ការព្យាករណ៍អាកាសធាតុសម្រាប់ រដ្ឋកាលីហ្វញ៉ា នៃសហរដ្ឋអាមេរិក ឱ្យដឹងថា ខ្យល់ខ្លាំងនឹងកើតមាននៅទីក្រុងឡូសអាន់ជឺឡេស(Los Angeles)ជាថ្មីម្តងទៀត ចាប់ពីយប់ថ្ងៃអាទិត្យ រហូតដល់ថ្ងៃពុធក្នុងល្បឿនខ្យល់៩៦គីឡូម៉ែត្រក្នុងមួយម៉ោង ខណៈក្រុមពន្លត់អគ្គីភ័យកំពុងព្យាយាមពន្លត់ភ្លើងឆេះព្រៃដែលកំពុងកើតមាននៅទីក្រុងមួយនេះ។ 
 

អាជ្ញាធរទីក្រុងឡូសអាន់ជឺឡេស ឱ្យដឹងថា មកដល់ត្រឹមថ្ងៃអាទិត្យតួលេខមនុស្សស្លាប់កើនឡើងដល់២៤នាក់ ខណៈនៅមុននេះ អាជ្ញាធរឱ្យដឹងថា មនុស្ស១៦នាក់ផ្សេងទៀត នៅបាត់ខ្លួននៅឡើយ។ 

ភ្លើងឆេះព្រៃខ្លាំងធ្ងន់ធ្ងរស្ថិតនៅតំបន់Palisades ដែលមកដល់ពេលនេះឆាបឆេះដីព្រៃក្នុងទំហំជាង២៣០០០អេកឺ ដែលមានត្រឹមតែ១៣ភាគរយប៉ុណ្ណោះពន្លត់បាន។ ទីតាំងភ្លើងឆេះព្រៃធំលំដាប់ទី២ស្ថិតនៅតំបន់Eaton ឆាបឆេះដីព្រៃជាង១៤០០០អេកឺនៅតំបន់នេះភ្លើងព្រៃពន្លត់បានមាន២៧ភាគរយ។ 

នៅថ្ងៃអាទិត្យ តាមការប៉ាន់ស្មានឱ្យដឹងថា តម្លៃខូចខាតបឋមដែលបង្កឡើងពីភ្លើងឆេះព្រៃនេះ ស្ថិតនៅរវាង២៥០ពាន់លានដុល្លារ ទៅ២៧៥ពាន់លានដុល្លារអាមេរិក។ 

ជាមួយគ្នាផងដែរ មកដល់ពេលនេះមនុស្ស២៩នាក់ ត្រូវបានចាប់ខ្លួនពាក់ព័ន្ធនិងអំពើលួច អំឡុងពេលកើតមានហេតុការណ៍ភ្លើងឆេះព្រៃ។ 

ប្រែសម្រួល៖ណាវ័ន្ត