ដោយមិនអាចពឹងពាក់លើសិល្បៈទាំងស្រុងសម្រាប់អនាគត តារាសម្តែងរូបសង្ហា ប្រុសខួច បានដាក់គោលដៅថ្មីសម្រាប់ខ្លួនក្នុងឆ្នាំ២០២៥នេះ ។ តារាសម្តែងរូបសង្ហា ប្រុសខួច បានដាក់គោលដៅជីវិតថ្មីសម្រាប់ខ្លួនក្នុងឆ្នាំ២០២៥ ទាំងការងារសិល្បៈ បង្កើតអាជីវកម្ម ដើម្បីទុកជាទុនសម្រាប់បង្កើតគ្រួសារនាថ្ងៃអនាគត ។ 

ប្រុសខួច គឺជាតារាសម្តែងលេចធ្លោមួយរូបប្រចាំនៅស្ថានីយ៍ទូរទស្សន៍ ភីអិនអិន កន្លងមកលោកធ្លាប់មានស្នាដៃល្អៗជាច្រើនបង្ហាញមហាជន ។ ថ្មីៗនេះលោក ក៏បានលេចមុខក្នុងរឿងដុំជាបន្តបន្ទាប់ ធ្វើឱ្យកេរ្តិ៍ឈ្មោះរបស់លោកចាប់ផ្តើមល្បីល្បាញឡើងវិញបន្ទាប់ពីស្ងប់ស្ងាត់អស់មួយរយៈពេល ។

តារារូបនេះ ថាក្នុងឆ្នាំ២០២៥ នេះលោកមានគម្រោងការងារថ្មីៗជាច្រើន ទាំងការងារថតភាពយន្តរឿងភាគនិងរឿងដុំ ព្រមទាំងការងាររកស៊ីផ្សេងៗ ។  ឆ្នាំ២០២៥នេះ ប្រុសខួច ក៏ត្រៀមនឹងមានវត្តមានថ្មីនៅក្នុងរឿងភាគរបស់ ភីអិនអិន ផងដែរ ទស្សនិកជនជាច្រើនកំពុងទន្ទឹងរងចាំមើលស្នាដៃថ្មីរបស់លោក ។

ជាមួយនិងការត្រៀមបង្ហាញស្នាដៃថ្មីនេះ ប្រុសខួច ក៏បានបង្ហើបប្រាប់ថា ខ្លួនមិនអាចពឹងលើសិល្បៈទាំងស្រុងបានទេ ដូច្នេះហើយត្រូវប្រឹងប្រែងរកការងារក្រៅបន្ថែម ដូចជាការងាររកស៊ីជាដើម ព្រោះទៅថ្ងៃអគនាគតខ្លួនមិនចង់លើដៃសុំជំនួយឡើយ ។ 

ចូលវ័យជាង៣០ឆ្នាំ ប្រុសខួច កាន់តែចាស់ទុំជាងមុនច្រើន ហើយលោកក៏បានបង្ហើបប្រាប់ពីគូស្រករអនាគតរបស់ខ្លួនផងដែរថា ខ្លួនចាស់ហើយក៏ល្មមដល់ពេលត្រូវគិតគូពីរឿងគ្រួសារដែរ ទើបលោកប្រឹងប្រែងធ្វើការងារ សន្សំប្រាក់ដើម្បីទុកសាងគ្រួសារ ចំពោះពេលវេលាច្បាស់លាស់ក្នុងការរៀបការ លោកពុំទាន់កំណត់នៅឡើយទេ ដោយសារពេលនេះលោកកំពុងយកចិត្តទុកដាក់ខ្លាំងលើអាជីវកម្មថ្មី ដោយរំពឹងថា ខ្លួននឹងជោគជ័យក្នុងពេលឆាប់ៗ ៕ 

អត្ថបទ ៖ ម៉ា រីសា រូបភាព ៖ ភីអិនអិន