ថ្ងៃសុក្រ ទី០៤ ខែមេសា ឆ្នាំ២០២៥
ថ្ងៃសុក្រ ទី០៤ ខែមេសា ឆ្នាំ២០២៥
តារាសម្តែង និងជា Influencer ល្បីឈ្មោះ ខន សូរិយា ស្រាប់តែបង្ហាញខ្លួនយ៉ាងភ្ញាក់ផ្អើលក្នុងថ្ងៃ Orientation (អូរៀនថេសិន) នៃកម្មវិធី Miss Cosmo Cambodia 2025 ដែលជាកម្មវិធីប្រកួតបវរកញ្ញាកំពុងផ្ទុះការចាប់អារម្មណ៍ពីមហាជន និងអ្នកនិយមតាមដានវិស័យបវរកញ្ញានៅកម្ពុជា។ ប៉ុន្តែ គួរឱ្យសោកស្តាយគេបែរជាមិនឃើញវត្តមានរបស់ Influencer ល្បីឈ្មោះ ខន សូរិយា ក្នុងចំណោមបេក្ខភាពផ្លូវការទាំងអស់នោះឡើយ។
ជុំវិញរឿងរ៉ាវនេះដែរ កញ្ញា ខន សូរិយា បានប្រាប់ឱ្យភីអិនអីនដឹងថា នាងពិតជាបង្ហាញខ្លួនក្នុងថ្ងៃ Orientation នោះមែន តែនាងសម្រេចចិត្តថា មិនចូលប្រកួតវិញក្រោយទទួលបានព័ត៌មាន និងកាលវិភាគលម្អិតនៃការប្រកួតទាំងស្រុង។
តារាស្រីទម្រង់មុខពងក្រពើរូបនេះឱ្យដឹងទៀតថា កម្មវិធី Miss Cosmo មានអ្វីថ្មីប្លែកសម្រាប់ឱ្យនាង Challenge ខ្លួនឯង ដូច្នេះហើយទើបនាងចង់សាកល្បងប្រកួតកម្មវិធីនេះ។ ប៉ុន្តែដោយសារឆ្នាំនេះពេលវេលាមិនអំណោយផល នាងសង្ឃឹមថា នាងនឹងអាចចូលប្រកួតប្រជែងនៅឆ្នាំក្រោយទៀត។ ម៉្យាង នាងក៏ចង់ទុកពេលសម្រាប់ពង្រឹងសមត្ថភាពខ្លួនឯងឱ្យល្អប្រសើរជាងនេះផងដេរ។
ក្រៅពីកម្មវិធី Miss Cosmo Cambodia ស្រីស្អាត ខន សូរិយា ក៏សម្លឹងឃើញសក្កានុពលរបស់ Miss Universe ដូចគ្នា ដោយនាងសង្ឃឹមថា ខ្លួនឯងអាចនឹងចូលប្រកួតកម្មវិធីនេះក្នុងឆ្នាំណាមួយដែលស័ក្កសមសម្រាប់នាង ព្រោះមែនទែនទៅ សូរិយា ហាក់ដូចរៀងថ្មីសម្រាប់វិស័យបវរកញ្ញា តែនាងសប្បាយចិត្តទទួលយកការរៀនសូត្រថ្មីៗ ស្របពេលដែលវិស័យបវរកញ្ញា-បុរសឯកកំពុងរីកដុះដាលខ្លាំងរយៈពេលប៉ុន្មានឆ្នាំចុងក្រោយនេះ។
បន្ថែមពីលើនោះ សូរិយា មានគម្រោងការងារសិល្បៈជាច្រើនត្រៀមបង្ហាញជូនប្រិយមិត្តទស្សនិកជន ជាពិសេសស្នាដៃរឿងភាគថ្មីដែលកំពុងត្រៀមថតសម្រាប់ទូរទស្សន៍ទំនើបភីអិនអិន កុំភ្លេចរង់ចាំតាមដានទស្សនាទាំងអស់គ្នា៕
អត្ថបទ៖ រ៉ាត់ ចាន់ធីតា រូបភាព៖ ឃាង ទូច និង ភីអិនអិន