ក្រុមហ៊ុន Smart Eden មានបំណងពង្រីកការនាំចេញផលិតផលកម្ពុជា ពី ១០ ទៅ ១៥មុខ ក្នុងឆ្នាំ២០២៥ នេះ ដែលរួមមានទាំងអង្ករ ម្រេច ស្ករត្នោត និងធ្យូងអនាម័យ ទៅកាន់ទីផ្សារអន្តរជាតិ។

នាថ្ងៃទី ១ ខែមេសា ឆ្នាំ ២០២៥ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជាមួយនឹងគណៈប្រតិភូក្រុមហ៊ុន Smart Eden ដឹកនាំដោយនាយកប្រតិបត្តិ លោក Laurent Strauch និងអ្នកឧកញ៉ា ហ៊ុន ឡាក់ បានជួបពិភាក្សាអំពី កិច្ចសហប្រតិបត្តិការក្នុងការផលិត និងការនាំចេញផលិតផលកម្ពុជាទៅកាន់ទីផ្សារបារាំង។

លោក Laurent Strauch នាយកប្រតិបត្តិក្រុមហ៊ុន Smart Eden បានគូសបញ្ជាក់ថា ក្រុមហ៊ុន Smart Eden បាននាំចេញគ្រាប់ស្វាយចន្ទី និងដំណាប់ស្វាយពីកម្ពុជាតាំងពីឆ្នាំ២០២៤ ហើយទទួលបានការគាំទ្រច្រើនពីអតិថិជនក្នុងប្រទេសបារាំង។

អាស្រ័យហេតុនេះ ក្រុមហ៊ុន មានបំណងពង្រីកការនាំចេញផលិតផលកម្ពុជា ប្រមាណពី ១០ ទៅ ១៥មុខបន្ថែមទៀត ក្នុងឆ្នាំ ២០២៥នេះ ដែលរួមមានទាំងអង្ករ ម្រេច ស្ករត្នោត និងធ្យូងអនាម័យ។

លើសពីនេះ ក្រុមហ៊ុន ក៏គ្រោងផលិតបឺរ ពីគ្រាប់ស្វាយចន្ទី ដើម្បីនាំចេញទៅបារាំងផងដែរ។គួរបញ្ជាក់ថា ក្រុមហ៊ុន Smart Eden គឺជាក្រុមហ៊ុនចែកចាយផលិតផលដ៏ធំ បច្ចុប្បន្នមានបណ្តាញលក់ជាង ៦ពាន់ទីតាំងនៅទូទាំងប្រទេសបារាំង៕
 

អត្ថបទ៖ ងួន សុភ័ត្រ្តា រូបភាព៖ ឯកសារ + ក្រសួងឧស្សាហកម្ម