លោក Narendra Modi នាយករដ្ឋមន្ត្រីឥណ្ឌា បានទៅដល់ទីក្រុងតូក្យូ នៅថ្ងៃសុក្រ(២៩សីហា)នេះ សម្រាប់កិច្ចប្រជុំកំពូលប្រចាំឆ្នាំ។ នៅប្រទេសជប៉ុន លោក Modi  រំពឹងនឹងស្វែងរកការពង្រឹងទំនាក់ទំនងយុទ្ធសាស្ត្រ ខណៈប្រទេសរបស់លោកជួបបញ្ហាដោយសារការតំឡើងពន្ធរបស់លោកប្រធានាធិបតីអាមេរិកDonald Trump។ 

ប្រភពពីមន្ត្រីជាច្រើន ឱ្យដឹងថា ដំណើរទស្សនកិច្ចរយៈពេល២ថ្ងៃរបស់លោក Modi រំពឹងនឹងមានកិច្ចពិភាក្សាទៅលើ ភាពជាដៃគូរ៉ែសំខាន់ៗ និងការវិនិយោគរបស់ប្រទេសជប៉ុនទៅលើផលិតកម្មដែលមានតម្លៃខ្ពស់នៅក្នុងប្រទេសឥណ្ឌា។  

ដំណើរទស្សនកិច្ចរបស់មេដឹកនាំឥណ្ឌា ទៅកាន់ប្រទេសជប៉ុននៅថ្ងៃសុក្រ និងថ្ងៃសៅរ៍(៣០សីហា) បានបង្កើននូវសារៈសំខាន់ ខណៈប្រទេសទាំង២ជាប្រទេសនៅក្នុងក្រុមប្រទេសQuad រួមជាមួយប្រទេសអូស្ត្រាលី និងសហរដ្ឋអាមេរិក ជាក្រុមប្រទេសដែលស្វែងរកការប្រយុទ្ធប្រឆាំងនឹងការកើនឡើងឥទ្ធិពលរបស់ប្រទេសចិននៅតំបន់ឥណ្ឌូប៉ាស៊ីហ្វិក។ 
 

ទោះជាទំនាក់ទំនងល្អក់កករជាមួយរដ្ឋាភិបាលទីក្រុងវ៉ាស៊ីនតោន, ប្រទេសឥណ្ឌា បាននិយាយថា លោកModi​និងលោកនាយករដ្ឋមន្ត្រីជប៉ុន Shigeru Ishiba នឹងពិភាក្សាទៅលើការពង្រីកកិច្ចសហប្រតិបត្តិការក្នុងក្របខណញឌនៃក្រុមប្រទេសសន្តិសុខក្នុងតំបន់។ 

ប្រែសម្រួល៖ណាវ័ន្ត