គម្រោងហើយ ដែលក្នុងនោះមានដូចជា គម្រោងខុនដូ Bodaiju គម្រោងបុរីមហាសែនសុខ និងគម្រោងទី៣ ដែលទើបបើកសម្ពោធសាងសង់នាពេលថ្មីៗនេះ គឺគម្រោងសួនលំនៅដ្ឋាន Arata ដែលចំនាយទុនប្រមាណជាង ២០លាន លើផ្ទៃដីសាងសង់សរុបជាង ១២ហិកតា។ បើតាមការបញ្ជាក់ពី ប្រធានក្រុមហ៊ុន Creed Cambodia បានឲ្យដឹងថា គិតមកទល់ពេលនេះ ក្រុមហ៊ុនជប៉ុនមួយនេះ បានវិនិយោគលើគម្រោងលំនៅដ្ឋានទាំងបីខាងលើ គិតជាទឹកប្រាក់សរុបមានប្រមាណជាង ៧០លានដុល្លារ និងកំពុងសិក្សាលើគម្រោង​ថ្មីៗ​បន្ថែមទៀត។   បើតាមរបាយការណ៍រ​បស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា គិតត្រឹម៦ខែឆ្នាំ២០១៧នេះ គម្រោងសាងសង់បុរីលំនៅឋាន ឬលំនៅឋានមានលក្ខណៈបុរីថ្មីៗ មាន១៤ទីតាំង ហើយបើគិតមកទល់ពេលបច្ចុប្បន្ន គម្រោងលំនៅឋានប្រភេទនេះមានសរុបរហូតដល់១៥៣ទីតាំង ដែលបាននិងកំពុងប្រមូលផ្ដុំគ្នាសាងសង់នៅតំបន់សំខាន់ៗមួយចំនួនដូចជា តំបន់ក្បែរផ្លូវជាលេខ៤ ផ្លូវជាតិលេខ៦ ផ្លូវជាតិលេខ១ តំបន់ស្ថិតក្នុងខណ្ឌសែនសុខ ខណ្ឌឬស្សីកែវ និងតំបន់អរិក្សត្រជាដើម៕ សូមទស្សនាព័ត៌មានជាវីដេអូ៖  ប្រភព៖ PNN News   

ការប្រមូលផលស្រូវនៅអំឡុងខែកក្កដា-សីហា ឆ្នាំនេះ ចាប់ផ្ដើមជួបនឹងបញ្ហាធ្លាក់ថ្លៃគួរឲ្យកត់សម្គាល់ ស្របពេលដែលទន្និផលស្រូវ នៅឆ្នាំ២០១៧-២០១៨ ត្រូវបានគេរំពឹងថា នឹងអាចកើនឡើង ដល់ជាង១០លានតោន។ ដើម្បីឆ្លើយតបទៅនឹងបញ្ហាធ្លាក់ចុះនៃតម្លៃស្រូវ ក្រសួងសេដ្ឋកិច្ច និងហិរញ្ញវត្ថុ បានបើកកិច្ចប្រជុំពិភាក្សាជាមួយបណ្ដាស្ថាប័នរដ្ឋ និងឯកជនដែលពាក់ព័ន្ធជាច្រើន ដើម្បីស្វែងរកអន្តរាមន៍ ចំពោះ​បញ្ហា​ស្រូវ​អង្ករ​ សម្រាប់​រយៈពេល​ខ្លី។  បញ្ហាទីផ្សារស្រូវអង្ករនៅតែជាបញ្ហាដ៏រសើបរបស់រាជរដ្ឋាភិបាលក្នុងការស្វែងរកដំណោះស្រាយជូនប្រជាពលរដ្ឋ ខណៈដែលតម្លៃស្រូវអង្ករនៅកម្ពុជានៅរដូវប្រមូលផលនៃពាក់កណ្ដាលឆ្នាំនេះ បាននឹងកំពុងបន្តធ្លាក់ចុះគួរឲ្យកត់សម្គាល់ ពោលគឺនៅខេត្តមួយចំនួនបានធ្លាក់មកនៅក្រោម ៧បាត ឬប្រមាណតែ ៨០០រៀលប៉ុណ្ណោះ ក្នុង ១គីឡូក្រាម។ ថ្លែងក្នុងកិច្ចពិភាក្សាលើយន្ដការអន្តរាគមន៍នេះ ឯកឧត្តម វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងពី បទអន្តរាគមន៍ ៥ចំណុច ដើម្បីជាការដោះស្រាយបញ្ហាធ្លាក់ចុះថ្លៃស្រូវអង្ករកម្ពុជា។  ឯកឧត្តម វង្សី វិស្សុត បន្ថែមថា យន្តការរយៈពេលខ្លីដែលរាជរដ្ឋាភិបាលដាក់ចេញ ដើម្បីរក្សាស្ថិរភាពថ្លៃស្រូវអង្ករនាពេលនេះ មិនបានធ្វើឲ្យឃ្លាតចាកពីគោលការណ៍ រយៈពេលវែង ដែលមានស្រាប់ជាធរមានរបស់រដ្ឋាភិបាលឡើយ ប៉ុន្តែឯកឧត្តម អះអាងថា នេះគឺជាការអន្តាគមន៍ដោយផ្តោតសំខាន់ទៅលើហេដ្ឋារចនាសម្ព័ន្ធ មានឃ្លំាង និងឡសម្ងួតជាដើម ប៉ុន្តែដើម្បីឲ្យសម្រេចបាននូវគោលដៅនេះតម្រូវមានកិច្ចសហការល្អរវាងរាជរដ្ឋាភិបាល និងវិស័យឯកជន។  សូមបញ្ជាក់ដែរថា គិតមកត្រឹម ៧ខែឆ្នាំ២០១៧ ការនាំចេញអង្កររបស់កម្ពុជា សម្រេចបានជាង ៣១ម៉ឺនតោន ខណៈដែលកាលពីពេលថ្មីៗនេះ​ ប្រទេសបង់ក្លាដេស ក៏ទើបតែចុះហត្ថលេខាទិញអង្ករពីកម្ពុជាចំនួន ១លានតោន ក្នុងរយៈពេល ៥ឆ្នាំផងដែរ។ ការ​ធ្លាក់​ចុះ​តម្លៃ​អង្ករ​នៅ​លើ​ទីផ្សារ​អន្តរជាតិ ដោយ​សារ​ការ​ប្រកួត​ប្រជែង​ច្រើន រួម​ជាមួយ​នឹង​ការ​ហូរ​ចូល​អង្ករ​ពី​ប្រទេស​វៀតណាម។ បញ្ហា​ទំាង​អស់​នេះ​ហើយ ​ដែល​ធ្វើ​ឲ្យ​ឈ្មួញ​អង្ករ ​និង​កសិករ​ខ្មែរ​ដង្ហោយ​ស្វែង​រក​អន្តរាគមន៍​ពី​រាជ​រដ្ឋាភិបាល​កម្ពុជា៕  សូមទស្សនាព័ត៌មានទាំងស្រុង៖   ប្រភព៖ PNN News    

 រដ្ឋាភិបាលកម្ពុជា ប្រកាសធ្វើឲ្យ ខេត្តព្រះសីហនុ ទាំងមូលក្លាយជា តំបន់ឧស្សាហកម្ម គំរូរបស់ប្រទេស ដែលនឹងយកលំនាំ ការអភិវឌ្ឍន៍ តំបន់សេដ្ឋកិច្ចពិសេស «សេនចេន» របស់ចិន។ ខេត្តដែលជាប់ សមុទ្រមួយនេះ មានអំណោយផល ទីតាំងភូមិសាស្រ្តដ៏ធំធេងសម្រាប់ កម្ពុជា ក្នុងការផ្សាភ្ជាប់ ​ពាណិជ្ជកម្មរបស់ខ្លួន ទៅក្នុងតំបន់ ខណៈដែល កម្ពុជា នឹងចូលរួមក្នុងសមាហរណកម្ម សេដ្ឋកិច្ចអាស៊ាន ចាប់ពីចុងឆ្នាំ ២០១៥ នេះតទៅ។គម្រោងបង្កើត តំបន់សេដ្ឋកិច្ចពិសេស គំរូនៅខេត្តព្រះសីហនុ មួយនេះបានដាក់ចូលជាផែនការ អទិភាពរបស់រដ្ឋាភិបាលរួចហើយ ក្នុងគោលនយោបាយ អភិវឌ្ឍន៍ឧស្សាហកម្មឆ្នាំ ២០១៥ - ២០២៥។  រដ្ឋាភិបាលរំពឹងថា តំបន់សេដ្ឋកិច្ចពិសេសនេះ នឹងរួមចំណែកជំរុញ ប្រភេទឧស្សាហកម្ម នៅកម្ពុជាកាន់តែ ចម្រុះឡើង បន្ថែមពីប្រភេទឧស្សាហកម្ម រោងចក្រកាត់ដេរ ដែលមានស្រាប់។ឯកឧត្តម សុខ ចិន្តាសោភា អគ្គលេខាធិការ ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានឲ្យដឹងថា រដ្ឋាភិបាល បានយល់ឃើញ ពីអត្ថប្រយោជន៍ ក្នុងការបង្កើត តំបន់សេដ្ឋកិច្ចពិសេស សម្រាប់ជំរុញកំណើនសេដ្ឋកិច្ច ជាពិសេសបានស្ញប់ស្ញែង ពីការអវត្តន៍យ៉ាង ជោគជ័យរបស់ប្រទេសចិន ដែលបានបង្កើត តំបន់សេដ្ឋកិច្ចពិសេស សេនចេន ហើយធ្វើឲ្យវិស័យឧស្សាហកម្ម រីកចម្រើនយ៉ាងខ្លាំង។ លោកបន្តថា ខេត្តព្រះសីហនុ គឺជាទីតាំងដែលល្អឥតខ្ចោះ ដើម្បីឲ្យកម្ពុជាអាចបង្កើត តំបន់សេដ្ឋកិច្ចពិសេស ដោយជោគជ័យ។តំបន់សេដ្ឋកិច្ចពិសេស គឺជាទីតាំងវិនិយោគ ដែលបង្កើតឡើងសម្រាប់ ទាក់ទាញវិនិយោគផ្ទាល់ ពីបរទេស ដែលជាទូទៅរដ្ឋាភិបាល បានផ្តល់លក្ខ័ណ្ឌលើកទឹកចិត្ត ផ្សេងៗដូចជា ការអនុគ្រោះពន្ធ ការបម្រើជូនសេវា ច្រកចេញចូលតែមួយ ការសម្រួលបែបបទនាំចេញ នាំចូលទំនិញ ការសម្រួល បែបបទរដ្ឋបាលនានា និង លក្ខ័ណ្ឌផ្សេងៗទៀតជាច្រើន ដើម្បីជំរុញសកម្មភាព វិនិយោគ។លោក ហ៊ីរ៉ូស៊ិ យូអ៊ីម៉ាត់ស៊ុ អគ្គនាយក តំបន់សេដ្ឋកិច្ចពិសេស ក្រុងភ្នំពេញ ដែលជាតំបន់សេដ្ឋកិច្ចធំជាងគេ នៅកម្ពុជាបានបង្ហាញ ពីសុទិដ្ឋិនិយម ​​ពីបរិយាកាសវិនិយោគ នៅកម្ពុជាខណៈ ដែលតំបន់របស់លោក បានរីកចម្រើន ជាបន្តបន្ទាប់។លោកថា កម្ពុជានឹងអាចចាប់យក ឱកាសនៃការធ្វើ សមាហរណកម្ម សេដ្ឋកិច្ចតំបន់ ដើម្បីធ្វើពិពិធកម្ម ផ្នែកសេដ្ឋកិច្ច និងធ្វើឱចំនួនវិនិយោគ បរទេសនៅកម្ពុជា កាន់តែចំរុះឡើង»។ ប្រមុខរាជរដ្ឋាភិបាលកម្ពុជា កាលពីចុងខែសីហា បានប្រកាសដាក់ឲ្យអនុវត្តន៍ គោលនយោបាយ អភិវឌ្ឍន៍ឧស្សាហកម្ម ដែលជាផែនទីចង្អុលផ្លូវ ដ៏ថ្មីសន្លាងមួយសម្រាប់ អភិវឌ្ឍន៍វិស័យឧស្សាហកម្ម នៅកម្ពុជា។ ការបញ្ចុះថ្លៃអគ្គីសនី សម្រាប់វិស័យឧស្សាហកម្ម និងពាណិជ្ជកម្ម ការបន្តអភិវឌ្ឍន៍ ប្រព័ន្ធដឹកជញ្ជូន ក្នុងប្រទេស ការយកចិត្តទុកដាក់ បណ្តុះបណ្តាលធនធានមនុស្ស និង ការបង្កើត តំបន់សេដ្ឋកិច្ច គំរូនៅខេត្តព្រះសីហនុ សុទ្ធសឹងជា យុទ្ធសាស្រ្តអទិភាព របស់រដ្ឋាភិបាល ក្នុងគោលនយោបាយនេះ៕

 យោងតាមរបាយការណ៍ បូកសរុបលទ្ធផលការងារ ប្រចាំឆ្នាំរបស់ ក្រសួងរៀបចំដែនដីនគរូបនីយកម្ម និងសំណង់។ នៅក្នុង ឆ្នាំ២០១៥ កន្លងទៅថ្មីៗនេះ គម្រោងសាងសង់បុរីលំនៅឋាន អគារពាពាណិជ្ជកម្ម អគារខុនដូរ អគារស្នាក់នៅរួម និង សំណង់អគារផ្សេងៗទៀត នៅទូទាំង ប្រទេសមានចំនួនសរុប ២៣០៥ គម្រោង ដែលមានទឹកប្រាក់សាង់សង់ជាង ៣ពាន់លាន ដុល្លារ កើន ៣៣ %ធៀបនឹងឆ្នាំ ២០១៤។វិស័យសំណង់ នូវតែជាវិស័យសំខាន់ជាងគេមួយ ទ្រទ្រង់កំណើនសេដ្ឋកិច្ចជាតិ និង ជម្រុញអោយការអភិវឌ្ឍ ប្រទេសកម្ពុជា កាន់តែប្រសើរក្នុង ឆ្នាំ២០១៥ កន្លងទៅនេះ។ វិស័យនេះ បានចូលរួមចំណែក ផ្តល់ការងារជូន ប្រជាពលរដ្ឋកម្ពុជា ប្រមាណពី ២០ម៉ឺនទៅ២៥ម៉ឺននាក់ ទូទំាងប្រទេស។ ក្នុងនោះនៅរាជធានីភ្នំពេញពី ៩ម៉ឺន​ ទៅ១០ម៉ឹននាក់ ធៀបកាលពីឆ្នាំទៅមិញ កើនឡើងទ្វេរដង។ គិតចាប់ពីខែមករា ដល់ខែធ្នូក្នុងឆ្នាំ២០១៥ ក្រសួងរៀបចំដែនដី បានផ្តល់លិខិតអនុញ្ញាត បើកការដ្ឋានសាងសង់ ចំនួន ១១១ គម្រោង បិតការដ្ឋានសាង​ សង់ ​៥៥ គម្រោង និងផ្តល់លិខិតជួសជុល ១០គម្រោង។ក្នុងនោះដែរ ក្រុមហ៊ុនសិក្សារគម្រោងប្លង់ និងសាងសង់ចំនួន ២៨៧ ក្រុមហ៊ុន ក្រុមហ៊ុនបរទេស៩២ និងក្នុងស្រុក១៩២ ក្រុមហ៊ុនដោយឡែក​ ចំនួន​អគារ​​ខ្ពស់ៗ នៅក្នុងរាជធានីភ្នំពេញ កម្ពស់ចាប់ពី ៥ជាន់ ឡើងទៅ ៥៥ជាន់ មាន ៦៨៥ អគារ ដែលមានបន្ទប់ស្នាក់នៅសរុបជាង ១ម៉ឺនយូនីត។ យោងតាមទិន្នន័យ ដែលទទួលបានពី ក្រសួងសេដ្ឋកិច្ច និងហិរញ្ញវត្ថុបង្ហាញថា កំណើនផលិតផលសរុប ក្នុងឆ្នាំ២០១៥ កើនឡើង ជិត ៧%​  វិស័យ​សំណង់កើនជាង ១៧% និង វិស័យអចលនទ្រព្យ និង ជំនួញកើនជិត១៩%៕

 ក្រសួងឧស្សាហកម្ម និងសិប្បកម្មបាន ធ្វើការសិក្សា ស្តីពីសុពលភាពប្រកាស នីយប័ត្រតក្កកម្ម ជាច្បាប់ការពារកម្មសិទ្ធិបញ្ញា របស់ការិយាល័យប្រកាស នីយបត្រតក្កកម្ម អឺរ៉ុប។ តំណាង ក្រសួងឧស្សាហកម្ម និង សិប្បកម្មលើកឡើងថា  កម្ពុជា មានច្បាប់ស្តីពីប្រកាស នីប័ត្រតក្តកម្ម ជាច្បាប់ការពារកម្មសិទ្ធិបញ្ញា ជាង១០ឆ្នាំមកហើយ ប៉ន្តែដោយសារតែ កង្វះខាត ធនធានមនុស្ស កម្ពុជានៅមិនទាន់អាច មានលទ្ធភាព ក្នុងការអនុវត្តន៍ច្បាប់នៅឡើយ។ថ្លែងក្នុងកម្មសិក្ខាសិលា ស្តីពីសុពលភាពប្រកាស នីយបត្រតក្កកម្ម របស់ការិយាល័យប្រកាស នីយត្រតក្តកម្មអឺរ៉ុប ឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួង ឧស្សាហកម្ម និងសិប្បកម្មមានប្រសាសន៍ថា សិក្ខានេះនឹងជួយឲ្យកម្ពុជា រៀនសូត្របន្ថែម ពីសហគមន៍អឺរ៉ុប និងអាចធ្វើកិច្ចសហប្រតិបត្តិការណ៍ ជាមួយហគមន៍អឺរ៉ុប ទាក់ទងនឹងការអនុវត្តន៍ប្រកាស នីយបត្រតក្តកម្ម នៅកម្ពុជា ខណៈដែលកម្ពុជា មិនទាន់អាចមានលទ្ធភាព អនុវត្តន៍ច្បាប់នេះនៅឡើយ។រដ្ឋមន្រ្តី រូបនេះ បានបន្ថែមទៀតថា ប្រកាសនីយបត្រតក្តកម្ម មានសារៈសំខាន់ណាស់ សម្រាប់ វិស័យឯកជន ដើម្បីអះអាងថា របបគំហើញថ្មី របស់ខ្លួននឹងត្រូវបានកាពារ ដោយច្បាប់យ៉ាងតឹងរឹង។ ដោយសារកម្ពុជា មានការខ្វះខាត ខាងអ្នកជំនាញក្នុងការត្រួតពិនិត្យប្រកាស និយត្រតក្តកម្ម ឯកឧត្តមចម ប្រសិទ្ធ បន្តថា កន្លងមកកម្ពុជា បានសហការណ៍ជា ប្រទេសសិង្ហបុរី ដើម្បីធ្វើការបញ្ហានេះ ហើយកម្ពុជា ក៍នឹងសហការណ៍ ជាមួយការិយាល័យប្រកាស នីយត្រតក្តកម្មអឺរ៉ុប បន្លែមទៀត ដើម្បីជំរុញការអនុវត្តន៍ ប្រកាសនីយត្រតក្តកម្ម នៅកម្ពុជា៕