ក្រុមហ៊ុនតុក្កតាចិន Pop Mart ដែលមហាជនភាគច្រើនបានស្គាល់ថាជាក្រុមហ៊ុនលក់តុក្កតា Labubu បាន​បង្ហាញភាពជឿជាក់ថាពួកគេអាចនឹងរកចំណូលបានដល់ ៤ ពាន់លានដុល្លារសម្រាប់ឆ្នាំ២០២៥នេះ។

សម្ភារតុក្កតា និងប្រដាប់ប្រដាក្មេងលេងរបស់ក្រុមហ៊ុន Pop Mart នៅតែបន្តទទួលបានប្រជាប្រិយភាពទូទាំងពិភពលោក ជាពិសេសតុក្កតា Labubu ដែលពេញនិយមយ៉ាងខ្លាំង រហូតក្លាយអាច​លក់បន្តបាន​ក្នុង​តម្លៃ​ខ្ពស់​ជាង​តម្លៃ​ដើម​ទ្វេដង។ ភាពជោគជ័យនេះបានជំរុញឱ្យអាជីវកម្មរបស់ POP MART ទទួលបាន​កំណើនមិន​ធ្លាប់មានពីមុន ហើយនាយកប្រតិបត្តិក្រុមហ៊ុនបានបង្ហើប​ថាពួកគេ​អាចនឹង​រកប្រាក់ចំណូលបាន ៤ ពាន់លានដុល្លារក្នុងឆ្នាំនេះ។

របាយការណ៍ប្រាក់ចំណូល​ប្រចាំ​ឆមាសទីមួយរបស់ POP MART បានបង្ហាញពីការកើនឡើងជិត ៤០០% នៃប្រាក់ចំណេញ ដោយសារតម្រូវការខ្ពស់ពីអតិថិជនទូទាំងពិភពលោក។ លោក Wang Ning ស្ថាបនិក និងជានាយកប្រតិបត្តិរបស់ POP MART បានចេញមុខ​បញ្ជាក់​ពី​កំណើន​ប្រាក់ចំណូលមហាសាលដែលពួកគេទទួលបាន ដោយ​បង្ហើប​ថា ក្រុមហ៊ុនជិតរកបានប្រាក់ចំណូល ២៧៨០ លានដុល្លារតាមគោលដៅដែលបានកំណត់នៅឆ្នាំ ២០២៥ ហើយ ថែមទាំងបញ្ជាក់ថាការ​រក​ចំណូល​បាន ៤ ពាន់​លាន​ដុល្លារ​ក្នុង​ឆ្នាំ​នេះ​មិន​ពិបាក​ទេ។

ភាពជោគជ័យរបស់ POP MART កើតចេញពីយុទ្ធសាស្ត្រនៃ​ការ​លក់បែប “ប្រអប់អាថ៌កំបាំង” ដែលអតិថិជន​មិនអាចទស្សន៍ទាយ​បាន​ទេ​ថាតុក្កតាមួយណាដែលពួកគេនឹងទទួលបានពី Collectionដែលពួកគេទិញ។ យុទ្ធសាស្ត្រទីផ្សារនេះផ្តល់នូវបទពិសោធន៍រំភើប និងបង្កើនចំណាប់អារម្មណ៍សម្រាប់អតិថិជន ហើយលោក Wang Ning ក៏មានទំនុកចិត្តលើកំណើនការលក់នៅក្រៅប្រទេសផងដែរ។

តម្រូវការដ៏លើសលប់សម្រាប់ផលិតផលដូចជា Labubu បានបង្ហាញកាន់តែច្បាស់ពីអំណាចនៃម៉ាកយីហោរបស់ POP MART និងនិន្នាការបច្ចុប្បន្ននៅក្នុងទីផ្សារវត្ថុអនុស្សាវរីយ៍។ គួររំឭកថា តុក្កតា Labubu ត្រូវបានក្រុមហ៊ុន Pop Mart ផលិតចេញលក់ក្នុងឆ្នាំ ២០១៩ ហើយនៅឆ្នាំ ២០២៤ តុក្កតានេះក៏មានប្រជាប្រិយភាពកាន់តែខ្លាំងនៅពេលដែល Lisa ក្រុម Blackpink បង្ហោះរូបភាពជាមួយ ៕

ប្រែសម្រួល៖ វ៉ាន់ថន