អ្នកមានជំនឿលើអាគមសាក់រាប់ពាន់នាក់បានប្រមូលផ្តុំគ្នានៅវត្តមួយក្នុងប្រទសថៃដើម្បីចូលរួមក្នុងពិធីបុណ្យបូជាដល់អាគមសាក់ប្រចាំឆ្នាំ និងគោរពបូជាដល់គ្រូសាក់ដ៏ល្បីល្បាញផងដែរ។

អ្នកជឿលើអាគមសាក់ក្នុងប្រទេសថៃរាប់ពាន់នាក់បានប្រមូលផ្តុំគ្នានៅវត្ត Bang Phra (បាងប្រាក់) ក្រុង Nakhon Pathom (ណាខន ប៉ាធំ) នៅព្រឹកព្រលឹមនៅថ្ងៃសៅរ៍ទី៨ ខែមីនាសម្រាប់ពិធីបុណ្យ "Wai Khru" ជាពិធីបុណ្យប្រចាំឆ្នាំមួយដែលត្រូវបានប្រារព្ធឡើងដើម្បីឧទ្ទិសដល់វិញ្ញាណក្ខន្ធព្រះសង្ឃ ហ្លួង ផ ពើន ជាគ្រូសាក់មន្តអាគមដ៏ល្បីល្បាញមួយរូប។

បានទទួលអនិច្ចកម្មនៅឆ្នាំ ២០០២ ក្នុងជន្មាយុ ៧៩ វស្សា ប៉ុន្តែព្រះសង្ឃ ហ្លួង ផ ពើន នៅតែមានអ្នកគោរពបូជាយ៉ាងខ្លាំង ជាពិសេសក្នុងពិធីប្រចាំឆ្នាំមួយនេះ។ក្នុង​ពិធី​នោះ គេ​ឃើញ​អ្នក​គោរព​បូជា​ខ្លះ​បាន​រងនូវបាតុភូតចម្លែកដែលគេជឿថា​វិញ្ញាណ​នៃ​សត្វ​នៅ​ក្នុង​ស្នាម​សាក់​របស់​ពួកគេចូលសណ្ឋិត ដោយខ្លះ​រត់ ខ្លះស្រែក​ហ៊ោ​កញ្ជ្រៀវ និង​បញ្ចេញ​កាយវិការដូចសត្វ​កាចៗ​ពេញ​បរិវេណវត្ត។

ព្រះតេជគុណ Tuk (ទុក) ជាចៅអធិការវត្តបាងប្រាក់ មានសង្ឃដីកាថា គោលបំណងនៃការសាក់អាគមបុរាណនេះគឺចង់ដាស់តឿនមនុស្សឱ្យប្រកាន់ខ្ជាប់សីល ៥ ក្នុងជំនឿព្រះពុទ្ធសាសនា និងបង្ហាញការគោរពចំពោះមាតាបិតា និងគ្រូអាចារ្យ ដោយធ្វើអំពើល្អ។ ព្រះតេជគុណបន្ថែមថា អ្នកដែលមានអាការប្លែកៗក្នុងពិធីបុណ្យនេះគឺមានទាំងអ្នកត្រូវចូលសណ្ឋិតពិត និងសម្ដែង ខណៈអ្នកខ្លះអាចនឹងមានសុខភាព ឬស្មារតីទន់ខ្សោយ។

គួរបញ្ជាក់ថា ពលរដ្ឋថៃជាច្រើនមានជំនឿថារូបសាក់មន្តអាគមដែលគ្របដណ្តប់លើរាងកាយ អាចការពារពួកគេពីគ្រោះថ្នាក់ នាំមកនូវសំណាងល្អក្នុងការប្រកបមុខរបរ ខណៈអ្នកខ្លះជឿថាអាចព្យាបាលជំងឺថែមទៀត។ 

អ្នកដែលបំពានសីលប្រាំនឹងធ្វើឱ្យមន្តអាគមសាក់របស់ពួកគេសាបរលាប ប៉ុន្តែពួកគេអាចមកបួងសួងពង្រឹងអាគមឡើងវិញនៅក្នុងពិធីបុណ្យប្រចាំឆ្នាំមួយនេះ ខណៈអ្នកចូលរួមគឺតម្រូវឱ្យទិញផ្កា ធូប និងបារីមួយកញ្ចប់ រួមជាមួយបច្ច័យបូជាតាមសទ្ធាជាតង្វាយសម្រាប់គ្រូសាក់ ៕
 

ប្រែសម្រួល៖ វ៉ាន់ថន