តារាសម្ដែងអ្នកនាង សឿន ផាន់ផាភួង បានជួបរឿងស៊យពេញមួយឆ្នាំខណៈលោក លាង ឧត្តម ដែលជាដៃគូស្និទ្ធ ស្នាលត្រៀមដឹកដៃគូស្នេហ៍ថ្មីមានងារជាជំទាវចូលរោងការឆាប់ៗ ។ 

ទើបតែឆ្លងថ្ងៃកំណើតយ៉ាងសប្បាយរីករាយ តារាសម្តែង សឿន ផាន់ផាភួង បែរជាបង្ហាញនូវអារម្មណ៍សោកសៅ និងមិនសប្បាយចិត្ត បន្ទាប់ពីជីវិតក្នុងឆ្នាំ២០២៤ជួបរឿងស៊យជាបន្តបន្ទាប់ ជាពិសេសពេលនេះដៃគូដែលធ្លាប់ស្និទ្ធស្នាលជាមួយនាងគឺលោក លាង ឧត្តម ត្រៀមដឹកដៃគូស្នេហ៍អនឡាញចូលរោងការក្នុងពេលឆាប់ៗខាងមុខ ។ 

ជួបជាមួយតារាសម្តែងរូបនេះ នៅក្នុងពិធីសម្ពោធរឿង « ប្រមាត់ត្រយ៉ូវ » កាលពីប៉ុន្មានថ្ងៃមុន នាងបានរៀបរាប់ប្រាប់ថាឆ្នាំ២០២៤ ជីវិតនាងជួបនូវរឿងមិនល្អ និងការលំបាកជាច្រើន មានទាំងទឹកភ្នែក មានទាំងសោកសៅ ។  

សឿន ផាន់ផាភួង រំពឹងថាក្នុងឆ្នាំ២០២៥នេះជីវិតនាងនឹងល្អប្រសើរជាងឆ្នាំចាស់ ។ ថ្វីដ្បិតតែមិនទាន់ជោគជ័យក្នុងជីវិត សឿន ផាន់ផាភួង នៅតែមិនមានគម្រោងរៀបការនៅឡើយទេ បើទោះបីជាពេលនេះដៃគូរបស់នាងគឺលោក លាង ឧត្តម ត្រៀមចូលរោងការជាមួយអ្នកលក់អនឡាញល្បីឈ្មោះមួយក្តី ។

សឿន ផាន់ផាភួង បានបញ្ជាក់ប្រាប់នៅក្នុងពេលនេះថា សូមមហាជនឈប់មានការយល់ច្រឡំ រវាងនាងនិងលោក លាង ឧត្តម ត្រឹមតែជាមិត្តភក្តិ នាងពិតជាសប្បាយចិត្តនៅពេលដែលឃើញដៃគូរកឃើញគូជីវិត ។  

សឿន ផាន់ផាភួង ចាត់ទុកថាជាតារាសម្តែងចាស់វស្សាមួយរូបនៅក្នុងវិស័យសិល្បៈ ក្នុងមួយឆ្នាំៗនាងទទួលថតរឿងជាច្រើន ទោះស្ថិតក្នុងតំណែងត្រឹមតែជាតួរាយរង តួម្តាយ នាងរីករាយក្នុងការថត ជាក់ស្តែងនាងមានស្នាដៃជាច្រើនបង្ហាញទស្សនិកជនក្នុងឆ្នាំ២០២៥នេះ ក្នុងនោះនាងក៏ត្រៀមនឹងមានវត្តមាននៅក្នុងរឿងរបស់ ភីអិនអិន ផងដែរ ៕ 

អត្ថបទ ៖ ម៉ា រីសា រូបភាព ៖ ឃាង ទូច