ក្រុមហ៊ុន Santana Agro ចុះកិច្ចសន្យាទិញគ្រាប់ស្វាយចន្ទីសើម ៣០០តោន ពីសហគមន៍កសិកម្មទំនើបខេត្តកំពង់ធំ ក្នុងទំហំទឹកប្រាក់ ៤០ម៉ឺនដុល្លារអាមេរិក។ក្នុងពិធីចុះកិច្ចសន្យាទិញស្វាយចន្ទីសើមចំនួន ៣០០តោន កាលពីពេលថ្មីៗនេះ ជាផ្លូវការពីសហគមន៍កសិកម្មទំនើបស្វាយចន្ទីចំនួន៣ គឺសហគមន៍ប្រាសាទសំបូររុងរឿង សហគមន៍សាលាវិស័យ និងសហគមន៍ទំរីងកំពង់ធំ ឯកឧត្តម ឃឹម ហ្វីណង់ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានលើកឡើងថា កិច្ចសន្យាទិញស្វាយចន្ទីសើមចំនួន ៣០០តោននេះ ធ្វើឡើងក្នុងលក្ខខណ្ឌតម្លៃប្រែប្រួលតាមជាក់ស្តែង ដោយក្រុមហ៊ុននឹងផ្តល់ជូន ១០០៛/គីឡូក្រាមបន្ថែម ពីតម្លៃទីផ្សារនៅតាមតំបន់នីមួយៗ ក្នុងនោះ ការចំណាយដឹកជញ្ជូនពីសហគមន៍ គឺជាបន្ទុករបស់ក្រុមហ៊ុន។

លើសពីនេះ ក្រុមហ៊ុនអាចផ្តល់ដល់សហគមន៍ក្នុងថ្ងៃទី៣០ ខែមីនា ឆ្នាំ២០២៥ កន្លងទៅនេះ ក្នុងតម្លៃ ៥៩០០៛/គីឡូក្រាម សម្រាប់ គ្រាប់ស្វាយចន្ទីសើម ដែលមានកម្រិតភាគរយសាច់ ២៨%។

អ្នកនាំពាក្យក្រសួងកសិកម្មរូបនេះ បានបន្តថា កាលពីថ្ងៃទី២៥ ខែមីនា កន្លងទៅនេះ ក្រុមហ៊ុន MIRARTH បានចុះកិច្ចសន្យាទិញគ្រាប់ស្វាយចន្ទីស្រស់ ពីសហគមន៍កសិកម្មទំនើបដំណាំស្វាយចន្ទីទាំង៣ នៅខេត្តកំពង់ធំចំនួន ៤០០តោន ក្នុងទំហំទឹកប្រាក់ជិត ៦៥ម៉ឺនដុល្លារអាមេរិក ដែលធ្វើឱ្យសហគមន៍លែងមានការព្រួយបារម្ភអំពីបញ្ហាទីផ្សារសម្រាប់រដូវកាលប្រមូលផលឆ្នាំនេះទៀតហើយ។ 

ក្នុងនោះ គ្រាប់ស្វាយចន្ទីដែលនៅសេសសល់ នឹងត្រូវបានប្រមូលសម្ងួតទុកដើម្បីទុកលក់ស្ងួតនៅពេលក្រោយ។សូមជម្រាបថា បើយោងតាមសមាគមស្វាយចន្ទីកម្ពុជានៅឆ្នាំ២០២៤ កម្ពុជាសម្រេចបានការប្រមូលទិន្នផលគ្រាប់ស្វាយចន្ទីចំនួន ៨៥ម៉ឺនតោន ក្នុងនោះ ការនាំចេញគ្រាប់ឆៅបានចំនួន ៨១ម៉ឺន ៥ពាន់តោន កើនឡើង ២១% គិតជាទឹកប្រាក់ ១១៥០ ពាន់លានដុល្លារ កើនឡើង ២៦% ក្នុងនោះ នាំចេញទៅវៀតណាមចំនួន ៧៩ម៉ឺន ៥ពាន់តោន៕
 

អត្ថបទ៖ ថុន សុកេតុមាលា រូបភាព៖ ឯកសារ