បន្ទាប់ពីផ្ទុះព័ត៌មានអាស្រូវជាងមួយខែ ទីបំផុតតារាសម្ដែងកូរ៉េ Kim Soo-hyun បានចេញមុខបដិសេធចំពោះការចោទប្រកាន់ជាច្រើនពីសំណាក់គ្រួសារតារាសម្ដែងស្រី Kim Sae-ron ក្នុងសន្និសីទសារព័ត៌មានមួយកាលពីថ្ងៃចន្ទ ទី៣១ ខែមីនា។

តារាសម្ដែងកូរ៉េខាងត្បូង Kim Soo-hyun បានបដិសេធទាំងទឹកភ្នែកចំពោះការចោទប្រកាន់ថា លោកមានទំនាក់ទំនងស្នេហាជាមួយតារាសម្ដែង Kim Sae-ron នៅពេលនាងមិនទាន់គ្រប់អាយុ និងនិយាយថាលោកមិនអាច "ទទួលស្គាល់អ្វីដែលមិនមែនជាការពិត" បានទេ។

ម៉ាកល្បីៗរួមទាំង Prada បានកាត់ផ្តាច់ទំនាក់ទំនងជាមួយតារាសម្តែងប្រុសរូបនេះស្របពេលមានព័ត៌មានចម្រូងចម្រាសជុំវិញទំនាក់ទំនងរបស់លោកជាមួយតារាស្រី Kim Sae-ron ដែលត្រូវបានគេប្រទះឃើញស្លាប់កាលពីថ្ងៃទី១៦ ខែកុម្ភៈ ក្នុងវ័យ ២៤ឆ្នាំ ដោយមានការសង្ស័យថាបានធ្វើអត្តឃាត។ ក្រោយមកម្ដាយមីងរបស់នាងក៏បានចេញមុខអះអាងថាការស្លាប់របស់នាងគឺមានទំនាក់ទំនងជាមួយ Kim Soo-hyun និងក្រុមហ៊ុនរបស់លោកជុំវិញការជំរិតទារបំណុលនាងជាងកន្លះលានដុល្លារ។

តារាសម្តែងប្រុសវ័យ ៣៧ ឆ្នាំ Kim Soo-hyun បាននិយាយថាលោកបានទាក់ទង Kim Sae-ron រយៈពេលប្រហែល ១ឆ្នាំ កាលពី ៥ ឆ្នាំមុន ប៉ុន្តែមិនមែននៅពេលដែលនាងមិនទាន់គ្រប់អាយុនោះទេ ហើយព័ត៌មានតាមយូធូបដែលបានចេញផ្សាយកាលពីដើមខែមីនានោះបានបង្ហាញភស្តុតាងមិនពិត ទាំងរូបថត Screenshot នៃសារឆ្លើយឆ្លងនានា។

មេធាវីតំណាងឱ្យ Kim Soo-hyun និងទីភ្នាក់ងាររបស់លោកបាននិយាយកាលពីថ្ងៃចន្ទថា ពួកគេបានប្តឹងគ្រួសារ Kim Sae-ron និងអ្នកពាក់ព័ន្ធនឹងការផ្សាយព័ត៌មានលើឆានែល YouTube របស់វិទ្យាស្ថាន Garo Sero ពីបទបរិហារកេរ្តិ៍ និងការរំលោភច្បាប់ការពារព័ត៌មាន ដោយទាមទារសំណងខូចខាតសរុបចំនួន ១២ ពាន់លានវ៉ុន ស្មើនឹងប្រមាណ ៨,១៥ លានដុល្លារអាមេរិក ។

គួរបញ្ជាក់ថា Kim Soo-hyun ទទួលបានភាពល្បីល្បាញនៅក្នុងប្រទេសកូរ៉េខាងត្បូង និងតំបន់អាស៊ី តាមរយៈការសម្ដែងក្នុងរឿងភាគល្បីៗដូចជា "My Love from the Star" និង "Queen of Tears" ជាដើម ៕

ប្រែសម្រួល៖ វ៉ាន់ថន