តារាចម្រៀងស្រីកំពុងឡើងកូដរបស់អាហ្វ្រិកខាងត្បូងគឺ Tyla បានបញ្ចេញបទថ្មីមួយទៀត បន្ទាប់ពីបទ “Water” បានទទួលជោគជ័យ និងមានភាពល្បីល្បាញទូទាំងពិភពលោក។បទចម្រៀងចង្វាក់ញាក់ថ្មីរបស់តារាចម្រៀងស្រីអាហ្រ្វិកខាងត្បូង Tyla (ថៃឡា) មានចំណងជើងថា 'Is It' និងវីដេអូចម្រៀងត្រូវបានចេញផ្សាយព្រមគ្នាកាលពីពេលថ្មីៗនេះ។

បទចម្រៀងថ្មីនេះគឺជាស្នាដៃនិពន្ធរបស់ផលិតករ Sammy Soso ដែលធ្លាប់បានធ្វើការជាមួយតារាចម្រៀង Wizkid និងសមាជិកក្រុម BLACKPINK Lisa ខណៈដែលវីដេអូចម្រៀងនេះត្រូវបានដឹកនាំដោយ Aerin Moreno ដែលត្រូវបានគេស្គាល់ថាជាអ្នកដឹកនាំវីដេអូចម្រៀងរបស់តារាល្បីៗរួមមានក្រុម Maroon 5, Tate McRae និងក្រុម KATSEYE ។

គួររំឭកថា តារាចម្រៀងវ័យ ២៣ ឆ្នាំ Tyla បានរកឃើញភាពជោគជ័យនៅពេលដែលបទចម្រៀងរបស់នាងមានចំណងជើង "Water" បានល្បីផ្ទុះនៅលើបណ្ដាញសង្គម TikTok ក្នុងឆ្នាំ ២០២៣ ។

បទនេះបានឡើងដល់ចំណាត់ថ្នាក់លេខ ៧ លើតារាង Billboard Hot 100 របស់សហរដ្ឋអាមេរិក និងជាប់ Top 5 នៅចក្រភពអង់គ្លេស ដែលធ្វើឱ្យនាងក្លាយជាតារាចម្រៀងស្រីអាហ្វ្រិកដែលជាប់ចំណាត់ថ្នាក់ខ្ពស់បំផុតលើតារាងតន្ត្រីអន្តរជាតិ ក្នុងប្រវត្តិសាស្រ្ត។មិនតែប៉ុណ្ណោះ នៅឆ្នាំបន្ទាប់ នាងក៏បានឈ្នះពានរង្វាន់ការសម្តែងចម្រៀងអាហ្វ្រិកល្អបំផុតនៅកម្មវិធី Grammys សម្រាប់បទចម្រៀងនេះដែរ។

មកដល់ឆ្នាំ ២០២៥ នេះ នៅថ្ងៃទី ១៩ ខែ Tyla បានក្លាយជាសិល្បករទោលអាហ្រ្វិកដំបូងគេដែលទទួលបានការស្ដាប់ចម្រៀង ឬ Stream ចំនួនមួយពាន់លាននៅលើវេទិកា Spotify ជាមួយនឹងបទ "Water"។ខណៈបទចម្រៀងថ្មី “Is It” បានចេញផ្សាយកាលពីថ្ងៃទី១១ ខែកក្កដា ប៉ុន្តែក៏មិនទាន់មានព័ត៌មានថាតារាចម្រៀងស្រីរូបនេះនឹងមានអាល់ប៊ុមចម្រៀងថ្មីនាពេលខាងមុខនៅឡើយទេ ៕
 

ប្រែសម្រួល៖ វ៉ាន់ថន