តាំងពីក្លាយទៅជាតារាចម្រៀងឯករាជ្យ តារាចម្រៀង សុគន្ធ និសា ហាក់ស្ងាត់ឈឹងពីសិល្បៈ ដោយឡែកថ្មីៗនេះនាងចំណាយប្រាក់ផ្ទាល់ខ្លួនដើម្បីផលិតបទចម្រៀងថ្មីបំបុកទីផ្សារខ្លួនឱ្យខ្លាំងឡើងវិញ ។

ក្រោយចាកចេញពីផលិតកម្ម ហង្សមាស សុគន្ធ និសា មិនបានស្វែងរក ផលិតកម្ម ច្រៀងដូចមុនទេ ក៏ប៉ុន្តែអ្នកនាង បែរជាផ្ដើមចំណាយលុយផ្ទាល់ខ្លួន ផលិតចម្រៀងថ្មីដោយខ្លួនឯង ដើម្បីពង្រឹងទីផ្សារ និងប្រជាប្រិយភាព។

ជាក់ស្ដែង នៅក្នុងឱកាសបុណ្យចូលឆ្នាំថ្មីនេះតារាចម្រៀង សុគន្ធ និសា ត្រូវចេញទៅ សហរដ្ឋអាមេរិក ជាមួយស្វាមីខ្លួន តែដោយសារត្រូវចូលរួមកម្មវិធីធំៗជាច្រើននាងសុខចិត្តផ្អាកការហោះហើរ និងបានចំណាយលុយផ្ទាល់ខ្លួនផលិតMVបទចម្រៀងថ្មីដ៏ទាក់ទាញបំបុកទីផ្សារចម្រៀង ។ 

MV ចម្រៀង « ចាក់ក្រឡេកទយ » របស់តារាចម្រៀង សុគន្ធ និសា និង រ៉ូលីន កំពុងផ្ទុះខ្លាំងនៅក្នុងវិស័យចម្រៀង ដោយនាងបានផ្លាស់ប្តូរខ្លួនឯងទាំងស្រុង ទាំងម៉ូដសក់ ការតុបតែងខ្លួន ចរិតលក្ខណៈ និងច្រៀងបែបស៊កសៀតជាមួយដៃគូ រ៉ូលីន ធ្វើឱ្យបទចម្រៀងនេះកាន់តែទទួលបានការចាប់អារម្មណ៍ពីមហាជន ។សុគន្ធ និសា បានសម្តែងនូវការត្រេអរជាខ្លាំងនៅពេលដែល MV ចម្រៀងមួយបទនេះផ្ទុះការចាប់អារម្មណ៍ខ្លាំងពីទស្សនិកជន នាងមិននឹកស្មានថាបទចម្រៀងខ្លួនផ្ទុះខ្លាំងដល់ថ្នាក់នេះទេ ពីព្រោះនាងខកខាននៅក្នុងការចេញបទចម្រៀងបែបនេះជាយូរមកហើយ ។

ក្នុងបទចម្រៀងថ្មីមួយបទនេះ សុគន្ធ និសា បានចំណាយថវិការផ្ទាល់ខ្លួនដើម្បីផលិតបទចម្រៀងនេះឡើង បើទោះបីជាក្នុង MV ចម្រៀងនេះបានចំណាយអស់ប្រាក់ច្រើនគួរសមក្នុងការផលិត តែនាងមិនសោកស្តាយនោះទេ ផ្ទុយទៅវិញនាងបែរជាសប្បាយ និងរំភើបចិត្តព្រោះបទចម្រៀងនេះមានអ្នកគាំទ្រខ្លាំងរហូតដល់ទៅរាប់លាននាក់ត្រឹមតែរយៈពេលមួយប្រព្រិចភ្នែក ។ ក្រៅពីបទចម្រៀងនេះអ្នកមាង ក៏ត្រៀមនឹងចេញបទចម្រៀងថ្មីៗជាបន្តបន្ទាប់របស់ខ្លួនផងដែរដើម្បីអបអរសាទរបុណ្យចុលឆ្នាំថ្មី ។

ជាមួយនិងការសប្បាយរីករាយនេះ អតីតតារាចម្រៀង របស់ផលិតកម្ម ហង្សមាស ខាងលើ ក៏មានគម្រោងនឹងចេញទៅ សហរដ្ឋអាមេរិក ជាថ្មីម្តងទៀតដែរជាមួយស្វាមីរបស់ខ្លួនក្នុងឱកាសបុណ្យចូលឆ្នាំថ្មី តែដោយសារការងារក្នុងស្រុកច្រើន នាងសុខចិត្តផ្អាកការហោះហើរ ហើយទទួលការងារទាំងនោះវិញ ។ ចាប់ពីដើមខែមេសាតទៅ នាងត្រូវចូលរួមកម្មវិធីសង្រ្កាន្តឆ្នាំថ្មី ប្រគំតន្រ្តីតាមខេត្តនានា...។

អត្ថបទ ៖ ម៉ា រីសា រូបភាព ៖ ភីអិនអិន និង ហ្វេសប៊ុក