ពិតមិនធ្វើឱ្យអ្នកគាំទ្រ និងអ្នកស្នេហាវិស័យបវរកញ្ញាខកបំណងឡើយ នាថការនីរបាំបុរាណល្បីឈ្មោះ កូនអាន ប្រកាសថា នាងនឹងចូលរួមប្រកួត Miss Universe Cambodia ភ្លាម ប្រសិនបើបានពង្រឹងសមត្ថភាពប៉ុន្មានចំនុចសំខាន់ៗ។

 
នេះជាការបញ្ជាក់ច្បាស់ៗរបស់នាថការនីរបាំបុរាណល្បីឈ្មោះ កូនអាន ដែលមានឈ្មោះពិតថា សុខគា គីមលាង អំពីគម្រោងនៃការបោះជំហានចូលប្រឡូកវិស័យបវរកញ្ញា ខណៈបច្ចុប្បន្នវិស័យនេះកំពុងមានការផុសផុលខ្លាំងគួរឱ្យកត់សម្គាល់។

 
មិនបដិសេធចំពោះការប្រកាសជាសាធារណៈកាលពីពេលកន្លងទៅនោះឡើយ កូនអាន បញ្ជាក់ច្បាស់ៗថា នាងពិតជាមានគម្រោងចង់ប្រកួតកម្មវិធី Miss Universe Cambodia ប្រាកដមែន។
 

 
ផ្តល់បទសម្ភាសន៍ផ្តាច់មុខជាមួយភីអិនអិន កាលពីពេលថ្មីៗ សិល្បការនីជំនាន់ក្រោយដ៏មានឥទ្ធិពលរូបនេះឱ្យដឹងថា ពេលនេះនាងពុំទាន់អាចកំណត់ពេលវេលានៃការចូលប្រកួតបានឡើយ ព្រោះនាងត្រូវការពេលវេលាដុះខាតសមត្ថភាពខ្លួនឯងឱ្យល្អជាមុនសិន។ 

តែបើពេលនោះមកដល់ នាងប្តេជ្ញាបញ្ចេញឱ្យអស់ពីទេពកោសល្យ សមត្ថភាព ពិសេសរបាំបុរាណដែលជាជំនាញស្នូលរបស់នាងតែម្តង៕
 

អត្ថបទ៖ រ៉ាត់ ចាន់ធីតា រូបភាព៖ ឃាង ទូច