ថ្ងៃអាទិត្យ ទី០៥ ខែឧសភា ឆ្នាំ២០២៤
ថ្ងៃអាទិត្យ ទី០៥ ខែឧសភា ឆ្នាំ២០២៤
បញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ បានផ្តល់អាវរងារជូនកងកម្លាំងស្ថិតក្នុងអង្គភាពក្រោមចំណុះ ដើម្បីទុកប្រើប្រាស់នៅក្នុងអំឡុងពេលអាកាសធាតុចុះត្រជាក់។ អាវរងារដែលផ្តល់ជូនកងកម្លាំងនេះ ជារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន។
អាវរងារដែលជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រ៉ានីហ៊ុនសែន ត្រូវបានប្រគល់ជូនដល់កងកម្លាំង នៅតាមអង្គភាពនានាចំណុះក្រោមបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ ទុកប្រើប្រាស់នៅក្នុងអំឡុងពេលអាកាសធាតុចុះត្រជាក់។
ក្នុងពិធីចែកអាវរងាជូនដល់កងកម្លាំង នៅបញ្ជាការដ្ឋានវិស្វកម្មកងទ័ពជើងគោក ខេត្តតាកែវ កាលពីចុងសប្តាហ៍កន្លងទៅ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានបញ្ជាក់ថា ការផ្តល់ជូនអាវរងារនេះ ជាការយកចិត្តទុកដាក់របស់ សម្តេចតេជោ ហ៊ុន សែននិងសម្តេចកិត្តិព្រឹទ្ធបណ្ឌិត ចំពោះសុខទុក្ខរបស់កងកម្លាំងប្រដាប់អាវុធ ទាំងអស់ព្រមទាំងក្រុមគ្រួសារ ដែលបានខិតខំប្រឹងប្រែង ក្នុងការបំពេញភារកិច្ចអស់ពីកម្លាំងកាយចិត្ត ក្នុងការការពារសន្តិសុខ សន្តិភាព និងស្ថិរភាពជូនប្រជាពលរដ្ឋ។
ឯកឧត្តម ឧត្តមសេនីយ៍ឯក ក៏បានកោតសរសើរដល់កងកម្លាំងប្រដាប់អាវុធទាំងអស់ចំពោះការចូលរួមគ្រប់រូបភាពក្នុងការជួយ ការពារទឹកដី សុខសន្តិភាព ស្ថិរភាព ជូនប្រទេសជាតិ និងប្រជាជន ក៏ដូចជាចូលរួមក្នុងសកម្មភាពនានាដូចជា ការជួយដល់ប្រជាពលរដ្ឋក្រីក្រ អតីតយុទ្ធជន ហើយថ្មីៗនេះបានចុះជួយជាប្រចាំដល់សកម្មភាពគ្រោះមហន្តរាយនានាដូចជាទឹកជំនន់ និងជាពិសេសជួយទប់ស្កាត់ការរីករាលដាលនៃជម្ងឺកូវីដ-១៩នៅក្នុងអង្គភាពក៏ដូចជាភូមិសាស្ត្រឈរជើងរបស់ខ្លួន។
ជាមួយគ្នា ឯកឧត្តម ឧត្តមសេនីយ៍ឯក ក៏អំពាវនាវដល់កងកម្លាំងទាំងអស់ ត្រូវចូលរួមយកចិត្តទុកដាក់ខ្ពស់គ្រប់ពេលវេលាក្នុងការបន្តអនុវត្តវិធានរបស់សុខាភិបាល រួមមានពាក់ម៉ាស់ លាងដៃនឹងអាកុលឬសាប៊ូ រក្សាគម្លាតសុវត្ថិភាព រក្សាអនាម័យខ្ពស់ ដើម្បីទប់ស្កាត់នូវការឆ្លងរាលដាលនូវជំងឺកូវីដ–១៩នៅក្នុងប្រទេសកម្ពុជា ។
គួរបញ្ជាក់ថា ក្រៅពីផ្តល់អាវរងារជូនកងកម្លាំងប្រដាប់អាវុធ នៅបញ្ជាការដ្ឋានវិស្វកម្មកងទ័ពជើងគោក ខេត្តតាកែវ បញ្ជាការដ្ឋានកងទ័ពជើងគោក ក៏បានផ្តល់អាវរងារដូចគ្នានេះជូនយោធភូមិភាគទី៥ យោធភូមិភាគទី១ យោធភូមិភាគទី២ និងយោធភូមិភាគទី៤ផងដែរ ៕
អត្ថបទ និងរូបភាព៖ សន រដ្ឋា