តារាហូលីវូដល្បីៗរួមមាន តារាសម្ដែងអាមេរិក George Clooney, Adam Sandler និង Laura Dern បានធ្វើដំណើរទៅកាន់តំបន់កោះ Venice Lido ប្រទេសអ៊ីតាលី កាលពីពេលថ្មីៗដើម្បីចូលរួមព្រឹត្តិការណ៍មហោស្រពភាពយន្តក្រុង Venice។

ព្រឹត្តិការណ៍មហោស្រពភាពយន្តក្រុង Venice ប្រចាំឆ្នាំ២០២៥ កំពុងរៀបចំឡើងយ៉ាងអធិអធមនៅលើកោះកោះ Venice Lido ក្រោមវត្តមានតារាសម្ដែង និងផលិតករអន្តរជាតិល្បីៗជាច្រើនរួប។

ចូលរួមកម្មវិធីឆ្នាំនេះ តារាប្រុស George Clooney បាននាំយកភាពយន្តថ្មីរបស់ខ្លួនមានចំណងជើងថា “Jay Kelly” មកប្រកួតប្រជែងពានរង្វាន់ ខណៈតារាល្បីៗផ្សេងទៀតដែលបានរួមសម្ដែងក្នុងរឿងនេះក៏បានចូលរួមជាមួយគ្នាដែរដូចជា Adam Sandler, Laura Dern, Billy Crudup និង Alba Rohrwacher។ 

កម្មវិធីមហោស្រពភាពយន្តក្រុង Venice បានចាប់ផ្ដើមផ្លូវការកាលពីយប់ថ្ងៃពុធ ដោយមានការសម្ពោធបញ្ចាំងភាពយន្តអ៊ីតាលី “La Grazia” ជាពិធីបើកមហោស្រព។
នៅលើកម្រាលព្រំក្រហមនៃកម្មវិធីដែលរៀបចំឡើងនៅរោងភាពយន្ត Palazzo Del Cinema តារាសម្ដែងស្រីដ៏ល្បីពីអូស្ត្រាលី Cate Blanchett បានបង្ហាញខ្លួនក្នុងចំណោមតារាអន្តរជាតិជាច្រើនទៀតសម្រាប់ការដាក់បញ្ចាំងស្នាដៃភាពយន្តរបស់ខ្លួនមានចំណងជើងថា “After the Hunt”។ ផលិតករអ៊ីតាលី Paolo Sorrentino ដែលជាអ្នកដឹកនាំរឿង “La Grazia” ព្រមជាមួយតារាសម្ដែងក្នុងរឿងនេះក៏បានបង្ហាញខ្លួនលើកម្រាលព្រំក្រហមដូចគ្នា។

ងាកមកមើល គណៈវិនិច្ឆ័យដែលទទួលបានតួនាទីជ្រើសរើសខ្សែភាពយន្តឈ្នះពានរង្វាន់ Golden Lion ពីកម្មវិធីក្នុងឆ្នាំនេះរួមមាន អ្នកដឹកនាំរឿងអាមេរិក Alexander Payne ជាប្រធាន ខណៈសមាជិករួមមានផលិតករភាពយន្ត Stéphane Brizé, Maura Delpero, Cristian Mungiu និង Mohammad Rasoulof រួមជាមួយតារាសម្តែង Fernanda Torres និង Zhao Tao ។

កម្មវិធីមហោស្រពភាពយន្តភាពយន្តក្រុង Venice ត្រូវបានគេស្គាល់ថាជាមហោស្រពភាពយន្ដមានអាយុកាលចំណាស់ជាងគេបំផុតរបស់ពិភពលោក និងតែងតែជាវេទិកាពេញនិយមសម្រាប់បេក្ខភាពពានរង្វាន់អូស្ការ។ កម្មវិធីឆ្នាំនេះដែលជាឆ្នាំទី៨២ នឹងបន្តប្រព្រឹត្តទៅរហូតដល់ថ្ងៃទី ៦ ខែកញ្ញា ៕

ប្រែសម្រួល៖ វ៉ា់ន់ថន