ថ្ងៃសៅរ៍ ទី១៨ ខែឧសភា ឆ្នាំ២០២៤
ថ្ងៃសៅរ៍ ទី១៨ ខែឧសភា ឆ្នាំ២០២៤
កូនស្រីរបស់លោកThaksin Shinawatra ដែលលេចវត្តមានឡើងជាមេដឹកនាំដ៏មានសក្ដានុពលរបស់ប្រទេសថៃ នៅថ្ងៃសុក្រ(៣ឧសភា) បានលើកឡើងថា ឯករាជ្យរបស់ធនាគារកណ្តាល ជាឧបសគ្គក្នុងការដោះស្រាយបញ្ហាសេដ្ឋកិច្ច។ នេះជាការរិះគន់ថ្មីចុងក្រោយបំផុតក្នុងបញ្ហាដែលកំពុងតែកើតមានឡើងលើអត្រាប្រាក់។
លោកស្រី Paetongtarn Shinawatra កូនស្រីលោកThaksinនិងជាមេដឹកនាំគណបក្សPheu Thai បានបង្ហាញការយល់ឃើញរបស់ខ្លួនទៅលើបញ្ហាដែលមិនមានការឯកភាពគ្នាចាប់តាំងពីឆ្នាំមុនរវាងលោកSrettha Thavisinនាយករដ្ឋមន្ត្រីថៃ និងធនាគារកណ្តាល។
ធនាគារកណ្តាលថៃ មិនព្រមធ្វើតាមសម្ពាធនាយករដ្ឋមន្ត្រីថៃដែលទាមទារឱ្យកាត់បន្ថយអត្រាការប្រាក់ឡើយ។
«ច្បាប់ដែលការពារឯករាជ្យធនាគារកណ្តាលរបស់ប្រទេសថៃ Bank of Thailand( BOT) ពីរដ្ឋាភិបាល គឺជាបញ្ហានិងជាឧបសគ្គយ៉ាងសំខាន់នៅក្នុងការដោះស្រាយបញ្ហាសេដ្ឋកិច្ច»។ លោកស្រីPaetongtarn ថ្លែងទៅកាន់សមាជិកគណបក្សកាលពីថ្ងៃសុក្រ។
លោក Srettha លើកឡើងយ៉ាងទទូចថា អត្រាការប្រាក់ក្នុងកម្រិតខ្ពស់មួយគឺ ២,៥០ ភាគរយ កំពុងធ្វើឱ្យប៉ះពាល់ដល់អាជីវកម្មតូចៗ និងបំផ្លាញប្រសិទ្ធិភាពនៃកិច្ចខិតខំប្រឹងប្រែងរបស់រដ្ឋាភិបាលក្នុងការដោះស្រាយបញ្ហាសេដ្ឋកិច្ចដែលនាយករដ្ឋមន្ត្រីថៃរូបនេះលើកឡើងថាសេដ្ឋកិច្ចថៃស្ថិតនៅក្នុងវិបត្តិ។
លោកស្រី Paetongtarn បានលើកឡើងថា គោលនយោបាយរូបិយវត្ថុរបស់ធនាគារកណ្តាល(BOT) បានបដិសេធដឹងឮ និងសហការណ៍ ហើយក៏ប៉ះពាល់ដល់កិច្ចខិតខំប្រឹងប្រែងក្នុងការកាត់បន្ថយបំណុល។
ធនាគារកណ្តាលរបស់ប្រទេសថៃ Bank of Thailand( BOT) បដិសេធអត្ថាធិប្បាយលើការលើកឡើងរបស់លោកស្រីPaetongtarn នៅពេលសារព័ត៌មានរ៉យទ័រទាក់ទងទៅ។
អត្ថបទ៖ណាវ័ន្ត