មិនសូវទទួលធ្វើការងារសិល្បៈច្រើនដូចមុនក៏ពិតមែន តែតារាចម្រៀង អេឡិច ច័ន្ទត្រា ធ្វើឱ្យមិត្តភ័កអ្នកសិល្បៈភ្ញាក់ផ្អើលយ៉ាងខ្លាំង ដោយជិតដាច់ឆ្នាំ២០២៤នេះ លោកត្រូវប៉ាន់ការងារ ២ធំៗព្រមគ្នាតែម្តង។

សល់ប្រមាណជាង២សប្តាហ៍ទៀតប៉ុណ្ណោះដាច់ឆ្នាំ២០២៤ ឈានចូលឆ្នាំសកល២០២៥ តារាសម្តែង និងជាតារាចម្រៀងរូបសង្ហា អេឡិច ចាន់ត្រា បានបង្កការភ្ញាក់ផ្អើលមួយដល់មិត្តភ័ក្តរួមអាជីព ដោយស្ងាត់ៗលោកស្រាប់តែត្រូវប្រកាសជាទូតសុឆន្ទៈតែគុជដ៏ល្បីនៅកម្ពុជា THE ALLEY CAMBODIA។

មិនតែប៉ុណ្ណោះ ក៏មានការរៀបចំពិធីចុះអនុស្សារណៈយោគយល់គ្នារវាង Alex Entertainment Agency និងយីហ៊ោតែគុជដ៏ល្បីនេះផងដែរ ក្នុងបំណងចាប់ដៃគ្នាពង្រីកសក្កានុពលអាជីវកម្មសម្រាប់ឆ្នាំថ្មី២០២៥។

តារាសម្ដែង និងចម្រៀងរូបនេះបានបង្ហាញក្តីរំភើប ក្រោយពីលោកបានក្លាយជាទូតសុឆន្ទៈក្នុងការងារមួយនេះ ថែមទាំងបានចាប់ដៃពង្រីកជំនួញថែមទៀត ដែលវាស្របតាមគោលដៅឆ្នាំថ្មីរបស់លោកតែម្តង។

ដោយឡែក លោក លី ដេវីត នាយកប្រតិបត្តិ THE ALLEY CAMBODIA បានប្រាប់ឱ្យដឹងពីការសម្រេចចិត្តជ្រើសតារាម្រៀង អេឡិច ច័ន្ទត្រា ព្រោះលោកជាសិល្បករល្បីឈ្មោះម្នាក់ក្នុងរង្វង់សិល្បៈ និងមានស្គាល់ច្រើនមកហើយ ជាពិសេស Alex Entertainment Agency របស់លោកទទួលបានទំនុកចិត្តយ៉ាងខ្លាំងពីទស្សនិកជន។ ដូច្នេះ លោកជឿថា សមត្ថភាព ទេពកោសល្យ និងភាពបត់បែនរបស់ អេឡិច ច័ន្ទត្រា នឹងអាចជួយផ្សព្វផ្សាយឱ្យគ្រប់គ្នាយល់ដឹងកាន់តែច្បាស់ថែមទៀត។

ពីពេលនេះតទៅ តារាចម្រៀងរាងខ្ពស់ស្រឡះ អេឡិច ច័ន្ទត្រា មានគម្រោងផែនការជាច្រើនត្រៀមធ្វើនៅឆ្នាំ២០២៥ ដើម្បីពង្រីកកេរ្តិ៍ និងអាជីវកម្មផ្ទាល់ខ្លួនឱ្យកាន់តែរីកលូតលាស់។

ទោះរវល់ខ្លាំងយ៉ាងណាក៏ដោយ ក៏លោកនៅតែឆ្លៀតពេលចូលរួមកម្មវិធីសិល្បៈផ្សេងៗ និងទទួលធ្វើការងារសិល្បៈដូចធម្មតា គ្រាន់តែមិនច្រើនដូចមុនព្រោះត្រូវទុកពេលមើលថែមុខរបរផ្ទាល់ខ្លួន៕

អត្ថបទ៖ រ៉ាត់ ចាន់ធីតា រូបភាព៖ ឃាង ទូច