ទឹកជំនន់ បានហូរនាំលំនៅដ្ឋានជាច្រើនខ្នង និងអាគារជាច្រើន ក្រោយមានភ្លៀងធ្លាក់ខ្លាំង បង្កឱ្យកើតមានគ្រោះមហន្តរាយទឹកជំនន់ និងបាក់ដី នៅទូទាំងតំបន់ភាគខាងជើង ប្រទេសឥណ្ឌានៅថ្ងៃសុក្រ(២៩សីហា)។ 

ក្រុមសង្គ្រោះបានដើរកាត់ផ្លូវលិចទឹក ដើម្បីជួយមនុស្សម្នាជាច្រើនដែលជាប់ក្នុងលំនៅដ្ឋានលិចក្នុងទឹកជំនន់។

មនុស្ស៨ទៅ៩នាក់ ត្រូវគេបារម្ភថាជាប់នៅក្នុងគំនរបាក់បែកក្រោយកើតមានគ្រោះមហន្តរាយបាក់ដីនៅតំបន់Rudraprayag នៅថ្ងៃព្រហស្បតិ៍(២៨សីហា)។នេះបើតាមការឱ្យដឹងពីអាជ្ញាធរក្នុងតំបន់។

ភ្លៀងធ្លាក់ខ្លាំងបានបង្កការបំផ្លិចបំផ្លាញធ្ងន់ធ្ងរទាំងនៅប្រទេសឥណ្ឌានិងប្រទេសប៉ាគីស្ថាន នៅសប្តាហ៍នេះ ។ តាមការព្យាករណ៍ ឱ្យដឹងថា នៅចុងសប្តាហ៍នេះនឹងមានភ្លៀងធ្លាក់ខ្លាំងជាបន្តទៀត។ 

នៅឯប្រទេសប៉ាគីស្ថាននៅសប្តាហ៍នេះ អាជ្ញាធរ បានជម្លៀសប្រជាជនច្រើនជាង១លាននាក់ នៅខេត្តPunjab ខណៈស្ថានភាពទឹកជំនន់ជាទឹកជំនន់ធ្ងន់ធ្ងរមិនធ្លាប់មានក្នុងពេល៤០ឆ្នាំមកនេះ បានបំផ្លិចបំផ្លាញភូមិរាប់រយ និងផលដំណាំត្រូវលិចក្នុងទឹកជំនន់។ 

ប្រែសម្រួល៖ណាវ័ន្ត