ការប្រគំតន្ត្រី 'Cowboy Carter' របស់តារាចម្រៀងអាមេរិក Beyonce ក្លាយជាការប្រគំតន្ត្រីទេសចរណ៍បែប Country ដែលរកចំណូលបានខ្ពស់បំផុតក្នុងប្រវត្តិសាស្ត្រ និងបំបែកកំណត់ត្រាជាច្រើនទៀត។

ក្រុមហ៊ុនរៀបចំព្រឹត្តិការណ៍ Live Nation បាននិយាយនៅក្នុងសេចក្តីថ្លែងការណ៍មួយកាលពីថ្ងៃទី ២៨ ខែកក្កដាថា ការប្រគំតន្ត្រីទេសចរណ៍ "Cowboy Carter" របស់តារាចម្រៀង Beyonce នៅពេលនេះបានក្លាយជាការប្រគំតន្ត្រីទេសចរណ៍ Country ដែលរកចំណូលបានខ្ពស់បំផុតក្នុងប្រវត្តិសាស្ត្រពោលគឺជាង ៤០០ លានដុល្លារ។

ប្រភពដដែលបន្ថែមថា តារាចម្រៀងម្ចាស់បទ "Drunk in Love" ក៏បានក្លាយជាសិល្បករស្បែកខ្មៅដែលរកចំណូលបានខ្ពស់បំផុតក្នុងប្រវត្តិសាស្ត្រ និងជាតារាចម្រៀង R&B ដែលរកចំណូលបានខ្ពស់បំផុតក្នុងប្រវត្តិសាស្ត្រដូចគ្នា។ មិនតែប៉ុណ្ណោះ តារាស្រីវ័យ ៤៣ ឆ្នាំរូបនេះ ក៏បានបង្កើតប្រវត្តិសាស្ត្រជាស្ត្រី និងជាជនជាតិអាមេរិកដំបូងគេ ដែលមានការប្រគំតន្ត្រីទេសចរណ៍ចំនួនពីរអាចរកចំណូលបានជាង ៤០០ លានដុល្លារ។

នៅចុងខែមេសា Beyonce បានចាប់ផ្តើមការប្រគំតន្ត្រីទេសចរណ៍ "Cowboy Carter" នៅទីក្រុង Los Angeles ដោយបានសម្ដែងបទ "Texas Hold 'Em" និងបទចម្រៀងចង្វាក់ Country ល្បីៗជាច្រើនទៀតរបស់នាង ព្រមទាំងបាននាំកូនស្រីមកសម្ដែងលើឆាកជាមួយគ្នាផងដែរ។ ការសម្ដែងចំនួន ៣២ ឆាកនៅពហុកីឡដ្ឋានធំៗក្នុងតំបន់អាមេរិកខាងជើង ចក្រភពអង់គ្លេស និងអឺរ៉ុប សុទ្ធតែលក់សំបុត្រដាច់អស់គ្មានសល់។

ពេញមួយដំណើរប្រគំតន្ត្រីទេសចរណ៍របស់នាង Beyonce បានគោរពដល់ការរួមចំណែករបស់ជនជាតិអាមេរិកស្បែកខ្មៅចំពោះតន្ត្រី Country ជាពិសេសក៏បានផ្តល់កិត្តិយសដល់សិល្បករជនជាតិស្បែកខ្មៅ ដែលមួយចំនួនបានបង្ហាញវត្តមាននៅក្នុងអាល់ប៊ុម "Cowboy Carter" ផងដែរ។កាលពីខែកុម្ភៈ Beyonce ក៏បានក្លាយជាស្ត្រីស្បែកខ្មៅដំបូងគេផងដែរ ដែលឈ្នះអាល់ប៊ុមចម្រៀង Country ល្អបំផុតនៅកម្មវិធី Grammy Awards ឆ្នាំ ២០២៥ ៕

ប្រែសម្រួល៖ វ៉ាន់ថន