កាន់តែច្បាស់ការណ៍មែនទែនហើយ គឺតារាសម្ដែងអាមេរិក Angelina Jolie នឹងត្រលប់មកសម្ដែងភាពយន្ត “Maleficent” មួយវគ្គទៀត បន្ទាប់ពីវគ្គ២ បានចេញផ្សាយ៦ឆ្នាំកន្លងមក។

បន្ទាប់ពីមានពាក្យចចាមអារ៉ាម និងសំណូមពរពីអ្នកគាំទ្រជាបន្តបន្ទាប់ ថ្មីៗនេះ ក្រុមហ៊ុន Walt Disney ក៏បានទាក់ទងអ្នកនិពន្ធរឿង Linda Woolverton ដើម្បីអភិវឌ្ឍសាច់រឿងវគ្គ ៣ សម្រាប់ភាពយន្តទេពអប្សរបិសាច 'Maleficent' ដែលបានធ្វើអោយទស្សនិកជនទូទាំងពិភពលោកពេញចិត្តខ្លាំងទាំងពីរភាគរួចមកហើយ។ 

គួរបញ្ជាក់ថាអ្នកនិពន្ធរឿងស្រីរូបនេះត្រូវបានគេស្គាល់ច្រើនរួចមកហើយតាមរយៈស្នាដៃនិពន្ធអត្ថបទភាពយន្តបែបរឿងព្រេងនិទានជាច្រើនកន្លងមករួមមានភាពយន្ត Beauty and the Beast ភាពយន្ត The Lion King ភាពយន្ត Alice in Wonderland និង Maleficent ទាំង ២ វគ្គកន្លងមក។

ភាពយន្ត “Maleficent” បានចេញផ្សាយភាគដំបូងក្នុងឆ្នាំ ២០១៤ ដោយនិយាយពីរឿងរ៉ាវទេពអប្សរបិសាចមានថាមពលពិសេស Maleficent (សម្តែងដោយ Angelina Jolie) រស់នៅក្នុងដែនដីទេវតាមានឈ្មោះថា The Moors ។ ប៉ុន្តែថ្ងៃមួយ នាងត្រូវបានបុរសដែលនាងស្រលាញ់ក្បត់ដោយលួចកាត់ស្លាបរបស់នាង យកថ្វាយទៅស្ដេចនៅនគររបស់គេ ដូច្នេះហើយ Maleficent ក៏បានដាក់បណ្តាសាកូនស្រីស្ដេចនោះ គឺព្រះនាង Aurora ឱ្យគេងលក់ជារៀងរហូតនៅថ្ងៃខួបកំណើតទី ១៦ របស់នាង លើកលែងតែនាងទទួលបានការថើបពីស្នេហាពិត។

ចូលមកដល់វគ្គទី២ ដែលចេញនៅឆ្នាំ ២០១៩ បន្ទាប់ពីបានរស់ឡើងវិញ ព្រះនាង Aurora ក៏បានរស់នៅទឹកដី The Moors យ៉ាងមានក្ដីសុខដោយមាន Maleficent ជាម្ដាយចិញ្ចឹម។ ប៉ុន្តែបញ្ហាបានកើតឡើងនៅពេលដែលនាងសម្រេចចិត្តរៀបការជាមួយព្រះអង្គម្ចាស់ Phillips ខណៈមាតារបស់បុត្រារូបនេះមានផែនការអាក្រក់ចំពោះប្រជាជនលើទឹកដី The Moors។

យ៉ាងណាក៏ដោយ បើទោះបីជាតារាសម្តែងជើងចាស់ Angelina Jolie បានបង្ហើបថានាងពិតជាត្រៀមខ្លួនរួចរាល់ហើយក្នុងការវិលមកសម្តែងជាតួ Maleficent ប៉ុន្តែមកដល់ពេលនេះនៅមិនទាន់មានការបញ្ជាក់ថាតើតារាស្រី Elle Fanning នឹងត្រលប់មកសម្តែងជាព្រះនាង Aurora ឬអត់នោះទេ  រួមទាំងអ្នកដឹកនាំរឿង និងតួអង្គផ្សេងទៀត ក៏មិនទាន់ការប្រកាសជាផ្លូវការនៅឡើយដែរ ៕
 

ប្រែសម្រួល៖ វ៉ាន់ថន