ខណៈពេលដែលមិត្តភក្តិបានរៀបការជាបន្តបន្ទាប់ស្រាប់តែ វី ឌីណែត ពោលពាក្យចង់រៀបការដែរ តែបញ្ហាគឺរកអ្នកច្បាស់លាស់មិនបានក្រោយចាកចេញពីផលិតកម្មដ៏ធំមួយ ។ 

ចប់កុងត្រាក្នុងផលិតកម្មភ្លាម វី ឌីណែត បានឈានជើងចេញធ្វើជាតារាចម្រៀងឯករាជ្យភ្លែត ដើម្បីប្រមូលប្រជាប្រិយភាពឡើងវិញក្រោយស្ងប់ស្ងាត់អស់មួយរយៈពេល។ ប៉ុន្តែអ្វីដែលជាក្តីកង្វល់របស់កញ្ញា នៅក្នុងពេលនេះមិនមែនអត់កន្លែងជ្រកកោណទេ គឺនាងបែរជាព្រួយបារម្ភរឿងរកអ្នកច្បាស់ លាស់មិនទាន់ឃើញ ។ 

ជួបជាមួយតារាចម្រៀងរូបនេះ កាលពីពេលថ្មីៗនាងប្រាប់ថា ក៏ចង់រៀបការមានគ្រួសារនិងគេឆាប់ៗដែរ ប៉ុន្តែរកអ្នកច្បាស់លាស់មិនទាន់ឃើញ ។  ពេលនេះតារាចម្រៀង វី ឌីណែត បានចាកចេញពីផលិតកម្មចាស់របស់ខ្លួនហើយ ដោយងាកមកធ្វើជាតារាចម្រៀងឯករាជ្យវិញម្តង នាងថា ធ្វើតារាចម្រៀងឯករាជ្យមិនស្រួលដូចច្រៀងនៅផលិតកម្មទេ ប៉ុន្តែនាងសប្បាយចិត្តនូវអ្វីដែលខ្លួនមាន នាងសង្ឃឹមថា ទស្សនិកជននឹងពេញចិត្តស្នាដៃថ្មីរបស់ខ្លួន ។ 

តារាចម្រៀង វី ឌីណែត សុំមិនបកស្រាយអ្វីច្រើនខណៈពេលដែលបានបញ្ចប់កុងត្រាជាមួយផលិតកម្មចាស់ បើទោះបីជាកន្លងមកធ្លាប់មានលេចលឺព័ត៌មានថា វី ឌីណែត ដើរចេញពីទ្រនំចាស់ដោយសារតែផលិតកម្មបានផ្អិបនាងចោល ពុំមានបទចម្រៀងថ្មី និងអ្វីដែលថ្មីសម្រាប់ខ្លួន ទើបនាងដាច់ចិត្តដើរចេញទាំងមិនអាល័យ ៕ 

អត្ថបទ ៖ ម៉ា រីសា  រូបភាព ៖  ភីអិនអិន