នៅព្រឹកថ្ងៃទី ៣ ខែមេសា ឆ្នាំ ២០២៥ ប្រធានាធិបតីអាមេរិក លោក ដូណាល់ ត្រាំ បានប្រកាសដំឡើងពន្ធទៅវិញទៅមក ទៅលើប្រទេសដៃគូពាណិជ្ជកម្មជាច្រើន ដែលក្នុងនោះ រួមមានប្រទេសកម្ពុជា ផងដែរ ដែលនឹងទទួលនូវបន្ទុកពន្ធ ៤៩% លើមុខទំនិញនាំចូលទៅ អាមេរិក។ទាក់ទងនឹងបញ្ហាខាងលើនេះ ឯកឧត្តម មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានលើកឡើងថា ក្រសួងសេដ្ឋកិច្ច មានក្រុមការងារកំពុងវាយតម្លៃអំពី កម្មវិបាកនៃការដាក់ពន្ធគយនេះ ហើយនឹងរៀបចំវិធានការ ដើម្បីដោះស្រាយបញ្ហានេះ សំដៅរក្សាភាពប្រកួតប្រជែង និងកំណើនសេដ្ឋកិច្ចរបស់កម្ពុជា។

ចំពោះការដំឡើងពន្ធរបស់អាមេរិកនេះដែរ លោកឧកញ៉ាបណ្ឌិត ស៊ិន ចន្ធី អគ្គនាយកក្រុមហ៊ុន ឡាញហល អេចប្រេស ខេមបូឌា យល់ឃើញថា អាមេរិក ចាប់ផ្តើមដំឡើងពន្ធលើបណ្តាប្រទេសជាច្រើន ចាប់តាំងពី លោកដូណាល់ ត្រាំ ឡើងជាប្រធានាធិបតីអាមេរិក នៅដើមឆ្នាំ ២០២៥មកម្ល៉េះ ហើយយើងមិនអាចទប់ស្កាត់ ឬហាមឃាត់ការដំឡើងពន្ធនេះបានទេ ប៉ុន្តែរាជរដ្ឋាភិបាលកម្ពុជា បានដាក់ចេញនូវយុទ្ធសាស្រ្តជាច្រើន ដើម្បីទប់ទល់នឹងបញ្ហាដែលមិនអាចមើលឃើញជាមុន ព្រមទាំងផែនការជំរុញកំណើនសេដ្ឋកិច្ចជាតិផងដែរ។

យ៉ាងណាក៏ដោយ បណ្ឌិត ស៊ិន ចន្ធី ជឿជាក់ថា ព័ត៌មាននៃការដំឡើងពន្ធនេះ ទើបតែចាប់ផ្តើមប៉ុណ្ណោះ ហើយមានរឿងជាច្រើនទៀត ដែលរដ្ឋាភិបាលនៃប្រទេសទាំង ២ ត្រូវបន្តពិភាក្សា និងដោះស្រាយបញ្ហានេះ។ស្របគ្នានេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា យល់ឃើញថា ការដំឡើងពន្ធ ឬប្រកាសច្បាប់ណាមួយ ដែលទើបតែប្រកាស និងមិនទាន់ចូលជាធរមាន គឺយើងពុំទាន់អាចសន្និដ្ឋាន ឬវាយតម្លៃបានត្រឹមត្រូវនោះទេ ទាល់តែរង់ចាំមើលការអនុវត្តចូលជាធរមាន ក្នុងរយៈពេលជាក់លាក់ណាមួយ ទើបអាចវាយតម្លៃពីផលប៉ះពាល់បានត្រឹមត្រូវ។

បន្ថែមលើនេះ អ្នកឧកញ៉ា ពន្យល់ថា ក្រៅពីទីផ្សារអាមេរិក កម្ពុជា នៅមានទីផ្សារសំខាន់ៗផ្សេងទៀតដូចជា សហគមន៍អឺរ៉ុប អង់គ្លេស កាណាដា និងបណ្តាប្រទេសដៃគូ ស្ថិតក្រោមកិច្ចព្រមព្រៀងពាណិជ្ជកម្មជាច្រើនទៀត អាចជាទីផ្សារថ្មីរបស់កម្ពុជា ដែលគួរពិចារណា និងមិនរងផលប៉ះពាល់ធំដុំ។លោក Casey Barnett ប្រធានសភាពាណិជ្ជកម្មសហរដ្ឋអាម៉េរិកប្រចាំនៅកម្ពុជា បានបង្ហោះនៅថ្ងៃទី ៣ ខែមេសា នៅលើបណ្តាញសង្គមរបស់ខ្លួនថា ប្រសិនបើរាជរដ្ឋាភិបាលកម្ពុជា មិនដោះស្រាយបញ្ហាពន្ធ ៤៩% ដែលអាមេរិក ដាក់លើកម្ពុជា វានឹងប៉ះពាល់ដល់ សេដ្ឋកិច្ចកម្ពុជា។

លោកបានសង្កត់ធ្ងន់ថា ក្នុងឆ្នាំ ២០២៤ កម្ពុជា នាំចូលទំនិញពីសហរដ្ឋអាមេរិកត្រឹមតែ ៣០០លានដុល្លារប៉ុណ្ណោះ ដូច្នេះវានឹងត្រូវចំណាយតិចតួចសម្រាប់រាជរដ្ឋាភិបាលកម្ពុជា ក្នុងការអនុញ្ញាតឱ្យទំនិញទាំងអស់របស់សហរដ្ឋអាមេរិក អាចនាំចូលទីផ្សារកម្ពុជា ដោយគ្មានពន្ធ និងផ្តល់អាជ្ញាប័ណ្ណយ៉ាងឆាប់រហ័សដល់អាជីវកម្មរបស់សហរដ្ឋអាមេរិកដូចជា Starlink ជាដើម។បើក្រឡេកមើលតួលេខពាណិជ្ជកម្មវិញ យើងឃើញថា អាមេរិក គឺតែងតែជាទីផ្សារនាំចេញធំបំផុតរបស់កម្ពុជា ជាក់ស្តែង ក្នុងរយៈពេល ២ខែ ដើមឆ្នាំ ២០២៥នេះ កម្ពុជា នាំចេញទំនិញទៅកាន់អាមេរិក ជាង ១ពាន់ ៦រយលានដុល្លារអាមេរិក ខណៈកម្ពុជា នាំចូលមកជាង ៤៨លានដុល្លារអាមេរិក។

កាលពីឆ្នាំ ២០២៤កន្លងទៅ កម្ពុជា នាំចេញទំនិញទៅកាន់អាមេរិកជិត ១០ពាន់លានដុល្លារអាមេរិក កើនឡើងប្រមាណ ១១% ហើយកម្ពុជា ក៏បាននាំចូលពីអាមេរិក មកវិញប្រមាណ ២៦៤លានដុល្លារអាមេរិក មានន័យថា កម្ពុជា សម្រេចនូវអតិរេកពាណិជ្ជកម្មជាង ៩ពាន់ ៦រយលានដុល្លារអាមេរិក។សូមជម្រាបថា ប្រធានាធិបតីអាមេរិកលោក ដូណាល់ ត្រាំ បានបញ្ឆេះសង្រ្គាមពាណិជ្ជកម្មពិភពលោក ដោយបានដំឡើងពន្ធ ១០% លើការនាំចូលពី ជុំវិញពិភពលោក និងការយកពន្ធបន្ថែមយ៉ាងធ្ងន់ធ្ងរលើដៃគូពាណិជ្ជកម្មសំខាន់ៗ៕

អត្ថបទ៖ ងួន សុភ័ត្រ្តា រូបភាព៖ ឯកសារ