កញ្ញា នីម៉ូ កូនស្រីទី២ បានធ្វើឱ្យ គង់ សុជាតិ និង ជា វិបុល ដែលឪពុកម្តាយ ភ្ញាក់ផ្អើលខ្លាំងដែលកំពុងដើរតាមគន្លងរបស់ពួកគេយ៉ាងណាក្នុងវិថីជាពិធីការិនី ។ទំពាំងស្នងឬស្សីម្នាក់ទៀតកំពុងបោះជំហានដើរតាមគន្លងរបស់ឪពុកម្តាយដែលលះបង់កម្លាំងកាយចិត្តយ៉ាងមុះមុតបម្រើការក្នុងវិស័យសិល្បៈរយៈពេលជាច្រើនឆ្នាំគឺ កញ្ញា ម៉ៅ សាលភាពនែលលី ហៅ នីម៉ូ ដែលជាកូនស្រីទី២ របស់ពិធីការនីឆ្នើម គង់ សុជាតិ និងស្វាមី លោក ជា វិបុល។

គួរឱ្យភ្ញាក់ផ្អើលខ្លាំងមែនទែននោះ ថ្មីៗនេះគេស្រាប់តែប្រទះឃើញ នីម៉ូ ឡើងធ្វើពិធីការនីក្នុងកម្មវិធីធំមួយជាមួយឪពុកម្តាយរបស់នាង ពោលគឺក្តោបតំណែងពិធីករពិធីការនីទាំងគ្រួសារតែម្តង ធ្វើឱ្យអ្នកសិល្បៈនិងទស្សនិកជនភ្ញាក់ផ្អើលយ៉ាងខ្លាំង សូម្បីតែអ្នកនាង គង់ សុជាតិ ជាម្តាយក៏ភ្ញាក់ផ្អើលពេលបានឮថ្វីមាត់ដ៏ពូកែរបស់កូនស្រី ដែលផ្តោះផ្តងសម្តីជាមួយអ្នកនាង និងស្វាមីបានយ៉ាងល្អលើវេទិកាតែមួយជាមួយគ្នា ប្រៀបបីដូចពិធីការនីអាជីពតែម្តង។

កន្លងមក ពិធីការនីឆ្នើម គង់ សុជាតិ តែងតែគិតថា ប្រហែលជានាងគ្មានអ្នកបន្តវេនវិស័យសិល្បៈនោះឡើយ ព្រោះកូនៗរបស់នាង ពិសេសកូនស្រីច្បងហាក់បីដូចជាមិនសូវអើពើជាមួយការងារសិល្បៈដែលនាងនិងស្វាមីកំពុងធ្វើនោះឡើយ ដោយគិតតែផ្តោតលើការសិក្សារហូតទទួលបានជោគជ័យយ៉ាងក្រាសក្រែលមិននឹកស្មានដល់។ 

ផ្ទុយស្រឡះពីការគិត គង់ សុជាតិ និងស្វាមី នាំគ្នាបើកភ្នែកធំៗ ចំហរមាត់ ពេលឃើញដុងទេពកោសល្យ និងសមត្ថភាពថ្វីមាត់ពីធម្មជាតិរបស់កូនស្រី នីម៉ូ ដែលមានឈាមជ័រជាអ្នកសិល្បៈពេញខ្លួន ហើយកំពុងសម្រេចចិត្តដើរតាមគន្លងរបស់អ្នកនាង និងស្វាមី។ ជាទំពាំងស្នងឬស្សីដ៏មានគុណភាព នីម៉ូ មិនត្រឹមតែអាចប្រើប្រាស់បានភាសាខ្មែរបានល្អប៉ុណ្ណោះទេ ថែមទាំងប្រើប្រាស់ភាសាបរទេសបានយ៉ាងល្អឥតខ្ចោះថែមទៀតផង។

ក្រោយកូនស្រីបញ្ចេញថ្វីមាត់លើឆាកជាមួយគ្នាទាំងគ្រួសារ ធ្វើឱ្យអ្នកម្តាយរូបនេះ រំភើបចិត្ត និងមានមោទនភាពចំពោះកូនស្រីពន់ពេក រហូតបង្ហោះសារលើបណ្តាញសង្គមហ្វេសប៊ុកថា «មោទនភាព និងរំភើបចំពោះកូនស្រី ដែលអាចបញ្ចេញនូវស្នាដៃ និងសមត្ថិភាពដ៏ប៉ិនប្រសព្វ ក្នុងការងារជាពិធីការិនី ជាភាសាបរទេសក្នុងកម្មវិធីមង្គលដ៏ធំជាមួយនឹងនាងខ្ញុំ ជាម្តាយលើកដំបូងដោយរលូននិងជោគជ័យ»។

តាមការឱ្យដឹងពីអ្នកម្តាយជាសិល្បករជើងចាស់រូបនេះ កូនស្រីរបស់នាងជាសិស្សរៀនពូកែខ្លាំង និងតែងតែទទួលបានពានរង្វាន់ ព្រមទាំងមេដាយពីការសិក្សា និងការប្រកួតប្រជែងផ្សេងៗទាំងក្នុង និងក្រៅប្រទេស។ ថ្មីៗនេះ សោភារូបស្រស់ នីម៉ូ និងក្រុមបានតំណាងឱ្យកម្ពុជាទៅប្រកួតកម្មវិធី WCS Seoul Globle Round 2023 នៅប្រទេសកូរ៉េ ហើយជាលទ្ធផលក្រុមនាងទទួលបានចំណាត់ថ្នាក់លេខ១ ក្នុងចំណោមប្រទេសជាច្រើនក្នុងតំបន់អាស៊ី។

ពិធីករពិធីការនីឆ្នើមទាំងប្តីប្រពន្ធ គង់ សុជាតិ និង ជា វិបុល សប្បាយចិត្តក្រៃលែងដែលមានកូនប្រុសស្រីកត្តញ្ញូ និងដើរតាមគន្លងធម៌បែបនេះ ព្រោះទាំងការសិក្សា និងការងារ នីម៉ូ ពូកែសព្វគ្រប់បែបយ៉ាង និងទទួលលទ្ធផលល្អគួរជាទីមោទន។ អ្វីដែលរឹតតែសមបំណងទៀតនោះ កូនស្រីរូបនេះអាចចាប់យកអាជីពជាអ្នកសិល្បៈបានយ៉ាងល្អ ដោយដើរតាមការបង្ហាត់បង្ហាញពីឪពុកម្តាយដែលមានអាជីពជាពិធីករពិធីការិនីអាជីព ដែលសំបូរទៅដោយវោហា៍ស័ព្ទមិនចេះរីងស្ងួត។'

ការបោះជំហានចូលវិស័យសិល្បៈតាមគន្លងឪពុកម្តាយរបស់ កញ្ញា នីម៉ូ ជាផលចំណេញមួយទៀតសម្រាប់វិស័យសិល្បៈខ្មែរ ដោយយើងមានធនធានដ៏ល្អម្នាក់ទៀត ដែលអាចបង្ហាញឱ្យពិភពលោកឃើញពីសក្កានុពលសិល្បករកម្ពុជា ដែលមានទាំងសម្រស់ និងសមត្ថភាព មិនថាអាយុតិចឬច្រើន សុទ្ធសឹងតែមានសមត្ថភាពខ្ពស់៕

អត្ថបទ៖ រ៉ាត់ ចាន់ធីតា រូបភាព៖ ផ្តល់ឱ្យ