អាល់ប៊ុមខ្នាតពេញទីបួនរបស់ក្រុមចម្រៀងកូរ៉េ Stray Kids មានចំណងជើងថា "Karma" បានសម្រេចកំណត់ត្រាលក់បានរហូតដល់ជាងពីរលានបន្ទះក្នុងថ្ងៃដំបូង។ផលិតកម្ម JYP Entertainment បានឱ្យដឹងកាលពីថ្ងៃទី២៥ ខែសីហាថា ក្រុមចម្រៀងបុរសកំពូលរបស់ខ្លួនគឺ Stray Kids បានសម្រេចកំណត់ត្រាលក់អាល់ប៊ុមបានពីរលានបន្ទះក្នុងថ្ងៃដំបូងតាមរយៈអាល់ប៊ុមពេញទីបួនរបស់ខ្លួនមានចំណងជើងថា "Karma" ។ 

ទិន្នន័យផ្លូវការបង្ហាញថា អាល់ប៊ុមនេះអាចលក់បានច្រើនជាង ២ លានច្បាប់កាលពីថ្ងៃសុក្រ ដោយបានឡើងដល់កំពូលតារាងអាល់ប៊ុមប្រចាំសប្តាហ៍របស់ Hanteo និងតារាងអាល់ប៊ុមលក់រាយប្រចាំសប្តាហ៍របស់ Circle Chart ភ្លាមៗក្រោយចេញលក់។

មិនតែប៉ុណ្ណោះ នៅទីផ្សារពិភពលោក អាល់ប៊ុម "Karma" បានជាប់ចំណាត់ថ្នាក់លេខ ១ នៅលើតារាង iTunes' Worldwide Albums និង European Albums រយៈពេលបីថ្ងៃជាប់គ្នារហូតដល់ថ្ងៃអាទិត្យ ថែមទាំងបានជាប់ចំណាត់ថ្នាក់កំពូលក្នុងប្រទេសផ្សេងៗជាច្រើនរួមមាន ជប៉ុន បារាំង និងអូស្ត្រាលី។

នៅលើសេវាកម្ម Streaming សកលដូចជា Spotify អាល់ប៊ុមនេះបានទទួលការស្ដាប់សរុប ដល់ ១៨.២៦ លានដងនៅថ្ងៃចេញផ្សាយ។ ក្នុងនោះ បទចម្រៀងនាំមុខសម្រាប់អាល់ប៊ុមគឺបទ "Ceremony" បានទាក់ទាញការស្ដាប់ចំនួន ២.៥២ លានដង ដោយបានបង្ហាញខ្លួនដំបូងនៅចំណាត់ថ្នាក់លេខ ២៧ នៅលើតារាង Daily Top Songs Global របស់វេទិកា។

សូមបញ្ជាក់ថា អាល់ប៊ុមចុងក្រោយនេះគឺជាអាល់ប៊ុមខ្នាតពេញដំបូងរបស់ Stray Kids ចាប់តាំងពីអាល់ប៊ុម "5-Star" បានចេញក្នុងខែមិថុនា ឆ្នាំ ២០២៣ និងបានឆ្លុះបញ្ចាំងពីសមិទ្ធផលអស្ចារ្យជាច្រើនដែលក្រុមចម្រៀងមួយនេះបានបង្កើតឡើងតាមរយៈការខិតខំប្រឹងប្រែងរយៈពេលជាច្រើនឆ្នាំកន្លងមក ៕
 

ប្រែសម្រួល៖ វ៉ាន់ថន