បន្ទាប់ពីទទួលបានជោគជ័យខ្លាំងសម្រាប់វគ្គ១កាលពីចុងឆ្នាំមុន នៅពេលនេះ Ariana Grande ក៏ចាប់ផ្ដើមចេញផ្សពផ្សាយភាគពីរនៃរឿងនេះដែលត្រៀមបញ្ចាំងនៅចុងឆ្នាំ២០២៥។

នៅថ្ងៃទី ២ ខែមេសា តារាចម្រៀងនិងសម្ដែងអាមេរិក Ariana Grande រួមទាំងដៃគូសម្ដែងក្នុងភាពយន្តល្ខោនតន្ត្រី “Wicked” គឺតារាអង់គ្លេស Cynthia Erivo បានចូលរួមកម្មវិធី CinemaCon 2025 នៅទីក្រុង Las Vegas ព្រមទាំងបានឡើងឆាកកំឡុងពេលការធ្វើបទបង្ហាញរបស់ផលិតកម្ម Universal Pictures ដោយពួកគេបានបង្ហាញឈុតខ្លីៗដំបូងសម្រាប់ភាពយន្ត Wicked: For Good ដែលជាភាគពីរ និងភាគចុងក្រោយសម្រាប់រឿង “Wicked”។មិនត្រឹមតែតារាទាំងពីររូបនោះទេដែលបានចូលរួមនោះទេ ប៉ុន្តែអ្នកដឹកនាំរឿងគឺលោក John M. Chu និងផលិតករ Marc Platt ក៏បានបង្ហាញខ្លួននៅលើឆាកផងដែរ។

ជាការពិតណាស់ អ្នកគាំទ្រជាច្រើនកំពុងរង់ចាំទស្សនាភាគបន្ត រួមទាំងសកម្មភាពចេញផ្សព្វផ្សាយភាពយន្តដោយ Cynthia Erivo និង Ariana Grande ដែលបានក្លាយជារូបភាពពេញនិយមស្ទើរតែរាល់ពេលដែលពួកគេបានចូលរួមក្នុងព្រឹត្តិការណ៍ជាមួយរួមគ្នាសម្រាប់ភាពយន្ត Wicked វគ្គដំបូង។ Cynthia Erivo បាននិយាយបែបកំប្លែងទៅកាន់ទស្សនិកជននៅ CinemaCon ឆ្នាំនេះថា ពួកគេទាំងពីរចង់ត្រលប់ទៅផ្សព្វផ្សាយភាពយន្តជាមួយគ្នាម្តងទៀត ហើយបានរៀបចំក្រដាសជូតទឹកភ្នែករួចហើយ ដោយសារតែពួកគេតែងតែយំនៅពេលពួកគេផ្តល់បទសម្ភាសន៍ជាមួយគ្នា។

Cynthia Erivo បាននិយាយអំពីតួអង្គរបស់នាងនៅក្នុងរឿង “Wicked: For Good” គឺ Elphaba ដែលជាមេធ្មប់បៃតងថានឹងនាងត្រូវធ្វើការសម្រេចចិត្តអំពីរបៀបប្រើប្រាស់ថាមពលរបស់ខ្លួន ខណៈដែល Ariana Grande បានបង្ហាញថាតួអង្គរបស់នាងគឺ Glinda ដែលជាមេធ្មប់ចិត្តល្អនឹងត្រូវធ្វើការពិចារណាខ្លួនឯង ៕
 

ប្រែសម្រួល៖ វ៉ាន់ថន