តារាស្រីល្បីឈ្មោះ ព្រះកាយច័ន្ទ ដែលធ្លាប់បោះបង់ការប្រកួតនៅពាក់កណ្តាលទីក្នុងវិស័យបវរកញ្ញានោះ ហាក់បង្ហាញតម្រុយក្នុងការវិលត្រឡប់មកដណ្តើមមកុដជាថ្មីម្តងទៀត ។ 

ទោះរវល់នៅក្នុងការបង្ហាត់បង្រៀនកូនសិស្សតូចៗរបស់ខ្លួនក្តី ព្រះកាយច័ន្ទ មិនភ្លេចពីការថែសម្ផស្សដើម្បីត្រៀមខ្លួនចូលប្រកួតក្នុងវិស័យបវរកញ្ញាជាថ្មីម្តងទៀត បន្ទាប់ពីនាងបង្ហើរពាក្យប្លែកៗជាច្រើនទៅកាន់អ្នកគាំទ្រ ។ 

កន្លងមកនេះកញ្ញា មានការខកចិត្តនិងសោកស្តាយខ្លាំងណាស់នៅក្នុងការបោះបង់ការប្រកួតក្នុងកម្មវិធីមួយ ព្រោះមិនបានបំពេញក្តីស្រមៃធំរបស់ខ្លួន តែទោះជាយ៉ាងណានាងនៅតែចិញ្ចឹមចិត្តចង់ប្រកួតដណ្តើមមកុដនៅក្នុងកម្មវិធីណាមួយប្រសិនបើពេលវេលាអំណោយផល ។ នាងស្រាប់តែពោលពាក្យប្លែកៗដែលធ្វើឱ្យអ្នកគាំទ្រជាច្រើនហាក់រំពឹងថា ព្រះកាយច័ន្ទ នឹងត្រឡប់មកជាថ្មី ។ 

ព្រះកាយច័ន្ទ បាននិយាយថា អ្នកចាស់មិនប្រាកដថាខ្លាំង ហើយអ្នកថ្មីក៏មិនប្រាកដថាខ្សោយ អ្វីដែលអ្នកប្រកួតគ្រប់រូបចង់បាននោះគឺ ការប្រកួតប្រជេងដោយសមធម៌ ដោយលក្ខណៈស្មើភាព យុត្តិធម៌ និងប្រកបដោយតម្លាភាព ។ បន្ទាប់ពីឃើញ ព្រះកាយច័ន្ទ និយាយបែបនេះ អ្នកគាំទ្រជាច្រើនបានសំណូមពរឱ្យនាងចូលរួមប្រកួតជាថ្មី ដើម្បីដណ្តើមមកុដក្នុងក្តីស្រមៃនាង ។ 

ចំពោះរឿងនេះកញ្ញា ធ្លាប់បានបង្ហើបប្រាប់ថា បើមានឱកាសល្អ នាងនឹងបន្តចូលរួមប្រកួត ដើម្បីបញ្ចប់ក្តីស្រមៃធំរបស់ខ្លួនមុនវ័យ៣០ឆ្នាំ ពេលនេះនាងសុំលាក់សិន ដើម្បី Surprise អ្នកគាំទ្រ ។ 

មួយរយៈពេលចុងក្រោយនេះស្រីស្អាត ព្រះកាយច័ន្ទ មមាញឹកខ្លាំងនៅក្នុងការបង្ហាត់បង្រៀនសិស្សក្មេងៗរបស់ខ្លួនឱ្យកាន់តែមានដុងខាងសិល្បៈ ហើយនាងក៏មិនភ្លេចនៅក្នុងការថែរក្សាសម្រស់ និងថែរក្សារូបរាងឱ្យកាន់តែស្រស់ស្អាត មុននឹងនាងចូលរួមប្រកួតនៅក្នុងកម្មវិធីណាមួយ ៕ 

អត្ថបទ ៖ ម៉ា រីសា រូបភាព ៖ ភីអិនអិន