ថ្ងៃព្រហស្បតិ៍ ទី១៩ ខែមិថុនា ឆ្នាំ២០២៥
ថ្ងៃព្រហស្បតិ៍ ទី១៩ ខែមិថុនា ឆ្នាំ២០២៥
"Jurassic World: Rebirth" ដែលជាភាពយន្តទី៧ ពីសែស្រឡាយភាពយន្តដាយណូស័រ "Jurassic Park” ទើបតែត្រូវបានសម្ពោធបញ្ចាំងនៅទីក្រុងឡុងដ៍ កាលពីថ្ងៃទី១៧ ខែមិថុនានេះ ជាមួយវត្តមានតារាល្បីៗដែលបានចូលរួមសម្ដែង។
តារាហូលីវូដល្បីៗរួមមានតារាស្រី Scarlett Johansson, តារាប្រុស Jonathan Bailey និង Mahershala Ali បានបង្ហាញវត្តមានរួមគ្នាដើម្បីសម្ពោធភាពយន្ត "Jurassic World: Rebirth" នៅលើកម្រាលព្រំពណ៌បៃតងនៅទីក្រុងឡុងដ៍ កាលពីថ្ងៃទី១៧ ខែមិថុនា។
ដឹកនាំដោយលោក Gareth Edwards ភាពយន្ត "Jurassic World: Rebirth" មិនមានសាច់រឿងពាក់ព័ន្ធនឹងភាពយន្ត "Jurassic World” វគ្គមុនៗនោះទេ ដោយនឹងនិយាយពីរឿងរ៉ាវរបស់តួអង្គថ្មីមួយក្រុមដែលត្រូវបំពេញបេសកកម្មលើកោះហាមឃាត់ ដើម្បីតាមរកគំរូ DNA ពីដាយណូស័រ ៣ ប្រភេទដើម្បីយកមកធ្វើជាថ្នាំសង្គ្រោះជីវិតមនុស្ស។
ភាពយន្តនេះត្រូវបានចេញបញ្ចាំងរយៈពេល៣ឆ្នាំបន្ទាប់ពីវគ្គមុនគឺរឿង Jurassic World Dominion ដែលមានតារាសម្ដែង Chris Pratt ជាតួឯកបានចេញកាលពីឆ្នាំ២០២២ និងរកចំណូលពីការលក់សំបុត្របានដល់ ១ ពាន់លានដុល្លារ។
ជួបជាមួយសារព័ត៌មានរ៉យទ័រនៅក្នុងកម្មវិធីសម្ពោធបញ្ចាំងលើកដំបូងនេះ តួឯកស្រីវគ្គថ្មីគឺតារាសម្ដែង Johansson បាននិយាយថាតួនាទីរបស់នាងនៅក្នុងខ្សែភាពយន្តនេះបានធ្វើឱ្យនាងនឹកឃើញដល់ការចងចាំដំបូងបំផុតរបស់នាងចំពោះស៊េរីភាពយន្តដាយណូស័រនេះ។ តួសម្តែងរឿង "Black Widow" បានរំឭកថានាងបានមើលខ្សែភាពយន្ត "Jurassic Park" ដំបូងនៅរោងកុនតាំងពីនាងមានអាយុ ១០ ឆ្នាំ ហើយវាជារឿងដ៏អស្ចារ្យដែល ៣ ទសវត្សរ៍ក្រោយមកនាងបានចូលរួមចំណែកក្នុងភាពយន្តនេះដូចបំណង។
ចំណែកអ្នកនិពន្ធរឿងគឺលោក David Koepp ដែលបានសរសេរសាច់រឿងសម្រាប់ភាពយន្ត "Jurassic World: Rebirth" ព្រមទាំងភាពយន្ត "Jurassic Park" កាលពីឆ្នាំ ១៩៩៣ បាននិយាយថា លោកមានបំណងធ្វើយ៉ាងណាឱ្យខ្សែភាពយន្តចុងក្រោយនេះមានចំណុចពាក់ព័ន្ធខ្លះជាមួយភាពយន្តដើម ដែលធ្វើឱ្យទស្សនិកជនក៏ដូចជាអ្នកគាំទ្រស៊េរីភាពយន្តនេះផ្ទាល់បានត្រលប់ទៅកាន់ការចងចាំគួរឱ្យខ្លាចកាលពីក្មេងម្ដងទៀត។សូមបញ្ជាក់ថាភាពយន្ត “Jurassic World: Rebirth” នឹងចាប់ផ្តើមចាក់បញ្ចាំងជាសកលនៅថ្ងៃទី ២ខែកក្កដាខាងមុខ៕
ប្រែសម្រួល៖ វ៉ាន់ថន
