ភាពយន្តភាគ "Emily in Paris" រដូវកាលទី៥ បានបន្តការថតនៅទីក្រុង Venice ប្រទេសអ៊ីតាលីឡើងវិញ បន្ទាប់ពីជំនួយការអ្នកដឹកនាំរឿងបានគាំងបេះដូងស្លាប់នៅកន្លែងថត។

ក្រុមការងារថតរឿងភាគល្បី Netflix "Emily in Paris" ចាប់ផ្ដើមបន្តការថតនៅទីក្រុង Venice ប្រទេសអ៊ីតាលីឡើងវិញហើយ បន្ទាប់ពីលោក Diego Borella ដែលជាជំនួយការអ្នកដឹកនាំរឿង បានទទួលមរណភាពនៅទីតាំងថត។

ជំនួយការដឹកនាំ លោក Diego Borella បានស្លាប់ក្នុងវ័យ ៤៧ ឆ្នាំកាលពីថ្ងៃទី ២១ ខែសីហា ខណៈពេលកំពុងថតរឿង "Emily in Paris" រដូវកាលទី ៥ នៅទីក្រុង Venice បន្ទាប់ពីសន្លប់បាត់ស្មារតី។

សេចក្តីរាយការណ៍បឋមបង្ហាញថា លោកបានស្លាប់ដោយសារគាំងបេះដូង។ ក្រុមហ៊ុនផលិតភាពយន្ត Paramount Television Studios បានចេញសេចក្តីថ្លែងការណ៍ បញ្ជាក់ពីការស្លាប់ភ្លាមៗរបស់លោក និងបានចូលរួមរំលែកទុក្ខជាមួយគ្រួសារ និងមនុស្សជាទីស្រលាញ់របស់លោកក្នុងពេលវេលាដ៏លំបាកនេះ។

ក្រោយមកនៅថ្ងៃទី ២៣ ខែសីហា តារាស្រី Lily Collins ដែលសម្ដែងជាតួឯកក្នុងរឿងនេះបានត្រលប់មកកន្លែងថតវិញ ហើយបានថតរឿងជាបន្តជាមួយនឹងតារាសម្ដែងសំខាន់ផ្សេងទៀតដូចជាតារាប្រុស Eugenio Franceschini តារាស្រី Ashley Park និងតារាប្រុស Paul Forman។ ភាពយន្ត Emily in Paris រដូវកាលទី ៥ គ្រោងនឹងចាក់បញ្ចាំងលើកដំបូងនៅលើ Netflix ខែធ្នូនេះ។

សម្រាប់ Diego Borella គឺជាអ្នកដឹកនាំ និងអ្នកនិពន្ធរឿងមកពីទីក្រុង Venice និងធ្លាប់បានធ្វើការនៅទីក្រុងរ៉ូម ទីក្រុងឡុងដ៍ និងញូវយ៉ក។ ក្រៅពីនេះ លោកក៏មានស្នាដៃផ្នែកសិល្បៈ និងអក្សរសាស្ត្រជាច្រើនផងដែរ។ លោកបានស្លាប់ខណៈពេលកំពុងរៀបចំថតឈុតចុងក្រោយនៅក្នុងសណ្ឋាគារ Danieli បើទោះបីជាមានការខិតខំប្រឹងប្រែងជួយសង្រ្គោះពីសំណាក់បុគ្គលិកពេទ្យក៏ដោយ ៕
 

ប្រែសម្រួល៖ វ៉ាន់ថន