សមាគមអ្នកនាំចេញ និងផលិតអាហារសមុទ្រវៀតណាម បញ្ជាក់ថា ឧស្សាហកម្មនាំចេញបង្គារបស់វៀតណាម បានចាប់ផ្ដើមស្ទុះឡើងនៅដើមឆ្នាំ ២០២៥ ជាមួយនឹងកំណើនគួរឲ្យចាប់អារម្មណ៍ ហើយក្លាយជាតួអង្គសំខាន់ នៅក្នុងទីផ្សារនាំចេញអាហារសមុទ្រក្នុងស្រុក។ទិន្នន័យពីសមាគមអ្នកនាំចេញ និងផលិតអាហារសមុទ្រវៀតណាម បង្ហាញថា ផលិតផលបង្គា បានកត់ត្រាការនាំចេញសរុប ៥៤២លានដុល្លារអាមេរិក ដែលជាតួលេខមួយខ្ពស់ ក្នុងចំណោមការនាំចេញគ្រឿងសមុទ្រសរុប ១ពាន់ ៤រយលានដុល្លារអាមេរិក។

ការបន្តកំណើនដ៏រឹងមាំនេះ ត្រូវបានសន្មតថា បានមកពីការប្រើប្រាស់ប្រកបដោយប្រសិទ្ធភាពនូវ កិច្ចព្រមព្រៀងពាណិជ្ជកម្មសេរីរបស់វៀតណាម ការពង្រីកទីផ្សារយុទ្ធសាស្ត្រ និងការបង្កើនតម្លៃបន្ថែម តាមរយៈការដំណើរការយ៉ាងស៊ីជម្រៅ។បណ្តាញកិច្ចព្រមព្រៀងពាណិជ្ជកម្មសេរីរបស់វៀតណាម ជាមួយជាង ៦០ប្រទេស និងសេដ្ឋកិច្ច បានដើរតួយ៉ាងសំខាន់ ក្នុងការបង្កើតមូលដ្ឋានគ្រឹះដ៏រឹងមាំ សម្រាប់អាជីវកម្មអាហារសមុទ្រ ដើម្បីពង្រីកទៅកាន់ទីផ្សារអន្តរជាតិ។

អគ្គលេខាធិការ សមាគមអ្នកនាំចេញ និងផលិតអាហារសមុទ្រវៀតណាម បានគូសបញ្ជាក់ថា អាហារសមុទ្ររបស់វៀតណាមឥឡូវនេះ កំពុងឈានទៅដល់ទីផ្សារជាង ១៦០ នៅទូទាំងពិភពលោក ហើយក្នុងចំណោមកិច្ចព្រមព្រៀងសំខាន់ៗបំផុតគឺ កិច្ចព្រមព្រៀងពាណិជ្ជកម្មសេរីវៀតណាម-សហភាពអឺរ៉ុប ដែលអ្នកជំនាញជឿថា មានសក្តានុពលយ៉ាងសំខាន់ ក្នុងការពង្រីកការនាំចេញបង្គាទៅកាន់សហភាពអឺរ៉ុប។

ទោះជាយ៉ាងណាក៏ សមាគម ចង្អុលបង្ហាញថា ការពង្រីកទៅកាន់ទីផ្សារថ្មី ក៏មកជាមួយបញ្ហាប្រឈមផងដែរ ខណៈឧស្សាហកម្មអាហារសមុទ្រ ប្រឈមមុខនឹងការប្រកួតប្រជែងយ៉ាងតឹងរ៉ឹងពីប្រទេសផលិតបង្គាឈានមុខគេ ដូចជាអេក្វាឌ័រ ឥណ្ឌា និងថៃ៕
 

អត្ថបទ៖ ងួន សុភ័ត្រ្តា រូបភាព៖ ឯកសារ