អាជីពសិល្បៈមិនសូវរកលុយបានច្រើនដូចមុនទើប ថ្មីៗនេះតារាកំប្លែងស្រី អ៊ីត និងកូនស្រី ណានណាន បានងាកមកផលិតវិដេអូប្លែកៗ ដើម្បីបង្កើនប្រាក់ចំណូល តែយ៉ាងណាអ្នកទាំង២មិនបោះបង់អាជីពកំប្លែងចោលនោះទេ ។  

ថ្មីៗនេះតារាកំប្លែង ស្រី អ៊ីត និងកូនស្រី ណានណាន បានចាប់ដៃគ្នាផលិតវិដេអូប្លែកៗនៅតាមវាលស្រែ និងតាមតំបន់នានា ដើម្បីបង្កើនប្រាក់ចំណូលផង និងដើម្បីបង្កើនប្រជាប្រិយភាពផង បន្ទាប់ពីការងារសិល្បៈមានការធ្លាក់ចុះ មិនអាចរកប្រាក់ចំណូលបានច្រើនដូចមុន ។ 

ជួបជាមួយម្ដាយ និងកូនទាំង២ កាលពីពេលថ្មីៗ អ្នកទាំងពីរបានបង្ហាញនូវអារម្មណ៍រីករាយ ដែលបានក្លាយទៅជាអ្នកផលិតវិដេអូប្លែកៗ សប្បាយៗ ដើម្បីចែករំលែកទៅកាន់មហាជន រាល់វិដេអូអ្នកទាំងពីផលិតម្តងៗមានអ្នកចូលទស្សនារាប់លាននាក់ ជាពិសេសនៅពេលដែលអ្នកទាំងពីរសម្តែងជាក្រុមគ្រួសារជាមួយ នាយក្រូច និង នាយចឺម ជាដើម...។ 

ស្របពេលដែល ស្រីអ៊ីត និង ណានណាន ចាប់ផ្តើមលេចមុខខ្លាំងនៅក្នុងការផលិតវិដេអូ អ្នកទាំងពីរនៅតែប្តេជ្ញាចិត្តមិនបោះបង់អាជីពសម្តែង និងច្រៀងចោលឡើយ បើទោះបីជាអាជីពនេះមិនសូវរកប្រាក់ចំណូលបានច្រើនដូចមុនក្តី ។   

តារាកំប្លែង ស្រីអ៊ីត មានគម្រោងរៀបការជាមួយគូស្នេហ៍របស់ខ្លួនក្នុងពេលឆាប់ៗខាងមុខ នាងថា នាងចង់រៀបការមុនកូនស្រី យ៉ាងយូរនៅឆ្នាំ ២០២៥ ។ ទស្សនិកជនជាច្រើនកំពុងទន្ទឹងរងចាំមើលតារាកំប្លែងរូបនេះដឹកដៃគូស្នេហ៍រូបសង្ហារបស់ខ្លួនចូលរោងការទៅតាមប្រពៃណី បន្ទាប់ពីបានសម្រេចរួមរស់ជាមួយគ្នាអស់ពេលជាច្រើនឆ្នាំ ៕  

អត្ថបទ ៖ ម៉ា រីសា រូបភាព ៖ អ៊ិន អាត និងហ្វេសប៊ុក