តារាសម្តែងកូន ២ សារ៉ាយ សក្ខណា កំពុងពិបាកចិត្តខ្លាំង ពីព្រោះមិនចង់ត្រឡប់ទៅរស់នៅ សហរដ្ឋអាមេរិក វិញ ដោយចង់រស់នៅស្រុក ខ្មែរ វាយស្រួលរកប្រាក់ចំណូលជាង តែឪពុកម្ដាយក្មេករបស់នាងចង់ឱ្យវិលត្រឡប់ទៅអាមេរិកវិញឆាប់ៗ ។ 

ក្រោយចំណាយពេលវេលាមកលេងស្រុកកំណើតអស់ជិតមួយឆ្នាំ បានធ្វើឱ្យ សារ៉ាយ សក្ខណា មានការរារែកចិត្តក្នុងការវិលត្រឡប់ទៅ សហរដ្ឋអាមេរិក វិញ រហូតធ្វើឱ្យឪពុកម្តាយក្មេកនាងនឹករលឹក និងបានដាក់កំហិតឱ្យនាងនិងស្វាមីនាំកូនៗត្រឡប់ទៅវិញក្នុងពេលឆាប់ៗខាងមុខ ។

រយៈពេលជិតមួយឆ្នាំនៅស្រុក ខ្មែរ បានធ្វើឱ្យ សារ៉ាយ សក្ខណា ងាកមកបោះទុនប្រាក់បន្ថែមទៅលើ អាវីកម្មជាច្រើន ក្រៅពីនេះនាងថែមទាំងបានទទួលថតរឿងចំនួន ២ ជាប់ៗគ្នាផងដែរ ដូច្នេះហើយទើបនាងពន្យាពេលចេញទៅ សរហដ្ឋអាមេរិក ជាលើកទី ៣ ។ 

ជួបជាមួយ សារ៉ាយ សក្ខណា នៅក្នុងពិធីសម្ពោធរឿង « សួស្តីអ្នកជិតខាង » របស់ផលិតកម្ម LD កាលពីពេលថ្មីៗនេះ នាងបានបញ្ជាក់ប្រាប់ថា តាមគម្រោងនាងនឹងត្រឡប់ទៅ អាមេរិក វិញបន្ទាប់ពីពិធីបុណ្យភ្ជុំបិណ្ឌរួច ពីព្រោះយាយតានៅទីនោះ នឹករលឹកចៅៗ ។ 

ដោយក្តីនឹករលឹកខ្លាំងចំពោះកូន និងចៅៗ បានធ្វើឱ្យឪពុកម្តាយក្មេក របស់ សារ៉ាយ សក្ខណា ដែលរស់នៅ សហរដ្ឋអាមេរិក បានដាក់កំហិតថា នាងនិងស្វាមីព្រមទាំងកូនៗត្រូវទៅ សហរដ្ឋអាមេរិក ជាដាច់ខាត ដូច្នេះហើយទើប សារ៉ាយ សក្ខណា ប្រញាប់ទិញសំបុត្រយន្តនិងត្រៀមត្រឡប់ទៅវិញ ។ 

ទោះបីជាមានគម្រោងត្រឡប់ទៅ សហរដ្ឋអាមេរិក វិញក្តី សារ៉ាយ សក្ខណា បានឱ្យដឹងផងដែរថា នាងនឹងត្រឡប់មកស្រុក ខ្មែរ វិញ បន្ទាប់ពីលេងយាយតានៅទីនោះបាន ២ ខែ ពីព្រោះនាងត្រូវចុះមក ស្រុក ខ្មែរ ដើម្បីមើលការងាររកស៊ី ជាពិសេសនាងមានបំណងចង់ឱ្យកូនទាំងពីរចូលសាលារៀនភាសា ខ្មែរ ពីព្រោះក្នុងនាមជាកូន ខ្មែរ ម្នាក់នាងចង់ឱ្យកូនៗមានចំណេះដឹងខ្លះពីភាសាដើមកំណើត បើទោះបីជាពួកគេកើតនៅលើទឹកដី អាមេរិក ក្តី ។ 

ជាមួយនិងក្តីបំណងចង់ឱ្យកូនទាំងពីរបានរៀនភាសា ខ្មែរ សារ៉ាយ សក្ខណា ក៏បានបង្ហើបប្រាប់ផងដែរថា ស្វាមីនាងក៏និងចុះមកស្រុក ខ្មែរ ជាមួយគ្នាផងដែរដើម្បីមើលគ្លីនីក ក៏ដូចជាមើលអាជីវកម្មផ្សេង ដូចដឹងស្រាប់ហើយថា នៅស្រុក យើងងាយស្រួលរកប្រាក់ចំណូលបើប្រៀបធៀបនិងស្រុកគេ ។ ណាមួយនៅស្រុកគេ នាងគ្មានការងារអ្វីត្រូវធ្វើក្រៅពីនៅមើលថែទាំកូនៗ បើនៅស្រុកយើងមានមុខរបរជាច្រើនដែលនាងអាចធ្វើបានទាំងមើលហាងរកស៊ី ថតភាពយន្ត ថតសំអាងការ និងចូលរួមកម្មវិធីផ្សេងៗ...៕  

អត្ថបទ ៖ ម៉ា រីសា រូបភាព ៖ ឃាង ទូច