ថ្ងៃសុក្រ ទី១៨ ខែមេសា ឆ្នាំ២០២៥
ថ្ងៃសុក្រ ទី១៨ ខែមេសា ឆ្នាំ២០២៥
ការពន្យាពេលអនុវត្តន៍លើការយកពន្ធរបស់លោកប្រធានាធិបតីអាមេរិកDonald Trumpរយៈពេល៩០ថ្ងៃ បានទុកចន្លោះពេលវេលាសម្រាប់កិច្ចពិភាក្សាជាច្រើនបន្ថែមទៀត ខណៈដែលកោះតៃវ៉ាន់សង្ឃឹមថានឹងទទួលបានប្រយោជន៍ច្រើនពីទីផ្សារអាមេរិក។ នេះជាការលើកឡើងរបស់រដ្ឋមន្ត្រីការបរទេសតៃវ៉ាន់នៅថ្ងៃព្រហស្បតិ៍(១០មេសា)នេះ។
នៅក្នុងការកែប្រែដ៏គួរឱ្យភ្ញាក់ផ្អើលមួយ នៅថ្ងៃពុធ(៩មេសា) លោក Trump និយាយថា លោកនឹងបន្ថយការយកពន្ធធ្ងន់ជាបណ្ដោះអាសន្នដែលលោកបានប្រកាសនៅលើប្រទេសជាច្រើន ស្របពេលលោកបានដាក់តំឡើងពន្ធធ្ងន់លើប្រទេសចិនជាង១០០ភាគរយ។
អាមេរិកដាក់ពន្ធលើកោះតៃវ៉ាន់៣២ភាគរយ ដែលធ្វើឱ្យទីផ្សារភាគហ៊ុនរបស់ដែនកោះមួយនេះធ្លាក់ចុះ ។
ថ្លែងទៅកាន់អ្នកសារព័ត៌មាននៅសភានៅថ្ងៃព្រហស្បតិ៍នេះ លោករដ្ឋមន្ត្រីការបរទេសតៃវ៉ាន់ Lin Chia-lung និយាយថា រដ្ឋាភិបាលនឹងបង្កើនការទិញរបស់ខ្លួនពីអាមេរិក ហើយបង្កើនការវិនិយោគបន្ថែមនៅអាមេរិក រួមនិងកាត់បន្ថយអតិរេកពាណិជ្ជកម្មរបស់កោះនេះជាមួយនឹងសហរដ្ឋអាមេរិកដែលជាប្រទេសជាខ្នងបង្អែកបរទេសដ៏សំខាន់បំផុតរបស់តៃវ៉ាន់។
ប្រែសម្រួល៖ណាវ័ន្ត
