រដូវកាលទី ៣ នៃភាពយន្តភាគដ៏ល្បីរបស់ Netflix "Squid Game" បានរក្សាចំណាត់ថ្នាក់លេខ ១ របស់ខ្លួននៅ ៩៣ ប្រទេសសម្រាប់សប្តាហ៍ទីពីរជាប់ៗគ្នា។ក្រុមហ៊ុន Netflix ក្នុងថ្ងៃពុធ ទី៩ ខែកក្កដានេះ បានឱ្យដឹងថាភាពយន្តភាគ "Squid Game" រដូវកាលទី ៣ បានរក្សាចំណាត់ថ្នាក់លេខ ១ បញ្ជី Global Top 10 នៅ ៩៣ ប្រទេសសម្រាប់សប្តាហ៍ទីពីរ ដោយបានកត់ត្រាការចូលទស្សនាចំនួន ៤៦.៣ លានដងនៅចន្លោះថ្ងៃទី ៣០ ខែមិថុនា ដល់ថ្ងៃទី ៦ ខែកក្កដា។

រយៈពេលត្រឹម ១០ ថ្ងៃបន្ទាប់ពីចេញផ្សាយ ភាពយន្តភាគនេះអាចទាក់ទាញការចូលទស្សនាសរុបដល់ជាង ១០៦ លានដងរួចទៅហើយ ធ្វើឱ្យរឿងនេះក្លាយជាស៊េរីមិននិយាយភាសាអង់គ្លេសដែលមានអ្នកទស្សនាច្រើនបំផុតទីបីនៅក្នុងប្រវត្តិសាស្ត្រ Netflix ។

ជាមួយគ្នានេះ រដូវកាលទាំងបីរបស់ "Squid Game" បច្ចុប្បន្នបានកាន់កាប់តំណែងកំពូល Top 3 នៅក្នុងបញ្ជីចំណាត់ថ្នាក់ស៊េរីមិនមែនភាសាអង់គ្លេសរបស់ Netflix។ជាក់ស្ដែង រដូវកាលទី ១ និងទី ២ ក៏បានទទួលការកើនឡើងនៃប្រជាប្រិយភាពឡើងវិញដែរចាប់តាំងពីការចេញផ្សាយរដូវកាលទី ៣ ។

ក្នុងរយៈពេលមួយសប្ដាហ៍ចុងក្រោយដូចគ្នា “Squid Game” រដូវកាលទី ២ បានជាប់ចំណាត់ថ្នាក់លេខ ២ ដោយមានអ្នកចូលមើលចំនួន ៤.៩ លានដង ខណៈដែលរដូវកាលទី ១ ជាប់ចំណាត់ថ្នាក់លេខ ៣ ជាមួយចំនួនទស្សនា ៣.៨ លានដង។

សូមបញ្ជាក់ថា ភាពយន្ត "Squid Game" រដូវកាលទី ៣ បានបន្តសាច់រឿងនៃការតស៊ូរបស់តួឯក Gi-hun នៅពេលដែលលោកបានចូលប្រកួតប្រជែងល្បែងមរណៈម្ដងទៀត ក្រោយរងការឈឺចាប់ដោយបាត់បង់មិត្តជិតស្និទ្ធបំផុតរបស់ខ្លួន។

រដូវកាលនេះក៏បានបង្ហាញពីជោគវាសនារបស់ Front Man ដ៏អាថ៌កំបាំង និងអ្នករស់រានមានជីវិតដែលនៅសេសសល់ ដោយបន្តការរិះគន់យ៉ាងខ្លាំងចំពោះធម្មជាតិយង់ឃ្នងរបស់មនុស្ស និងប្រព័ន្ធសង្គមតាមរយៈហ្គេមដែលកាន់តែមានភាពឃោរឃៅ ៕
 

ប្រែសម្រួល៖ វ៉ាន់ថន