ថ្ងៃព្រហស្បតិ៍ ទី០៣ ខែមេសា ឆ្នាំ២០២៥

ប្រាសាទ ដាវីន និងតារាម៉ូដែលល្បីៗប្រជែងសម្រស់គ្នាយ៉ាងភ្ញាក់ផ្អើលក្នុងកម្មវិធីបង្ហាញម៉ូដដ៏ធំមួយ

៣១ មីនា ២០២៥ | កម្សាន្ដ

 

 

អតីតម្ចាស់មកុដ Miss Universe Cambodia 2024 ប្រាសាទ ដាវីន និងតារាម៉ូដែលល្បីៗជាច្រើនរូបដើរបង្ហាញម៉ូដប្រជែងសម្រស់គ្នាយ៉ាងភ្ញាក់ផ្អើលក្នុងពិធីសម្ភោធហាងរបស់អ្នកជំនួញស្រីល្បីឈ្មោះម្នាក់កាលពីចុងសប្តាហ៍កន្លងទៅ។

 

 
តារាម៉ូដែលប្រុសស្រីជាច្រើនរូប រួមទាំងវត្តមានបវរកញ្ញាចក្កវាឡកម្ពុជាឆ្នាំ២០២៤ អ្នកនាង ប្រាសាទ ដាវីន បានលេចមុខបង្អួតសម្រស់គ្នាយ៉ាងភ្ញាក់ផ្អើលក្នុងកម្មវិធីដើរបង្ហាញម៉ូដដ៏ធំមួយក្នុងថ្ងៃសម្ភោធ KBT Central របស់អ្នកជំនួញស្រីល្បីឈ្មោះ អ៊ឹង សុខគីម កាលពីល្ងាចថ្ងៃទី២៩ ខែមីនា ឆ្នាំ២០២៥ ។

 


 
ក្រៅពីវត្តមាន Miss Universe Cambodia 2024 ប្រាសាទ ដាវីន និងតារាបង្ហាញម៉ូដល្បីៗដែលប្រជែងសម្រស់គ្នាលើឆាកបង្ហាញម៉ូដ កម្មវិធីនេះក៏មានការចូលរួមពីសិល្បករ-សិល្បការនី តារាល្បីៗ និង KOL វ័យក្មេងជាច្រើនរូប តែងខ្លួនបង្អួតសម្រស់ជាមួយស្ទីលកាបូបបែបទាន់សម័យមើលទៅពិតជាស៊ីវិល័យខ្លាំងមែនទែន។
 


ដាវីន ថា នាងពិតជាសប្បាយចិត្តដែលទទួលបានទំនុកចិត្តពីអ្នកជំនួញខាងលើ ឱ្យរៀបចំកម្មវិធី​នេះ ហើយរឹតតែសប្បាយចិត្តពេលបានជួបជុំសិល្បករ-សិល្បការនីល្បីៗជាច្រើនរូបដែលគ្រប់គ្នារៀបចំតុបតែងខ្លួនយ៉ាងស្រស់ស្អាតរៀងៗខ្លួន។

 


 
អ្នកនាង ប្រាសាទ ដាវីន បានកោតសរសើរដល់អ្នកជំនួញស្រីល្បីឈ្មោះ អ៊ឹង សុខគីម ដែលបានធ្វើជាគំរូដល់ស្ត្រីដ៏ទៃឱ្យមានភាពក្លាហាន ហ៊ានបង្កើត និងធ្វើឱ្យក្តីស្រមៃរបស់ខ្លួនឯងក្លាយជាការពិត ថែមទាំងបានជួយជ្រោមជ្រែងដល់ស្ត្រីផ្សេងទៀតផង។

 

 

មិនតែប៉ុណ្ណោះ អ្នកជំនួញស្រីល្បីឈ្មោះរូបនេះថែមទាំងផ្តល់ការងារដល់សិល្បករ-សិល្បការនីផងដែរ ដោយកន្លងមកគេឃើញតារាល្បីៗ រួមទាំង ប្រាសាទ ដាវីន ផ្ទាល់ សុទ្ធតែធ្លាប់រួមការងារជាមួយគ្នារួចមកហើយ។ក្នុងនាមជាសិល្បការនីម្នាក់ អ្នកនាង ប្រាសាទ សង្ឃឹមថា សិល្បករ-សិល្បការនីខ្មែរយើងទទួលធ្វើការងារប្រកបដោយគុណតម្លៃ និងសេចក្តីថ្លៃថ្នូរ។ ក្រោយចប់កម្មវិធីនេះ Miss Universe Cambodia 2024 សង្ឃឹមថា នាងនឹងអាចមានឱកាសរួមការងារជាមួយអ្នកជំនួញស្រីរូបនេះបន្តទៀត ដើម្បីបង្ហាញឱ្យគ្រប់គ្នាឃើញពីឥទ្ធិពលរបស់ស្រ្តីខ្មែរយើង ។

 

 

អត្ថបទ៖ រ៉ាត់ ចាន់ធីតា រូបភាព៖ ឃាង ទូច

 

 

ព័ត៌មានដែលទាក់ទង

© រក្សា​សិទ្ធិ​គ្រប់​យ៉ាង​ដោយ​ PNN ប៉ុស្ថិ៍លេខ៥៦ ឆ្នាំ 2025