ភាពយន្ត “The Wicked” ទើបតែបញ្ចេញវីដេអូផ្សព្វផ្សាយដំបូងសម្រាប់វគ្គថ្មីកាលពីពេលថ្មីៗនេះ ជាមួយការវិលត្រលប់របស់តួឯកស្រីដ៏ល្បីឈ្មោះទាំងពីរគឺ Ariana Grande និង Cynthia Erivo។

រយៈពេលជាង ៧ ខែបន្ទាប់ពីភាគដំបូងត្រូវបានចាក់បញ្ចាំង នៅពេលនេះអ្នកគាំទ្រក៏បានទស្សនាវីដេអូ Trailer ដំបូងពីភាពយន្ត “Wicked: For Good” ដែលជាភាគបន្តនិងភាគបញ្ចប់នៃភាពយន្តវេទមន្តមេមត់ “The Wicked” (ដឹ វីកឃីត)។

តួឯកស្រីទាំងពីរគឺ Ariana Grande និង Cynthia Erivo នឹងត្រលប់មកសម្ដែងជាតួអង្គ Glinda និង Elphaba វិញសម្រាប់ភាគបញ្ចប់នៃភាពយន្តដែលថតតាមល្ខោនតន្ត្រីដ៏ល្បីមួយនេះ។

ភាពយន្តទាំងពីរវគ្គត្រូវបានដឹកនាំដោយផលិតករដើមកំណើតចិនលោក Jon M. Chu និងផ្អែកតាមល្ខោនតន្ត្រីរបស់លោក Stephen Schwartz និងសាច់រឿងដើមគឺសៀវភៅប្រលោមលោកឆ្នាំ ១៩៩៥ ដោយអ្នកនិពន្ធ Gregory Maguire។ សាច់រឿងនិយាយពីរឿងរ៉ាវរបស់មេមត់ស្បែកបៃតង Elphaba ដែលត្រូវបានគេយល់ខុសថាជាសភាវៈអាក្រក់នៅក្នុងប្រលោមលោកកុមារ “The Wizard of Oz”។

ឈុតខ្លីៗសម្រាប់ភាពយន្ត "Wicked: For Good" ចាប់ផ្តើមដោយមេមត់ទាំងពីររូបបានឃ្លាតឆ្ងាយពីគ្នា ដោយ Elphaba ត្រូវលាក់ខ្លួនបន្ទាប់ពីប្រឆាំងនឹងតួអង្គ Wizard ខណៈតួអង្គ Glinda ទទួលបានភាពល្បីល្បាញ និងប្រជាប្រិយភាព។

គួររំឭកថា ភាពយន្ត "Wicked" វគ្គ១ អាចរកចំណូលបាន ៧៥៦ លានដុល្លារទូទាំងពិភពលោក និងបានឈ្នះពានរង្វាន់អូស្ការចំនួនពីរសម្រាប់ការរចនាសំលៀកបំពាក់ និងការរៀបចំឆាក។សម្រាប់ភាពយន្ត "Wicked: For Good" ដែលជាវគ្គថ្មីនឹងចាក់បញ្ចាំងគ្រប់រោងភាពយន្តក្នុងខែវិច្ឆិកាខាងមុខ ៕
 

ប្រែសម្រួល៖ វ៉ាន់ថន