អតីត ហ្វ្រេសស៊ី និងជាតារាសម្តែងរូបសង្ហា លឹម ជាឡាយ នៅតែត្អូញត្អែរថា ចំណូលពីសិល្បៈមិនអាចធ្វើឱ្យខ្លួនរស់ស្រួលនោះទេ ទើបថ្មីៗនេះលោកបានបន្ថែមការងាររកស៊ីផ្ទាល់ខ្លួនដើម្បីបង្កើនប្រាក់ចំណូល ។ 

ថ្វីដ្បិតតែទទួលថតរឿងជាបន្តបន្ទាប់ក្តី តារាសម្តែងរូបសង្ហា លឹម ជាឡាយ នៅតែត្អូញត្អែរថា អាចមិនអាចពឹងលើអាជីពសម្តែងដើម្បីរកប្រាក់ចំណូលចិញ្ចឹមជីវិតបានឡើយ លោកត្រូវឆ្លៀតពេលដើម្បីចេញរកស៊ីខ្លះដើម្បីជីវភាព មុននឹងចង់សាងគ្រួសារ ។ 

លោក លឹម ជាឡាយ ទើបតែលេចមុខនៅក្នុងរឿងដុំ « ខ្សែចងក » វគ្គ២ កាលពីពេលថ្មីៗនេះ បន្ទាប់ពីបាត់មុខពីឆាកសម្តែងអស់ពេលយ៉ាងយូរ លោកខំប្រឹងហាត់ប្រាណសម្រកគីឡូដើម្បីបានរាងស្រស់សង្ហា ងាយស្រួលក្នុងការថតរឿង ។

សម្រាប់ការងាររនាពេលបច្ចុប្បន្នលោក លឹម ជាឡាយ នៅតែមានទីផ្សារខ្ពស់ដែរក្នុងចំណោមតារាសម្តែងរួមជំនាន់ ជាក់ស្តែងថ្មីៗនេះលោកទើបតែថតចប់៣ ទៅ៤ ជាប់គ្នា ដើម្បីត្រៀមទុកដាក់បញ្ចាំងនៅដើមឆ្នាំ២០២៥ ខាងមុខ ។

លោក លឹម ជាឡាយ បានប្រាប់ថា ក្រោយថតចប់ប៉ុន្មានរឿងចុងក្រោយនេះលោកទំនេរច្រើន ហើយក៏ឆ្លៀតពេលដើម្បីបើកមុខរបរកស៊ីបន្ថែម ដើម្បីបានប្រាក់ចំណូលចិញ្ចឹមជិវិត ។

 ទោះបីមានឈ្មោះជាតារាសម្តែងចាស់វស្សា តែលោក លឹម ជាឡាយ មិនប្រកាន់ចរិតតួឯកឡើយ អ្វីដែលសំខាន់ គឺតម្លៃខ្លួន មិនថាតួអង្គបែបណាលោកទទួលថតទាំងអស់ ៕ 

អត្ថបទ ៖ ម៉ា រីសា រូបភាព ៖ ឃាង ទូច