រយៈពេលប្រមាណ ៥ខែកន្លងមកនេះ ពោលគឺគិតចាប់ពីខែវិច្ឆិកា ឆ្នាំ២០២៤ មកដល់ដំណាច់ខែមីនា ឆ្នាំ២០២៥ ផ្លូវក្រវាត់ព្រំដែននៅក្នុងភូមិសាស្ត្រខេត្តមណ្ឌលគិរី និងខេត្តរតនគិរី សាងសង់សម្រេចបានប្រមាណជិត៤០ហើយ នៃផែនការរួម។ ក្នុងនោះ ខេត្តមណ្ឌលគិរី សាងសង់បានប្រវែងជិត ៤៥ គីឡូម៉ែត្រ ស្មើនឹង ៤២,៤៥% និងខេត្តរតនគិរី បានប្រវែងជាង៣០គីឡូម៉ែត្រ ស្មើនឹង ៣៤,២៦%។ផ្លូវក្រវាត់ព្រំដែនដែលកំពុងសាងសង់នេះ គឺប្រើបា្រស់ថវិការបស់”មូលនិធិកសាងហេដ្ឋារចនាសម្ព័ន្ធតាមព្រំដែន“ ដែលជនរួមជាតិខ្មែរគ្រប់ទិសទីទាំងក្នុង និងក្រៅប្រទេស បានស្ម័គ្រចិត្តចូលរួមបរិច្ចាគ។

បើតាមក្រុមការងារចំពោះកិច្ចគ្រប់គ្រងមូលនិធិកសាងហេដ្ឋារចនាសម្ព័ន្ធតាមព្រំដែនដោយផ្តោតលើការកសាងផ្លូវក្រវាត់ព្រំដែន ថានៅក្នុងកិច្ចការងារសាងសង់ ក្រុមការងារជំនាញក៏ បានឈូសព្រៃទទឹង ៥ ម៉ែត្រ បានប្រវែង ១១០ គីឡូម៉ែត្រ សម្រាប់រកផ្លូវខ្សែដំបូង, ឈូសផ្លូវទទឹង ២០ ម៉ែត្រ បានប្រវែង ១០៣,៨៥ ម៉ែត្រ សម្រាប់រកអ័ក្សផ្លូវ, លុបជ្រលង-អូរ បន្ទាបចំណោតភ្នំ និងធ្វើប្រឡាយបាន ប្រវែង ១០០,៥០ គីឡូម៉ែត្រ, កសាងតួផ្លូវ និងចិតជញ្ជាំងភ្នំ បានប្រវែង ៩៩,១០ គីឡូមែត្រ និងក្រាលល្បាយ កម្ទេចថ្មសម្រេចជាស្ថាពរប្រវែង ៧៥,២០ គីឡូម៉ែត្រ។ 

ក្រៅពីនេះ ក្រុមការងារចំពោះកិច្ច ក៏បានកសាងសម្រេចជាស្ថាពរសំណង់សិល្បការជាច្រើន រួមមាន  លូប្រអប់ សរុប ចំនួន ២១ កន្លែង ស្មើនឹង ២០៨,៤៥ ម៉ែត្រ, ដាក់លូមូលបេតុងគ្រប់ប្រភេទ សរុប ៩៨ កន្លែង និងស្ថាបនាសម្រេច ជាស្ថាពរនូវថ្នល់បេតុងបង្រៀរទឹក សរុប ចំនួន ៦ កន្លែង ស្មើនឹង ១០៥,៧០ ម៉ែត្រ។ ចំពោះការងាររាវរកគ្រាប់មីន-យុទ្ធភណ្ឌមិនទាន់ផ្ទុះតាមមុខសញ្ញានៃការដ្ឋានស្ថាបនាផ្លូវក្រវាត់ព្រំដែន ត្រូវបាន សម្រេចជាស្ថាពរលើផ្ទៃដីទំហំ ២.៧៥២.៥០០ ម៉ែត្រការ៉េ ស្មើនឹង ៤៤% នៃផ្ទៃដីសរុប ដែលគ្រោងរាវរកទំហំ ៦.២៥០.០០០ ម៉ែត្រការ៉េ ដោយបានរកឃើញគ្រាប់គ្រប់ប្រភេទ ចំនួន ៧៩ គ្រាប់ ក្នុងនោះរួមមាន គ្រាប់ប៊ុមប៊ី (គ្រាប់បែកចង្កោម) ចំនួន ៣៥ គ្រាប់។

សម្រាប់ការងារចំពោះមុខ ក្រុមការងារកំពុងបន្តជំរុញការងារបោសសម្អាតមីនយុទ្ធភណ្ឌមិនទាន់ផ្ទុះបន្ថែមទៀត, បន្តជំរុញ ល្បឿនកសាងផ្លូវក្នុងរដូវប្រាំង ដោយធានាឱ្យបានតាមបទដ្ឋានលក្ខណៈបច្ចេកទេស មានគុណភាព និង ភាពធន់នឹងអាកាសធាតុ, បន្តជំរុញល្បឿននៃការកសាងសំណង់សិល្បការ្យ ធ្វើយ៉ាងណាឱ្យសម្រេចជាស្ថាពរ នៅមុនពេលភ្លៀងធ្លាក់ជោគជាំនារដូវវស្សាដ៏ឆាប់ខាងមុខនេះ។

គួរបញ្ជាក់ថា ផ្លូវក្រវាត់ព្រំដែន និងផ្លូវតភ្ជាប់ចូលផ្លូវព្រំដែន នៅក្នុងភូមិសាស្ត្រខេត្តមណ្ឌលគិរី និងខេត្តរតនគិរី ដែលមានប្រវែងផ្លូវសរុបប្រមាណ ២៥០គីឡូម៉ែត្រ បានចាប់ផ្តើមបើកការដ្ឋានសាងសង់ កាលពីថ្ងៃទី០១ ខែវិច្ឆិកា ឆ្នាំ២០២៤។ ផ្លូវក្រវាត់ព្រំដែនប្រវែងសរុប២៥០គីឡូម៉ែត្រ គឺស្មើជាង ១៨ភាគរយ នៃផ្លូវខ្សែក្រវាត់ព្រំដែនដែលនៅសល់ប្រមាណជាង៥០ភាគរយ។ចាប់តាំងឆ្នាំ១៩៩៤ មករាជរដ្ឋាភិបាល បានជំរុញកសាង ផ្លូវក្រវាត់ ព្រំដែនជាមួយ ប្រទេសជិតខាងទាំងបីដែលរួម មាន វៀតណាម ឡាវ និង ថៃ ។ រហូតមកដល់បច្ចុប្បន្ន  ផ្លូវក្រវាត់ព្រំដែនសាងសង់សម្រេចបានប្រមាណ១៣០០គីឡូម៉ែត្រ និងនៅសេសសល់ប្រមាណ១៣០០គីឡូម៉ែត្រ ត្រូវសាងសង់បន្ត៕
 

អត្ថបទ៖ សន រដ្ឋា ,រូបភាព៖ ឯកសារ