តារាចម្រៀងជួរមុខអាមេរិក Taylor Swift និងគូស្នេហ៍ជាតារាបាល់ឱប Travis Kelce បានប្រកាសភ្ជាប់ពាក្យ យ៉ាងកក្រើកបណ្ដាញសង្គម បន្ទាប់ពីសេពគប់មើលចិត្តគ្នាជាងពីរឆ្នាំ។

ជាដំណឹងដ៏រំភើបនិងភ្ញាក់ផ្អើលសម្រាប់អ្នកគាំទ្រទូទាំងពិភពលោក ខណៈកំពូលតារាចម្រៀងប៉ុប Taylor Swift និងគូស្នេហ៍គឺកីឡាករបាល់ឱបជម្រើសជាតិអាមេរិក Travis Kelce បានប្រកាសភ្ជាប់ពាក្យជាមួយគ្នា។ 

តាមរយៈការបង្ហោះរួមគ្នាលើ Instagram កាលពីយប់ថ្ងៃទី២៦ ខែសីហា តារាទាំងពីរបានសរសេរថា "គ្រូភាសាអង់គ្លេសរបស់អ្នក និងគ្រូហាត់ប្រាណរបស់អ្នកបានរៀបការហើយ" រួមជាមួយរូបថតបង្ហាញពីការសុំរៀបការ និងចិញ្ចៀនភ្ជាប់ពាក្យដ៏ធំ។

ការប្រកាសភ្ជាប់ពាក្យនេះបានទទួលការអបអរសាទរយ៉ាងកក់ក្ដៅនៅលើបណ្ដាញសង្គមដោយមានអ្នកចុច Like ច្រើនជាង ២៤ លាននាក់នៅលើការបង្ហោះ Instagram ក្នុងរយៈពេលមិនដល់ ២៤ ម៉ោងនោះឡើយ។

សូមបញ្ជាក់ថា  គូស្នេហ៍ដែលមានអាយុ ៣៥ ឆ្នាំទាំងពីររូបនេះបានចាប់ផ្តើមទាក់ទងគ្នានៅឆ្នាំ ២០២៣ បន្ទាប់ពីតារាចម្រៀង Taylor Swift បានសម្តែងនៅពហុកីឡដ្ឋាន Arrowhead ដែលជាកន្លែងហ្វឹកហាត់របស់ Travis Kelce។ យ៉ាងណាមិញ កីឡាករបាល់ឱបរូបនេះបានបង្ហើបនៅពេលក្រោយថាលោកមិនមានឱកាសជួបនាងនៅក្នុងការសម្ដែងពេលនោះទេ។

នៅខែកញ្ញា ឆ្នាំ ២០២៣ Taylor Swift បានបង្ហាញខ្លួននៅក្នុងកម្មវិធី Chiefs Games ដើម្បីលើកទឹកចិត្តដល់ Travis Kelce ខណៈដែល Travis Kelce បានចូលរួមការប្រគំតន្ត្រីទេសចរណ៍ Eras Tour របស់ Taylor Swift នៅជាច្រើនកន្លែងដូចគ្នា។

ទន្ទឹមនឹងការប្រកាសភ្ជាប់ពាក្យ បច្ចុប្បន្ន Taylor Swift ក៏កំពុងត្រៀមចេញអាល់ប៊ុមចម្រៀងថ្មីមួយទៀតមានចំណងជើងថា “The Life of a Showgirl” នៅថ្ងៃទី ៣ ខែតុលា ខាងមុខនេះផងដែរ ៕
 

ប្រែសម្រួល៖ វ៉ាន់ថន